| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
១០. ពហុធីតរសុត្តំ
10. Bahudhītarasuttaṃ
១៩៦. ឯកំ សមយំ ភគវា កោសលេសុ វិហរតិ អញ្ញតរស្មិំ វនសណ្ឌេ។ តេន ខោ បន សមយេន អញ្ញតរស្ស ភារទ្វាជគោត្តស្ស ព្រាហ្មណស្ស ចតុទ្ទស ពលីពទ្ទា នដ្ឋា ហោន្តិ។ អថ ខោ ភារទ្វាជគោត្តោ ព្រាហ្មណោ តេ ពលីពទ្ទេ គវេសន្តោ យេន សោ វនសណ្ឌោ តេនុបសង្កមិ; ឧបសង្កមិត្វា អទ្ទស ភគវន្តំ តស្មិំ វនសណ្ឌេ និសិន្នំ បល្លង្កំ អាភុជិត្វា ឧជុំ កាយំ បណិធាយ បរិមុខំ សតិំ ឧបដ្ឋបេត្វា។ ទិស្វាន យេន ភគវា តេនុបសង្កមិ; ឧបសង្កមិត្វា ភគវតោ សន្តិកេ ឥមា គាថាយោ អភាសិ –
196. Ekaṃ samayaṃ bhagavā kosalesu viharati aññatarasmiṃ vanasaṇḍe. Tena kho pana samayena aññatarassa bhāradvājagottassa brāhmaṇassa catuddasa balībaddā naṭṭhā honti. Atha kho bhāradvājagotto brāhmaṇo te balībadde gavesanto yena so vanasaṇḍo tenupasaṅkami; upasaṅkamitvā addasa bhagavantaṃ tasmiṃ vanasaṇḍe nisinnaṃ pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā. Disvāna yena bhagavā tenupasaṅkami; upasaṅkamitvā bhagavato santike imā gāthāyo abhāsi –
អជ្ជសដ្ឋិំ ន ទិស្សន្តិ, តេនាយំ សមណោ សុខី។
Ajjasaṭṭhiṃ na dissanti, tenāyaṃ samaṇo sukhī.
‘‘ន ហិ នូនិមស្ស សមណស្ស, តិលាខេត្តស្មិ បាបកា;
‘‘Na hi nūnimassa samaṇassa, tilākhettasmi pāpakā;
‘‘ន ហិ នូនិមស្ស សមណស្ស, តុច្ឆកោដ្ឋស្មិ មូសិកា;
‘‘Na hi nūnimassa samaṇassa, tucchakoṭṭhasmi mūsikā;
ឧស្សោឡ្ហិកាយ នច្ចន្តិ, តេនាយំ សមណោ សុខី។
Ussoḷhikāya naccanti, tenāyaṃ samaṇo sukhī.
‘‘ន ហិ នូនិមស្ស សមណស្ស, សន្ថារោ សត្តមាសិកោ;
‘‘Na hi nūnimassa samaṇassa, santhāro sattamāsiko;
ឧប្បាដកេហិ សញ្ឆន្នោ, តេនាយំ សមណោ សុខី។
Uppāṭakehi sañchanno, tenāyaṃ samaṇo sukhī.
‘‘ន ហិ នូនិមស្ស សមណស្ស, វិធវា សត្ត ធីតរោ;
‘‘Na hi nūnimassa samaṇassa, vidhavā satta dhītaro;
‘‘ន ហិ នូនិមស្ស សមណស្ស, បិង្គលា តិលកាហតា;
‘‘Na hi nūnimassa samaṇassa, piṅgalā tilakāhatā;
សោត្តំ បាទេន ពោធេតិ, តេនាយំ សមណោ សុខី។
Sottaṃ pādena bodheti, tenāyaṃ samaṇo sukhī.
‘‘ន ហិ នូនិមស្ស សមណស្ស, បច្ចូសម្ហិ ឥណាយិកា;
‘‘Na hi nūnimassa samaṇassa, paccūsamhi iṇāyikā;
ទេថ ទេថាតិ ចោទេន្តិ, តេនាយំ សមណោ សុខី’’តិ។
Detha dethāti codenti, tenāyaṃ samaṇo sukhī’’ti.
‘‘ន ហិ មយ្ហំ ព្រាហ្មណ, ពលីពទ្ទា ចតុទ្ទស;
‘‘Na hi mayhaṃ brāhmaṇa, balībaddā catuddasa;
អជ្ជសដ្ឋិំ ន ទិស្សន្តិ, តេនាហំ ព្រាហ្មណា សុខី។
Ajjasaṭṭhiṃ na dissanti, tenāhaṃ brāhmaṇā sukhī.
‘‘ន ហិ មយ្ហំ ព្រាហ្មណ, តិលាខេត្តស្មិ បាបកា;
‘‘Na hi mayhaṃ brāhmaṇa, tilākhettasmi pāpakā;
ឯកបណ្ណា ទុបណ្ណា ច, តេនាហំ ព្រាហ្មណា សុខី។
Ekapaṇṇā dupaṇṇā ca, tenāhaṃ brāhmaṇā sukhī.
‘‘ន ហិ មយ្ហំ ព្រាហ្មណ, តុច្ឆកោដ្ឋស្មិ មូសិកា;
‘‘Na hi mayhaṃ brāhmaṇa, tucchakoṭṭhasmi mūsikā;
ឧស្សោឡ្ហិកាយ នច្ចន្តិ, តេនាហំ ព្រាហ្មណា សុខី។
Ussoḷhikāya naccanti, tenāhaṃ brāhmaṇā sukhī.
‘‘ន ហិ មយ្ហំ ព្រាហ្មណ, សន្ថារោ សត្តមាសិកោ;
‘‘Na hi mayhaṃ brāhmaṇa, santhāro sattamāsiko;
ឧប្បាដកេហិ សញ្ឆន្នោ, តេនាហំ ព្រាហ្មណា សុខី។
Uppāṭakehi sañchanno, tenāhaṃ brāhmaṇā sukhī.
‘‘ន ហិ មយ្ហំ ព្រាហ្មណ, វិធវា សត្ត ធីតរោ;
‘‘Na hi mayhaṃ brāhmaṇa, vidhavā satta dhītaro;
ឯកបុត្តា ទុបុត្តា ច, តេនាហំ ព្រាហ្មណា សុខី។
Ekaputtā duputtā ca, tenāhaṃ brāhmaṇā sukhī.
‘‘ន ហិ មយ្ហំ ព្រាហ្មណ, បិង្គលា តិលកាហតា;
‘‘Na hi mayhaṃ brāhmaṇa, piṅgalā tilakāhatā;
សោត្តំ បាទេន ពោធេតិ, តេនាហំ ព្រាហ្មណា សុខី។
Sottaṃ pādena bodheti, tenāhaṃ brāhmaṇā sukhī.
‘‘ន ហិ មយ្ហំ ព្រាហ្មណ, បច្ចូសម្ហិ ឥណាយិកា;
‘‘Na hi mayhaṃ brāhmaṇa, paccūsamhi iṇāyikā;
ទេថ ទេថាតិ ចោទេន្តិ, តេនាហំ ព្រាហ្មណា សុខី’’តិ។
Detha dethāti codenti, tenāhaṃ brāhmaṇā sukhī’’ti.
ឯវំ វុត្តេ, ភារទ្វាជគោត្តោ ព្រាហ្មណោ ភគវន្តំ ឯតទវោច – ‘‘អភិក្កន្តំ, ភោ គោតម, អភិក្កន្តំ, ភោ គោតម! សេយ្យថាបិ, ភោ គោតម, និក្កុជ្ជិតំ វា ឧក្កុជ្ជេយ្យ, បដិច្ឆន្នំ វា វិវរេយ្យ, មូឡ្ហស្ស វា មគ្គំ អាចិក្ខេយ្យ, អន្ធការេ វា តេលបជ្ជោតំ ធារេយ្យ – ចក្ខុមន្តោ រូបានិ ទក្ខន្តីតិ; ឯវមេវ ភោតា គោតមេន អនេកបរិយាយេន ធម្មោ បកាសិតោ។ ឯសាហំ ភវន្តំ គោតមំ សរណំ គច្ឆាមិ ធម្មញ្ច ភិក្ខុសង្ឃញ្ច។ លភេយ្យាហំ ភោតោ គោតមស្ស សន្តិកេ បព្ពជ្ជំ, លភេយ្យំ ឧបសម្បទ’’ន្តិ។
Evaṃ vutte, bhāradvājagotto brāhmaṇo bhagavantaṃ etadavoca – ‘‘abhikkantaṃ, bho gotama, abhikkantaṃ, bho gotama! Seyyathāpi, bho gotama, nikkujjitaṃ vā ukkujjeyya, paṭicchannaṃ vā vivareyya, mūḷhassa vā maggaṃ ācikkheyya, andhakāre vā telapajjotaṃ dhāreyya – cakkhumanto rūpāni dakkhantīti; evameva bhotā gotamena anekapariyāyena dhammo pakāsito. Esāhaṃ bhavantaṃ gotamaṃ saraṇaṃ gacchāmi dhammañca bhikkhusaṅghañca. Labheyyāhaṃ bhoto gotamassa santike pabbajjaṃ, labheyyaṃ upasampada’’nti.
អលត្ថ ខោ ភារទ្វាជគោត្តោ ព្រាហ្មណោ ភគវតោ សន្តិកេ បព្ពជ្ជំ, អលត្ថ ឧបសម្បទំ។ អចិរូបសម្បន្នោ បនាយស្មា ភារទ្វាជោ ឯកោ វូបកដ្ឋោ អប្បមត្តោ អាតាបី បហិតត្តោ វិហរន្តោ នចិរស្សេវ – យស្សត្ថាយ កុលបុត្តា សម្មទេវ អគារស្មា អនគារិយំ បព្ពជន្តិ, តទនុត្តរំ – ព្រហ្មចរិយបរិយោសានំ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហាសិ។ ‘‘ខីណា ជាតិ, វុសិតំ ព្រហ្មចរិយំ, កតំ ករណីយំ, នាបរំ ឥត្ថត្តាយា’’តិ អព្ភញ្ញាសិ។ អញ្ញតរោ ច បនាយស្មា ភារទ្វាជោ អរហតំ អហោសីតិ។
Alattha kho bhāradvājagotto brāhmaṇo bhagavato santike pabbajjaṃ, alattha upasampadaṃ. Acirūpasampanno panāyasmā bhāradvājo eko vūpakaṭṭho appamatto ātāpī pahitatto viharanto nacirasseva – yassatthāya kulaputtā sammadeva agārasmā anagāriyaṃ pabbajanti, tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihāsi. ‘‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’’ti abbhaññāsi. Aññataro ca panāyasmā bhāradvājo arahataṃ ahosīti.
អរហន្តវគ្គោ បឋមោ។
Arahantavaggo paṭhamo.
តស្សុទ្ទានំ –
Tassuddānaṃ –
ធនញ្ជានី ច អក្កោសំ, អសុរិន្ទំ ពិលង្គិកំ;
Dhanañjānī ca akkosaṃ, asurindaṃ bilaṅgikaṃ;
អហិំសកំ ជដា ចេវ, សុទ្ធិកញ្ចេវ អគ្គិកា;
Ahiṃsakaṃ jaṭā ceva, suddhikañceva aggikā;
សុន្ទរិកំ ពហុធីតរេន ច តេ ទសាតិ។
Sundarikaṃ bahudhītarena ca te dasāti.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១០. ពហុធីតរសុត្តវណ្ណនា • 10. Bahudhītarasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១០. ពហុធីតរសុត្តវណ្ណនា • 10. Bahudhītarasuttavaṇṇanā
