| Library / Tipiṭaka / ਤਿਪਿਟਕ • Tipiṭaka / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā |
ਬਾਲਕਲੋਣਕਗਮਨਕਥਾવਣ੍ਣਨਾ
Bālakaloṇakagamanakathāvaṇṇanā
੪੬੫. ਬਾਲਕਲੋਣਕਾਰਗਾਮੋਤਿ ਉਪਾਲਿਗਹਪਤਿਸ੍ਸ ਏવਂਨਾਮਕੋ ਭੋਗਗਾਮੋ। ਤੇਨੁਪਸਙ੍ਕਮੀਤਿ ਧਮ੍ਮਸੇਨਾਪਤਿਮਹਾਮੋਗ੍ਗਲ੍ਲਾਨਤ੍ਥੇਰੇਸੁ વਾ ਅਸੀਤਿਮਹਾਸਾવਕੇਸੁ વਾ ਅਨ੍ਤਮਸੋ ਧਮ੍ਮਭਣ੍ਡਾਗਾਰਿਕਂ ਆਨਨ੍ਦਤ੍ਥੇਰਮ੍ਪਿ ਕਞ੍ਚਿ ਅਨਾਮਨ੍ਤੇਤ੍વਾ ਸਯਮੇવ ਪਤ੍ਤਚੀવਰਮਾਦਾਯ ਅਨੀਕਨਿਸ੍ਸਟੋ ਹਤ੍ਥੀ વਿਯ ਯੂਥਨਿਸ੍ਸਟੋ ਕਾਲ਼ਸੀਹੋ વਿਯ વਾਤਚ੍ਛਿਨ੍ਨੋ વਲਾਹਕੋ વਿਯ ਚ ਏਕਕੋવ ਉਪਸਙ੍ਕਮਿ। ਕਸ੍ਮਾ ਉਪਸਙ੍ਕਮਿ? ਗਣੇ ਕਿਰਸ੍ਸ ਆਦੀਨવਂ ਦਿਸ੍વਾ ਏਕવਿਹਾਰਿਂ ਭਿਕ੍ਖੁਂ ਪਸ੍ਸਿਤੁਕਾਮਤਾ ਉਦਪਾਦਿ, ਤਸ੍ਮਾ ਸੀਤਾਦਿਪੀਲ਼ਿਤੋ ਉਣ੍ਹਾਦਿਂ ਪਤ੍ਥਯਮਾਨੋ વਿਯ ਉਪਸਙ੍ਕਮਿ। ਅਥ વਾ ਭਗવਤਾ ਸੋ ਆਦੀਨવੋ ਪਗੇવ ਪਰਿਞ੍ਞਾਤੋ, ਨ ਤੇਨ ਸਤ੍ਥਾ ਨਿਬ੍ਬਿਨ੍ਨੋ, ਤਸ੍ਮਿਂ ਪਨ ਅਨ੍ਤੋવਸ੍ਸੇ ਕੇਚਿ ਬੁਦ੍ਧવੇਨੇਯ੍ਯਾ ਨਾਹੇਸੁਂ, ਤੇਨ ਅਞ੍ਞਤ੍ਥ ਗਮਨਂ ਤੇਸਂ ਭਿਕ੍ਖੂਨਂ ਦਮਨੁਪਾਯੋਤਿ ਪਾਲਿਲੇਯ੍ਯਕਂ ਉਦ੍ਦਿਸ੍ਸ ਗਚ੍ਛਨ੍ਤੋ ਏਕવਿਹਾਰਿਂ ਆਯਸ੍ਮਨ੍ਤਂ ਭਗੁਂ ਸਮ੍ਪਹਂਸੇਤੁਂ ਤਤ੍ਥ ਗਤੋ। ਏવਂ ਗਤੇ ਚ ਸਤ੍ਥਰਿ ਪਞ੍ਚਸਤਾ ਭਿਕ੍ਖੂ ਆਯਸ੍ਮਨ੍ਤਂ ਆਨਨ੍ਦਂ ਆਹਂਸੁ ‘‘ਆવੁਸੋ ਆਨਨ੍ਦ ਸਤ੍ਥਾ ਏਕਕੋવ ਗਤੋ, ਮਯਂ ਅਨੁਬਨ੍ਧਿਸ੍ਸਾਮਾ’’ਤਿ। ‘‘ਆવੁਸੋ, ਯਦਾ ਭਗવਾ ਸਾਮਂ ਸੇਨਾਸਨਂ ਸਂਸਾਮੇਤ੍વਾ ਪਤ੍ਤਚੀવਰਮਾਦਾਯ ਅਨਾਮਨ੍ਤੇਤ੍વਾ ਉਪਟ੍ਠਾਕੇ ਅਨਪਲੋਕੇਤ੍વਾ ਭਿਕ੍ਖੁਸਙ੍ਘਂ ਅਦੁਤਿਯੋ ਗਚ੍ਛਤਿ, ਤਦਾ ਏਕਚਾਰਿਕਂ ਚਰਿਤੁਂ ਭਗવਤੋ ਅਜ੍ਝਾਸਯੋ, ਸਾવਕੇਨ ਨਾਮ ਸਤ੍ਥੁ ਅਜ੍ਝਾਸਯਾਨੁਰੂਪਂ ਪਟਿਪਜ੍ਜਿਤਬ੍ਬਂ, ਤਸ੍ਮਾ ਨ ਇਮੇਸੁ ਦਿવਸੇਸੁ ਭਗવਾ ਅਨੁਗਨ੍ਤਬ੍ਬੋ’’ਤਿ ਨਿવਾਰੇਸਿ, ਸਯਮ੍ਪਿ ਨਾਨੁਗਞ੍ਛਿ। ਧਮ੍ਮਿਯਾ ਕਥਾਯਾਤਿ ਏਕੀਭਾવੇ ਆਨਿਸਂਸਪਟਿਸਂਯੁਤ੍ਤਾਯ ਧਮ੍ਮਕਥਾਯ।
465.Bālakaloṇakāragāmoti upāligahapatissa evaṃnāmako bhogagāmo. Tenupasaṅkamīti dhammasenāpatimahāmoggallānattheresu vā asītimahāsāvakesu vā antamaso dhammabhaṇḍāgārikaṃ ānandattherampi kañci anāmantetvā sayameva pattacīvaramādāya anīkanissaṭo hatthī viya yūthanissaṭo kāḷasīho viya vātacchinno valāhako viya ca ekakova upasaṅkami. Kasmā upasaṅkami? Gaṇe kirassa ādīnavaṃ disvā ekavihāriṃ bhikkhuṃ passitukāmatā udapādi, tasmā sītādipīḷito uṇhādiṃ patthayamāno viya upasaṅkami. Atha vā bhagavatā so ādīnavo pageva pariññāto, na tena satthā nibbinno, tasmiṃ pana antovasse keci buddhaveneyyā nāhesuṃ, tena aññattha gamanaṃ tesaṃ bhikkhūnaṃ damanupāyoti pālileyyakaṃ uddissa gacchanto ekavihāriṃ āyasmantaṃ bhaguṃ sampahaṃsetuṃ tattha gato. Evaṃ gate ca satthari pañcasatā bhikkhū āyasmantaṃ ānandaṃ āhaṃsu ‘‘āvuso ānanda satthā ekakova gato, mayaṃ anubandhissāmā’’ti. ‘‘Āvuso, yadā bhagavā sāmaṃ senāsanaṃ saṃsāmetvā pattacīvaramādāya anāmantetvā upaṭṭhāke anapaloketvā bhikkhusaṅghaṃ adutiyo gacchati, tadā ekacārikaṃ carituṃ bhagavato ajjhāsayo, sāvakena nāma satthu ajjhāsayānurūpaṃ paṭipajjitabbaṃ, tasmā na imesu divasesu bhagavā anugantabbo’’ti nivāresi, sayampi nānugañchi. Dhammiyā kathāyāti ekībhāve ānisaṃsapaṭisaṃyuttāya dhammakathāya.
ਬਾਲਕਲੋਣਕਗਮਨਕਥਾવਣ੍ਣਨਾ ਨਿਟ੍ਠਿਤਾ।
Bālakaloṇakagamanakathāvaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / વਿਨਯਪਿਟਕ • Vinayapiṭaka / ਮਹਾવਗ੍ਗਪਾਲ਼ਿ • Mahāvaggapāḷi / ੨੭੩. ਬਾਲਕਲੋਣਕਗਮਨਕਥਾ • 273. Bālakaloṇakagamanakathā
