| Library / Tipiṭaka / তিপিটক • Tipiṭaka / উদানপাল়ি • Udānapāḷi |
১০. বাহিযসুত্তং
10. Bāhiyasuttaṃ
১০. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন বাহিযো দারুচীরিযো সুপ্পারকে পটিৰসতি সমুদ্দতীরে সক্কতো গরুকতো মানিতো পূজিতো অপচিতো লাভী চীৰরপিণ্ডপাতসেনাসনগিলানপচ্চযভেসজ্জপরিক্খারানং। অথ খো বাহিযস্স দারুচীরিযস্স রহোগতস্স পটিসল্লীনস্স এৰং চেতসো পরিৰিতক্কো উদপাদি – ‘‘যে খো কেচি লোকে অরহন্তো ৰা অরহত্তমগ্গং ৰা সমাপন্না, অহং তেসং অঞ্ঞতরো’’তি।
10. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bāhiyo dārucīriyo suppārake paṭivasati samuddatīre sakkato garukato mānito pūjito apacito lābhī cīvarapiṇḍapātasenāsanagilānapaccayabhesajjaparikkhārānaṃ. Atha kho bāhiyassa dārucīriyassa rahogatassa paṭisallīnassa evaṃ cetaso parivitakko udapādi – ‘‘ye kho keci loke arahanto vā arahattamaggaṃ vā samāpannā, ahaṃ tesaṃ aññataro’’ti.
অথ খো বাহিযস্স দারুচীরিযস্স পুরাণসালোহিতা দেৰতা অনুকম্পিকা অত্থকামা বাহিযস্স দারুচীরিযস্স চেতসা চেতোপরিৰিতক্কমঞ্ঞায যেন বাহিযো দারুচীরিযো তেনুপসঙ্কমি; উপসঙ্কমিত্ৰা বাহিযং দারুচীরিযং এতদৰোচ – ‘‘নেৰ খো ত্ৰং , বাহিয, অরহা, নাপি অরহত্তমগ্গং ৰা সমাপন্নো। সাপি তে পটিপদা নত্থি যায ত্ৰং অরহা ৰা অস্স 1 অরহত্তমগ্গং ৰা সমাপন্নো’’তি।
Atha kho bāhiyassa dārucīriyassa purāṇasālohitā devatā anukampikā atthakāmā bāhiyassa dārucīriyassa cetasā cetoparivitakkamaññāya yena bāhiyo dārucīriyo tenupasaṅkami; upasaṅkamitvā bāhiyaṃ dārucīriyaṃ etadavoca – ‘‘neva kho tvaṃ , bāhiya, arahā, nāpi arahattamaggaṃ vā samāpanno. Sāpi te paṭipadā natthi yāya tvaṃ arahā vā assa 2 arahattamaggaṃ vā samāpanno’’ti.
‘‘অথ কে চরহি সদেৰকে লোকে অরহন্তো ৰা অরহত্তমগ্গং ৰা সমাপন্নো’’তি? ‘‘অত্থি, বাহিয, উত্তরেসু জনপদেসু 3 সাৰত্থি নাম নগরং। তত্থ সো ভগৰা এতরহি ৰিহরতি অরহং সম্মাসম্বুদ্ধো। সো হি, বাহিয, ভগৰা অরহা চেৰ অরহত্তায চ ধম্মং দেসেতী’’তি।
‘‘Atha ke carahi sadevake loke arahanto vā arahattamaggaṃ vā samāpanno’’ti? ‘‘Atthi, bāhiya, uttaresu janapadesu 4 sāvatthi nāma nagaraṃ. Tattha so bhagavā etarahi viharati arahaṃ sammāsambuddho. So hi, bāhiya, bhagavā arahā ceva arahattāya ca dhammaṃ desetī’’ti.
অথ খো বাহিযো দারুচীরিযো তায দেৰতায সংৰেজিতো তাৰদেৰ সুপ্পারকম্হা পক্কামি। সব্বত্থ একরত্তিপরিৰাসেন যেন সাৰত্থি জেতৰনং অনাথপিণ্ডিকস্স আরামো তেনুপসঙ্কমি। তেন খো পন সমযেন সম্বহুলা ভিক্খূ অব্ভোকাসে চঙ্কমন্তি। অথ খো বাহিযো দারুচীরিযো যেন তে ভিক্খূ তেনুপসঙ্কমি; উপসঙ্কমিত্ৰা তে ভিক্খূ এতদৰোচ – ‘‘কহং নু খো, ভন্তে, এতরহি ভগৰা ৰিহরতি অরহং সম্মাসম্বুদ্ধো? দস্সনকামম্হা মযং তং ভগৰন্তং অরহন্তং সম্মাসম্বুদ্ধ’’ন্তি। ‘‘অন্তরঘরং পৰিট্ঠো খো, বাহিয, ভগৰা পিণ্ডাযা’’তি।
Atha kho bāhiyo dārucīriyo tāya devatāya saṃvejito tāvadeva suppārakamhā pakkāmi. Sabbattha ekarattiparivāsena yena sāvatthi jetavanaṃ anāthapiṇḍikassa ārāmo tenupasaṅkami. Tena kho pana samayena sambahulā bhikkhū abbhokāse caṅkamanti. Atha kho bāhiyo dārucīriyo yena te bhikkhū tenupasaṅkami; upasaṅkamitvā te bhikkhū etadavoca – ‘‘kahaṃ nu kho, bhante, etarahi bhagavā viharati arahaṃ sammāsambuddho? Dassanakāmamhā mayaṃ taṃ bhagavantaṃ arahantaṃ sammāsambuddha’’nti. ‘‘Antaragharaṃ paviṭṭho kho, bāhiya, bhagavā piṇḍāyā’’ti.
অথ খো বাহিযো দারুচীরিযো তরমানরূপো জেতৰনা নিক্খমিত্ৰা সাৰত্থিং পৰিসিত্ৰা অদ্দস ভগৰন্তং সাৰত্থিযং পিণ্ডায চরন্তং পাসাদিকং পসাদনীযং সন্তিন্দ্রিযং সন্তমানসং উত্তমদমথসমথমনুপ্পত্তং দন্তং গুত্তং যতিন্দ্রিযং নাগং। দিস্ৰান যেন ভগৰা তেনুপসঙ্কমি; উপসঙ্কমিত্ৰা ভগৰতো পাদে সিরসা নিপতিত্ৰা ভগৰন্তং এতদৰোচ – ‘‘দেসেতু মে, ভন্তে ভগৰা, ধম্মং; দেসেতু, সুগতো, ধম্মং, যং মমস্স দীঘরত্তং হিতায সুখাযা’’তি। এৰং ৰুত্তে, ভগৰা বাহিযং দারুচীরিযং এতদৰোচ – ‘‘অকালো খো তাৰ, বাহিয, অন্তরঘরং পৰিট্ঠম্হা পিণ্ডাযা’’তি।
Atha kho bāhiyo dārucīriyo taramānarūpo jetavanā nikkhamitvā sāvatthiṃ pavisitvā addasa bhagavantaṃ sāvatthiyaṃ piṇḍāya carantaṃ pāsādikaṃ pasādanīyaṃ santindriyaṃ santamānasaṃ uttamadamathasamathamanuppattaṃ dantaṃ guttaṃ yatindriyaṃ nāgaṃ. Disvāna yena bhagavā tenupasaṅkami; upasaṅkamitvā bhagavato pāde sirasā nipatitvā bhagavantaṃ etadavoca – ‘‘desetu me, bhante bhagavā, dhammaṃ; desetu, sugato, dhammaṃ, yaṃ mamassa dīgharattaṃ hitāya sukhāyā’’ti. Evaṃ vutte, bhagavā bāhiyaṃ dārucīriyaṃ etadavoca – ‘‘akālo kho tāva, bāhiya, antaragharaṃ paviṭṭhamhā piṇḍāyā’’ti.
দুতিযম্পি খো বাহিযো দারুচীরিযো ভগৰন্তং এতদৰোচ – ‘‘দুজ্জানং খো পনেতং, ভন্তে, ভগৰতো ৰা জীৰিতন্তরাযানং, ময্হং ৰা জীৰিতন্তরাযানং । দেসেতু মে, ভন্তে ভগৰা, ধম্মং; দেসেতু, সুগতো, ধম্মং, যং মমস্স দীঘরত্তং হিতায সুখাযা’’তি। দুতিযম্পি খো ভগৰা বাহিযং দারুচীরিযং এতদৰোচ – ‘‘অকালো খো তাৰ, বাহিয, অন্তরঘরং পৰিট্ঠম্হা পিণ্ডাযা’’তি।
Dutiyampi kho bāhiyo dārucīriyo bhagavantaṃ etadavoca – ‘‘dujjānaṃ kho panetaṃ, bhante, bhagavato vā jīvitantarāyānaṃ, mayhaṃ vā jīvitantarāyānaṃ . Desetu me, bhante bhagavā, dhammaṃ; desetu, sugato, dhammaṃ, yaṃ mamassa dīgharattaṃ hitāya sukhāyā’’ti. Dutiyampi kho bhagavā bāhiyaṃ dārucīriyaṃ etadavoca – ‘‘akālo kho tāva, bāhiya, antaragharaṃ paviṭṭhamhā piṇḍāyā’’ti.
ততিযম্পি খো বাহিযো দারুচীরিযো ভগৰন্তং এতদৰোচ – ‘‘দুজ্জানং খো পনেতং, ভন্তে, ভগৰতো ৰা জীৰিতন্তরাযানং, ময্হং ৰা জীৰিতন্তরাযানং। দেসেতু মে ভন্তে ভগৰা, ধম্মং; দেসেতু, সুগতো, ধম্মং, যং মমস্স দীঘরত্তং হিতায সুখাযা’’তি।
Tatiyampi kho bāhiyo dārucīriyo bhagavantaṃ etadavoca – ‘‘dujjānaṃ kho panetaṃ, bhante, bhagavato vā jīvitantarāyānaṃ, mayhaṃ vā jīvitantarāyānaṃ. Desetu me bhante bhagavā, dhammaṃ; desetu, sugato, dhammaṃ, yaṃ mamassa dīgharattaṃ hitāya sukhāyā’’ti.
‘‘তস্মাতিহ তে, বাহিয, এৰং সিক্খিতব্বং – ‘দিট্ঠে দিট্ঠমত্তং ভৰিস্সতি, সুতে সুতমত্তং ভৰিস্সতি, মুতে মুতমত্তং ভৰিস্সতি, ৰিঞ্ঞাতে ৰিঞ্ঞাতমত্তং ভৰিস্সতী’তি। এৰঞ্হি তে, বাহিয, সিক্খিতব্বং। যতো খো তে, বাহিয, দিট্ঠে দিট্ঠমত্তং ভৰিস্সতি, সুতে সুতমত্তং ভৰিস্সতি, মুতে মুতমত্তং ভৰিস্সতি, ৰিঞ্ঞাতে ৰিঞ্ঞাতমত্তং ভৰিস্সতি, ততো ত্ৰং, বাহিয, ন তেন; যতো ত্ৰং, বাহিয, ন তেন ততো ত্ৰং, বাহিয, ন তত্থ ; যতো ত্ৰং, বাহিয, ন তত্থ, ততো ত্ৰং, বাহিয, নেৰিধ ন হুরং ন উভযমন্তরেন। এসেৰন্তো দুক্খস্সা’’তি।
‘‘Tasmātiha te, bāhiya, evaṃ sikkhitabbaṃ – ‘diṭṭhe diṭṭhamattaṃ bhavissati, sute sutamattaṃ bhavissati, mute mutamattaṃ bhavissati, viññāte viññātamattaṃ bhavissatī’ti. Evañhi te, bāhiya, sikkhitabbaṃ. Yato kho te, bāhiya, diṭṭhe diṭṭhamattaṃ bhavissati, sute sutamattaṃ bhavissati, mute mutamattaṃ bhavissati, viññāte viññātamattaṃ bhavissati, tato tvaṃ, bāhiya, na tena; yato tvaṃ, bāhiya, na tena tato tvaṃ, bāhiya, na tattha ; yato tvaṃ, bāhiya, na tattha, tato tvaṃ, bāhiya, nevidha na huraṃ na ubhayamantarena. Esevanto dukkhassā’’ti.
অথ খো বাহিযস্স দারুচীরিযস্স ভগৰতো ইমায সংখিত্তায ধম্মদেসনায তাৰদেৰ অনুপাদায আসৰেহি চিত্তং ৰিমুচ্চি।
Atha kho bāhiyassa dārucīriyassa bhagavato imāya saṃkhittāya dhammadesanāya tāvadeva anupādāya āsavehi cittaṃ vimucci.
অথ খো ভগৰা বাহিযং দারুচীরিযং ইমিনা সংখিত্তেন ওৰাদেন ওৰদিত্ৰা পক্কামি। অথ খো অচিরপক্কন্তস্স ভগৰতো বাহিযং দারুচীরিযং গাৰী তরুণৰচ্ছা অধিপতিত্ৰা 5 জীৰিতা ৰোরোপেসি।
Atha kho bhagavā bāhiyaṃ dārucīriyaṃ iminā saṃkhittena ovādena ovaditvā pakkāmi. Atha kho acirapakkantassa bhagavato bāhiyaṃ dārucīriyaṃ gāvī taruṇavacchā adhipatitvā 6 jīvitā voropesi.
অথ খো ভগৰা সাৰত্থিযং পিণ্ডায চরিত্ৰা পচ্ছাভত্তং পিণ্ডপাতপটিক্কন্তো সম্বহুলেহি ভিক্খূহি সদ্ধিং নগরম্হা নিক্খমিত্ৰা অদ্দস বাহিযং দারুচীরিযং কালঙ্কতং 7; দিস্ৰান ভিক্খূ আমন্তেসি – ‘‘গণ্হথ, ভিক্খৰে, বাহিযস্স দারুচীরিযস্স সরীরকং; মঞ্চকং আরোপেত্ৰা নীহরিত্ৰা ঝাপেথ; থূপঞ্চস্স করোথ। সব্রহ্মচারী ৰো, ভিক্খৰে, কালঙ্কতো’’তি।
Atha kho bhagavā sāvatthiyaṃ piṇḍāya caritvā pacchābhattaṃ piṇḍapātapaṭikkanto sambahulehi bhikkhūhi saddhiṃ nagaramhā nikkhamitvā addasa bāhiyaṃ dārucīriyaṃ kālaṅkataṃ 8; disvāna bhikkhū āmantesi – ‘‘gaṇhatha, bhikkhave, bāhiyassa dārucīriyassa sarīrakaṃ; mañcakaṃ āropetvā nīharitvā jhāpetha; thūpañcassa karotha. Sabrahmacārī vo, bhikkhave, kālaṅkato’’ti.
‘‘এৰং, ভন্তে’’তি খো তে ভিক্খূ ভগৰতো পটিস্সুত্ৰা বাহিযস্স দারুচীরিযস্স সরীরকং মঞ্চকং আরোপেত্ৰা নীহরিত্ৰা ঝাপেত্ৰা থূপঞ্চস্স কত্ৰা যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু। একমন্তং নিসিন্না খো তে ভিক্খূ ভগৰন্তং এতদৰোচুং – ‘‘দড্ঢং, ভন্তে, বাহিযস্স দারুচীরিযস্স সরীরং, থূপো চস্স কতো। তস্স কা গতি, কো অভিসম্পরাযো’’তি? ‘‘পণ্ডিতো, ভিক্খৰে, বাহিযো দারুচীরিযো পচ্চপাদি ধম্মস্সানুধম্মং; ন চ মং ধম্মাধিকরণং ৰিহেসেসি। পরিনিব্বুতো, ভিক্খৰে, বাহিযো দারুচীরিযো’’তি।
‘‘Evaṃ, bhante’’ti kho te bhikkhū bhagavato paṭissutvā bāhiyassa dārucīriyassa sarīrakaṃ mañcakaṃ āropetvā nīharitvā jhāpetvā thūpañcassa katvā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘daḍḍhaṃ, bhante, bāhiyassa dārucīriyassa sarīraṃ, thūpo cassa kato. Tassa kā gati, ko abhisamparāyo’’ti? ‘‘Paṇḍito, bhikkhave, bāhiyo dārucīriyo paccapādi dhammassānudhammaṃ; na ca maṃ dhammādhikaraṇaṃ vihesesi. Parinibbuto, bhikkhave, bāhiyo dārucīriyo’’ti.
অথ খো ভগৰা এতমত্থং ৰিদিত্ৰা তাযং ৰেলাযং ইমং উদানং উদানেসি –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘যত্থ আপো চ পথৰী, তেজো ৰাযো ন গাধতি।
‘‘Yattha āpo ca pathavī, tejo vāyo na gādhati;
ন তত্থ সুক্কা জোতন্তি, আদিচ্চো নপ্পকাসতি।
Na tattha sukkā jotanti, ādicco nappakāsati;
ন তত্থ চন্দিমা ভাতি, তমো তত্থ ন ৰিজ্জতি॥
Na tattha candimā bhāti, tamo tattha na vijjati.
অথ রূপা অরূপা চ, সুখদুক্খা পমুচ্চতী’’তি॥ দসমং।
Atha rūpā arūpā ca, sukhadukkhā pamuccatī’’ti. dasamaṃ;
বোধিৰগ্গো পঠমো নিট্ঠিতো।
Bodhivaggo paṭhamo niṭṭhito.
তস্সুদ্দানং –
Tassuddānaṃ –
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / উদান-অট্ঠকথা • Udāna-aṭṭhakathā / ১০. বাহিযসুত্তৰণ্ণনা • 10. Bāhiyasuttavaṇṇanā
