| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၂၁. ဗာလအဗ္ယတ္တဝတ္ထု
21. Bālaabyattavatthu
၈၂. တေန ခော ပန သမယေန ဘိက္ခူ, ဒသဝသ္သမ္ဟာ ဒသဝသ္သမ္ဟာတိ, ဗာလာ အဗ္ယတ္တာ နိသ္သယံ ဒေန္တိ။ ဒိသ္သန္တိ အာစရိယာ ဗာလာ, အန္တေဝာသိကာ ပဏ္ဍိတာ ။ ဒိသ္သန္တိ အာစရိယာ အဗ္ယတ္တာ, အန္တေဝာသိကာ ဗ္ယတ္တာ။ ဒိသ္သန္တိ အာစရိယာ အပ္ပသ္သုတာ, အန္တေဝာသိကာ ဗဟုသ္သုတာ။ ဒိသ္သန္တိ အာစရိယာ ဒုပ္ပညာ, အန္တေဝာသိကာ ပညဝန္တော။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဘိက္ခူ, ဒသဝသ္သမ္ဟာ ဒသဝသ္သမ္ဟာတိ, ဗာလာ အဗ္ယတ္တာ နိသ္သယံ ဒသ္သန္တိ။ ဒိသ္သန္တိ အာစရိယာ ဗာလာ အန္တေဝာသိကာ ပဏ္ဍိတာ, ဒိသ္သန္တိ အာစရိယာ အဗ္ယတ္တာ အန္တေဝာသိကာ ဗ္ယတ္တာ, ဒိသ္သန္တိ အာစရိယာ အပ္ပသ္သုတာ အန္တေဝာသိကာ ဗဟုသ္သုတာ, ဒိသ္သန္တိ အာစရိယာ ဒုပ္ပညာ အန္တေဝာသိကာ ပညဝန္တော’’တိ။ အထ ခော တေ ဘိက္ခူ ဘဂဝတော ဧတမတ္ထံ အာရောစေသုံ။ပေ.။ သစ္စံ ကိရ, ဘိက္ခဝေ, ဘိက္ခူ, ဒသဝသ္သမ္ဟာ ဒသဝသ္သမ္ဟာတိ, ဗာလာ အဗ္ယတ္တာ နိသ္သယံ ဒေန္တိ။ပေ.။ သစ္စံ, ဘဂဝာတိ။ ဝိဂရဟိ ဗုဒ္ဓော ဘဂဝာ။ပေ.။ ဝိဂရဟိတ္ဝာ။ပေ.။ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘န, ဘိက္ခဝေ, ဗာလေန အဗ္ယတ္တေန နိသ္သယော ဒာတဗ္ဗော။ ယော ဒဒေယ္ယ, အာပတ္တိ ဒုက္ကဋသ္သ။ အနုဇာနာမိ, ဘိက္ခဝေ, ဗ္ယတ္တေန ဘိက္ခုနာ ပဋိဗလေန ဒသဝသ္သေန ဝာ အတိရေကဒသဝသ္သေန ဝာ နိသ္သယံ ဒာတု’’န္တိ။
82. Tena kho pana samayena bhikkhū, dasavassamhā dasavassamhāti, bālā abyattā nissayaṃ denti. Dissanti ācariyā bālā, antevāsikā paṇḍitā . Dissanti ācariyā abyattā, antevāsikā byattā. Dissanti ācariyā appassutā, antevāsikā bahussutā. Dissanti ācariyā duppaññā, antevāsikā paññavanto. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhū, dasavassamhā dasavassamhāti, bālā abyattā nissayaṃ dassanti. Dissanti ācariyā bālā antevāsikā paṇḍitā, dissanti ācariyā abyattā antevāsikā byattā, dissanti ācariyā appassutā antevāsikā bahussutā, dissanti ācariyā duppaññā antevāsikā paññavanto’’ti. Atha kho te bhikkhū bhagavato etamatthaṃ ārocesuṃ…pe… saccaṃ kira, bhikkhave, bhikkhū, dasavassamhā dasavassamhāti, bālā abyattā nissayaṃ denti…pe… saccaṃ, bhagavāti. Vigarahi buddho bhagavā…pe… vigarahitvā…pe… dhammiṃ kathaṃ katvā bhikkhū āmantesi – ‘‘na, bhikkhave, bālena abyattena nissayo dātabbo. Yo dadeyya, āpatti dukkaṭassa. Anujānāmi, bhikkhave, byattena bhikkhunā paṭibalena dasavassena vā atirekadasavassena vā nissayaṃ dātu’’nti.
ဗာလအဗ္ယတ္တဝတ္ထု နိဋ္ဌိတံ။
Bālaabyattavatthu niṭṭhitaṃ.
