| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ • Majjhimanikāya |
༩. བཧུཝེདནཱིཡསུཏྟཾ
9. Bahuvedanīyasuttaṃ
༨༨. ཨེཝཾ མེ སུཏཾ – ཨེཀཾ སམཡཾ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཨཐ ཁོ པཉྩཀངྒོ ཐཔཏི ཡེནཱཡསྨཱ ཨུདཱཡཱི ཏེནུཔསངྐམི; ཨུཔསངྐམིཏྭཱ ཨཱཡསྨནྟཾ ཨུདཱཡིཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ པཉྩཀངྒོ ཐཔཏི ཨཱཡསྨནྟཾ ཨུདཱཡིཾ ཨེཏདཝོཙ – ‘‘ཀཏི ནུ ཁོ, བྷནྟེ ཨུདཱཡི, ཝེདནཱ ཝུཏྟཱ བྷགཝཏཱ’’ཏི? ‘‘ཏིསྶོ ཁོ, ཐཔཏི 1, ཝེདནཱ ཝུཏྟཱ བྷགཝཏཱ། སུཁཱ ཝེདནཱ, དུཀྑཱ ཝེདནཱ, ཨདུཀྑམསུཁཱ ཝེདནཱ – ཨིམཱ ཁོ, ཐཔཏི, ཏིསྶོ ཝེདནཱ ཝུཏྟཱ བྷགཝཏཱ’’ཏི། ཨེཝཾ ཝུཏྟེ, པཉྩཀངྒོ ཐཔཏི ཨཱཡསྨནྟཾ ཨུདཱཡིཾ ཨེཏདཝོཙ – ‘‘ན ཁོ, བྷནྟེ ཨུདཱཡི, ཏིསྶོ ཝེདནཱ ཝུཏྟཱ བྷགཝཏཱ; དྭེ ཝེདནཱ ཝུཏྟཱ བྷགཝཏཱ – སུཁཱ ཝེདནཱ, དུཀྑཱ ཝེདནཱ། ཡཱཡཾ, བྷནྟེ, ཨདུཀྑམསུཁཱ ཝེདནཱ སནྟསྨིཾ ཨེསཱ པཎཱིཏེ སུཁེ ཝུཏྟཱ བྷགཝཏཱ’’ཏི། དུཏིཡམྤི ཁོ ཨཱཡསྨཱ ཨུདཱཡཱི པཉྩཀངྒཾ ཐཔཏིཾ ཨེཏདཝོཙ – ‘‘ན ཁོ, གཧཔཏི, དྭེ ཝེདནཱ ཝུཏྟཱ བྷགཝཏཱ; ཏིསྶོ ཝེདནཱ ཝུཏྟཱ བྷགཝཏཱ། སུཁཱ ཝེདནཱ, དུཀྑཱ ཝེདནཱ, ཨདུཀྑམསུཁཱ ཝེདནཱ – ཨིམཱ ཁོ, ཐཔཏི, ཏིསྶོ ཝེདནཱ ཝུཏྟཱ བྷགཝཏཱ’’ཏི། དུཏིཡམྤི ཁོ པཉྩཀངྒོ ཐཔཏི ཨཱཡསྨནྟཾ ཨུདཱཡིཾ ཨེཏདཝོཙ – ‘‘ན ཁོ, བྷནྟེ ཨུདཱཡི, ཏིསྶོ ཝེདནཱ ཝུཏྟཱ བྷགཝཏཱ; དྭེ ཝེདནཱ ཝུཏྟཱ བྷགཝཏཱ – སུཁཱ ཝེདནཱ, དུཀྑཱ ཝེདནཱ། ཡཱཡཾ, བྷནྟེ , ཨདུཀྑམསུཁཱ ཝེདནཱ སནྟསྨིཾ ཨེསཱ པཎཱིཏེ སུཁེ ཝུཏྟཱ བྷགཝཏཱ’’ཏི། ཏཏིཡམྤི ཁོ ཨཱཡསྨཱ ཨུདཱཡཱི པཉྩཀངྒཾ ཐཔཏིཾ ཨེཏདཝོཙ – ‘‘ན ཁོ, ཐཔཏི, དྭེ ཝེདནཱ ཝུཏྟཱ བྷགཝཏཱ; ཏིསྶོ ཝེདནཱ ཝུཏྟཱ བྷགཝཏཱ། སུཁཱ ཝེདནཱ, དུཀྑཱ ཝེདནཱ, ཨདུཀྑམསུཁཱ ཝེདནཱ – ཨིམཱ ཁོ, ཐཔཏི, ཏིསྶོ ཝེདནཱ ཝུཏྟཱ བྷགཝཏཱ’’ཏི། ཏཏིཡམྤི ཁོ པཉྩཀངྒོ ཐཔཏི ཨཱཡསྨནྟཾ ཨུདཱཡིཾ ཨེཏདཝོཙ – ‘‘ན ཁོ, བྷནྟེ ཨུདཱཡི, ཏིསྶོ ཝེདནཱ ཝུཏྟཱ བྷགཝཏཱ, དྭེ ཝེདནཱ ཝུཏྟཱ བྷགཝཏཱ – སུཁཱ ཝེདནཱ, དུཀྑཱ ཝེདནཱ། ཡཱཡཾ, བྷནྟེ, ཨདུཀྑམསུཁཱ ཝེདནཱ སནྟསྨིཾ ཨེསཱ པཎཱིཏེ སུཁེ ཝུཏྟཱ བྷགཝཏཱ’’ཏི། ནེཝ ཁོ སཀྑི ཨཱཡསྨཱ ཨུདཱཡཱི པཉྩཀངྒཾ ཐཔཏིཾ སཉྙཱཔེཏུཾ ན པནཱསཀྑི པཉྩཀངྒོ ཐཔཏི ཨཱཡསྨནྟཾ ཨུདཱཡིཾ སཉྙཱཔེཏུཾ།
88. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho pañcakaṅgo thapati yenāyasmā udāyī tenupasaṅkami; upasaṅkamitvā āyasmantaṃ udāyiṃ abhivādetvā ekamantaṃ nisīdi. Ekamantaṃ nisinno kho pañcakaṅgo thapati āyasmantaṃ udāyiṃ etadavoca – ‘‘kati nu kho, bhante udāyi, vedanā vuttā bhagavatā’’ti? ‘‘Tisso kho, thapati 2, vedanā vuttā bhagavatā. Sukhā vedanā, dukkhā vedanā, adukkhamasukhā vedanā – imā kho, thapati, tisso vedanā vuttā bhagavatā’’ti. Evaṃ vutte, pañcakaṅgo thapati āyasmantaṃ udāyiṃ etadavoca – ‘‘na kho, bhante udāyi, tisso vedanā vuttā bhagavatā; dve vedanā vuttā bhagavatā – sukhā vedanā, dukkhā vedanā. Yāyaṃ, bhante, adukkhamasukhā vedanā santasmiṃ esā paṇīte sukhe vuttā bhagavatā’’ti. Dutiyampi kho āyasmā udāyī pañcakaṅgaṃ thapatiṃ etadavoca – ‘‘na kho, gahapati, dve vedanā vuttā bhagavatā; tisso vedanā vuttā bhagavatā. Sukhā vedanā, dukkhā vedanā, adukkhamasukhā vedanā – imā kho, thapati, tisso vedanā vuttā bhagavatā’’ti. Dutiyampi kho pañcakaṅgo thapati āyasmantaṃ udāyiṃ etadavoca – ‘‘na kho, bhante udāyi, tisso vedanā vuttā bhagavatā; dve vedanā vuttā bhagavatā – sukhā vedanā, dukkhā vedanā. Yāyaṃ, bhante , adukkhamasukhā vedanā santasmiṃ esā paṇīte sukhe vuttā bhagavatā’’ti. Tatiyampi kho āyasmā udāyī pañcakaṅgaṃ thapatiṃ etadavoca – ‘‘na kho, thapati, dve vedanā vuttā bhagavatā; tisso vedanā vuttā bhagavatā. Sukhā vedanā, dukkhā vedanā, adukkhamasukhā vedanā – imā kho, thapati, tisso vedanā vuttā bhagavatā’’ti. Tatiyampi kho pañcakaṅgo thapati āyasmantaṃ udāyiṃ etadavoca – ‘‘na kho, bhante udāyi, tisso vedanā vuttā bhagavatā, dve vedanā vuttā bhagavatā – sukhā vedanā, dukkhā vedanā. Yāyaṃ, bhante, adukkhamasukhā vedanā santasmiṃ esā paṇīte sukhe vuttā bhagavatā’’ti. Neva kho sakkhi āyasmā udāyī pañcakaṅgaṃ thapatiṃ saññāpetuṃ na panāsakkhi pañcakaṅgo thapati āyasmantaṃ udāyiṃ saññāpetuṃ.
༨༩. ཨསྶོསི ཁོ ཨཱཡསྨཱ ཨཱནནྡོ ཨཱཡསྨཏོ ཨུདཱཡིསྶ པཉྩཀངྒེན ཐཔཏིནཱ སདྡྷིཾ ཨིམཾ ཀཐཱསལླཱཔཾ། ཨཐ ཁོ ཨཱཡསྨཱ ཨཱནནྡོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཨཱཡསྨཱ ཨཱནནྡོ ཡཱཝཏཀོ ཨཧོསི ཨཱཡསྨཏོ ཨུདཱཡིསྶ པཉྩཀངྒེན ཐཔཏིནཱ སདྡྷིཾ ཀཐཱསལླཱཔོ ཏཾ སབྦཾ བྷགཝཏོ ཨཱརོཙེསི། ཨེཝཾ ཝུཏྟེ, བྷགཝཱ ཨཱཡསྨནྟཾ ཨཱནནྡཾ ཨེཏདཝོཙ – ‘‘སནྟཉྙེཝ ཁོ, ཨཱནནྡ, པརིཡཱཡཾ པཉྩཀངྒོ ཐཔཏི ཨུདཱཡིསྶ ནཱབྦྷནུམོདི, སནྟཉྙེཝ ཙ པན པརིཡཱཡཾ ཨུདཱཡཱི པཉྩཀངྒསྶ ཐཔཏིསྶ ནཱབྦྷནུམོདི། དྭེཔཱནནྡ, ཝེདནཱ ཝུཏྟཱ མཡཱ པརིཡཱཡེན , ཏིསྶོཔི ཝེདནཱ ཝུཏྟཱ མཡཱ པརིཡཱཡེན, པཉྩཔི ཝེདནཱ ཝུཏྟཱ མཡཱ པརིཡཱཡེན, ཚཔི ཝེདནཱ ཝུཏྟཱ མཡཱ པརིཡཱཡེན, ཨཊྛཱརསཔི ཝེདནཱ ཝུཏྟཱ མཡཱ པརིཡཱཡེན, ཚཏྟིཾསཔི ཝེདནཱ ཝུཏྟཱ མཡཱ པརིཡཱཡེན, ཨཊྛསཏམྤི ཝེདནཱ ཝུཏྟཱ མཡཱ པརིཡཱཡེན། ཨེཝཾ པརིཡཱཡདེསིཏོ ཁོ, ཨཱནནྡ, མཡཱ དྷམྨོ། ཨེཝཾ པརིཡཱཡདེསིཏེ ཁོ, ཨཱནནྡ, མཡཱ དྷམྨེ ཡེ ཨཉྙམཉྙསྶ སུབྷཱསིཏཾ སུལཔིཏཾ ན སམནུཛཱནིསྶནྟི ན སམནུམཉྙིསྶནྟི ན སམནུམོདིསྶནྟི ཏེསམེཏཾ པཱཊིཀངྑཾ – བྷཎྜནཛཱཏཱ ཀལཧཛཱཏཱ ཝིཝཱདཱཔནྣཱ ཨཉྙམཉྙཾ མུཁསཏྟཱིཧི ཝིཏུདནྟཱ ཝིཧརིསྶནྟི། ཨེཝཾ པརིཡཱཡདེསིཏོ ཁོ, ཨཱནནྡ, མཡཱ དྷམྨོ། ཨེཝཾ པརིཡཱཡདེསིཏེ ཁོ, ཨཱནནྡ, མཡཱ དྷམྨེ ཡེ ཨཉྙམཉྙསྶ སུབྷཱསིཏཾ སུལཔིཏཾ སམནུཛཱནིསྶནྟི སམནུམཉྙིསྶནྟི སམནུམོདིསྶནྟི ཏེསམེཏཾ པཱཊིཀངྑཾ – སམགྒཱ སམྨོདམཱནཱ ཨཝིཝདམཱནཱ ཁཱིརོདཀཱིབྷཱུཏཱ ཨཉྙམཉྙཾ པིཡཙཀྑཱུཧི སམྤསྶནྟཱ ཝིཧརིསྶནྟི’’།
89. Assosi kho āyasmā ānando āyasmato udāyissa pañcakaṅgena thapatinā saddhiṃ imaṃ kathāsallāpaṃ. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando yāvatako ahosi āyasmato udāyissa pañcakaṅgena thapatinā saddhiṃ kathāsallāpo taṃ sabbaṃ bhagavato ārocesi. Evaṃ vutte, bhagavā āyasmantaṃ ānandaṃ etadavoca – ‘‘santaññeva kho, ānanda, pariyāyaṃ pañcakaṅgo thapati udāyissa nābbhanumodi, santaññeva ca pana pariyāyaṃ udāyī pañcakaṅgassa thapatissa nābbhanumodi. Dvepānanda, vedanā vuttā mayā pariyāyena , tissopi vedanā vuttā mayā pariyāyena, pañcapi vedanā vuttā mayā pariyāyena, chapi vedanā vuttā mayā pariyāyena, aṭṭhārasapi vedanā vuttā mayā pariyāyena, chattiṃsapi vedanā vuttā mayā pariyāyena, aṭṭhasatampi vedanā vuttā mayā pariyāyena. Evaṃ pariyāyadesito kho, ānanda, mayā dhammo. Evaṃ pariyāyadesite kho, ānanda, mayā dhamme ye aññamaññassa subhāsitaṃ sulapitaṃ na samanujānissanti na samanumaññissanti na samanumodissanti tesametaṃ pāṭikaṅkhaṃ – bhaṇḍanajātā kalahajātā vivādāpannā aññamaññaṃ mukhasattīhi vitudantā viharissanti. Evaṃ pariyāyadesito kho, ānanda, mayā dhammo. Evaṃ pariyāyadesite kho, ānanda, mayā dhamme ye aññamaññassa subhāsitaṃ sulapitaṃ samanujānissanti samanumaññissanti samanumodissanti tesametaṃ pāṭikaṅkhaṃ – samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharissanti’’.
༩༠. ‘‘པཉྩ ཁོ ཨིམེ, ཨཱནནྡ, ཀཱམགུཎཱ། ཀཏམེ པཉྩ? ཙཀྑུཝིཉྙེཡྻཱ རཱུཔཱ ཨིཊྛཱ ཀནྟཱ མནཱཔཱ པིཡརཱུཔཱ ཀཱམཱུཔསཾཧིཏཱ རཛནཱིཡཱ, སོཏཝིཉྙེཡྻཱ སདྡཱ…པེ॰… གྷཱནཝིཉྙེཡྻཱ གནྡྷཱ…པེ॰… ཛིཝ྄ཧཱཝིཉྙེཡྻཱ རསཱ…པེ॰… ཀཱཡཝིཉྙེཡྻཱ ཕོཊྛབྦཱ ཨིཊྛཱ ཀནྟཱ མནཱཔཱ པིཡརཱུཔཱ ཀཱམཱུཔསཾཧིཏཱ རཛནཱིཡཱ – ཨིམེ ཁོ, ཨཱནནྡ, པཉྩ ཀཱམགུཎཱ། ཡཾ ཁོ, ཨཱནནྡ, ཨིམེ པཉྩ ཀཱམགུཎེ པཊིཙྩ ཨུཔྤཛྫཏི སུཁཾ སོམནསྶཾ ཨིདཾ ཝུཙྩཏི ཀཱམསུཁཾ།
90. ‘‘Pañca kho ime, ānanda, kāmaguṇā. Katame pañca? Cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā, sotaviññeyyā saddā…pe… ghānaviññeyyā gandhā…pe… jivhāviññeyyā rasā…pe… kāyaviññeyyā phoṭṭhabbā iṭṭhā kantā manāpā piyarūpā kāmūpasaṃhitā rajanīyā – ime kho, ānanda, pañca kāmaguṇā. Yaṃ kho, ānanda, ime pañca kāmaguṇe paṭicca uppajjati sukhaṃ somanassaṃ idaṃ vuccati kāmasukhaṃ.
‘‘ཡོ ཁོ, ཨཱནནྡ, ཨེཝཾ ཝདེཡྻ – ‘ཨེཏཔརམཾ སཏྟཱ སུཁཾ སོམནསྶཾ པཊིསཾཝེདེནྟཱི’ཏི, ཨིདམསྶ ནཱནུཛཱནཱམི། ཏཾ ཀིསྶ ཧེཏུ? ཨཏྠཱནནྡ, ཨེཏམྷཱ སུཁཱ ཨཉྙཾ སུཁཾ ཨབྷིཀྐནྟཏརཉྩ པཎཱིཏཏརཉྩ། ཀཏམཉྩཱནནྡ, ཨེཏམྷཱ སུཁཱ ཨཉྙཾ སུཁཾ ཨབྷིཀྐནྟཏརཉྩ པཎཱིཏཏརཉྩ? ཨིདྷཱནནྡ, བྷིཀྑུ ཝིཝིཙྩེཝ ཀཱམེཧི ཝིཝིཙྩ ཨཀུསལེཧི དྷམྨེཧི སཝིཏཀྐཾ སཝིཙཱརཾ ཝིཝེཀཛཾ པཱིཏིསུཁཾ པཋམཾ ཛྷཱནཾ ཨུཔསམྤཛྫ ཝིཧརཏི ། ཨིདཾ ཁོ, ཨཱནནྡ, ཨེཏམྷཱ སུཁཱ ཨཉྙཾ སུཁཾ ཨབྷིཀྐནྟཏརཉྩ པཎཱིཏཏརཉྩ།
‘‘Yo kho, ānanda, evaṃ vadeyya – ‘etaparamaṃ sattā sukhaṃ somanassaṃ paṭisaṃvedentī’ti, idamassa nānujānāmi. Taṃ kissa hetu? Atthānanda, etamhā sukhā aññaṃ sukhaṃ abhikkantatarañca paṇītatarañca. Katamañcānanda, etamhā sukhā aññaṃ sukhaṃ abhikkantatarañca paṇītatarañca? Idhānanda, bhikkhu vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharati . Idaṃ kho, ānanda, etamhā sukhā aññaṃ sukhaṃ abhikkantatarañca paṇītatarañca.
‘‘ཡོ ཁོ, ཨཱནནྡ, ཨེཝཾ ཝདེཡྻ – ‘ཨེཏཔརམཾ སཏྟཱ སུཁཾ སོམནསྶཾ པཊིསཾཝེདེནྟཱི’ཏི, ཨིདམསྶ ནཱནུཛཱནཱམི། ཏཾ ཀིསྶ ཧེཏུ? ཨཏྠཱནནྡ, ཨེཏམྷཱ སུཁཱ ཨཉྙཾ སུཁཾ ཨབྷིཀྐནྟཏརཉྩ པཎཱིཏཏརཉྩ། ཀཏམཉྩཱནནྡ, ཨེཏམྷཱ སུཁཱ ཨཉྙཾ སུཁཾ ཨབྷིཀྐནྟཏརཉྩ པཎཱིཏཏརཉྩ? ཨིདྷཱནནྡ, བྷིཀྑུ ཝིཏཀྐཝིཙཱརཱནཾ ཝཱུཔསམཱ…པེ॰… དུཏིཡཾ ཛྷཱནཾ ཨུཔསམྤཛྫ ཝིཧརཏི། ཨིདཾ ཁོ, ཨཱནནྡ, ཨེཏམྷཱ སུཁཱ ཨཉྙཾ སུཁཾ ཨབྷིཀྐནྟཏརཉྩ པཎཱིཏཏརཉྩ།
‘‘Yo kho, ānanda, evaṃ vadeyya – ‘etaparamaṃ sattā sukhaṃ somanassaṃ paṭisaṃvedentī’ti, idamassa nānujānāmi. Taṃ kissa hetu? Atthānanda, etamhā sukhā aññaṃ sukhaṃ abhikkantatarañca paṇītatarañca. Katamañcānanda, etamhā sukhā aññaṃ sukhaṃ abhikkantatarañca paṇītatarañca? Idhānanda, bhikkhu vitakkavicārānaṃ vūpasamā…pe… dutiyaṃ jhānaṃ upasampajja viharati. Idaṃ kho, ānanda, etamhā sukhā aññaṃ sukhaṃ abhikkantatarañca paṇītatarañca.
‘‘ཡོ ཁོ, ཨཱནནྡ, ཨེཝཾ ཝདེཡྻ…པེ॰…། ཀཏམཉྩཱནནྡ, ཨེཏམྷཱ སུཁཱ ཨཉྙཾ སུཁཾ ཨབྷིཀྐནྟཏརཉྩ པཎཱིཏཏརཉྩ? ཨིདྷཱནནྡ, བྷིཀྑུ པཱིཏིཡཱ ཙ ཝིརཱགཱ…པེ॰… ཏཏིཡཾ ཛྷཱནཾ ཨུཔསམྤཛྫ ཝིཧརཏི། ཨིདཾ ཁོ, ཨཱནནྡ, ཨེཏམྷཱ སུཁཱ ཨཉྙཾ སུཁཾ ཨབྷིཀྐནྟཏརཉྩ པཎཱིཏཏརཉྩ།
‘‘Yo kho, ānanda, evaṃ vadeyya…pe…. Katamañcānanda, etamhā sukhā aññaṃ sukhaṃ abhikkantatarañca paṇītatarañca? Idhānanda, bhikkhu pītiyā ca virāgā…pe… tatiyaṃ jhānaṃ upasampajja viharati. Idaṃ kho, ānanda, etamhā sukhā aññaṃ sukhaṃ abhikkantatarañca paṇītatarañca.
‘‘ཡོ ཁོ, ཨཱནནྡ, ཨེཝཾ ཝདེཡྻ…པེ॰…། ཀཏམཉྩཱནནྡ, ཨེཏམྷཱ སུཁཱ ཨཉྙཾ སུཁཾ ཨབྷིཀྐནྟཏརཉྩ པཎཱིཏཏརཉྩ? ཨིདྷཱནནྡ, བྷིཀྑུ སུཁསྶ ཙ པཧཱནཱ…པེ॰… ཙཏུཏྠཾ ཛྷཱནཾ ཨུཔསམྤཛྫ ཝིཧརཏི། ཨིདཾ ཁོ, ཨཱནནྡ, ཨེཏམྷཱ སུཁཱ ཨཉྙཾ སུཁཾ ཨབྷིཀྐནྟཏརཉྩ པཎཱིཏཏརཉྩ།
‘‘Yo kho, ānanda, evaṃ vadeyya…pe…. Katamañcānanda, etamhā sukhā aññaṃ sukhaṃ abhikkantatarañca paṇītatarañca? Idhānanda, bhikkhu sukhassa ca pahānā…pe… catutthaṃ jhānaṃ upasampajja viharati. Idaṃ kho, ānanda, etamhā sukhā aññaṃ sukhaṃ abhikkantatarañca paṇītatarañca.
‘‘ཡོ ཁོ, ཨཱནནྡ, ཨེཝཾ ཝདེཡྻ…པེ॰…། ཀཏམཉྩཱནནྡ, ཨེཏམྷཱ སུཁཱ ཨཉྙཾ སུཁཾ ཨབྷིཀྐནྟཏརཉྩ པཎཱིཏཏརཉྩ ? ཨིདྷཱནནྡ, བྷིཀྑུ སབྦསོ རཱུཔསཉྙཱནཾ སམཏིཀྐམཱ, པཊིགྷསཉྙཱནཾ ཨཏྠངྒམཱ, ནཱནཏྟསཉྙཱནཾ ཨམནསིཀཱརཱ ‘ཨནནྟོ ཨཱཀཱསོ’ཏི ཨཱཀཱསཱནཉྩཱཡཏནཾ ཨུཔསམྤཛྫ ཝིཧརཏི། ཨིདཾ ཁོ, ཨཱནནྡ, ཨེཏམྷཱ སུཁཱ ཨཉྙཾ སུཁཾ ཨབྷིཀྐནྟཏརཉྩ པཎཱིཏཏརཉྩ།
‘‘Yo kho, ānanda, evaṃ vadeyya…pe…. Katamañcānanda, etamhā sukhā aññaṃ sukhaṃ abhikkantatarañca paṇītatarañca ? Idhānanda, bhikkhu sabbaso rūpasaññānaṃ samatikkamā, paṭighasaññānaṃ atthaṅgamā, nānattasaññānaṃ amanasikārā ‘ananto ākāso’ti ākāsānañcāyatanaṃ upasampajja viharati. Idaṃ kho, ānanda, etamhā sukhā aññaṃ sukhaṃ abhikkantatarañca paṇītatarañca.
‘‘ཡོ ཁོ, ཨཱནནྡ, ཨེཝཾ ཝདེཡྻ…པེ॰…། ཀཏམཉྩཱནནྡ, ཨེཏམྷཱ སུཁཱ ཨཉྙཾ སུཁཾ ཨབྷིཀྐནྟཏརཉྩ པཎཱིཏཏརཉྩ? ཨིདྷཱནནྡ, བྷིཀྑུ སབྦསོ ཨཱཀཱསཱནཉྩཱཡཏནཾ སམཏིཀྐམྨ ‘ཨནནྟཾ ཝིཉྙཱཎ’ནྟི ཝིཉྙཱཎཉྩཱཡཏནཾ ཨུཔསམྤཛྫ ཝིཧརཏི། ཨིདཾ ཁོ, ཨཱནནྡ, ཨེཏམྷཱ སུཁཱ ཨཉྙཾ སུཁཾ ཨབྷིཀྐནྟཏརཉྩ པཎཱིཏཏརཉྩ།
‘‘Yo kho, ānanda, evaṃ vadeyya…pe…. Katamañcānanda, etamhā sukhā aññaṃ sukhaṃ abhikkantatarañca paṇītatarañca? Idhānanda, bhikkhu sabbaso ākāsānañcāyatanaṃ samatikkamma ‘anantaṃ viññāṇa’nti viññāṇañcāyatanaṃ upasampajja viharati. Idaṃ kho, ānanda, etamhā sukhā aññaṃ sukhaṃ abhikkantatarañca paṇītatarañca.
‘‘ཡོ ཁོ, ཨཱནནྡ, ཨེཝཾ ཝདེཡྻ…པེ॰…། ཀཏམཉྩཱནནྡ, ཨེཏམྷཱ སུཁཱ ཨཉྙཾ སུཁཾ ཨབྷིཀྐནྟཏརཉྩ པཎཱིཏཏརཉྩ? ཨིདྷཱནནྡ, བྷིཀྑུ སབྦསོ ཝིཉྙཱཎཉྩཱཡཏནཾ སམཏིཀྐམྨ ‘ནཏྠི ཀིཉྩཱི’ཏི ཨཱཀིཉྩཉྙཱཡཏནཾ ཨུཔསམྤཛྫ ཝིཧརཏི། ཨིདཾ ཁོ, ཨཱནནྡ, ཨེཏམྷཱ སུཁཱ ཨཉྙཾ སུཁཾ ཨབྷིཀྐནྟཏརཉྩ པཎཱིཏཏརཉྩ།
‘‘Yo kho, ānanda, evaṃ vadeyya…pe…. Katamañcānanda, etamhā sukhā aññaṃ sukhaṃ abhikkantatarañca paṇītatarañca? Idhānanda, bhikkhu sabbaso viññāṇañcāyatanaṃ samatikkamma ‘natthi kiñcī’ti ākiñcaññāyatanaṃ upasampajja viharati. Idaṃ kho, ānanda, etamhā sukhā aññaṃ sukhaṃ abhikkantatarañca paṇītatarañca.
‘‘ཡོ ཁོ, ཨཱནནྡ, ཨེཝཾ ཝདེཡྻ…པེ॰…། ཀཏམཉྩཱནནྡ, ཨེཏམྷཱ སུཁཱ ཨཉྙཾ སུཁཾ ཨབྷིཀྐནྟཏརཉྩ པཎཱིཏཏརཉྩ? ཨིདྷཱནནྡ, བྷིཀྑུ སབྦསོ ཨཱཀིཉྩཉྙཱཡཏནཾ སམཏིཀྐམྨ ནེཝསཉྙཱནཱསཉྙཱཡཏནཾ ཨུཔསམྤཛྫ ཝིཧརཏི། ཨིདཾ ཁོ, ཨཱནནྡ, ཨེཏམྷཱ སུཁཱ ཨཉྙཾ སུཁཾ ཨབྷིཀྐནྟཏརཉྩ པཎཱིཏཏརཉྩ།
‘‘Yo kho, ānanda, evaṃ vadeyya…pe…. Katamañcānanda, etamhā sukhā aññaṃ sukhaṃ abhikkantatarañca paṇītatarañca? Idhānanda, bhikkhu sabbaso ākiñcaññāyatanaṃ samatikkamma nevasaññānāsaññāyatanaṃ upasampajja viharati. Idaṃ kho, ānanda, etamhā sukhā aññaṃ sukhaṃ abhikkantatarañca paṇītatarañca.
‘‘ཡོ ཁོ, ཨཱནནྡ, ཨེཝཾ ཝདེཡྻ – ‘ཨེཏཔརམཾ སཏྟཱ སུཁཾ སོམནསྶཾ པཊིསཾཝེདེནྟཱི’ཏི, ཨིདམསྶ ནཱནུཛཱནཱམི། ཏཾ ཀིསྶ ཧེཏུ? ཨཏྠཱནནྡ, ཨེཏམྷཱ སུཁཱ ཨཉྙཾ སུཁཾ ཨབྷིཀྐནྟཏརཉྩ པཎཱིཏཏརཉྩ། ཀཏམཉྩཱནནྡ, ཨེཏམྷཱ སུཁཱ ཨཉྙཾ སུཁཾ ཨབྷིཀྐནྟཏརཉྩ པཎཱིཏཏརཉྩ? ཨིདྷཱནནྡ, བྷིཀྑུ སབྦསོ ནེཝསཉྙཱནཱསཉྙཱཡཏནཾ སམཏིཀྐམྨ སཉྙཱཝེདཡིཏནིརོདྷཾ ཨུཔསམྤཛྫ ཝིཧརཏི། ཨིདཾ ཁོ, ཨཱནནྡ, ཨེཏམྷཱ སུཁཱ ཨཉྙཾ སུཁཾ ཨབྷིཀྐནྟཏརཉྩ པཎཱིཏཏརཉྩ།
‘‘Yo kho, ānanda, evaṃ vadeyya – ‘etaparamaṃ sattā sukhaṃ somanassaṃ paṭisaṃvedentī’ti, idamassa nānujānāmi. Taṃ kissa hetu? Atthānanda, etamhā sukhā aññaṃ sukhaṃ abhikkantatarañca paṇītatarañca. Katamañcānanda, etamhā sukhā aññaṃ sukhaṃ abhikkantatarañca paṇītatarañca? Idhānanda, bhikkhu sabbaso nevasaññānāsaññāyatanaṃ samatikkamma saññāvedayitanirodhaṃ upasampajja viharati. Idaṃ kho, ānanda, etamhā sukhā aññaṃ sukhaṃ abhikkantatarañca paṇītatarañca.
༩༡. ‘‘ཋཱནཾ ཁོ པནེཏཾ, ཨཱནནྡ, ཝིཛྫཏི ཡཾ ཨཉྙཏིཏྠིཡཱ པརིབྦཱཛཀཱ ཨེཝཾ ཝདེཡྻུཾ – ‘སཉྙཱཝེདཡིཏནིརོདྷཾ སམཎོ གོཏམོ ཨཱཧ; ཏཉྩ སུཁསྨིཾ པཉྙཔེཏི། ཏཡིདཾ ཀིཾསུ, ཏཡིདཾ ཀཐཾསཱུ’ཏི? ཨེཝཾཝཱདིནོ, ཨཱནནྡ, ཨཉྙཏིཏྠིཡཱ པརིབྦཱཛཀཱ ཨེཝམསྶུ ཝཙནཱིཡཱ – ‘ན ཁོ, ཨཱཝུསོ, བྷགཝཱ སུཁཾཡེཝ ཝེདནཾ སནྡྷཱཡ སུཁསྨིཾ པཉྙཔེཏི; ཨཔི ཙ, ཨཱཝུསོ, ཡཏྠ ཡཏྠ སུཁཾ ཨུཔལབྦྷཏི ཡཧིཾ ཡཧིཾ ཏཾ ཏཾ ཏཐཱགཏོ སུཁསྨིཾ པཉྙཔེཏཱི’’’ཏི།
91. ‘‘Ṭhānaṃ kho panetaṃ, ānanda, vijjati yaṃ aññatitthiyā paribbājakā evaṃ vadeyyuṃ – ‘saññāvedayitanirodhaṃ samaṇo gotamo āha; tañca sukhasmiṃ paññapeti. Tayidaṃ kiṃsu, tayidaṃ kathaṃsū’ti? Evaṃvādino, ānanda, aññatitthiyā paribbājakā evamassu vacanīyā – ‘na kho, āvuso, bhagavā sukhaṃyeva vedanaṃ sandhāya sukhasmiṃ paññapeti; api ca, āvuso, yattha yattha sukhaṃ upalabbhati yahiṃ yahiṃ taṃ taṃ tathāgato sukhasmiṃ paññapetī’’’ti.
ཨིདམཝོཙ བྷགཝཱ། ཨཏྟམནོ ཨཱཡསྨཱ ཨཱནནྡོ བྷགཝཏོ བྷཱསིཏཾ ཨབྷིནནྡཱིཏི།
Idamavoca bhagavā. Attamano āyasmā ānando bhagavato bhāsitaṃ abhinandīti.
བཧུཝེདནཱིཡསུཏྟཾ ནིཊྛིཏཾ ནཝམཾ།
Bahuvedanīyasuttaṃ niṭṭhitaṃ navamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༩. བཧུཝེདནཱིཡསུཏྟཝཎྞནཱ • 9. Bahuvedanīyasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༩. བཧུཝེདནིཡསུཏྟཝཎྞནཱ • 9. Bahuvedaniyasuttavaṇṇanā
