| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
21. බාලඅබ්‍යත්‌තවත්‌ථු
21. Bālaabyattavatthu
82. තෙන ඛො පන සමයෙන භික්‌ඛූ, දසවස්‌සම්‌හා දසවස්‌සම්‌හාති, බාලා අබ්‍යත්‌තා නිස්‌සයං දෙන්‌ති. දිස්‌සන්‌ති ආචරියා බාලා, අන්‌තෙවාසිකා පණ්‌ඩිතා . දිස්‌සන්‌ති ආචරියා අබ්‍යත්‌තා, අන්‌තෙවාසිකා බ්‍යත්‌තා. දිස්‌සන්‌ති ආචරියා අප්‌පස්‌සුතා, අන්‌තෙවාසිකා බහුස්‌සුතා. දිස්‌සන්‌ති ආචරියා දුප්‌පඤ්‌ඤා, අන්‌තෙවාසිකා පඤ්‌ඤවන්‌තො. යෙ තෙ භික්‌ඛූ අප්‌පිච්‌ඡා…පෙ.… තෙ උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම භික්‌ඛූ, දසවස්‌සම්‌හා දසවස්‌සම්‌හාති, බාලා අබ්‍යත්‌තා නිස්‌සයං දස්‌සන්‌ති. දිස්‌සන්‌ති ආචරියා බාලා අන්‌තෙවාසිකා පණ්‌ඩිතා, දිස්‌සන්‌ති ආචරියා අබ්‍යත්‌තා අන්‌තෙවාසිකා බ්‍යත්‌තා, දිස්‌සන්‌ති ආචරියා අප්‌පස්‌සුතා අන්‌තෙවාසිකා බහුස්‌සුතා, දිස්‌සන්‌ති ආචරියා දුප්‌පඤ්‌ඤා අන්‌තෙවාසිකා පඤ්‌ඤවන්‌තො’’ති. අථ ඛො තෙ භික්‌ඛූ භගවතො එතමත්‌ථං ආරොචෙසුං…පෙ.… සච්‌චං කිර, භික්‌ඛවෙ, භික්‌ඛූ, දසවස්‌සම්‌හා දසවස්‌සම්‌හාති, බාලා අබ්‍යත්‌තා නිස්‌සයං දෙන්‌ති…පෙ.… සච්‌චං, භගවාති. විගරහි බුද්‌ධො භගවා…පෙ.… විගරහිත්‌වා…පෙ.… ධම්‌මිං කථං කත්‌වා භික්‌ඛූ ආමන්‌තෙසි – ‘‘න, භික්‌ඛවෙ, බාලෙන අබ්‍යත්‌තෙන නිස්‌සයො දාතබ්‌බො. යො දදෙය්‍ය, ආපත්‌ති දුක්‌කටස්‌ස. අනුජානාමි, භික්‌ඛවෙ, බ්‍යත්‌තෙන භික්‌ඛුනා පටිබලෙන දසවස්‌සෙන වා අතිරෙකදසවස්‌සෙන වා නිස්‌සයං දාතු’’න්‌ති.
82. Tena kho pana samayena bhikkhū, dasavassamhā dasavassamhāti, bālā abyattā nissayaṃ denti. Dissanti ācariyā bālā, antevāsikā paṇḍitā . Dissanti ācariyā abyattā, antevāsikā byattā. Dissanti ācariyā appassutā, antevāsikā bahussutā. Dissanti ācariyā duppaññā, antevāsikā paññavanto. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhū, dasavassamhā dasavassamhāti, bālā abyattā nissayaṃ dassanti. Dissanti ācariyā bālā antevāsikā paṇḍitā, dissanti ācariyā abyattā antevāsikā byattā, dissanti ācariyā appassutā antevāsikā bahussutā, dissanti ācariyā duppaññā antevāsikā paññavanto’’ti. Atha kho te bhikkhū bhagavato etamatthaṃ ārocesuṃ…pe… saccaṃ kira, bhikkhave, bhikkhū, dasavassamhā dasavassamhāti, bālā abyattā nissayaṃ denti…pe… saccaṃ, bhagavāti. Vigarahi buddho bhagavā…pe… vigarahitvā…pe… dhammiṃ kathaṃ katvā bhikkhū āmantesi – ‘‘na, bhikkhave, bālena abyattena nissayo dātabbo. Yo dadeyya, āpatti dukkaṭassa. Anujānāmi, bhikkhave, byattena bhikkhunā paṭibalena dasavassena vā atirekadasavassena vā nissayaṃ dātu’’nti.
බාලඅබ්‍යත්‌තවත්‌ථු නිට්‌ඨිතං.
Bālaabyattavatthu niṭṭhitaṃ.
