| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๔. พหุการสุตฺตวณฺณนา
4. Bahukārasuttavaṇṇanā
๒๔. จตุเตฺถ ตโยเม, ภิกฺขเว, ปุคฺคลาติ ตโย อาจริยปุคฺคลาฯ ปุคฺคลสฺส พหุการาติ อเนฺตวาสิกปุคฺคลสฺส พหูปการาฯ พุทฺธนฺติ สพฺพญฺญุพุทฺธํฯ สรณํ คโต โหตีติ อวสฺสยํ คโต โหติฯ ธมฺมนฺติ สตนฺติกํ นวโลกุตฺตรธมฺมํฯ สงฺฆนฺติ อฎฺฐอริยปุคฺคลสมูหํฯ อิทญฺจ ปน สรณคมนํ อคฺคหิตสรณปุพฺพสฺส อกตาภินิเวสสฺส วเสน วุตฺตํฯ อิติ อิมสฺมิํ สุเตฺต สรณทายโก โสตาปตฺติมคฺคสมฺปาปโก อรหตฺตมคฺคสมฺปาปโกติ ตโย อาจริยา พหุการาติ อาคตา, ปพฺพชฺชาทายโก พุทฺธวจนทายโก กมฺมวาจาจริโย สกทาคามิมคฺคสมฺปาปโก อนาคามิมคฺคสมฺปาปโกติ อิเม อาจริยา น อาคตา, กิํ เอเต น พหุการาติ? โน, น พหุการาฯ อยํ ปน เทสนา ทุวิเธน ปริจฺฉินฺนาฯ ตสฺมา สเพฺพเปเต พหุการาฯ เตสุ สรณคมนสฺมิํเยว อกตาภินิเวโส วฎฺฎติ, จตุปาริสุทฺธิสีลกสิณปริกมฺมวิปสฺสนาญาณานิ ปน ปฐมมคฺคสนฺนิสฺสิตานิ โหนฺติ, อุปริ เทฺว มคฺคา จ ผลานิ จ อรหตฺตมคฺคสนฺนิสฺสิตานีติ เวทิตพฺพานิฯ
24. Catutthe tayome, bhikkhave, puggalāti tayo ācariyapuggalā. Puggalassabahukārāti antevāsikapuggalassa bahūpakārā. Buddhanti sabbaññubuddhaṃ. Saraṇaṃ gato hotīti avassayaṃ gato hoti. Dhammanti satantikaṃ navalokuttaradhammaṃ. Saṅghanti aṭṭhaariyapuggalasamūhaṃ. Idañca pana saraṇagamanaṃ aggahitasaraṇapubbassa akatābhinivesassa vasena vuttaṃ. Iti imasmiṃ sutte saraṇadāyako sotāpattimaggasampāpako arahattamaggasampāpakoti tayo ācariyā bahukārāti āgatā, pabbajjādāyako buddhavacanadāyako kammavācācariyo sakadāgāmimaggasampāpako anāgāmimaggasampāpakoti ime ācariyā na āgatā, kiṃ ete na bahukārāti? No, na bahukārā. Ayaṃ pana desanā duvidhena paricchinnā. Tasmā sabbepete bahukārā. Tesu saraṇagamanasmiṃyeva akatābhiniveso vaṭṭati, catupārisuddhisīlakasiṇaparikammavipassanāñāṇāni pana paṭhamamaggasannissitāni honti, upari dve maggā ca phalāni ca arahattamaggasannissitānīti veditabbāni.
อิมินา ปุคฺคเลนาติ อิมินา อเนฺตวาสิกปุคฺคเลนฯ น สุปฺปติการํ วทามีติ ปติการํ กาตุํ น สุกรนฺติ วทามิฯ อภิวาทนาทีสุ อเนกสตวารํ อเนกสหสฺสวารมฺปิ หิ ปญฺจปติฎฺฐิเตน นิปติตฺวา วนฺทโนฺต อาสนา วุฎฺฐาย ปจฺจุคฺคจฺฉโนฺต ทิฎฺฐทิฎฺฐกฺขเณ อญฺชลิํ ปคฺคณฺหโนฺต อนุจฺฉวิกํ สามีจิกมฺมํ กโรโนฺต ทิวเส ทิวเส จีวรสตํ จีวรสหสฺสํ ปิณฺฑปาตสตํ ปิณฺฑปาตสหสฺสํ ททมาโน จกฺกวาฬปริยเนฺตน สพฺพรตนมยํ อาวาสํ กโรโนฺต สปฺปินวนีตาทินานปฺปการํ เภสชฺชํ อนุปฺปทชฺชมาโน เนว สโกฺกติ อาจริเยน กตสฺส ปติการํ นาม กาตุนฺติ เอวมโตฺถ เวทิตโพฺพฯ
Iminā puggalenāti iminā antevāsikapuggalena. Na suppatikāraṃ vadāmīti patikāraṃ kātuṃ na sukaranti vadāmi. Abhivādanādīsu anekasatavāraṃ anekasahassavārampi hi pañcapatiṭṭhitena nipatitvā vandanto āsanā vuṭṭhāya paccuggacchanto diṭṭhadiṭṭhakkhaṇe añjaliṃ paggaṇhanto anucchavikaṃ sāmīcikammaṃ karonto divase divase cīvarasataṃ cīvarasahassaṃ piṇḍapātasataṃ piṇḍapātasahassaṃ dadamāno cakkavāḷapariyantena sabbaratanamayaṃ āvāsaṃ karonto sappinavanītādinānappakāraṃ bhesajjaṃ anuppadajjamāno neva sakkoti ācariyena katassa patikāraṃ nāma kātunti evamattho veditabbo.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๔. พหุการสุตฺตํ • 4. Bahukārasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๔. พหุการสุตฺตวณฺณนา • 4. Bahukārasuttavaṇṇanā
