| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
८. बहुकारसुत्तं
8. Bahukārasuttaṃ
१०७. वुत्तञ्हेतं भगवता, वुत्तमरहताति मे सुतं –
107. Vuttañhetaṃ bhagavatā, vuttamarahatāti me sutaṃ –
‘‘बहुकारा 1, भिक्खवे, ब्राह्मणगहपतिका तुम्हाकं ये वो 2 पच्चुपट्ठिता चीवरपिण्डपातसेनासनगिलानपच्चयभेसज्जपरिक्खारेहि। तुम्हेपि, भिक्खवे, बहुकारा ब्राह्मणगहपतिकानं यं 3 नेसं धम्मं देसेथ आदिकल्याणं मज्झेकल्याणं परियोसानकल्याणं सात्थं सब्यञ्जनं, केवलपरिपुण्णं परिसुद्धं ब्रह्मचरियं पकासेथ। एवमिदं, भिक्खवे, अञ्ञमञ्ञं निस्साय ब्रह्मचरियं वुस्सति ओघस्स नित्थरणत्थाय सम्मा दुक्खस्स अन्तकिरियाया’’ति। एतमत्थं भगवा अवोच। तत्थेतं इति वुच्चति –
‘‘Bahukārā 4, bhikkhave, brāhmaṇagahapatikā tumhākaṃ ye vo 5 paccupaṭṭhitā cīvarapiṇḍapātasenāsanagilānapaccayabhesajjaparikkhārehi. Tumhepi, bhikkhave, bahukārā brāhmaṇagahapatikānaṃ yaṃ 6 nesaṃ dhammaṃ desetha ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ, kevalaparipuṇṇaṃ parisuddhaṃ brahmacariyaṃ pakāsetha. Evamidaṃ, bhikkhave, aññamaññaṃ nissāya brahmacariyaṃ vussati oghassa nittharaṇatthāya sammā dukkhassa antakiriyāyā’’ti. Etamatthaṃ bhagavā avoca. Tatthetaṃ iti vuccati –
‘‘सागारा अनगारा च, उभो अञ्ञोञ्ञनिस्सिता।
‘‘Sāgārā anagārā ca, ubho aññoññanissitā;
आराधयन्ति सद्धम्मं, योगक्खेमं अनुत्तरं॥
Ārādhayanti saddhammaṃ, yogakkhemaṃ anuttaraṃ.
‘‘सागारेसु च चीवरं, पच्चयं सयनासनं।
‘‘Sāgāresu ca cīvaraṃ, paccayaṃ sayanāsanaṃ;
अनगारा पटिच्छन्ति, परिस्सयविनोदनं॥
Anagārā paṭicchanti, parissayavinodanaṃ.
सद्दहाना अरहतं, अरियपञ्ञाय झायिनो॥
Saddahānā arahataṃ, ariyapaññāya jhāyino.
‘‘इध धम्मं चरित्वान, मग्गं सुगतिगामिनं।
‘‘Idha dhammaṃ caritvāna, maggaṃ sugatigāminaṃ;
नन्दिनो देवलोकस्मिं, मोदन्ति कामकामिनो’’ति॥
Nandino devalokasmiṃ, modanti kāmakāmino’’ti.
अयम्पि अत्थो वुत्तो भगवता, इति मे सुतन्ति। अट्ठमं।
Ayampi attho vutto bhagavatā, iti me sutanti. Aṭṭhamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ८. बहुकारसुत्तवण्णना • 8. Bahukārasuttavaṇṇanā
