| Library / Tipiṭaka / ཏིཔིཊཀ • Tipiṭaka / ཨིཏིཝུཏྟཀ-ཨཊྛཀཐཱ • Itivuttaka-aṭṭhakathā |
༨. བཧུཀཱརསུཏྟཝཎྞནཱ
8. Bahukārasuttavaṇṇanā
༡༠༧. ཨཊྛམེ བྲཱཧྨཎགཧཔཏིཀཱཏི བྲཱཧྨཎཱ ཙེཝ གཧཔཏིཀཱ ཙ། ཋཔེཏྭཱ བྲཱཧྨཎེ ཡེ ཀེཙི ཨགཱརཾ ཨཛ྄ཛྷཱཝསནྟཱ ཨིདྷ གཧཔཏིཀཱཏི ཝེདིཏབྦཱ ། ཡེཏི ཨནིཡམཏོ ནིདྡིཊྛཔརཱམསནཾ། ཝོཏི ཨུཔཡོགབཧུཝཙནཾ། ཨཡཉྷེཏྠ སངྑེཔཏྠོ – བྷིཀྑཝེ, ཏུམྷཱཀཾ བཧཱུཔཀཱརཱ བྲཱཧྨཎགཧཔཏིཀཱ, ཡེ བྲཱཧྨཎཱ ཙེཝ སེསཨགཱརིཀཱ ཙ ‘‘ཏུམྷེ ཨེཝ ཨམྷཱཀཾ པུཉྙཀྑེཏྟཾ, ཡཏྠ མཡཾ ཨུདྡྷགྒིཀཾ དཀྑིཎཾ པཏིཊྛཱཔེམ སོཝགྒིཀཾ སུཁཝིཔཱཀཾ སགྒསཾཝཏྟནིཀ’’ནྟི ཙཱིཝརཱདཱིཧི པཙྩཡེཧི པཏིཨུཔཊྛིཏཱཏི།
107. Aṭṭhame brāhmaṇagahapatikāti brāhmaṇā ceva gahapatikā ca. Ṭhapetvā brāhmaṇe ye keci agāraṃ ajjhāvasantā idha gahapatikāti veditabbā . Yeti aniyamato niddiṭṭhaparāmasanaṃ. Voti upayogabahuvacanaṃ. Ayañhettha saṅkhepattho – bhikkhave, tumhākaṃ bahūpakārā brāhmaṇagahapatikā, ye brāhmaṇā ceva sesaagārikā ca ‘‘tumhe eva amhākaṃ puññakkhettaṃ, yattha mayaṃ uddhaggikaṃ dakkhiṇaṃ patiṭṭhāpema sovaggikaṃ sukhavipākaṃ saggasaṃvattanika’’nti cīvarādīhi paccayehi patiupaṭṭhitāti.
ཨེཝཾ ‘‘ཨཱམིསདཱནེན ཨཱམིསསཾཝིབྷཱགེན ཨཱམིསཱནུགྒཧེན གཧཊྛཱ བྷིཀྑཱུནཾ ཨུཔཀཱརཝནྟོ’’ཏི དསྶེཏྭཱ ཨིདཱནི དྷམྨདཱནེན དྷམྨསཾཝིབྷཱགེན དྷམྨཱནུགྒཧེན བྷིཀྑཱུནམྤི ཏེསཾ ཨུཔཀཱརཝནྟཏཾ དསྶེཏུཾ ‘‘ཏུམྷེཔི, བྷིཀྑཝེ,’’ཏིཨཱདི ཝུཏྟཾ, ཏཾ ཝུཏྟནཡམེཝ།
Evaṃ ‘‘āmisadānena āmisasaṃvibhāgena āmisānuggahena gahaṭṭhā bhikkhūnaṃ upakāravanto’’ti dassetvā idāni dhammadānena dhammasaṃvibhāgena dhammānuggahena bhikkhūnampi tesaṃ upakāravantataṃ dassetuṃ ‘‘tumhepi, bhikkhave,’’tiādi vuttaṃ, taṃ vuttanayameva.
ཨིམིནཱ ཀིཾ ཀཐིཏཾ? པིཎྜཱཔཙཱཡནཾ ནཱམ ཀཐིཏཾ། ཨཡཉྷེཏྠ ཨདྷིཔྤཱཡོ – བྷིཀྑཝེ, ཡསྨཱ ཨིམེ བྲཱཧྨཎགཧཔཏིཀཱ ནེཝ ཏུམྷཱཀཾ ཉཱཏཀཱ, ན མིཏྟཱ, ན ཨིཎཾ ཝཱ དྷཱརེནྟི, ཨཐ ཁོ ‘‘ཨིམེ སམཎཱ སམྨགྒཏཱ སམྨཱ པཊིཔནྣཱ, ཨེཏྠ ནོ ཀཱརཱ མཧཔྥལཱ བྷཝིསྶནྟི མཧཱནིསཾསཱ’’ཏི ཕལཝིསེསཾ ཨཱཀངྑནྟཱ ཏུམྷེ ཙཱིཝརཱདཱིཧི ཨུཔཊྛཧནྟི། ཏསྨཱ ཏཾ ཏེསཾ ཨདྷིཔྤཱཡཾ པརིཔཱུརེནྟཱ ཨཔྤམཱདེན སམྤཱདེཐ, དྷམྨདེསནཱཔི ཝོ ཀཱརཀཱནཾཡེཝ སོབྷཏི, ཨཱདེཡྻཱ ཙ ཧོཏི, ན ཨིཏརེསནྟི ཨེཝཾ སམྨཱཔཊིཔཏྟིཡཾ ཨཔྤམཱདོ ཀརཎཱིཡོཏི།
Iminā kiṃ kathitaṃ? Piṇḍāpacāyanaṃ nāma kathitaṃ. Ayañhettha adhippāyo – bhikkhave, yasmā ime brāhmaṇagahapatikā neva tumhākaṃ ñātakā, na mittā, na iṇaṃ vā dhārenti, atha kho ‘‘ime samaṇā sammaggatā sammā paṭipannā, ettha no kārā mahapphalā bhavissanti mahānisaṃsā’’ti phalavisesaṃ ākaṅkhantā tumhe cīvarādīhi upaṭṭhahanti. Tasmā taṃ tesaṃ adhippāyaṃ paripūrentā appamādena sampādetha, dhammadesanāpi vo kārakānaṃyeva sobhati, ādeyyā ca hoti, na itaresanti evaṃ sammāpaṭipattiyaṃ appamādo karaṇīyoti.
ཨེཝམིདཾ, བྷིཀྑཝེཏིཨཱདཱིསུ ཨཡཾ སངྑེཔཏྠོ – བྷིཀྑཝེ, ཨེཝཾ ཨིམིནཱ ཝུཏྟཔྤཀཱརེན གཧཊྛཔབྦཛིཏེཧི ཨཱམིསདཱནདྷམྨདཱནཝསེན ཨཉྙམཉྙཾ སནྣིསྶཱཡ ཀཱམཱདིཝསེན ཙཏུབྦིདྷསྶཔི ཨོགྷསྶ ནིཏྠརཎཏྠཱཡ སཀལསྶཔི ཝཊྚདུཀྑསྶ སམྨདེཝ པརིཡོསཱནཀརཎཱཡ ཨུཔོསཐསཱིལནིཡམཱདིཝསེན ཙཏུཔཱརིསུདྡྷིསཱིལཱདིཝསེན ཝཱ ཨིདཾ སཱསནབྲཧྨཙརིཡཾ མགྒབྲཧྨཙརིཡཉྩ ཝུསྶཏི ཙརཱིཡཏཱིཏི།
Evamidaṃ, bhikkhavetiādīsu ayaṃ saṅkhepattho – bhikkhave, evaṃ iminā vuttappakārena gahaṭṭhapabbajitehi āmisadānadhammadānavasena aññamaññaṃ sannissāya kāmādivasena catubbidhassapi oghassa nittharaṇatthāya sakalassapi vaṭṭadukkhassa sammadeva pariyosānakaraṇāya uposathasīlaniyamādivasena catupārisuddhisīlādivasena vā idaṃ sāsanabrahmacariyaṃ maggabrahmacariyañca vussati carīyatīti.
གཱཐཱསུ སཱགཱརཱཏི གཧཊྛཱ། ཨནགཱརཱཏི པརིཙྩཏྟཨགཱརཱ པབྦཛིཏཱ། ཨུབྷོ ཨཉྙོཉྙནིསྶིཏཱཏི ཏེ ཨུབྷོཔི ཨཉྙམཉྙསནྣིསྶིཏཱ། སཱགཱརཱ ཧི ཨནགཱརཱནཾ དྷམྨདཱནསནྣིསྶིཏཱ, ཨནགཱརཱ ཙ སཱགཱརཱནཾ པཙྩཡདཱནསནྣིསྶིཏཱ། ཨཱརཱདྷཡནྟཱིཏི སཱདྷེནྟི སམྤཱདེནྟི། སདྡྷམྨནྟི པཊིཔཏྟིསདྡྷམྨཾ པཊིཝེདྷསདྡྷམྨཉྩ། ཏཏྠ ཡཾ ཨུཏྟམཾ, ཏཾ དསྶེནྟོ ཨཱཧ ‘‘ཡོགཀྑེམཾ ཨནུཏྟར’’ནྟི ཨརཧཏྟཾ ནིབྦཱནཉྩ། སཱགཱརེསཱུཏི སཱགཱརེཧི, ནིསྶཀྐེ ཨིདཾ བྷུམྨཝཙནཾ, སཱགཱརཱནཾ ཝཱ སནྟིཀེ། པཙྩཡནྟི ཝུཏྟཱཝསེསཾ དུཝིདྷཾ པཙྩཡཾ པིཎྜཔཱཏཾ བྷེསཛྫཉྩ། པརིསྶཡཝིནོདནནྟི ཨུཏུཔརིསྶཡཱདིཔརིསྶཡཧརཎཾ ཝིཧཱརཱདིཨཱཝསཐཾ། སུགཏནྟི སམྨཱ པཊིཔནྣཾ ཀལྱཱཎཔུཐུཛྫནེན སདྡྷིཾ ཨཊྛཝིདྷཾ ཨརིཡཔུགྒལཾ། སཱཝཀོ ཧི ཨིདྷ སུགཏོཏི ཨདྷིཔྤེཏོ། གྷརམེསིནོཏི གྷརཾ ཨེསིནོ, གེཧེ ཋཏྭཱ གྷརཱཝཱསཾ ཝསནྟཱ བྷོགཱུཔཀརཎཱནི ཙེཝ གཧཊྛསཱིལཱདཱིནི ཙ ཨེསནསཱིལཱཏི ཨཏྠོ། སདྡཧཱནོ ཨརཧཏནྟི ཨརཧནྟཱནཾ ཨརིཡཱནཾ ཝཙནཾ, ཏེསཾ ཝཱ སམྨཱཔཊིཔཏྟིཾ སདྡཧནྟཱ། ‘‘ཨདྡྷཱ ཨིམེ སམྨཱ པཊིཔནྣཱ, ཡཐཱ ཨིམེ ཀཐེནྟི, ཏཐཱ པཊིཔཛྫནྟཱནཾ སཱ པཊིཔཏྟི སགྒམོཀྑསམྤཏྟིཡཱ སཾཝཏྟཏཱི’’ཏི ཨབྷིསདྡཧནྟཱཏི ཨཏྠོ། ‘‘སདྡཧནྟཱ’’ཏིཔི པཱཋོ། ཨརིཡཔཉྙཱཡཱཏི སུཝིསུདྡྷཔཉྙཱཡ། ཛྷཱཡིནོཏི ཨཱརམྨཎལཀྑཎཱུཔནིཛ྄ཛྷཱནཝསེན དུཝིདྷེནཔི ཛྷཱནེན ཛྷཱཡིནོ།
Gāthāsu sāgārāti gahaṭṭhā. Anagārāti pariccattaagārā pabbajitā. Ubho aññoññanissitāti te ubhopi aññamaññasannissitā. Sāgārā hi anagārānaṃ dhammadānasannissitā, anagārā ca sāgārānaṃ paccayadānasannissitā. Ārādhayantīti sādhenti sampādenti. Saddhammanti paṭipattisaddhammaṃ paṭivedhasaddhammañca. Tattha yaṃ uttamaṃ, taṃ dassento āha ‘‘yogakkhemaṃanuttara’’nti arahattaṃ nibbānañca. Sāgāresūti sāgārehi, nissakke idaṃ bhummavacanaṃ, sāgārānaṃ vā santike. Paccayanti vuttāvasesaṃ duvidhaṃ paccayaṃ piṇḍapātaṃ bhesajjañca. Parissayavinodananti utuparissayādiparissayaharaṇaṃ vihārādiāvasathaṃ. Sugatanti sammā paṭipannaṃ kalyāṇaputhujjanena saddhiṃ aṭṭhavidhaṃ ariyapuggalaṃ. Sāvako hi idha sugatoti adhippeto. Gharamesinoti gharaṃ esino, gehe ṭhatvā gharāvāsaṃ vasantā bhogūpakaraṇāni ceva gahaṭṭhasīlādīni ca esanasīlāti attho. Saddahāno arahatanti arahantānaṃ ariyānaṃ vacanaṃ, tesaṃ vā sammāpaṭipattiṃ saddahantā. ‘‘Addhā ime sammā paṭipannā, yathā ime kathenti, tathā paṭipajjantānaṃ sā paṭipatti saggamokkhasampattiyā saṃvattatī’’ti abhisaddahantāti attho. ‘‘Saddahantā’’tipi pāṭho. Ariyapaññāyāti suvisuddhapaññāya. Jhāyinoti ārammaṇalakkhaṇūpanijjhānavasena duvidhenapi jhānena jhāyino.
ཨིདྷ དྷམྨཾ ཙརིཏྭཱནཱཏི ཨིམསྨིཾ ཨཏྟབྷཱཝེ, ཨིམསྨིཾ ཝཱ སཱསནེ ལོཀིཡལོཀུཏྟརསུཁསྶ མགྒབྷཱུཏཾ སཱིལཱདིདྷམྨཾ པཊིཔཛྫིཏྭཱ ཡཱཝ པརིནིབྦཱནཾ ན པཱཔུཎནྟི, ཏཱཝདེཝ སུགཏིགཱམིནོ། ནནྡིནོཏི པཱིཏིསོམནསྶཡོགེན ནནྡནསཱིལཱ། ཀེཙི པན ‘‘དྷམྨཾ ཙརིཏྭཱན མགྒནྟི སོཏཱཔཏྟིམགྒཾ པཱཔུཎིཏྭཱ’’ཏི ཝདནྟི། དེཝལོཀསྨིནྟི ཚབྦིདྷེཔི ཀཱམཱཝཙརདེཝལོཀེ། མོདནྟི ཀཱམཀཱམིནོཏི ཡཐིཙྪིཏཝཏྠུནིཔྥཏྟིཏོ ཀཱམཀཱམིནོ ཀཱམཝནྟོ ཧུཏྭཱ པམོདནྟཱིཏི།
Idha dhammaṃ caritvānāti imasmiṃ attabhāve, imasmiṃ vā sāsane lokiyalokuttarasukhassa maggabhūtaṃ sīlādidhammaṃ paṭipajjitvā yāva parinibbānaṃ na pāpuṇanti, tāvadeva sugatigāmino. Nandinoti pītisomanassayogena nandanasīlā. Keci pana ‘‘dhammaṃ caritvāna magganti sotāpattimaggaṃ pāpuṇitvā’’ti vadanti. Devalokasminti chabbidhepi kāmāvacaradevaloke. Modanti kāmakāminoti yathicchitavatthunipphattito kāmakāmino kāmavanto hutvā pamodantīti.
ཨཊྛམསུཏྟཝཎྞནཱ ནིཊྛིཏཱ།
Aṭṭhamasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ཨིཏིཝུཏྟཀཔཱལི༹ • Itivuttakapāḷi / ༨. བཧུཀཱརསུཏྟཾ • 8. Bahukārasuttaṃ
