| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
১০. বহুধীতরসুত্তৰণ্ণনা
10. Bahudhītarasuttavaṇṇanā
১৯৬. সমন্ততোতি দক্খিণৰামানং ৰসেন সমন্ততো। ঊরুবদ্ধাসনন্তি ঊরূনং বন্ধনৰসেন নিসজ্জনং। দ্ৰিন্নং ঊরূনং অঞ্ঞমঞ্ঞবন্ধনৰসেন আভুজিতাকারং সন্ধাযাহ ‘‘আভুজিত্ৰাতি বন্ধিত্ৰা’’তি। হেট্ঠিমকাযস্স অনুজুকং ঠপনং নিসজ্জাৰচনেনেৰ বোধিতন্তি ‘‘উজুং কায’’ন্তি এত্থ কায-সদ্দো উপরিমকাযৰিসযোতি আহ ‘‘উপরিমং সরীরং উজুকং ঠপেত্ৰা’’তি। তং পন উজুকট্ঠপনং সরূপতো পযোজনতো চ দস্সেতুং ‘‘অট্ঠারসা’’তিআদি ৰুত্তং। পরিমুখন্তি এত্থ পরি-সদ্দো অভিসদ্দেন সমানত্থোতি আহ ‘‘কম্মট্ঠানাভিমুখ’’ন্তি, বহিদ্ধা পুথুত্তারম্মণতো নিৰারেত্ৰা কম্মট্ঠানংযেৰ পুরেক্খতোতি অত্থো। পরিগ্গহট্ঠো ‘‘পরিণাযিকা’’তিআদীসু ৰিয। মুখন্তি নিয্যানট্ঠো ‘‘সুঞ্ঞতৰিমোক্খমুখ’’ন্তিআদীসু ৰিয। পটিপক্খতো নিগ্গমনট্ঠো হি নিয্যানট্ঠো, তস্মা পরিগ্গহিতনিয্যানন্তি সব্বথা গহিতসম্মোসং পরিচ্চত্তসম্মোসং সতিং কত্ৰা পরমং সতিনেপক্কং উপট্ঠপেত্ৰাতি অত্থো। ছব্বণ্ণা…পে॰… নিসীদি ব্রাহ্মণস্স পসাদসঞ্জাননত্থং। অটৰিমুখা চরমানাতি গোচরং গণ্হন্তা।
196.Samantatoti dakkhiṇavāmānaṃ vasena samantato. Ūrubaddhāsananti ūrūnaṃ bandhanavasena nisajjanaṃ. Dvinnaṃ ūrūnaṃ aññamaññabandhanavasena ābhujitākāraṃ sandhāyāha ‘‘ābhujitvāti bandhitvā’’ti. Heṭṭhimakāyassa anujukaṃ ṭhapanaṃ nisajjāvacaneneva bodhitanti ‘‘ujuṃ kāya’’nti ettha kāya-saddo uparimakāyavisayoti āha ‘‘uparimaṃ sarīraṃ ujukaṃ ṭhapetvā’’ti. Taṃ pana ujukaṭṭhapanaṃ sarūpato payojanato ca dassetuṃ ‘‘aṭṭhārasā’’tiādi vuttaṃ. Parimukhanti ettha pari-saddo abhisaddena samānatthoti āha ‘‘kammaṭṭhānābhimukha’’nti, bahiddhā puthuttārammaṇato nivāretvā kammaṭṭhānaṃyeva purekkhatoti attho. Pariggahaṭṭho ‘‘pariṇāyikā’’tiādīsu viya. Mukhanti niyyānaṭṭho ‘‘suññatavimokkhamukha’’ntiādīsu viya. Paṭipakkhato niggamanaṭṭho hi niyyānaṭṭho, tasmā pariggahitaniyyānanti sabbathā gahitasammosaṃ pariccattasammosaṃ satiṃ katvā paramaṃ satinepakkaṃ upaṭṭhapetvāti attho. Chabbaṇṇā…pe… nisīdi brāhmaṇassa pasādasañjānanatthaṃ. Aṭavimukhā caramānāti gocaraṃ gaṇhantā.
অজ্জসট্ঠিন্তি অজ্জ ছন্নং পূরণী সট্ঠী দিৰসৰুত্তি, অজ্জ আদিং কত্ৰা ছ দিৰসেতি অত্থো। অচ্চন্তসংযোগে চেতং উপযোগৰচনং। অজ্জ ছদিৰসমত্তকাতি অজ্জতো ছট্ঠদিৰসমত্তকা। লামকাতি নিহীনা নিপ্ফলা। তেনাহ ‘‘তিলখাণুকা’’তিআদি।
Ajjasaṭṭhinti ajja channaṃ pūraṇī saṭṭhī divasavutti, ajja ādiṃ katvā cha divaseti attho. Accantasaṃyoge cetaṃ upayogavacanaṃ. Ajja chadivasamattakāti ajjato chaṭṭhadivasamattakā. Lāmakāti nihīnā nipphalā. Tenāha ‘‘tilakhāṇukā’’tiādi.
উস্সাহেনাতি উদ্ধং উদ্ধং পসারেন অভিভৰনেন। তং পন নেসং অভিভৰনং দস্সেতুং ‘‘কণ্ণনঙ্গুট্ঠাদীনী’’তিআদিমাহ।
Ussāhenāti uddhaṃ uddhaṃ pasārena abhibhavanena. Taṃ pana nesaṃ abhibhavanaṃ dassetuṃ ‘‘kaṇṇanaṅguṭṭhādīnī’’tiādimāha.
‘‘উপ্পাটকপাণকা’’তি তচং উপ্পাটেত্ৰা ৰিয খাদকপাণকা ঊকামঙ্গুলাদযো।
‘‘Uppāṭakapāṇakā’’ti tacaṃ uppāṭetvā viya khādakapāṇakā ūkāmaṅgulādayo.
কল়ারপিঙ্গলাতি নিক্খন্তপিঙ্গলক্খিকা, কল়ারপিঙ্গলাতি ৰা রত্তগত্তা চ পিঙ্গলচক্খুকা চ। তিলকাহতাতি আহততিলকা, তিলপ্পমাণেহি বিন্দূহি সমন্ততো সন্থতসরীরা।
Kaḷārapiṅgalāti nikkhantapiṅgalakkhikā, kaḷārapiṅgalāti vā rattagattā ca piṅgalacakkhukā ca. Tilakāhatāti āhatatilakā, tilappamāṇehi bindūhi samantato santhatasarīrā.
পটিগাথাহি ব্রাহ্মণস্স ধম্মদেসনং ৰড্ঢেসীতি পকতিযা তস্স অত্তনা কথেতব্বং ধম্মদেসনং পব্বজ্জাগুণকিত্তনৰসেন সত্তহি ৰড্ঢেসি। পব্বজিত্ৰাতি ইণাযিকানং অত্তনো পলিবোধং তথা তথা জানাপেত্ৰা পব্বজিত্ৰা।
Paṭigāthāhi brāhmaṇassa dhammadesanaṃ vaḍḍhesīti pakatiyā tassa attanā kathetabbaṃ dhammadesanaṃ pabbajjāguṇakittanavasena sattahi vaḍḍhesi. Pabbajitvāti iṇāyikānaṃ attano palibodhaṃ tathā tathā jānāpetvā pabbajitvā.
যথা চ তত্থ ভগৰা পটিপজ্জি, তং দস্সেতুং ‘‘পুন দিৰসে’’তিআদি ৰুত্তং।
Yathā ca tattha bhagavā paṭipajji, taṃ dassetuṃ ‘‘puna divase’’tiādi vuttaṃ.
তং তং কুলঘরং পেসেত্ৰাতি তং তং তস্স ব্রাহ্মণস্স ধীতরং তস্স তস্সানুচ্ছৰিকস্স ব্রাহ্মণস্স দেন্তো তং তং কুলঘরং পেসেত্ৰা ব্রাহ্মণধম্মে গরুকরণাভাৰতো।
Taṃ taṃ kulagharaṃ pesetvāti taṃ taṃ tassa brāhmaṇassa dhītaraṃ tassa tassānucchavikassa brāhmaṇassa dento taṃ taṃ kulagharaṃ pesetvā brāhmaṇadhamme garukaraṇābhāvato.
‘‘নট্ঠে মতে পব্বজিতে, নপুংসকেপি ভত্তরি।
‘‘Naṭṭhe mate pabbajite, napuṃsakepi bhattari;
ইত্থিযা পতিসেট্ঠায, ন অঞ্ঞো পতি ইচ্ছিযো’’তি॥ –
Itthiyā patiseṭṭhāya, na añño pati icchiyo’’ti. –
অযঞ্হি ব্রাহ্মণধম্মো। অয্যিকট্ঠানেতি মাতামহিট্ঠানে ঠপেসি সত্থু চিত্তারাধনৰসেনাতি।
Ayañhi brāhmaṇadhammo. Ayyikaṭṭhāneti mātāmahiṭṭhāne ṭhapesi satthu cittārādhanavasenāti.
বহুধীতরসুত্তৰণ্ণনা নিট্ঠিতা।
Bahudhītarasuttavaṇṇanā niṭṭhitā.
পঠমৰগ্গৰণ্ণনা নিট্ঠিতা।
Paṭhamavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১০. বহুধীতরসুত্তং • 10. Bahudhītarasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. বহুধীতরসুত্তৰণ্ণনা • 10. Bahudhītarasuttavaṇṇanā
