| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၂၇၃. ဗာလကလောဏကဂမနကထာ
273. Bālakaloṇakagamanakathā
၄၆၅. အထ ခော ဘဂဝာ သင္ဃမဇ္ဈေ ဌိတကောဝ ဣမာ ဂာထာယော ဘာသိတ္ဝာ ယေန ဗာလကလောဏကဂာမော 1 တေနုပသင္ကမိ။ တေန ခော ပန သမယေန အာယသ္မာ ဘဂု ဗာလကလောဏကဂာမေ ဝိဟရတိ။ အဒ္ဒသာ ခော အာယသ္မာ ဘဂု ဘဂဝန္တံ ဒူရတောဝ အာဂစ္ဆန္တံ, ဒိသ္ဝာန အာသနံ ပညပေသိ, ပာဒောဒကံ ပာဒပီဌံ ပာဒကထလိကံ ဥပနိက္ခိပိ, ပစ္စုဂ္ဂန္တ္ဝာ ပတ္တစီဝရံ ပဋိဂ္ဂဟေသိ။ နိသီဒိ ဘဂဝာ ပညတ္တေ အာသနေ, နိသဇ္ဇ ခော ဘဂဝာ ပာဒေ ပက္ခာလေသိ။ အာယသ္မာပိ ခော ဘဂု ဘဂဝန္တံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နံ ခော အာယသ္မန္တံ ဘဂုံ ဘဂဝာ ဧတဒဝောစ – ‘‘ကစ္စိ, ဘိက္ခု, ခမနီယံ; ကစ္စိ ယာပနီယံ, ကစ္စိ ပိဏ္ဍကေန န ကိလမသီ’’တိ? ‘‘ခမနီယံ, ဘဂဝာ, ယာပနီယံ, ဘဂဝာ; န စာဟံ, ဘန္တေ, ပိဏ္ဍကေန ကိလမာမီ’’တိ။ အထ ခော ဘဂဝာ အာယသ္မန္တံ ဘဂုံ ဓမ္မိယာ ကထာယ သန္ဒသ္သေတ္ဝာ သမာဒပေတ္ဝာ သမုတ္တေဇေတ္ဝာ သမ္ပဟံသေတ္ဝာ ဥဋ္ဌာယာသနာ ယေန ပာစီနဝံသဒာယော တေနုပသင္ကမိ။
465. Atha kho bhagavā saṅghamajjhe ṭhitakova imā gāthāyo bhāsitvā yena bālakaloṇakagāmo 2 tenupasaṅkami. Tena kho pana samayena āyasmā bhagu bālakaloṇakagāme viharati. Addasā kho āyasmā bhagu bhagavantaṃ dūratova āgacchantaṃ, disvāna āsanaṃ paññapesi, pādodakaṃ pādapīṭhaṃ pādakathalikaṃ upanikkhipi, paccuggantvā pattacīvaraṃ paṭiggahesi. Nisīdi bhagavā paññatte āsane, nisajja kho bhagavā pāde pakkhālesi. Āyasmāpi kho bhagu bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ bhaguṃ bhagavā etadavoca – ‘‘kacci, bhikkhu, khamanīyaṃ; kacci yāpanīyaṃ, kacci piṇḍakena na kilamasī’’ti? ‘‘Khamanīyaṃ, bhagavā, yāpanīyaṃ, bhagavā; na cāhaṃ, bhante, piṇḍakena kilamāmī’’ti. Atha kho bhagavā āyasmantaṃ bhaguṃ dhammiyā kathāya sandassetvā samādapetvā samuttejetvā sampahaṃsetvā uṭṭhāyāsanā yena pācīnavaṃsadāyo tenupasaṅkami.
ဗာလကလောဏကဂမနကထာ နိဋ္ဌိတာ။
Bālakaloṇakagamanakathā niṭṭhitā.
Footnotes:
Related texts:
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ဗာလကလောဏကဂမနကထာဝဏ္ဏနာ • Bālakaloṇakagamanakathāvaṇṇanā
