| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
9. ப³லகதா²
9. Balakathā
44. ஸாவத்தி²னிதா³னங் 1. ‘‘பஞ்சிமானி , பி⁴க்க²வே, ப³லானி. கதமானி பஞ்ச? ஸத்³தா⁴ப³லங், வீரியப³லங், ஸதிப³லங், ஸமாதி⁴ப³லங், பஞ்ஞாப³லங் – இமானி கோ², பி⁴க்க²வே, பஞ்ச ப³லானி.
44. Sāvatthinidānaṃ 2. ‘‘Pañcimāni , bhikkhave, balāni. Katamāni pañca? Saddhābalaṃ, vīriyabalaṃ, satibalaṃ, samādhibalaṃ, paññābalaṃ – imāni kho, bhikkhave, pañca balāni.
‘‘அபி ச, அட்ட²ஸட்டி² ப³லானி – ஸத்³தா⁴ப³லங், வீரியப³லங், ஸதிப³லங், ஸமாதி⁴ப³லங், பஞ்ஞாப³லங், ஹிரிப³லங், ஒத்தப்பப³லங், படிஸங்கா²னப³லங், பா⁴வனாப³லங், அனவஜ்ஜப³லங், ஸங்க³ஹப³லங், க²ந்திப³லங், பஞ்ஞத்திப³லங், நிஜ்ஜ²த்திப³லங், இஸ்ஸரியப³லங் , அதி⁴ட்டா²னப³லங், ஸமத²ப³லங், விபஸ்ஸனாப³லங், த³ஸ ஸேக²ப³லானி, த³ஸ அஸேக²ப³லானி, த³ஸ கீ²ணாஸவப³லானி, த³ஸ இத்³தி⁴ப³லானி, த³ஸ ததா²க³தப³லானி’’.
‘‘Api ca, aṭṭhasaṭṭhi balāni – saddhābalaṃ, vīriyabalaṃ, satibalaṃ, samādhibalaṃ, paññābalaṃ, hiribalaṃ, ottappabalaṃ, paṭisaṅkhānabalaṃ, bhāvanābalaṃ, anavajjabalaṃ, saṅgahabalaṃ, khantibalaṃ, paññattibalaṃ, nijjhattibalaṃ, issariyabalaṃ , adhiṭṭhānabalaṃ, samathabalaṃ, vipassanābalaṃ, dasa sekhabalāni, dasa asekhabalāni, dasa khīṇāsavabalāni, dasa iddhibalāni, dasa tathāgatabalāni’’.
கதமங் ஸத்³தா⁴ப³லங்? அஸ்ஸத்³தி⁴யே ந கம்பதீதி – ஸத்³தா⁴ப³லங். ஸஹஜாதானங் த⁴ம்மானங் உபத்த²ம்ப⁴னட்டே²ன ஸத்³தா⁴ப³லங், கிலேஸானங் பரியாதா³னட்டே²ன ஸத்³தா⁴ப³லங், படிவேதா⁴தி³விஸோத⁴னட்டே²ன ஸத்³தா⁴ப³லங், சித்தஸ்ஸ அதி⁴ட்டா²னட்டே²ன ஸத்³தா⁴ப³லங், சித்தஸ்ஸ வோதா³னட்டே²ன ஸத்³தா⁴ப³லங், விஸேஸாதி⁴க³மட்டே²ன ஸத்³தா⁴ப³லங், உத்தரி படிவேத⁴ட்டே²ன ஸத்³தா⁴ப³லங், ஸச்சாபி⁴ஸமயட்டே²ன ஸத்³தா⁴ப³லங், நிரோதே⁴ பதிட்டா²பகட்டே²ன ஸத்³தா⁴ப³லங். இத³ங் ஸத்³தா⁴ப³லங்.
Katamaṃ saddhābalaṃ? Assaddhiye na kampatīti – saddhābalaṃ. Sahajātānaṃ dhammānaṃ upatthambhanaṭṭhena saddhābalaṃ, kilesānaṃ pariyādānaṭṭhena saddhābalaṃ, paṭivedhādivisodhanaṭṭhena saddhābalaṃ, cittassa adhiṭṭhānaṭṭhena saddhābalaṃ, cittassa vodānaṭṭhena saddhābalaṃ, visesādhigamaṭṭhena saddhābalaṃ, uttari paṭivedhaṭṭhena saddhābalaṃ, saccābhisamayaṭṭhena saddhābalaṃ, nirodhe patiṭṭhāpakaṭṭhena saddhābalaṃ. Idaṃ saddhābalaṃ.
கதமங் வீரியப³லங்? கோஸஜ்ஜே ந கம்பதீதி – வீரியப³லங். ஸஹஜாதானங் த⁴ம்மானங் உபத்த²ம்ப⁴னட்டே²ன வீரியப³லங், கிலேஸானங் பரியாதா³னட்டே²ன வீரியப³லங், படிவேதா⁴தி³விஸோத⁴னட்டே²ன வீரியப³லங், சித்தஸ்ஸ அதி⁴ட்டா²னட்டே²ன வீரியப³லங், சித்தஸ்ஸ வோதா³னட்டே²ன வீரியப³லங், விஸேஸாதி⁴க³மட்டே²ன வீரியப³லங், உத்தரி படிவேத⁴ட்டே²ன வீரியப³லங், ஸச்சாபி⁴ஸமயட்டே²ன வீரியப³லங், நிரோதே⁴ பதிட்டா²பகட்டே²ன வீரியப³லங். இத³ங் வீரியப³லங்.
Katamaṃ vīriyabalaṃ? Kosajje na kampatīti – vīriyabalaṃ. Sahajātānaṃ dhammānaṃ upatthambhanaṭṭhena vīriyabalaṃ, kilesānaṃ pariyādānaṭṭhena vīriyabalaṃ, paṭivedhādivisodhanaṭṭhena vīriyabalaṃ, cittassa adhiṭṭhānaṭṭhena vīriyabalaṃ, cittassa vodānaṭṭhena vīriyabalaṃ, visesādhigamaṭṭhena vīriyabalaṃ, uttari paṭivedhaṭṭhena vīriyabalaṃ, saccābhisamayaṭṭhena vīriyabalaṃ, nirodhe patiṭṭhāpakaṭṭhena vīriyabalaṃ. Idaṃ vīriyabalaṃ.
கதமங் ஸதிப³லங்? பமாதே³ ந கம்பதீதி – ஸதிப³லங். ஸஹஜாதானங் த⁴ம்மானங் உபத்த²ம்ப⁴னட்டே²ன ஸதிப³லங்…பே॰… நிரோதே⁴ பதிட்டா²பகட்டே²ன ஸதிப³லங். இத³ங் ஸதிப³லங்.
Katamaṃ satibalaṃ? Pamāde na kampatīti – satibalaṃ. Sahajātānaṃ dhammānaṃ upatthambhanaṭṭhena satibalaṃ…pe… nirodhe patiṭṭhāpakaṭṭhena satibalaṃ. Idaṃ satibalaṃ.
கதமங் ஸமாதி⁴ப³லங்? உத்³த⁴ச்சே ந கம்பதீதி – ஸமாதி⁴ப³லங். ஸஹஜாதானங் த⁴ம்மானங் உபத்த²ம்ப⁴னட்டே²ன ஸமாதி⁴ப³லங்…பே॰… நிரோதே⁴ பதிட்டா²பகட்டே²ன ஸமாதி⁴ப³லங். இத³ங் ஸமாதி⁴ப³லங்.
Katamaṃ samādhibalaṃ? Uddhacce na kampatīti – samādhibalaṃ. Sahajātānaṃ dhammānaṃ upatthambhanaṭṭhena samādhibalaṃ…pe… nirodhe patiṭṭhāpakaṭṭhena samādhibalaṃ. Idaṃ samādhibalaṃ.
கதமங் பஞ்ஞாப³லங்? அவிஜ்ஜாய ந கம்பதீதி – பஞ்ஞாப³லங். ஸஹஜாதானங் த⁴ம்மானங் உபத்த²ம்ப⁴னட்டே²ன பஞ்ஞாப³லங்…பே॰… நிரோதே⁴ பதிட்டா²பகட்டே²ன பஞ்ஞாப³லங். இத³ங் பஞ்ஞாப³லங்.
Katamaṃ paññābalaṃ? Avijjāya na kampatīti – paññābalaṃ. Sahajātānaṃ dhammānaṃ upatthambhanaṭṭhena paññābalaṃ…pe… nirodhe patiṭṭhāpakaṭṭhena paññābalaṃ. Idaṃ paññābalaṃ.
கதமங் ஹிரிப³லங்? நெக்க²ம்மேன காமச்ச²ந்த³ங் ஹிரீயதீதி 3 – ஹிரிப³லங். அப்³யாபாதே³ன ப்³யாபாத³ங் ஹிரீயதீதி – ஹிரிப³லங். ஆலோகஸஞ்ஞாய தி²னமித்³த⁴ங் ஹிரீயதீதி – ஹிரிப³லங். அவிக்கே²பேன உத்³த⁴ச்சங் ஹிரீயதீதி – ஹிரிப³லங். த⁴ம்மவவத்தா²னேன விசிகிச்ச²ங் ஹிரீயதீதி – ஹிரிப³லங். ஞாணேன அவிஜ்ஜங் ஹிரீயதீதி – ஹிரிப³லங். பாமோஜ்ஜேன அரதிங் ஹிரீயதீதி – ஹிரிப³லங். பட²மேன ஜா²னேன நீவரணே ஹிரீயதீதி – ஹிரிப³லங்…பே॰… அரஹத்தமக்³கே³ன ஸப்³ப³கிலேஸே ஹிரீயதீதி – ஹிரிப³லங். இத³ங் ஹிரிப³லங்.
Katamaṃ hiribalaṃ? Nekkhammena kāmacchandaṃ hirīyatīti 4 – hiribalaṃ. Abyāpādena byāpādaṃ hirīyatīti – hiribalaṃ. Ālokasaññāya thinamiddhaṃ hirīyatīti – hiribalaṃ. Avikkhepena uddhaccaṃ hirīyatīti – hiribalaṃ. Dhammavavatthānena vicikicchaṃ hirīyatīti – hiribalaṃ. Ñāṇena avijjaṃ hirīyatīti – hiribalaṃ. Pāmojjena aratiṃ hirīyatīti – hiribalaṃ. Paṭhamena jhānena nīvaraṇe hirīyatīti – hiribalaṃ…pe… arahattamaggena sabbakilese hirīyatīti – hiribalaṃ. Idaṃ hiribalaṃ.
கதமங் ஒத்தப்பப³லங்? நெக்க²ம்மேன காமச்ச²ந்த³ங் ஒத்தப்பதீதி – ஒத்தப்பப³லங். அப்³யாபாதே³ன ப்³யாபாத³ங் ஒத்தப்பதீதி – ஒத்தப்பப³லங். ஆலோகஸஞ்ஞாய தி²னமித்³த⁴ங் ஒத்தப்பதீதி – ஒத்தப்பப³லங். அவிக்கே²பேன உத்³த⁴ச்சங் ஒத்தப்பதீதி – ஒத்தப்பப³லங். த⁴ம்மவவத்தா²னேன விசிகிச்ச²ங் ஒத்தப்பதீதி – ஒத்தப்பப³லங். ஞாணேன அவிஜ்ஜங் ஒத்தப்பதீதி – ஒத்தப்பப³லங் . பாமோஜ்ஜேன அரதிங் ஒத்தப்பதீதி – ஒத்தப்பப³லங். பட²மேன ஜா²னேன நீவரணே ஒத்தப்பதீதி – ஒத்தப்பப³லங்…பே॰… அரஹத்தமக்³கே³ன ஸப்³ப³கிலேஸே ஒத்தப்பதீதி – ஒத்தப்பப³லங். இத³ங் ஒத்தப்பப³லங்.
Katamaṃ ottappabalaṃ? Nekkhammena kāmacchandaṃ ottappatīti – ottappabalaṃ. Abyāpādena byāpādaṃ ottappatīti – ottappabalaṃ. Ālokasaññāya thinamiddhaṃ ottappatīti – ottappabalaṃ. Avikkhepena uddhaccaṃ ottappatīti – ottappabalaṃ. Dhammavavatthānena vicikicchaṃ ottappatīti – ottappabalaṃ. Ñāṇena avijjaṃ ottappatīti – ottappabalaṃ . Pāmojjena aratiṃ ottappatīti – ottappabalaṃ. Paṭhamena jhānena nīvaraṇe ottappatīti – ottappabalaṃ…pe… arahattamaggena sabbakilese ottappatīti – ottappabalaṃ. Idaṃ ottappabalaṃ.
கதமங் படிஸங்கா²னப³லங்? நெக்க²ம்மேன காமச்ச²ந்த³ங் படிஸங்கா²தீதி – படிஸங்கா²னப³லங். அப்³யாபாதே³ன ப்³யாபாத³ங் படிஸங்கா²தீதி – படிஸங்கா²னப³லங். ஆலோகஸஞ்ஞாய தி²னமித்³த⁴ங் படிஸங்கா²தீதி – படிஸங்கா²னப³லங். அவிக்கே²பேன உத்³த⁴ச்சங் படிஸங்கா²தீதி – படிஸங்கா²னப³லங். த⁴ம்மவவத்தா²னேன விசிகிச்ச²ங் படிஸங்கா²தீதி – படிஸங்கா²னப³லங். ஞாணேன அவிஜ்ஜங் படிஸங்கா²தீதி – படிஸங்கா²னப³லங் . பாமோஜ்ஜேன அரதிங் படிஸங்கா²தீதி – படிஸங்கா²னப³லங். பட²மேன ஜா²னேன நீவரணே படிஸங்கா²தீதி – படிஸங்கா²னப³லங்…பே॰… அரஹத்தமக்³கே³ன ஸப்³ப³கிலேஸே படிஸங்கா²தீதி – படிஸங்கா²னப³லங். இத³ங் படிஸங்கா²னப³லங்.
Katamaṃ paṭisaṅkhānabalaṃ? Nekkhammena kāmacchandaṃ paṭisaṅkhātīti – paṭisaṅkhānabalaṃ. Abyāpādena byāpādaṃ paṭisaṅkhātīti – paṭisaṅkhānabalaṃ. Ālokasaññāya thinamiddhaṃ paṭisaṅkhātīti – paṭisaṅkhānabalaṃ. Avikkhepena uddhaccaṃ paṭisaṅkhātīti – paṭisaṅkhānabalaṃ. Dhammavavatthānena vicikicchaṃ paṭisaṅkhātīti – paṭisaṅkhānabalaṃ. Ñāṇena avijjaṃ paṭisaṅkhātīti – paṭisaṅkhānabalaṃ . Pāmojjena aratiṃ paṭisaṅkhātīti – paṭisaṅkhānabalaṃ. Paṭhamena jhānena nīvaraṇe paṭisaṅkhātīti – paṭisaṅkhānabalaṃ…pe… arahattamaggena sabbakilese paṭisaṅkhātīti – paṭisaṅkhānabalaṃ. Idaṃ paṭisaṅkhānabalaṃ.
கதமங் பா⁴வனாப³லங்? காமச்ச²ந்த³ங் பஜஹந்தோ நெக்க²ம்மங் பா⁴வேதீதி – பா⁴வனாப³லங். ப்³யாபாத³ங் பஜஹந்தோ அப்³யாபாத³ங் பா⁴வேதீதி – பா⁴வனாப³லங். தி²னமித்³த⁴ங் பஜஹந்தோ ஆலோகஸஞ்ஞங் பா⁴வேதீதி – பா⁴வனாப³லங். உத்³த⁴ச்சங் பஜஹந்தோ அவிக்கே²பங் பா⁴வேதீதி – பா⁴வனாப³லங். விசிகிச்ச²ங் பஜஹந்தோ த⁴ம்மவவத்தா²னங் பா⁴வேதீதி – பா⁴வனாப³லங். அவிஜ்ஜங் பஜஹந்தோ ஞாணங் பா⁴வேதீதி – பா⁴வனாப³லங். அரதிங் பஜஹந்தோ பாமோஜ்ஜங் பா⁴வேதீதி – பா⁴வனாப³லங். நீவரணே பஜஹந்தோ பட²மங் ஜா²னங் பா⁴வேதீதி – பா⁴வனாப³லங்…பே॰… ஸப்³ப³கிலேஸே பஜஹந்தோ அரஹத்தமக்³க³ங் பா⁴வேதீதி – பா⁴வனாப³லங். இத³ங் பா⁴வனாப³லங்.
Katamaṃ bhāvanābalaṃ? Kāmacchandaṃ pajahanto nekkhammaṃ bhāvetīti – bhāvanābalaṃ. Byāpādaṃ pajahanto abyāpādaṃ bhāvetīti – bhāvanābalaṃ. Thinamiddhaṃ pajahanto ālokasaññaṃ bhāvetīti – bhāvanābalaṃ. Uddhaccaṃ pajahanto avikkhepaṃ bhāvetīti – bhāvanābalaṃ. Vicikicchaṃ pajahanto dhammavavatthānaṃ bhāvetīti – bhāvanābalaṃ. Avijjaṃ pajahanto ñāṇaṃ bhāvetīti – bhāvanābalaṃ. Aratiṃ pajahanto pāmojjaṃ bhāvetīti – bhāvanābalaṃ. Nīvaraṇe pajahanto paṭhamaṃ jhānaṃ bhāvetīti – bhāvanābalaṃ…pe… sabbakilese pajahanto arahattamaggaṃ bhāvetīti – bhāvanābalaṃ. Idaṃ bhāvanābalaṃ.
கதமங் அனவஜ்ஜப³லங்? காமச்ச²ந்த³ஸ்ஸ பஹீனத்தா நெக்க²ம்மே நத்தி² கிஞ்சி வஜ்ஜந்தி – அனவஜ்ஜப³லங். ப்³யாபாத³ஸ்ஸ பஹீனத்தா அப்³யாபாதே³ நத்தி² கிஞ்சி வஜ்ஜந்தி – அனவஜ்ஜப³லங். தி²னமித்³த⁴ஸ்ஸ பஹீனத்தா ஆலோகஸஞ்ஞாய நத்தி² கிஞ்சி வஜ்ஜந்தி – அனவஜ்ஜப³லங். உத்³த⁴ச்சஸ்ஸ பஹீனத்தா அவிக்கே²பே நத்தி² கிஞ்சி வஜ்ஜந்தி – அனவஜ்ஜப³லங். விசிகிச்சா²ய பஹீனத்தா த⁴ம்மவவத்தா²னே நத்தி² கிஞ்சி வஜ்ஜந்தி – அனவஜ்ஜப³லங். அவிஜ்ஜாய பஹீனத்தா ஞாணே நத்தி² கிஞ்சி வஜ்ஜந்தி – அனவஜ்ஜப³லங். அரதியா பஹீனத்தா பாமோஜ்ஜே நத்தி² கிஞ்சி வஜ்ஜந்தி அனவஜ்ஜப³லங். நீவரணானங் பஹீனத்தா பட²மஜ்ஜா²னே நத்தி² கிஞ்சி வஜ்ஜந்தி – அனவஜ்ஜப³லங்…பே॰… ஸப்³ப³கிலேஸானங் பஹீனத்தா அரஹத்தமக்³கே³ நத்தி² கிஞ்சி வஜ்ஜந்தி – அனவஜ்ஜப³லங். இத³ங் அனவஜ்ஜப³லங்.
Katamaṃ anavajjabalaṃ? Kāmacchandassa pahīnattā nekkhamme natthi kiñci vajjanti – anavajjabalaṃ. Byāpādassa pahīnattā abyāpāde natthi kiñci vajjanti – anavajjabalaṃ. Thinamiddhassa pahīnattā ālokasaññāya natthi kiñci vajjanti – anavajjabalaṃ. Uddhaccassa pahīnattā avikkhepe natthi kiñci vajjanti – anavajjabalaṃ. Vicikicchāya pahīnattā dhammavavatthāne natthi kiñci vajjanti – anavajjabalaṃ. Avijjāya pahīnattā ñāṇe natthi kiñci vajjanti – anavajjabalaṃ. Aratiyā pahīnattā pāmojje natthi kiñci vajjanti anavajjabalaṃ. Nīvaraṇānaṃ pahīnattā paṭhamajjhāne natthi kiñci vajjanti – anavajjabalaṃ…pe… sabbakilesānaṃ pahīnattā arahattamagge natthi kiñci vajjanti – anavajjabalaṃ. Idaṃ anavajjabalaṃ.
கதமங் ஸங்க³ஹப³லங்? காமச்ச²ந்த³ங் பஜஹந்தோ நெக்க²ம்மவஸேன சித்தங் ஸங்க³ண்ஹாதீதி – ஸங்க³ஹப³லங். ப்³யாபாத³ங் பஜஹந்தோ அப்³யாபாத³வஸேன சித்தங் ஸங்க³ண்ஹாதீதி – ஸங்க³ஹப³லங். தி²னமித்³த⁴ங் பஜஹந்தோ ஆலோகஸஞ்ஞாவஸேன சித்தங் ஸங்க³ண்ஹாதீதி – ஸங்க³ஹப³லங்…பே॰… ஸப்³ப³கிலேஸே பஜஹந்தோ அரஹத்தமக்³க³வஸேன சித்தங் ஸங்க³ண்ஹாதீதி – ஸங்க³ஹப³லங். இத³ங் ஸங்க³ஹப³லங்.
Katamaṃ saṅgahabalaṃ? Kāmacchandaṃ pajahanto nekkhammavasena cittaṃ saṅgaṇhātīti – saṅgahabalaṃ. Byāpādaṃ pajahanto abyāpādavasena cittaṃ saṅgaṇhātīti – saṅgahabalaṃ. Thinamiddhaṃ pajahanto ālokasaññāvasena cittaṃ saṅgaṇhātīti – saṅgahabalaṃ…pe… sabbakilese pajahanto arahattamaggavasena cittaṃ saṅgaṇhātīti – saṅgahabalaṃ. Idaṃ saṅgahabalaṃ.
கதமங் க²ந்திப³லங்? காமச்ச²ந்த³ஸ்ஸ பஹீனத்தா நெக்க²ம்மங் க²மதீதி – க²ந்திப³லங். ப்³யாபாத³ஸ்ஸ பஹீனத்தா அப்³யாபாதோ³ க²மதீதி – க²ந்திப³லங். தி²னமித்³த⁴ஸ்ஸ பஹீனத்தா ஆலோகஸஞ்ஞா க²மதீதி – க²ந்திப³லங். உத்³த⁴ச்சஸ்ஸ பஹீனத்தா அவிக்கே²போ க²மதீதி – க²ந்திப³லங். விசிகிச்சா²ய பஹீனத்தா த⁴ம்மவவத்தா²னங் க²மதீதி – க²ந்திப³லங். அவிஜ்ஜாய பஹீனத்தா ஞாணங் க²மதீதி – க²ந்திப³லங். அரதியா பஹீனத்தா பாமோஜ்ஜங் க²மதீதி – க²ந்திப³லங். நீவரணானங் பஹீனத்தா பட²மங் ஜா²னங் க²மதீதி – க²ந்திப³லங்…பே॰… ஸப்³ப³கிலேஸானங் பஹீனத்தா அரஹத்தமக்³கோ³ க²மதீதி – க²ந்திப³லங். இத³ங் க²ந்திப³லங்.
Katamaṃ khantibalaṃ? Kāmacchandassa pahīnattā nekkhammaṃ khamatīti – khantibalaṃ. Byāpādassa pahīnattā abyāpādo khamatīti – khantibalaṃ. Thinamiddhassa pahīnattā ālokasaññā khamatīti – khantibalaṃ. Uddhaccassa pahīnattā avikkhepo khamatīti – khantibalaṃ. Vicikicchāya pahīnattā dhammavavatthānaṃ khamatīti – khantibalaṃ. Avijjāya pahīnattā ñāṇaṃ khamatīti – khantibalaṃ. Aratiyā pahīnattā pāmojjaṃ khamatīti – khantibalaṃ. Nīvaraṇānaṃ pahīnattā paṭhamaṃ jhānaṃ khamatīti – khantibalaṃ…pe… sabbakilesānaṃ pahīnattā arahattamaggo khamatīti – khantibalaṃ. Idaṃ khantibalaṃ.
கதமங் பஞ்ஞத்திப³லங்? காமச்ச²ந்த³ங் பஜஹந்தோ நெக்க²ம்மவஸேன சித்தங் பஞ்ஞபேதீதி – பஞ்ஞத்திப³லங். ப்³யாபாத³ங் பஜஹந்தோ அப்³யாபாத³வஸேன சித்தங் பஞ்ஞபேதீதி – பஞ்ஞத்திப³லங். தி²னமித்³த⁴ங் பஜஹந்தோ ஆலோகஸஞ்ஞாவஸேன சித்தங் பஞ்ஞபேதீதி – பஞ்ஞத்திப³லங்…பே॰… ஸப்³ப³கிலேஸே பஜஹந்தோ அரஹத்தமக்³க³வஸேன சித்தங் பஞ்ஞபேதீதி – பஞ்ஞத்திப³லங். இத³ங் பஞ்ஞத்திப³லங்.
Katamaṃ paññattibalaṃ? Kāmacchandaṃ pajahanto nekkhammavasena cittaṃ paññapetīti – paññattibalaṃ. Byāpādaṃ pajahanto abyāpādavasena cittaṃ paññapetīti – paññattibalaṃ. Thinamiddhaṃ pajahanto ālokasaññāvasena cittaṃ paññapetīti – paññattibalaṃ…pe… sabbakilese pajahanto arahattamaggavasena cittaṃ paññapetīti – paññattibalaṃ. Idaṃ paññattibalaṃ.
கதமங் நிஜ்ஜ²த்திப³லங்? காமச்ச²ந்த³ங் பஜஹந்தோ நெக்க²ம்மவஸேன சித்தங் நிஜ்ஜா²பேதீதி – நிஜ்ஜ²த்திப³லங். ப்³யாபாத³ங் பஜஹந்தோ அப்³யாபாத³வஸேன சித்தங் நிஜ்ஜா²பேதீதி – நிஜ்ஜ²த்திப³லங். தி²னமித்³த⁴ங் பஜஹந்தோ ஆலோகஸஞ்ஞாவஸேன சித்தங் நிஜ்ஜா²பேதீதி – நிஜ்ஜ²த்திப³லங்…பே॰… ஸப்³ப³கிலேஸே பஜஹந்தோ அரஹத்தமக்³க³வஸேன சித்தங் நிஜ்ஜா²பேதீதி – நிஜ்ஜ²த்திப³லங். இத³ங் நிஜ்ஜ²த்திப³லங்.
Katamaṃ nijjhattibalaṃ? Kāmacchandaṃ pajahanto nekkhammavasena cittaṃ nijjhāpetīti – nijjhattibalaṃ. Byāpādaṃ pajahanto abyāpādavasena cittaṃ nijjhāpetīti – nijjhattibalaṃ. Thinamiddhaṃ pajahanto ālokasaññāvasena cittaṃ nijjhāpetīti – nijjhattibalaṃ…pe… sabbakilese pajahanto arahattamaggavasena cittaṃ nijjhāpetīti – nijjhattibalaṃ. Idaṃ nijjhattibalaṃ.
கதமங் இஸ்ஸரியப³லங்? காமச்ச²ந்த³ங் பஜஹந்தோ நெக்க²ம்மவஸேன சித்தங் வஸங் வத்தேதீதி – இஸ்ஸரியப³லங். ப்³யாபாத³ங் பஜஹந்தோ அப்³யாபாத³வஸேன சித்தங் வஸங் வத்தேதீதி – இஸ்ஸரியப³லங். தி²னமித்³த⁴ங் பஜஹந்தோ ஆலோகஸஞ்ஞாவஸேன சித்தங் வஸங் வத்தேதீதி – இஸ்ஸரியப³லங்…பே॰… ஸப்³ப³கிலேஸே பஜஹந்தோ அரஹத்தமக்³க³வஸேன சித்தங் வஸங் வத்தேதீதி – இஸ்ஸரியப³லங். இத³ங் இஸ்ஸரியப³லங்.
Katamaṃ issariyabalaṃ? Kāmacchandaṃ pajahanto nekkhammavasena cittaṃ vasaṃ vattetīti – issariyabalaṃ. Byāpādaṃ pajahanto abyāpādavasena cittaṃ vasaṃ vattetīti – issariyabalaṃ. Thinamiddhaṃ pajahanto ālokasaññāvasena cittaṃ vasaṃ vattetīti – issariyabalaṃ…pe… sabbakilese pajahanto arahattamaggavasena cittaṃ vasaṃ vattetīti – issariyabalaṃ. Idaṃ issariyabalaṃ.
கதமங் அதி⁴ட்டா²னப³லங்? காமச்ச²ந்த³ங் பஜஹந்தோ நெக்க²ம்மவஸேன சித்தங் அதி⁴ட்டா²தீதி – அதி⁴ட்டா²னப³லங். ப்³யாபாத³ங் பஜஹந்தோ அப்³யாபாத³வஸேன சித்தங் அதி⁴ட்டா²தீதி – அதி⁴ட்டா²னப³லங். தி²னமித்³த⁴ங் பஜஹந்தோ ஆலோகஸஞ்ஞாவஸேன சித்தங் அதி⁴ட்டா²தீதி – அதி⁴ட்டா²னப³லங்…பே॰… ஸப்³ப³கிலேஸே பஜஹந்தோ அரஹத்தமக்³க³வஸேன சித்தங் அதி⁴ட்டா²தீதி – அதி⁴ட்டா²னப³லங். இத³ங் அதி⁴ட்டா²னப³லங்.
Katamaṃ adhiṭṭhānabalaṃ? Kāmacchandaṃ pajahanto nekkhammavasena cittaṃ adhiṭṭhātīti – adhiṭṭhānabalaṃ. Byāpādaṃ pajahanto abyāpādavasena cittaṃ adhiṭṭhātīti – adhiṭṭhānabalaṃ. Thinamiddhaṃ pajahanto ālokasaññāvasena cittaṃ adhiṭṭhātīti – adhiṭṭhānabalaṃ…pe… sabbakilese pajahanto arahattamaggavasena cittaṃ adhiṭṭhātīti – adhiṭṭhānabalaṃ. Idaṃ adhiṭṭhānabalaṃ.
கதமங் ஸமத²ப³லங்? நெக்க²ம்மவஸேன சித்தஸ்ஸ ஏகக்³க³தா அவிக்கே²போ ஸமத²ப³லங், அப்³யாபாத³வஸேன சித்தஸ்ஸ ஏகக்³க³தா அவிக்கே²போ ஸமத²ப³லங், ஆலோகஸஞ்ஞாவஸேன சித்தஸ்ஸ ஏகக்³க³தா அவிக்கே²போ ஸமத²ப³லங்…பே॰… படினிஸ்ஸக்³கா³னுபஸ்ஸீ அஸ்ஸாஸவஸேன சித்தஸ்ஸ ஏகக்³க³தா அவிக்கே²போ ஸமத²ப³லங், படினிஸ்ஸக்³கா³னுபஸ்ஸீ பஸ்ஸாஸவஸேன சித்தஸ்ஸ ஏகக்³க³தா அவிக்கே²போ ஸமத²ப³லங்.
Katamaṃ samathabalaṃ? Nekkhammavasena cittassa ekaggatā avikkhepo samathabalaṃ, abyāpādavasena cittassa ekaggatā avikkhepo samathabalaṃ, ālokasaññāvasena cittassa ekaggatā avikkhepo samathabalaṃ…pe… paṭinissaggānupassī assāsavasena cittassa ekaggatā avikkhepo samathabalaṃ, paṭinissaggānupassī passāsavasena cittassa ekaggatā avikkhepo samathabalaṃ.
ஸமத²ப³லந்தி கேனட்டே²ன ஸமத²ப³லங்? பட²மேன ஜா²னேன நீவரணே ந கம்பதீதி – ஸமத²ப³லங். து³தியேன ஜா²னேன விதக்கவிசாரே ந கம்பதீதி – ஸமத²ப³லங். ததியேன ஜா²னேன பீதியா ந கம்பதீதி – ஸமத²ப³லங். சதுத்தே²ன ஜா²னேன ஸுக²து³க்கே² ந கம்பதீதி – ஸமத²ப³லங். ஆகாஸானஞ்சாயதனஸமாபத்தியா ரூபஸஞ்ஞாய படிக⁴ஸஞ்ஞாய நானத்தஸஞ்ஞாய ந கம்பதீதி – ஸமத²ப³லங் . விஞ்ஞாணஞ்சாயதனஸமாபத்தியா ஆகாஸானஞ்சாயதனஸஞ்ஞாய ந கம்பதீதி – ஸமத²ப³லங். ஆகிஞ்சஞ்ஞாயதனஸமாபத்தியா விஞ்ஞாணஞ்சாயதனஸஞ்ஞாய ந கம்பதீதி – ஸமத²ப³லங். நேவஸஞ்ஞானாஸஞ்ஞாயதனஸமாபத்தியா ஆகிஞ்சஞ்ஞாயதனஸஞ்ஞாய ந கம்பதீதி – ஸமத²ப³லங். உத்³த⁴ச்சே ச உத்³த⁴ச்சஸஹக³தகிலேஸே ச க²ந்தே⁴ ச ந கம்பதீ ந சலதி ந வேத⁴தீதி – ஸமத²ப³லங். இத³ங் ஸமத²ப³லங்.
Samathabalanti kenaṭṭhena samathabalaṃ? Paṭhamena jhānena nīvaraṇe na kampatīti – samathabalaṃ. Dutiyena jhānena vitakkavicāre na kampatīti – samathabalaṃ. Tatiyena jhānena pītiyā na kampatīti – samathabalaṃ. Catutthena jhānena sukhadukkhe na kampatīti – samathabalaṃ. Ākāsānañcāyatanasamāpattiyā rūpasaññāya paṭighasaññāya nānattasaññāya na kampatīti – samathabalaṃ . Viññāṇañcāyatanasamāpattiyā ākāsānañcāyatanasaññāya na kampatīti – samathabalaṃ. Ākiñcaññāyatanasamāpattiyā viññāṇañcāyatanasaññāya na kampatīti – samathabalaṃ. Nevasaññānāsaññāyatanasamāpattiyā ākiñcaññāyatanasaññāya na kampatīti – samathabalaṃ. Uddhacce ca uddhaccasahagatakilese ca khandhe ca na kampatī na calati na vedhatīti – samathabalaṃ. Idaṃ samathabalaṃ.
கதமங் விபஸ்ஸனாப³லங்? அனிச்சானுபஸ்ஸனா விபஸ்ஸனாப³லங், து³க்கா²னுபஸ்ஸனா விபஸ்ஸனாப³லங்…பே॰… படினிஸ்ஸக்³கா³னுபஸ்ஸனா விபஸ்ஸனாப³லங், ரூபே அனிச்சானுபஸ்ஸனா விபஸ்ஸனாப³லங், ரூபே து³க்கா²னுபஸ்ஸனா விபஸ்ஸனாப³லங்…பே॰… ரூபே படினஸ்ஸக்³கா³னுபஸ்ஸனா விபஸ்ஸனாப³லங், வேத³னாய…பே॰… ஸஞ்ஞாய… ஸங்கா²ரேஸு… விஞ்ஞாணே… சக்கு²ஸ்மிங்…பே॰… ஜராமரணே அனிச்சானுபஸ்ஸனா விபஸ்ஸனாப³லங், ஜராமரணே து³க்கா²னுபஸ்ஸனா விபஸ்ஸனாப³லங்…பே॰… ஜராமரணே படினிஸ்ஸக்³கா³னுபஸ்ஸனா விபஸ்ஸனாப³லங். விபஸ்ஸனாப³லந்தி கேனட்டே²ன விபஸ்ஸனாப³லங்? அனிச்சானுபஸ்ஸனாய நிச்சஸஞ்ஞாய ந கம்பதீதி – விபஸ்ஸனாப³லங். து³க்கா²னுபஸ்ஸனாய ஸுக²ஸஞ்ஞாய ந கம்பதீதி – விபஸ்ஸனாப³லங். அனத்தானுபஸ்ஸனாய அத்தஸஞ்ஞாய கம்பதீதி – விபஸ்ஸனாப³லங். நிப்³பி³தா³னுபஸ்ஸனாய நந்தி³யா ந கம்பதீதி – விபஸ்ஸனாப³லங். விராகா³னுபஸ்ஸனாய ராகே³ ந கம்பதீதி – விபஸ்ஸனாப³லங். நிரோதா⁴னுபஸ்ஸனா ஸமுத³யே ந கம்பதீதி – விபஸ்ஸனாப³லங் . படினிஸ்ஸக்³கா³னுபஸ்ஸனாய ஆதா³னே ந கம்பதீதி – விபஸ்ஸனாப³லங். அவிஜ்ஜாய அவிஜ்ஜாஸஹக³தகிலேஸே ச க²ந்தே⁴ ச ந கம்பதி ந சலதி ந வேத⁴தீதி – விபஸ்ஸனாப³லங். இத³ங் விபஸ்ஸனாப³லங்.
Katamaṃ vipassanābalaṃ? Aniccānupassanā vipassanābalaṃ, dukkhānupassanā vipassanābalaṃ…pe… paṭinissaggānupassanā vipassanābalaṃ, rūpe aniccānupassanā vipassanābalaṃ, rūpe dukkhānupassanā vipassanābalaṃ…pe… rūpe paṭinassaggānupassanā vipassanābalaṃ, vedanāya…pe… saññāya… saṅkhāresu… viññāṇe… cakkhusmiṃ…pe… jarāmaraṇe aniccānupassanā vipassanābalaṃ, jarāmaraṇe dukkhānupassanā vipassanābalaṃ…pe… jarāmaraṇe paṭinissaggānupassanā vipassanābalaṃ. Vipassanābalanti kenaṭṭhena vipassanābalaṃ? Aniccānupassanāya niccasaññāya na kampatīti – vipassanābalaṃ. Dukkhānupassanāya sukhasaññāya na kampatīti – vipassanābalaṃ. Anattānupassanāya attasaññāya kampatīti – vipassanābalaṃ. Nibbidānupassanāya nandiyā na kampatīti – vipassanābalaṃ. Virāgānupassanāya rāge na kampatīti – vipassanābalaṃ. Nirodhānupassanā samudaye na kampatīti – vipassanābalaṃ . Paṭinissaggānupassanāya ādāne na kampatīti – vipassanābalaṃ. Avijjāya avijjāsahagatakilese ca khandhe ca na kampati na calati na vedhatīti – vipassanābalaṃ. Idaṃ vipassanābalaṃ.
கதமானி த³ஸ ஸேக²ப³லானி, த³ஸ அஸேக²ப³லானி? ஸம்மாதி³ட்டி²ங் 5 ஸிக்க²தீதி – ஸேக²ப³லங். தத்த² ஸிக்கி²தத்தா அஸேக²ப³லங். ஸம்மாஸங்கப்பங் ஸிக்க²தீதி – ஸேக²ப³லங். தத்த² ஸிக்கி²தத்தா – அஸேக²ப³லங் . ஸம்மாவாசங்…பே॰… ஸம்மாகம்மந்தங்… ஸம்மாஆஜீவங்… ஸம்மாவாயாமங்… ஸம்மாஸதிங்… ஸம்மாஸமாதி⁴ங்… ஸம்மாஞாணங்…பே॰… ஸம்மாவிமுத்திங் ஸிக்க²தீதி – ஸேக²ப³லங். தத்த² ஸிக்கி²தத்தா – அஸேக²ப³லங். இமானி த³ஸ ஸேக²ப³லானி, த³ஸ அஸேக²ப³லானி.
Katamāni dasa sekhabalāni, dasa asekhabalāni? Sammādiṭṭhiṃ 6 sikkhatīti – sekhabalaṃ. Tattha sikkhitattā asekhabalaṃ. Sammāsaṅkappaṃ sikkhatīti – sekhabalaṃ. Tattha sikkhitattā – asekhabalaṃ . Sammāvācaṃ…pe… sammākammantaṃ… sammāājīvaṃ… sammāvāyāmaṃ… sammāsatiṃ… sammāsamādhiṃ… sammāñāṇaṃ…pe… sammāvimuttiṃ sikkhatīti – sekhabalaṃ. Tattha sikkhitattā – asekhabalaṃ. Imāni dasa sekhabalāni, dasa asekhabalāni.
கதமானி த³ஸ கீ²ணாஸவப³லானி? 7 இத⁴ கீ²ணாஸவஸ்ஸ பி⁴க்கு²னோ அனிச்சதோ ஸப்³பே³ ஸங்கா²ரா யதா²பூ⁴தங் ஸம்மப்பஞ்ஞாய ஸுதி³ட்டா² ஹொந்தி. யம்பி கீ²ணாஸவஸ்ஸ பி⁴க்கு²னோ அனிச்சதோ ஸப்³பே³ ஸங்கா²ரா யதா²பூ⁴தங் ஸம்மப்பஞ்ஞாய ஸுதி³ட்டா² ஹொந்தி, இத³ம்பி கீ²ணாஸவஸ்ஸ பி⁴க்கு²னோ ப³லங் ஹோதி, யங் ப³லங் ஆக³ம்ம கீ²ணாஸவோ பி⁴க்கு² ஆஸவானங் க²யங் படிஜானாதி – ‘‘கீ²ணா மே ஆஸவா’’தி.
Katamāni dasa khīṇāsavabalāni?8 Idha khīṇāsavassa bhikkhuno aniccato sabbe saṅkhārā yathābhūtaṃ sammappaññāya sudiṭṭhā honti. Yampi khīṇāsavassa bhikkhuno aniccato sabbe saṅkhārā yathābhūtaṃ sammappaññāya sudiṭṭhā honti, idampi khīṇāsavassa bhikkhuno balaṃ hoti, yaṃ balaṃ āgamma khīṇāsavo bhikkhu āsavānaṃ khayaṃ paṭijānāti – ‘‘khīṇā me āsavā’’ti.
புன சபரங் கீ²ணாஸவஸ்ஸ பி⁴க்கு²னோ அங்கா³ரகாஸூபமா காமா யதா²பூ⁴தங் ஸம்மப்பஞ்ஞாய ஸுதி³ட்டா² ஹொந்தி. யம்பி கீ²ணாஸவஸ்ஸ பி⁴க்கு²னோ அங்கா³ரகாஸூபமா காமா யதா²பூ⁴தங் ஸம்மப்பஞ்ஞாய ஸுதி³ட்டா² ஹொந்தி, இத³ம்பி கீ²ணாஸவஸ்ஸ பி⁴க்கு²னோ ப³லங் ஹோதி, யங் ப³லங் ஆக³ம்ம கீ²ணாஸவோ பி⁴க்கு² ஆஸவானங் க²யங் படிஜானாதி – ‘‘கீ²ணா மே ஆஸவா’’தி.
Puna caparaṃ khīṇāsavassa bhikkhuno aṅgārakāsūpamā kāmā yathābhūtaṃ sammappaññāya sudiṭṭhā honti. Yampi khīṇāsavassa bhikkhuno aṅgārakāsūpamā kāmā yathābhūtaṃ sammappaññāya sudiṭṭhā honti, idampi khīṇāsavassa bhikkhuno balaṃ hoti, yaṃ balaṃ āgamma khīṇāsavo bhikkhu āsavānaṃ khayaṃ paṭijānāti – ‘‘khīṇā me āsavā’’ti.
புன சபரங் கீ²ணாஸவஸ்ஸ பி⁴க்கு²னோ விவேகனின்னங் சித்தங் ஹோதி விவேகபோணங் விவேகபப்³பா⁴ரங் விவேகட்ட²ங் நெக்க²ம்மாபி⁴ரதங் ப்³யந்தீபூ⁴தங் 9 ஸப்³ப³ஸோ ஆஸவட்டா²னியேஹி த⁴ம்மேஹி. யம்பி கீ²ணாஸவஸ்ஸ பி⁴க்கு²னோ விவேகனின்னங் சித்தங் ஹோதி விவேகபோணங் விவேகபப்³பா⁴ரங் விவேகட்ட²ங் நெக்க²ம்மாபி⁴ரதங் ப்³யந்திபூ⁴தங் ஸப்³ப³ஸோ ஆஸவட்டா²னியேஹி த⁴ம்மேஹி, இத³ம்பி கீ²ணாஸவஸ்ஸ பி⁴க்கு²னோ ப³லங் ஹோதி, யங் ப³லங் ஆக³ம்ம கீ²ணாஸவோ பி⁴க்கு² ஆஸவானங் க²யங் படிஜானாதி – ‘‘கீ²ணா மே ஆஸவா’’தி.
Puna caparaṃ khīṇāsavassa bhikkhuno vivekaninnaṃ cittaṃ hoti vivekapoṇaṃ vivekapabbhāraṃ vivekaṭṭhaṃ nekkhammābhirataṃ byantībhūtaṃ 10 sabbaso āsavaṭṭhāniyehi dhammehi. Yampi khīṇāsavassa bhikkhuno vivekaninnaṃ cittaṃ hoti vivekapoṇaṃ vivekapabbhāraṃ vivekaṭṭhaṃ nekkhammābhirataṃ byantibhūtaṃ sabbaso āsavaṭṭhāniyehi dhammehi, idampi khīṇāsavassa bhikkhuno balaṃ hoti, yaṃ balaṃ āgamma khīṇāsavo bhikkhu āsavānaṃ khayaṃ paṭijānāti – ‘‘khīṇā me āsavā’’ti.
புன சபரங் கீ²ணாஸவஸ்ஸ பி⁴க்கு²னோ சத்தாரோ ஸதிபட்டா²னா பா⁴விதா ஹொந்தி ஸுபா⁴விதா. யம்பி கீ²ணாஸவஸ்ஸ பி⁴க்கு²னோ சத்தாரோ ஸதிபட்டா²னா பா⁴விதா ஹொந்தி ஸுபா⁴விதா, இத³ம்பி கீ²ணாஸவஸ்ஸ பி⁴க்கு²னோ ப³லங் ஹோதி, யங் ப³லங் ஆக³ம்ம கீ²ணாஸவோ பி⁴க்கு² ஆஸவானங் க²யங் படிஜானாதி – ‘‘கீ²ணா மே ஆஸவா’’தி.
Puna caparaṃ khīṇāsavassa bhikkhuno cattāro satipaṭṭhānā bhāvitā honti subhāvitā. Yampi khīṇāsavassa bhikkhuno cattāro satipaṭṭhānā bhāvitā honti subhāvitā, idampi khīṇāsavassa bhikkhuno balaṃ hoti, yaṃ balaṃ āgamma khīṇāsavo bhikkhu āsavānaṃ khayaṃ paṭijānāti – ‘‘khīṇā me āsavā’’ti.
புன சபரங் கீ²ணாஸவஸ்ஸ பி⁴க்கு²னோ சத்தாரோ ஸம்மப்பதா⁴னா பா⁴விதா ஹொந்தி ஸுபா⁴விதா…பே॰… சத்தாரோ இத்³தி⁴பாதா³ பா⁴விதா ஹொந்தி ஸுபா⁴விதா… பஞ்சிந்த்³ரியானி பா⁴விதானி ஹொந்தி ஸுபா⁴விதானி… பஞ்ச ப³லானி பா⁴விதானி ஹொந்தி ஸுபா⁴விதானி… ஸத்த பொ³ஜ்ஜ²ங்கா³ பா⁴விதா ஹொந்தி ஸுபா⁴விதா…பே॰… அரியோ அட்ட²ங்கி³கோ மக்³கோ³ பா⁴விதோ ஹோதி ஸுபா⁴விதோ. யம்பி கீ²ணாஸவஸ்ஸ பி⁴க்கு²னோ அட்ட²ங்கி³கோ மக்³கோ³ பா⁴விதோ ஹோதி ஸுபா⁴விதோ, இத³ம்பி கீ²ணாஸவஸ்ஸ பி⁴க்கு²னோ ப³லங் ஹோதி, யங் ப³லங் ஆக³ம்ம கீ²ணாஸவோ பி⁴க்கு² ஆஸவானங் க²யங் படிஜானாதி – ‘‘கீ²ணா மே ஆஸவா’’தி. இமானி த³ஸ கீ²ணாஸவப³லானி.
Puna caparaṃ khīṇāsavassa bhikkhuno cattāro sammappadhānā bhāvitā honti subhāvitā…pe… cattāro iddhipādā bhāvitā honti subhāvitā… pañcindriyāni bhāvitāni honti subhāvitāni… pañca balāni bhāvitāni honti subhāvitāni… satta bojjhaṅgā bhāvitā honti subhāvitā…pe… ariyo aṭṭhaṅgiko maggo bhāvito hoti subhāvito. Yampi khīṇāsavassa bhikkhuno aṭṭhaṅgiko maggo bhāvito hoti subhāvito, idampi khīṇāsavassa bhikkhuno balaṃ hoti, yaṃ balaṃ āgamma khīṇāsavo bhikkhu āsavānaṃ khayaṃ paṭijānāti – ‘‘khīṇā me āsavā’’ti. Imāni dasa khīṇāsavabalāni.
கதமானி த³ஸ இத்³தி⁴ப³லானி? அதி⁴ட்டா²னா இத்³தி⁴, விகுப்³ப³னா இத்³தி⁴, மனோமயா இத்³தி⁴, ஞாணவிப்பா²ரா இத்³தி⁴, ஸமாதி⁴விப்பா²ரா இத்³தி⁴, அரியா இத்³தி⁴, கம்மவிபாகஜா இத்³தி⁴, புஞ்ஞவதோ இத்³தி⁴, விஜ்ஜாமயா இத்³தி⁴, தத்த² தத்த² ஸம்மா பயோக³ப்பச்சயா இஜ்ஜ²னட்டே²ன இத்³தி⁴ – இமானி த³ஸ இத்³தி⁴ப³லானி.
Katamāni dasa iddhibalāni? Adhiṭṭhānā iddhi, vikubbanā iddhi, manomayā iddhi, ñāṇavipphārā iddhi, samādhivipphārā iddhi, ariyā iddhi, kammavipākajā iddhi, puññavato iddhi, vijjāmayā iddhi, tattha tattha sammā payogappaccayā ijjhanaṭṭhena iddhi – imāni dasa iddhibalāni.
கதமானி த³ஸ ததா²க³தப³லானி? இத⁴ ததா²க³தோ டா²னஞ்ச டா²னதோ அட்டா²னஞ்ச அட்டா²னதோ யதா²பூ⁴தங் பஜானாதி. யம்பி ததா²க³தோ டா²னஞ்ச டா²னதோ அட்டா²னஞ்ச அட்டா²னதோ யதா²பூ⁴தங் பஜானாதி, இத³ம்பி ததா²க³தஸ்ஸ ததா²க³தப³லங் ஹோதி, யங் ப³லங் ஆக³ம்ம ததா²க³தோ ஆஸப⁴ங் டா²னங் படிஜானாதி பரிஸாஸு ஸீஹனாத³ங் நத³தி, ப்³ரஹ்மசக்கங் பவத்தேதி.
Katamāni dasa tathāgatabalāni? Idha tathāgato ṭhānañca ṭhānato aṭṭhānañca aṭṭhānato yathābhūtaṃ pajānāti. Yampi tathāgato ṭhānañca ṭhānato aṭṭhānañca aṭṭhānato yathābhūtaṃ pajānāti, idampi tathāgatassa tathāgatabalaṃ hoti, yaṃ balaṃ āgamma tathāgato āsabhaṃ ṭhānaṃ paṭijānāti parisāsu sīhanādaṃ nadati, brahmacakkaṃ pavatteti.
புன சபரங் ததா²க³தோ அதீதானாக³தபச்சுப்பன்னானங் கம்மஸமாதா³னானங் டா²னஸோ ஹேதுஸோ விபாகங் யதா²பூ⁴தங் பஜானாதி. யம்பி ததா²க³தோ அதீதானாக³தபச்சுப்பன்னானங் கம்மஸமாதா³னானங் டா²னஸோ ஹேதுஸோ விபாகங் யதா²பூ⁴தங் பஜானாதி, இத³ம்பி ததா²க³தஸ்ஸ ததா²க³தப³லங் ஹோதி, யங் ப³லங் ஆக³ம்ம ததா²க³தோ ஆஸப⁴ங் டா²னங் படிஜானாதி, பரிஸாஸு ஸீஹனாத³ங், நத³தி, ப்³ரஹ்மசக்கங் பவத்தேதி.
Puna caparaṃ tathāgato atītānāgatapaccuppannānaṃ kammasamādānānaṃ ṭhānaso hetuso vipākaṃ yathābhūtaṃ pajānāti. Yampi tathāgato atītānāgatapaccuppannānaṃ kammasamādānānaṃ ṭhānaso hetuso vipākaṃ yathābhūtaṃ pajānāti, idampi tathāgatassa tathāgatabalaṃ hoti, yaṃ balaṃ āgamma tathāgato āsabhaṃ ṭhānaṃ paṭijānāti, parisāsu sīhanādaṃ, nadati, brahmacakkaṃ pavatteti.
புன சபரங் ததா²க³தோ ஸப்³ப³த்த²கா³மினிங் படிபத³ங் 11 யதா²பூ⁴தங் பஜானாதி. யம்பி ததா²க³தோ ஸப்³ப³த்த²கா³மினிங் படிபத³ங் யதா²பூ⁴தங் பஜானாதி, இத³ம்பி ததா²க³தஸ்ஸ ததா²க³தப³லங் ஹோதி, யங் ப³லங் ஆக³ம்ம ததா²க³தோ ஆஸப⁴ங் டா²னங் படிஜானாதி, பரிஸாஸு ஸீஹனாத³ங் நத³தி, ப்³ரஹ்மசக்கங் பவத்தேதி.
Puna caparaṃ tathāgato sabbatthagāminiṃ paṭipadaṃ 12 yathābhūtaṃ pajānāti. Yampi tathāgato sabbatthagāminiṃ paṭipadaṃ yathābhūtaṃ pajānāti, idampi tathāgatassa tathāgatabalaṃ hoti, yaṃ balaṃ āgamma tathāgato āsabhaṃ ṭhānaṃ paṭijānāti, parisāsu sīhanādaṃ nadati, brahmacakkaṃ pavatteti.
புன சபரங் ததா²க³தோ அனேகதா⁴துனானாதா⁴துலோகங் யதா²பூ⁴தங் பஜானாதி. யம்பி ததா²க³தோ அனேகதா⁴துனானாதா⁴துலோகங் யதா²பூ⁴தங் பஜானாதி, இத³ம்பி ததா²க³தஸ்ஸ…பே॰….
Puna caparaṃ tathāgato anekadhātunānādhātulokaṃ yathābhūtaṃ pajānāti. Yampi tathāgato anekadhātunānādhātulokaṃ yathābhūtaṃ pajānāti, idampi tathāgatassa…pe….
புன சபரங் ததா²க³தோ ஸத்தானங் நானாதி⁴முத்திகதங் யதா²பூ⁴தங் பஜானாதி. யம்பி ததா²க³தோ ஸத்தானங் நானாதி⁴முத்திகதங் யதா²பூ⁴தங் பஜானாதி, இத³ம்பி ததா²க³தஸ்ஸ…பே॰….
Puna caparaṃ tathāgato sattānaṃ nānādhimuttikataṃ yathābhūtaṃ pajānāti. Yampi tathāgato sattānaṃ nānādhimuttikataṃ yathābhūtaṃ pajānāti, idampi tathāgatassa…pe….
புன சபரங் ததா²க³தோ பரஸத்தானங் பரபுக்³க³லானங் இந்த்³ரியபரோபரியத்தங் யதா²பூ⁴தங் பஜானாதி. யம்பி ததா²க³தோ பரஸத்தானங் பரபுக்³க³லானங் இந்த்³ரியபரோபரியத்தங் யதா²பூ⁴தங் பஜானாதி, இத³ம்பி ததா²க³தஸ்ஸ…பே॰….
Puna caparaṃ tathāgato parasattānaṃ parapuggalānaṃ indriyaparopariyattaṃ yathābhūtaṃ pajānāti. Yampi tathāgato parasattānaṃ parapuggalānaṃ indriyaparopariyattaṃ yathābhūtaṃ pajānāti, idampi tathāgatassa…pe….
புன சபரங் ததா²க³தோ ஜா²னவிமொக்க²ஸமாதி⁴ஸமாபத்தீனங் ஸங்கிலேஸங் வோதா³னங் வுட்டா²னங் யதா²பூ⁴தங் பஜானாதி. யம்பி ததா²க³தோ ஜா²னவிமொக்க²ஸமாதி⁴ஸமாபத்தீனங் ஸங்கிலேஸங் வோதா³னங் வுட்டா²னங் யதா²பூ⁴தங் பஜானாதி, இத³ம்பி ததா²க³தஸ்ஸ…பே॰….
Puna caparaṃ tathāgato jhānavimokkhasamādhisamāpattīnaṃ saṃkilesaṃ vodānaṃ vuṭṭhānaṃ yathābhūtaṃ pajānāti. Yampi tathāgato jhānavimokkhasamādhisamāpattīnaṃ saṃkilesaṃ vodānaṃ vuṭṭhānaṃ yathābhūtaṃ pajānāti, idampi tathāgatassa…pe….
புன சபரங் ததா²க³தோ அனேகவிஹிதங் புப்³பே³னிவாஸங் அனுஸ்ஸரதி, ஸெய்யதி²த³ங் – ஏகம்பி ஜாதிங் த்³வேபி ஜாதியோ…பே॰… இதி ஸாகாரங் ஸஉத்³தே³ஸங் அனேகவிஹிதங் புப்³பே³னிவாஸங் அனுஸ்ஸரதி. யம்பி ததா²க³தோ அனேகவிஹிதங் புப்³பே³னிவாஸங் அனுஸ்ஸரதி. ஸெய்யதி²த³ங் – ஏகம்பி ஜாதிங் த்³வேபி ஜாதியோ…பே॰… இத³ம்பி ததா²க³தஸ்ஸ…பே॰….
Puna caparaṃ tathāgato anekavihitaṃ pubbenivāsaṃ anussarati, seyyathidaṃ – ekampi jātiṃ dvepi jātiyo…pe… iti sākāraṃ sauddesaṃ anekavihitaṃ pubbenivāsaṃ anussarati. Yampi tathāgato anekavihitaṃ pubbenivāsaṃ anussarati. Seyyathidaṃ – ekampi jātiṃ dvepi jātiyo…pe… idampi tathāgatassa…pe….
புன சபரங் ததா²க³தோ தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே…பே॰… யம்பி ததா²க³தோ தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே…பே॰… இத³ம்பி ததா²க³தஸ்ஸ…பே॰….
Puna caparaṃ tathāgato dibbena cakkhunā visuddhena atikkantamānusakena satte passati cavamāne upapajjamāne…pe… yampi tathāgato dibbena cakkhunā visuddhena atikkantamānusakena satte passati cavamāne upapajjamāne…pe… idampi tathāgatassa…pe….
புன சபரங் ததா²க³தோ ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. யம்பி ததா²க³தோ ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி, இத³ம்பி ததா²க³தஸ்ஸ ததா²க³தப³லங் ஹோதி, யங் ப³லங் ஆக³ம்ம ததா²க³தோ ஆஸப⁴ங் டா²னங் படிஜானாதி, பரிஸாஸு ஸீஹனாத³ங் நத³தி, ப்³ரஹ்மசக்கங் பவத்தேதி. இமானி த³ஸ ததா²க³தப³லானி.
Puna caparaṃ tathāgato āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Yampi tathāgato āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati, idampi tathāgatassa tathāgatabalaṃ hoti, yaṃ balaṃ āgamma tathāgato āsabhaṃ ṭhānaṃ paṭijānāti, parisāsu sīhanādaṃ nadati, brahmacakkaṃ pavatteti. Imāni dasa tathāgatabalāni.
45. கேனட்டே²ன ஸத்³தா⁴ப³லங்? கேனட்டே²ன வீரியப³லங்? கேனட்டே²ன ஸதிப³லங்? கேனட்டே²ன ஸமாதி⁴ப³லங்? கேனட்டே²ன பஞ்ஞாப³லங்? கேனட்டே²ன ஹிரிப³லங்? கேனட்டே²ன ஒத்தப்பப³லங்? கேனட்டே²ன படிஸங்கா²னப³லங்…பே॰… கேனட்டே²ன ததா²க³தப³லங்?
45. Kenaṭṭhena saddhābalaṃ? Kenaṭṭhena vīriyabalaṃ? Kenaṭṭhena satibalaṃ? Kenaṭṭhena samādhibalaṃ? Kenaṭṭhena paññābalaṃ? Kenaṭṭhena hiribalaṃ? Kenaṭṭhena ottappabalaṃ? Kenaṭṭhena paṭisaṅkhānabalaṃ…pe… kenaṭṭhena tathāgatabalaṃ?
அஸ்ஸத்³தி⁴யே அகம்பியட்டே²ன ஸத்³தா⁴ப³லங். கோஸஜ்ஜே அகம்பியட்டே²ன வீரியப³லங். பமாதே³ அகம்பியட்டே²ன ஸதிப³லங். உத்³த⁴ச்சே அகம்பியட்டே²ன ஸமாதி⁴ப³லங். அவிஜ்ஜாய அகம்பியட்டே²ன பஞ்ஞாப³லங் . ஹிரீயதி பாபகே அகுஸலே த⁴ம்மேதி – ஹிரிப³லங். ஒத்தப்பதி பாபகே அகுஸலே த⁴ம்மேதி – ஒத்தப்பப³லங். ஞாணேன கிலேஸே படிஸங்கா²தீதி – படிஸங்கா²னப³லங். தத்த² ஜாதா த⁴ம்மா ஏகரஸா ஹொந்தீதி – பா⁴வனாப³லங். தத்த² நத்தி² கிஞ்சி வஜ்ஜந்தி – அனவஜ்ஜப³லங். தேன சித்தங் ஸங்க³ண்ஹாதீதி – ஸங்க³ஹப³லங். தங் தஸ்ஸ க²மதீதி – 13 க²ந்திப³லங். தேன சித்தங் பஞ்ஞபேதீதி – பஞ்ஞத்திப³லங். தேன சித்தங் நிஜ்ஜா²பேதீதி – நிஜ்ஜ²த்திப³லங். தேன சித்தங் வஸங் வத்தேதீதி – இஸ்ஸரியப³லங். தேன சித்தங் அதி⁴ட்டா²தீதி – அதி⁴ட்டா²னப³லங். தேன சித்தங் ஏகக்³க³ந்தி – ஸமத²ப³லங். தத்த² ஜாதே த⁴ம்மே அனுபஸ்ஸதீதி – விபஸ்ஸனாப³லங். தத்த² ஸிக்க²தீதி – ஸேக²ப³லங். தத்த² ஸிக்கி²தத்தா – அஸேக²ப³லங். தேன ஆஸவா கீ²ணாதி – கீ²ணாஸவப³லங். தஸ்ஸ இஜ்ஜ²தீதி – இத்³தி⁴ப³லங். அப்பமெய்யட்டே²ன ததா²க³தப³லந்தி.
Assaddhiye akampiyaṭṭhena saddhābalaṃ. Kosajje akampiyaṭṭhena vīriyabalaṃ. Pamāde akampiyaṭṭhena satibalaṃ. Uddhacce akampiyaṭṭhena samādhibalaṃ. Avijjāya akampiyaṭṭhena paññābalaṃ . Hirīyati pāpake akusale dhammeti – hiribalaṃ. Ottappati pāpake akusale dhammeti – ottappabalaṃ. Ñāṇena kilese paṭisaṅkhātīti – paṭisaṅkhānabalaṃ. Tattha jātā dhammā ekarasā hontīti – bhāvanābalaṃ. Tattha natthi kiñci vajjanti – anavajjabalaṃ. Tena cittaṃ saṅgaṇhātīti – saṅgahabalaṃ. Taṃ tassa khamatīti – 14 khantibalaṃ. Tena cittaṃ paññapetīti – paññattibalaṃ. Tena cittaṃ nijjhāpetīti – nijjhattibalaṃ. Tena cittaṃ vasaṃ vattetīti – issariyabalaṃ. Tena cittaṃ adhiṭṭhātīti – adhiṭṭhānabalaṃ. Tena cittaṃ ekagganti – samathabalaṃ. Tattha jāte dhamme anupassatīti – vipassanābalaṃ. Tattha sikkhatīti – sekhabalaṃ. Tattha sikkhitattā – asekhabalaṃ. Tena āsavā khīṇāti – khīṇāsavabalaṃ. Tassa ijjhatīti – iddhibalaṃ. Appameyyaṭṭhena tathāgatabalanti.
ப³லகதா² நிட்டி²தா.
Balakathā niṭṭhitā.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / ப³லகதா²வண்ணனா • Balakathāvaṇṇanā
