| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
4. ப³ஹுகாரஸுத்தவண்ணனா
4. Bahukārasuttavaṇṇanā
24. சதுத்தே² அவஸ்ஸயங் க³தோதி வட்டது³க்க²பரிமுத்தியா அவஸ்ஸயோ மய்ஹந்தி ஸரணக³மனக்கமேன உபக³தோ ஹோதி. ஸதந்திகந்தி ஸபரியத்தித⁴ம்மங். அக்³க³ஹிதஸரணபுப்³ப³ஸ்ஸாதி அக்³க³ஹிதபுப்³ப³ஸரணஸ்ஸ. அகதாபி⁴னிவேஸஸ்ஸ வஸேன வுத்தந்தி தஸ்மிங் அத்தபா⁴வே ந கதோ ஸரணக³மனாபி⁴னிவேஸோ யேனாதி அகதாபி⁴னிவேஸோ, தஸ்ஸ வஸேன வுத்தங். காமங் புப்³பே³பி ஸரணதா³யகோ ஆசரியோ வுத்தோ, பப்³ப³ஜ்ஜாதா³யகோபி ஸரணதா³யகோவ. புப்³பே³ பன உபாஸகபா⁴வாபாத³கவஸேன ஸரணதா³யகோ அதி⁴ப்பேதோ. இத³ங் பன க³ஹிதபப்³ப³ஜ்ஜஸ்ஸ ஸரணக³மனங். பப்³ப³ஜா ஹி ஸவிஸேஸங் ஸரணக³மனந்தி பப்³ப³ஜ்ஜாதா³யகோ புன வுத்தோ. ஏதேதி பப்³ப³ஜ்ஜாதா³யகாத³யோ. து³விதே⁴ன பரிச்சி²ன்னாதி லோகியத⁴ம்மஸம்பாபகோ லோகுத்தரத⁴ம்மஸம்பாபகோதி த்³விப்பகாரேன பரிச்சி²ன்னா, கதாபி⁴னிவேஸஅகதாபி⁴னிவேஸவஸேன வா. உபரீதி பட²மமக்³க³தோ உபரி. நேவ ஸக்கோதீதி ஆசரியேன கதஸ்ஸ உபகாரஸ்ஸ மஹானுபா⁴வத்தா தஸ்ஸ பதிகாரங் நாம காதுங் ந ஸக்கோதி.
24. Catutthe avassayaṃ gatoti vaṭṭadukkhaparimuttiyā avassayo mayhanti saraṇagamanakkamena upagato hoti. Satantikanti sapariyattidhammaṃ. Aggahitasaraṇapubbassāti aggahitapubbasaraṇassa. Akatābhinivesassa vasena vuttanti tasmiṃ attabhāve na kato saraṇagamanābhiniveso yenāti akatābhiniveso, tassa vasena vuttaṃ. Kāmaṃ pubbepi saraṇadāyako ācariyo vutto, pabbajjādāyakopi saraṇadāyakova. Pubbe pana upāsakabhāvāpādakavasena saraṇadāyako adhippeto. Idaṃ pana gahitapabbajjassa saraṇagamanaṃ. Pabbajā hi savisesaṃ saraṇagamananti pabbajjādāyako puna vutto. Eteti pabbajjādāyakādayo. Duvidhena paricchinnāti lokiyadhammasampāpako lokuttaradhammasampāpakoti dvippakārena paricchinnā, katābhinivesaakatābhinivesavasena vā. Uparīti paṭhamamaggato upari. Neva sakkotīti ācariyena katassa upakārassa mahānubhāvattā tassa patikāraṃ nāma kātuṃ na sakkoti.
ப³ஹுகாரஸுத்தவண்ணனா நிட்டி²தா.
Bahukārasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. ப³ஹுகாரஸுத்தங் • 4. Bahukārasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4. ப³ஹுகாரஸுத்தவண்ணனா • 4. Bahukārasuttavaṇṇanā
