| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
4. බහුකාරසුත්‌තං
4. Bahukārasuttaṃ
24. ‘‘තයොමෙ , භික්‌ඛවෙ, පුග්‌ගලා පුග්‌ගලස්‌ස බහුකාරා. කතමෙ තයො? යං, භික්‌ඛවෙ, පුග්‌ගලං ආගම්‌ම පුග්‌ගලො බුද්‌ධං සරණං ගතො හොති, ධම්‌මං සරණං ගතො හොති, සඞ්‌ඝං සරණං ගතො හොති; අයං, භික්‌ඛවෙ, පුග්‌ගලො ඉමස්‌ස පුග්‌ගලස්‌ස බහුකාරො.
24. ‘‘Tayome , bhikkhave, puggalā puggalassa bahukārā. Katame tayo? Yaṃ, bhikkhave, puggalaṃ āgamma puggalo buddhaṃ saraṇaṃ gato hoti, dhammaṃ saraṇaṃ gato hoti, saṅghaṃ saraṇaṃ gato hoti; ayaṃ, bhikkhave, puggalo imassa puggalassa bahukāro.
‘‘පුන චපරං, භික්‌ඛවෙ, යං පුග්‌ගලං ආගම්‌ම පුග්‌ගලො ‘ඉදං දුක්‌ඛ’න්‌ති යථාභූතං පජානාති, ‘අයං දුක්‌ඛසමුදයො’ති යථාභූතං පජානාති, ‘අයං දුක්‌ඛනිරොධො’ති යථාභූතං පජානාති, ‘අයං දුක්‌ඛනිරොධගාමිනී පටිපදා’ති යථාභූතං පජානාති; අයං, භික්‌ඛවෙ, පුග්‌ගලො ඉමස්‌ස පුග්‌ගලස්‌ස බහුකාරො.
‘‘Puna caparaṃ, bhikkhave, yaṃ puggalaṃ āgamma puggalo ‘idaṃ dukkha’nti yathābhūtaṃ pajānāti, ‘ayaṃ dukkhasamudayo’ti yathābhūtaṃ pajānāti, ‘ayaṃ dukkhanirodho’ti yathābhūtaṃ pajānāti, ‘ayaṃ dukkhanirodhagāminī paṭipadā’ti yathābhūtaṃ pajānāti; ayaṃ, bhikkhave, puggalo imassa puggalassa bahukāro.
‘‘පුන චපරං, භික්‌ඛවෙ, යං පුග්‌ගලං ආගම්‌ම පුග්‌ගලො ආසවානං ඛයා අනාසවං චෙතොවිමුත්‌තිං පඤ්‌ඤාවිමුත්‌තිං දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරති; අයං, භික්‌ඛවෙ, පුග්‌ගලො ඉමස්‌ස පුග්‌ගලස්‌ස බහුකාරො. ඉමෙ ඛො, භික්‌ඛවෙ, තයො පුග්‌ගලා පුග්‌ගලස්‌ස බහුකාරා.
‘‘Puna caparaṃ, bhikkhave, yaṃ puggalaṃ āgamma puggalo āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati; ayaṃ, bhikkhave, puggalo imassa puggalassa bahukāro. Ime kho, bhikkhave, tayo puggalā puggalassa bahukārā.
‘‘ඉමෙහි ච පන, භික්‌ඛවෙ, තීහි පුග්‌ගලෙහි ඉමස්‌ස පුග්‌ගලස්‌ස නත්‌ථඤ්‌ඤො පුග්‌ගලො බහුකාරොති වදාමි. ඉමෙසං පන, භික්‌ඛවෙ, තිණ්‌ණං පුග්‌ගලානං ඉමිනා පුග්‌ගලෙන න සුප්‌පතිකාරං වදාමි, යදිදං අභිවාදනපච්‌චුට්‌ඨානඅඤ්‌ජලිකම්‌මසාමීචිකම්‌මචීවරපිණ්‌ඩපාතසෙනාසන-ගිලානපච්‌චයභෙසජ්‌ජපරික්‌ඛාරානුප්‌පදානෙනා’’ති. චතුත්‌ථං.
‘‘Imehi ca pana, bhikkhave, tīhi puggalehi imassa puggalassa natthañño puggalo bahukāroti vadāmi. Imesaṃ pana, bhikkhave, tiṇṇaṃ puggalānaṃ iminā puggalena na suppatikāraṃ vadāmi, yadidaṃ abhivādanapaccuṭṭhānaañjalikammasāmīcikammacīvarapiṇḍapātasenāsana-gilānapaccayabhesajjaparikkhārānuppadānenā’’ti. Catutthaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 4. බහුකාරසුත්‌තවණ්‌ණනා • 4. Bahukārasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 4. බහුකාරසුත්‌තවණ්‌ණනා • 4. Bahukārasuttavaṇṇanā
