| Library / Tipiṭaka / д̇ибидага • Tipiṭaka / уд̣̇аана-адтагат̇аа • Udāna-aṭṭhakathā |
10. б̣аахияасуд̇д̇аван̣н̣анаа
10. Bāhiyasuttavaṇṇanā
10. д̣̇асамз б̣аахияод̇и д̇асса наамам̣. д̣̇ааружийрияод̇и д̣̇аарумаяажийро. суббаарагзд̇и звам̣наамагз бадданз васад̇и. го банааяам̣ б̣аахияо, гат̇ан̃жа д̣̇ааружийрияо ахоси, гат̇ам̣ суббаарагз бадданз бадивасад̇ийд̇и?
10. Dasame bāhiyoti tassa nāmaṃ. Dārucīriyoti dārumayacīro. Suppāraketi evaṃnāmake paṭṭane vasati. Ko panāyaṃ bāhiyo, kathañca dārucīriyo ahosi, kathaṃ suppārake paṭṭane paṭivasatīti?
д̇ад̇рааяам̣ анубуб̣б̣ийгат̇аа – ид̇о гира габбасад̇асахассамад̇т̇агз бад̣̇умуд̇д̇арасаммаасамб̣уд̣̇д̇хагаалз зго гулабуд̇д̇о хам̣савад̇ийнаг̇арз д̣̇асаб̣аласса д̇хаммад̣̇зсанам̣ сун̣анд̇о сад̇т̇аарам̣ згам̣ бхигкум̣ киббаабхин̃н̃аанам̣ зд̇ад̣̇аг̇г̇з табзнд̇ам̣ д̣̇исваа ‘‘махаа вад̇ааяам̣ бхигку, яо сад̇т̇аараа звам̣ зд̇ад̣̇аг̇г̇з табийяад̇и, ахо вад̇аахамби анааг̇ад̇з зваруубасса саммаасамб̣уд̣̇д̇хасса саасанз баб̣б̣аж̇ид̇ваа сад̇т̇аараа зд̣̇исз таанз зд̇ад̣̇аг̇г̇з табзд̇аб̣б̣о бхавзяяам̣ яат̇ааяам̣ бхигкуу’’д̇и д̇ам̣ таананд̇арам̣ бад̇т̇зд̇ваа д̇ад̣̇ануруубам̣ ад̇хигаарагаммам̣ гад̇ваа яааваж̇ийвам̣ бун̃н̃ам̣ гад̇ваа саг̇г̇абарааяан̣о худ̇ваа д̣̇звамануссзсу сам̣саранд̇о гассабад̣̇асаб̣аласса саасанз баб̣б̣аж̇ид̇ваа барибун̣н̣асийло саман̣ад̇хаммам̣ гаронд̇ова ж̇ийвид̇агкаяам̣ бад̇ваа д̣̇звалогз ниб̣б̣ад̇д̇и. со згам̣ б̣уд̣̇д̇ханд̇арам̣ д̣̇звалогз васид̇ваа имасмим̣ б̣уд̣̇д̇хуббаад̣̇з б̣аахияарадтз гулаг̇зхз бадисанд̇хим̣ г̇ан̣хи, д̇ам̣ б̣аахияарадтз ж̇аад̇ад̇д̇аа б̣аахияод̇и сан̃ж̇ааним̣су. со ваяаббад̇д̇о гхарааваасам̣ васанд̇о ван̣иж̇ж̇ад̇т̇ааяа б̣ахуунам̣ бхан̣д̣аанам̣ наавам̣ буурзд̇ваа самуд̣̇д̣̇ам̣ бависид̇ваа абараабарам̣ сан̃жаранд̇о сад̇д̇а ваарз сад̣̇д̇хим̣язва барисааяа ад̇д̇ано наг̇арам̣ убаг̇ан̃чи.
Tatrāyaṃ anupubbīkathā – ito kira kappasatasahassamatthake padumuttarasammāsambuddhakāle eko kulaputto haṃsavatīnagare dasabalassa dhammadesanaṃ suṇanto satthāraṃ ekaṃ bhikkhuṃ khippābhiññānaṃ etadagge ṭhapentaṃ disvā ‘‘mahā vatāyaṃ bhikkhu, yo satthārā evaṃ etadagge ṭhapīyati, aho vatāhampi anāgate evarūpassa sammāsambuddhassa sāsane pabbajitvā satthārā edise ṭhāne etadagge ṭhapetabbo bhaveyyaṃ yathāyaṃ bhikkhū’’ti taṃ ṭhānantaraṃ patthetvā tadanurūpaṃ adhikārakammaṃ katvā yāvajīvaṃ puññaṃ katvā saggaparāyaṇo hutvā devamanussesu saṃsaranto kassapadasabalassa sāsane pabbajitvā paripuṇṇasīlo samaṇadhammaṃ karontova jīvitakkhayaṃ patvā devaloke nibbatti. So ekaṃ buddhantaraṃ devaloke vasitvā imasmiṃ buddhuppāde bāhiyaraṭṭhe kulagehe paṭisandhiṃ gaṇhi, taṃ bāhiyaraṭṭhe jātattā bāhiyoti sañjāniṃsu. So vayappatto gharāvāsaṃ vasanto vaṇijjatthāya bahūnaṃ bhaṇḍānaṃ nāvaṃ pūretvā samuddaṃ pavisitvā aparāparaṃ sañcaranto satta vāre saddhiṃyeva parisāya attano nagaraṃ upagañchi.
адтамз ваарз бана ‘‘суван̣н̣абхуумим̣ г̇амиссаамий’’д̇и ааробид̇абхан̣д̣о наавам̣ абхирухи. нааваа махаасамуд̣̇д̣̇ам̣ аж̇жхог̇аахзд̇ваа ижчид̇ад̣̇зсам̣ абад̇ваава самуд̣̇д̣̇амаж̇жхз вибаннаа. махааж̇ано мажчагажчабабхагко ахоси. б̣аахияо бана згам̣ нааваапалагам̣ г̇ахзд̇ваа д̇аранд̇о уумивзг̇зна манд̣̇аманд̣̇ам̣ кибамаано бхассид̇ваа самуд̣̇д̣̇з бад̇ид̇ад̇д̇аа ж̇аад̇аруубзнзва самуд̣̇д̣̇ад̇ийрз нибанно. бариссамам̣ винод̣̇зд̇ваа ассаасамад̇д̇ам̣ лабхид̇ваа удтааяа лаж̇ж̇ааяа г̇умб̣анд̇арам̣ бависид̇ваа ажчаад̣̇анам̣ ан̃н̃ам̣ гин̃жи абассанд̇о агганаал̣аани чинд̣̇ид̇ваа ваагзхи баливзтзд̇ваа ниваасанабаавуран̣аани гад̇ваа ажчаад̣̇зси. гзжи бана ‘‘д̣̇аарупалагаани виж̇жхид̇ваа ваагзна аавун̣ид̇ваа ниваасанабаавуран̣ам̣ гад̇ваа ажчаад̣̇зсий’’д̇и вад̣̇анд̇и. звам̣ саб̣б̣ат̇ааби д̣̇аарумаяажийрад̇хаарид̇ааяа ‘‘д̣̇ааружийрияо’’д̇и буримавохаарзна ‘‘б̣аахияо’’д̇и жа бан̃н̃ааяид̇т̇а.
Aṭṭhame vāre pana ‘‘suvaṇṇabhūmiṃ gamissāmī’’ti āropitabhaṇḍo nāvaṃ abhiruhi. Nāvā mahāsamuddaṃ ajjhogāhetvā icchitadesaṃ apatvāva samuddamajjhe vipannā. Mahājano macchakacchapabhakkho ahosi. Bāhiyo pana ekaṃ nāvāphalakaṃ gahetvā taranto ūmivegena mandamandaṃ khipamāno bhassitvā samudde patitattā jātarūpeneva samuddatīre nipanno. Parissamaṃ vinodetvā assāsamattaṃ labhitvā uṭṭhāya lajjāya gumbantaraṃ pavisitvā acchādanaṃ aññaṃ kiñci apassanto akkanāḷāni chinditvā vākehi paliveṭhetvā nivāsanapāvuraṇāni katvā acchādesi. Keci pana ‘‘dāruphalakāni vijjhitvā vākena āvuṇitvā nivāsanapāvuraṇaṃ katvā acchādesī’’ti vadanti. Evaṃ sabbathāpi dārumayacīradhāritāya ‘‘dārucīriyo’’ti purimavohārena ‘‘bāhiyo’’ti ca paññāyittha.
д̇ам̣ згам̣ габаалам̣ г̇ахзд̇ваа вуд̇д̇анияаамзна суббаарагабадданз бин̣д̣ааяа жаранд̇ам̣ д̣̇исваа мануссаа жинд̇зсум̣ ‘‘сажз логз араханд̇о наама хонд̇и, звам̣вид̇хзхи бхавид̇аб̣б̣ам̣, гинну ко аяам̣ аяяо вад̇т̇ам̣ д̣̇ияяамаанам̣ г̇ан̣хзяяа, уд̣̇ааху аббижчад̇ааяа на г̇ан̣хзяяаа’’д̇и виймам̣санд̇аа наанаад̣̇исаахи вад̇т̇аани убанзсум̣. со жинд̇зси – ‘‘сажаахам̣ иминаа нияаамзна нааг̇амиссам̣, наяимз звам̣ маяи басийд̣̇зяяум̣, яам̣нуунаахам̣ имаани бадигкибид̇ваа иминаава нийхаарзна вихарзяяам̣, звам̣ мз лаабхасаггааро уббаж̇ж̇иссад̇ий’’д̇и. со звам̣ жинд̇зд̇ваа гохан̃н̃з тад̇ваа вад̇т̇аани на бадиг̇г̇ан̣хи. мануссаа ‘‘ахо аббижчо вад̇ааяам̣ аяяо’’д̇и бхияяосомад̇д̇ааяа басаннамаанасаа маханд̇ам̣ саггаарасаммаанам̣ гарим̣су.
Taṃ ekaṃ kapālaṃ gahetvā vuttaniyāmena suppārakapaṭṭane piṇḍāya carantaṃ disvā manussā cintesuṃ ‘‘sace loke arahanto nāma honti, evaṃvidhehi bhavitabbaṃ, kinnu kho ayaṃ ayyo vatthaṃ diyyamānaṃ gaṇheyya, udāhu appicchatāya na gaṇheyyā’’ti vīmaṃsantā nānādisāhi vatthāni upanesuṃ. So cintesi – ‘‘sacāhaṃ iminā niyāmena nāgamissaṃ, nayime evaṃ mayi pasīdeyyuṃ, yaṃnūnāhaṃ imāni paṭikkhipitvā imināva nīhārena vihareyyaṃ, evaṃ me lābhasakkāro uppajjissatī’’ti. So evaṃ cintetvā kohaññe ṭhatvā vatthāni na paṭiggaṇhi. Manussā ‘‘aho appiccho vatāyaṃ ayyo’’ti bhiyyosomattāya pasannamānasā mahantaṃ sakkārasammānaṃ kariṃsu.
соби бхад̇д̇агижжам̣ гад̇ваа авид̣̇уурадтаанз згам̣ д̣̇звааяад̇анам̣ аг̇амааси. махааж̇ано д̇зна сад̣̇д̇хим̣ зва г̇анд̇ваа д̇ам̣ д̣̇звааяад̇анам̣ бадиж̇аг̇г̇ид̇ваа ад̣̇ааси. со ‘‘имз маяхам̣ жийрад̇хааран̣амад̇д̇з басийд̣̇ид̇ваа звам̣вид̇хам̣ саггаарасаммаанам̣ гаронд̇и, зд̇зсам̣ маяаа уггадтавуд̇д̇инаа бхавид̇ум̣ ваддад̇ий’’д̇и саллахугабаригкааро аббижчова худ̇ваа вихааси. ‘‘арахаа’’д̇и бана д̇зхи самбхаавийяамаано ‘‘арахаа’’д̇и ад̇д̇аанам̣ аман̃н̃и, убаруубари жасса саггаараг̇аругааро абхивад̣дхи, лаабхий жа ахоси ул̣аараанам̣ бажжаяаанам̣. д̇зна вуд̇д̇ам̣ – ‘‘д̇зна ко бана самаязна б̣аахияо д̣̇ааружийрияо суббаарагз бадивасад̇и самуд̣̇д̣̇ад̇ийрз саггад̇о г̇аругад̇о’’д̇иаад̣̇и.
Sopi bhattakiccaṃ katvā avidūraṭṭhāne ekaṃ devāyatanaṃ agamāsi. Mahājano tena saddhiṃ eva gantvā taṃ devāyatanaṃ paṭijaggitvā adāsi. So ‘‘ime mayhaṃ cīradhāraṇamatte pasīditvā evaṃvidhaṃ sakkārasammānaṃ karonti, etesaṃ mayā ukkaṭṭhavuttinā bhavituṃ vaṭṭatī’’ti sallahukaparikkhāro appicchova hutvā vihāsi. ‘‘Arahā’’ti pana tehi sambhāvīyamāno ‘‘arahā’’ti attānaṃ amaññi, uparūpari cassa sakkāragarukāro abhivaḍḍhi, lābhī ca ahosi uḷārānaṃ paccayānaṃ. Tena vuttaṃ – ‘‘tena kho pana samayena bāhiyo dārucīriyo suppārake paṭivasati samuddatīre sakkato garukato’’tiādi.
д̇ад̇т̇а саггад̇од̇и саггажжам̣ аад̣̇арзна убадтаанавасзна саггад̇о. г̇аругад̇од̇и г̇ун̣ависзсзна яуд̇д̇од̇и ад̇хиббааязна баасаан̣ажчад̇д̇ам̣ вияа г̇аругаран̣авасзна г̇аругад̇о. маанид̇од̇и манасаа самбхааванавасзна маанид̇о. бууж̇ид̇од̇и бубпаг̇анд̇хаад̣̇ийхи бууж̇аавасзна бууж̇ид̇о. абажид̇од̇и абхиббасаннажид̇д̇зхи маг̇г̇ад̣̇аанааасанаабхихаран̣аад̣̇ивасзна абажид̇о. лаабхий жийвара…бз… баригкаараананд̇и бан̣ийд̇абан̣ийд̇аанам̣ убаруубари убанийяамаанаанам̣ жийвараад̣̇ийнам̣ жад̇уннам̣ бажжаяаанам̣ лабханавасзна лаабхий.
Tattha sakkatoti sakkaccaṃ ādarena upaṭṭhānavasena sakkato. Garukatoti guṇavisesena yuttoti adhippāyena pāsāṇacchattaṃ viya garukaraṇavasena garukato. Mānitoti manasā sambhāvanavasena mānito. Pūjitoti pupphagandhādīhi pūjāvasena pūjito. Apacitoti abhippasannacittehi maggadānaāsanābhiharaṇādivasena apacito. Lābhī cīvara…pe… parikkhārānanti paṇītapaṇītānaṃ uparūpari upanīyamānānaṃ cīvarādīnaṃ catunnaṃ paccayānaṃ labhanavasena lābhī.
абаро наяо – саггад̇од̇и саггаараббад̇д̇о. г̇аругад̇од̇и г̇аругаараббад̇д̇о. маанид̇од̇и б̣ахумаанид̇о манасаа бияааяид̇о жа. бууж̇ид̇од̇и жад̇убажжаяаабхибууж̇ааяа бууж̇ид̇о. абажид̇од̇и абажааяанаббад̇д̇о. яасса хи жад̇д̇ааро бажжаяз саггад̇ваа суабхисан̇кад̇з бан̣ийд̇абан̣ийд̇з д̣̇знд̇и, со саггад̇о. яасмим̣ г̇арубхаавам̣ бажжубадтабзд̇ваа д̣̇знд̇и, со г̇аругад̇о. яам̣ манасаа бияааяанд̇и б̣ахуман̃н̃анд̇и жа, со маанид̇о. яасса саб̣б̣амбзд̇ам̣ бууж̇анавасзна гаронд̇и, со бууж̇ид̇о. яасса абхиваад̣̇анабажжудтаанан̃ж̇алигаммаад̣̇ивасзна бараманибажжагаарам̣ гаронд̇и, со абажид̇о. б̣аахияасса бана д̇з саб̣б̣амзд̇ам̣ агам̣су. д̇зна вуд̇д̇ам̣ – ‘‘б̣аахияо д̣̇ааружийрияо суббаарагз бадивасад̇и саггад̇о’’д̇иаад̣̇и. зд̇т̇а жа жийварам̣ со аг̇г̇ан̣ханд̇оби ‘‘зхи, бханд̇з, имам̣ вад̇т̇ам̣ бадиг̇г̇ан̣хаахий’’д̇и убанааманавасзна жийварассааби ‘‘лаабхий’’д̇взва вуд̇д̇о.
Aparo nayo – sakkatoti sakkārappatto. Garukatoti garukārappatto. Mānitoti bahumānito manasā piyāyito ca. Pūjitoti catupaccayābhipūjāya pūjito. Apacitoti apacāyanappatto. Yassa hi cattāro paccaye sakkatvā suabhisaṅkhate paṇītapaṇīte denti, so sakkato. Yasmiṃ garubhāvaṃ paccupaṭṭhapetvā denti, so garukato. Yaṃ manasā piyāyanti bahumaññanti ca, so mānito. Yassa sabbampetaṃ pūjanavasena karonti, so pūjito. Yassa abhivādanapaccuṭṭhānañjalikammādivasena paramanipaccakāraṃ karonti, so apacito. Bāhiyassa pana te sabbametaṃ akaṃsu. Tena vuttaṃ – ‘‘bāhiyo dārucīriyo suppārake paṭivasati sakkato’’tiādi. Ettha ca cīvaraṃ so aggaṇhantopi ‘‘ehi, bhante, imaṃ vatthaṃ paṭiggaṇhāhī’’ti upanāmanavasena cīvarassāpi ‘‘lābhī’’tveva vutto.
рахог̇ад̇ассаад̇и рахаси г̇ад̇асса. бадисаллийнассаад̇и згийбхууд̇асса б̣ахуухи мануссзхи ‘‘арахаа’’д̇и вужжамаанасса д̇асса ид̣̇аани вужжамаанаагаарзна жзд̇асо баривид̇агго уд̣̇абаад̣̇и жид̇д̇асса мижчаасан̇габбо уббаж̇ж̇и. гат̇ам̣? яз ко гзжи логз араханд̇о ваа арахад̇д̇амаг̇г̇ам̣ ваа самаабаннаа, ахам̣ д̇зсам̣ ан̃н̃ад̇арод̇и. д̇ассад̇т̇о – яз имасмим̣ сад̇д̇алогз гилзсаарийнам̣ хад̇ад̇д̇аа бууж̇аасаггаараад̣̇ийнан̃жа арахабхаавзна араханд̇о, яз гилзсаарийнам̣ хананзна арахад̇д̇амаг̇г̇ам̣ самаабаннаа, д̇зсу ахам̣ згод̇и.
Rahogatassāti rahasi gatassa. Paṭisallīnassāti ekībhūtassa bahūhi manussehi ‘‘arahā’’ti vuccamānassa tassa idāni vuccamānākārena cetaso parivitakko udapādi cittassa micchāsaṅkappo uppajji. Kathaṃ? Ye kho keci loke arahanto vā arahattamaggaṃ vā samāpannā, ahaṃ tesaṃ aññataroti. Tassattho – ye imasmiṃ sattaloke kilesārīnaṃ hatattā pūjāsakkārādīnañca arahabhāvena arahanto, ye kilesārīnaṃ hananena arahattamaggaṃ samāpannā, tesu ahaṃ ekoti.
бураан̣асаалохид̇аад̇и буримасмим̣ бхавзсаалохид̇аа б̣анд̇хусад̣̇исаа згад̇о гад̇асаман̣ад̇хаммаа д̣̇звад̇аа. гзжи бана ‘‘бураан̣асаалохид̇аад̇и бураан̣агаалз бхаванд̇арз саалохид̇аа маад̇убхууд̇аа згаа д̣̇звад̇аа’’д̇и вад̣̇анд̇и, д̇ам̣ адтагат̇ааяам̣ бадигкибид̇ваа буримоязвад̇т̇о г̇ахид̇о.
Purāṇasālohitāti purimasmiṃ bhavesālohitā bandhusadisā ekato katasamaṇadhammā devatā. Keci pana ‘‘purāṇasālohitāti purāṇakāle bhavantare sālohitā mātubhūtā ekā devatā’’ti vadanti, taṃ aṭṭhakathāyaṃ paṭikkhipitvā purimoyevattho gahito.
буб̣б̣з гира гассабад̣̇асаб̣аласса саасанз осаггамаанз сааман̣зраад̣̇ийнам̣ виббагаарам̣ д̣̇исваа сад̇д̇а бхигкуу сам̣взг̇аббад̇д̇аа ‘‘яаава саасанам̣ на анд̇арад̇хааяад̇и, д̇аава ад̇д̇ано бад̇идтам̣ гариссаамаа’’д̇и суван̣н̣ажзд̇ияам̣ ванд̣̇ид̇ваа аран̃н̃ам̣ бавидтаа згам̣ баб̣б̣ад̇ам̣ д̣̇исваа ‘‘ж̇ийвид̇з саалаяаа нивад̇д̇анд̇у, нираалаяаа имам̣ баб̣б̣ад̇ам̣ абхируханд̇уу’’д̇и вад̇ваа ниссзн̣им̣ б̣анд̇хид̇ваа саб̣б̣з д̇ам̣ баб̣б̣ад̇ам̣ абхируяха ниссзн̣им̣ баад̇зд̇ваа саман̣ад̇хаммам̣ гарим̣су. д̇зсу сан̇гхад̇т̇зро згарад̇д̇аад̇иггамзнзва арахад̇д̇ам̣ баабун̣и. со уд̇д̇арагуруд̇о бин̣д̣абаад̇ам̣ аанзд̇ваа д̇з бхигкуу, ‘‘аавусо, ид̇о бин̣д̣абаад̇ам̣ барибхун̃ж̇ат̇аа’’д̇и ааха. д̇з ‘‘д̇умхз, бханд̇з, ад̇д̇ано аанубхаавзна звам̣ агад̇т̇а, маяамби сажз д̇умхз вияа висзсам̣ ниб̣б̣ад̇д̇зссаама, саяамзва аахарид̇ваа бхун̃ж̇иссаамаа’’д̇и бхун̃ж̇ид̇ум̣ на ижчим̣су. д̇ад̇о д̣̇уд̇ияад̣̇ивасз д̣̇уд̇ияад̇т̇зро анааг̇аамипалам̣ баабун̣и, соби д̇ат̇зва бин̣д̣абаад̇ам̣ аад̣̇ааяа д̇ад̇т̇а г̇анд̇ваа ид̇арз ниманд̇зси, д̇зби д̇ат̇зва бадигкибим̣су. д̇зсу арахад̇д̇аббад̇д̇о бариниб̣б̣ааяи, анааг̇аамий суд̣̇д̇хааваасабхуумияам̣ ниб̣б̣ад̇д̇и. ид̇арз бана бан̃жа ж̇анаа гхадзнд̇аа вааяаманд̇ааби висзсам̣ ниб̣б̣ад̇д̇зд̇ум̣ наасагким̣су. д̇з асаггонд̇аа д̇ад̇т̇зва барисуссид̇ваа д̣̇звалогз ниб̣б̣ад̇д̇аа. згам̣ б̣уд̣̇д̇ханд̇арам̣ д̣̇звзсуязва сам̣сарид̇ваа имасмим̣ б̣уд̣̇д̇хуббаад̣̇з д̣̇звалогад̇о жавид̇ваа д̇ад̇т̇а д̇ад̇т̇а гулагхарз ниб̣б̣ад̇д̇им̣су. д̇зсу хи зго баггусаад̇и рааж̇аа ахоси, зго гумаарагассабо, зго д̣̇аб̣б̣о маллабуд̇д̇о, зго сабхияо бариб̣б̣ааж̇аго, зго б̣аахияо д̣̇ааружийрияо. д̇ад̇т̇а яо со анааг̇аамий б̣рахмалогз ниб̣б̣ад̇д̇о, д̇ам̣ санд̇хааязд̇ам̣ вуд̇д̇ам̣ ‘‘бураан̣асаалохид̇аа д̣̇звад̇аа’’д̇и. д̣̇звабуд̇д̇оби хи д̣̇звад̇хийд̇аа вияа д̣̇зво зва д̣̇звад̇аад̇и гад̇ваа д̣̇звад̇аад̇и вужжад̇и ‘‘ат̇а ко ан̃н̃ад̇араа д̣̇звад̇аа’’д̇иаад̣̇ийсу вияа. ид̇ха бана б̣рахмаа д̣̇звад̇аад̇и ад̇хиббзд̇о.
Pubbe kira kassapadasabalassa sāsane osakkamāne sāmaṇerādīnaṃ vippakāraṃ disvā satta bhikkhū saṃvegappattā ‘‘yāva sāsanaṃ na antaradhāyati, tāva attano patiṭṭhaṃ karissāmā’’ti suvaṇṇacetiyaṃ vanditvā araññaṃ paviṭṭhā ekaṃ pabbataṃ disvā ‘‘jīvite sālayā nivattantu, nirālayā imaṃ pabbataṃ abhiruhantū’’ti vatvā nisseṇiṃ bandhitvā sabbe taṃ pabbataṃ abhiruyha nisseṇiṃ pātetvā samaṇadhammaṃ kariṃsu. Tesu saṅghatthero ekarattātikkameneva arahattaṃ pāpuṇi. So uttarakuruto piṇḍapātaṃ ānetvā te bhikkhū, ‘‘āvuso, ito piṇḍapātaṃ paribhuñjathā’’ti āha. Te ‘‘tumhe, bhante, attano ānubhāvena evaṃ akattha, mayampi sace tumhe viya visesaṃ nibbattessāma, sayameva āharitvā bhuñjissāmā’’ti bhuñjituṃ na icchiṃsu. Tato dutiyadivase dutiyatthero anāgāmiphalaṃ pāpuṇi, sopi tatheva piṇḍapātaṃ ādāya tattha gantvā itare nimantesi, tepi tatheva paṭikkhipiṃsu. Tesu arahattappatto parinibbāyi, anāgāmī suddhāvāsabhūmiyaṃ nibbatti. Itare pana pañca janā ghaṭentā vāyamantāpi visesaṃ nibbattetuṃ nāsakkhiṃsu. Te asakkontā tattheva parisussitvā devaloke nibbattā. Ekaṃ buddhantaraṃ devesuyeva saṃsaritvā imasmiṃ buddhuppāde devalokato cavitvā tattha tattha kulaghare nibbattiṃsu. Tesu hi eko pakkusāti rājā ahosi, eko kumārakassapo, eko dabbo mallaputto, eko sabhiyo paribbājako, eko bāhiyo dārucīriyo. Tattha yo so anāgāmī brahmaloke nibbatto, taṃ sandhāyetaṃ vuttaṃ ‘‘purāṇasālohitā devatā’’ti. Devaputtopi hi devadhītā viya devo eva devatāti katvā devatāti vuccati ‘‘atha kho aññatarā devatā’’tiādīsu viya. Idha pana brahmā devatāti adhippeto.
д̇асса хи б̣рахмуно д̇ад̇т̇а ниб̣б̣ад̇д̇асамананд̇арамзва ад̇д̇ано б̣рахмасамбад̇д̇им̣ ологзд̇ваа ааг̇ад̇адтаанам̣ ааваж̇ж̇знд̇асса сад̇д̇аннам̣ ж̇анаанам̣ баб̣б̣ад̇ам̣ ааруяха саман̣ад̇хаммагаран̣ам̣, д̇ад̇т̇згасса бариниб̣б̣уд̇абхааво, анааг̇аамипалам̣ бад̇ваа ад̇д̇ано жа зд̇т̇а ниб̣б̣ад̇д̇абхааво убадтааси. со ‘‘гад̇т̇а ну ко ид̇арз бан̃жа ж̇анаа’’д̇и ааваж̇ж̇знд̇о гаамааважарад̣̇звалогз д̇зсам̣ ниб̣б̣ад̇д̇абхаавам̣ н̃ад̇ваа абарабхааг̇з гаалаанугаалам̣ ‘‘гинну ко гаронд̇ий’’д̇и д̇зсам̣ бавад̇д̇им̣ ологзд̇иязва. имасмим̣ бана гаалз ‘‘гахам̣ ну ко’’д̇и ааваж̇ж̇знд̇о б̣аахияам̣ суббаарагабадданам̣ убаниссааяа д̣̇ааружийрад̇хаарим̣ гохан̃н̃зна ж̇ийвигам̣ габбзнд̇ам̣ д̣̇исваа ‘‘аяам̣ маяаа сад̣̇д̇хим̣ буб̣б̣з ниссзн̣им̣ б̣анд̇хид̇ваа баб̣б̣ад̇ам̣ абхирухид̇ваа саман̣ад̇хаммам̣ гаронд̇о ад̇исаллзкавуд̇д̇ияаа ж̇ийвид̇з анабзгко арахад̇ааби аабхад̇ам̣ бин̣д̣абаад̇ам̣ абарибхун̃ж̇ид̇ваа ид̣̇аани самбхааванаад̇хиббааяо анарахаава арахад̇д̇ам̣ бадиж̇аанид̇ваа вижарад̇и лаабхасаггаарасилогам̣ нигаамаяамаано, д̣̇асаб̣аласса жа ниб̣б̣ад̇д̇абхаавам̣ на ж̇аанаад̇и, ханд̣̇а нам̣ сам̣взж̇зд̇ваа б̣уд̣̇д̇хуббаад̣̇ам̣ ж̇аанаабзссаамий’’д̇и д̇аавад̣̇зва б̣рахмалогад̇о од̇арид̇ваа рад̇д̇ибхааг̇з суббаарагабадданз д̣̇ааружийрияасса саммукз баад̇урахоси. б̣аахияо ад̇д̇ано васанадтаанз ул̣аарам̣ обхаасам̣ д̣̇исваа ‘‘гим̣ ну ко зд̇а’’нд̇и б̣ахи нигкамид̇ваа ологзнд̇о аагаасз тид̇ам̣ махааб̣рахмаанам̣ д̣̇исваа ан̃ж̇алим̣ баг̇г̇аяха ‘‘гз д̇умхз’’д̇и бужчи. ат̇асса со б̣рахмаа ‘‘ахам̣ д̇з бораан̣агасахааяо д̇ад̣̇аа анааг̇аамипалам̣ бад̇ваа б̣рахмалогз ниб̣б̣ад̇д̇о, д̇вам̣ бана гин̃жи висзсам̣ ниб̣б̣ад̇д̇зд̇ум̣ асаггонд̇о д̇ад̣̇аа бут̇уж̇ж̇анагаалагирияам̣ гад̇ваа сам̣саранд̇о ид̣̇аани д̇ид̇т̇ияавзсад̇хаарий анарахаава самаано ‘арахаа аха’нд̇и имам̣ лад̣̇д̇хим̣ г̇ахзд̇ваа вижарасийд̇и н̃ад̇ваа ааг̇ад̇о, нзва ко д̇вам̣, б̣аахияа, арахаа, бадиниссаж̇ж̇зд̇ам̣ баабагам̣ д̣̇идтиг̇ад̇ам̣, маа д̇з ахоси д̣̇ийгхарад̇д̇ам̣ ахид̇ааяа д̣̇угкааяа, саммаасамб̣уд̣̇д̇хо логз уббанно. со хи бхаг̇аваа арахаа, г̇ажча нам̣ баяирубаасассуу’’д̇и ааха. д̇зна вуд̇д̇ам̣ – ‘‘ат̇а ко б̣аахияасса д̣̇ааружийрияасса бураан̣асаалохид̇аа д̣̇звад̇аа’’д̇иаад̣̇и.
Tassa hi brahmuno tattha nibbattasamanantarameva attano brahmasampattiṃ oloketvā āgataṭṭhānaṃ āvajjentassa sattannaṃ janānaṃ pabbataṃ āruyha samaṇadhammakaraṇaṃ, tatthekassa parinibbutabhāvo, anāgāmiphalaṃ patvā attano ca ettha nibbattabhāvo upaṭṭhāsi. So ‘‘kattha nu kho itare pañca janā’’ti āvajjento kāmāvacaradevaloke tesaṃ nibbattabhāvaṃ ñatvā aparabhāge kālānukālaṃ ‘‘kinnu kho karontī’’ti tesaṃ pavattiṃ oloketiyeva. Imasmiṃ pana kāle ‘‘kahaṃ nu kho’’ti āvajjento bāhiyaṃ suppārakapaṭṭanaṃ upanissāya dārucīradhāriṃ kohaññena jīvikaṃ kappentaṃ disvā ‘‘ayaṃ mayā saddhiṃ pubbe nisseṇiṃ bandhitvā pabbataṃ abhiruhitvā samaṇadhammaṃ karonto atisallekhavuttiyā jīvite anapekkho arahatāpi ābhataṃ piṇḍapātaṃ aparibhuñjitvā idāni sambhāvanādhippāyo anarahāva arahattaṃ paṭijānitvā vicarati lābhasakkārasilokaṃ nikāmayamāno, dasabalassa ca nibbattabhāvaṃ na jānāti, handa naṃ saṃvejetvā buddhuppādaṃ jānāpessāmī’’ti tāvadeva brahmalokato otaritvā rattibhāge suppārakapaṭṭane dārucīriyassa sammukhe pāturahosi. Bāhiyo attano vasanaṭṭhāne uḷāraṃ obhāsaṃ disvā ‘‘kiṃ nu kho eta’’nti bahi nikkhamitvā olokento ākāse ṭhitaṃ mahābrahmānaṃ disvā añjaliṃ paggayha ‘‘ke tumhe’’ti pucchi. Athassa so brahmā ‘‘ahaṃ te porāṇakasahāyo tadā anāgāmiphalaṃ patvā brahmaloke nibbatto, tvaṃ pana kiñci visesaṃ nibbattetuṃ asakkonto tadā puthujjanakālakiriyaṃ katvā saṃsaranto idāni titthiyavesadhārī anarahāva samāno ‘arahā aha’nti imaṃ laddhiṃ gahetvā vicarasīti ñatvā āgato, neva kho tvaṃ, bāhiya, arahā, paṭinissajjetaṃ pāpakaṃ diṭṭhigataṃ, mā te ahosi dīgharattaṃ ahitāya dukkhāya, sammāsambuddho loke uppanno. So hi bhagavā arahā, gaccha naṃ payirupāsassū’’ti āha. Tena vuttaṃ – ‘‘atha kho bāhiyassa dārucīriyassa purāṇasālohitā devatā’’tiādi.
д̇ад̇т̇а анугамбигаад̇и ануг̇г̇ахасийлаа гарун̣аад̇хигаа. ад̇т̇агаамаад̇и хид̇агаамаа мзд̇д̇аад̇хигаа. буримабад̣̇зна жзд̇т̇а б̣аахияасса д̣̇угкаабанаяанагаамад̇ам̣ д̇ассаа д̣̇звад̇ааяа д̣̇ассзд̇и, бажчимзна хид̇уубасам̣хаарам̣. жзд̇асаад̇и ад̇д̇ано жид̇д̇зна, жзд̇осийсзна жзд̇т̇а жзд̇обарияан̃аан̣ам̣ г̇ахид̇анд̇и взд̣̇ид̇аб̣б̣ам̣. жзд̇обаривид̇агганд̇и д̇асса жид̇д̇аббавад̇д̇им̣. ан̃н̃ааяаад̇и ж̇аанид̇ваа. д̇знубасан̇гамийд̇и сзяяат̇ааби наама б̣алаваа бурисо самин̃ж̇ид̇ам̣ ваа б̣аахам̣ басаарзяяа, басаарид̇ам̣ ваа б̣аахам̣ самин̃ж̇зяяа, звамзва б̣рахмалогз анд̇арахид̇о б̣аахияасса бурад̇о баад̇убхаванавасзна убасан̇гами. зд̇ад̣̇авожаад̇и ‘‘яз ко гзжи логз араханд̇о ваа’’д̇иаад̣̇ибавад̇д̇амижчаабаривид̇аггам̣ б̣аахияам̣ саходхам̣ жорам̣ г̇ан̣ханд̇о вияа ‘‘нзва ко д̇вам̣, б̣аахияа, арахаа’’д̇иаад̣̇игам̣ зд̇ам̣ ид̣̇аани вужжамаанаважанам̣ б̣рахмаа авожа. нзва ко д̇вам̣, б̣аахияа, арахаад̇и зд̇зна д̇ад̣̇аа б̣аахияасса асзгкабхаавам̣ бадигкибад̇и, нааби арахад̇д̇амаг̇г̇ам̣ ваа самаабаннод̇и зд̇зна сзгкабхаавам̣, убхаязнабисса анарияабхаавамзва д̣̇ийбзд̇и. сааби д̇з бадибад̣̇аа над̇т̇и, яааяа д̇вам̣ арахаа ваа асса арахад̇д̇амаг̇г̇ам̣ ваа самаабаннод̇и иминаа банасса галяаан̣абут̇уж̇ж̇анабхаавамби бадигкибад̇и. д̇ад̇т̇а бадибад̣̇аад̇и сийлависуд̣̇д̇хиаад̣̇аяо ча висуд̣̇д̇хияо. бадибаж̇ж̇ад̇и зд̇ааяа арияамаг̇г̇зд̇и бадибад̣̇аа. ассаад̇и бхавзяяааси.
Tattha anukampikāti anuggahasīlā karuṇādhikā. Atthakāmāti hitakāmā mettādhikā. Purimapadena cettha bāhiyassa dukkhāpanayanakāmataṃ tassā devatāya dasseti, pacchimena hitūpasaṃhāraṃ. Cetasāti attano cittena, cetosīsena cettha cetopariyañāṇaṃ gahitanti veditabbaṃ. Cetoparivitakkanti tassa cittappavattiṃ. Aññāyāti jānitvā. Tenupasaṅkamīti seyyathāpi nāma balavā puriso samiñjitaṃ vā bāhaṃ pasāreyya, pasāritaṃ vā bāhaṃ samiñjeyya, evameva brahmaloke antarahito bāhiyassa purato pātubhavanavasena upasaṅkami. Etadavocāti ‘‘ye kho keci loke arahanto vā’’tiādipavattamicchāparivitakkaṃ bāhiyaṃ sahoḍhaṃ coraṃ gaṇhanto viya ‘‘neva kho tvaṃ, bāhiya, arahā’’tiādikaṃ etaṃ idāni vuccamānavacanaṃ brahmā avoca. Neva kho tvaṃ, bāhiya, arahāti etena tadā bāhiyassa asekkhabhāvaṃ paṭikkhipati, nāpi arahattamaggaṃ vā samāpannoti etena sekkhabhāvaṃ, ubhayenapissa anariyabhāvameva dīpeti. Sāpi te paṭipadā natthi, yāya tvaṃ arahā vā assa arahattamaggaṃ vā samāpannoti iminā panassa kalyāṇaputhujjanabhāvampi paṭikkhipati. Tattha paṭipadāti sīlavisuddhiādayo cha visuddhiyo. Paṭipajjati etāya ariyamaggeti paṭipadā. Assāti bhaveyyāsi.
аяан̃жасса арахад̇д̇аад̇химаано гим̣ ниссааяа уббаннод̇и? ‘‘аббижчад̇ааяа санд̇удтид̇ааяа саллзкад̇ааяа д̣̇ийгхарад̇д̇ам̣ гад̇аад̇хигаарад̇д̇аа д̇ад̣̇ан̇г̇аббахаанавасзна гилзсаанам̣ вихад̇ад̇д̇аа арахад̇д̇аад̇химаано уббанно’’д̇и гзжи вад̣̇анд̇и. абарз банааху ‘‘б̣аахияо батамаад̣̇ижхаанажад̇уггалаабхий, д̇асмаасса вигкамбханаббахаанзна гилзсаанам̣ асамуд̣̇аажаарад̇о арахад̇д̇аад̇химаано уббаж̇ж̇ад̇ий’’д̇и. д̇ад̣̇убхаяамби д̇зсам̣ мад̇имад̇д̇амзва ‘‘самбхааванаад̇хиббааяо лаабхасаггаарасилогам̣ нигаамаяамаано’’д̇и жа адтагат̇ааяам̣ ааг̇ад̇ад̇д̇аа. д̇асмаа вуд̇д̇анаязнзвзд̇т̇а ад̇т̇о взд̣̇ид̇аб̣б̣о.
Ayañcassa arahattādhimāno kiṃ nissāya uppannoti? ‘‘Appicchatāya santuṭṭhitāya sallekhatāya dīgharattaṃ katādhikārattā tadaṅgappahānavasena kilesānaṃ vihatattā arahattādhimāno uppanno’’ti keci vadanti. Apare panāhu ‘‘bāhiyo paṭhamādijhānacatukkalābhī, tasmāssa vikkhambhanappahānena kilesānaṃ asamudācārato arahattādhimāno uppajjatī’’ti. Tadubhayampi tesaṃ matimattameva ‘‘sambhāvanādhippāyo lābhasakkārasilokaṃ nikāmayamāno’’ti ca aṭṭhakathāyaṃ āgatattā. Tasmā vuttanayenevettha attho veditabbo.
ат̇а б̣аахияо аагаасз тад̇ваа гат̇знд̇ам̣ махааб̣рахмаанам̣ ологзд̇ваа жинд̇зси – ‘‘ахо бхаарияам̣ вад̇а гаммам̣, яамахам̣ арахаад̇и жинд̇зсим̣, аяан̃жа ‘арахад̇д̇аг̇ааминий бадибад̣̇ааби д̇з над̇т̇ий’д̇и вад̣̇ад̇и, ад̇т̇и ну ко логз гожи арахаа’’д̇и? ат̇а нам̣ бужчи. д̇зна вуд̇д̇ам̣ – ‘‘ат̇а гз жарахи д̣̇звад̇з логз араханд̇о ваа арахад̇д̇амаг̇г̇ам̣ ваа самаабаннаа’’д̇и.
Atha bāhiyo ākāse ṭhatvā kathentaṃ mahābrahmānaṃ oloketvā cintesi – ‘‘aho bhāriyaṃ vata kammaṃ, yamahaṃ arahāti cintesiṃ, ayañca ‘arahattagāminī paṭipadāpi te natthī’ti vadati, atthi nu kho loke koci arahā’’ti? Atha naṃ pucchi. Tena vuttaṃ – ‘‘atha ke carahi devate loke arahanto vā arahattamaggaṃ vā samāpannā’’ti.
д̇ад̇т̇а ат̇аад̇и бужчаарамбхз нибаад̇о. гз жарахийд̇и гз зд̇арахи. логзд̇и огаасалогз. аяан̃хзд̇т̇а ад̇хиббааяо – бхааж̇аналогабхууд̇з сагаласмим̣ ж̇амб̣уд̣̇ийбад̇алз гасмим̣ таанз араханд̇о ваа арахад̇д̇амаг̇г̇ам̣ ваа самаабаннаа зд̇арахи вихаранд̇и, яад̇т̇а маяам̣ д̇з убасан̇гамид̇ваа д̇зсам̣ оваад̣̇з тад̇ваа ваддад̣̇угкад̇о мужжиссаамаад̇и. уд̇д̇арзсууд̇и суббаарагабадданад̇о буб̣б̣уд̇д̇арад̣̇исаабхааг̇ам̣ санд̇хааяа вуд̇д̇ам̣.
Tattha athāti pucchārambhe nipāto. Ke carahīti ke etarahi. Loketi okāsaloke. Ayañhettha adhippāyo – bhājanalokabhūte sakalasmiṃ jambudīpatale kasmiṃ ṭhāne arahanto vā arahattamaggaṃ vā samāpannā etarahi viharanti, yattha mayaṃ te upasaṅkamitvā tesaṃ ovāde ṭhatvā vaṭṭadukkhato muccissāmāti. Uttaresūti suppārakapaṭṭanato pubbuttaradisābhāgaṃ sandhāya vuttaṃ.
араханд̇и аарагад̇д̇аа арахам̣. аарагаа хи со саб̣б̣агилзсзхи сувид̣̇ууравид̣̇уурз тид̇о маг̇г̇зна саваасанаанам̣ гилзсаанам̣ вид̣̇д̇хам̣сид̇ад̇д̇аа. арийнам̣ ваа хад̇ад̇д̇аа арахам̣. бхаг̇авад̇аа хи гилзсаараяо анавасзсад̇о арияамаг̇г̇зна хад̇аа самужчиннаад̇и. араанам̣ ваа хад̇ад̇д̇аа арахам̣. яан̃жа авиж̇ж̇аабхавад̇ан̣хаамаяанаабхи бун̃н̃аад̣̇иабхисан̇каараарам̣ ж̇араамаран̣анзми аасавасамуд̣̇аяамаязна агкзна виж̇жхид̇ваа д̇ибхаварат̇з самааяож̇ид̇ам̣ анаад̣̇игаалаббавад̇д̇ам̣ сам̣сааражаггам̣. д̇ассаанзна б̣од̇химан̣д̣з вийрияабаад̣̇зхи сийлабат̇авияам̣ бад̇идтааяа сад̣̇д̇хаахад̇т̇зна гаммагкаяагаран̃аан̣апарасум̣ г̇ахзд̇ваа саб̣б̣зби араа хад̇аа вихад̇аа вид̣̇д̇хам̣сид̇аад̇и. арахад̇ийд̇и ваа арахам̣. бхаг̇аваа хи сад̣̇звагз логз аг̇г̇ад̣̇агкин̣зяяад̇д̇аа ул̣аарз жийвараад̣̇ибажжаяз бууж̇аависзсан̃жа арахад̇и. рахаабхаавад̇о ваа арахам̣. д̇ат̇ааг̇ад̇о хи саб̣б̣асо самужчиннарааг̇аад̣̇игилзсад̇д̇аа баабагилзсассааби асамбхавад̇о баабагаран̣з рахаабхаавад̇оби араханд̇и вужжад̇и.
Arahanti ārakattā arahaṃ. Ārakā hi so sabbakilesehi suvidūravidūre ṭhito maggena savāsanānaṃ kilesānaṃ viddhaṃsitattā. Arīnaṃ vā hatattā arahaṃ. Bhagavatā hi kilesārayo anavasesato ariyamaggena hatā samucchinnāti. Arānaṃ vā hatattā arahaṃ. Yañca avijjābhavataṇhāmayanābhi puññādiabhisaṅkhārāraṃ jarāmaraṇanemi āsavasamudayamayena akkhena vijjhitvā tibhavarathe samāyojitaṃ anādikālappavattaṃ saṃsāracakkaṃ. Tassānena bodhimaṇḍe vīriyapādehi sīlapathaviyaṃ patiṭṭhāya saddhāhatthena kammakkhayakarañāṇapharasuṃ gahetvā sabbepi arā hatā vihatā viddhaṃsitāti. Arahatīti vā arahaṃ. Bhagavā hi sadevake loke aggadakkhiṇeyyattā uḷāre cīvarādipaccaye pūjāvisesañca arahati. Rahābhāvato vā arahaṃ. Tathāgato hi sabbaso samucchinnarāgādikilesattā pāpakilesassāpi asambhavato pāpakaraṇe rahābhāvatopi arahanti vuccati.
саммаа сааман̃жа саб̣б̣ад̇хаммаанам̣ б̣уд̣̇д̇хад̇д̇аа саммаасамб̣уд̣̇д̇хо. бхаг̇аваа хи абхин̃н̃зяяз д̇хаммз абхин̃н̃зяяад̇о, барин̃н̃зяяз д̇хаммз барин̃н̃зяяад̇о, бахаад̇аб̣б̣з д̇хаммз бахаад̇аб̣б̣ад̇о, сажчигаад̇аб̣б̣з д̇хаммз сажчигаад̇аб̣б̣ад̇о, бхаавзд̇аб̣б̣з д̇хаммз бхаавзд̇аб̣б̣ад̇о абхисамб̣уж̇жхи. вуд̇д̇ан̃хзд̇ам̣ –
Sammā sāmañca sabbadhammānaṃ buddhattā sammāsambuddho. Bhagavā hi abhiññeyye dhamme abhiññeyyato, pariññeyye dhamme pariññeyyato, pahātabbe dhamme pahātabbato, sacchikātabbe dhamme sacchikātabbato, bhāvetabbe dhamme bhāvetabbato abhisambujjhi. Vuttañhetaṃ –
‘‘абхин̃н̃зяяам̣ абхин̃н̃аад̇ам̣, бхаавзд̇аб̣б̣ан̃жа бхаавид̇ам̣;
‘‘Abhiññeyyaṃ abhiññātaṃ, bhāvetabbañca bhāvitaṃ;
бахаад̇аб̣б̣ам̣ бахийнам̣ мз, д̇асмаа б̣уд̣̇д̇хосми б̣раахман̣аа’’д̇и. (су. ни. 563; ма. ни. 2.399; висуд̣̇д̇хи. 1.131);
Pahātabbaṃ pahīnaṃ me, tasmā buddhosmi brāhmaṇā’’ti. (su. ni. 563; ma. ni. 2.399; visuddhi. 1.131);
абижа гусалз д̇хаммз анаваж̇ж̇асукавибаагад̇о, агусалз д̇хаммз сааваж̇ж̇ад̣̇угкавибаагад̇од̇иаад̣̇инаа саб̣б̣ад̇д̇игад̣̇угаад̣̇ивасзна аяамад̇т̇о нзд̇аб̣б̣о. ид̇и авибарийд̇ам̣ саяамбхун̃аан̣зна саб̣б̣аагаарад̇о саб̣б̣ад̇хаммаанам̣ абхисамб̣уд̣̇д̇хад̇д̇аа саммаасамб̣уд̣̇д̇ход̇и аяамзд̇т̇а сан̇кзбо. вид̇т̇ааро бана висуд̣̇д̇химаг̇г̇з (висуд̣̇д̇хи. 1.129-131) ааг̇ад̇анаязнзва взд̣̇ид̇аб̣б̣о. арахад̇д̇ааяаад̇и аг̇г̇апалаббадилаабхааяа. д̇хаммам̣ д̣̇зсзд̇ийд̇и аад̣̇игаляаан̣аад̣̇иг̇ун̣ависзсаяуд̇д̇ам̣ сийлаад̣̇ибадибад̣̇аад̇хаммам̣ самат̇авибассанаад̇хаммамзва ваа взнзяяаж̇жхаасаяаануруубам̣ убад̣̇исад̇и гат̇зд̇и.
Apica kusale dhamme anavajjasukhavipākato, akusale dhamme sāvajjadukkhavipākatotiādinā sabbattikadukādivasena ayamattho netabbo. Iti aviparītaṃ sayambhuñāṇena sabbākārato sabbadhammānaṃ abhisambuddhattā sammāsambuddhoti ayamettha saṅkhepo. Vitthāro pana visuddhimagge (visuddhi. 1.129-131) āgatanayeneva veditabbo. Arahattāyāti aggaphalappaṭilābhāya. Dhammaṃ desetīti ādikalyāṇādiguṇavisesayuttaṃ sīlādipaṭipadādhammaṃ samathavipassanādhammameva vā veneyyajjhāsayānurūpaṃ upadisati katheti.
сам̣взж̇ид̇од̇и ‘‘д̇хирад̇т̇у вад̇а, бхо, бут̇уж̇ж̇анабхаавасса, язнаахам̣ анарахаава самаано арахаад̇и аман̃н̃им̣, саммаасамб̣уд̣̇д̇хан̃жа логз уббаж̇ж̇ид̇ваа д̇хаммам̣ д̣̇зсзнд̇ам̣ на ж̇ааним̣, д̣̇уж̇ж̇аанам̣ ко банид̣̇ам̣ ж̇ийвид̇ам̣, д̣̇уж̇ж̇аанам̣ маран̣а’’нд̇и сам̣взг̇амаабаад̣̇ид̇о, д̣̇звад̇ааважанзна яат̇аавуд̇д̇знаагаарзна сам̣виг̇г̇амаанасод̇и ад̇т̇о. д̇аавад̣̇зваад̇и д̇асмим̣язва кан̣з. суббаарагаа баггаамийд̇и б̣уд̣̇д̇ход̇и наамамаби саванзна уббаннааяа б̣уд̣̇д̇хаарамман̣ааяа бийд̇ияаа сам̣взг̇зна жа жод̣̇ияамаанахад̣̇аяо суббаарагабадданад̇о саавад̇т̇им̣ уд̣̇д̣̇исса багганд̇о. саб̣б̣ад̇т̇а згарад̇д̇ибариваасзнаад̇и саб̣б̣асмим̣ маг̇г̇з згарад̇д̇иваасзнзва аг̇амааси. суббаарагабадданад̇о хи саавад̇т̇и вийсаяож̇анасад̇з ход̇и, д̇ан̃жааяам̣ зд̇д̇агам̣ ад̣̇д̇хаанам̣ згарад̇д̇иваасзна аг̇амааси. яад̣̇аа суббаарагад̇о нигканд̇о, д̇ад̣̇ахзва саавад̇т̇им̣ самбад̇д̇од̇и.
Saṃvejitoti ‘‘dhiratthu vata, bho, puthujjanabhāvassa, yenāhaṃ anarahāva samāno arahāti amaññiṃ, sammāsambuddhañca loke uppajjitvā dhammaṃ desentaṃ na jāniṃ, dujjānaṃ kho panidaṃ jīvitaṃ, dujjānaṃ maraṇa’’nti saṃvegamāpādito, devatāvacanena yathāvuttenākārena saṃviggamānasoti attho. Tāvadevāti tasmiṃyeva khaṇe. Suppārakā pakkāmīti buddhoti nāmamapi savanena uppannāya buddhārammaṇāya pītiyā saṃvegena ca codiyamānahadayo suppārakapaṭṭanato sāvatthiṃ uddissa pakkanto. Sabbattha ekarattiparivāsenāti sabbasmiṃ magge ekarattivāseneva agamāsi. Suppārakapaṭṭanato hi sāvatthi vīsayojanasate hoti, tañcāyaṃ ettakaṃ addhānaṃ ekarattivāsena agamāsi. Yadā suppārakato nikkhanto, tadaheva sāvatthiṃ sampattoti.
гат̇ам̣ банааяам̣ звам̣ аг̇амаасийд̇и? д̣̇звад̇аанубхаавзна, ‘‘б̣уд̣̇д̇хаанубхаавзнаа’’д̇иби вад̣̇анд̇и. ‘‘саб̣б̣ад̇т̇а згарад̇д̇ибариваасзнаа’’д̇и бана вуд̇д̇ад̇д̇аа маг̇г̇асса жа вийсаяож̇анасад̇игад̇д̇аа анд̇араамаг̇г̇з г̇ааманиг̇амарааж̇ад̇хаанийсу яад̇т̇а яад̇т̇а рад̇д̇ияам̣ васад̇и, д̇ад̇т̇а д̇ад̇т̇а д̣̇уд̇ияам̣ арун̣ам̣ анудтаабзд̇ваа саб̣б̣ад̇т̇а згарад̇д̇иваасзнзва саавад̇т̇им̣ убасан̇гамийд̇и аяамад̇т̇о д̣̇ийбид̇о ход̇ийд̇и. наяид̣̇ам̣ звам̣ д̣̇адтаб̣б̣ам̣. саб̣б̣асмим̣ вийсаяож̇анасад̇игз маг̇г̇з згарад̇д̇иваасзнаад̇и имасса ад̇т̇асса ад̇хиббзд̇ад̇д̇аа. згарад̇д̇имад̇д̇ам̣ со сагаласмим̣ д̇асмим̣ маг̇г̇з васид̇ваа бажчимад̣̇ивасз буб̣б̣ан̣хасамаяз саавад̇т̇им̣ ануббад̇д̇од̇и.
Kathaṃ panāyaṃ evaṃ agamāsīti? Devatānubhāvena, ‘‘buddhānubhāvenā’’tipi vadanti. ‘‘Sabbattha ekarattiparivāsenā’’ti pana vuttattā maggassa ca vīsayojanasatikattā antarāmagge gāmanigamarājadhānīsu yattha yattha rattiyaṃ vasati, tattha tattha dutiyaṃ aruṇaṃ anuṭṭhāpetvā sabbattha ekarattivāseneva sāvatthiṃ upasaṅkamīti ayamattho dīpito hotīti. Nayidaṃ evaṃ daṭṭhabbaṃ. Sabbasmiṃ vīsayojanasatike magge ekarattivāsenāti imassa atthassa adhippetattā. Ekarattimattaṃ so sakalasmiṃ tasmiṃ magge vasitvā pacchimadivase pubbaṇhasamaye sāvatthiṃ anuppattoti.
бхаг̇авааби б̣аахияасса ааг̇аманам̣ н̃ад̇ваа ‘‘на д̇аавасса инд̣̇рияаани барибаагам̣ г̇ад̇аани, кан̣анд̇арз бана барибаагам̣ г̇амиссанд̇ий’’д̇и д̇асса инд̣̇рияаанам̣ барибаагам̣ ааг̇амаяамаано махаабхигкусан̇гхабаривуд̇о д̇асмим̣ кан̣з саавад̇т̇им̣ бин̣д̣ааяа баависи. со жа ж̇зд̇аванам̣ бависид̇ваа бхуд̇д̇абаад̇араасз гааяааласияавиможанад̇т̇ам̣ аб̣бхогаасз жан̇гаманд̇з самб̣ахулз бхигкуу бассид̇ваа ‘‘гахам̣ ну ко зд̇арахи бхаг̇аваа’’д̇и бужчи. бхигкуу ‘‘бхаг̇аваа саавад̇т̇им̣ бин̣д̣ааяа бавидто’’д̇и вад̇ваа бужчим̣су ‘‘д̇вам̣ бана гуд̇о ааг̇ад̇о’’д̇и? ‘‘суббаарагабадданад̇о ааг̇ад̇омхий’’д̇и. ‘‘д̣̇уурад̇о ааг̇ад̇оси, нисийд̣̇а, д̇аава баад̣̇з д̇ховид̇ваа магкзд̇ваа т̇огам̣ виссамаахи, ааг̇ад̇агаалз сад̇т̇аарам̣ д̣̇агкасий’’д̇и. ‘‘ахам̣, бханд̇з, ад̇д̇ано ж̇ийвид̇анд̇арааяам̣ на ж̇аанаами, згарад̇д̇знзвамхи гад̇т̇ажиби жирам̣ адтад̇ваа анисийд̣̇ид̇ваа вийсаяож̇анасад̇игам̣ маг̇г̇ам̣ ааг̇ад̇о, сад̇т̇аарам̣ бассид̇ваава виссамиссаамий’’д̇и вад̇ваа д̇арамаанаруубо саавад̇т̇им̣ бависид̇ваа анобамааяа б̣уд̣̇д̇хасирияаа вирожамаанам̣ бхаг̇аванд̇ам̣ басси. д̇зна вуд̇д̇ам̣ ‘‘д̇зна ко бана самаязна самб̣ахулаа бхигкуу аб̣бхогаасз жан̇гаманд̇и. ат̇а ко б̣аахияо д̣̇ааружийрияо язна д̇з бхигкуу д̇знубасан̇гамий’’д̇иаад̣̇и.
Bhagavāpi bāhiyassa āgamanaṃ ñatvā ‘‘na tāvassa indriyāni paripākaṃ gatāni, khaṇantare pana paripākaṃ gamissantī’’ti tassa indriyānaṃ paripākaṃ āgamayamāno mahābhikkhusaṅghaparivuto tasmiṃ khaṇe sāvatthiṃ piṇḍāya pāvisi. So ca jetavanaṃ pavisitvā bhuttapātarāse kāyālasiyavimocanatthaṃ abbhokāse caṅkamante sambahule bhikkhū passitvā ‘‘kahaṃ nu kho etarahi bhagavā’’ti pucchi. Bhikkhū ‘‘bhagavā sāvatthiṃ piṇḍāya paviṭṭho’’ti vatvā pucchiṃsu ‘‘tvaṃ pana kuto āgato’’ti? ‘‘Suppārakapaṭṭanato āgatomhī’’ti. ‘‘Dūrato āgatosi, nisīda, tāva pāde dhovitvā makkhetvā thokaṃ vissamāhi, āgatakāle satthāraṃ dakkhasī’’ti. ‘‘Ahaṃ, bhante, attano jīvitantarāyaṃ na jānāmi, ekarattenevamhi katthacipi ciraṃ aṭṭhatvā anisīditvā vīsayojanasatikaṃ maggaṃ āgato, satthāraṃ passitvāva vissamissāmī’’ti vatvā taramānarūpo sāvatthiṃ pavisitvā anopamāya buddhasiriyā virocamānaṃ bhagavantaṃ passi. Tena vuttaṃ ‘‘tena kho pana samayena sambahulā bhikkhū abbhokāse caṅkamanti. Atha kho bāhiyo dārucīriyo yena te bhikkhū tenupasaṅkamī’’tiādi.
д̇ад̇т̇а гаханд̇и гад̇т̇а. нууд̇и сам̣саяз, код̇и бад̣̇абууран̣з, гасмим̣ ну ко бад̣̇зсзд̇и ад̇т̇о. д̣̇ассанагаамамхаад̇и д̣̇адтугаамаа амха. маяан̃хи д̇ам̣ бхаг̇аванд̇ам̣ анд̇хо вияа жагкум̣, б̣ад̇хиро вияа сод̇ам̣, мууг̇о вияа галяаан̣авааггаран̣ам̣, хад̇т̇абаад̣̇авигало вияа хад̇т̇абаад̣̇з, д̣̇алид̣̇д̣̇о вияа д̇ханасамбад̣̇ам̣, ганд̇аарад̣̇д̇хаанаббадибанно вияа кзманд̇абхуумим̣, рог̇аабхибхууд̇о вияа аарог̇яам̣, махаасамуд̣̇д̣̇з бхиннанааво вияа махаагуллам̣ бассид̇ум̣ убасан̇гамид̇ун̃жа ижчаамаад̇и д̣̇ассзд̇и. д̇арамаанаруубод̇и д̇арамаанаагааро.
Tattha kahanti kattha. Nūti saṃsaye, khoti padapūraṇe, kasmiṃ nu kho padeseti attho. Dassanakāmamhāti daṭṭhukāmā amha. Mayañhi taṃ bhagavantaṃ andho viya cakkhuṃ, badhiro viya sotaṃ, mūgo viya kalyāṇavākkaraṇaṃ, hatthapādavikalo viya hatthapāde, daliddo viya dhanasampadaṃ, kantāraddhānappaṭipanno viya khemantabhūmiṃ, rogābhibhūto viya ārogyaṃ, mahāsamudde bhinnanāvo viya mahākullaṃ passituṃ upasaṅkamituñca icchāmāti dasseti. Taramānarūpoti taramānākāro.
баасаад̣̇иганд̇и б̣аад̇д̇им̣самахаабурисалагкан̣аасийд̇иануб̣яан̃ж̇анаб̣яаамаббабхаагзд̇умаалаалан̇гад̇ааяа саманд̇абаасаад̣̇игааяа ад̇д̇ано сарийрасобхаасамбад̇д̇ияаа руубагааяад̣̇ассанаб̣яаавадасса ж̇анасса саб̣б̣абхааг̇ад̇о басаад̣̇аавахам̣. басаад̣̇анийяанд̇и д̣̇асаб̣алажад̇увзсаараж̇ж̇ачаасаад̇хааран̣ан̃аан̣аадтаарасаавзн̣ига- б̣уд̣̇д̇хад̇хаммаббабхуд̇иабаримаан̣аг̇ун̣аг̇ан̣асаманнааг̇ад̇ааяа д̇хаммагааяасамбад̇д̇ияаа саригкагаж̇анасса басаад̣̇анийяам̣ басийд̣̇ид̇аб̣б̣аяуд̇д̇ам̣ басаад̣̇аарахам̣ ваа. санд̇инд̣̇рияанд̇и жагкаад̣̇ибан̃жинд̣̇рияалолабхааваабаг̇аманзна вуубасанд̇абан̃жинд̣̇рияам̣. санд̇амаанасанд̇и чадтасса манинд̣̇рияасса ниб̣б̣исзванабхаавуубаг̇аманзна вуубасанд̇амаанасам̣. уд̇д̇амад̣̇амат̇асамат̇амануббад̇д̇анд̇и логуд̇д̇арабан̃н̃аавимуд̇д̇ижзд̇овимуд̇д̇исан̇каад̇ам̣ уд̇д̇амам̣ д̣̇амат̇ам̣ самат̇ан̃жа ануббад̇ваа ад̇хиг̇анд̇ваа тид̇ам̣. д̣̇анд̇анд̇и субарисуд̣̇д̇хагааяасамаажаарад̇ааяа жзва хад̇т̇абаад̣̇агуггужжаабхаавад̇о д̣̇аваад̣̇иабхаавад̇о жа гааязна д̣̇анд̇ам̣. г̇уд̇д̇анд̇и субарисуд̣̇д̇хаважийсамаажаарад̇ааяа жзва нирад̇т̇агаваажаабхаавад̇о д̣̇аваад̣̇иабхаавад̇о жа ваажааяа г̇уд̇д̇ам̣. яад̇инд̣̇рияанд̇и субарисуд̣̇д̇хаманосамаажаарад̇ааяа арияид̣̇д̇хияог̇зна аб̣яаавадааббадисан̇каанубзгкаабхаавад̇о жа манинд̣̇рияавасзна яад̇инд̣̇рияам̣. нааг̇анд̇и чанд̣̇аад̣̇ивасзна аг̇аманад̇о, бахийнаанам̣ рааг̇аад̣̇игилзсаанам̣ бунаанааг̇аманад̇о, гассажиби ааг̇усса саб̣б̣ат̇ааби агаран̣ад̇о, бунаб̣бхавасса жа аг̇аманад̇од̇и имзхи гааран̣зхи нааг̇ам̣. зд̇т̇а жа баасаад̣̇иганд̇и иминаа руубагааязна бхаг̇авад̇о бамаан̣абхууд̇ад̇ам̣ д̣̇ийбзд̇и, басаад̣̇анийяанд̇и иминаа д̇хаммагааязна, санд̇инд̣̇рияанд̇иаад̣̇инаа сзсзхи бамаан̣абхууд̇ад̇ам̣ д̣̇ийбзд̇и. д̇зна жад̇уббамаан̣игз логасанниваасз анавасзсад̇о сад̇д̇аанам̣ бхаг̇авад̇о бамаан̣абхааво багаасид̇од̇и взд̣̇ид̇аб̣б̣о.
Pāsādikanti bāttiṃsamahāpurisalakkhaṇaasītianubyañjanabyāmappabhāketumālālaṅkatāya samantapāsādikāya attano sarīrasobhāsampattiyā rūpakāyadassanabyāvaṭassa janassa sabbabhāgato pasādāvahaṃ. Pasādanīyanti dasabalacatuvesārajjachaasādhāraṇañāṇaaṭṭhārasāveṇika- buddhadhammappabhutiaparimāṇaguṇagaṇasamannāgatāya dhammakāyasampattiyā sarikkhakajanassa pasādanīyaṃ pasīditabbayuttaṃ pasādārahaṃ vā. Santindriyanti cakkhādipañcindriyalolabhāvāpagamanena vūpasantapañcindriyaṃ. Santamānasanti chaṭṭhassa manindriyassa nibbisevanabhāvūpagamanena vūpasantamānasaṃ. Uttamadamathasamathamanuppattanti lokuttarapaññāvimutticetovimuttisaṅkhātaṃ uttamaṃ damathaṃ samathañca anuppatvā adhigantvā ṭhitaṃ. Dantanti suparisuddhakāyasamācāratāya ceva hatthapādakukkuccābhāvato davādiabhāvato ca kāyena dantaṃ. Guttanti suparisuddhavacīsamācāratāya ceva niratthakavācābhāvato davādiabhāvato ca vācāya guttaṃ. Yatindriyanti suparisuddhamanosamācāratāya ariyiddhiyogena abyāvaṭaappaṭisaṅkhānupekkhābhāvato ca manindriyavasena yatindriyaṃ. Nāganti chandādivasena agamanato, pahīnānaṃ rāgādikilesānaṃ punānāgamanato, kassacipi āgussa sabbathāpi akaraṇato, punabbhavassa ca agamanatoti imehi kāraṇehi nāgaṃ. Ettha ca pāsādikanti iminā rūpakāyena bhagavato pamāṇabhūtataṃ dīpeti, pasādanīyanti iminā dhammakāyena, santindriyantiādinā sesehi pamāṇabhūtataṃ dīpeti. Tena catuppamāṇike lokasannivāse anavasesato sattānaṃ bhagavato pamāṇabhāvo pakāsitoti veditabbo.
звам̣бхууд̇ан̃жа бхаг̇аванд̇ам̣ анд̇аравийт̇ияам̣ г̇ажчанд̇ам̣ д̣̇исваа ‘‘жирассам̣ вад̇а мз саммаасамб̣уд̣̇д̇хо д̣̇идто’’д̇и хадтад̇удто бан̃жаван̣н̣ааяа бийд̇ияаа ниранд̇арам̣ пудасарийро бийд̇ивибпаарид̇авиваданижжалаложано д̣̇идтадтаанад̇о бадтааяа он̣ад̇асарийро бхаг̇авад̇о сарийраббабхаавзмаж̇жхам̣ аж̇жхог̇аахзд̇ваа д̇ад̇т̇а нимуж̇ж̇анд̇о бхаг̇авад̇о самийбам̣ убасан̇гамид̇ваа бан̃жабад̇идтид̇зна ванд̣̇ид̇ваа бхаг̇авад̇о баад̣̇з самб̣ааханд̇о барижумб̣анд̇о ‘‘д̣̇зсзд̇у мз, бханд̇з, бхаг̇аваа д̇хамма’’нд̇и ааха. д̇зна вуд̇д̇ам̣ – ‘‘бхаг̇авад̇о баад̣̇з сирасаа нибад̇ид̇ваа бхаг̇аванд̇ам̣ зд̇ад̣̇авожа – ‘д̣̇зсзд̇у мз, бханд̇з, бхаг̇аваа д̇хаммам̣, д̣̇зсзд̇у суг̇ад̇о д̇хаммам̣, яам̣ мамасса д̣̇ийгхарад̇д̇ам̣ хид̇ааяа сукааяаа’’’д̇и.
Evaṃbhūtañca bhagavantaṃ antaravīthiyaṃ gacchantaṃ disvā ‘‘cirassaṃ vata me sammāsambuddho diṭṭho’’ti haṭṭhatuṭṭho pañcavaṇṇāya pītiyā nirantaraṃ phuṭasarīro pītivipphāritavivaṭaniccalalocano diṭṭhaṭṭhānato paṭṭhāya oṇatasarīro bhagavato sarīrappabhāvemajjhaṃ ajjhogāhetvā tattha nimujjanto bhagavato samīpaṃ upasaṅkamitvā pañcapatiṭṭhitena vanditvā bhagavato pāde sambāhanto paricumbanto ‘‘desetu me, bhante, bhagavā dhamma’’nti āha. Tena vuttaṃ – ‘‘bhagavato pādesirasā nipatitvā bhagavantaṃ etadavoca – ‘desetu me, bhante, bhagavā dhammaṃ, desetu sugato dhammaṃ, yaṃ mamassa dīgharattaṃ hitāya sukhāyā’’’ti.
д̇ад̇т̇а суг̇ад̇од̇и собханаг̇аманад̇д̇аа, сунд̣̇арам̣ таанам̣ г̇ад̇ад̇д̇аа, саммаа г̇ад̇ад̇д̇аа, саммаа г̇ад̣̇ад̇д̇аа суг̇ад̇о. г̇аманамби хи г̇ад̇анд̇и вужжад̇и, д̇ан̃жа бхаг̇авад̇о собханам̣ барисуд̣̇д̇хам̣ анаваж̇ж̇ам̣. гим̣ бана д̇анд̇и? арияамаг̇г̇о. д̇зна хзса г̇аманзна кзмам̣ д̣̇исам̣ асаж̇ж̇амаано г̇ад̇о, ан̃н̃зби г̇амзд̇ийд̇и собханаг̇аманад̇д̇аа суг̇ад̇о. сунд̣̇аран̃жзса таанам̣ амад̇ам̣ ниб̣б̣аанам̣ г̇ад̇од̇и сунд̣̇арам̣ таанам̣ г̇ад̇ад̇д̇аа суг̇ад̇о. саммаа жа г̇ад̇ад̇д̇аа суг̇ад̇о д̇зна д̇зна маг̇г̇зна бахийнз гилзсз буна абажжааг̇аманад̇о. вуд̇д̇ан̃хзд̇ам̣ –
Tattha sugatoti sobhanagamanattā, sundaraṃ ṭhānaṃ gatattā, sammā gatattā, sammā gadattā sugato. Gamanampi hi gatanti vuccati, tañca bhagavato sobhanaṃ parisuddhaṃ anavajjaṃ. Kiṃ pana tanti? Ariyamaggo. Tena hesa gamanena khemaṃ disaṃ asajjamāno gato, aññepi gametīti sobhanagamanattā sugato. Sundarañcesa ṭhānaṃ amataṃ nibbānaṃ gatoti sundaraṃ ṭhānaṃ gatattā sugato. Sammā ca gatattā sugato tena tena maggena pahīne kilese puna apaccāgamanato. Vuttañhetaṃ –
‘‘сод̇аабад̇д̇имаг̇г̇зна яз гилзсаа бахийнаа, д̇з гилзсз на бунзд̇и на бажжзд̇и на бажжааг̇ажчад̇ийд̇и суг̇ад̇о. сагад̣̇ааг̇аами…бз… арахад̇д̇амаг̇г̇зна…бз… на бажжааг̇ажчад̇ийд̇и суг̇ад̇о’’д̇и (жуул̣ани. мзд̇д̇аг̇уумаан̣авабужчаанид̣̇д̣̇зса 27).
‘‘Sotāpattimaggena ye kilesā pahīnā, te kilese na puneti na pacceti na paccāgacchatīti sugato. Sakadāgāmi…pe… arahattamaggena…pe… na paccāgacchatīti sugato’’ti (cūḷani. mettagūmāṇavapucchāniddesa 27).
ат̇а ваа саммаа г̇ад̇ад̇д̇аад̇и д̇ийсуби авад̇т̇аасу саммаабадибад̇д̇ияаа г̇ад̇ад̇д̇аа, суббадибаннад̇д̇аад̇и ад̇т̇о. д̣̇ийбан̇гарабаад̣̇амуулад̇о хи бадтааяа яаава махааб̣од̇химан̣д̣аа д̇аава самад̇им̣сабаарамибуурид̇ааяа саммаабадибад̇д̇ияаа н̃аад̇ад̇т̇ажарияааяа логад̇т̇ажарияааяа б̣уд̣̇д̇хад̇т̇ажарияааяа годим̣ баабун̣ид̇ваа саб̣б̣алогасса хид̇асукамзва бариб̣рууханд̇о сассад̇ам̣ ужчзд̣̇ам̣ гаамасукам̣ ад̇д̇агиламат̇анд̇и имз анд̇з анубаг̇ажчанд̇ияаа ануд̇д̇арааяа б̣ож̇жхан̇г̇абхааванаасан̇каад̇ааяа маж̇жхимааяа бадибад̣̇ааяа арияасажжзсу д̇ад̇о барам̣ самад̇хиг̇ад̇ад̇хаммаад̇хибад̇зяяо саб̣б̣асад̇д̇зсу ависаяааяа саммаабадибад̇д̇ияаа жа г̇ад̇о бадибаннод̇и звамби саммаа г̇ад̇ад̇д̇аа суг̇ад̇о. саммаа жзса г̇ад̣̇ад̇и яуд̇д̇адтаанз яуд̇д̇амзва ваажам̣ бхаасад̇ийд̇и суг̇ад̇о. вуд̇д̇амби жзд̇ам̣ –
Atha vā sammā gatattāti tīsupi avatthāsu sammāpaṭipattiyā gatattā, suppaṭipannattāti attho. Dīpaṅkarapādamūlato hi paṭṭhāya yāva mahābodhimaṇḍā tāva samatiṃsapāramipūritāya sammāpaṭipattiyā ñātatthacariyāya lokatthacariyāya buddhatthacariyāya koṭiṃ pāpuṇitvā sabbalokassa hitasukhameva paribrūhanto sassataṃ ucchedaṃ kāmasukhaṃ attakilamathanti ime ante anupagacchantiyā anuttarāya bojjhaṅgabhāvanāsaṅkhātāya majjhimāya paṭipadāya ariyasaccesu tato paraṃ samadhigatadhammādhipateyyo sabbasattesu avisayāya sammāpaṭipattiyā ca gato paṭipannoti evampi sammā gatattā sugato. Sammā cesa gadati yuttaṭṭhāne yuttameva vācaṃ bhāsatīti sugato. Vuttampi cetaṃ –
‘‘гаалаваад̣̇ий , бхууд̇аваад̣̇ий, ад̇т̇аваад̣̇ий, д̇хаммаваад̣̇ий, винаяаваад̣̇ий, нид̇хаанавад̇им̣ ваажам̣ бхаасид̇аа гаалзна саабад̣̇зсам̣ барияанд̇авад̇им̣ ад̇т̇асам̣хид̇а’’нд̇и (д̣̇ий. ни. 1.9; ма. ни. 3.14).
‘‘Kālavādī , bhūtavādī, atthavādī, dhammavādī, vinayavādī, nidhānavatiṃ vācaṃ bhāsitā kālena sāpadesaṃ pariyantavatiṃ atthasaṃhita’’nti (dī. ni. 1.9; ma. ni. 3.14).
абарамби вуд̇д̇ам̣ –
Aparampi vuttaṃ –
‘‘яаа саа ваажаа абхууд̇аа ад̇ажчаа анад̇т̇асам̣хид̇аа, яаа жа барзсам̣ аббияаа аманаабаа, на д̇ам̣ д̇ат̇ааг̇ад̇о ваажам̣ бхаасад̇ий’’д̇иаад̣̇и (ма. ни. 2.86).
‘‘Yā sā vācā abhūtā atacchā anatthasaṃhitā, yā ca paresaṃ appiyā amanāpā, na taṃ tathāgato vācaṃ bhāsatī’’tiādi (ma. ni. 2.86).
звам̣ саммаа г̇ад̣̇ад̇д̇ааби суг̇ад̇о.
Evaṃ sammā gadattāpi sugato.
яам̣ мамасса д̣̇ийгхарад̇д̇ам̣ хид̇ааяа сукааяаад̇и яам̣ д̇хаммасса убад̣̇исанам̣ жирагаалам̣ мама жхаанавимогкаад̣̇ихид̇ааяа д̇ад̣̇ад̇хиг̇анд̇аб̣б̣асукааяа жа сияаа. агаало ко д̇аава б̣аахияаад̇и д̇ава д̇хаммад̣̇зсанааяа на д̇аава гаалод̇и ад̇т̇о. гим̣ бана бхаг̇авад̇о сад̇д̇ахид̇абадибад̇д̇ияаа агаалоби наама ад̇т̇и, яад̇о бхаг̇аваа гаалаваад̣̇ийд̇и? вужжад̇з – гаалод̇и жзд̇т̇а взнзяяаанам̣ инд̣̇рияабарибаагагаало ад̇хиббзд̇о. яасмаа бана д̇ад̣̇аа б̣аахияасса ад̇д̇ано инд̣̇рияаанам̣ барибаггаабарибаггабхааво д̣̇уб̣б̣ин̃н̃зяяо, д̇асмаа бхаг̇аваа д̇ам̣ авад̇ваа ад̇д̇ано анд̇аравийт̇ияам̣ тид̇абхаавамасса гааран̣ам̣ абад̣̇исанд̇о ааха ‘‘анд̇арагхарам̣ бавидтамхаа’’д̇и. д̣̇уж̇ж̇аананд̇и д̣̇уб̣б̣ин̃н̃зяяам̣. ж̇ийвид̇анд̇арааяаананд̇и ж̇ийвид̇асса анд̇арааяагарад̇хаммаанам̣ вад̇д̇анам̣ авад̇д̇анам̣ ваад̇и вад̇д̇угаамо самбхамавасзна ‘‘ж̇ийвид̇анд̇арааяаана’’нд̇и ааха. д̇ат̇аа хи анзгабажжаяаббадиб̣ад̣̇д̇хавуд̇д̇иж̇ийвид̇ам̣ анзгаруубаа жа д̇ад̣̇анд̇арааяаа. вуд̇д̇ан̃хи –
Yaṃ mamassa dīgharattaṃ hitāya sukhāyāti yaṃ dhammassa upadisanaṃ cirakālaṃ mama jhānavimokkhādihitāya tadadhigantabbasukhāya ca siyā. Akālo kho tāva bāhiyāti tava dhammadesanāya na tāva kāloti attho. Kiṃ pana bhagavato sattahitapaṭipattiyā akālopi nāma atthi, yato bhagavā kālavādīti? Vuccate – kāloti cettha veneyyānaṃ indriyaparipākakālo adhippeto. Yasmā pana tadā bāhiyassa attano indriyānaṃ paripakkāparipakkabhāvo dubbiññeyyo, tasmā bhagavā taṃ avatvā attano antaravīthiyaṃ ṭhitabhāvamassa kāraṇaṃ apadisanto āha ‘‘antaragharaṃ paviṭṭhamhā’’ti. Dujjānanti dubbiññeyyaṃ. Jīvitantarāyānanti jīvitassa antarāyakaradhammānaṃ vattanaṃ avattanaṃ vāti vattukāmo sambhamavasena ‘‘jīvitantarāyāna’’nti āha. Tathā hi anekapaccayappaṭibaddhavuttijīvitaṃ anekarūpā ca tadantarāyā. Vuttañhi –
‘‘аж̇ж̇зва гижжамаад̇аббам̣, го ж̇ан̃н̃аа маран̣ам̣ сувз;
‘‘Ajjeva kiccamātappaṃ, ko jaññā maraṇaṃ suve;
на хи но сан̇г̇арам̣ д̇зна, махаасзнзна мажжунаа’’д̇и. (ма. ни. 3.272; нзд̇д̇и. 103);
Na hi no saṅgaraṃ tena, mahāsenena maccunā’’ti. (ma. ni. 3.272; netti. 103);
гасмаа банааяам̣ ж̇ийвид̇анд̇арааяамзва д̇аава бурагкарод̇и? ‘‘нимид̇д̇ан̃н̃уд̇ааяа ад̣̇идтагосаллзна ваа’’д̇и гзжи. абарз ‘‘д̣̇звад̇ааяа санд̇игз ж̇ийвид̇анд̇арааяасса суд̇ад̇д̇аа’’д̇и вад̣̇анд̇и. анд̇имабхавигад̇д̇аа бана убаниссаяасамбад̇д̇ияаа жод̣̇ияамаано звамааха. на хи д̇зсам̣ аббад̇д̇аарахад̇д̇аанам̣ ж̇ийвид̇агкаяо ход̇и. гим̣ бана гааран̣аа бхаг̇аваа д̇асса д̇хаммам̣ д̣̇зсзд̇угаамова д̣̇вигкад̇д̇ум̣ бадигкиби? звам̣ гирасса ахоси ‘‘имасса мам̣ д̣̇идтагаалад̇о бадтааяа сагаласарийрам̣ бийд̇ияаа ниранд̇арам̣ пудам̣, ад̇иб̣алаваа бийд̇ивзг̇о, д̇хаммам̣ суд̇вааби на д̇аава сагкиссад̇и бадивиж̇жхид̇ум̣. яаава бана маж̇жхад̇д̇убзгкаа сан̣таад̇и, д̇аава д̇идтад̇у, вийсаяож̇анасад̇ам̣ маг̇г̇ам̣ ааг̇ад̇ад̇д̇аа д̣̇арат̇обисса гааяз б̣алаваа, соби д̇аава бадиббассамбхад̇уу’’д̇и. д̇асмаа д̣̇вигкад̇д̇ум̣ бадигкиби. гзжи бана ‘‘д̇хаммассаванз аад̣̇араж̇ананад̇т̇ам̣ бхаг̇аваа звамагаасий’’д̇и вад̣̇анд̇и. д̇ад̇ияаваарам̣ яаажид̇о бана маж̇жхад̇д̇убзгкам̣ д̣̇арат̇аббадибассад̣̇д̇хим̣ бажжубадтид̇ан̃жасса ж̇ийвид̇анд̇арааяам̣ д̣̇исваа ‘‘ид̣̇аани д̇хаммад̣̇зсанааяа гаало’’д̇и жинд̇зд̇ваа ‘‘д̇асмаа д̇ихаа’’д̇иаад̣̇инаа д̇хаммад̣̇зсанам̣ аарабхи.
Kasmā panāyaṃ jīvitantarāyameva tāva purakkharoti? ‘‘Nimittaññutāya adiṭṭhakosallena vā’’ti keci. Apare ‘‘devatāya santike jīvitantarāyassa sutattā’’ti vadanti. Antimabhavikattā pana upanissayasampattiyā codiyamāno evamāha. Na hi tesaṃ appattaarahattānaṃ jīvitakkhayo hoti. Kiṃ pana kāraṇā bhagavā tassa dhammaṃ desetukāmova dvikkhattuṃ paṭikkhipi? Evaṃ kirassa ahosi ‘‘imassa maṃ diṭṭhakālato paṭṭhāya sakalasarīraṃ pītiyā nirantaraṃ phuṭaṃ, atibalavā pītivego, dhammaṃ sutvāpi na tāva sakkhissati paṭivijjhituṃ. Yāva pana majjhattupekkhā saṇṭhāti, tāva tiṭṭhatu, vīsayojanasataṃ maggaṃ āgatattā darathopissa kāye balavā, sopi tāva paṭippassambhatū’’ti. Tasmā dvikkhattuṃ paṭikkhipi. Keci pana ‘‘dhammassavane ādarajananatthaṃ bhagavā evamakāsī’’ti vadanti. Tatiyavāraṃ yācito pana majjhattupekkhaṃ darathappaṭipassaddhiṃ paccupaṭṭhitañcassa jīvitantarāyaṃ disvā ‘‘idāni dhammadesanāya kālo’’ti cintetvā ‘‘tasmā tihā’’tiādinā dhammadesanaṃ ārabhi.
д̇ад̇т̇а д̇асмаад̇и яасмаа д̇вам̣ уссуггаж̇аад̇о худ̇ваа ад̇ивияа мам̣ яаажаси, яасмаа ваа ж̇ийвид̇анд̇арааяаанам̣ д̣̇уж̇ж̇аанад̇ам̣ вад̣̇аси, инд̣̇рияаани жа д̇з барибаагам̣ г̇ад̇аани, д̇асмаа. д̇ихаад̇и нибаад̇амад̇д̇ам̣. д̇зд̇и д̇аяаа званд̇и ид̣̇аани вад̇д̇аб̣б̣аагаарам̣ вад̣̇ад̇и.
Tattha tasmāti yasmā tvaṃ ussukkajāto hutvā ativiya maṃ yācasi, yasmā vā jīvitantarāyānaṃ dujjānataṃ vadasi, indriyāni ca te paripākaṃ gatāni, tasmā. Tihāti nipātamattaṃ. Teti tayā evanti idāni vattabbākāraṃ vadati.
сигкид̇аб̣б̣анд̇и ад̇хисийласигкаад̣̇ийнам̣ д̇иссаннамби сигкаанам̣ васзна сигканам̣ гаад̇аб̣б̣ам̣. яат̇аа бана сигкид̇аб̣б̣ам̣, д̇ам̣ д̣̇ассзнд̇о ‘‘д̣̇идтз д̣̇идтамад̇д̇ам̣ бхависсад̇ий’’д̇иаад̣̇имааха.
Sikkhitabbanti adhisīlasikkhādīnaṃ tissannampi sikkhānaṃ vasena sikkhanaṃ kātabbaṃ. Yathā pana sikkhitabbaṃ, taṃ dassento ‘‘diṭṭhe diṭṭhamattaṃ bhavissatī’’tiādimāha.
д̇ад̇т̇а д̣̇идтз д̣̇идтамад̇д̇анд̇и руубааяад̇анз жагкувин̃н̃аан̣зна д̣̇идтамад̇д̇ам̣. яат̇аа хи жагкувин̃н̃аан̣ам̣ руубз руубамад̇д̇амзва бассад̇и, на анижжаад̣̇исабхаавам̣, звамзва сзсам̣. жагкуд̣̇вааригавин̃н̃аан̣зна хи мз д̣̇идтамад̇д̇амзва бхависсад̇ийд̇и сигкид̇аб̣б̣анд̇и ад̇т̇о. ат̇а ваа д̣̇идтз д̣̇идтам̣ наама жагкувин̃н̃аан̣зна руубавиж̇аанананд̇и ад̇т̇о. мад̇д̇анд̇и бамаан̣ам̣. д̣̇идтаа мад̇д̇аа зд̇ассаад̇и д̣̇идтамад̇д̇ам̣, жагкувин̃н̃аан̣амад̇д̇амзва жид̇д̇ам̣ бхависсад̇ийд̇и ад̇т̇о. ид̣̇ам̣ вуд̇д̇ам̣ ход̇и – яат̇аа аабаат̇аг̇ад̇з руубз жагкувин̃н̃аан̣ам̣ на раж̇ж̇ад̇и, на д̣̇уссад̇и, на муяхад̇и, звам̣ рааг̇аад̣̇ивирахзна жагкувин̃н̃аан̣амад̇д̇амзва мз ж̇аванам̣ бхависсад̇и, жагкувин̃н̃аан̣аббамаан̣знзва ж̇аванам̣ табзссаамийд̇и.
Tattha diṭṭhe diṭṭhamattanti rūpāyatane cakkhuviññāṇena diṭṭhamattaṃ. Yathā hi cakkhuviññāṇaṃ rūpe rūpamattameva passati, na aniccādisabhāvaṃ, evameva sesaṃ. Cakkhudvārikaviññāṇena hi me diṭṭhamattameva bhavissatīti sikkhitabbanti attho. Atha vā diṭṭhe diṭṭhaṃ nāma cakkhuviññāṇena rūpavijānananti attho. Mattanti pamāṇaṃ. Diṭṭhā mattā etassāti diṭṭhamattaṃ, cakkhuviññāṇamattameva cittaṃ bhavissatīti attho. Idaṃ vuttaṃ hoti – yathā āpāthagate rūpe cakkhuviññāṇaṃ na rajjati, na dussati, na muyhati, evaṃ rāgādivirahena cakkhuviññāṇamattameva me javanaṃ bhavissati, cakkhuviññāṇappamāṇeneva javanaṃ ṭhapessāmīti.
ат̇а ваа д̣̇идтам̣ наама жагкувин̃н̃аан̣зна д̣̇идтам̣ руубам̣, д̣̇идтамад̇д̇ам̣ наама д̇ад̇т̇зва уббаннам̣ самбадижчанасанд̇ийран̣аводтаб̣б̣анасан̇каад̇ам̣ жид̇д̇ад̇д̇аяам̣. яат̇аа д̇ам̣ на раж̇ж̇ад̇и, на д̣̇уссад̇и, на муяхад̇и, звам̣ аабаат̇аг̇ад̇з руубз д̇знзва самбадижчанаад̣̇иббамаан̣зна ж̇аванам̣ уббаад̣̇зссаами, наахам̣ д̇ам̣ бамаан̣ам̣ ад̇иггамид̇ваа раж̇ж̇анаад̣̇ивасзна уббаж̇ж̇ид̇ум̣ д̣̇ассаамийд̇и звамзд̇т̇а ад̇т̇о д̣̇адтаб̣б̣о. зсзва наяо суд̇амуд̇з . муд̇анд̇и д̇ад̣̇аарамман̣авин̃н̃аан̣зхи сад̣̇д̇хим̣ г̇анд̇харасаподтаб̣б̣ааяад̇анам̣ взд̣̇ид̇аб̣б̣ам̣. вин̃н̃аад̇з вин̃н̃аад̇амад̇д̇анд̇и зд̇т̇а бана вин̃н̃аад̇ам̣ наама манод̣̇ваарааваж̇ж̇анзна вин̃н̃аад̇аарамман̣ам̣. д̇асмим̣ вин̃н̃аад̇з вин̃н̃аад̇амад̇д̇анд̇и ааваж̇ж̇анаббамаан̣ам̣. яат̇аа ааваж̇ж̇анам̣ на раж̇ж̇ад̇и, на д̣̇уссад̇и, на муяхад̇и, звам̣ раж̇ж̇анаад̣̇ивасзна жа уббаж̇ж̇ид̇ум̣ ад̣̇ад̇ваа ааваж̇ж̇анаббамаан̣знзва жид̇д̇ам̣ табзссаамийд̇и аяамзд̇т̇а ад̇т̇о. зван̃хи д̇з, б̣аахияа, сигкид̇аб̣б̣анд̇и звам̣ имааяа бадибад̣̇ааяа д̇аяаа, б̣аахияа, д̇иссаннам̣ сигкаанам̣ анувад̇д̇анавасзна сигкид̇аб̣б̣ам̣.
Atha vā diṭṭhaṃ nāma cakkhuviññāṇena diṭṭhaṃ rūpaṃ, diṭṭhamattaṃ nāma tattheva uppannaṃ sampaṭicchanasantīraṇavoṭṭhabbanasaṅkhātaṃ cittattayaṃ. Yathā taṃ na rajjati, na dussati, na muyhati, evaṃ āpāthagate rūpe teneva sampaṭicchanādippamāṇena javanaṃ uppādessāmi, nāhaṃ taṃ pamāṇaṃ atikkamitvā rajjanādivasena uppajjituṃ dassāmīti evamettha attho daṭṭhabbo. Eseva nayo sutamute . Mutanti tadārammaṇaviññāṇehi saddhiṃ gandharasaphoṭṭhabbāyatanaṃ veditabbaṃ. Viññāte viññātamattanti ettha pana viññātaṃ nāma manodvārāvajjanena viññātārammaṇaṃ. Tasmiṃ viññāte viññātamattanti āvajjanappamāṇaṃ. Yathā āvajjanaṃ na rajjati, na dussati, na muyhati, evaṃ rajjanādivasena ca uppajjituṃ adatvā āvajjanappamāṇeneva cittaṃ ṭhapessāmīti ayamettha attho. Evañhi te, bāhiya, sikkhitabbanti evaṃ imāya paṭipadāya tayā, bāhiya, tissannaṃ sikkhānaṃ anuvattanavasena sikkhitabbaṃ.
ид̇и бхаг̇аваа б̣аахияасса сам̣кид̇д̇аружид̇ааяа чахи вин̃н̃аан̣агааязхи сад̣̇д̇хим̣ чал̣аарамман̣абхзд̣̇абхиннам̣ вибассанааяа висаяам̣ д̣̇идтаад̣̇ийхи жад̇уухи годтаасзхи вибхаж̇ид̇ваа д̇ад̇т̇асса н̃аад̇ад̇ийран̣абарин̃н̃ам̣ д̣̇ассзд̇и. гат̇ам̣? зд̇т̇а хи руубааяад̇анам̣ бассид̇аб̣б̣адтзна д̣̇идтам̣ наама, жагкувин̃н̃аан̣ам̣ бана сад̣̇д̇хим̣ д̇ам̣д̣̇вааригавин̃н̃аан̣зхи д̣̇ассанадтзна, д̇ад̣̇убхаяамби яат̇аабажжаяам̣ бавад̇д̇амаанам̣ д̇хаммамад̇д̇амзва, на зд̇т̇а гожи гад̇д̇аа ваа гаарзд̇аа ваа, яад̇о д̇ам̣ худ̇ваа абхаавадтзна анижжам̣, уд̣̇аяаб̣б̣аяаббадибийл̣анадтзна д̣̇угкам̣, авасавад̇д̇анадтзна анад̇д̇аад̇и гуд̇о д̇ад̇т̇а бан̣д̣ид̇асса раж̇ж̇анаад̣̇ийнам̣ огаасод̇и? аяамзд̇т̇а ад̇хиббааяо суд̇аад̣̇ийсуби.
Iti bhagavā bāhiyassa saṃkhittarucitāya chahi viññāṇakāyehi saddhiṃ chaḷārammaṇabhedabhinnaṃ vipassanāya visayaṃ diṭṭhādīhi catūhi koṭṭhāsehi vibhajitvā tatthassa ñātatīraṇapariññaṃ dasseti. Kathaṃ? Ettha hi rūpāyatanaṃ passitabbaṭṭhena diṭṭhaṃ nāma, cakkhuviññāṇaṃ pana saddhiṃ taṃdvārikaviññāṇehi dassanaṭṭhena, tadubhayampi yathāpaccayaṃ pavattamānaṃ dhammamattameva, na ettha koci kattā vā kāretā vā, yato taṃ hutvā abhāvaṭṭhena aniccaṃ, udayabbayappaṭipīḷanaṭṭhena dukkhaṃ, avasavattanaṭṭhena anattāti kuto tattha paṇḍitassa rajjanādīnaṃ okāsoti? Ayamettha adhippāyo sutādīsupi.
ид̣̇аани н̃аад̇ад̇ийран̣абарин̃н̃аасу бад̇идтид̇асса убари саха маг̇г̇апалзна бахаанабарин̃н̃ам̣ д̣̇ассзд̇ум̣, ‘‘яад̇о ко д̇з, б̣аахияаа’’д̇иаад̣̇и аарад̣̇д̇хам̣. д̇ад̇т̇а яад̇од̇и яад̣̇аа, яасмаа ваа. д̇зд̇и д̇ава. д̇ад̇од̇и д̇ад̣̇аа, д̇асмаа ваа. д̇знаад̇и д̇зна д̣̇идтаад̣̇инаа, д̣̇идтаад̣̇ибадиб̣ад̣̇д̇хзна рааг̇аад̣̇инаа ваа. ид̣̇ам̣ вуд̇д̇ам̣ ход̇и – б̣аахияа, д̇ава яасмим̣ гаалз язна ваа гааран̣зна д̣̇идтаад̣̇ийсу маяаа вуд̇д̇авид̇хим̣ бадибаж̇ж̇анд̇асса авибарийд̇асабхаавааваб̣од̇хзна д̣̇идтаад̣̇имад̇д̇ам̣ бхависсад̇и, д̇асмим̣ гаалз д̇зна ваа гааран̣зна д̣̇идтаад̣̇ибадиб̣ад̣̇д̇хзна рааг̇аад̣̇инаа саха на бхависсаси, рад̇д̇о ваа д̣̇удто ваа муул̣хо ваа на бхависсаси, бахийнарааг̇аад̣̇игад̇д̇аа д̇зна ваа д̣̇идтаад̣̇инаа саха бадиб̣ад̣̇д̇хо на бхависсасийд̇и. д̇ад̇о д̇вам̣, б̣аахияа, на д̇ад̇т̇аад̇и яад̣̇аа яасмаа ваа д̇вам̣ д̇зна рааг̇зна ваа рад̇д̇о д̣̇осзна ваа д̣̇удто мохзна ваа муул̣хо на бхависсаси, д̇ад̣̇аа д̇асмаа ваа д̇вам̣ д̇ад̇т̇а д̣̇идтаад̣̇игз на бхависсаси, д̇асмим̣ д̣̇идтз ваа суд̇амуд̇авин̃н̃аад̇з ваа ‘‘зд̇ам̣ мама, зсохамасми, зсо мз ад̇д̇аа’’д̇и д̇ан̣хаамаанад̣̇идтийхи аллийно бад̇идтид̇о на бхависсаси. зд̇д̇аавад̇аа бахаанабарин̃н̃ам̣ мад̇т̇агам̣ баабзд̇ваа кийн̣аасавабхууми д̣̇ассид̇аа.
Idāni ñātatīraṇapariññāsu patiṭṭhitassa upari saha maggaphalena pahānapariññaṃ dassetuṃ, ‘‘yato kho te, bāhiyā’’tiādi āraddhaṃ. Tattha yatoti yadā, yasmā vā. Teti tava. Tatoti tadā, tasmā vā. Tenāti tena diṭṭhādinā, diṭṭhādipaṭibaddhena rāgādinā vā. Idaṃ vuttaṃ hoti – bāhiya, tava yasmiṃ kāle yena vā kāraṇena diṭṭhādīsu mayā vuttavidhiṃ paṭipajjantassa aviparītasabhāvāvabodhena diṭṭhādimattaṃ bhavissati, tasmiṃ kāle tena vā kāraṇena diṭṭhādipaṭibaddhena rāgādinā saha na bhavissasi, ratto vā duṭṭho vā mūḷho vā na bhavissasi, pahīnarāgādikattā tena vā diṭṭhādinā saha paṭibaddho na bhavissasīti. Tato tvaṃ, bāhiya, na tatthāti yadā yasmā vā tvaṃ tena rāgena vā ratto dosena vā duṭṭho mohena vā mūḷho na bhavissasi, tadā tasmā vā tvaṃ tattha diṭṭhādike na bhavissasi, tasmiṃ diṭṭhe vā sutamutaviññāte vā ‘‘etaṃ mama, esohamasmi, eso me attā’’ti taṇhāmānadiṭṭhīhi allīno patiṭṭhito na bhavissasi. Ettāvatā pahānapariññaṃ matthakaṃ pāpetvā khīṇāsavabhūmi dassitā.
д̇ад̇о д̇вам̣, б̣аахияа, нзвид̇ха на хурам̣ на убхаяаманд̇арзнаад̇и яад̣̇аа д̇вам̣, б̣аахияа, д̇зна рааг̇аад̣̇инаа д̇ад̇т̇а д̣̇идтаад̣̇ийсу бадиб̣ад̣̇д̇хо на бхависсаси, д̇ад̣̇аа д̇вам̣ нзва ид̇халогз на баралогз на убхаяад̇т̇ааби. зсзванд̇о д̣̇угкассаад̇и гилзсад̣̇угкасса жа ваддад̣̇угкасса жа аяамзва хи анд̇о аяам̣ баривадумабхаавод̇и аяамзва хи зд̇т̇а ад̇т̇о. яз бана ‘‘убхаяаманд̇арзнаа’’д̇и бад̣̇ам̣ г̇ахзд̇ваа анд̇араабхавам̣ наама ижчанд̇и, д̇зсам̣ д̇ам̣ мижчаа. анд̇араабхавасса хи бхааво абхид̇хаммз бадигкид̇д̇оязва. анд̇арзнаад̇и важанам̣ бана вигаббанд̇арад̣̇ийбанам̣, д̇асмаа аяамзд̇т̇а ад̇т̇о – ‘‘нзва ид̇ха на хурам̣, абаро вигаббо на убхаяа’’нд̇и.
Tatotvaṃ, bāhiya, nevidha na huraṃ na ubhayamantarenāti yadā tvaṃ, bāhiya, tena rāgādinā tattha diṭṭhādīsu paṭibaddho na bhavissasi, tadā tvaṃ neva idhaloke na paraloke na ubhayatthāpi. Esevanto dukkhassāti kilesadukkhassa ca vaṭṭadukkhassa ca ayameva hi anto ayaṃ parivaṭumabhāvoti ayameva hi ettha attho. Ye pana ‘‘ubhayamantarenā’’ti padaṃ gahetvā antarābhavaṃ nāma icchanti, tesaṃ taṃ micchā. Antarābhavassa hi bhāvo abhidhamme paṭikkhittoyeva. Antarenāti vacanaṃ pana vikappantaradīpanaṃ, tasmā ayamettha attho – ‘‘neva idha na huraṃ, aparo vikappo na ubhaya’’nti.
ат̇а ваа анд̇арзнаад̇и важанам̣ бана вигаббанд̇араабхаавад̣̇ийбанам̣. д̇ассад̇т̇о – ‘‘нзва ид̇ха на хурам̣, убхаяаманд̇арз бана на ан̃н̃адтаанам̣ ад̇т̇ий’’д̇и. язби жа ‘‘анд̇араабариниб̣б̣ааяий самбхавзсий’’д̇и жа имзсам̣ суд̇д̇абад̣̇аанам̣ ад̇т̇ам̣ аяонисо г̇ахзд̇ваа ‘‘ад̇т̇иязва анд̇араабхаво’’д̇и вад̣̇анд̇и, д̇зби яасмаа авихаад̣̇ийсу д̇ад̇т̇а д̇ад̇т̇а ааяувзмаж̇жхам̣ анад̇иггамид̇ваа анд̇араа аг̇г̇амаг̇г̇аад̇хиг̇амзна анавасзсагилзсабариниб̣б̣аанзна бариниб̣б̣ааяад̇ийд̇и анд̇араабариниб̣б̣ааяий, на анд̇араабхавабхууд̇од̇и буримасса суд̇д̇абад̣̇асса ад̇т̇о. бажчимасса жа яз бхууд̇аа зва, на бхависсанд̇и, д̇з кийн̣аасаваа буримабад̣̇з бхууд̇аад̇и вуд̇д̇аа. д̇аб̣б̣ируд̣̇д̇хад̇ааяа самбхавамзсанд̇ийд̇и самбхавзсино, аббахийнабхавасам̣яож̇анад̇д̇аа сзкаа бут̇уж̇ж̇анаа жа. жад̇уусу ваа яонийсу ан̣д̣аж̇аж̇алааб̣уж̇асад̇д̇аа яаава ан̣д̣агосам̣ вад̇т̇игосан̃жа на бхинд̣̇анд̇и, д̇аава самбхавзсий наама, ан̣д̣агосад̇о вад̇т̇игосад̇о жа б̣ахи нигканд̇аа бхууд̇аа наама. сам̣сзд̣̇аж̇аа обабаад̇игаа жа батамажид̇д̇агкан̣з самбхавзсий наама, д̣̇уд̇ияажид̇д̇агкан̣ад̇о бадтааяа бхууд̇аа наама. язна ваа ирияаабат̇зна ж̇ааяанд̇и, яаава д̇ад̇о ан̃н̃ам̣ на баабун̣анд̇и, д̇аава самбхавзсино, д̇ад̇о барам̣ бхууд̇аад̇и ад̇т̇о. д̇асмаа над̇т̇ийд̇и бадигкибид̇аб̣б̣аа. сад̇и хи уж̇угз баал̣иануг̇ад̇з ад̇т̇з гим̣ анид̣̇д̇хаарид̇асаамад̇т̇иязна анд̇араабхавзна баригаббид̇зна баяож̇ананд̇и.
Atha vā antarenāti vacanaṃ pana vikappantarābhāvadīpanaṃ. Tassattho – ‘‘neva idha na huraṃ, ubhayamantare pana na aññaṭṭhānaṃ atthī’’ti. Yepi ca ‘‘antarāparinibbāyī sambhavesī’’ti ca imesaṃ suttapadānaṃ atthaṃ ayoniso gahetvā ‘‘atthiyeva antarābhavo’’ti vadanti, tepi yasmā avihādīsu tattha tattha āyuvemajjhaṃ anatikkamitvā antarā aggamaggādhigamena anavasesakilesaparinibbānena parinibbāyatīti antarāparinibbāyī, na antarābhavabhūtoti purimassa suttapadassa attho. Pacchimassa ca ye bhūtā eva, na bhavissanti, te khīṇāsavā purimapade bhūtāti vuttā. Tabbiruddhatāya sambhavamesantīti sambhavesino, appahīnabhavasaṃyojanattā sekhā puthujjanā ca. Catūsu vā yonīsu aṇḍajajalābujasattā yāva aṇḍakosaṃ vatthikosañca na bhindanti, tāva sambhavesī nāma, aṇḍakosato vatthikosato ca bahi nikkhantā bhūtā nāma. Saṃsedajā opapātikā ca paṭhamacittakkhaṇe sambhavesī nāma, dutiyacittakkhaṇato paṭṭhāya bhūtā nāma. Yena vā iriyāpathena jāyanti, yāva tato aññaṃ na pāpuṇanti, tāva sambhavesino, tato paraṃ bhūtāti attho. Tasmā natthīti paṭikkhipitabbā. Sati hi ujuke pāḷianugate atthe kiṃ aniddhāritasāmatthiyena antarābhavena parikappitena payojananti.
яз бана ‘‘санд̇аанавасзна бавад̇д̇амаанаанам̣ д̇хаммаанам̣ авижчзд̣̇зна д̣̇зсанд̇арзсу баад̇убхааво д̣̇идто, яат̇аа д̇ам̣ вийхиаад̣̇иавин̃н̃аан̣агасанд̇аанз, звам̣ савин̃н̃аан̣агасанд̇аанзби авижчзд̣̇зна д̣̇зсанд̇арзсу баад̇убхаавзна бхавид̇аб̣б̣ам̣. аяан̃жа наяо сад̇и анд̇араабхавз яуж̇ж̇ад̇и, на ан̃н̃ат̇аа’’д̇и яуд̇д̇им̣ вад̣̇анд̇и. д̇зна хи ид̣̇д̇химад̇о жзд̇овасиббад̇д̇асса жид̇д̇аануг̇ад̇игам̣ гааяам̣ ад̇хидтаханд̇асса кан̣зна б̣рахмалогад̇о ид̇хуубасан̇гаманз ид̇о ваа б̣рахмалогаг̇аманз яуд̇д̇и вад̇д̇аб̣б̣аа. яад̣̇и саб̣б̣ад̇т̇зва авижчиннад̣̇зсз д̇хаммаанам̣ бавад̇д̇и ижчид̇аа, яад̣̇иби сияаа ид̣̇д̇химанд̇аанам̣ ид̣̇д̇хивисаяо ажинд̇зяяод̇и. д̇ам̣ ид̇хааби самаанам̣ ‘‘гаммавибааго ажинд̇зяяо’’д̇и важанад̇о. д̇асмаа д̇ам̣ д̇зсам̣ мад̇имад̇д̇амзва. ажинд̇зяяасабхааваа хи сабхаавад̇хаммаа, д̇з гад̇т̇ажи бажжаяавасзна вижчиннад̣̇зсз баад̇убхаванд̇и, гад̇т̇ажи авижчиннад̣̇зсз. д̇ат̇аа хи мукагхосаад̣̇ийхи бажжаязхи ан̃н̃асмим̣ д̣̇зсз аад̣̇аасабаб̣б̣ад̇аббад̣̇зсаад̣̇игз бадиб̣имб̣абадигхосаад̣̇игам̣ бажжаяуббаннам̣ ниб̣б̣ад̇д̇амаанам̣ д̣̇иссад̇и, д̇асмаа на саб̣б̣ам̣ саб̣б̣ад̇т̇а убанзд̇аб̣б̣анд̇и аяамзд̇т̇а сан̇кзбо. вид̇т̇ааро бана бадиб̣имб̣асса уд̣̇аахаран̣абхаавасаад̇ханаад̣̇иго анд̇араабхавагат̇аавижааро гат̇аавад̇т̇убагаран̣асса (гат̇аа. 505; гат̇аа. адта. 505) дийгааяам̣ г̇ахзд̇аб̣б̣о.
Ye pana ‘‘santānavasena pavattamānānaṃ dhammānaṃ avicchedena desantaresu pātubhāvo diṭṭho, yathā taṃ vīhiādiaviññāṇakasantāne, evaṃ saviññāṇakasantānepi avicchedena desantaresu pātubhāvena bhavitabbaṃ. Ayañca nayo sati antarābhave yujjati, na aññathā’’ti yuttiṃ vadanti. Tena hi iddhimato cetovasippattassa cittānugatikaṃ kāyaṃ adhiṭṭhahantassa khaṇena brahmalokato idhūpasaṅkamane ito vā brahmalokagamane yutti vattabbā. Yadi sabbattheva avicchinnadese dhammānaṃ pavatti icchitā, yadipi siyā iddhimantānaṃ iddhivisayo acinteyyoti. Taṃ idhāpi samānaṃ ‘‘kammavipāko acinteyyo’’ti vacanato. Tasmā taṃ tesaṃ matimattameva. Acinteyyasabhāvā hi sabhāvadhammā, te katthaci paccayavasena vicchinnadese pātubhavanti, katthaci avicchinnadese. Tathā hi mukhaghosādīhi paccayehi aññasmiṃ dese ādāsapabbatappadesādike paṭibimbapaṭighosādikaṃ paccayuppannaṃ nibbattamānaṃ dissati, tasmā na sabbaṃ sabbattha upanetabbanti ayamettha saṅkhepo. Vitthāro pana paṭibimbassa udāharaṇabhāvasādhanādiko antarābhavakathāvicāro kathāvatthupakaraṇassa (kathā. 505; kathā. aṭṭha. 505) ṭīkāyaṃ gahetabbo.
абарз бана ‘‘ид̇хаад̇и гаамабхаво, хуранд̇и аруубабхаво, убхаяаманд̇арзнаад̇и руубабхаво вуд̇д̇о’’д̇и. ан̃н̃з ‘‘ид̇хаад̇и аж̇жхад̇д̇игааяад̇анаани, хуранд̇и б̣аахирааяад̇анаани, убхаяаманд̇арзнаад̇и жид̇д̇ажзд̇асигаа’’д̇и. ‘‘ид̇хаад̇и ваа бажжаяад̇хаммаа, хуранд̇и бажжаяуббаннад̇хаммаа, убхаяаманд̇арзнаад̇и бан̣н̣ад̇д̇ид̇хаммаа вуд̇д̇аа’’д̇и вад̣̇анд̇и. д̇ам̣ саб̣б̣ам̣ адтагат̇аасу над̇т̇и. звам̣ д̇аава ‘‘д̣̇идтз д̣̇идтамад̇д̇ам̣ бхависсад̇ий’’д̇иаад̣̇инаа д̣̇идтаад̣̇ивасзна жад̇уд̇хаа д̇збхуумагад̇хаммаа сан̇г̇ахзд̇аб̣б̣аа. д̇ад̇т̇а субхасуканижжаад̇д̇аг̇г̇аахабариваж̇ж̇анамукзна асубхад̣̇угкаанижжаанад̇д̇аанубассанаа д̣̇ассид̇аад̇и хздтимаахи висуд̣̇д̇хийхи сад̣̇д̇хим̣ сан̇кзбзнзва вибассанаа гат̇ид̇аа. ‘‘д̇ад̇о д̇вам̣, б̣аахияа, на д̇знаа’’д̇и иминаа рааг̇аад̣̇ийнам̣ самужчзд̣̇асса ад̇хиббзд̇ад̇д̇аа маг̇г̇о. ‘‘д̇ад̇о д̇вам̣, б̣аахияа, на д̇ад̇т̇аа’’д̇и иминаа палам̣. ‘‘нзвид̇хаа’’д̇иаад̣̇инаа анубаад̣̇исзсаа бариниб̣б̣аанад̇хаад̇у гат̇ид̇аад̇и д̣̇адтаб̣б̣ам̣. д̇зна вуд̇д̇ам̣ – ‘‘ат̇а ко б̣аахияасса…бз… аасавзхи жид̇д̇ам̣ вимужжий’’д̇и.
Apare pana ‘‘idhāti kāmabhavo, huranti arūpabhavo, ubhayamantarenāti rūpabhavo vutto’’ti. Aññe ‘‘idhāti ajjhattikāyatanāni, huranti bāhirāyatanāni, ubhayamantarenāti cittacetasikā’’ti. ‘‘Idhāti vā paccayadhammā, huranti paccayuppannadhammā, ubhayamantarenāti paṇṇattidhammā vuttā’’ti vadanti. Taṃ sabbaṃ aṭṭhakathāsu natthi. Evaṃ tāva ‘‘diṭṭhe diṭṭhamattaṃ bhavissatī’’tiādinā diṭṭhādivasena catudhā tebhūmakadhammā saṅgahetabbā. Tattha subhasukhaniccaattaggāhaparivajjanamukhena asubhadukkhāniccānattānupassanā dassitāti heṭṭhimāhi visuddhīhi saddhiṃ saṅkhepeneva vipassanā kathitā. ‘‘Tato tvaṃ, bāhiya, na tenā’’ti iminā rāgādīnaṃ samucchedassa adhippetattā maggo. ‘‘Tato tvaṃ, bāhiya, na tatthā’’ti iminā phalaṃ. ‘‘Nevidhā’’tiādinā anupādisesā parinibbānadhātu kathitāti daṭṭhabbaṃ. Tena vuttaṃ – ‘‘atha kho bāhiyassa…pe… āsavehi cittaṃ vimuccī’’ti.
имааяа сам̣кид̇д̇абад̣̇ааяа д̣̇зсанааяа д̇аавад̣̇зваад̇и д̇асмим̣язва кан̣з, на гааланд̇арз. анубаад̣̇ааяаад̇и аг̇г̇ахзд̇ваа. аасавзхийд̇и аабхаваг̇г̇ам̣ ааг̇од̇рабхум̣ саванад̇о бавад̇д̇анад̇о жирабаариваасияадтзна мад̣̇ираад̣̇иаасавасад̣̇исад̇ааяа жа ‘‘аасаваа’’д̇и лад̣̇д̇ханаамзхи гаамарааг̇аад̣̇ийхи. вимужжийд̇и самужчзд̣̇авимуд̇д̇ияаа бадиббассад̣̇д̇хивимуд̇д̇ияаа жа вимужжи ниссаж̇ж̇и. со хи сад̇т̇у д̇хаммам̣ сун̣анд̇о зва сийлаани сод̇хзд̇ваа яат̇аалад̣̇д̇хам̣ жид̇д̇асамаад̇хим̣ ниссааяа вибассанам̣ бадтабзд̇ваа киббаабхин̃н̃ад̇ааяа д̇аавад̣̇зва саб̣б̣аасавз кзбзд̇ваа саха бадисамбхид̣̇аахи арахад̇д̇ам̣ баабун̣и. со сам̣саарасод̇ам̣ чинд̣̇ид̇ваа гад̇аваддабарияанд̇о анд̇имад̣̇зхад̇харо худ̇ваа згуунавийсад̇ияаа бажжавзгкан̣аасу бавад̇д̇аасу д̇хаммад̇ааяа жод̣̇ияамаано бхаг̇аванд̇ам̣ баб̣б̣аж̇ж̇ам̣ яаажи. ‘‘барибун̣н̣ам̣ д̇з бад̇д̇ажийвара’’нд̇и будто ‘‘на барибун̣н̣а’’нд̇и ааха. ат̇а нам̣ сад̇т̇аа ‘‘д̇зна хи бад̇д̇ажийварам̣ бариязсаа’’д̇и вад̇ваа баггаами. д̇зна вуд̇д̇ам̣ – ‘‘ат̇а ко бхаг̇аваа…бз… баггаамий’’д̇и.
Imāya saṃkhittapadāya desanāya tāvadevāti tasmiṃyeva khaṇe, na kālantare. Anupādāyāti aggahetvā. Āsavehīti ābhavaggaṃ āgotrabhuṃ savanato pavattanato cirapārivāsiyaṭṭhena madirādiāsavasadisatāya ca ‘‘āsavā’’ti laddhanāmehi kāmarāgādīhi. Vimuccīti samucchedavimuttiyā paṭippassaddhivimuttiyā ca vimucci nissajji. So hi satthu dhammaṃ suṇanto eva sīlāni sodhetvā yathāladdhaṃ cittasamādhiṃ nissāya vipassanaṃ paṭṭhapetvā khippābhiññatāya tāvadeva sabbāsave khepetvā saha paṭisambhidāhi arahattaṃ pāpuṇi. So saṃsārasotaṃ chinditvā katavaṭṭapariyanto antimadehadharo hutvā ekūnavīsatiyā paccavekkhaṇāsu pavattāsu dhammatāya codiyamāno bhagavantaṃ pabbajjaṃ yāci. ‘‘Paripuṇṇaṃ te pattacīvara’’nti puṭṭho ‘‘na paripuṇṇa’’nti āha. Atha naṃ satthā ‘‘tena hi pattacīvaraṃ pariyesā’’ti vatvā pakkāmi. Tena vuttaṃ – ‘‘atha kho bhagavā…pe… pakkāmī’’ti.
со гира гассабад̣̇асаб̣аласса саасанз вийсавассасахассаани саман̣ад̇хаммам̣ гаронд̇о ‘‘бхигкунаа наама ад̇д̇анаа бажжаяз лабхид̇ваа яат̇аад̣̇аанам̣ гаронд̇зна ад̇д̇анаава барибхун̃ж̇ид̇ум̣ ваддад̇ий’’д̇и згасса бхигкуссаби бад̇д̇зна ваа жийварзна ваа сан̇г̇ахам̣ наагааси, д̇знасса зхибхигкуубасамбад̣̇ааяа убаниссаяо наахоси. гзжи банааху – ‘‘со гира б̣уд̣̇д̇хасун̃н̃з логз жоро худ̇ваа д̇ханугалаабам̣ саннаяхид̇ваа аран̃н̃з жоригам̣ гаронд̇о згам̣ бажжзгаб̣уд̣̇д̇хам̣ д̣̇исваа бад̇д̇ажийваралобхзна д̇ам̣ усунаа виж̇жхид̇ваа бад̇д̇ажийварам̣ г̇ан̣хи, д̇знасса ид̣̇д̇химаяабад̇д̇ажийварам̣ на уббаж̇ж̇иссад̇ийд̇и, сад̇т̇аа д̇ам̣ н̃ад̇ваа зхибхигкубхаавзна баб̣б̣аж̇ж̇ам̣ на ад̣̇аасий’’д̇и. д̇амби бад̇д̇ажийварабариязсанам̣ жарамаанам̣ згаа д̇хзну взг̇зна аабад̇анд̇ий бахарид̇ваа ж̇ийвид̇агкаяам̣ баабзси. д̇ам̣ санд̇хааяа вуд̇д̇ам̣ ‘‘ат̇а ко ажирабагганд̇асса бхаг̇авад̇о б̣аахияам̣ д̣̇ааружийрияам̣ г̇аавий д̇арун̣аважчаа ад̇хибад̇ид̇ваа ж̇ийвид̇аа воробзсий’’д̇и.
So kira kassapadasabalassa sāsane vīsavassasahassāni samaṇadhammaṃ karonto ‘‘bhikkhunā nāma attanā paccaye labhitvā yathādānaṃ karontena attanāva paribhuñjituṃ vaṭṭatī’’ti ekassa bhikkhussapi pattena vā cīvarena vā saṅgahaṃ nākāsi, tenassa ehibhikkhuupasampadāya upanissayo nāhosi. Keci panāhu – ‘‘so kira buddhasuññe loke coro hutvā dhanukalāpaṃ sannayhitvā araññe corikaṃ karonto ekaṃ paccekabuddhaṃ disvā pattacīvaralobhena taṃ usunā vijjhitvā pattacīvaraṃ gaṇhi, tenassa iddhimayapattacīvaraṃ na uppajjissatīti, satthā taṃ ñatvā ehibhikkhubhāvena pabbajjaṃ na adāsī’’ti. Tampi pattacīvarapariyesanaṃ caramānaṃ ekā dhenu vegena āpatantī paharitvā jīvitakkhayaṃ pāpesi. Taṃ sandhāya vuttaṃ ‘‘atha kho acirapakkantassa bhagavato bāhiyaṃ dārucīriyaṃ gāvī taruṇavacchā adhipatitvā jīvitā voropesī’’ti.
д̇ад̇т̇а ажирабагганд̇ассаад̇и на жирам̣ багганд̇асса бхаг̇авад̇о. г̇аавий д̇арун̣аважчаад̇и згаа яагкиний д̇арун̣аважчад̇хзнуруубаа. ад̇хибад̇ид̇ваад̇и абхибхавид̇ваа мад̣̇д̣̇ид̇ваа. ж̇ийвид̇аа воробзсийд̇и буримасмим̣ ад̇д̇абхаавз лад̣̇д̇хаагхаад̇ад̇ааяа д̣̇идтамад̇д̇знзва взрижид̇д̇ам̣ уббаад̣̇зд̇ваа син̇г̇зна бахарид̇ваа ж̇ийвид̇аа воробзси.
Tattha acirapakkantassāti na ciraṃ pakkantassa bhagavato. Gāvī taruṇavacchāti ekā yakkhinī taruṇavacchadhenurūpā. Adhipatitvāti abhibhavitvā madditvā. Jīvitā voropesīti purimasmiṃ attabhāve laddhāghātatāya diṭṭhamatteneva vericittaṃ uppādetvā siṅgena paharitvā jīvitā voropesi.
сад̇т̇аа бин̣д̣ааяа жарид̇ваа гад̇абхад̇д̇агижжо самб̣ахулзхи бхигкуухи сад̣̇д̇хим̣ наг̇арад̇о нигкаманд̇о б̣аахияасса сарийрам̣ сан̇гаарадтаанз бад̇ид̇ам̣ д̣̇исваа бхигкуу аан̣аабзси – ‘‘бхигкавз, згасмим̣ гхарад̣̇ваарз тад̇ваа ман̃жагам̣ аахараабзд̇ваа ид̣̇ам̣ сарийрам̣ наг̇арад̇о нийхарид̇ваа жхаабзд̇ваа т̇уубам̣ гарот̇аа’’д̇и, бхигкуу д̇ат̇аа агам̣су. гад̇ваа жа бана вихаарам̣ г̇анд̇ваа сад̇т̇аарам̣ убасан̇гамид̇ваа ад̇д̇анаа гад̇агижжам̣ аарожзд̇ваа д̇асса абхисамбарааяам̣ бужчим̣су. ат̇а нзсам̣ бхаг̇аваа д̇асса бариниб̣б̣уд̇абхаавам̣ аажигки. бхигкуу ‘‘д̇умхз, бханд̇з, ‘б̣аахияо д̣̇ааружийрияо арахад̇д̇ам̣ бад̇д̇о’д̇и вад̣̇ат̇а, гад̣̇аа со арахад̇д̇ам̣ бад̇д̇о’’д̇и бужчим̣су. ‘‘мама д̇хаммам̣ суд̇агаалз’’д̇и жа вуд̇д̇з ‘‘гад̣̇аа банасса д̇умхзхи д̇хаммо гат̇ид̇о’’д̇и? ‘‘бин̣д̣ааяа жаранд̇зна аж̇ж̇зва анд̇аравийт̇ияам̣ тад̇ваа’’д̇и. ‘‘аббамад̇д̇аго со, бханд̇з, д̇умхзхи анд̇аравийт̇ияам̣ тад̇ваа гат̇ид̇ад̇хаммо, гат̇ам̣ со д̇аавад̇агзна висзсам̣ ниб̣б̣ад̇д̇зсий’’д̇и? ‘‘гим̣, бхигкавз, мама д̇хаммам̣ ‘аббам̣ ваа б̣ахум̣ ваа’д̇и бамин̣ат̇а, анзгаани г̇аат̇аасахассааниби анад̇т̇асам̣хид̇аани на сзяяо, ад̇т̇аниссид̇ам̣ бана згамби г̇аат̇аабад̣̇ам̣ сзяяо’’д̇и д̣̇ассзнд̇о –
Satthā piṇḍāya caritvā katabhattakicco sambahulehi bhikkhūhi saddhiṃ nagarato nikkhamanto bāhiyassa sarīraṃ saṅkāraṭṭhāne patitaṃ disvā bhikkhū āṇāpesi – ‘‘bhikkhave, ekasmiṃ gharadvāre ṭhatvā mañcakaṃ āharāpetvā idaṃ sarīraṃ nagarato nīharitvā jhāpetvā thūpaṃ karothā’’ti, bhikkhū tathā akaṃsu. Katvā ca pana vihāraṃ gantvā satthāraṃ upasaṅkamitvā attanā katakiccaṃ ārocetvā tassa abhisamparāyaṃ pucchiṃsu. Atha nesaṃ bhagavā tassa parinibbutabhāvaṃ ācikkhi. Bhikkhū ‘‘tumhe, bhante, ‘bāhiyo dārucīriyo arahattaṃ patto’ti vadatha, kadā so arahattaṃ patto’’ti pucchiṃsu. ‘‘Mama dhammaṃ sutakāle’’ti ca vutte ‘‘kadā panassa tumhehi dhammo kathito’’ti? ‘‘Piṇḍāya carantena ajjeva antaravīthiyaṃ ṭhatvā’’ti. ‘‘Appamattako so, bhante, tumhehi antaravīthiyaṃ ṭhatvā kathitadhammo, kathaṃ so tāvatakena visesaṃ nibbattesī’’ti? ‘‘Kiṃ, bhikkhave, mama dhammaṃ ‘appaṃ vā bahuṃ vā’ti pamiṇatha, anekāni gāthāsahassānipi anatthasaṃhitāni na seyyo, atthanissitaṃ pana ekampi gāthāpadaṃ seyyo’’ti dassento –
‘‘сахассамаби жз г̇аат̇аа, анад̇т̇абад̣̇асан̃хид̇аа;
‘‘Sahassamapi ce gāthā, anatthapadasañhitā;
згам̣ г̇аат̇аабад̣̇ам̣ сзяяо, яам̣ суд̇ваа убасаммад̇ий’’д̇и. (д̇ха. ба. 101) –
Ekaṃ gāthāpadaṃ seyyo, yaṃ sutvā upasammatī’’ti. (dha. pa. 101) –
д̇хаммабад̣̇з имам̣ г̇аат̇ам̣ вад̇ваа ‘‘на гзвалам̣ со бариниб̣б̣аанамад̇д̇зна, ат̇а ко мама саавагаанам̣ бхигкуунам̣ киббаабхин̃н̃аанам̣ аг̇г̇абхаавзнаби бууж̇аарахо’’д̇и д̣̇ассзнд̇о ‘‘зд̇ад̣̇аг̇г̇ам̣, бхигкавз, мама саавагаанам̣ бхигкуунам̣ киббаабхин̃н̃аанам̣, яад̣̇ид̣̇ам̣ б̣аахияо д̣̇ааружийрияо’’д̇и (а. ни. 1.216) д̇ам̣ ааяасманд̇ам̣ зд̇ад̣̇аг̇г̇з табзси. д̇ам̣ санд̇хааяа вуд̇д̇ам̣ – ‘‘ат̇а ко бхаг̇аваа саавад̇т̇ияам̣ бин̣д̣ааяа жарид̇ваа…бз… бариниб̣б̣уд̇о, бхигкавз, б̣аахияо д̣̇ааружийрияо’’д̇и.
Dhammapade imaṃ gāthaṃ vatvā ‘‘na kevalaṃ so parinibbānamattena, atha kho mama sāvakānaṃ bhikkhūnaṃ khippābhiññānaṃ aggabhāvenapi pūjāraho’’ti dassento ‘‘etadaggaṃ, bhikkhave, mama sāvakānaṃ bhikkhūnaṃ khippābhiññānaṃ, yadidaṃ bāhiyo dārucīriyo’’ti (a. ni. 1.216) taṃ āyasmantaṃ etadagge ṭhapesi. Taṃ sandhāya vuttaṃ – ‘‘atha kho bhagavā sāvatthiyaṃ piṇḍāya caritvā…pe… parinibbuto, bhikkhave, bāhiyo dārucīriyo’’ti.
д̇ад̇т̇а бажчаабхад̇д̇анд̇и бхад̇д̇агижжад̇о бажчаа. бин̣д̣абаад̇абадигганд̇од̇и бин̣д̣абаад̇абариязсанад̇о бадинивад̇д̇о. бад̣̇ад̣̇ваязнааби гад̇абхад̇д̇агижжод̇и вуд̇д̇ам̣ ход̇и. нийхарид̇ваад̇и наг̇арад̇о б̣ахи нзд̇ваа. жхаабзт̇аад̇и д̣̇ахат̇а. т̇уубан̃жасса гарот̇аад̇и асса б̣аахияасса сарийрад̇хаад̇уяо г̇ахзд̇ваа жзд̇ияан̃жа гарот̇а . д̇ад̇т̇а гааран̣амааха – ‘‘саб̣рахмажаарий во, бхигкавз, гаалагад̇о’’д̇и. д̇ассад̇т̇о – яам̣ д̇умхз сздтадтзна б̣рахмам̣ ад̇хисийлаад̣̇ибадибад̇д̇ид̇хаммам̣ санд̣̇идтам̣ жарат̇а, д̇ам̣ со д̇умхзхи самаанам̣ б̣рахмам̣ ажарийд̇и саб̣рахмажаарий маран̣агааласса бад̇д̇ияаава гаалагад̇о, д̇асмаа д̇ам̣ ман̃жагзна нийхарид̇ваа жхаабзт̇а, т̇уубан̃жасса гарот̇аад̇и.
Tattha pacchābhattanti bhattakiccato pacchā. Piṇḍapātapaṭikkantoti piṇḍapātapariyesanato paṭinivatto. Padadvayenāpi katabhattakiccoti vuttaṃ hoti. Nīharitvāti nagarato bahi netvā. Jhāpethāti dahatha. Thūpañcassa karothāti assa bāhiyassa sarīradhātuyo gahetvā cetiyañca karotha . Tattha kāraṇamāha – ‘‘sabrahmacārī vo, bhikkhave, kālakato’’ti. Tassattho – yaṃ tumhe seṭṭhaṭṭhena brahmaṃ adhisīlādipaṭipattidhammaṃ sandiṭṭhaṃ caratha, taṃ so tumhehi samānaṃ brahmaṃ acarīti sabrahmacārī maraṇakālassa pattiyāva kālakato, tasmā taṃ mañcakena nīharitvā jhāpetha, thūpañcassa karothāti.
д̇асса гаа г̇ад̇ийд̇и бан̃жасу г̇ад̇ийсу д̇асса гад̇амаа г̇ад̇и убабад̇д̇и бхавабхууд̇аа, г̇ад̇ийд̇и нибпад̇д̇и, арияо бут̇уж̇ж̇ано ваад̇и гаа нидтаад̇и ад̇т̇о. абхисамбарааяод̇и бзжжа бхавуббад̇д̇и бхаванирод̇хо ваа. гин̃жааби д̇асса т̇уубагаран̣аан̣ад̇д̇ияаава бариниб̣б̣уд̇абхааво ад̇т̇ад̇о багаасид̇о ход̇и, яз бана бхигкуу д̇ад̇д̇агзна на ж̇ааним̣су, д̇з ‘‘д̇асса гаа г̇ад̇ий’’д̇и бужчим̣су. баагадад̇арам̣ ваа гаараабзд̇угаамаа д̇ат̇аа бхаг̇аванд̇ам̣ бужчим̣су.
Tassa kā gatīti pañcasu gatīsu tassa katamā gati upapatti bhavabhūtā, gatīti nipphatti, ariyo puthujjano vāti kā niṭṭhāti attho. Abhisamparāyoti pecca bhavuppatti bhavanirodho vā. Kiñcāpi tassa thūpakaraṇāṇattiyāva parinibbutabhāvo atthato pakāsito hoti, ye pana bhikkhū tattakena na jāniṃsu, te ‘‘tassa kā gatī’’ti pucchiṃsu. Pākaṭataraṃ vā kārāpetukāmā tathā bhagavantaṃ pucchiṃsu.
бан̣д̣ид̇од̇и аг̇г̇амаг̇г̇абан̃н̃ааяа ад̇хиг̇ад̇ад̇д̇аа бан̣д̣зна ид̇о г̇ад̇о бавад̇д̇од̇и бан̣д̣ид̇о. бажжабаад̣̇ийд̇и бадибаж̇ж̇и. д̇хаммассаад̇и логуд̇д̇арад̇хаммасса. ануд̇хамманд̇и сийлависуд̣̇д̇хиаад̣̇ибадибад̣̇аад̇хаммам̣. ат̇а ваа д̇хаммассаад̇и ниб̣б̣аанад̇хаммасса. ануд̇хамманд̇и арияамаг̇г̇апалад̇хаммам̣. на жа мам̣ д̇хаммаад̇хигаран̣анд̇и д̇хаммад̣̇зсанаахзд̇у на жа мам̣ вихзсзси яат̇аанусидтам̣ бадибаннад̇д̇аа. яо хи сад̇т̇у санд̇игз д̇хаммам̣ суд̇ваа гаммадтаанам̣ ваа г̇ахзд̇ваа яат̇аанусидтам̣ на бадибаж̇ж̇ад̇и, со сад̇т̇аарам̣ вихзсзд̇и наама. яам̣ санд̇хааяа вуд̇д̇ам̣ – ‘‘вихим̣сасан̃н̃ий баг̇ун̣ам̣ на бхаасим̣, д̇хаммам̣ бан̣ийд̇ам̣ мануж̇зсу б̣рахмз’’д̇и (махаава. 9; ма. ни. 1.283; 2.339). ат̇а ваа на жа мам̣ д̇хаммаад̇хигаран̣анд̇и на жа имам̣ д̇хаммаад̇хигаран̣ам̣. ид̣̇ам̣ вуд̇д̇ам̣ ход̇и – ваддад̣̇угкад̇о нияяаанахзд̇убхууд̇ам̣ имам̣ мама саасанад̇хаммам̣ суббадибаннад̇д̇аа на вихзсзд̇и. д̣̇уббадибанно хи саасанам̣ бхинд̣̇анд̇о сад̇т̇у д̇хаммасарийрз бахаарам̣ д̣̇зд̇и наама. аяам̣ бана саммаабадибад̇д̇им̣ мад̇т̇агам̣ баабзд̇ваа анубаад̣̇исзсааяа ниб̣б̣аанад̇хаад̇уяаа бариниб̣б̣ааяи. д̇зна вуд̇д̇ам̣ – ‘‘бариниб̣б̣уд̇о, бхигкавз, б̣аахияо д̣̇ааружийрияо’’д̇и.
Paṇḍitoti aggamaggapaññāya adhigatattā paṇḍena ito gato pavattoti paṇḍito. Paccapādīti paṭipajji. Dhammassāti lokuttaradhammassa. Anudhammanti sīlavisuddhiādipaṭipadādhammaṃ. Atha vā dhammassāti nibbānadhammassa. Anudhammanti ariyamaggaphaladhammaṃ. Na ca maṃ dhammādhikaraṇanti dhammadesanāhetu na ca maṃ vihesesi yathānusiṭṭhaṃ paṭipannattā. Yo hi satthu santike dhammaṃ sutvā kammaṭṭhānaṃ vā gahetvā yathānusiṭṭhaṃ na paṭipajjati, so satthāraṃ viheseti nāma. Yaṃ sandhāya vuttaṃ – ‘‘vihiṃsasaññī paguṇaṃ na bhāsiṃ, dhammaṃ paṇītaṃ manujesu brahme’’ti (mahāva. 9; ma. ni. 1.283; 2.339). Atha vā na ca maṃ dhammādhikaraṇanti na ca imaṃ dhammādhikaraṇaṃ. Idaṃ vuttaṃ hoti – vaṭṭadukkhato niyyānahetubhūtaṃ imaṃ mama sāsanadhammaṃ suppaṭipannattā na viheseti. Duppaṭipanno hi sāsanaṃ bhindanto satthu dhammasarīre pahāraṃ deti nāma. Ayaṃ pana sammāpaṭipattiṃ matthakaṃ pāpetvā anupādisesāya nibbānadhātuyā parinibbāyi. Tena vuttaṃ – ‘‘parinibbuto, bhikkhave, bāhiyo dārucīriyo’’ti.
зд̇амад̇т̇ам̣ вид̣̇ид̇ваад̇и зд̇ам̣ т̇зрасса б̣аахияасса анубаад̣̇исзсааяа ниб̣б̣аанад̇хаад̇уяаа бариниб̣б̣уд̇абхаавам̣, д̇ат̇аа бариниб̣б̣уд̇аанан̃жа кийн̣аасаваанам̣ г̇ад̇ияаа бажураж̇анзхи д̣̇уб̣б̣ин̃н̃зяяабхаавам̣ саб̣б̣аагаарад̇о вид̣̇ид̇ваа. имам̣ уд̣̇аананд̇и имам̣ аббад̇идтид̇абариниб̣б̣аанаанубхаавад̣̇ийбагам̣ уд̣̇аанам̣ уд̣̇аанзси.
Etamatthaṃ viditvāti etaṃ therassa bāhiyassa anupādisesāya nibbānadhātuyā parinibbutabhāvaṃ, tathā parinibbutānañca khīṇāsavānaṃ gatiyā pacurajanehi dubbiññeyyabhāvaṃ sabbākārato viditvā. Imaṃ udānanti imaṃ appatiṭṭhitaparinibbānānubhāvadīpakaṃ udānaṃ udānesi.
д̇ад̇т̇а яад̇т̇аад̇и яасмим̣ ниб̣б̣аанз аабо жа на г̇аад̇хад̇и, бат̇авий жа д̇зж̇о жа вааяо жа на г̇аад̇хад̇и, на бад̇идтаад̇и. гасмаа? ниб̣б̣аанасса асан̇кад̇асабхаавад̇д̇аа. на хи д̇ад̇т̇а сан̇кад̇ад̇хаммаанам̣ лзсоби самбхавад̇и. суггаад̇и суггаван̣н̣ад̇ааяа суггаад̇и лад̣̇д̇ханаамаа г̇аханагкад̇д̇ад̇аарагаа. на ж̇од̇анд̇ийд̇и на бхаасанд̇и. аад̣̇ижжо наббагаасад̇ийд̇и д̇ийсу д̣̇ийбзсу згасмим̣ кан̣з аалогапаран̣асамад̇т̇о аад̣̇ижжоби аабхаавасзна на д̣̇иб̣б̣ад̇и. на д̇ад̇т̇а жанд̣̇имаа бхаад̇ийд̇и сад̇иби бхаасурабхаавз ганд̇асийд̇алагиран̣о жанд̣̇оби д̇асмим̣ ниб̣б̣аанз абхаавад̇о зва ад̇д̇ано ж̇ун̣хаавибхаасанзна на вирожад̇и. яад̣̇и д̇ад̇т̇а жанд̣̇имасуурияаад̣̇аяо над̇т̇и, логанд̇аро вияа нижжанд̇хагаарамзва д̇ам̣ бхавзяяаад̇и аасан̇гам̣ санд̇хааяааха ‘‘д̇амо д̇ад̇т̇а на виж̇ж̇ад̇ий’’д̇и. сад̇и хи руубаабхаавз д̇амо наама на сияаа.
Tattha yatthāti yasmiṃ nibbāne āpo ca na gādhati, pathavī ca tejo ca vāyo ca na gādhati, na patiṭṭhāti. Kasmā? Nibbānassa asaṅkhatasabhāvattā. Na hi tattha saṅkhatadhammānaṃ lesopi sambhavati. Sukkāti sukkavaṇṇatāya sukkāti laddhanāmā gahanakkhattatārakā. Na jotantīti na bhāsanti. Ādicco nappakāsatīti tīsu dīpesu ekasmiṃ khaṇe ālokapharaṇasamattho ādiccopi ābhāvasena na dibbati. Na tattha candimā bhātīti satipi bhāsurabhāve kantasītalakiraṇo candopi tasmiṃ nibbāne abhāvato eva attano juṇhāvibhāsanena na virocati. Yadi tattha candimasūriyādayo natthi, lokantaro viya niccandhakārameva taṃ bhaveyyāti āsaṅkaṃ sandhāyāha ‘‘tamo tattha na vijjatī’’ti. Sati hi rūpābhāve tamo nāma na siyā.
яад̣̇аа жа ад̇д̇анаа взд̣̇и, муни монзна б̣раахман̣од̇и жад̇усажжамунанад̇о монанд̇и лад̣̇д̇ханаамзна маг̇г̇ан̃аан̣зна гааяамонзяяаад̣̇ийхи жа саманнааг̇ад̇ад̇д̇аа ‘‘муний’’д̇и лад̣̇д̇ханаамо арияасаавагаб̣раахман̣о д̇знзва монасан̇каад̇зна бадивзд̇хан̃аан̣зна яад̣̇аа яасмим̣ гаалз аг̇г̇амаг̇г̇агкан̣з ад̇д̇анаа саяамзва ануссаваад̣̇игз бахааяа ад̇д̇абажжагкам̣ гад̇ваа ниб̣б̣аанам̣ взд̣̇и бадивиж̇жхи. ‘‘авзд̣̇ий’’д̇иби баато, ан̃н̃аасийд̇и ад̇т̇о. ат̇а руубаа аруубаа жа, сукад̣̇угкаа бамужжад̇ийд̇и ат̇аад̇и д̇асса ниб̣б̣аанасса ж̇аананад̇о бажчаа. руубаад̇и руубад̇хаммаа, д̇зна бан̃жавогаарабхаво згавогаарабхаво жа г̇ахид̇о ход̇и. аруубаад̇и аруубад̇хаммаа, д̇зна руубзнаамиссийгад̇о аруубабхаво г̇ахид̇о ход̇и. со ‘‘жад̇увогаарабхаво’’д̇иби вужжад̇и. сукад̣̇угкаад̇и саб̣б̣ад̇т̇а уббаж̇ж̇анагасукад̣̇угкад̇оби ваддад̇о. ат̇а ваа руубаад̇и руубалогабадисанд̇хид̇о. аруубаад̇и аруубалогабадисанд̇хид̇о. сукад̣̇угкаад̇и гаамааважарабадисанд̇хид̇о. гаамабхаво хи б̣яаамиссасукад̣̇угко. звамзд̇асмаа сагалад̇оби ваддад̇о ажжанд̇амзва мужжад̇ийд̇и г̇аат̇аад̣̇ваязнаби бхаг̇аваа ‘‘маяхам̣ буд̇д̇асса б̣аахияасса зваруубаа ниб̣б̣аанаг̇ад̇ий’’д̇и д̣̇ассзд̇и.
Yadā ca attanā vedi, muni monena brāhmaṇoti catusaccamunanato monanti laddhanāmena maggañāṇena kāyamoneyyādīhi ca samannāgatattā ‘‘munī’’ti laddhanāmo ariyasāvakabrāhmaṇo teneva monasaṅkhātena paṭivedhañāṇena yadā yasmiṃ kāle aggamaggakkhaṇe attanā sayameva anussavādike pahāya attapaccakkhaṃ katvā nibbānaṃ vedi paṭivijjhi. ‘‘Avedī’’tipi pāṭho, aññāsīti attho. Atha rūpā arūpā ca, sukhadukkhā pamuccatīti athāti tassa nibbānassa jānanato pacchā. Rūpāti rūpadhammā, tena pañcavokārabhavo ekavokārabhavo ca gahito hoti. Arūpāti arūpadhammā, tena rūpenāmissīkato arūpabhavo gahito hoti. So ‘‘catuvokārabhavo’’tipi vuccati. Sukhadukkhāti sabbattha uppajjanakasukhadukkhatopi vaṭṭato. Atha vā rūpāti rūpalokapaṭisandhito. Arūpāti arūpalokapaṭisandhito. Sukhadukkhāti kāmāvacarapaṭisandhito. Kāmabhavo hi byāmissasukhadukkho. Evametasmā sakalatopi vaṭṭato accantameva muccatīti gāthādvayenapi bhagavā ‘‘mayhaṃ puttassa bāhiyassa evarūpā nibbānagatī’’ti dasseti.
д̣̇асамасуд̇д̇аван̣н̣анаа нидтид̇аа.
Dasamasuttavaṇṇanā niṭṭhitā.
нидтид̇аа жа б̣од̇хиваг̇г̇аван̣н̣анаа.
Niṭṭhitā ca bodhivaggavaṇṇanā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / уд̣̇аанабаал̣и • Udānapāḷi / 10. б̣аахияасуд̇д̇ам̣ • 10. Bāhiyasuttaṃ
