| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
4. பா³குலஸுத்தவண்ணனா
4. Bākulasuttavaṇṇanā
209. யதா² ‘‘த்³வத்திங்ஸா’’தி வத்தப்³பே³ த்³வி-ஸத்³த³ஸ்ஸ பா³-ஆதே³ஸங் கத்வா பா³த்திங்ஸாதி வுச்சதி, ஏவங் எத்த² பா³-காராதே³ஸங் கத்வா பா³குலோதி ஸமஞ்ஞா அஹோஸி, ஸாயங் தஸ்ஸ அன்வத்த²ஸஞ்ஞாதி த³ஸ்ஸேதுங், ‘‘தஸ்ஸ ஹீ’’திஆதி³ வுத்தங். ஸீஸங் ந்ஹாபெத்வாதி மங்க³லத்த²ங் மஹாக³ங்கா³ய ஸீஸங் ந்ஹாபெத்வா. நிமுஜ்ஜனவஸேனாதி ஜண்ணுபமாணே உத³கே தோ²கங்யேவ நிமுஜ்ஜனவஸேன. ச²ட்³டெ³த்வா பலாதா மரணப⁴யதஜ்ஜிதா. பஹரியமானா மரந்தி, ந ஜாலேன ப³ந்தி⁴தமத்தேன. தா³ரகஸ்ஸ தேஜேனாதி தா³ரகஸ்ஸ புஞ்ஞதேஜேன. நீஹடமத்தோவ மதோ, தஸ்ஸ மரணத்த²ங் உபக்கமோ ந கதோ, யேன உபக்கமேன தா³ரகஸ்ஸ பா³தோ⁴ ஸியா. தந்தி மச்ச²ங். ஸகலமேவாதி பரிபுண்ணாவயவமேவ.
209. Yathā ‘‘dvattiṃsā’’ti vattabbe dvi-saddassa bā-ādesaṃ katvā bāttiṃsāti vuccati, evaṃ ettha bā-kārādesaṃ katvā bākuloti samaññā ahosi, sāyaṃ tassa anvatthasaññāti dassetuṃ, ‘‘tassa hī’’tiādi vuttaṃ. Sīsaṃ nhāpetvāti maṅgalatthaṃ mahāgaṅgāya sīsaṃ nhāpetvā. Nimujjanavasenāti jaṇṇupamāṇe udake thokaṃyeva nimujjanavasena. Chaḍḍetvā palātā maraṇabhayatajjitā. Pahariyamānā maranti, na jālena bandhitamattena. Dārakassa tejenāti dārakassa puññatejena. Nīhaṭamattova mato, tassa maraṇatthaṃ upakkamo na kato, yena upakkamena dārakassa bādho siyā. Tanti macchaṃ. Sakalamevāti paripuṇṇāvayavameva.
ந கேலாயதீதி ந மமாயதி கிஸ்மிஞ்சி ந மஞ்ஞதி. தா³ரகஸ்ஸ புஞ்ஞதேஜேன பிட்டி²தோ பா²லெந்தீ. தா³ரகங் லப⁴தீதி உக்³கோ⁴ஸனவஸேன பே⁴ரிங் சராபெத்வா. பவத்திங் ஆசிக்கி², அத்தனோ புத்தபா⁴வங் கதே²ஸி. குச்சி²யா தா⁴ரிதத்தா அமாதா காதுங் ந ஸக்கா ஜனநீபா⁴வதோ. மச்ச²ங் க³ண்ஹந்தாபீதி மச்ச²ங் கிணித்வா க³ண்ஹந்தாபி. ததா² க³ண்ஹந்தா ச தப்பரியாபன்னங் ஸப்³ப³ங் க³ண்ஹாதி நாமாதி ஆஹ – ‘‘வக்கயகனாதீ³னி ப³ஹி கத்வா க³ண்ஹந்தா நாம நத்தீ²’’தி. அயம்பி அமாதா காதுங் ந ஸக்கா ஸாமிகபா⁴வதோ. தா³ரகோ உபி⁴ன்னம்பி குலானங் தா³யாதோ³ ஹோது த்³வின்னங் புத்தபா⁴வதோ.
Na kelāyatīti na mamāyati kismiñci na maññati. Dārakassa puññatejena piṭṭhito phālentī. Dārakaṃ labhatīti ugghosanavasena bheriṃ carāpetvā. Pavattiṃ ācikkhi, attano puttabhāvaṃ kathesi. Kucchiyā dhāritattā amātā kātuṃ na sakkā jananībhāvato. Macchaṃ gaṇhantāpīti macchaṃ kiṇitvā gaṇhantāpi. Tathā gaṇhantā ca tappariyāpannaṃ sabbaṃ gaṇhāti nāmāti āha – ‘‘vakkayakanādīni bahi katvā gaṇhantā nāma natthī’’ti. Ayampi amātā kātuṃ na sakkā sāmikabhāvato. Dārako ubhinnampi kulānaṃ dāyādo hotu dvinnaṃ puttabhāvato.
அஸீதிமேதி ஜாதியா அஸீதிமே வஸ்ஸே. பப்³ப³ஜ்ஜாமத்தேன கிலேஸானங் அஸமுச்சி²ஜ்ஜனதோ வீதிக்கமிதுங் காமஸஞ்ஞா உப்பன்னபுப்³பா³தி புச்சா² பன புச்சி²தப்³பா³. தேனாஹ – ‘‘ஏவஞ்ச கோ² மங், ஆவுஸோ கஸ்ஸப, புச்சி²தப்³ப³’’ந்தி.
Asītimeti jātiyā asītime vasse. Pabbajjāmattena kilesānaṃ asamucchijjanato vītikkamituṃ kāmasaññā uppannapubbāti pucchā pana pucchitabbā. Tenāha – ‘‘evañca kho maṃ, āvuso kassapa, pucchitabba’’nti.
210. நியமெத்வாதி தங் தங்வாரே ஸேஸவாரேன நியமெத்வா. கம்மபத²பே⁴த³கோதி கம்மபத²விஸேஸகரோ. தத்த² காமவிதக்கோ யதா² காயவசீத்³வாரேஸு சோபனப்பத்தோ கம்மபத²ப்பத்தோ நாம ஹோதி; மனொத்³வாரே பரப⁴ண்ட³ஸ்ஸ அத்தனோ பரிணாமனவஸேன பவத்தஅபி⁴ஜ்ஜா²ஸஹக³தோ; ஏவங் காமஸஞ்ஞாதி, ததா² ப்³யாபாத³விஹிங்ஸாவிதக்கஸஞ்ஞாதி தே²ரோ, ‘‘உப⁴யம்பேதங் கம்மபத²பே⁴த³கமேவா’’தி ஆஹ. கம்மபத²ங் அப்பத்தங் ஸஞ்ஞங் ஸந்தா⁴ய, ‘‘ஸஞ்ஞா உப்பன்னமத்தாவா’’தி வுச்சமானே விதக்கிதம்பி ஸமானங் கம்மபத²ங் அப்பத்தமேவ, உப⁴யஸ்ஸ பன வஸேன ஸுத்தபத³ங் பவத்தந்தி தே²ரஸ்ஸ அதி⁴ப்பாயோ.
210.Niyametvāti taṃ taṃvāre sesavārena niyametvā. Kammapathabhedakoti kammapathavisesakaro. Tattha kāmavitakko yathā kāyavacīdvāresu copanappatto kammapathappatto nāma hoti; manodvāre parabhaṇḍassa attano pariṇāmanavasena pavattaabhijjhāsahagato; evaṃ kāmasaññāti, tathā byāpādavihiṃsāvitakkasaññāti thero, ‘‘ubhayampetaṃ kammapathabhedakamevā’’ti āha. Kammapathaṃ appattaṃ saññaṃ sandhāya, ‘‘saññā uppannamattāvā’’ti vuccamāne vitakkitampi samānaṃ kammapathaṃ appattameva, ubhayassa pana vasena suttapadaṃ pavattanti therassa adhippāyo.
211. ஆயூஹனகம்மந்தி அத்தனா ஆயூஹிதப்³ப³கம்மங். லோமகிலிட்டா²னீதி கிலிட்ட²லோமானி, கிலிட்ட²ங்ஸூனீதி அத்தோ². கிமேவங் போ⁴கே³ஸு பரனிம்மிதப⁴வே வஸவத்திதே³வானங் விய ஸப்³ப³ஸோ ஆயூஹனகம்மேன வினா அஞ்ஞஸ்ஸபி பப்³ப³ஜிதஸ்ஸ பச்சயலாபோ⁴ தி³ட்ட²புப்³போ³ ஸுதபுப்³போ³தி ஆஹ ‘‘அனச்ச²ரியஞ்சேத’’ந்தி. குலூபகதே²ரானமேதங் கம்மங், தே²ரோ பன கதா³சிபி குலூபகோ நாஹோஸி.
211.Āyūhanakammanti attanā āyūhitabbakammaṃ. Lomakiliṭṭhānīti kiliṭṭhalomāni, kiliṭṭhaṃsūnīti attho. Kimevaṃ bhogesu paranimmitabhave vasavattidevānaṃ viya sabbaso āyūhanakammena vinā aññassapi pabbajitassa paccayalābho diṭṭhapubbo sutapubboti āha ‘‘anacchariyañceta’’nti. Kulūpakatherānametaṃ kammaṃ, thero pana kadācipi kulūpako nāhosi.
க³த்³து³ஹனமத்தந்தி கோ³து³ஹனமத்தகாலங். இத⁴ பன ஸகலோ கோ³து³ஹனோ அதி⁴ப்பேதோதி த³ஸ்ஸெந்தோ, ‘‘கா³விங்…பே॰… காலமத்தம்பீ’’தி ஆஹ. நிப³ந்தீ⁴தி நிப³த்³த⁴தா³தப்³ப³ங் கத்வா ட²பேஸி.
Gadduhanamattanti goduhanamattakālaṃ. Idha pana sakalo goduhano adhippetoti dassento, ‘‘gāviṃ…pe… kālamattampī’’ti āha. Nibandhīti nibaddhadātabbaṃ katvā ṭhapesi.
ஸகிலேஸபுக்³க³லஸ்ஸ அஸேரிபா⁴வகரணேன ரணேன ஸதி³ஸதாய ரணோ, ஸங்கிலேஸோ. அஞ்ஞா உத³பாதீ³தி பனாஹ, தஸ்மா அரஹத்தங் ந படிஞ்ஞாதந்தி த³ஸ்ஸேதி. நனு ததா² வசனங் படிஜானநங் விய ஹோதீதி ஆஹ ‘‘அபிசா’’திஆதி³.
Sakilesapuggalassa aseribhāvakaraṇena raṇena sadisatāya raṇo, saṃkileso. Aññā udapādīti panāha, tasmā arahattaṃ na paṭiññātanti dasseti. Nanu tathā vacanaṃ paṭijānanaṃ viya hotīti āha ‘‘apicā’’tiādi.
212. அவாபுரதி த்³வாரங் ஏதேனாதி அவாபுரணங். பட²மஸங்க³ஹதோ பச்சா² தே³ஸிதத்தா து³தியஸங்க³ஹே ஸங்கி³தங். ஸேஸங் ஸுவிஞ்ஞெய்யமேவ.
212. Avāpurati dvāraṃ etenāti avāpuraṇaṃ. Paṭhamasaṅgahato pacchā desitattā dutiyasaṅgahe saṅgitaṃ. Sesaṃ suviññeyyameva.
பா³குலஸுத்தவண்ணனாய லீனத்த²ப்பகாஸனா ஸமத்தா.
Bākulasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 4. பா³குலஸுத்தங் • 4. Bākulasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 4. பா³குலஸுத்தவண்ணனா • 4. Bākulasuttavaṇṇanā
