| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
៤. ពហុការសុត្តវណ្ណនា
4. Bahukārasuttavaṇṇanā
២៤. ចតុត្ថេ អវស្សយំ គតោតិ វដ្ដទុក្ខបរិមុត្តិយា អវស្សយោ មយ្ហន្តិ សរណគមនក្កមេន ឧបគតោ ហោតិ។ សតន្តិកន្តិ សបរិយត្តិធម្មំ។ អគ្គហិតសរណបុព្ពស្សាតិ អគ្គហិតបុព្ពសរណស្ស។ អកតាភិនិវេសស្ស វសេន វុត្តន្តិ តស្មិំ អត្តភាវេ ន កតោ សរណគមនាភិនិវេសោ យេនាតិ អកតាភិនិវេសោ, តស្ស វសេន វុត្តំ។ កាមំ បុព្ពេបិ សរណទាយកោ អាចរិយោ វុត្តោ, បព្ពជ្ជាទាយកោបិ សរណទាយកោវ។ បុព្ពេ បន ឧបាសកភាវាបាទកវសេន សរណទាយកោ អធិប្បេតោ។ ឥទំ បន គហិតបព្ពជ្ជស្ស សរណគមនំ។ បព្ពជា ហិ សវិសេសំ សរណគមនន្តិ បព្ពជ្ជាទាយកោ បុន វុត្តោ។ ឯតេតិ បព្ពជ្ជាទាយកាទយោ។ ទុវិធេន បរិច្ឆិន្នាតិ លោកិយធម្មសម្បាបកោ លោកុត្តរធម្មសម្បាបកោតិ ទ្វិប្បការេន បរិច្ឆិន្នា, កតាភិនិវេសអកតាភិនិវេសវសេន វា។ ឧបរីតិ បឋមមគ្គតោ ឧបរិ។ នេវ សក្កោតីតិ អាចរិយេន កតស្ស ឧបការស្ស មហានុភាវត្តា តស្ស បតិការំ នាម កាតុំ ន សក្កោតិ។
24. Catutthe avassayaṃ gatoti vaṭṭadukkhaparimuttiyā avassayo mayhanti saraṇagamanakkamena upagato hoti. Satantikanti sapariyattidhammaṃ. Aggahitasaraṇapubbassāti aggahitapubbasaraṇassa. Akatābhinivesassa vasena vuttanti tasmiṃ attabhāve na kato saraṇagamanābhiniveso yenāti akatābhiniveso, tassa vasena vuttaṃ. Kāmaṃ pubbepi saraṇadāyako ācariyo vutto, pabbajjādāyakopi saraṇadāyakova. Pubbe pana upāsakabhāvāpādakavasena saraṇadāyako adhippeto. Idaṃ pana gahitapabbajjassa saraṇagamanaṃ. Pabbajā hi savisesaṃ saraṇagamananti pabbajjādāyako puna vutto. Eteti pabbajjādāyakādayo. Duvidhena paricchinnāti lokiyadhammasampāpako lokuttaradhammasampāpakoti dvippakārena paricchinnā, katābhinivesaakatābhinivesavasena vā. Uparīti paṭhamamaggato upari. Neva sakkotīti ācariyena katassa upakārassa mahānubhāvattā tassa patikāraṃ nāma kātuṃ na sakkoti.
ពហុការសុត្តវណ្ណនា និដ្ឋិតា។
Bahukārasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៤. ពហុការសុត្តំ • 4. Bahukārasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៤. ពហុការសុត្តវណ្ណនា • 4. Bahukārasuttavaṇṇanā
