| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၄. ဗဟုဘာဏိသုတ္တံ
4. Bahubhāṇisuttaṃ
၂၁၄. ‘‘ပဉ္စိမေ, ဘိက္ခဝေ, အာဒီနဝာ ဗဟုဘာဏိသ္မိံ ပုဂ္ဂလေ။ ကတမေ ပဉ္စ? မုသာ ဘဏတိ, ပိသုဏံ ဘဏတိ, ဖရုသံ ဘဏတိ, သမ္ဖပ္ပလာပံ ဘဏတိ, ကာယသ္သ ဘေဒာ ပရံ မရဏာ အပာယံ ဒုဂ္ဂတိံ ဝိနိပာတံ နိရယံ ဥပပဇ္ဇတိ။ ဣမေ ခော, ဘိက္ခဝေ, ပဉ္စ အာဒီနဝာ ဗဟုဘာဏိသ္မိံ ပုဂ္ဂလေ။
214. ‘‘Pañcime, bhikkhave, ādīnavā bahubhāṇismiṃ puggale. Katame pañca? Musā bhaṇati, pisuṇaṃ bhaṇati, pharusaṃ bhaṇati, samphappalāpaṃ bhaṇati, kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati. Ime kho, bhikkhave, pañca ādīnavā bahubhāṇismiṃ puggale.
‘‘ပဉ္စိမေ, ဘိက္ခဝေ, အာနိသံသာ မန္တဘာဏိသ္မိံ ပုဂ္ဂလေ။ ကတမေ ပဉ္စ? န မုသာ ဘဏတိ, န ပိသုဏံ ဘဏတိ, န ဖရုသံ ဘဏတိ, န သမ္ဖပ္ပလာပံ ဘဏတိ, ကာယသ္သ ဘေဒာ ပရံ မရဏာ သုဂတိံ သဂ္ဂံ လောကံ ဥပပဇ္ဇတိ။ ဣမေ ခော, ဘိက္ခဝေ, ပဉ္စ အာနိသံသာ မန္တဘာဏိသ္မိံ ပုဂ္ဂလေ’’တိ။ စတုတ္ထံ။
‘‘Pañcime, bhikkhave, ānisaṃsā mantabhāṇismiṃ puggale. Katame pañca? Na musā bhaṇati, na pisuṇaṃ bhaṇati, na pharusaṃ bhaṇati, na samphappalāpaṃ bhaṇati, kāyassa bhedā paraṃ maraṇā sugatiṃ saggaṃ lokaṃ upapajjati. Ime kho, bhikkhave, pañca ānisaṃsā mantabhāṇismiṃ puggale’’ti. Catutthaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၄. ဗဟုဘာဏိသုတ္တဝဏ္ဏနာ • 4. Bahubhāṇisuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၃-၁၀. သီလသုတ္တာဒိဝဏ္ဏနာ • 3-10. Sīlasuttādivaṇṇanā
