| Library / Tipiṭaka / তিপিটক • Tipiṭaka / ইতিৰুত্তক-অট্ঠকথা • Itivuttaka-aṭṭhakathā |
৫. বহুজনহিতসুত্তৰণ্ণনা
5. Bahujanahitasuttavaṇṇanā
৮৪. পঞ্চমে লোকেতি এত্থ তযো লোকা – সত্তলোকো, সঙ্খারলোকো, ওকাসলোকোতি। তেসু ইন্দ্রিযবদ্ধানং রূপধম্মানং অরূপধম্মানং রূপারূপধম্মানঞ্চ সন্তানৰসেন ৰত্তমানানং সমূহো সত্তলোকো, পথৰীপব্বতাদিভেদো ওকাসলোকো, উভযেপি খন্ধা সঙ্খারলোকো। তেসু সত্তলোকো ইধ অধিপ্পেতো। তস্মা লোকেতি সত্তলোকে। তত্থাপি ন দেৰলোকে, ন ব্রহ্মলোকে, মনুস্সলোকে। মনুস্সলোকেপি ন অঞ্ঞস্মিং চক্কৰাল়ে, ইমস্মিংযেৰ চক্কৰাল়ে। তত্রাপি ন সব্বট্ঠানেসু, ‘‘পুরত্থিমায দিসায গজঙ্গলং নাম নিগমো, তস্স অপরেন মহাসালা, ততো পরং পচ্চন্তিমা জনপদা, ওরতো মজ্ঝে; পুরত্থিমদক্খিণায দিসায সল্লৰতী নাম নদী, ততো পরং পচ্চন্তিমা জনপদা, ওরতো মজ্ঝে; দক্খিণায দিসায সেতকণ্ণিকং নাম নিগমো, ততো পরং পচ্চন্তিমা জনপদা , ওরতো মজ্ঝে; পচ্ছিমায দিসায থূণং নাম ব্রাহ্মণগামো, ততো পরং পচ্চন্তিমা জনপদা, ওরতো মজ্ঝে; উত্তরায দিসায উসিরদ্ধজো নাম পব্বতো, ততো পরং পচ্চন্তিমা জনপদা, ওরতো মজ্ঝে’’তি (মহাৰ॰ ২৫৯) এৰং পরিচ্ছিন্নে আযামতো তিযোজনসতে ৰিত্থারতো অড্ঢতেয্যযোজনসতে পরিক্খেপতো নৰযোজনসতে মজ্ঝিমদেসে উপ্পজ্জতি তথাগতো। ন কেৰলঞ্চ তথাগতোৰ পচ্চেকবুদ্ধা অগ্গসাৰকা অসীতিমহাথেরা বুদ্ধমাতা বুদ্ধপিতা চক্কৰত্তিরাজা অঞ্ঞে চ সারপ্পত্তা ব্রাহ্মণগহপতিকা এত্থেৰ উপ্পজ্জন্তি। ইধ পন তথাগতৰারেযেৰ সব্বত্থকৰসেন অযং নযো লব্ভতি, ইতরেসু একদেসৰসেন।
84. Pañcame loketi ettha tayo lokā – sattaloko, saṅkhāraloko, okāsalokoti. Tesu indriyabaddhānaṃ rūpadhammānaṃ arūpadhammānaṃ rūpārūpadhammānañca santānavasena vattamānānaṃ samūho sattaloko, pathavīpabbatādibhedo okāsaloko, ubhayepi khandhā saṅkhāraloko. Tesu sattaloko idha adhippeto. Tasmā loketi sattaloke. Tatthāpi na devaloke, na brahmaloke, manussaloke. Manussalokepi na aññasmiṃ cakkavāḷe, imasmiṃyeva cakkavāḷe. Tatrāpi na sabbaṭṭhānesu, ‘‘puratthimāya disāya gajaṅgalaṃ nāma nigamo, tassa aparena mahāsālā, tato paraṃ paccantimā janapadā, orato majjhe; puratthimadakkhiṇāya disāya sallavatī nāma nadī, tato paraṃ paccantimā janapadā, orato majjhe; dakkhiṇāya disāya setakaṇṇikaṃ nāma nigamo, tato paraṃ paccantimā janapadā , orato majjhe; pacchimāya disāya thūṇaṃ nāma brāhmaṇagāmo, tato paraṃ paccantimā janapadā, orato majjhe; uttarāya disāya usiraddhajo nāma pabbato, tato paraṃ paccantimā janapadā, orato majjhe’’ti (mahāva. 259) evaṃ paricchinne āyāmato tiyojanasate vitthārato aḍḍhateyyayojanasate parikkhepato navayojanasate majjhimadese uppajjati tathāgato. Na kevalañca tathāgatova paccekabuddhā aggasāvakā asītimahātherā buddhamātā buddhapitā cakkavattirājā aññe ca sārappattā brāhmaṇagahapatikā ettheva uppajjanti. Idha pana tathāgatavāreyeva sabbatthakavasena ayaṃ nayo labbhati, itaresu ekadesavasena.
উপ্পজ্জমানা উপ্পজ্জন্তীতি ইদং পন উভযম্পি ৰিপ্পকতৰচনমেৰ, উপ্পজ্জন্তা বহুজনহিতত্থায উপ্পজ্জন্তি, ন অঞ্ঞেন কারণেনাতি এৰমেত্থ অত্থো ৰেদিতব্বো। এৰরূপঞ্হেত্থ সদ্দলক্খণং ন সক্কা অঞ্ঞেন সদ্দলক্খণেন পটিবাহিতুং।
Uppajjamānāuppajjantīti idaṃ pana ubhayampi vippakatavacanameva, uppajjantā bahujanahitatthāya uppajjanti, na aññena kāraṇenāti evamettha attho veditabbo. Evarūpañhettha saddalakkhaṇaṃ na sakkā aññena saddalakkhaṇena paṭibāhituṃ.
অপিচ উপ্পজ্জমানো নাম উপ্পজ্জতি নাম উপ্পন্নো নামাতি অযং পভেদো ৰেদিতব্বো। তথাগতো হি মহাভিনীহারং করোন্তো, বুদ্ধকরে ধম্মে পরিযেসন্তো, পারমিযো পূরেন্তো, পঞ্চ মহাপরিচ্চাগে পরিচ্চজন্তো, ঞাতত্থচরিযং চরন্তো, লোকত্থচরিযং, বুদ্ধত্থচরিযং কোটিং পাপেন্তো, পারমিযো পূরেত্ৰা তুসিতভৰনে তিট্ঠন্তো, ততো ওতরিত্ৰা চরিমভৰে পটিসন্ধিং গণ্হন্তো, অগারমজ্ঝে ৰসন্তো, অভিনিক্খমন্তো, মহাপধানং পদহন্তো, পরিপক্কঞাণো বোধিমণ্ডং আরুয্হ মারবলং ৰিধমেন্তো পঠমযামে পুব্বেনিৰাসং অনুস্সরন্তো, মজ্ঝিমযামে দিব্বচক্খুং ৰিসোধেন্তো, পচ্ছিমযামে পটিচ্চসমুপ্পাদে ঞাণং ওতারেত্ৰা অনেকাকারং সব্বসঙ্খারে সম্মসিত্ৰা সোতাপত্তিমগ্গং পটিৰিজ্ঝন্তো যাৰ অনাগামিফলং সচ্ছিকরোন্তোপি উপ্পজ্জমানো এৰ নাম, অরহত্তমগ্গক্খণে উপ্পজ্জতি নাম, অরহত্তফলক্খণে পন উপ্পন্নো নাম। বুদ্ধানঞ্হি সাৰকানং ৰিয ন পটিপাটিযা ইদ্ধিৰিধঞাণাদীনং উপ্পাদনকিচ্চং অত্থি, সহেৰ পন অরহত্তমগ্গেন সকলোপি বুদ্ধগুণরাসি আগতোৰ নাম হোতি। তস্মা তে নিব্বত্তসব্বকিচ্চত্তা অরহত্তফলক্খণে উপ্পন্না নাম হোন্তি। ইধ অরহত্তফলক্খণং সন্ধায ‘‘উপ্পজ্জতী’’তি ৰুত্তো। উপ্পন্নো হোতীতি অযঞ্হেত্থ অত্থো।
Apica uppajjamāno nāma uppajjati nāma uppanno nāmāti ayaṃ pabhedo veditabbo. Tathāgato hi mahābhinīhāraṃ karonto, buddhakare dhamme pariyesanto, pāramiyo pūrento, pañca mahāpariccāge pariccajanto, ñātatthacariyaṃ caranto, lokatthacariyaṃ, buddhatthacariyaṃ koṭiṃ pāpento, pāramiyo pūretvā tusitabhavane tiṭṭhanto, tato otaritvā carimabhave paṭisandhiṃ gaṇhanto, agāramajjhe vasanto, abhinikkhamanto, mahāpadhānaṃ padahanto, paripakkañāṇo bodhimaṇḍaṃ āruyha mārabalaṃ vidhamento paṭhamayāme pubbenivāsaṃ anussaranto, majjhimayāme dibbacakkhuṃ visodhento, pacchimayāme paṭiccasamuppāde ñāṇaṃ otāretvā anekākāraṃ sabbasaṅkhāre sammasitvā sotāpattimaggaṃ paṭivijjhanto yāva anāgāmiphalaṃ sacchikarontopi uppajjamāno eva nāma, arahattamaggakkhaṇe uppajjati nāma, arahattaphalakkhaṇe pana uppanno nāma. Buddhānañhi sāvakānaṃ viya na paṭipāṭiyā iddhividhañāṇādīnaṃ uppādanakiccaṃ atthi, saheva pana arahattamaggena sakalopi buddhaguṇarāsi āgatova nāma hoti. Tasmā te nibbattasabbakiccattā arahattaphalakkhaṇe uppannā nāma honti. Idha arahattaphalakkhaṇaṃ sandhāya ‘‘uppajjatī’’ti vutto. Uppanno hotīti ayañhettha attho.
সাৰকোপি খীণাসৰো সাৰকবোধিযা হেতুভূতে পুঞ্ঞসম্ভারে সম্ভরন্তো পুব্বযোগং পুব্বচরিযং গতপচ্চাগতৰত্তং পূরেন্তো চরিমভৰে নিব্বত্তন্তো অনুক্কমেন ৰিঞ্ঞুতং পত্ৰা সংসারে আদীনৰং দিস্ৰা পব্বজ্জায চেতযমানো পব্বজ্জং মত্থকং পাপেত্ৰা সীলাদীনি পরিপূরেন্তো ধুতধম্মে সমাদায ৰত্তমানো জাগরিযং অনুযুঞ্জন্তো ঞাণানি নিব্বত্তেন্তো ৰিপস্সনং পট্ঠপেত্ৰা হেট্ঠিমমগ্গে অধিগচ্ছন্তোপি উপ্পজ্জমানো এৰ নাম, অরহত্তমগ্গক্খণে উপ্পজ্জতি নাম, অরহত্তফলক্খণে পন উপ্পন্নো নাম। সেক্খো পন পুব্বূপনিস্সযতো পট্ঠায যাৰ গোত্রভুঞাণা উপ্পজ্জমানো নাম, পঠমমগ্গক্খণে উপ্পজ্জতি নাম, পঠমফলক্খণতো পট্ঠায উপ্পন্নো নাম। এত্তাৰতা ‘‘তযোমে, ভিক্খৰে, পুগ্গলা লোকে উপ্পজ্জমানা উপ্পজ্জন্তী’’তি পদানং অত্থো ৰুত্তো হোতি।
Sāvakopi khīṇāsavo sāvakabodhiyā hetubhūte puññasambhāre sambharanto pubbayogaṃ pubbacariyaṃ gatapaccāgatavattaṃ pūrento carimabhave nibbattanto anukkamena viññutaṃ patvā saṃsāre ādīnavaṃ disvā pabbajjāya cetayamāno pabbajjaṃ matthakaṃ pāpetvā sīlādīni paripūrento dhutadhamme samādāya vattamāno jāgariyaṃ anuyuñjanto ñāṇāni nibbattento vipassanaṃ paṭṭhapetvā heṭṭhimamagge adhigacchantopi uppajjamāno eva nāma, arahattamaggakkhaṇe uppajjati nāma, arahattaphalakkhaṇe pana uppanno nāma. Sekkho pana pubbūpanissayato paṭṭhāya yāva gotrabhuñāṇā uppajjamāno nāma, paṭhamamaggakkhaṇe uppajjati nāma, paṭhamaphalakkhaṇato paṭṭhāya uppanno nāma. Ettāvatā ‘‘tayome, bhikkhave, puggalā loke uppajjamānā uppajjantī’’ti padānaṃ attho vutto hoti.
ইদানি বহুজনহিতাযাতিআদীসু বহুজনহিতাযাতি মহাজনস্স হিতত্থায। বহুজনসুখাযাতি মহাজনস্স সুখত্থায। লোকানুকম্পাযাতি সত্তলোকস্স অনুকম্পং পটিচ্চ। কতরসত্তলোকস্সাতি ? যো তথাগতস্স ধম্মদেসনং সুত্ৰা ধম্মং পটিৰিজ্ঝতি, অমতপানং পিৰতি, তস্স। ভগৰতো হি ধম্মচক্কপ্পৰত্তনসুত্তন্তদেসনায অঞ্ঞাতকোণ্ডঞ্ঞপ্পমুখা অট্ঠারস ব্রহ্মকোটিযো ধম্মং পটিৰিজ্ঝিংসু। এৰং যাৰ সুভদ্দপরিব্বাজকৰিনযনা ধম্মং পটিৰিদ্ধসত্তানং গণনা নত্থি, মহাসমযসুত্তন্তদেসনাযং মঙ্গলসুত্তং, চূল়রাহুলোৰাদং, সমচিত্তদেসনাযন্তি ইমেসু চতূসু ঠানেসু অভিসমযং পত্তসত্তানং পরিচ্ছেদো নত্থি। এৰমেতস্স অপরিমাণস্স সত্তলোকস্স অনুকম্পায। সাৰকস্স পন অরহতো সেক্খস্স চ লোকানুকম্পায উপ্পত্তি ধম্মসেনাপতিআদীহি ধম্মভণ্ডাগারিকাদীহি চ দেসিতদেসনায পটিৰেধপ্পত্তসত্তানং ৰসেন, অপরভাগে চ মহামহিন্দত্থেরাদীহি দেসিতদেসনায পটিৰিদ্ধসচ্চানং ৰসেন, যাৰজ্জতনা ইতো পরং অনাগতে চ সাসনং নিস্সায সগ্গমোক্খমগ্গেসু পতিট্ঠহন্তানং ৰসেনপি অযমত্থো ৰিভাৰেতব্বো।
Idāni bahujanahitāyātiādīsu bahujanahitāyāti mahājanassa hitatthāya. Bahujanasukhāyāti mahājanassa sukhatthāya. Lokānukampāyāti sattalokassa anukampaṃ paṭicca. Katarasattalokassāti ? Yo tathāgatassa dhammadesanaṃ sutvā dhammaṃ paṭivijjhati, amatapānaṃ pivati, tassa. Bhagavato hi dhammacakkappavattanasuttantadesanāya aññātakoṇḍaññappamukhā aṭṭhārasa brahmakoṭiyo dhammaṃ paṭivijjhiṃsu. Evaṃ yāva subhaddaparibbājakavinayanā dhammaṃ paṭividdhasattānaṃ gaṇanā natthi, mahāsamayasuttantadesanāyaṃ maṅgalasuttaṃ, cūḷarāhulovādaṃ, samacittadesanāyanti imesu catūsu ṭhānesu abhisamayaṃ pattasattānaṃ paricchedo natthi. Evametassa aparimāṇassa sattalokassa anukampāya. Sāvakassa pana arahato sekkhassa ca lokānukampāya uppatti dhammasenāpatiādīhi dhammabhaṇḍāgārikādīhi ca desitadesanāya paṭivedhappattasattānaṃ vasena, aparabhāge ca mahāmahindattherādīhi desitadesanāya paṭividdhasaccānaṃ vasena, yāvajjatanā ito paraṃ anāgate ca sāsanaṃ nissāya saggamokkhamaggesu patiṭṭhahantānaṃ vasenapi ayamattho vibhāvetabbo.
অপিচ বহুজনহিতাযাতি বহুজনস্স হিতত্থায, নেসং পঞ্ঞাসম্পত্তিযা দিট্ঠধম্মিকসম্পরাযিকহিতূপদেসকোতি। বহুজনসুখাযাতি বহুজনস্স সুখত্থায, চাগসম্পত্তিযা উপকরণসুখসম্পদাযকোতি। লোকানুকম্পাযাতি লোকস্স অনুকম্পনত্থায, মেত্তাকরুণাসম্পত্তিযা মাতাপিতরো ৰিয লোকস্স রক্খিতা গোপিতাতি। অত্থায হিতায সুখায দেৰমনুস্সানন্তি ইধ দেৰমনুস্সগ্গহণেন ভব্বপুগ্গলে ৰেনেয্যসত্তে এৰ গহেত্ৰা তেসং নিব্বানমগ্গফলাধিগমায তথাগতস্স উপ্পত্তি দস্সিতা পঠমৰারে, দুতিযততিযৰারেসু পন অরহতো সেক্খস্স চ ৰসেন যোজেতব্বং। তত্থ অত্থাযাতি ইমিনা পরমত্থায, নিব্বানাযাতি ৰুত্তং হোতি। হিতাযাতি তংসম্পাপকমগ্গত্থাযাতি ৰুত্তং হোতি। নিব্বানসম্পাপকমগ্গতো হি উত্তরিং হিতং নাম নত্থি। সুখাযাতি ফলসমাপত্তিসুখত্থাযাতি ৰুত্তং হোতি, ততো উত্তরি সুখাভাৰতো। ৰুত্তঞ্হেতং ‘‘অযং সমাধি পচ্চুপ্পন্নসুখো চেৰ আযতিঞ্চ সুখৰিপাকো’’তি (দী॰ নি॰ ৩.৩৫৫; অ॰ নি॰ ৫.২৭; ৰিভ॰ ৮০৪)।
Apica bahujanahitāyāti bahujanassa hitatthāya, nesaṃ paññāsampattiyā diṭṭhadhammikasamparāyikahitūpadesakoti. Bahujanasukhāyāti bahujanassa sukhatthāya, cāgasampattiyā upakaraṇasukhasampadāyakoti. Lokānukampāyāti lokassa anukampanatthāya, mettākaruṇāsampattiyā mātāpitaro viya lokassa rakkhitā gopitāti. Atthāya hitāya sukhāya devamanussānanti idha devamanussaggahaṇena bhabbapuggale veneyyasatte eva gahetvā tesaṃ nibbānamaggaphalādhigamāya tathāgatassa uppatti dassitā paṭhamavāre, dutiyatatiyavāresu pana arahato sekkhassa ca vasena yojetabbaṃ. Tattha atthāyāti iminā paramatthāya, nibbānāyāti vuttaṃ hoti. Hitāyāti taṃsampāpakamaggatthāyāti vuttaṃ hoti. Nibbānasampāpakamaggato hi uttariṃ hitaṃ nāma natthi. Sukhāyāti phalasamāpattisukhatthāyāti vuttaṃ hoti, tato uttari sukhābhāvato. Vuttañhetaṃ ‘‘ayaṃ samādhi paccuppannasukho ceva āyatiñca sukhavipāko’’ti (dī. ni. 3.355; a. ni. 5.27; vibha. 804).
তথাগতোতিআদীনং পদানং অত্থো হেট্ঠা ৰুত্তো। ৰিজ্জাচরণসম্পন্নোতিআদীসু তিস্সোপি ৰিজ্জা ভযভেরৰে (ম॰ নি॰ ১.৩৪ আদযো) আগতনযেন, ছপি ৰিজ্জা ছল়ভিঞ্ঞাৰসেন, অট্ঠপি ৰিজ্জা অম্বট্ঠসুত্তে আগতাতি ৰিজ্জাহি, সীলসংৰরাদীহি, পন্নরসহি চরণধম্মেহি চ, অনঞ্ঞসাধারণেহি সম্পন্নো সমন্নাগতোতি ৰিজ্জাচরণসম্পন্নো। সোভনগমনত্তা, সুন্দরং ঠানং গতত্তা, সম্মা গতত্তা, সম্মা গদত্তা চ সুগতো। সব্বথা ৰিদিতলোকত্তা লোকৰিদূ। নত্থি এতস্স উত্তরোতি অনুত্তরো। পুরিসদম্মে পুরিসৰেনেয্যে সারেতি ৰিনেতীতি পুরিসদম্মসারথি। দিট্ঠধম্মিকসম্পরাযিকপরমত্থেহি যথারহং অনুসাসতীতি সত্থা। সব্বস্সাপি নেয্যস্স সব্বপ্পকারেন সযম্ভুঞাণেন বুদ্ধত্তা বুদ্ধোতি অযমেত্থ সঙ্খেপো, ৰিত্থারো পন ৰিসুদ্ধিমগ্গতো (ৰিসুদ্ধি॰ ১.১৩২-১৩৩) গহেতব্বো।
Tathāgatotiādīnaṃ padānaṃ attho heṭṭhā vutto. Vijjācaraṇasampannotiādīsu tissopi vijjā bhayabherave (ma. ni. 1.34 ādayo) āgatanayena, chapi vijjā chaḷabhiññāvasena, aṭṭhapi vijjā ambaṭṭhasutte āgatāti vijjāhi, sīlasaṃvarādīhi, pannarasahi caraṇadhammehi ca, anaññasādhāraṇehi sampanno samannāgatoti vijjācaraṇasampanno. Sobhanagamanattā, sundaraṃ ṭhānaṃ gatattā, sammā gatattā, sammā gadattā ca sugato. Sabbathā viditalokattā lokavidū. Natthi etassa uttaroti anuttaro. Purisadamme purisaveneyye sāreti vinetīti purisadammasārathi. Diṭṭhadhammikasamparāyikaparamatthehi yathārahaṃ anusāsatīti satthā. Sabbassāpi neyyassa sabbappakārena sayambhuñāṇena buddhattā buddhoti ayamettha saṅkhepo, vitthāro pana visuddhimaggato (visuddhi. 1.132-133) gahetabbo.
সো ধম্মং দেসেতি আদি…পে॰… পরিযোসানকল্যাণন্তি সো ভগৰা সত্তেসু কারুঞ্ঞং পটিচ্চ হিত্ৰাপি অনুত্তরং ৰিৰেকসুখং ধম্মং দেসেতি। তঞ্চ খো অপ্পং ৰা বহুং ৰা দেসেন্তো আদিকল্যাণাদিপ্পকারমেৰ দেসেতি। কথং? একগাথাপি হি সমন্তভদ্দকত্তা ধম্মস্স পঠমপাদেন আদিকল্যাণা, দুতিযততিযেহি মজ্ঝেকল্যাণা, পচ্ছিমেন পরিযোসানকল্যাণা। একানুসন্ধিকং সুত্তং নিদানেন আদিকল্যাণং, নিগমনেন পরিযোসানকল্যাণং, সেসেন মজ্ঝেকল্যাণং। নানানুসন্ধিকং সুত্তং পঠমেন অনুসন্ধিনা আদিকল্যাণং, পচ্ছিমেন পরিযোসানকল্যাণং, সেসেহি মজ্ঝেকল্যাণং। সকলোপি ৰা সাসনধম্মো অত্তনো অত্থভূতেন সীলেন আদিকল্যাণো, সমথৰিপস্সনামগ্গফলেহি মজ্ঝেকল্যাণো, নিব্বানেন পরিযোসানকল্যাণো। সীলসমাধীহি ৰা আদিকল্যাণো, ৰিপস্সনামগ্গেহি মজ্ঝেকল্যাণো, ফলনিব্বানেহি পরিযোসানকল্যাণো। বুদ্ধসুবুদ্ধতায ৰা আদিকল্যাণো, ধম্মসুধম্মতায মজ্ঝেকল্যাণো, সঙ্ঘসুপ্পটিপত্তিযা পরিযোসানকল্যাণো। তং সুত্ৰা তথত্তায পটিপন্নেন অধিগন্তব্বায অভিসম্বোধিযা ৰা আদিকল্যাণো, পচ্চেকবোধিযা মজ্ঝেকল্যাণো, সাৰকবোধিযা পরিযোসানকল্যাণো। সুয্যমানো চেস নীৰরণৰিক্খম্ভনতো সৰনেনপি কল্যাণমেৰ আৰহতীতি আদিকল্যাণো, পটিপজ্জিযমানো সমথৰিপস্সনাসুখাৰহনতো পটিপত্তিযাপি সুখমেৰ আৰহতীতি মজ্ঝেকল্যাণো, তথাপটিপন্নো চ পটিপত্তিফলে নিট্ঠিতে তাদিভাৰাৰহনতো পটিপত্তিফলেনপি কল্যাণমেৰ আৰহতীতি পরিযোসানকল্যাণো। নাথপ্পভৰত্তা চ পভৰসুদ্ধিযা আদিকল্যাণো, অত্থসুদ্ধিযা মজ্ঝেকল্যাণো, কিচ্চসুদ্ধিযা পরিযোসানকল্যাণো। তেন ৰুত্তং ‘‘সো ধম্মং দেসেতি আদি…পে॰… পরিযোসানকল্যাণ’’ন্তি।
So dhammaṃ deseti ādi…pe… pariyosānakalyāṇanti so bhagavā sattesu kāruññaṃ paṭicca hitvāpi anuttaraṃ vivekasukhaṃ dhammaṃ deseti. Tañca kho appaṃ vā bahuṃ vā desento ādikalyāṇādippakārameva deseti. Kathaṃ? Ekagāthāpi hi samantabhaddakattā dhammassa paṭhamapādena ādikalyāṇā, dutiyatatiyehi majjhekalyāṇā, pacchimena pariyosānakalyāṇā. Ekānusandhikaṃ suttaṃ nidānena ādikalyāṇaṃ, nigamanena pariyosānakalyāṇaṃ, sesena majjhekalyāṇaṃ. Nānānusandhikaṃ suttaṃ paṭhamena anusandhinā ādikalyāṇaṃ, pacchimena pariyosānakalyāṇaṃ, sesehi majjhekalyāṇaṃ. Sakalopi vā sāsanadhammo attano atthabhūtena sīlena ādikalyāṇo, samathavipassanāmaggaphalehi majjhekalyāṇo, nibbānena pariyosānakalyāṇo. Sīlasamādhīhi vā ādikalyāṇo, vipassanāmaggehi majjhekalyāṇo, phalanibbānehi pariyosānakalyāṇo. Buddhasubuddhatāya vā ādikalyāṇo, dhammasudhammatāya majjhekalyāṇo, saṅghasuppaṭipattiyā pariyosānakalyāṇo. Taṃ sutvā tathattāya paṭipannena adhigantabbāya abhisambodhiyā vā ādikalyāṇo, paccekabodhiyā majjhekalyāṇo, sāvakabodhiyā pariyosānakalyāṇo. Suyyamāno cesa nīvaraṇavikkhambhanato savanenapi kalyāṇameva āvahatīti ādikalyāṇo, paṭipajjiyamāno samathavipassanāsukhāvahanato paṭipattiyāpi sukhameva āvahatīti majjhekalyāṇo, tathāpaṭipanno ca paṭipattiphale niṭṭhite tādibhāvāvahanato paṭipattiphalenapi kalyāṇameva āvahatīti pariyosānakalyāṇo. Nāthappabhavattā ca pabhavasuddhiyā ādikalyāṇo, atthasuddhiyā majjhekalyāṇo, kiccasuddhiyā pariyosānakalyāṇo. Tena vuttaṃ ‘‘so dhammaṃ deseti ādi…pe… pariyosānakalyāṇa’’nti.
যং পন ভগৰা ধম্মং দেসেন্তো সাসনব্রহ্মচরিযং মগ্গব্রহ্মচরিযঞ্চ পকাসেতি, নানানযেহি দীপেতি, তং যথানুরূপং অত্থসম্পত্তিযা সাত্থং, ব্যঞ্জনসম্পত্তিযা সব্যঞ্জনং। সঙ্কাসন, পকাসন, ৰিৰরণ, ৰিভজন, উত্তানীকরণ পঞ্ঞত্তিঅত্থপদসমাযোগতো সাত্থং, অক্খরপদব্যঞ্জনাকারনিরুত্তিনিদ্দেসসম্পত্তিযা সব্যঞ্জনং, অত্থগম্ভীরতাপটিৰেধগম্ভীরতাহি ৰা সাত্থং, ধম্মগম্ভীরতাদেসনাগম্ভীরতাহি সব্যঞ্জনং। অত্থপটিভানপটিসম্ভিদাৰিসযতো ৰা সাত্থং, ধম্মনিরুত্তিপটিসম্ভিদাৰিসযতো সব্যঞ্জনং। পণ্ডিতৰেদনীযতো পরিক্খকজনপ্পসাদকন্তি সাত্থং, সদ্ধেয্যতো লোকিযজনপ্পসাদকন্তি সব্যঞ্জনং। গম্ভীরাধিপ্পাযতো সাত্থং, উত্তানপদতো সব্যঞ্জনং। উপনেতব্বস্স অভাৰতো সকলপরিপুণ্ণভাৰেন কেৰলপরিপুণ্ণং, অপনেতব্বস্স অভাৰতো নিদ্দোসভাৰেন পরিসুদ্ধং, অপিচ পটিপত্তিযা অধিগমব্যত্তিতো সাত্থং, পরিযত্তিযা আগমব্যত্তিতো সব্যঞ্জনং, সীলাদিপঞ্চধম্মক্খন্ধপারিপূরিযা পরিপুণ্ণং, নিরুপক্কিলেসতো নিত্থরণত্থায পৰত্তিতো লোকামিসনিরপেক্খতো চ পরিসুদ্ধং, সিক্খত্তযপরিগ্গহিতত্তা ব্রহ্মভূতেহি সেট্ঠেহি চরিতব্বতো তেসং চরিযভাৰতো চ ব্রহ্মচরিযং। তস্মা ‘‘সাত্থং সব্যঞ্জনং…পে॰… পকাসেতী’’তি ৰুচ্চতি। পঠমোতি গণনানুপুব্বতো সব্বলোকুত্তমভাৰতো চ পঠমো পুগ্গলো।
Yaṃ pana bhagavā dhammaṃ desento sāsanabrahmacariyaṃ maggabrahmacariyañca pakāseti, nānānayehi dīpeti, taṃ yathānurūpaṃ atthasampattiyā sātthaṃ, byañjanasampattiyā sabyañjanaṃ. Saṅkāsana, pakāsana, vivaraṇa, vibhajana, uttānīkaraṇa paññattiatthapadasamāyogato sātthaṃ, akkharapadabyañjanākāraniruttiniddesasampattiyā sabyañjanaṃ, atthagambhīratāpaṭivedhagambhīratāhi vā sātthaṃ, dhammagambhīratādesanāgambhīratāhi sabyañjanaṃ. Atthapaṭibhānapaṭisambhidāvisayato vā sātthaṃ, dhammaniruttipaṭisambhidāvisayato sabyañjanaṃ. Paṇḍitavedanīyato parikkhakajanappasādakanti sātthaṃ, saddheyyato lokiyajanappasādakanti sabyañjanaṃ. Gambhīrādhippāyato sātthaṃ, uttānapadato sabyañjanaṃ. Upanetabbassa abhāvato sakalaparipuṇṇabhāvena kevalaparipuṇṇaṃ, apanetabbassa abhāvato niddosabhāvena parisuddhaṃ, apica paṭipattiyā adhigamabyattito sātthaṃ, pariyattiyā āgamabyattito sabyañjanaṃ, sīlādipañcadhammakkhandhapāripūriyā paripuṇṇaṃ, nirupakkilesato nittharaṇatthāya pavattito lokāmisanirapekkhato ca parisuddhaṃ, sikkhattayapariggahitattā brahmabhūtehi seṭṭhehi caritabbato tesaṃ cariyabhāvato ca brahmacariyaṃ. Tasmā ‘‘sātthaṃ sabyañjanaṃ…pe… pakāsetī’’ti vuccati. Paṭhamoti gaṇanānupubbato sabbalokuttamabhāvato ca paṭhamo puggalo.
তস্সেৰ সত্থু সাৰকোতি তস্সেৰ যথাৰুত্তগুণস্স সত্থু সম্মাসম্বুদ্ধস্স ধম্মদেসনায সৰনন্তে জাতো ধম্মসেনাপতিসদিসো সাৰকো, ন পূরণাদি ৰিয পটিঞ্ঞামত্তেন সত্থু সাৰকো। পাটিপদোতি পটিপদাসঙ্খাতেন অরিযমগ্গেন অরিযায জাতিযা জাতো ভৰোতি পাটিপদো, অনিট্ঠিতপটিপত্তিকিচ্চো পটিপজ্জমানোতি অত্থো। সুত্তগেয্যাদি পরিযত্তিধম্মো বহুং সুতো এতেনাতি বহুস্সুতো। পাতিমোক্খসংৰরাদিসীলেন চেৰ আরঞ্ঞিকঙ্গাদিধুতঙ্গৰতেহি চ উপপন্নো সম্পন্নো সমন্নাগতোতি সীলৰতূপপন্নো। ইতি ভগৰা ‘‘লোকানুকম্পা নাম হিতজ্ঝাসযেন ধম্মদেসনা, সা চ ইমেসু এৰ তীসু পুগ্গলেসু পটিবদ্ধা’’তি দস্সেতি। সেসং সুৰিঞ্ঞেয্যমেৰ।
Tasseva satthu sāvakoti tasseva yathāvuttaguṇassa satthu sammāsambuddhassa dhammadesanāya savanante jāto dhammasenāpatisadiso sāvako, na pūraṇādi viya paṭiññāmattena satthu sāvako. Pāṭipadoti paṭipadāsaṅkhātena ariyamaggena ariyāya jātiyā jāto bhavoti pāṭipado, aniṭṭhitapaṭipattikicco paṭipajjamānoti attho. Suttageyyādi pariyattidhammo bahuṃ suto etenāti bahussuto. Pātimokkhasaṃvarādisīlena ceva āraññikaṅgādidhutaṅgavatehi ca upapanno sampanno samannāgatoti sīlavatūpapanno. Iti bhagavā ‘‘lokānukampā nāma hitajjhāsayena dhammadesanā, sā ca imesu eva tīsu puggalesu paṭibaddhā’’ti dasseti. Sesaṃ suviññeyyameva.
গাথাসু তস্সন্ৰযোতি তস্সেৰ সত্থু পটিপত্তিযা ধম্মদেসনায চ অনুগমনেন তস্সন্ৰযো অনুজাতো। অৰিজ্জন্ধকারং ৰিধমিত্ৰা সপরসন্তানেসু ধম্মালোকসঙ্খাতায পভায করণতো পভঙ্করা। ধম্মমুদীরযন্তাতি চতুসচ্চধম্মং কথেন্তা। অপাপুরন্তীতি উগ্ঘাটেন্তি। অমতস্স নিব্বানস্স। দ্ৰারং অরিযমগ্গং। যোগাতি কামযোগাদিতো। সত্থৰাহেনাতি ৰেনেয্যসত্থৰাহনতো ভৰকন্তারনিত্থরণতো সত্থৰাহো, ভগৰা, তেন সত্থৰাহেন। সুদেসিতং মগ্গমনুক্কমন্তীতি তেন সম্মা দেসিতং অরিযমগ্গং তস্স দেসনানুসারেন অনুগচ্ছন্তি পটিপজ্জন্তি। ইধেৰাতি ইমস্মিংযেৰ অত্তভাৰে। সেসং উত্তানমেৰ।
Gāthāsu tassanvayoti tasseva satthu paṭipattiyā dhammadesanāya ca anugamanena tassanvayo anujāto. Avijjandhakāraṃ vidhamitvā saparasantānesu dhammālokasaṅkhātāya pabhāya karaṇato pabhaṅkarā. Dhammamudīrayantāti catusaccadhammaṃ kathentā. Apāpurantīti ugghāṭenti. Amatassa nibbānassa. Dvāraṃ ariyamaggaṃ. Yogāti kāmayogādito. Satthavāhenāti veneyyasatthavāhanato bhavakantāranittharaṇato satthavāho, bhagavā, tena satthavāhena. Sudesitaṃ maggamanukkamantīti tena sammā desitaṃ ariyamaggaṃ tassa desanānusārena anugacchanti paṭipajjanti. Idhevāti imasmiṃyeva attabhāve. Sesaṃ uttānameva.
পঞ্চমসুত্তৰণ্ণনা নিট্ঠিতা।
Pañcamasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / ইতিৰুত্তকপাল়ি • Itivuttakapāḷi / ৫. বহুজনহিতসুত্তং • 5. Bahujanahitasuttaṃ
