| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
4. බහුභාණිසුත්‌තං
4. Bahubhāṇisuttaṃ
214. ‘‘පඤ්‌චිමෙ, භික්‌ඛවෙ, ආදීනවා බහුභාණිස්‌මිං පුග්‌ගලෙ. කතමෙ පඤ්‌ච? මුසා භණති, පිසුණං භණති, ඵරුසං භණති, සම්‌ඵප්‌පලාපං භණති, කායස්‌ස භෙදා පරං මරණා අපායං දුග්‌ගතිං විනිපාතං නිරයං උපපජ්‌ජති. ඉමෙ ඛො, භික්‌ඛවෙ, පඤ්‌ච ආදීනවා බහුභාණිස්‌මිං පුග්‌ගලෙ.
214. ‘‘Pañcime, bhikkhave, ādīnavā bahubhāṇismiṃ puggale. Katame pañca? Musā bhaṇati, pisuṇaṃ bhaṇati, pharusaṃ bhaṇati, samphappalāpaṃ bhaṇati, kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati. Ime kho, bhikkhave, pañca ādīnavā bahubhāṇismiṃ puggale.
‘‘පඤ්‌චිමෙ, භික්‌ඛවෙ, ආනිසංසා මන්‌තභාණිස්‌මිං පුග්‌ගලෙ. කතමෙ පඤ්‌ච? න මුසා භණති, න පිසුණං භණති, න ඵරුසං භණති, න සම්‌ඵප්‌පලාපං භණති, කායස්‌ස භෙදා පරං මරණා සුගතිං සග්‌ගං ලොකං උපපජ්‌ජති. ඉමෙ ඛො, භික්‌ඛවෙ, පඤ්‌ච ආනිසංසා මන්‌තභාණිස්‌මිං පුග්‌ගලෙ’’ති. චතුත්‌ථං.
‘‘Pañcime, bhikkhave, ānisaṃsā mantabhāṇismiṃ puggale. Katame pañca? Na musā bhaṇati, na pisuṇaṃ bhaṇati, na pharusaṃ bhaṇati, na samphappalāpaṃ bhaṇati, kāyassa bhedā paraṃ maraṇā sugatiṃ saggaṃ lokaṃ upapajjati. Ime kho, bhikkhave, pañca ānisaṃsā mantabhāṇismiṃ puggale’’ti. Catutthaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 4. බහුභාණිසුත්‌තවණ්‌ණනා • 4. Bahubhāṇisuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 3-10. සීලසුත්‌තාදිවණ්‌ණනා • 3-10. Sīlasuttādivaṇṇanā
