| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
২১. বালঅব্যত্তৰত্থু
21. Bālaabyattavatthu
৮২. তেন খো পন সমযেন ভিক্খূ, দসৰস্সম্হা দসৰস্সম্হাতি, বালা অব্যত্তা নিস্সযং দেন্তি। দিস্সন্তি আচরিযা বালা, অন্তেৰাসিকা পণ্ডিতা । দিস্সন্তি আচরিযা অব্যত্তা, অন্তেৰাসিকা ব্যত্তা। দিস্সন্তি আচরিযা অপ্পস্সুতা, অন্তেৰাসিকা বহুস্সুতা। দিস্সন্তি আচরিযা দুপ্পঞ্ঞা, অন্তেৰাসিকা পঞ্ঞৰন্তো। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খূ, দসৰস্সম্হা দসৰস্সম্হাতি, বালা অব্যত্তা নিস্সযং দস্সন্তি। দিস্সন্তি আচরিযা বালা অন্তেৰাসিকা পণ্ডিতা, দিস্সন্তি আচরিযা অব্যত্তা অন্তেৰাসিকা ব্যত্তা, দিস্সন্তি আচরিযা অপ্পস্সুতা অন্তেৰাসিকা বহুস্সুতা, দিস্সন্তি আচরিযা দুপ্পঞ্ঞা অন্তেৰাসিকা পঞ্ঞৰন্তো’’তি। অথ খো তে ভিক্খূ ভগৰতো এতমত্থং আরোচেসুং…পে॰… সচ্চং কির, ভিক্খৰে, ভিক্খূ, দসৰস্সম্হা দসৰস্সম্হাতি, বালা অব্যত্তা নিস্সযং দেন্তি…পে॰… সচ্চং, ভগৰাতি। ৰিগরহি বুদ্ধো ভগৰা…পে॰… ৰিগরহিত্ৰা…পে॰… ধম্মিং কথং কত্ৰা ভিক্খূ আমন্তেসি – ‘‘ন, ভিক্খৰে, বালেন অব্যত্তেন নিস্সযো দাতব্বো। যো দদেয্য, আপত্তি দুক্কটস্স। অনুজানামি, ভিক্খৰে, ব্যত্তেন ভিক্খুনা পটিবলেন দসৰস্সেন ৰা অতিরেকদসৰস্সেন ৰা নিস্সযং দাতু’’ন্তি।
82. Tena kho pana samayena bhikkhū, dasavassamhā dasavassamhāti, bālā abyattā nissayaṃ denti. Dissanti ācariyā bālā, antevāsikā paṇḍitā . Dissanti ācariyā abyattā, antevāsikā byattā. Dissanti ācariyā appassutā, antevāsikā bahussutā. Dissanti ācariyā duppaññā, antevāsikā paññavanto. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhū, dasavassamhā dasavassamhāti, bālā abyattā nissayaṃ dassanti. Dissanti ācariyā bālā antevāsikā paṇḍitā, dissanti ācariyā abyattā antevāsikā byattā, dissanti ācariyā appassutā antevāsikā bahussutā, dissanti ācariyā duppaññā antevāsikā paññavanto’’ti. Atha kho te bhikkhū bhagavato etamatthaṃ ārocesuṃ…pe… saccaṃ kira, bhikkhave, bhikkhū, dasavassamhā dasavassamhāti, bālā abyattā nissayaṃ denti…pe… saccaṃ, bhagavāti. Vigarahi buddho bhagavā…pe… vigarahitvā…pe… dhammiṃ kathaṃ katvā bhikkhū āmantesi – ‘‘na, bhikkhave, bālena abyattena nissayo dātabbo. Yo dadeyya, āpatti dukkaṭassa. Anujānāmi, bhikkhave, byattena bhikkhunā paṭibalena dasavassena vā atirekadasavassena vā nissayaṃ dātu’’nti.
বালঅব্যত্তৰত্থু নিট্ঠিতং।
Bālaabyattavatthu niṭṭhitaṃ.
