| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
9. ப³ஹுவேத³னியஸுத்தவண்ணனா
9. Bahuvedaniyasuttavaṇṇanā
88. பஞ்சகங்கோ³தி வட்³ட⁴கீகிச்சஸாத⁴னே வாஸிஆதி³பஞ்சகங் அங்க³ங் ஸங்த⁴னங் ஏதஸ்மிந்தி பஞ்சகங்கோ³. த²ம்பா⁴தி³வத்தூ²னங் த²பனட்டே²ன த²பதி. பண்டி³தஉதா³யித்தே²ரோ, ந காளுதா³யீ தே²ரோ.
88.Pañcakaṅgoti vaḍḍhakīkiccasādhane vāsiādipañcakaṃ aṅgaṃ saṃdhanaṃ etasminti pañcakaṅgo. Thambhādivatthūnaṃ thapanaṭṭhena thapati. Paṇḍitaudāyitthero, na kāḷudāyī thero.
89. பரியாயதி அத்தனோ ப²லங் வத்தேதீதி பரியாயோ, காரணங். வேத³னாஸன்னிஸ்ஸிதோ ச காயிகசேதஸிகபா⁴வோ காரணங். தேனாஹ – ‘‘காயிகசேதஸிகவஸேன த்³வே வேதி³தப்³பா³’’தி. தத்த² பஸாத³காயஸன்னிஸ்ஸிதா காயிகா, சேதோஸன்னிஸ்ஸிதா சேதஸிகா. ஸுகா²தி³வஸேன திஸ்ஸோதி எத்த² ஸுக²னது³க்க²னுபெக்க²னானி ஸுகா²தி³வேத³னாய காரணங். தானி ஹி பவத்தினிமித்தானி கத்வா தத்த² ஸுகா²தி³ஸத்³த³ப்பவத்தி, இமினா நயேன ஸேஸேஸுபி யதா²ரஹங் காரணங் நித்³தா⁴ரெத்வா வத்தப்³ப³ங். உபவிசாரவஸேனாதி ஆரம்மணங் உபேச்ச ஸவிஸேஸபவத்திவஸேன. யஸ்மிஞ்ஹி ஆரம்மணே ஸோமனஸ்ஸவேத³னா பவத்ததி, ஆரம்மணதாய தங் உபக³ந்த்வா இதரவேத³னாஹி விஸிட்ட²தாய ஸவிஸேஸங் தத்த² பவத்தி. தேனாஹ ‘‘ஸோமனஸ்ஸட்டா²னியங் ரூபங் உபவிசரதீ’’தி. ஏஸ நயோ ஸேஸவேத³னாஸு கே³ஹஸ்ஸிதானீதி கே³ஹனிஸ்ஸிதானி.
89. Pariyāyati attano phalaṃ vattetīti pariyāyo, kāraṇaṃ. Vedanāsannissito ca kāyikacetasikabhāvo kāraṇaṃ. Tenāha – ‘‘kāyikacetasikavasena dve veditabbā’’ti. Tattha pasādakāyasannissitā kāyikā, cetosannissitā cetasikā. Sukhādivasena tissoti ettha sukhanadukkhanupekkhanāni sukhādivedanāya kāraṇaṃ. Tāni hi pavattinimittāni katvā tattha sukhādisaddappavatti, iminā nayena sesesupi yathārahaṃ kāraṇaṃ niddhāretvā vattabbaṃ. Upavicāravasenāti ārammaṇaṃ upecca savisesapavattivasena. Yasmiñhi ārammaṇe somanassavedanā pavattati, ārammaṇatāya taṃ upagantvā itaravedanāhi visiṭṭhatāya savisesaṃ tattha pavatti. Tenāha ‘‘somanassaṭṭhāniyaṃ rūpaṃ upavicaratī’’ti. Esa nayo sesavedanāsu gehassitānīti gehanissitāni.
90. பரியாயேனாதி ‘‘இத³மெத்த² து³க்க²ஸ்மிந்தி வதா³மீ’’தி வுத்தட்டா²னங் ஸந்தா⁴ய வத³தி. தங் த³ஸ்ஸெந்தோதி காமஞ்செத்த² ஸுத்தே – ‘‘த்³வேபானந்த³, வேத³னா வுத்தா’’தி த்³வே ஆதி³ங் கத்வா வேத³னா த³ஸ்ஸிதா, ஏகாபி பன த³ஸ்ஸிதா ஏவாதி த³ஸ்ஸெந்தோ. உபத்த²ம்பே⁴துந்தி ஏகாபி வேத³னா வுத்தா மயா பரியாயேன, ஏவங் ஸதி த்³வேபி வத்தப்³பா³தி ஏவங் தஸ்ஸ வாத³ங் உபத்த²ம்பே⁴துங். கத²ங் பன ஏகா வேத³னா வுத்தாதி? யங் கிஞ்சி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா, இத³மெத்த² து³க்க²ஸ்மிந்தி வதா³மீதி. யங் பனெத்த² வத்தப்³ப³ங், தங் இதிவுத்தகவண்ணனாயங் (இதிவு॰ அட்ட²॰ 52 ஆத³யோ) பரமத்த²தீ³பனியங் வுத்தனயேன வேதி³தப்³ப³ங்.
90.Pariyāyenāti ‘‘idamettha dukkhasminti vadāmī’’ti vuttaṭṭhānaṃ sandhāya vadati. Taṃ dassentoti kāmañcettha sutte – ‘‘dvepānanda, vedanā vuttā’’ti dve ādiṃ katvā vedanā dassitā, ekāpi pana dassitā evāti dassento. Upatthambhetunti ekāpi vedanā vuttā mayā pariyāyena, evaṃ sati dvepi vattabbāti evaṃ tassa vādaṃ upatthambhetuṃ. Kathaṃ pana ekā vedanā vuttāti? Yaṃ kiñci vedayitaṃ sukhaṃ vā dukkhaṃ vā adukkhamasukhaṃ vā, idamettha dukkhasminti vadāmīti. Yaṃ panettha vattabbaṃ, taṃ itivuttakavaṇṇanāyaṃ (itivu. aṭṭha. 52 ādayo) paramatthadīpaniyaṃ vuttanayena veditabbaṃ.
கத²ங் பனெத்த² ரூபாவசரசதுத்தே² அரூபேஸு ஸஞ்ஞாவேத³யிதனிரோதே⁴ ஸுக²ங் உத்³த⁴தந்தி ஆஹ ‘‘எத்த² சா’’திஆதி³. ஸந்தட்டே²னாதி படிபக்க²த⁴ம்மானங் வூபஸந்தபா⁴வேன. பணீதட்டே²னாதி பா⁴வனாவிஸேஸவிஸிட்டே²ன அதப்பகபா⁴வேனேவ ஸெட்ட²பா⁴வேன ச, பச்சயவிஸேஸேன பதா⁴னபா⁴வங் நீதந்திபி பணீதங். வேத³யிதஸுக²ங் நாம வேத³னாபூ⁴தங் ஸுக²ந்தி கத்வா. அவேத³யிதஸுக²ங் நாம யாவதா நித்³து³க்க²தா, தாவதா ஸுக²ந்தி வுச்சதீதி.அத² வா நிரோதோ⁴ ஸுட்டு² கா²த³தி க²னதி காயிகசேதஸிகாபா³த⁴ந்தி வத்தப்³ப³தங் அரஹதி ஸத்தாஹம்பி தத்த² து³க்க²ஸ்ஸ நிருஜ்ஜ²னதோ. தேனாஹ ‘‘நித்³து³க்க²பா⁴வஸங்கா²தேன ஸுக²ட்டே²னா’’தி.
Kathaṃ panettha rūpāvacaracatutthe arūpesu saññāvedayitanirodhe sukhaṃ uddhatanti āha ‘‘ettha cā’’tiādi. Santaṭṭhenāti paṭipakkhadhammānaṃ vūpasantabhāvena. Paṇītaṭṭhenāti bhāvanāvisesavisiṭṭhena atappakabhāveneva seṭṭhabhāvena ca, paccayavisesena padhānabhāvaṃ nītantipi paṇītaṃ. Vedayitasukhaṃ nāma vedanābhūtaṃ sukhanti katvā. Avedayitasukhaṃ nāma yāvatā niddukkhatā, tāvatā sukhanti vuccatīti.Atha vā nirodho suṭṭhu khādati khanati kāyikacetasikābādhanti vattabbataṃ arahati sattāhampi tattha dukkhassa nirujjhanato. Tenāha ‘‘niddukkhabhāvasaṅkhātena sukhaṭṭhenā’’ti.
91. யஸ்மிங் யஸ்மிங் ப⁴வே, சித்துப்பாதே³, அவத்தா²ய வா நித்³து³க்க²பா⁴வோ, து³க்க²ஸ்ஸ படிபக்க²தா அனுபலப்³ப⁴னேன து³க்க²விவித்தங், தங் ஸுக²ஸ்மிங்யேவ பஞ்ஞபேதி. ஸேஸங் ஸுவிஞ்ஞெய்யமேவ.
91.Yasmiṃ yasmiṃ bhave, cittuppāde, avatthāya vā niddukkhabhāvo, dukkhassa paṭipakkhatā anupalabbhanena dukkhavivittaṃ, taṃ sukhasmiṃyeva paññapeti. Sesaṃ suviññeyyameva.
ப³ஹுவேத³னீயஸுத்தவண்ணனாய லீனத்த²ப்பகாஸனா ஸமத்தா.
Bahuvedanīyasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 9. ப³ஹுவேத³னீயஸுத்தங் • 9. Bahuvedanīyasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 9. ப³ஹுவேத³னீயஸுத்தவண்ணனா • 9. Bahuvedanīyasuttavaṇṇanā
