| Library / Tipiṭaka / ਤਿਪਿਟਕ • Tipiṭaka / ਇਤਿવੁਤ੍ਤਕ-ਅਟ੍ਠਕਥਾ • Itivuttaka-aṭṭhakathā |
੮. ਬਹੁਕਾਰਸੁਤ੍ਤવਣ੍ਣਨਾ
8. Bahukārasuttavaṇṇanā
੧੦੭. ਅਟ੍ਠਮੇ ਬ੍ਰਾਹ੍ਮਣਗਹਪਤਿਕਾਤਿ ਬ੍ਰਾਹ੍ਮਣਾ ਚੇવ ਗਹਪਤਿਕਾ ਚ। ਠਪੇਤ੍વਾ ਬ੍ਰਾਹ੍ਮਣੇ ਯੇ ਕੇਚਿ ਅਗਾਰਂ ਅਜ੍ਝਾવਸਨ੍ਤਾ ਇਧ ਗਹਪਤਿਕਾਤਿ વੇਦਿਤਬ੍ਬਾ । ਯੇਤਿ ਅਨਿਯਮਤੋ ਨਿਦ੍ਦਿਟ੍ਠਪਰਾਮਸਨਂ। વੋਤਿ ਉਪਯੋਗਬਹੁવਚਨਂ। ਅਯਞ੍ਹੇਤ੍ਥ ਸਙ੍ਖੇਪਤ੍ਥੋ – ਭਿਕ੍ਖવੇ, ਤੁਮ੍ਹਾਕਂ ਬਹੂਪਕਾਰਾ ਬ੍ਰਾਹ੍ਮਣਗਹਪਤਿਕਾ, ਯੇ ਬ੍ਰਾਹ੍ਮਣਾ ਚੇવ ਸੇਸਅਗਾਰਿਕਾ ਚ ‘‘ਤੁਮ੍ਹੇ ਏવ ਅਮ੍ਹਾਕਂ ਪੁਞ੍ਞਕ੍ਖੇਤ੍ਤਂ, ਯਤ੍ਥ ਮਯਂ ਉਦ੍ਧਗ੍ਗਿਕਂ ਦਕ੍ਖਿਣਂ ਪਤਿਟ੍ਠਾਪੇਮ ਸੋવਗ੍ਗਿਕਂ ਸੁਖવਿਪਾਕਂ ਸਗ੍ਗਸਂવਤ੍ਤਨਿਕ’’ਨ੍ਤਿ ਚੀવਰਾਦੀਹਿ ਪਚ੍ਚਯੇਹਿ ਪਤਿਉਪਟ੍ਠਿਤਾਤਿ।
107. Aṭṭhame brāhmaṇagahapatikāti brāhmaṇā ceva gahapatikā ca. Ṭhapetvā brāhmaṇe ye keci agāraṃ ajjhāvasantā idha gahapatikāti veditabbā . Yeti aniyamato niddiṭṭhaparāmasanaṃ. Voti upayogabahuvacanaṃ. Ayañhettha saṅkhepattho – bhikkhave, tumhākaṃ bahūpakārā brāhmaṇagahapatikā, ye brāhmaṇā ceva sesaagārikā ca ‘‘tumhe eva amhākaṃ puññakkhettaṃ, yattha mayaṃ uddhaggikaṃ dakkhiṇaṃ patiṭṭhāpema sovaggikaṃ sukhavipākaṃ saggasaṃvattanika’’nti cīvarādīhi paccayehi patiupaṭṭhitāti.
ਏવਂ ‘‘ਆਮਿਸਦਾਨੇਨ ਆਮਿਸਸਂવਿਭਾਗੇਨ ਆਮਿਸਾਨੁਗ੍ਗਹੇਨ ਗਹਟ੍ਠਾ ਭਿਕ੍ਖੂਨਂ ਉਪਕਾਰવਨ੍ਤੋ’’ਤਿ ਦਸ੍ਸੇਤ੍વਾ ਇਦਾਨਿ ਧਮ੍ਮਦਾਨੇਨ ਧਮ੍ਮਸਂવਿਭਾਗੇਨ ਧਮ੍ਮਾਨੁਗ੍ਗਹੇਨ ਭਿਕ੍ਖੂਨਮ੍ਪਿ ਤੇਸਂ ਉਪਕਾਰવਨ੍ਤਤਂ ਦਸ੍ਸੇਤੁਂ ‘‘ਤੁਮ੍ਹੇਪਿ, ਭਿਕ੍ਖવੇ,’’ਤਿਆਦਿ વੁਤ੍ਤਂ, ਤਂ વੁਤ੍ਤਨਯਮੇવ।
Evaṃ ‘‘āmisadānena āmisasaṃvibhāgena āmisānuggahena gahaṭṭhā bhikkhūnaṃ upakāravanto’’ti dassetvā idāni dhammadānena dhammasaṃvibhāgena dhammānuggahena bhikkhūnampi tesaṃ upakāravantataṃ dassetuṃ ‘‘tumhepi, bhikkhave,’’tiādi vuttaṃ, taṃ vuttanayameva.
ਇਮਿਨਾ ਕਿਂ ਕਥਿਤਂ? ਪਿਣ੍ਡਾਪਚਾਯਨਂ ਨਾਮ ਕਥਿਤਂ। ਅਯਞ੍ਹੇਤ੍ਥ ਅਧਿਪ੍ਪਾਯੋ – ਭਿਕ੍ਖવੇ, ਯਸ੍ਮਾ ਇਮੇ ਬ੍ਰਾਹ੍ਮਣਗਹਪਤਿਕਾ ਨੇવ ਤੁਮ੍ਹਾਕਂ ਞਾਤਕਾ, ਨ ਮਿਤ੍ਤਾ, ਨ ਇਣਂ વਾ ਧਾਰੇਨ੍ਤਿ, ਅਥ ਖੋ ‘‘ਇਮੇ ਸਮਣਾ ਸਮ੍ਮਗ੍ਗਤਾ ਸਮ੍ਮਾ ਪਟਿਪਨ੍ਨਾ, ਏਤ੍ਥ ਨੋ ਕਾਰਾ ਮਹਪ੍ਫਲਾ ਭવਿਸ੍ਸਨ੍ਤਿ ਮਹਾਨਿਸਂਸਾ’’ਤਿ ਫਲવਿਸੇਸਂ ਆਕਙ੍ਖਨ੍ਤਾ ਤੁਮ੍ਹੇ ਚੀવਰਾਦੀਹਿ ਉਪਟ੍ਠਹਨ੍ਤਿ। ਤਸ੍ਮਾ ਤਂ ਤੇਸਂ ਅਧਿਪ੍ਪਾਯਂ ਪਰਿਪੂਰੇਨ੍ਤਾ ਅਪ੍ਪਮਾਦੇਨ ਸਮ੍ਪਾਦੇਥ, ਧਮ੍ਮਦੇਸਨਾਪਿ વੋ ਕਾਰਕਾਨਂਯੇવ ਸੋਭਤਿ, ਆਦੇਯ੍ਯਾ ਚ ਹੋਤਿ, ਨ ਇਤਰੇਸਨ੍ਤਿ ਏવਂ ਸਮ੍ਮਾਪਟਿਪਤ੍ਤਿਯਂ ਅਪ੍ਪਮਾਦੋ ਕਰਣੀਯੋਤਿ।
Iminā kiṃ kathitaṃ? Piṇḍāpacāyanaṃ nāma kathitaṃ. Ayañhettha adhippāyo – bhikkhave, yasmā ime brāhmaṇagahapatikā neva tumhākaṃ ñātakā, na mittā, na iṇaṃ vā dhārenti, atha kho ‘‘ime samaṇā sammaggatā sammā paṭipannā, ettha no kārā mahapphalā bhavissanti mahānisaṃsā’’ti phalavisesaṃ ākaṅkhantā tumhe cīvarādīhi upaṭṭhahanti. Tasmā taṃ tesaṃ adhippāyaṃ paripūrentā appamādena sampādetha, dhammadesanāpi vo kārakānaṃyeva sobhati, ādeyyā ca hoti, na itaresanti evaṃ sammāpaṭipattiyaṃ appamādo karaṇīyoti.
ਏવਮਿਦਂ, ਭਿਕ੍ਖવੇਤਿਆਦੀਸੁ ਅਯਂ ਸਙ੍ਖੇਪਤ੍ਥੋ – ਭਿਕ੍ਖવੇ, ਏવਂ ਇਮਿਨਾ વੁਤ੍ਤਪ੍ਪਕਾਰੇਨ ਗਹਟ੍ਠਪਬ੍ਬਜਿਤੇਹਿ ਆਮਿਸਦਾਨਧਮ੍ਮਦਾਨવਸੇਨ ਅਞ੍ਞਮਞ੍ਞਂ ਸਨ੍ਨਿਸ੍ਸਾਯ ਕਾਮਾਦਿવਸੇਨ ਚਤੁਬ੍ਬਿਧਸ੍ਸਪਿ ਓਘਸ੍ਸ ਨਿਤ੍ਥਰਣਤ੍ਥਾਯ ਸਕਲਸ੍ਸਪਿ વਟ੍ਟਦੁਕ੍ਖਸ੍ਸ ਸਮ੍ਮਦੇવ ਪਰਿਯੋਸਾਨਕਰਣਾਯ ਉਪੋਸਥਸੀਲਨਿਯਮਾਦਿવਸੇਨ ਚਤੁਪਾਰਿਸੁਦ੍ਧਿਸੀਲਾਦਿવਸੇਨ વਾ ਇਦਂ ਸਾਸਨਬ੍ਰਹ੍ਮਚਰਿਯਂ ਮਗ੍ਗਬ੍ਰਹ੍ਮਚਰਿਯਞ੍ਚ વੁਸ੍ਸਤਿ ਚਰੀਯਤੀਤਿ।
Evamidaṃ, bhikkhavetiādīsu ayaṃ saṅkhepattho – bhikkhave, evaṃ iminā vuttappakārena gahaṭṭhapabbajitehi āmisadānadhammadānavasena aññamaññaṃ sannissāya kāmādivasena catubbidhassapi oghassa nittharaṇatthāya sakalassapi vaṭṭadukkhassa sammadeva pariyosānakaraṇāya uposathasīlaniyamādivasena catupārisuddhisīlādivasena vā idaṃ sāsanabrahmacariyaṃ maggabrahmacariyañca vussati carīyatīti.
ਗਾਥਾਸੁ ਸਾਗਾਰਾਤਿ ਗਹਟ੍ਠਾ। ਅਨਗਾਰਾਤਿ ਪਰਿਚ੍ਚਤ੍ਤਅਗਾਰਾ ਪਬ੍ਬਜਿਤਾ। ਉਭੋ ਅਞ੍ਞੋਞ੍ਞਨਿਸ੍ਸਿਤਾਤਿ ਤੇ ਉਭੋਪਿ ਅਞ੍ਞਮਞ੍ਞਸਨ੍ਨਿਸ੍ਸਿਤਾ। ਸਾਗਾਰਾ ਹਿ ਅਨਗਾਰਾਨਂ ਧਮ੍ਮਦਾਨਸਨ੍ਨਿਸ੍ਸਿਤਾ, ਅਨਗਾਰਾ ਚ ਸਾਗਾਰਾਨਂ ਪਚ੍ਚਯਦਾਨਸਨ੍ਨਿਸ੍ਸਿਤਾ। ਆਰਾਧਯਨ੍ਤੀਤਿ ਸਾਧੇਨ੍ਤਿ ਸਮ੍ਪਾਦੇਨ੍ਤਿ। ਸਦ੍ਧਮ੍ਮਨ੍ਤਿ ਪਟਿਪਤ੍ਤਿਸਦ੍ਧਮ੍ਮਂ ਪਟਿવੇਧਸਦ੍ਧਮ੍ਮਞ੍ਚ। ਤਤ੍ਥ ਯਂ ਉਤ੍ਤਮਂ, ਤਂ ਦਸ੍ਸੇਨ੍ਤੋ ਆਹ ‘‘ਯੋਗਕ੍ਖੇਮਂ ਅਨੁਤ੍ਤਰ’’ਨ੍ਤਿ ਅਰਹਤ੍ਤਂ ਨਿਬ੍ਬਾਨਞ੍ਚ। ਸਾਗਾਰੇਸੂਤਿ ਸਾਗਾਰੇਹਿ, ਨਿਸ੍ਸਕ੍ਕੇ ਇਦਂ ਭੁਮ੍ਮવਚਨਂ, ਸਾਗਾਰਾਨਂ વਾ ਸਨ੍ਤਿਕੇ। ਪਚ੍ਚਯਨ੍ਤਿ વੁਤ੍ਤਾવਸੇਸਂ ਦੁવਿਧਂ ਪਚ੍ਚਯਂ ਪਿਣ੍ਡਪਾਤਂ ਭੇਸਜ੍ਜਞ੍ਚ। ਪਰਿਸ੍ਸਯવਿਨੋਦਨਨ੍ਤਿ ਉਤੁਪਰਿਸ੍ਸਯਾਦਿਪਰਿਸ੍ਸਯਹਰਣਂ વਿਹਾਰਾਦਿਆવਸਥਂ। ਸੁਗਤਨ੍ਤਿ ਸਮ੍ਮਾ ਪਟਿਪਨ੍ਨਂ ਕਲ੍ਯਾਣਪੁਥੁਜ੍ਜਨੇਨ ਸਦ੍ਧਿਂ ਅਟ੍ਠવਿਧਂ ਅਰਿਯਪੁਗ੍ਗਲਂ। ਸਾવਕੋ ਹਿ ਇਧ ਸੁਗਤੋਤਿ ਅਧਿਪ੍ਪੇਤੋ। ਘਰਮੇਸਿਨੋਤਿ ਘਰਂ ਏਸਿਨੋ, ਗੇਹੇ ਠਤ੍વਾ ਘਰਾવਾਸਂ વਸਨ੍ਤਾ ਭੋਗੂਪਕਰਣਾਨਿ ਚੇવ ਗਹਟ੍ਠਸੀਲਾਦੀਨਿ ਚ ਏਸਨਸੀਲਾਤਿ ਅਤ੍ਥੋ। ਸਦ੍ਦਹਾਨੋ ਅਰਹਤਨ੍ਤਿ ਅਰਹਨ੍ਤਾਨਂ ਅਰਿਯਾਨਂ વਚਨਂ, ਤੇਸਂ વਾ ਸਮ੍ਮਾਪਟਿਪਤ੍ਤਿਂ ਸਦ੍ਦਹਨ੍ਤਾ। ‘‘ਅਦ੍ਧਾ ਇਮੇ ਸਮ੍ਮਾ ਪਟਿਪਨ੍ਨਾ, ਯਥਾ ਇਮੇ ਕਥੇਨ੍ਤਿ, ਤਥਾ ਪਟਿਪਜ੍ਜਨ੍ਤਾਨਂ ਸਾ ਪਟਿਪਤ੍ਤਿ ਸਗ੍ਗਮੋਕ੍ਖਸਮ੍ਪਤ੍ਤਿਯਾ ਸਂવਤ੍ਤਤੀ’’ਤਿ ਅਭਿਸਦ੍ਦਹਨ੍ਤਾਤਿ ਅਤ੍ਥੋ। ‘‘ਸਦ੍ਦਹਨ੍ਤਾ’’ਤਿਪਿ ਪਾਠੋ। ਅਰਿਯਪਞ੍ਞਾਯਾਤਿ ਸੁવਿਸੁਦ੍ਧਪਞ੍ਞਾਯ। ਝਾਯਿਨੋਤਿ ਆਰਮ੍ਮਣਲਕ੍ਖਣੂਪਨਿਜ੍ਝਾਨવਸੇਨ ਦੁવਿਧੇਨਪਿ ਝਾਨੇਨ ਝਾਯਿਨੋ।
Gāthāsu sāgārāti gahaṭṭhā. Anagārāti pariccattaagārā pabbajitā. Ubho aññoññanissitāti te ubhopi aññamaññasannissitā. Sāgārā hi anagārānaṃ dhammadānasannissitā, anagārā ca sāgārānaṃ paccayadānasannissitā. Ārādhayantīti sādhenti sampādenti. Saddhammanti paṭipattisaddhammaṃ paṭivedhasaddhammañca. Tattha yaṃ uttamaṃ, taṃ dassento āha ‘‘yogakkhemaṃanuttara’’nti arahattaṃ nibbānañca. Sāgāresūti sāgārehi, nissakke idaṃ bhummavacanaṃ, sāgārānaṃ vā santike. Paccayanti vuttāvasesaṃ duvidhaṃ paccayaṃ piṇḍapātaṃ bhesajjañca. Parissayavinodananti utuparissayādiparissayaharaṇaṃ vihārādiāvasathaṃ. Sugatanti sammā paṭipannaṃ kalyāṇaputhujjanena saddhiṃ aṭṭhavidhaṃ ariyapuggalaṃ. Sāvako hi idha sugatoti adhippeto. Gharamesinoti gharaṃ esino, gehe ṭhatvā gharāvāsaṃ vasantā bhogūpakaraṇāni ceva gahaṭṭhasīlādīni ca esanasīlāti attho. Saddahāno arahatanti arahantānaṃ ariyānaṃ vacanaṃ, tesaṃ vā sammāpaṭipattiṃ saddahantā. ‘‘Addhā ime sammā paṭipannā, yathā ime kathenti, tathā paṭipajjantānaṃ sā paṭipatti saggamokkhasampattiyā saṃvattatī’’ti abhisaddahantāti attho. ‘‘Saddahantā’’tipi pāṭho. Ariyapaññāyāti suvisuddhapaññāya. Jhāyinoti ārammaṇalakkhaṇūpanijjhānavasena duvidhenapi jhānena jhāyino.
ਇਧ ਧਮ੍ਮਂ ਚਰਿਤ੍વਾਨਾਤਿ ਇਮਸ੍ਮਿਂ ਅਤ੍ਤਭਾવੇ, ਇਮਸ੍ਮਿਂ વਾ ਸਾਸਨੇ ਲੋਕਿਯਲੋਕੁਤ੍ਤਰਸੁਖਸ੍ਸ ਮਗ੍ਗਭੂਤਂ ਸੀਲਾਦਿਧਮ੍ਮਂ ਪਟਿਪਜ੍ਜਿਤ੍વਾ ਯਾવ ਪਰਿਨਿਬ੍ਬਾਨਂ ਨ ਪਾਪੁਣਨ੍ਤਿ, ਤਾવਦੇવ ਸੁਗਤਿਗਾਮਿਨੋ। ਨਨ੍ਦਿਨੋਤਿ ਪੀਤਿਸੋਮਨਸ੍ਸਯੋਗੇਨ ਨਨ੍ਦਨਸੀਲਾ। ਕੇਚਿ ਪਨ ‘‘ਧਮ੍ਮਂ ਚਰਿਤ੍વਾਨ ਮਗ੍ਗਨ੍ਤਿ ਸੋਤਾਪਤ੍ਤਿਮਗ੍ਗਂ ਪਾਪੁਣਿਤ੍વਾ’’ਤਿ વਦਨ੍ਤਿ। ਦੇવਲੋਕਸ੍ਮਿਨ੍ਤਿ ਛਬ੍ਬਿਧੇਪਿ ਕਾਮਾવਚਰਦੇવਲੋਕੇ। ਮੋਦਨ੍ਤਿ ਕਾਮਕਾਮਿਨੋਤਿ ਯਥਿਚ੍ਛਿਤવਤ੍ਥੁਨਿਪ੍ਫਤ੍ਤਿਤੋ ਕਾਮਕਾਮਿਨੋ ਕਾਮવਨ੍ਤੋ ਹੁਤ੍વਾ ਪਮੋਦਨ੍ਤੀਤਿ।
Idha dhammaṃ caritvānāti imasmiṃ attabhāve, imasmiṃ vā sāsane lokiyalokuttarasukhassa maggabhūtaṃ sīlādidhammaṃ paṭipajjitvā yāva parinibbānaṃ na pāpuṇanti, tāvadeva sugatigāmino. Nandinoti pītisomanassayogena nandanasīlā. Keci pana ‘‘dhammaṃ caritvāna magganti sotāpattimaggaṃ pāpuṇitvā’’ti vadanti. Devalokasminti chabbidhepi kāmāvacaradevaloke. Modanti kāmakāminoti yathicchitavatthunipphattito kāmakāmino kāmavanto hutvā pamodantīti.
ਅਟ੍ਠਮਸੁਤ੍ਤવਣ੍ਣਨਾ ਨਿਟ੍ਠਿਤਾ।
Aṭṭhamasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਇਤਿવੁਤ੍ਤਕਪਾਲ਼ਿ • Itivuttakapāḷi / ੮. ਬਹੁਕਾਰਸੁਤ੍ਤਂ • 8. Bahukārasuttaṃ
