| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. বহুধীতরসুত্তং
10. Bahudhītarasuttaṃ
১৯৬. একং সমযং ভগৰা কোসলেসু ৰিহরতি অঞ্ঞতরস্মিং ৰনসণ্ডে। তেন খো পন সমযেন অঞ্ঞতরস্স ভারদ্ৰাজগোত্তস্স ব্রাহ্মণস্স চতুদ্দস বলীবদ্দা নট্ঠা হোন্তি। অথ খো ভারদ্ৰাজগোত্তো ব্রাহ্মণো তে বলীবদ্দে গৰেসন্তো যেন সো ৰনসণ্ডো তেনুপসঙ্কমি; উপসঙ্কমিত্ৰা অদ্দস ভগৰন্তং তস্মিং ৰনসণ্ডে নিসিন্নং পল্লঙ্কং আভুজিত্ৰা উজুং কাযং পণিধায পরিমুখং সতিং উপট্ঠপেত্ৰা। দিস্ৰান যেন ভগৰা তেনুপসঙ্কমি; উপসঙ্কমিত্ৰা ভগৰতো সন্তিকে ইমা গাথাযো অভাসি –
196. Ekaṃ samayaṃ bhagavā kosalesu viharati aññatarasmiṃ vanasaṇḍe. Tena kho pana samayena aññatarassa bhāradvājagottassa brāhmaṇassa catuddasa balībaddā naṭṭhā honti. Atha kho bhāradvājagotto brāhmaṇo te balībadde gavesanto yena so vanasaṇḍo tenupasaṅkami; upasaṅkamitvā addasa bhagavantaṃ tasmiṃ vanasaṇḍe nisinnaṃ pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā. Disvāna yena bhagavā tenupasaṅkami; upasaṅkamitvā bhagavato santike imā gāthāyo abhāsi –
অজ্জসট্ঠিং ন দিস্সন্তি, তেনাযং সমণো সুখী॥
Ajjasaṭṭhiṃ na dissanti, tenāyaṃ samaṇo sukhī.
‘‘ন হি নূনিমস্স সমণস্স, তিলাখেত্তস্মি পাপকা।
‘‘Na hi nūnimassa samaṇassa, tilākhettasmi pāpakā;
‘‘ন হি নূনিমস্স সমণস্স, তুচ্ছকোট্ঠস্মি মূসিকা।
‘‘Na hi nūnimassa samaṇassa, tucchakoṭṭhasmi mūsikā;
উস্সোল়্হিকায নচ্চন্তি, তেনাযং সমণো সুখী॥
Ussoḷhikāya naccanti, tenāyaṃ samaṇo sukhī.
‘‘ন হি নূনিমস্স সমণস্স, সন্থারো সত্তমাসিকো।
‘‘Na hi nūnimassa samaṇassa, santhāro sattamāsiko;
উপ্পাটকেহি সঞ্ছন্নো, তেনাযং সমণো সুখী॥
Uppāṭakehi sañchanno, tenāyaṃ samaṇo sukhī.
‘‘ন হি নূনিমস্স সমণস্স, ৰিধৰা সত্ত ধীতরো।
‘‘Na hi nūnimassa samaṇassa, vidhavā satta dhītaro;
‘‘ন হি নূনিমস্স সমণস্স, পিঙ্গলা তিলকাহতা।
‘‘Na hi nūnimassa samaṇassa, piṅgalā tilakāhatā;
সোত্তং পাদেন বোধেতি, তেনাযং সমণো সুখী॥
Sottaṃ pādena bodheti, tenāyaṃ samaṇo sukhī.
‘‘ন হি নূনিমস্স সমণস্স, পচ্চূসম্হি ইণাযিকা।
‘‘Na hi nūnimassa samaṇassa, paccūsamhi iṇāyikā;
দেথ দেথাতি চোদেন্তি, তেনাযং সমণো সুখী’’তি॥
Detha dethāti codenti, tenāyaṃ samaṇo sukhī’’ti.
‘‘ন হি ময্হং ব্রাহ্মণ, বলীবদ্দা চতুদ্দস।
‘‘Na hi mayhaṃ brāhmaṇa, balībaddā catuddasa;
অজ্জসট্ঠিং ন দিস্সন্তি, তেনাহং ব্রাহ্মণা সুখী॥
Ajjasaṭṭhiṃ na dissanti, tenāhaṃ brāhmaṇā sukhī.
‘‘ন হি ময্হং ব্রাহ্মণ, তিলাখেত্তস্মি পাপকা।
‘‘Na hi mayhaṃ brāhmaṇa, tilākhettasmi pāpakā;
একপণ্ণা দুপণ্ণা চ, তেনাহং ব্রাহ্মণা সুখী॥
Ekapaṇṇā dupaṇṇā ca, tenāhaṃ brāhmaṇā sukhī.
‘‘ন হি ময্হং ব্রাহ্মণ, তুচ্ছকোট্ঠস্মি মূসিকা।
‘‘Na hi mayhaṃ brāhmaṇa, tucchakoṭṭhasmi mūsikā;
উস্সোল়্হিকায নচ্চন্তি, তেনাহং ব্রাহ্মণা সুখী॥
Ussoḷhikāya naccanti, tenāhaṃ brāhmaṇā sukhī.
‘‘ন হি ময্হং ব্রাহ্মণ, সন্থারো সত্তমাসিকো।
‘‘Na hi mayhaṃ brāhmaṇa, santhāro sattamāsiko;
উপ্পাটকেহি সঞ্ছন্নো, তেনাহং ব্রাহ্মণা সুখী॥
Uppāṭakehi sañchanno, tenāhaṃ brāhmaṇā sukhī.
‘‘ন হি ময্হং ব্রাহ্মণ, ৰিধৰা সত্ত ধীতরো।
‘‘Na hi mayhaṃ brāhmaṇa, vidhavā satta dhītaro;
একপুত্তা দুপুত্তা চ, তেনাহং ব্রাহ্মণা সুখী॥
Ekaputtā duputtā ca, tenāhaṃ brāhmaṇā sukhī.
‘‘ন হি ময্হং ব্রাহ্মণ, পিঙ্গলা তিলকাহতা।
‘‘Na hi mayhaṃ brāhmaṇa, piṅgalā tilakāhatā;
সোত্তং পাদেন বোধেতি, তেনাহং ব্রাহ্মণা সুখী॥
Sottaṃ pādena bodheti, tenāhaṃ brāhmaṇā sukhī.
‘‘ন হি ময্হং ব্রাহ্মণ, পচ্চূসম্হি ইণাযিকা।
‘‘Na hi mayhaṃ brāhmaṇa, paccūsamhi iṇāyikā;
দেথ দেথাতি চোদেন্তি, তেনাহং ব্রাহ্মণা সুখী’’তি॥
Detha dethāti codenti, tenāhaṃ brāhmaṇā sukhī’’ti.
এৰং ৰুত্তে, ভারদ্ৰাজগোত্তো ব্রাহ্মণো ভগৰন্তং এতদৰোচ – ‘‘অভিক্কন্তং, ভো গোতম, অভিক্কন্তং, ভো গোতম! সেয্যথাপি, ভো গোতম, নিক্কুজ্জিতং ৰা উক্কুজ্জেয্য, পটিচ্ছন্নং ৰা ৰিৰরেয্য, মূল়্হস্স ৰা মগ্গং আচিক্খেয্য, অন্ধকারে ৰা তেলপজ্জোতং ধারেয্য – চক্খুমন্তো রূপানি দক্খন্তীতি; এৰমেৰ ভোতা গোতমেন অনেকপরিযাযেন ধম্মো পকাসিতো। এসাহং ভৰন্তং গোতমং সরণং গচ্ছামি ধম্মঞ্চ ভিক্খুসঙ্ঘঞ্চ। লভেয্যাহং ভোতো গোতমস্স সন্তিকে পব্বজ্জং, লভেয্যং উপসম্পদ’’ন্তি।
Evaṃ vutte, bhāradvājagotto brāhmaṇo bhagavantaṃ etadavoca – ‘‘abhikkantaṃ, bho gotama, abhikkantaṃ, bho gotama! Seyyathāpi, bho gotama, nikkujjitaṃ vā ukkujjeyya, paṭicchannaṃ vā vivareyya, mūḷhassa vā maggaṃ ācikkheyya, andhakāre vā telapajjotaṃ dhāreyya – cakkhumanto rūpāni dakkhantīti; evameva bhotā gotamena anekapariyāyena dhammo pakāsito. Esāhaṃ bhavantaṃ gotamaṃ saraṇaṃ gacchāmi dhammañca bhikkhusaṅghañca. Labheyyāhaṃ bhoto gotamassa santike pabbajjaṃ, labheyyaṃ upasampada’’nti.
অলত্থ খো ভারদ্ৰাজগোত্তো ব্রাহ্মণো ভগৰতো সন্তিকে পব্বজ্জং, অলত্থ উপসম্পদং। অচিরূপসম্পন্নো পনাযস্মা ভারদ্ৰাজো একো ৰূপকট্ঠো অপ্পমত্তো আতাপী পহিতত্তো ৰিহরন্তো নচিরস্সেৰ – যস্সত্থায কুলপুত্তা সম্মদেৰ অগারস্মা অনগারিযং পব্বজন্তি, তদনুত্তরং – ব্রহ্মচরিযপরিযোসানং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহাসি। ‘‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’’তি অব্ভঞ্ঞাসি। অঞ্ঞতরো চ পনাযস্মা ভারদ্ৰাজো অরহতং অহোসীতি।
Alattha kho bhāradvājagotto brāhmaṇo bhagavato santike pabbajjaṃ, alattha upasampadaṃ. Acirūpasampanno panāyasmā bhāradvājo eko vūpakaṭṭho appamatto ātāpī pahitatto viharanto nacirasseva – yassatthāya kulaputtā sammadeva agārasmā anagāriyaṃ pabbajanti, tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihāsi. ‘‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’’ti abbhaññāsi. Aññataro ca panāyasmā bhāradvājo arahataṃ ahosīti.
অরহন্তৰগ্গো পঠমো।
Arahantavaggo paṭhamo.
তস্সুদ্দানং –
Tassuddānaṃ –
ধনঞ্জানী চ অক্কোসং, অসুরিন্দং বিলঙ্গিকং।
Dhanañjānī ca akkosaṃ, asurindaṃ bilaṅgikaṃ;
অহিংসকং জটা চেৰ, সুদ্ধিকঞ্চেৰ অগ্গিকা।
Ahiṃsakaṃ jaṭā ceva, suddhikañceva aggikā;
সুন্দরিকং বহুধীতরেন চ তে দসাতি॥
Sundarikaṃ bahudhītarena ca te dasāti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. বহুধীতরসুত্তৰণ্ণনা • 10. Bahudhītarasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১০. বহুধীতরসুত্তৰণ্ণনা • 10. Bahudhītarasuttavaṇṇanā
