| Library / Tipiṭaka / තිපිටක • Tipiṭaka / මජ්‌ඣිමනිකාය (අට්‌ඨකථා) • Majjhimanikāya (aṭṭhakathā) |
8. බාහිතිකසුත්‌තවණ්‌ණනා
8. Bāhitikasuttavaṇṇanā
358. එවං මෙ සුතන්‌ති බාහිතිකසුත්‌තං. තත්‌ථ එකපුණ්‌ඩරීකං නාගන්‌ති එවංනාමකං හත්‌ථිං. තස්‌ස කිර ඵාසුකානං උපරි තාලඵලමත්‌තං පණ්‌ඩරට්‌ඨානං අත්‌ථි , තෙනස්‌ස එකපුණ්‌ඩරීකොති නාමං අකංසු. සිරිවඩ්‌ඪං මහාමත්‌තන්‌ති පච්‌චෙකහත්‌ථිං අභිරුහිත්‌වා කථාඵාසුකත්‌ථං සද්‌ධිං ගච්‌ඡන්‌තං එවංනාමකං මහාමත්‌තං. ආයස්‌මානොති එත්‌ථ නොති පුච්‌ඡාය නිපාතො. මහාමත්‌තො ථෙරස්‌ස සඞ්‌ඝාටිපත්‌තධාරණාකාරං සල්‌ලක්‌ඛෙත්‌වා ‘‘එවං, මහාරාජා’’ති ආහ.
358.Evaṃme sutanti bāhitikasuttaṃ. Tattha ekapuṇḍarīkaṃ nāganti evaṃnāmakaṃ hatthiṃ. Tassa kira phāsukānaṃ upari tālaphalamattaṃ paṇḍaraṭṭhānaṃ atthi , tenassa ekapuṇḍarīkoti nāmaṃ akaṃsu. Sirivaḍḍhaṃ mahāmattanti paccekahatthiṃ abhiruhitvā kathāphāsukatthaṃ saddhiṃ gacchantaṃ evaṃnāmakaṃ mahāmattaṃ. Āyasmānoti ettha noti pucchāya nipāto. Mahāmatto therassa saṅghāṭipattadhāraṇākāraṃ sallakkhetvā ‘‘evaṃ, mahārājā’’ti āha.
359. ඔපාරම්‌භොති උපාරම්‌භං දොසං ආරොපනාරහො. කිං පුච්‌ඡාමීති රාජා පුච්‌ඡති. සුන්‌දරිවත්‌ථුස්‌මිං උප්‌පන්‌නමිදං සුත්‌තං, තං පුච්‌ඡාමීති පුච්‌ඡති. යඤ්‌හි මයං, භන්‌තෙති, භන්‌තෙ, යං මයං විඤ්‌ඤූහීති ඉදං පදං ගහෙත්‌වා පඤ්‌හෙන පරිපූරෙතුං නාසක්‌ඛිම්‌හා, තං කාරණං ආයස්‌මතා එවං වදන්‌තෙන පරිපූරිතං.
359.Opārambhoti upārambhaṃ dosaṃ āropanāraho. Kiṃ pucchāmīti rājā pucchati. Sundarivatthusmiṃ uppannamidaṃ suttaṃ, taṃ pucchāmīti pucchati. Yañhi mayaṃ, bhanteti, bhante, yaṃ mayaṃ viññūhīti idaṃ padaṃ gahetvā pañhena paripūretuṃ nāsakkhimhā, taṃ kāraṇaṃ āyasmatā evaṃ vadantena paripūritaṃ.
360. අකුසලොති අකොසල්‌ලසම්‌භූතො. සාවජ්‌ජොති සදොසො. සබ්‍යාබජ්‌ඣොති සදුක්‌ඛො. දුක්‌ඛවිපාකොති ඉධ නිස්‌සන්‌දවිපාකො කථිතො. තස්‌සාති තස්‌ස එවං අත්‌තබ්‍යාබාධාදීනං අත්‌ථාය පවත්‌තකායසමාචාරස්‌ස.
360.Akusaloti akosallasambhūto. Sāvajjoti sadoso. Sabyābajjhoti sadukkho. Dukkhavipākoti idha nissandavipāko kathito. Tassāti tassa evaṃ attabyābādhādīnaṃ atthāya pavattakāyasamācārassa.
සබ්‌බාකුසලධම්‌මපහීනො ඛො, මහාරාජ, තථාගතො කුසලධම්‌මසමන්‌නාගතොති එත්‌ථ සබ්‌බෙසංයෙව අකුසලානං ධම්‌මානං පහානං වණ්‌ණෙතීති. ආම වණ්‌ණෙතීති වුත්‌තෙ යථා පුච්‌ඡා, තථා අත්‌ථො වුත්‌තො භවෙය්‍ය. එවං බ්‍යාකරණං පන න භාරියං. අප්‌පහීනඅකුසලොපි හි පහානං වණ්‌ණෙය්‍ය, භගවා පන පහීනාකුසලතාය යථාකාරී තථාවාදීති දස්‌සෙතුං එවං බ්‍යාකාසි. සුක්‌කපක්‌ඛෙපි එසෙව නයො.
Sabbākusaladhammapahīno kho, mahārāja, tathāgato kusaladhammasamannāgatoti ettha sabbesaṃyeva akusalānaṃ dhammānaṃ pahānaṃ vaṇṇetīti. Āma vaṇṇetīti vutte yathā pucchā, tathā attho vutto bhaveyya. Evaṃ byākaraṇaṃ pana na bhāriyaṃ. Appahīnaakusalopi hi pahānaṃ vaṇṇeyya, bhagavā pana pahīnākusalatāya yathākārī tathāvādīti dassetuṃ evaṃ byākāsi. Sukkapakkhepi eseva nayo.
362. බාහිතිකාති බාහිතිරට්‌ඨෙ උට්‌ඨිතවත්‌ථස්‌සෙතං නාමං. සොළසසමා ආයාමෙනාති ආයාමෙන සමසොළසහත්‌ථා. අට්‌ඨසමා විත්‌ථාරෙනාති විත්‌ථාරෙන සමඅට්‌ඨහත්‌ථා.
362.Bāhitikāti bāhitiraṭṭhe uṭṭhitavatthassetaṃ nāmaṃ. Soḷasasamā āyāmenāti āyāmena samasoḷasahatthā. Aṭṭhasamā vitthārenāti vitthārena samaaṭṭhahatthā.
363. භගවතො පාදාසීති භගවතො නිය්‍යාතෙසි. දත්‌වා ච පන ගන්‌ධකුටියං විතානං කත්‌වා බන්‌ධි. තතො පට්‌ඨාය ගන්‌ධකුටි භිය්‍යොසොමත්‌තාය සොභි. සෙසං සබ්‌බත්‌ථ උත්‌තානමෙව. නෙය්‍යපුග්‌ගලස්‌ස පන වසෙන අයං දෙසනා නිට්‌ඨිතාති.
363.Bhagavatopādāsīti bhagavato niyyātesi. Datvā ca pana gandhakuṭiyaṃ vitānaṃ katvā bandhi. Tato paṭṭhāya gandhakuṭi bhiyyosomattāya sobhi. Sesaṃ sabbattha uttānameva. Neyyapuggalassa pana vasena ayaṃ desanā niṭṭhitāti.
පපඤ්‌චසූදනියා මජ්‌ඣිමනිකායට්‌ඨකථාය
Papañcasūdaniyā majjhimanikāyaṭṭhakathāya
බාහිතිකසුත්‌තවණ්‌ණනා නිට්‌ඨිතා.
Bāhitikasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / මජ්‌ඣිමනිකාය • Majjhimanikāya / 8. බාහිතිකසුත්‌තං • 8. Bāhitikasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / මජ්‌ඣිමනිකාය (ටීකා) • Majjhimanikāya (ṭīkā) / 8. බාහිතිකසුත්‌තවණ්‌ණනා • 8. Bāhitikasuttavaṇṇanā
