Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ • Majjhimanikāya

    ༤. བཱཀུལསུཏྟཾ

    4. Bākulasuttaṃ

    ༢༠༩. ཨེཝཾ མེ སུཏཾ – ཨེཀཾ སམཡཾ ཨཱཡསྨཱ བཱཀུལོ 1 རཱཛགཧེ ཝིཧརཏི ཝེལུ༹ཝནེ ཀལནྡཀནིཝཱཔེ། ཨཐ ཁོ ཨཙེལཀསྶཔོ ཨཱཡསྨཏོ བཱཀུལསྶ པུརཱཎགིཧིསཧཱཡོ ཡེནཱཡསྨཱ བཱཀུལོ ཏེནུཔསངྐམི; ཨུཔསངྐམིཏྭཱ ཨཱཡསྨཏཱ བཱཀུལེན སདྡྷིཾ སམྨོདི། སམྨོདནཱིཡཾ ཀཐཾ སཱརཎཱིཡཾ ཝཱིཏིསཱརེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཨཙེལཀསྶཔོ ཨཱཡསྨནྟཾ བཱཀུལཾ ཨེཏདཝོཙ –

    209. Evaṃ me sutaṃ – ekaṃ samayaṃ āyasmā bākulo 2 rājagahe viharati veḷuvane kalandakanivāpe. Atha kho acelakassapo āyasmato bākulassa purāṇagihisahāyo yenāyasmā bākulo tenupasaṅkami; upasaṅkamitvā āyasmatā bākulena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho acelakassapo āyasmantaṃ bākulaṃ etadavoca –

    ‘‘ཀཱིཝཙིརཾ པབྦཛིཏོསི, ཨཱཝུསོ བཱཀུལཱ’’ཏི? ‘‘ཨསཱིཏི མེ, ཨཱཝུསོ, ཝསྶཱནི པབྦཛིཏསྶཱ’’ཏི། ‘‘ཨིམེཧི པན ཏེ, ཨཱཝུསོ བཱཀུལ, ཨསཱིཏིཡཱ ཝསྶེཧི ཀཏིཀྑཏྟུཾ མེཐུནོ དྷམྨོ པཊིསེཝིཏོ’’ཏི? ‘‘ན ཁོ མཾ, ཨཱཝུསོ ཀསྶཔ, ཨེཝཾ པུཙྪིཏབྦཾ – ‘ཨིམེཧི པན ཏེ, ཨཱཝུསོ བཱཀུལ, ཨསཱིཏིཡཱ ཝསྶེཧི ཀཏིཀྑཏྟུཾ མེཐུནོ དྷམྨོ པཊིསེཝིཏོ’ཏི། ཨེཝཉྩ ཁོ མཾ, ཨཱཝུསོ ཀསྶཔ, པུཙྪིཏབྦཾ – ‘ཨིམེཧི པན ཏེ, ཨཱཝུསོ བཱཀུལ, ཨསཱིཏིཡཱ ཝསྶེཧི ཀཏིཀྑཏྟུཾ ཀཱམསཉྙཱ ཨུཔྤནྣཔུབྦཱ’’’ཏི? ( ) 3

    ‘‘Kīvaciraṃ pabbajitosi, āvuso bākulā’’ti? ‘‘Asīti me, āvuso, vassāni pabbajitassā’’ti. ‘‘Imehi pana te, āvuso bākula, asītiyā vassehi katikkhattuṃ methuno dhammo paṭisevito’’ti? ‘‘Na kho maṃ, āvuso kassapa, evaṃ pucchitabbaṃ – ‘imehi pana te, āvuso bākula, asītiyā vassehi katikkhattuṃ methuno dhammo paṭisevito’ti. Evañca kho maṃ, āvuso kassapa, pucchitabbaṃ – ‘imehi pana te, āvuso bākula, asītiyā vassehi katikkhattuṃ kāmasaññā uppannapubbā’’’ti? ( ) 4

    ༢༡༠. ‘‘ཨསཱིཏི མེ, ཨཱཝུསོ , ཝསྶཱནི པབྦཛིཏསྶ ནཱབྷིཛཱནཱམི ཀཱམསཉྙཾ ཨུཔྤནྣཔུབྦཾ། ཡཾཔཱཡསྨཱ བཱཀུལོ ཨསཱིཏིཡཱ ཝསྶེཧི ནཱབྷིཛཱནཱཏི ཀཱམསཉྙཾ ཨུཔྤནྣཔུབྦཾ ཨིདམྤི མཡཾ ཨཱཡསྨཏོ བཱཀུལསྶ ཨཙྪརིཡཾ ཨབྦྷུཏདྷམྨཾ དྷཱརེམ།

    210. ‘‘Asīti me, āvuso , vassāni pabbajitassa nābhijānāmi kāmasaññaṃ uppannapubbaṃ. Yaṃpāyasmā bākulo asītiyā vassehi nābhijānāti kāmasaññaṃ uppannapubbaṃ idampi mayaṃ āyasmato bākulassa acchariyaṃ abbhutadhammaṃ dhārema.

    ‘‘ཨསཱིཏི མེ, ཨཱཝུསོ, ཝསྶཱནི པབྦཛིཏསྶ ནཱབྷིཛཱནཱམི བྱཱཔཱདསཉྙཾ…པེ॰… ཝིཧིཾསཱསཉྙཾ ཨུཔྤནྣཔུབྦཾ། ཡཾཔཱཡསྨཱ བཱཀུལོ ཨསཱིཏིཡཱ ཝསྶེཧི ནཱབྷིཛཱནཱཏི ཝིཧིཾསཱསཉྙཾ ཨུཔྤནྣཔུབྦཾ, ཨིདམྤི མཡཾ ཨཱཡསྨཏོ བཱཀུལསྶ ཨཙྪརིཡཾ ཨབྦྷུཏདྷམྨཾ དྷཱརེམ།

    ‘‘Asīti me, āvuso, vassāni pabbajitassa nābhijānāmi byāpādasaññaṃ…pe… vihiṃsāsaññaṃ uppannapubbaṃ. Yaṃpāyasmā bākulo asītiyā vassehi nābhijānāti vihiṃsāsaññaṃ uppannapubbaṃ, idampi mayaṃ āyasmato bākulassa acchariyaṃ abbhutadhammaṃ dhārema.

    ‘‘ཨསཱིཏི མེ, ཨཱཝུསོ, ཝསྶཱནི པབྦཛིཏསྶ ནཱབྷིཛཱནཱམི ཀཱམཝིཏཀྐཾ ཨུཔྤནྣཔུབྦཾ། ཡཾཔཱཡསྨཱ བཱཀུལོ ཨསཱིཏིཡཱ ཝསྶེཧི ནཱབྷིཛཱནཱཏི ཀཱམཝིཏཀྐཾ ཨུཔྤནྣཔུབྦཾ, ཨིདམྤི མཡཾ ཨཱཡསྨཏོ བཱཀུལསྶ ཨཙྪརིཡཾ ཨབྦྷུཏདྷམྨཾ དྷཱརེམ།

    ‘‘Asīti me, āvuso, vassāni pabbajitassa nābhijānāmi kāmavitakkaṃ uppannapubbaṃ. Yaṃpāyasmā bākulo asītiyā vassehi nābhijānāti kāmavitakkaṃ uppannapubbaṃ, idampi mayaṃ āyasmato bākulassa acchariyaṃ abbhutadhammaṃ dhārema.

    ‘‘ཨསཱིཏི མེ, ཨཱཝུསོ, ཝསྶཱནི པབྦཛིཏསྶ ནཱབྷིཛཱནཱམི བྱཱཔཱདཝིཏཀྐཾ…པེ॰… ཝིཧིཾསཱཝིཏཀྐཾ ཨུཔྤནྣཔུབྦཾ། ཡཾཔཱཡསྨཱ བཱཀུལོ ཨསཱིཏིཡཱ ཝསྶེཧི ནཱབྷིཛཱནཱཏི ཝིཧིཾསཱཝིཏཀྐཾ ཨུཔྤནྣཔུབྦཾ, ཨིདམྤི མཡཾ ཨཱཡསྨཏོ བཱཀུལསྶ ཨཙྪརིཡཾ ཨབྦྷུཏདྷམྨཾ དྷཱརེམ།

    ‘‘Asīti me, āvuso, vassāni pabbajitassa nābhijānāmi byāpādavitakkaṃ…pe… vihiṃsāvitakkaṃ uppannapubbaṃ. Yaṃpāyasmā bākulo asītiyā vassehi nābhijānāti vihiṃsāvitakkaṃ uppannapubbaṃ, idampi mayaṃ āyasmato bākulassa acchariyaṃ abbhutadhammaṃ dhārema.

    ༢༡༡. ‘‘ཨསཱིཏི མེ, ཨཱཝུསོ, ཝསྶཱནི པབྦཛིཏསྶ ནཱབྷིཛཱནཱམི གཧཔཏིཙཱིཝརཾ སཱདིཏཱ། ཡཾཔཱཡསྨཱ བཱཀུལོ ཨསཱིཏིཡཱ ཝསྶེཧི ནཱབྷིཛཱནཱཏི གཧཔཏིཙཱིཝརཾ སཱདིཏཱ, ཨིདམྤི མཡཾ ཨཱཡསྨཏོ བཱཀུལསྶ ཨཙྪརིཡཾ ཨབྦྷུཏདྷམྨཾ དྷཱརེམ།

    211. ‘‘Asīti me, āvuso, vassāni pabbajitassa nābhijānāmi gahapaticīvaraṃ sāditā. Yaṃpāyasmā bākulo asītiyā vassehi nābhijānāti gahapaticīvaraṃ sāditā, idampi mayaṃ āyasmato bākulassa acchariyaṃ abbhutadhammaṃ dhārema.

    ‘‘ཨསཱིཏི མེ, ཨཱཝུསོ, ཝསྶཱནི པབྦཛིཏསྶ ནཱབྷིཛཱནཱམི སཏྠེན ཙཱིཝརཾ ཚིནྡིཏཱ། ཡཾཔཱཡསྨཱ བཱཀུལོ ཨསཱིཏིཡཱ ཝསྶེཧི ནཱབྷིཛཱནཱཏི སཏྠེན ཙཱིཝརཾ ཚིནྡིཏཱ…པེ॰… དྷཱརེམ།

    ‘‘Asīti me, āvuso, vassāni pabbajitassa nābhijānāmi satthena cīvaraṃ chinditā. Yaṃpāyasmā bākulo asītiyā vassehi nābhijānāti satthena cīvaraṃ chinditā…pe… dhārema.

    ‘‘ཨསཱིཏི མེ, ཨཱཝུསོ, ཝསྶཱནི པབྦཛིཏསྶ ནཱབྷིཛཱནཱམི སཱུཙིཡཱ ཙཱིཝརཾ སིབྦིཏཱ…པེ॰… ནཱབྷིཛཱནཱམི རཛནེན ཙཱིཝརཾ རཛིཏཱ… ནཱབྷིཛཱནཱམི ཀཐིནེ 5 ཙཱིཝརཾ སིབྦིཏཱ… ནཱབྷིཛཱནཱམི སབྲཧྨཙཱརཱིནཾ ཙཱིཝརཀམྨེ ཝིཙཱརིཏཱ 6 … ནཱབྷིཛཱནཱམི ནིམནྟནཾ སཱདིཏཱ… ནཱབྷིཛཱནཱམི ཨེཝརཱུཔཾ ཙིཏྟཾ ཨུཔྤནྣཔུབྦཾ – ‘ཨཧོ ཝཏ མཾ ཀོཙི ནིམནྟེཡྻཱ’ཏི… ནཱབྷིཛཱནཱམི ཨནྟརགྷརེ ནིསཱིདིཏཱ… ནཱབྷིཛཱནཱམི ཨནྟརགྷརེ བྷུཉྫིཏཱ… ནཱབྷིཛཱནཱམི མཱཏུགཱམསྶ ཨནུབྱཉྫནསོ ནིམིཏྟཾ གཧེཏཱ… ནཱབྷིཛཱནཱམི མཱཏུགཱམསྶ དྷམྨཾ དེསིཏཱ ཨནྟམསོ ཙཏུཔྤདམྤི གཱཐཾ… ནཱབྷིཛཱནཱམི བྷིཀྑུནུཔསྶཡཾ ཨུཔསངྐམིཏཱ… ནཱབྷིཛཱནཱམི བྷིཀྑུནིཡཱ དྷམྨཾ དེསིཏཱ… ནཱབྷིཛཱནཱམི སིཀྑམཱནཱཡ དྷམྨཾ དེསིཏཱ… ནཱབྷིཛཱནཱམི སཱམཎེརིཡཱ དྷམྨཾ དེསིཏཱ… ནཱབྷིཛཱནཱམི པབྦཱཛེཏཱ… ནཱབྷིཛཱནཱམི ཨུཔསམྤཱདེཏཱ… ནཱབྷིཛཱནཱམི ནིསྶཡཾ དཱཏཱ… ནཱབྷིཛཱནཱམི སཱམཎེརཾ ཨུཔཊྛཱཔེཏཱ… ནཱབྷིཛཱནཱམི ཛནྟཱགྷརེ ནྷཱཡིཏཱ… ནཱབྷིཛཱནཱམི ཙུཎྞེན ནྷཱཡིཏཱ… ནཱབྷིཛཱནཱམི སབྲཧྨཙཱརཱིགཏྟཔརིཀམྨེ ཝིཙཱརིཏཱ 7 … ནཱབྷིཛཱནཱམི ཨཱབཱདྷཾ ཨུཔྤནྣཔུབྦཾ, ཨནྟམསོ གདྡཱུཧནམཏྟམྤི… ནཱབྷིཛཱནཱམི བྷེསཛྫཾ ཨུཔཧརིཏཱ, ཨནྟམསོ ཧརིཏཀིཁཎྜམྤི… ནཱབྷིཛཱནཱམི ཨཔསྶེནཀཾ ཨཔསྶཡིཏཱ… ནཱབྷིཛཱནཱམི སེཡྻཾ ཀཔྤེཏཱ། ཡཾཔཱཡསྨཱ…པེ॰… དྷཱརེམ།

    ‘‘Asīti me, āvuso, vassāni pabbajitassa nābhijānāmi sūciyā cīvaraṃ sibbitā…pe… nābhijānāmi rajanena cīvaraṃ rajitā… nābhijānāmi kathine 8 cīvaraṃ sibbitā… nābhijānāmi sabrahmacārīnaṃ cīvarakamme vicāritā 9 … nābhijānāmi nimantanaṃ sāditā… nābhijānāmi evarūpaṃ cittaṃ uppannapubbaṃ – ‘aho vata maṃ koci nimanteyyā’ti… nābhijānāmi antaraghare nisīditā… nābhijānāmi antaraghare bhuñjitā… nābhijānāmi mātugāmassa anubyañjanaso nimittaṃ gahetā… nābhijānāmi mātugāmassa dhammaṃ desitā antamaso catuppadampi gāthaṃ… nābhijānāmi bhikkhunupassayaṃ upasaṅkamitā… nābhijānāmi bhikkhuniyā dhammaṃ desitā… nābhijānāmi sikkhamānāya dhammaṃ desitā… nābhijānāmi sāmaṇeriyā dhammaṃ desitā… nābhijānāmi pabbājetā… nābhijānāmi upasampādetā… nābhijānāmi nissayaṃ dātā… nābhijānāmi sāmaṇeraṃ upaṭṭhāpetā… nābhijānāmi jantāghare nhāyitā… nābhijānāmi cuṇṇena nhāyitā… nābhijānāmi sabrahmacārīgattaparikamme vicāritā 10 … nābhijānāmi ābādhaṃ uppannapubbaṃ, antamaso gaddūhanamattampi… nābhijānāmi bhesajjaṃ upaharitā, antamaso haritakikhaṇḍampi… nābhijānāmi apassenakaṃ apassayitā… nābhijānāmi seyyaṃ kappetā. Yaṃpāyasmā…pe… dhārema.

    ‘‘ཨསཱིཏི མེ, ཨཱཝུསོ, ཝསྶཱནི པབྦཛིཏསྶ ནཱབྷིཛཱནཱམི གཱམནྟསེནཱསནེ ཝསྶཾ ཨུཔགནྟཱ ། ཡཾཔཱཡསྨཱ བཱཀུལོ ཨསཱིཏིཡཱ ཝསྶེཧི ནཱབྷིཛཱནཱཏི གཱམནྟསེནཱསནེ ཝསྶཾ ཨུཔགནྟཱ, ཨིདམྤི མཡཾ ཨཱཡསྨཏོ བཱཀུལསྶ ཨཙྪརིཡཾ ཨབྦྷུཏདྷམྨཾ དྷཱརེམ།

    ‘‘Asīti me, āvuso, vassāni pabbajitassa nābhijānāmi gāmantasenāsane vassaṃ upagantā . Yaṃpāyasmā bākulo asītiyā vassehi nābhijānāti gāmantasenāsane vassaṃ upagantā, idampi mayaṃ āyasmato bākulassa acchariyaṃ abbhutadhammaṃ dhārema.

    ‘‘སཏྟཱཧམེཝ ཁོ ཨཧཾ, ཨཱཝུསོ, སརཎོ རཊྛཔིཎྜཾ བྷུཉྫིཾ; ཨཐ ཨཊྛམིཡཾ ཨཉྙཱ ཨུདཔཱདི། ཡཾཔཱཡསྨཱ བཱཀུལོ སཏྟཱཧམེཝ སརཎོ རཊྛཔིཎྜཾ བྷུཉྫི; ཨཐ ཨཊྛམིཡཾ ཨཉྙཱ ཨུདཔཱདི ཨིདམྤི མཡཾ ཨཱཡསྨཏོ བཱཀུལསྶ ཨཙྪརིཡཾ ཨབྦྷུཏདྷམྨཾ དྷཱརེམ།

    ‘‘Sattāhameva kho ahaṃ, āvuso, saraṇo raṭṭhapiṇḍaṃ bhuñjiṃ; atha aṭṭhamiyaṃ aññā udapādi. Yaṃpāyasmā bākulo sattāhameva saraṇo raṭṭhapiṇḍaṃ bhuñji; atha aṭṭhamiyaṃ aññā udapādi idampi mayaṃ āyasmato bākulassa acchariyaṃ abbhutadhammaṃ dhārema.

    ༢༡༢. ‘‘ལབྷེཡྻཱཧཾ, ཨཱཝུསོ བཱཀུལ, ཨིམསྨིཾ དྷམྨཝིནཡེ པབྦཛྫཾ, ལབྷེཡྻཾ ཨུཔསམྤད’’ནྟི། ཨལཏྠ ཁོ ཨཙེལཀསྶཔོ ཨིམསྨིཾ དྷམྨཝིནཡེ པབྦཛྫཾ, ཨལཏྠ ཨུཔསམྤདཾ། ཨཙིརཱུཔསམྤནྣོ པནཱཡསྨཱ ཀསྶཔོ ཨེཀོ ཝཱུཔཀཊྛོ ཨཔྤམཏྟོ ཨཱཏཱཔཱི པཧིཏཏྟོ ཝིཧརནྟོ ནཙིརསྶེཝ – ཡསྶཏྠཱཡ ཀུལཔུཏྟཱ སམྨདེཝ ཨགཱརསྨཱ ཨནགཱརིཡཾ པབྦཛནྟི ཏདནུཏྟརཾ – བྲཧྨཙརིཡཔརིཡོསཱནཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧཱསི། ‘ཁཱིཎཱ ཛཱཏི, ཝུསིཏཾ བྲཧྨཙརིཡཾ, ཀཏཾ ཀརཎཱིཡཾ, ནཱཔརཾ ཨིཏྠཏྟཱཡཱ’ཏི ཨབྦྷཉྙཱསི། ཨཉྙཏརོ ཁོ པནཱཡསྨཱ ཀསྶཔོ ཨརཧཏཾ ཨཧོསི།

    212. ‘‘Labheyyāhaṃ, āvuso bākula, imasmiṃ dhammavinaye pabbajjaṃ, labheyyaṃ upasampada’’nti. Alattha kho acelakassapo imasmiṃ dhammavinaye pabbajjaṃ, alattha upasampadaṃ. Acirūpasampanno panāyasmā kassapo eko vūpakaṭṭho appamatto ātāpī pahitatto viharanto nacirasseva – yassatthāya kulaputtā sammadeva agārasmā anagāriyaṃ pabbajanti tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihāsi. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti abbhaññāsi. Aññataro kho panāyasmā kassapo arahataṃ ahosi.

    ཨཐ ཁོ ཨཱཡསྨཱ བཱཀུལོ ཨཔརེན སམཡེན ཨཝཱཔུརཎཾ 11 ཨཱདཱཡ ཝིཧཱརེན ཝིཧཱརཾ ཨུཔསངྐམིཏྭཱ ཨེཝམཱཧ – ‘‘ཨབྷིཀྐམཐཱཡསྨནྟོ, ཨབྷིཀྐམཐཱཡསྨནྟོ། ཨཛྫ མེ པརིནིབྦཱནཾ བྷཝིསྶཏཱི’’ཏི། ‘‘ཡཾཔཱཡསྨཱ བཱཀུལོ ཨཝཱཔུརཎཾ ཨཱདཱཡ ཝིཧཱརེན ཝིཧཱརཾ ཨུཔསངྐམིཏྭཱ ཨེཝམཱཧ – ‘ཨབྷིཀྐམཐཱཡསྨནྟོ, ཨབྷིཀྐམཐཱཡསྨནྟོ; ཨཛྫ མེ པརིནིབྦཱནཾ བྷཝིསྶཏཱི’ཏི, ཨིདམྤི མཡཾ ཨཱཡསྨཏོ བཱཀུལསྶ ཨཙྪརིཡཾ ཨབྦྷུཏདྷམྨཾ དྷཱརེམ’’།

    Atha kho āyasmā bākulo aparena samayena avāpuraṇaṃ 12 ādāya vihārena vihāraṃ upasaṅkamitvā evamāha – ‘‘abhikkamathāyasmanto, abhikkamathāyasmanto. Ajja me parinibbānaṃ bhavissatī’’ti. ‘‘Yaṃpāyasmā bākulo avāpuraṇaṃ ādāya vihārena vihāraṃ upasaṅkamitvā evamāha – ‘abhikkamathāyasmanto, abhikkamathāyasmanto; ajja me parinibbānaṃ bhavissatī’ti, idampi mayaṃ āyasmato bākulassa acchariyaṃ abbhutadhammaṃ dhārema’’.

    ཨཱཡསྨཱ བཱཀུལོ མཛ྄ཛྷེ བྷིཀྑུསངྒྷསྶ ནིསིནྣཀོཝ པརིནིབྦཱཡི། ‘‘ཡཾཔཱཡསྨཱ བཱཀུལོ མཛ྄ཛྷེ བྷིཀྑུསངྒྷསྶ ནིསིནྣཀོཝ པརིནིབྦཱཡི, ཨིདམྤི མཡཾ ཨཱཡསྨཏོ བཱཀུལསྶ ཨཙྪརིཡཾ ཨབྦྷུཏདྷམྨཾ དྷཱརེམཱ’’ཏི།

    Āyasmā bākulo majjhe bhikkhusaṅghassa nisinnakova parinibbāyi. ‘‘Yaṃpāyasmā bākulo majjhe bhikkhusaṅghassa nisinnakova parinibbāyi, idampi mayaṃ āyasmato bākulassa acchariyaṃ abbhutadhammaṃ dhāremā’’ti.

    བཱཀུལསུཏྟཾ ནིཊྛིཏཾ ཙཏུཏྠཾ།

    Bākulasuttaṃ niṭṭhitaṃ catutthaṃ.




    Next: ༥. དནྟབྷཱུམིསུཏྟཾ • 5. Dantabhūmisuttaṃ




    Footnotes:
    1. བཀྐུལོ (སཱི॰ སྱཱ॰ ཀཾ॰ པཱི॰)
    2. bakkulo (sī. syā. kaṃ. pī.)
    3. (ཨིམེཧི པན ཏེ ཨཱཝུསོ བཀྐུལ ཨསཱིཏིཡོ ཝསྶེཧི ཀཏིཀྑཏྟུཾ ཀཱམསཉྙཱ ཨུཔྤནྣཔུབྦཱཏི།) (སཱི॰ པཱི॰)
    4. (imehi pana te āvuso bakkula asītiyo vassehi katikkhattuṃ kāmasaññā uppannapubbāti.) (sī. pī.)
    5. ཀཋིནེ (སཱི॰ སྱཱ॰ ཀཾ॰ པཱི॰)
    6. སབྲཧྨཙཱརཱི ཙཱིཝརཀམྨེ བྱཱཔཱརིཏཱ (སཱི॰ པཱི॰)
    7. བྱཱཔཱརིཏཱ (སཱི॰ པཱི॰)
    8. kaṭhine (sī. syā. kaṃ. pī.)
    9. sabrahmacārī cīvarakamme byāpāritā (sī. pī.)
    10. byāpāritā (sī. pī.)
    11. ཨཔཱཔུརཎཾ (སཱི॰ སྱཱ॰ ཀཾ॰ པཱི॰)
    12. apāpuraṇaṃ (sī. syā. kaṃ. pī.)



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༤. བཱཀུལསུཏྟཝཎྞནཱ • 4. Bākulasuttavaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༤. བཱཀུལསུཏྟཝཎྞནཱ • 4. Bākulasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact