| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༢༧༣. བཱལཀལོཎཀགམནཀཐཱ
273. Bālakaloṇakagamanakathā
༤༦༥. ཨཐ ཁོ བྷགཝཱ སངྒྷམཛ྄ཛྷེ ཋིཏཀོཝ ཨིམཱ གཱཐཱཡོ བྷཱསིཏྭཱ ཡེན བཱལཀལོཎཀགཱམོ 1 ཏེནུཔསངྐམི། ཏེན ཁོ པན སམཡེན ཨཱཡསྨཱ བྷགུ བཱལཀལོཎཀགཱམེ ཝིཧརཏི། ཨདྡསཱ ཁོ ཨཱཡསྨཱ བྷགུ བྷགཝནྟཾ དཱུརཏོཝ ཨཱགཙྪནྟཾ, དིསྭཱན ཨཱསནཾ པཉྙཔེསི, པཱདོདཀཾ པཱདཔཱིཋཾ པཱདཀཐལིཀཾ ཨུཔནིཀྑིཔི, པཙྩུགྒནྟྭཱ པཏྟཙཱིཝརཾ པཊིགྒཧེསི། ནིསཱིདི བྷགཝཱ པཉྙཏྟེ ཨཱསནེ, ནིསཛྫ ཁོ བྷགཝཱ པཱདེ པཀྑཱལེསི། ཨཱཡསྨཱཔི ཁོ བྷགུ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣཾ ཁོ ཨཱཡསྨནྟཾ བྷགུཾ བྷགཝཱ ཨེཏདཝོཙ – ‘‘ཀཙྩི, བྷིཀྑུ, ཁམནཱིཡཾ; ཀཙྩི ཡཱཔནཱིཡཾ, ཀཙྩི པིཎྜཀེན ན ཀིལམསཱི’’ཏི? ‘‘ཁམནཱིཡཾ, བྷགཝཱ, ཡཱཔནཱིཡཾ, བྷགཝཱ; ན ཙཱཧཾ, བྷནྟེ, པིཎྜཀེན ཀིལམཱམཱི’’ཏི། ཨཐ ཁོ བྷགཝཱ ཨཱཡསྨནྟཾ བྷགུཾ དྷམྨིཡཱ ཀཐཱཡ སནྡསྶེཏྭཱ སམཱདཔེཏྭཱ སམུཏྟེཛེཏྭཱ སམྤཧཾསེཏྭཱ ཨུཊྛཱཡཱསནཱ ཡེན པཱཙཱིནཝཾསདཱཡོ ཏེནུཔསངྐམི།
465. Atha kho bhagavā saṅghamajjhe ṭhitakova imā gāthāyo bhāsitvā yena bālakaloṇakagāmo 2 tenupasaṅkami. Tena kho pana samayena āyasmā bhagu bālakaloṇakagāme viharati. Addasā kho āyasmā bhagu bhagavantaṃ dūratova āgacchantaṃ, disvāna āsanaṃ paññapesi, pādodakaṃ pādapīṭhaṃ pādakathalikaṃ upanikkhipi, paccuggantvā pattacīvaraṃ paṭiggahesi. Nisīdi bhagavā paññatte āsane, nisajja kho bhagavā pāde pakkhālesi. Āyasmāpi kho bhagu bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ bhaguṃ bhagavā etadavoca – ‘‘kacci, bhikkhu, khamanīyaṃ; kacci yāpanīyaṃ, kacci piṇḍakena na kilamasī’’ti? ‘‘Khamanīyaṃ, bhagavā, yāpanīyaṃ, bhagavā; na cāhaṃ, bhante, piṇḍakena kilamāmī’’ti. Atha kho bhagavā āyasmantaṃ bhaguṃ dhammiyā kathāya sandassetvā samādapetvā samuttejetvā sampahaṃsetvā uṭṭhāyāsanā yena pācīnavaṃsadāyo tenupasaṅkami.
བཱལཀལོཎཀགམནཀཐཱ ནིཊྛིཏཱ།
Bālakaloṇakagamanakathā niṭṭhitā.
Footnotes:
Related texts:
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / བཱལཀལོཎཀགམནཀཐཱཝཎྞནཱ • Bālakaloṇakagamanakathāvaṇṇanā
