| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
4. ப³கப்³ரஹ்மஸுத்தவண்ணனா
4. Bakabrahmasuttavaṇṇanā
175. சதுத்தே² பாபகங் தி³ட்டி²க³தந்தி லாமிகா ஸஸ்ஸததி³ட்டி². இத³ங் நிச்சந்தி இத³ங் ஸஹ காயேன ப்³ரஹ்மட்டா²னங் அனிச்சங் ‘‘நிச்ச’’ந்தி வத³தி. து⁴வாதீ³னி தஸ்ஸேவ வேவசனானி. தத்த² து⁴வந்தி தி²ரங். ஸஸ்ஸதந்தி ஸதா³ விஜ்ஜமானங். கேவலந்தி அக²ண்ட³ங் ஸகலங். அசவனத⁴ம்மந்தி அசவனஸபா⁴வங். இத³ங் ஹி ந ஜாயதீதிஆதீ³ஸு இமஸ்மிங் டா²னே கோசி ஜாயனகோ வா ஜீயனகோ வா மீயனகோ வா சவனகோ வா உபபஜ்ஜனகோ வா நத்தி², தங் ஸந்தா⁴ய வத³தி. இதோ ச பனஞ்ஞந்தி இதோ ஸஹகாயா ப்³ரஹ்மட்டா²னா உத்தரி அஞ்ஞங் நிஸ்ஸரணங் நாம நத்தீ²தி. ஏவமஸ்ஸ தா²மக³தா ஸஸ்ஸததி³ட்டி² உப்பன்னா ஹோதி. ஏவங்வாதீ³ ச பன ஸோ உபரி திஸ்ஸோ ஜா²னபூ⁴மியோ சத்தாரோ மக்³கே³ சத்தாரி ப²லானி நிப்³பா³னந்தி ஸப்³ப³ங் படிபா³ஹதி. கதா³ பனஸ்ஸ ஸா தி³ட்டி² உப்பன்னாதி? பட²மஜ்ஜா²னபூ⁴மியங் நிப்³ப³த்தகாலே. து³தியஜ்ஜா²னபூ⁴மியந்தி ஏகே.
175. Catutthe pāpakaṃ diṭṭhigatanti lāmikā sassatadiṭṭhi. Idaṃ niccanti idaṃ saha kāyena brahmaṭṭhānaṃ aniccaṃ ‘‘nicca’’nti vadati. Dhuvādīni tasseva vevacanāni. Tattha dhuvanti thiraṃ. Sassatanti sadā vijjamānaṃ. Kevalanti akhaṇḍaṃ sakalaṃ. Acavanadhammanti acavanasabhāvaṃ. Idaṃ hi na jāyatītiādīsu imasmiṃ ṭhāne koci jāyanako vā jīyanako vā mīyanako vā cavanako vā upapajjanako vā natthi, taṃ sandhāya vadati. Ito ca panaññanti ito sahakāyā brahmaṭṭhānā uttari aññaṃ nissaraṇaṃ nāma natthīti. Evamassa thāmagatā sassatadiṭṭhi uppannā hoti. Evaṃvādī ca pana so upari tisso jhānabhūmiyo cattāro magge cattāri phalāni nibbānanti sabbaṃ paṭibāhati. Kadā panassa sā diṭṭhi uppannāti? Paṭhamajjhānabhūmiyaṃ nibbattakāle. Dutiyajjhānabhūmiyanti eke.
தத்ராயங் அனுபுப்³பி³கதா² – ஹெட்டு²பபத்திகோ கிரேஸ ப்³ரஹ்மா அனுப்பன்னே பு³த்³து⁴ப்பாதே³ இஸிபப்³ப³ஜ்ஜங் பப்³ப³ஜித்வா கஸிணபரிகம்மங் கத்வா ஸமாபத்தியோ நிப்³ப³த்தெத்வா அபரிஹீனஜ்ஜா²னோ காலங் கத்வா சதுத்த²ஜ்ஜா²னபூ⁴மியங் வேஹப்ப²லப்³ரஹ்மலோகே பஞ்சகப்பஸதிகங் ஆயுங் க³ஹெத்வா நிப்³ப³த்தி. தத்த² யாவதாயுகங் ட²த்வா ஹெட்டு²பபத்திகங் கத்வா ததியஜ்ஜா²னங் பணீதங் பா⁴வெத்வா ஸுப⁴கிண்ஹப்³ரஹ்மலோகே சதுஸட்டி²கப்பங் ஆயுங் க³ஹெத்வா நிப்³ப³த்தி. தத்த² து³தியஜ்ஜா²னங் பா⁴வெத்வா ஆப⁴ஸ்ஸரே அட்ட² கப்பே ஆயுங் க³ஹெத்வா நிப்³ப³த்தி. தத்த² பட²மஜ்ஜா²னங் பா⁴வெத்வா, பட²மஜ்ஜா²னபூ⁴மியங் கப்பாயுகோ ஹுத்வா நிப்³ப³த்தி . ஸோ பட²மகாலே அத்தனா கதகம்மஞ்ச நிப்³ப³த்தட்டா²னஞ்ச அஞ்ஞாஸி, காலே பன க³ச்ச²ந்தே க³ச்ச²ந்தே உப⁴யங் பமுஸ்ஸித்வா ஸஸ்ஸததி³ட்டி²ங் உப்பாதே³ஸி.
Tatrāyaṃ anupubbikathā – heṭṭhupapattiko kiresa brahmā anuppanne buddhuppāde isipabbajjaṃ pabbajitvā kasiṇaparikammaṃ katvā samāpattiyo nibbattetvā aparihīnajjhāno kālaṃ katvā catutthajjhānabhūmiyaṃ vehapphalabrahmaloke pañcakappasatikaṃ āyuṃ gahetvā nibbatti. Tattha yāvatāyukaṃ ṭhatvā heṭṭhupapattikaṃ katvā tatiyajjhānaṃ paṇītaṃ bhāvetvā subhakiṇhabrahmaloke catusaṭṭhikappaṃ āyuṃ gahetvā nibbatti. Tattha dutiyajjhānaṃ bhāvetvā ābhassare aṭṭha kappe āyuṃ gahetvā nibbatti. Tattha paṭhamajjhānaṃ bhāvetvā, paṭhamajjhānabhūmiyaṃ kappāyuko hutvā nibbatti . So paṭhamakāle attanā katakammañca nibbattaṭṭhānañca aññāsi, kāle pana gacchante gacchante ubhayaṃ pamussitvā sassatadiṭṭhiṃ uppādesi.
அவிஜ்ஜாக³தோதி அவிஜ்ஜாய க³தோ ஸமன்னாக³தோ அஞ்ஞாணீ அந்தீ⁴பூ⁴தோ. யத்ர ஹி நாமாதி யோ நாம. வக்க²தீதி ப⁴ணதி. ‘‘யத்ரா’’தி நிபாதயோகே³ன பன அனாக³தவசனங் கதங்.
Avijjāgatoti avijjāya gato samannāgato aññāṇī andhībhūto. Yatra hi nāmāti yo nāma. Vakkhatīti bhaṇati. ‘‘Yatrā’’ti nipātayogena pana anāgatavacanaṃ kataṃ.
ஏவங் வுத்தே ஸோ ப்³ரஹ்மா யதா² நாம மக்³க³சோரோ த்³வே தயோ பஹாரே அதி⁴வாஸெந்தோ ஸஹாயே அனாசிக்கி²த்வாபி உத்தரிங் பஹாரங் பஹரியமானோ ‘‘அஸுகோ ச அஸுகோ ச மய்ஹங் ஸஹாயோ’’தி ஆசிக்க²தி, ஏவமேவ ப⁴க³வதா ஸந்தஜ்ஜியமானோ ஸதிங் லபி⁴த்வா, ‘‘ப⁴க³வா மய்ஹங் பதா³னுபத³ங் பெக்க²ந்தோ மங் நிப்பீளிதுகாமோ’’தி பீ⁴தோ அத்தனோ ஸஹாயே ஆசிக்க²ந்தோ த்³வாஸத்ததீதிஆதி³மாஹ. தஸ்ஸத்தோ² – போ⁴ கோ³தம, மயங் த்³வாஸத்ததி ஜனா புஞ்ஞகம்மா தேன புஞ்ஞகம்மேன இத⁴ நிப்³ப³த்தா. வஸவத்தினோ ஸயங் அஞ்ஞேஸங் வஸே அவத்தித்வா பரே அத்தனோ வஸே வத்தேம, ஜாதிஞ்ச ஜரஞ்ச அதீதா, அயங் நோ வேதே³ஹி க³தத்தா ‘‘வேத³கூ³’’தி ஸங்க²ங் க³தா ப⁴க³வா அந்திமா ப்³ரஹ்முபபத்தி. அஸ்மாபி⁴ஜப்பந்தி ஜனா அனேகாதி அனேகஜனா அம்ஹே அபி⁴ஜப்பந்தி. ‘‘அயங் கோ² ப⁴வங் ப்³ரஹ்மா, மஹாப்³ரஹ்மா, அபி⁴பூ⁴, அனபி⁴பூ⁴தோ, அஞ்ஞத³த்து²த³ஸோ, வஸவத்தீ, இஸ்ஸரோ, கத்தா, நிம்மாதா, ஸெட்டோ², ஸஜிதா, வஸீ, பிதா பூ⁴தப⁴ப்³யான’’ந்தி ஏவங் பத்தெ²ந்தி பிஹெந்தீதி.
Evaṃ vutte so brahmā yathā nāma maggacoro dve tayo pahāre adhivāsento sahāye anācikkhitvāpi uttariṃ pahāraṃ pahariyamāno ‘‘asuko ca asuko ca mayhaṃ sahāyo’’ti ācikkhati, evameva bhagavatā santajjiyamāno satiṃ labhitvā, ‘‘bhagavā mayhaṃ padānupadaṃ pekkhanto maṃ nippīḷitukāmo’’ti bhīto attano sahāye ācikkhanto dvāsattatītiādimāha. Tassattho – bho gotama, mayaṃ dvāsattati janā puññakammā tena puññakammena idha nibbattā. Vasavattino sayaṃ aññesaṃ vase avattitvā pare attano vase vattema, jātiñca jarañca atītā, ayaṃ no vedehi gatattā ‘‘vedagū’’ti saṅkhaṃ gatā bhagavā antimā brahmupapatti. Asmābhijappanti janā anekāti anekajanā amhe abhijappanti. ‘‘Ayaṃ kho bhavaṃ brahmā, mahābrahmā, abhibhū, anabhibhūto, aññadatthudaso, vasavattī, issaro, kattā, nimmātā, seṭṭho, sajitā, vasī, pitā bhūtabhabyāna’’nti evaṃ patthenti pihentīti.
அத² நங் ப⁴க³வா அப்பங் ஹி ஏதந்திஆதி³மாஹ. தத்த² ஏதந்தி யங் த்வங் இத⁴ தவ ஆயுங் ‘‘தீ³க⁴’’ந்தி மஞ்ஞஸி, ஏதங் அப்பங் பரித்தகங். ஸதங் ஸஹஸ்ஸானங் நிரப்³பு³தா³னந்தி நிரப்³பு³த³க³ணனாய ஸதஸஹஸ்ஸனிரப்³பு³தா³னங். ஆயுங் பஜானாமீதி, ‘‘இதா³னி தவ அவஸிட்ட²ங் எத்தகங் ஆயூ’’தி அஹங் ஜானாமி. அனந்தத³ஸ்ஸீ ப⁴க³வா ஹமஸ்மீதி, ப⁴க³வா, தும்ஹே ‘‘அஹங் அனந்தத³ஸ்ஸீ ஜாதிஆதீ³னி உபாதிவத்தோ’’தி வத³த². கிங் மே புராணந்தி, யதி³ த்வங் அனந்தத³ஸ்ஸீ, ஏவங் ஸந்தே இத³ங் மே ஆசிக்க², கிங் மய்ஹங் புராணங்? வதஸீலவத்தந்தி ஸீலமேவ வுச்சதி. யமஹங் விஜஞ்ஞாதி யங் அஹங் தயா கதி²தங் ஜானெய்யங், தங் மே ஆசிக்கா²தி வத³தி.
Atha naṃ bhagavā appaṃ hi etantiādimāha. Tattha etanti yaṃ tvaṃ idha tava āyuṃ ‘‘dīgha’’nti maññasi, etaṃ appaṃ parittakaṃ. Sataṃ sahassānaṃ nirabbudānanti nirabbudagaṇanāya satasahassanirabbudānaṃ. Āyuṃ pajānāmīti, ‘‘idāni tava avasiṭṭhaṃ ettakaṃ āyū’’ti ahaṃ jānāmi. Anantadassī bhagavā hamasmīti, bhagavā, tumhe ‘‘ahaṃ anantadassī jātiādīni upātivatto’’ti vadatha. Kiṃ me purāṇanti, yadi tvaṃ anantadassī, evaṃ sante idaṃ me ācikkha, kiṃ mayhaṃ purāṇaṃ? Vatasīlavattanti sīlameva vuccati. Yamahaṃ vijaññāti yaṃ ahaṃ tayā kathitaṃ jāneyyaṃ, taṃ me ācikkhāti vadati.
இதா³னிஸ்ஸ ஆசிக்க²ந்தோ ப⁴க³வா யங் த்வங் அபாயேஸீதிஆதி³மாஹ. தத்ராயங் அதி⁴ப்பாயோ – புப்³பே³ கிரேஸ குலக⁴ரே நிப்³ப³த்தித்வா காமேஸு ஆதீ³னவங் தி³ஸ்வா – ‘‘ஜாதிஜராமரணஸ்ஸ அந்தங் கரிஸ்ஸாமீ’’தி நிக்க²ம்ம இஸிபப்³ப³ஜ்ஜங் பப்³ப³ஜித்வா ஸமாபத்தியோ நிப்³ப³த்தெத்வா அபி⁴ஞ்ஞாபாத³கஜ்ஜா²னஸ்ஸ லாபீ⁴ ஹுத்வா க³ங்கா³தீரே பண்ணஸாலங் காரெத்வா ஜா²னரதியா வீதினாமேதி. ததா³ ச காலேனகாலங் ஸத்த²வாஹா பஞ்சஹி ஸகடஸதேஹி மருகந்தாரங் படிபஜ்ஜந்தி. மருகந்தாரே பன தி³வா ந ஸக்கா க³ந்துங், ரத்திங் க³மனங் ஹோதி. அத² புரிமஸகடஸ்ஸ அக்³க³யுகே³ யுத்தப³லிப³த்³தா³ க³ச்ச²ந்தா க³ச்ச²ந்தா நிவத்தித்வா ஆக³தமக்³கா³பி⁴முகா² அஹேஸுங், ஸப்³ப³ஸகடானி ததே²வ நிவத்தித்வா அருணே உக்³க³தே நிவத்திதபா⁴வங் ஜானிங்ஸு. தேஸஞ்ச ததா³ கந்தாரங் அதிக்கமனதி³வஸோ அஹோஸி. ஸப்³ப³ங் தா³ருத³கங் பரிக்கீ²ணங் – தஸ்மா ‘‘நத்தி² தா³னி அம்ஹாகங் ஜீவித’’ந்தி சிந்தெத்வா, கோ³ணே சக்கேஸு ப³ந்தி⁴த்வா, மனுஸ்ஸா ஸகடச்சா²யங் பவிஸித்வா நிபஜ்ஜிங்ஸு.
Idānissa ācikkhanto bhagavā yaṃ tvaṃ apāyesītiādimāha. Tatrāyaṃ adhippāyo – pubbe kiresa kulaghare nibbattitvā kāmesu ādīnavaṃ disvā – ‘‘jātijarāmaraṇassa antaṃ karissāmī’’ti nikkhamma isipabbajjaṃ pabbajitvā samāpattiyo nibbattetvā abhiññāpādakajjhānassa lābhī hutvā gaṅgātīre paṇṇasālaṃ kāretvā jhānaratiyā vītināmeti. Tadā ca kālenakālaṃ satthavāhā pañcahi sakaṭasatehi marukantāraṃ paṭipajjanti. Marukantāre pana divā na sakkā gantuṃ, rattiṃ gamanaṃ hoti. Atha purimasakaṭassa aggayuge yuttabalibaddā gacchantā gacchantā nivattitvā āgatamaggābhimukhā ahesuṃ, sabbasakaṭāni tatheva nivattitvā aruṇe uggate nivattitabhāvaṃ jāniṃsu. Tesañca tadā kantāraṃ atikkamanadivaso ahosi. Sabbaṃ dārudakaṃ parikkhīṇaṃ – tasmā ‘‘natthi dāni amhākaṃ jīvita’’nti cintetvā, goṇe cakkesu bandhitvā, manussā sakaṭacchāyaṃ pavisitvā nipajjiṃsu.
தாபஸோபி காலஸ்ஸேவ பண்ணஸாலதோ நிக்க²மித்வா பண்ணஸாலத்³வாரே நிஸின்னோ க³ங்க³ங் ஓலோகயமானோ அத்³த³ஸ க³ங்க³ங் மஹதா உத³கோகே⁴ன பூரியமானங் பவத்திதமணிக்க²ந்த⁴ங் விய ஆக³ச்ச²ந்தங், தி³ஸ்வா சிந்தேஸி – ‘‘அத்தி² நு கோ² இமஸ்மிங் லோகே ஏவரூபஸ்ஸ மது⁴ரோத³கஸ்ஸ அலாபே⁴ன கிலிஸ்ஸமானா ஸத்தா’’தி? ஸோ ஏவங் ஆவஜ்ஜெந்தோ மருகந்தாரே தங் ஸத்த²ங் தி³ஸ்வா ‘இமே ஸத்தா மா நஸ்ஸந்தூ’தி ‘‘இதோ சிதோ ச மஹாஉத³கக்க²ந்தோ⁴ சி²ஜ்ஜித்வா மருகந்தாரே ஸத்தா²பி⁴முகோ² க³ச்ச²தூ’’தி அபி⁴ஞ்ஞாசித்தேன அதி⁴ட்டா²ஸி. ஸஹ சித்துப்பாதே³ன மாதிகாருள்ஹங் விய உத³கங் தத்த² அக³மாஸி. மனுஸ்ஸா உத³கஸத்³தே³ன வுட்டா²ய உத³கங் தி³ஸ்வா ஹட்ட²துட்டா² ந்ஹாயித்வா பிவித்வா கோ³ணேபி பாயெத்வா ஸொத்தி²னா இச்சி²தட்டா²னங் அக³மங்ஸு. ஸத்தா² தங் ப்³ரஹ்முனோ புப்³ப³கம்மங் த³ஸ்ஸெந்தோ பட²மங் கா³த²மாஹ. தத்த² அபாயேஸீதி பாயேஸி. அ-காரோ நிபாதமத்தங். க³ம்மனீதி கி³ம்ஹே. ஸம்பரேதேதி கி³ம்ஹாதபேன பு²ட்டே² அனுக³தே.
Tāpasopi kālasseva paṇṇasālato nikkhamitvā paṇṇasāladvāre nisinno gaṅgaṃ olokayamāno addasa gaṅgaṃ mahatā udakoghena pūriyamānaṃ pavattitamaṇikkhandhaṃ viya āgacchantaṃ, disvā cintesi – ‘‘atthi nu kho imasmiṃ loke evarūpassa madhurodakassa alābhena kilissamānā sattā’’ti? So evaṃ āvajjento marukantāre taṃ satthaṃ disvā ‘ime sattā mā nassantū’ti ‘‘ito cito ca mahāudakakkhandho chijjitvā marukantāre satthābhimukho gacchatū’’ti abhiññācittena adhiṭṭhāsi. Saha cittuppādena mātikāruḷhaṃ viya udakaṃ tattha agamāsi. Manussā udakasaddena vuṭṭhāya udakaṃ disvā haṭṭhatuṭṭhā nhāyitvā pivitvā goṇepi pāyetvā sotthinā icchitaṭṭhānaṃ agamaṃsu. Satthā taṃ brahmuno pubbakammaṃ dassento paṭhamaṃ gāthamāha. Tattha apāyesīti pāyesi. A-kāro nipātamattaṃ. Gammanīti gimhe. Sampareteti gimhātapena phuṭṭhe anugate.
அபரஸ்மிம்பி ஸமயே தாபஸோ க³ங்கா³தீரே பண்ணஸாலங் மாபெத்வா அரஞ்ஞகா³மகங் நிஸ்ஸாய வஸதி. தேன ச ஸமயேன சோரா தங் கா³மங் பஹரித்வா ஹத்த²ஸாரங் க³ஹெத்வா கா³வியோ ச கரமரே ச க³ஹெத்வா க³ச்ச²ந்தி. கா³வோபி ஸுனகா²பி மனுஸ்ஸாபி மஹாவிரவங் விரவந்தி. தாபஸோ தங் ஸத்³த³ங் ஸுத்வா ‘‘கின்னு கோ² ஏத’’ந்தி? ஆவஜ்ஜெந்தோ ‘‘மனுஸ்ஸானங் ப⁴யங் உப்பன்ன’’ந்தி ஞத்வா ‘‘மயி பஸ்ஸந்தே இமே ஸத்தா மா நஸ்ஸந்தூ’’தி அபி⁴ஞ்ஞாபாத³கஜ்ஜா²னங் ஸமாபஜ்ஜித்வா வுட்டா²ய அபி⁴ஞ்ஞாசித்தேன சோரானங் படிபதே² சதுரங்கி³னிங் ஸேனங் மாபேஸி. கம்மஸஜ்ஜா ஆக³ச்ச²ந்தா சோரா தி³ஸ்வா, ‘‘ராஜா மஞ்ஞே ஆக³தோ’’தி விலோபங் ச²ட்³டெ³த்வா பக்கமிங்ஸு. தாபஸோ ‘‘யங் யஸ்ஸ ஸந்தகங், தங் தஸ்ஸேவ ஹோதூ’’தி அதி⁴ட்டா²ஸி, தங் ததே²வ அஹோஸி. மஹாஜனோ ஸொத்தி²பா⁴வங் பாபுணி. ஸத்தா² இத³ம்பி தஸ்ஸ புப்³ப³கம்மங் த³ஸ்ஸெந்தோ து³தியங் கா³த²மாஹ. தத்த² ஏணிகூலஸ்மிந்தி க³ங்கா³தீரே. க³ய்ஹகங் நீயமானந்தி க³ஹெத்வா நீயமானங், கரமரங் நீயமானந்திபி அத்தோ².
Aparasmimpi samaye tāpaso gaṅgātīre paṇṇasālaṃ māpetvā araññagāmakaṃ nissāya vasati. Tena ca samayena corā taṃ gāmaṃ paharitvā hatthasāraṃ gahetvā gāviyo ca karamare ca gahetvā gacchanti. Gāvopi sunakhāpi manussāpi mahāviravaṃ viravanti. Tāpaso taṃ saddaṃ sutvā ‘‘kinnu kho eta’’nti? Āvajjento ‘‘manussānaṃ bhayaṃ uppanna’’nti ñatvā ‘‘mayi passante ime sattā mā nassantū’’ti abhiññāpādakajjhānaṃ samāpajjitvā vuṭṭhāya abhiññācittena corānaṃ paṭipathe caturaṅginiṃ senaṃ māpesi. Kammasajjā āgacchantā corā disvā, ‘‘rājā maññe āgato’’ti vilopaṃ chaḍḍetvā pakkamiṃsu. Tāpaso ‘‘yaṃ yassa santakaṃ, taṃ tasseva hotū’’ti adhiṭṭhāsi, taṃ tatheva ahosi. Mahājano sotthibhāvaṃ pāpuṇi. Satthā idampi tassa pubbakammaṃ dassento dutiyaṃ gāthamāha. Tattha eṇikūlasminti gaṅgātīre. Gayhakaṃ nīyamānanti gahetvā nīyamānaṃ, karamaraṃ nīyamānantipi attho.
புன ஏகஸ்மிங் ஸமயே உபரிக³ங்கா³வாஸிகங் ஏகங் குலங் ஹெட்டா²க³ங்கா³வாஸிகேன குலேன ஸத்³தி⁴ங் மித்தஸந்த²வங் கத்வா, நாவாஸங்கா⁴டங் ப³ந்தி⁴த்வா, ப³ஹுங் கா²த³னீயஞ்சேவ போ⁴ஜனீயஞ்ச க³ந்த⁴மாலாதீ³னி ச ஆரோபெத்வா க³ங்கா³ஸோதேன ஆக³ச்ச²தி. மனுஸ்ஸா கா²த³மானா பு⁴ஞ்ஜமானா நச்சந்தா கா³யந்தா தே³வவிமானேன க³ச்ச²ந்தா விய ப³லவஸோமனஸ்ஸா அஹேஸுங். க³ங்கெ³ய்யகோ நாகோ³ தி³ஸ்வா குபிதோ ‘‘இமே மயி ஸஞ்ஞம்பி ந கரொந்தி. இதா³னி நே ஸமுத்³த³மேவ பாபெஸ்ஸாமீ’’தி மஹந்தங் அத்தபா⁴வங் மாபெத்வா உத³கங் த்³விதா⁴ பி⁴ந்தி³த்வா உட்டா²ய ப²ணங் கத்வா, ஸுஸுகாரங் கரொந்தோ அட்டா²ஸி. மஹாஜனோ தி³ஸ்வா பீ⁴தோ விஸ்ஸரமகாஸி. தாபஸோ பண்ணஸாலாயங் நிஸின்னோ ஸுத்வா, ‘‘இமே கா³யந்தா நச்சந்தா ஸோமனஸ்ஸஜாதா ஆக³ச்ச²ந்தி. இதா³னி பன ப⁴யரவங் ரவிங்ஸு, கின்னு கோ²’’தி? ஆவஜ்ஜெந்தோ நாக³ராஜங் தி³ஸ்வா, ‘‘மயி பஸ்ஸந்தே ஸத்தா மா நஸ்ஸந்தூ’’தி அபி⁴ஞ்ஞாபாத³கஜ்ஜா²னங் ஸமாபஜ்ஜித்வா அத்தபா⁴வங் பஜஹித்வா ஸுபண்ணவண்ணங் மாபெத்வா நாக³ராஜஸ்ஸ த³ஸ்ஸேஸி. நாக³ராஜா பீ⁴தோ ப²ணங் ஸங்ஹரித்வா உத³கங் பவிட்டோ², மஹாஜனோ ஸொத்தி²பா⁴வங் பாபுணி. ஸத்தா² இத³ம்பி தஸ்ஸ புப்³ப³கம்மங் த³ஸ்ஸெந்தோ ததியங் கா³த²மாஹ. தத்த² லுத்³தே³னாதி தா³ருணேன. மனுஸ்ஸகம்யாதி மனுஸ்ஸகாமதாய, மனுஸ்ஸே விஹேடே²துகாமதாயாதி அத்தோ².
Puna ekasmiṃ samaye uparigaṅgāvāsikaṃ ekaṃ kulaṃ heṭṭhāgaṅgāvāsikena kulena saddhiṃ mittasanthavaṃ katvā, nāvāsaṅghāṭaṃ bandhitvā, bahuṃ khādanīyañceva bhojanīyañca gandhamālādīni ca āropetvā gaṅgāsotena āgacchati. Manussā khādamānā bhuñjamānā naccantā gāyantā devavimānena gacchantā viya balavasomanassā ahesuṃ. Gaṅgeyyako nāgo disvā kupito ‘‘ime mayi saññampi na karonti. Idāni ne samuddameva pāpessāmī’’ti mahantaṃ attabhāvaṃ māpetvā udakaṃ dvidhā bhinditvā uṭṭhāya phaṇaṃ katvā, susukāraṃ karonto aṭṭhāsi. Mahājano disvā bhīto vissaramakāsi. Tāpaso paṇṇasālāyaṃ nisinno sutvā, ‘‘ime gāyantā naccantā somanassajātā āgacchanti. Idāni pana bhayaravaṃ raviṃsu, kinnu kho’’ti? Āvajjento nāgarājaṃ disvā, ‘‘mayi passante sattā mā nassantū’’ti abhiññāpādakajjhānaṃ samāpajjitvā attabhāvaṃ pajahitvā supaṇṇavaṇṇaṃ māpetvā nāgarājassa dassesi. Nāgarājā bhīto phaṇaṃ saṃharitvā udakaṃ paviṭṭho, mahājano sotthibhāvaṃ pāpuṇi. Satthā idampi tassa pubbakammaṃ dassento tatiyaṃ gāthamāha. Tattha luddenāti dāruṇena. Manussakamyāti manussakāmatāya, manusse viheṭhetukāmatāyāti attho.
அபரஸ்மிம்பி ஸமயே ஏஸ இஸிபப்³ப³ஜ்ஜங் பப்³ப³ஜித்வா கேஸவோ நாம தாபஸோ அஹோஸி. தேன ஸமயேன அம்ஹாகங் போ³தி⁴ஸத்தோ கப்போ நாம மாணவோ கேஸவஸ்ஸ ப³த்³த⁴சரோ அந்தேவாஸிகோ ஹுத்வா ஆசரியஸ்ஸ கிங்காரபடிஸ்ஸாவீ மனாபசாரீ பு³த்³தி⁴ஸம்பன்னோ அத்த²சரோ அஹோஸி. கேஸவோ தேன வினா வஸிதுங் ந ஸக்கோதி, தங் நிஸ்ஸாயேவ ஜீவிகங் கப்பேஸி. ஸத்தா² இத³ம்பி தஸ்ஸ புப்³ப³கம்மங் த³ஸ்ஸெந்தோ சதுத்த²ங் கா³த²மாஹ.
Aparasmimpi samaye esa isipabbajjaṃ pabbajitvā kesavo nāma tāpaso ahosi. Tena samayena amhākaṃ bodhisatto kappo nāma māṇavo kesavassa baddhacaro antevāsiko hutvā ācariyassa kiṃkārapaṭissāvī manāpacārī buddhisampanno atthacaro ahosi. Kesavo tena vinā vasituṃ na sakkoti, taṃ nissāyeva jīvikaṃ kappesi. Satthā idampi tassa pubbakammaṃ dassento catutthaṃ gāthamāha.
தத்த² ப³த்³த⁴சரோதி அந்தேவாஸிகோ, ஸோ பன ஜெட்ட²ந்தேவாஸிகோ அஹோஸி. ஸம்பு³த்³தி⁴மந்தங் வதினங் அமஞ்ஞீதி, ‘‘ஸம்மா பு³த்³தி⁴மா வதஸம்பன்னோ அய’’ந்தி ஏவங் மஞ்ஞமானோ கப்போ தவ அந்தேவாஸிகோ அஹோஸிங் அஹங் ஸோ தேன ஸமயேனாதி த³ஸ்ஸேதி. அஞ்ஞேபி ஜானாஸீதி ந கேவலங் மய்ஹங் ஆயுமேவ, அஞ்ஞேபி த்வங் ஜானாஸியேவ. ததா² ஹி பு³த்³தோ⁴தி ததா² ஹி த்வங் பு³த்³தோ⁴, யஸ்மா பு³த்³தோ⁴, தஸ்மா ஜானாஸீதி அத்தோ². ததா² ஹி த்யாயங் ஜலிதானுபா⁴வோதி யஸ்மா ச த்வங் பு³த்³தோ⁴, தஸ்மா தே அயங் ஜலிதோ ஆனுபா⁴வோ. ஓபா⁴ஸயங் திட்ட²தீதி ஸப்³ப³ங் ப்³ரஹ்மலோகங் ஓபா⁴ஸயந்தோ திட்ட²தி. சதுத்த²ங்.
Tattha baddhacaroti antevāsiko, so pana jeṭṭhantevāsiko ahosi. Sambuddhimantaṃ vatinaṃ amaññīti, ‘‘sammā buddhimā vatasampanno aya’’nti evaṃ maññamāno kappo tava antevāsiko ahosiṃ ahaṃ so tena samayenāti dasseti. Aññepi jānāsīti na kevalaṃ mayhaṃ āyumeva, aññepi tvaṃ jānāsiyeva. Tathā hi buddhoti tathā hi tvaṃ buddho, yasmā buddho, tasmā jānāsīti attho. Tathā hi tyāyaṃ jalitānubhāvoti yasmā ca tvaṃ buddho, tasmā te ayaṃ jalito ānubhāvo. Obhāsayaṃ tiṭṭhatīti sabbaṃ brahmalokaṃ obhāsayanto tiṭṭhati. Catutthaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. ப³கப்³ரஹ்மஸுத்தங் • 4. Bakabrahmasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. ப³கப்³ரஹ்மஸுத்தவண்ணனா • 4. Bakabrahmasuttavaṇṇanā
