| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
பா³லகலோணகக³மனகதா²வண்ணனா
Bālakaloṇakagamanakathāvaṇṇanā
465. பா³லகலோணகாரகா³மோதி உபாலிக³ஹபதிஸ்ஸ ஏவங்னாமகோ போ⁴க³கா³மோ. தேனுபஸங்கமீதி த⁴ம்மஸேனாபதிமஹாமொக்³க³ல்லானத்தே²ரேஸு வா அஸீதிமஹாஸாவகேஸு வா அந்தமஸோ த⁴ம்மப⁴ண்டா³கா³ரிகங் ஆனந்த³த்தே²ரம்பி கஞ்சி அனாமந்தெத்வா ஸயமேவ பத்தசீவரமாதா³ய அனீகனிஸ்ஸடோ ஹத்தீ² விய யூத²னிஸ்ஸடோ காளஸீஹோ விய வாதச்சி²ன்னோ வலாஹகோ விய ச ஏககோவ உபஸங்கமி. கஸ்மா உபஸங்கமி? க³ணே கிரஸ்ஸ ஆதீ³னவங் தி³ஸ்வா ஏகவிஹாரிங் பி⁴க்கு²ங் பஸ்ஸிதுகாமதா உத³பாதி³, தஸ்மா ஸீதாதி³பீளிதோ உண்ஹாதி³ங் பத்த²யமானோ விய உபஸங்கமி. அத² வா ப⁴க³வதா ஸோ ஆதீ³னவோ பகே³வ பரிஞ்ஞாதோ, ந தேன ஸத்தா² நிப்³பி³ன்னோ, தஸ்மிங் பன அந்தோவஸ்ஸே கேசி பு³த்³த⁴வேனெய்யா நாஹேஸுங், தேன அஞ்ஞத்த² க³மனங் தேஸங் பி⁴க்கூ²னங் த³மனுபாயோதி பாலிலெய்யகங் உத்³தி³ஸ்ஸ க³ச்ச²ந்தோ ஏகவிஹாரிங் ஆயஸ்மந்தங் ப⁴கு³ங் ஸம்பஹங்ஸேதுங் தத்த² க³தோ. ஏவங் க³தே ச ஸத்த²ரி பஞ்சஸதா பி⁴க்கூ² ஆயஸ்மந்தங் ஆனந்த³ங் ஆஹங்ஸு ‘‘ஆவுஸோ ஆனந்த³ ஸத்தா² ஏககோவ க³தோ, மயங் அனுப³ந்தி⁴ஸ்ஸாமா’’தி. ‘‘ஆவுஸோ, யதா³ ப⁴க³வா ஸாமங் ஸேனாஸனங் ஸங்ஸாமெத்வா பத்தசீவரமாதா³ய அனாமந்தெத்வா உபட்டா²கே அனபலோகெத்வா பி⁴க்கு²ஸங்க⁴ங் அது³தியோ க³ச்ச²தி, ததா³ ஏகசாரிகங் சரிதுங் ப⁴க³வதோ அஜ்ஜா²ஸயோ, ஸாவகேன நாம ஸத்து² அஜ்ஜா²ஸயானுரூபங் படிபஜ்ஜிதப்³ப³ங், தஸ்மா ந இமேஸு தி³வஸேஸு ப⁴க³வா அனுக³ந்தப்³போ³’’தி நிவாரேஸி, ஸயம்பி நானுக³ஞ்சி². த⁴ம்மியா கதா²யாதி ஏகீபா⁴வே ஆனிஸங்ஸபடிஸங்யுத்தாய த⁴ம்மகதா²ய.
465.Bālakaloṇakāragāmoti upāligahapatissa evaṃnāmako bhogagāmo. Tenupasaṅkamīti dhammasenāpatimahāmoggallānattheresu vā asītimahāsāvakesu vā antamaso dhammabhaṇḍāgārikaṃ ānandattherampi kañci anāmantetvā sayameva pattacīvaramādāya anīkanissaṭo hatthī viya yūthanissaṭo kāḷasīho viya vātacchinno valāhako viya ca ekakova upasaṅkami. Kasmā upasaṅkami? Gaṇe kirassa ādīnavaṃ disvā ekavihāriṃ bhikkhuṃ passitukāmatā udapādi, tasmā sītādipīḷito uṇhādiṃ patthayamāno viya upasaṅkami. Atha vā bhagavatā so ādīnavo pageva pariññāto, na tena satthā nibbinno, tasmiṃ pana antovasse keci buddhaveneyyā nāhesuṃ, tena aññattha gamanaṃ tesaṃ bhikkhūnaṃ damanupāyoti pālileyyakaṃ uddissa gacchanto ekavihāriṃ āyasmantaṃ bhaguṃ sampahaṃsetuṃ tattha gato. Evaṃ gate ca satthari pañcasatā bhikkhū āyasmantaṃ ānandaṃ āhaṃsu ‘‘āvuso ānanda satthā ekakova gato, mayaṃ anubandhissāmā’’ti. ‘‘Āvuso, yadā bhagavā sāmaṃ senāsanaṃ saṃsāmetvā pattacīvaramādāya anāmantetvā upaṭṭhāke anapaloketvā bhikkhusaṅghaṃ adutiyo gacchati, tadā ekacārikaṃ carituṃ bhagavato ajjhāsayo, sāvakena nāma satthu ajjhāsayānurūpaṃ paṭipajjitabbaṃ, tasmā na imesu divasesu bhagavā anugantabbo’’ti nivāresi, sayampi nānugañchi. Dhammiyā kathāyāti ekībhāve ānisaṃsapaṭisaṃyuttāya dhammakathāya.
பா³லகலோணகக³மனகதா²வண்ணனா நிட்டி²தா.
Bālakaloṇakagamanakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 273. பா³லகலோணகக³மனகதா² • 273. Bālakaloṇakagamanakathā
