| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༢༡. བཱལཨབྱཏྟཝཏྠུ
21. Bālaabyattavatthu
༨༢. ཏེན ཁོ པན སམཡེན བྷིཀྑཱུ, དསཝསྶམྷཱ དསཝསྶམྷཱཏི, བཱལཱ ཨབྱཏྟཱ ནིསྶཡཾ དེནྟི། དིསྶནྟི ཨཱཙརིཡཱ བཱལཱ, ཨནྟེཝཱསིཀཱ པཎྜིཏཱ ། དིསྶནྟི ཨཱཙརིཡཱ ཨབྱཏྟཱ, ཨནྟེཝཱསིཀཱ བྱཏྟཱ། དིསྶནྟི ཨཱཙརིཡཱ ཨཔྤསྶུཏཱ, ཨནྟེཝཱསིཀཱ བཧུསྶུཏཱ། དིསྶནྟི ཨཱཙརིཡཱ དུཔྤཉྙཱ, ཨནྟེཝཱསིཀཱ པཉྙཝནྟོ། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ བྷིཀྑཱུ, དསཝསྶམྷཱ དསཝསྶམྷཱཏི, བཱལཱ ཨབྱཏྟཱ ནིསྶཡཾ དསྶནྟི། དིསྶནྟི ཨཱཙརིཡཱ བཱལཱ ཨནྟེཝཱསིཀཱ པཎྜིཏཱ, དིསྶནྟི ཨཱཙརིཡཱ ཨབྱཏྟཱ ཨནྟེཝཱསིཀཱ བྱཏྟཱ, དིསྶནྟི ཨཱཙརིཡཱ ཨཔྤསྶུཏཱ ཨནྟེཝཱསིཀཱ བཧུསྶུཏཱ, དིསྶནྟི ཨཱཙརིཡཱ དུཔྤཉྙཱ ཨནྟེཝཱསིཀཱ པཉྙཝནྟོ’’ཏི། ཨཐ ཁོ ཏེ བྷིཀྑཱུ བྷགཝཏོ ཨེཏམཏྠཾ ཨཱརོཙེསུཾ…པེ॰… སཙྩཾ ཀིར, བྷིཀྑཝེ, བྷིཀྑཱུ, དསཝསྶམྷཱ དསཝསྶམྷཱཏི, བཱལཱ ཨབྱཏྟཱ ནིསྶཡཾ དེནྟི…པེ॰… སཙྩཾ, བྷགཝཱཏི། ཝིགརཧི བུདྡྷོ བྷགཝཱ…པེ॰… ཝིགརཧིཏྭཱ…པེ॰… དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ན, བྷིཀྑཝེ, བཱལེན ཨབྱཏྟེན ནིསྶཡོ དཱཏབྦོ། ཡོ དདེཡྻ, ཨཱཔཏྟི དུཀྐཊསྶ། ཨནུཛཱནཱམི, བྷིཀྑཝེ, བྱཏྟེན བྷིཀྑུནཱ པཊིབལེན དསཝསྶེན ཝཱ ཨཏིརེཀདསཝསྶེན ཝཱ ནིསྶཡཾ དཱཏུ’’ནྟི།
82. Tena kho pana samayena bhikkhū, dasavassamhā dasavassamhāti, bālā abyattā nissayaṃ denti. Dissanti ācariyā bālā, antevāsikā paṇḍitā . Dissanti ācariyā abyattā, antevāsikā byattā. Dissanti ācariyā appassutā, antevāsikā bahussutā. Dissanti ācariyā duppaññā, antevāsikā paññavanto. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhū, dasavassamhā dasavassamhāti, bālā abyattā nissayaṃ dassanti. Dissanti ācariyā bālā antevāsikā paṇḍitā, dissanti ācariyā abyattā antevāsikā byattā, dissanti ācariyā appassutā antevāsikā bahussutā, dissanti ācariyā duppaññā antevāsikā paññavanto’’ti. Atha kho te bhikkhū bhagavato etamatthaṃ ārocesuṃ…pe… saccaṃ kira, bhikkhave, bhikkhū, dasavassamhā dasavassamhāti, bālā abyattā nissayaṃ denti…pe… saccaṃ, bhagavāti. Vigarahi buddho bhagavā…pe… vigarahitvā…pe… dhammiṃ kathaṃ katvā bhikkhū āmantesi – ‘‘na, bhikkhave, bālena abyattena nissayo dātabbo. Yo dadeyya, āpatti dukkaṭassa. Anujānāmi, bhikkhave, byattena bhikkhunā paṭibalena dasavassena vā atirekadasavassena vā nissayaṃ dātu’’nti.
བཱལཨབྱཏྟཝཏྠུ ནིཊྛིཏཾ།
Bālaabyattavatthu niṭṭhitaṃ.
