| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၉. ဗလကထာ
9. Balakathā
၄၄. သာဝတ္ထိနိဒာနံ 1။ ‘‘ပဉ္စိမာနိ , ဘိက္ခဝေ, ဗလာနိ။ ကတမာနိ ပဉ္စ? သဒ္ဓာဗလံ, ဝီရိယဗလံ, သတိဗလံ, သမာဓိဗလံ, ပညာဗလံ – ဣမာနိ ခော, ဘိက္ခဝေ, ပဉ္စ ဗလာနိ။
44. Sāvatthinidānaṃ 2. ‘‘Pañcimāni , bhikkhave, balāni. Katamāni pañca? Saddhābalaṃ, vīriyabalaṃ, satibalaṃ, samādhibalaṃ, paññābalaṃ – imāni kho, bhikkhave, pañca balāni.
‘‘အပိ စ, အဋ္ဌသဋ္ဌိ ဗလာနိ – သဒ္ဓာဗလံ, ဝီရိယဗလံ, သတိဗလံ, သမာဓိဗလံ, ပညာဗလံ, ဟိရိဗလံ, ဩတ္တပ္ပဗလံ, ပဋိသင္ခာနဗလံ, ဘာဝနာဗလံ, အနဝဇ္ဇဗလံ, သင္ဂဟဗလံ, ခန္တိဗလံ, ပညတ္တိဗလံ, နိဇ္ဈတ္တိဗလံ, ဣသ္သရိယဗလံ , အဓိဋ္ဌာနဗလံ, သမထဗလံ, ဝိပသ္သနာဗလံ, ဒသ သေခဗလာနိ, ဒသ အသေခဗလာနိ, ဒသ ခီဏာသဝဗလာနိ, ဒသ ဣဒ္ဓိဗလာနိ, ဒသ တထာဂတဗလာနိ’’။
‘‘Api ca, aṭṭhasaṭṭhi balāni – saddhābalaṃ, vīriyabalaṃ, satibalaṃ, samādhibalaṃ, paññābalaṃ, hiribalaṃ, ottappabalaṃ, paṭisaṅkhānabalaṃ, bhāvanābalaṃ, anavajjabalaṃ, saṅgahabalaṃ, khantibalaṃ, paññattibalaṃ, nijjhattibalaṃ, issariyabalaṃ , adhiṭṭhānabalaṃ, samathabalaṃ, vipassanābalaṃ, dasa sekhabalāni, dasa asekhabalāni, dasa khīṇāsavabalāni, dasa iddhibalāni, dasa tathāgatabalāni’’.
ကတမံ သဒ္ဓာဗလံ? အသ္သဒ္ဓိယေ န ကမ္ပတီတိ – သဒ္ဓာဗလံ။ သဟဇာတာနံ ဓမ္မာနံ ဥပတ္ထမ္ဘနဋ္ဌေန သဒ္ဓာဗလံ, ကိလေသာနံ ပရိယာဒာနဋ္ဌေန သဒ္ဓာဗလံ, ပဋိဝေဓာဒိဝိသောဓနဋ္ဌေန သဒ္ဓာဗလံ, စိတ္တသ္သ အဓိဋ္ဌာနဋ္ဌေန သဒ္ဓာဗလံ, စိတ္တသ္သ ဝောဒာနဋ္ဌေန သဒ္ဓာဗလံ, ဝိသေသာဓိဂမဋ္ဌေန သဒ္ဓာဗလံ, ဥတ္တရိ ပဋိဝေဓဋ္ဌေန သဒ္ဓာဗလံ, သစ္စာဘိသမယဋ္ဌေန သဒ္ဓာဗလံ, နိရောဓေ ပတိဋ္ဌာပကဋ္ဌေန သဒ္ဓာဗလံ။ ဣဒံ သဒ္ဓာဗလံ။
Katamaṃ saddhābalaṃ? Assaddhiye na kampatīti – saddhābalaṃ. Sahajātānaṃ dhammānaṃ upatthambhanaṭṭhena saddhābalaṃ, kilesānaṃ pariyādānaṭṭhena saddhābalaṃ, paṭivedhādivisodhanaṭṭhena saddhābalaṃ, cittassa adhiṭṭhānaṭṭhena saddhābalaṃ, cittassa vodānaṭṭhena saddhābalaṃ, visesādhigamaṭṭhena saddhābalaṃ, uttari paṭivedhaṭṭhena saddhābalaṃ, saccābhisamayaṭṭhena saddhābalaṃ, nirodhe patiṭṭhāpakaṭṭhena saddhābalaṃ. Idaṃ saddhābalaṃ.
ကတမံ ဝီရိယဗလံ? ကောသဇ္ဇေ န ကမ္ပတီတိ – ဝီရိယဗလံ။ သဟဇာတာနံ ဓမ္မာနံ ဥပတ္ထမ္ဘနဋ္ဌေန ဝီရိယဗလံ, ကိလေသာနံ ပရိယာဒာနဋ္ဌေန ဝီရိယဗလံ, ပဋိဝေဓာဒိဝိသောဓနဋ္ဌေန ဝီရိယဗလံ, စိတ္တသ္သ အဓိဋ္ဌာနဋ္ဌေန ဝီရိယဗလံ, စိတ္တသ္သ ဝောဒာနဋ္ဌေန ဝီရိယဗလံ, ဝိသေသာဓိဂမဋ္ဌေန ဝီရိယဗလံ, ဥတ္တရိ ပဋိဝေဓဋ္ဌေန ဝီရိယဗလံ, သစ္စာဘိသမယဋ္ဌေန ဝီရိယဗလံ, နိရောဓေ ပတိဋ္ဌာပကဋ္ဌေန ဝီရိယဗလံ။ ဣဒံ ဝီရိယဗလံ။
Katamaṃ vīriyabalaṃ? Kosajje na kampatīti – vīriyabalaṃ. Sahajātānaṃ dhammānaṃ upatthambhanaṭṭhena vīriyabalaṃ, kilesānaṃ pariyādānaṭṭhena vīriyabalaṃ, paṭivedhādivisodhanaṭṭhena vīriyabalaṃ, cittassa adhiṭṭhānaṭṭhena vīriyabalaṃ, cittassa vodānaṭṭhena vīriyabalaṃ, visesādhigamaṭṭhena vīriyabalaṃ, uttari paṭivedhaṭṭhena vīriyabalaṃ, saccābhisamayaṭṭhena vīriyabalaṃ, nirodhe patiṭṭhāpakaṭṭhena vīriyabalaṃ. Idaṃ vīriyabalaṃ.
ကတမံ သတိဗလံ? ပမာဒေ န ကမ္ပတီတိ – သတိဗလံ။ သဟဇာတာနံ ဓမ္မာနံ ဥပတ္ထမ္ဘနဋ္ဌေန သတိဗလံ။ပေ.။ နိရောဓေ ပတိဋ္ဌာပကဋ္ဌေန သတိဗလံ။ ဣဒံ သတိဗလံ။
Katamaṃ satibalaṃ? Pamāde na kampatīti – satibalaṃ. Sahajātānaṃ dhammānaṃ upatthambhanaṭṭhena satibalaṃ…pe… nirodhe patiṭṭhāpakaṭṭhena satibalaṃ. Idaṃ satibalaṃ.
ကတမံ သမာဓိဗလံ? ဥဒ္ဓစ္စေ န ကမ္ပတီတိ – သမာဓိဗလံ။ သဟဇာတာနံ ဓမ္မာနံ ဥပတ္ထမ္ဘနဋ္ဌေန သမာဓိဗလံ။ပေ.။ နိရောဓေ ပတိဋ္ဌာပကဋ္ဌေန သမာဓိဗလံ။ ဣဒံ သမာဓိဗလံ။
Katamaṃ samādhibalaṃ? Uddhacce na kampatīti – samādhibalaṃ. Sahajātānaṃ dhammānaṃ upatthambhanaṭṭhena samādhibalaṃ…pe… nirodhe patiṭṭhāpakaṭṭhena samādhibalaṃ. Idaṃ samādhibalaṃ.
ကတမံ ပညာဗလံ? အဝိဇ္ဇာယ န ကမ္ပတီတိ – ပညာဗလံ။ သဟဇာတာနံ ဓမ္မာနံ ဥပတ္ထမ္ဘနဋ္ဌေန ပညာဗလံ။ပေ.။ နိရောဓေ ပတိဋ္ဌာပကဋ္ဌေန ပညာဗလံ။ ဣဒံ ပညာဗလံ။
Katamaṃ paññābalaṃ? Avijjāya na kampatīti – paññābalaṃ. Sahajātānaṃ dhammānaṃ upatthambhanaṭṭhena paññābalaṃ…pe… nirodhe patiṭṭhāpakaṭṭhena paññābalaṃ. Idaṃ paññābalaṃ.
ကတမံ ဟိရိဗလံ? နေက္ခမ္မေန ကာမစ္ဆန္ဒံ ဟိရီယတီတိ 3 – ဟိရိဗလံ။ အဗ္ယာပာဒေန ဗ္ယာပာဒံ ဟိရီယတီတိ – ဟိရိဗလံ။ အာလောကသညာယ ထိနမိဒ္ဓံ ဟိရီယတီတိ – ဟိရိဗလံ။ အဝိက္ခေပေန ဥဒ္ဓစ္စံ ဟိရီယတီတိ – ဟိရိဗလံ။ ဓမ္မဝဝတ္ထာနေန ဝိစိကိစ္ဆံ ဟိရီယတီတိ – ဟိရိဗလံ။ ဉာဏေန အဝိဇ္ဇံ ဟိရီယတီတိ – ဟိရိဗလံ။ ပာမောဇ္ဇေန အရတိံ ဟိရီယတီတိ – ဟိရိဗလံ။ ပဌမေန ဈာနေန နီဝရဏေ ဟိရီယတီတိ – ဟိရိဗလံ။ပေ.။ အရဟတ္တမဂ္ဂေန သဗ္ဗကိလေသေ ဟိရီယတီတိ – ဟိရိဗလံ။ ဣဒံ ဟိရိဗလံ။
Katamaṃ hiribalaṃ? Nekkhammena kāmacchandaṃ hirīyatīti 4 – hiribalaṃ. Abyāpādena byāpādaṃ hirīyatīti – hiribalaṃ. Ālokasaññāya thinamiddhaṃ hirīyatīti – hiribalaṃ. Avikkhepena uddhaccaṃ hirīyatīti – hiribalaṃ. Dhammavavatthānena vicikicchaṃ hirīyatīti – hiribalaṃ. Ñāṇena avijjaṃ hirīyatīti – hiribalaṃ. Pāmojjena aratiṃ hirīyatīti – hiribalaṃ. Paṭhamena jhānena nīvaraṇe hirīyatīti – hiribalaṃ…pe… arahattamaggena sabbakilese hirīyatīti – hiribalaṃ. Idaṃ hiribalaṃ.
ကတမံ ဩတ္တပ္ပဗလံ? နေက္ခမ္မေန ကာမစ္ဆန္ဒံ ဩတ္တပ္ပတီတိ – ဩတ္တပ္ပဗလံ။ အဗ္ယာပာဒေန ဗ္ယာပာဒံ ဩတ္တပ္ပတီတိ – ဩတ္တပ္ပဗလံ။ အာလောကသညာယ ထိနမိဒ္ဓံ ဩတ္တပ္ပတီတိ – ဩတ္တပ္ပဗလံ။ အဝိက္ခေပေန ဥဒ္ဓစ္စံ ဩတ္တပ္ပတီတိ – ဩတ္တပ္ပဗလံ။ ဓမ္မဝဝတ္ထာနေန ဝိစိကိစ္ဆံ ဩတ္တပ္ပတီတိ – ဩတ္တပ္ပဗလံ။ ဉာဏေန အဝိဇ္ဇံ ဩတ္တပ္ပတီတိ – ဩတ္တပ္ပဗလံ ။ ပာမောဇ္ဇေန အရတိံ ဩတ္တပ္ပတီတိ – ဩတ္တပ္ပဗလံ။ ပဌမေန ဈာနေန နီဝရဏေ ဩတ္တပ္ပတီတိ – ဩတ္တပ္ပဗလံ။ပေ.။ အရဟတ္တမဂ္ဂေန သဗ္ဗကိလေသေ ဩတ္တပ္ပတီတိ – ဩတ္တပ္ပဗလံ။ ဣဒံ ဩတ္တပ္ပဗလံ။
Katamaṃ ottappabalaṃ? Nekkhammena kāmacchandaṃ ottappatīti – ottappabalaṃ. Abyāpādena byāpādaṃ ottappatīti – ottappabalaṃ. Ālokasaññāya thinamiddhaṃ ottappatīti – ottappabalaṃ. Avikkhepena uddhaccaṃ ottappatīti – ottappabalaṃ. Dhammavavatthānena vicikicchaṃ ottappatīti – ottappabalaṃ. Ñāṇena avijjaṃ ottappatīti – ottappabalaṃ . Pāmojjena aratiṃ ottappatīti – ottappabalaṃ. Paṭhamena jhānena nīvaraṇe ottappatīti – ottappabalaṃ…pe… arahattamaggena sabbakilese ottappatīti – ottappabalaṃ. Idaṃ ottappabalaṃ.
ကတမံ ပဋိသင္ခာနဗလံ? နေက္ခမ္မေန ကာမစ္ဆန္ဒံ ပဋိသင္ခာတီတိ – ပဋိသင္ခာနဗလံ။ အဗ္ယာပာဒေန ဗ္ယာပာဒံ ပဋိသင္ခာတီတိ – ပဋိသင္ခာနဗလံ။ အာလောကသညာယ ထိနမိဒ္ဓံ ပဋိသင္ခာတီတိ – ပဋိသင္ခာနဗလံ။ အဝိက္ခေပေန ဥဒ္ဓစ္စံ ပဋိသင္ခာတီတိ – ပဋိသင္ခာနဗလံ။ ဓမ္မဝဝတ္ထာနေန ဝိစိကိစ္ဆံ ပဋိသင္ခာတီတိ – ပဋိသင္ခာနဗလံ။ ဉာဏေန အဝိဇ္ဇံ ပဋိသင္ခာတီတိ – ပဋိသင္ခာနဗလံ ။ ပာမောဇ္ဇေန အရတိံ ပဋိသင္ခာတီတိ – ပဋိသင္ခာနဗလံ။ ပဌမေန ဈာနေန နီဝရဏေ ပဋိသင္ခာတီတိ – ပဋိသင္ခာနဗလံ။ပေ.။ အရဟတ္တမဂ္ဂေန သဗ္ဗကိလေသေ ပဋိသင္ခာတီတိ – ပဋိသင္ခာနဗလံ။ ဣဒံ ပဋိသင္ခာနဗလံ။
Katamaṃ paṭisaṅkhānabalaṃ? Nekkhammena kāmacchandaṃ paṭisaṅkhātīti – paṭisaṅkhānabalaṃ. Abyāpādena byāpādaṃ paṭisaṅkhātīti – paṭisaṅkhānabalaṃ. Ālokasaññāya thinamiddhaṃ paṭisaṅkhātīti – paṭisaṅkhānabalaṃ. Avikkhepena uddhaccaṃ paṭisaṅkhātīti – paṭisaṅkhānabalaṃ. Dhammavavatthānena vicikicchaṃ paṭisaṅkhātīti – paṭisaṅkhānabalaṃ. Ñāṇena avijjaṃ paṭisaṅkhātīti – paṭisaṅkhānabalaṃ . Pāmojjena aratiṃ paṭisaṅkhātīti – paṭisaṅkhānabalaṃ. Paṭhamena jhānena nīvaraṇe paṭisaṅkhātīti – paṭisaṅkhānabalaṃ…pe… arahattamaggena sabbakilese paṭisaṅkhātīti – paṭisaṅkhānabalaṃ. Idaṃ paṭisaṅkhānabalaṃ.
ကတမံ ဘာဝနာဗလံ? ကာမစ္ဆန္ဒံ ပဇဟန္တော နေက္ခမ္မံ ဘာဝေတီတိ – ဘာဝနာဗလံ။ ဗ္ယာပာဒံ ပဇဟန္တော အဗ္ယာပာဒံ ဘာဝေတီတိ – ဘာဝနာဗလံ။ ထိနမိဒ္ဓံ ပဇဟန္တော အာလောကသညံ ဘာဝေတီတိ – ဘာဝနာဗလံ။ ဥဒ္ဓစ္စံ ပဇဟန္တော အဝိက္ခေပံ ဘာဝေတီတိ – ဘာဝနာဗလံ။ ဝိစိကိစ္ဆံ ပဇဟန္တော ဓမ္မဝဝတ္ထာနံ ဘာဝေတီတိ – ဘာဝနာဗလံ။ အဝိဇ္ဇံ ပဇဟန္တော ဉာဏံ ဘာဝေတီတိ – ဘာဝနာဗလံ။ အရတိံ ပဇဟန္တော ပာမောဇ္ဇံ ဘာဝေတီတိ – ဘာဝနာဗလံ။ နီဝရဏေ ပဇဟန္တော ပဌမံ ဈာနံ ဘာဝေတီတိ – ဘာဝနာဗလံ။ပေ.။ သဗ္ဗကိလေသေ ပဇဟန္တော အရဟတ္တမဂ္ဂံ ဘာဝေတီတိ – ဘာဝနာဗလံ။ ဣဒံ ဘာဝနာဗလံ။
Katamaṃ bhāvanābalaṃ? Kāmacchandaṃ pajahanto nekkhammaṃ bhāvetīti – bhāvanābalaṃ. Byāpādaṃ pajahanto abyāpādaṃ bhāvetīti – bhāvanābalaṃ. Thinamiddhaṃ pajahanto ālokasaññaṃ bhāvetīti – bhāvanābalaṃ. Uddhaccaṃ pajahanto avikkhepaṃ bhāvetīti – bhāvanābalaṃ. Vicikicchaṃ pajahanto dhammavavatthānaṃ bhāvetīti – bhāvanābalaṃ. Avijjaṃ pajahanto ñāṇaṃ bhāvetīti – bhāvanābalaṃ. Aratiṃ pajahanto pāmojjaṃ bhāvetīti – bhāvanābalaṃ. Nīvaraṇe pajahanto paṭhamaṃ jhānaṃ bhāvetīti – bhāvanābalaṃ…pe… sabbakilese pajahanto arahattamaggaṃ bhāvetīti – bhāvanābalaṃ. Idaṃ bhāvanābalaṃ.
ကတမံ အနဝဇ္ဇဗလံ? ကာမစ္ဆန္ဒသ္သ ပဟီနတ္တာ နေက္ခမ္မေ နတ္ထိ ကိဉ္စိ ဝဇ္ဇန္တိ – အနဝဇ္ဇဗလံ။ ဗ္ယာပာဒသ္သ ပဟီနတ္တာ အဗ္ယာပာဒေ နတ္ထိ ကိဉ္စိ ဝဇ္ဇန္တိ – အနဝဇ္ဇဗလံ။ ထိနမိဒ္ဓသ္သ ပဟီနတ္တာ အာလောကသညာယ နတ္ထိ ကိဉ္စိ ဝဇ္ဇန္တိ – အနဝဇ္ဇဗလံ။ ဥဒ္ဓစ္စသ္သ ပဟီနတ္တာ အဝိက္ခေပေ နတ္ထိ ကိဉ္စိ ဝဇ္ဇန္တိ – အနဝဇ္ဇဗလံ။ ဝိစိကိစ္ဆာယ ပဟီနတ္တာ ဓမ္မဝဝတ္ထာနေ နတ္ထိ ကိဉ္စိ ဝဇ္ဇန္တိ – အနဝဇ္ဇဗလံ။ အဝိဇ္ဇာယ ပဟီနတ္တာ ဉာဏေ နတ္ထိ ကိဉ္စိ ဝဇ္ဇန္တိ – အနဝဇ္ဇဗလံ။ အရတိယာ ပဟီနတ္တာ ပာမောဇ္ဇေ နတ္ထိ ကိဉ္စိ ဝဇ္ဇန္တိ အနဝဇ္ဇဗလံ။ နီဝရဏာနံ ပဟီနတ္တာ ပဌမဇ္ဈာနေ နတ္ထိ ကိဉ္စိ ဝဇ္ဇန္တိ – အနဝဇ္ဇဗလံ။ပေ.။ သဗ္ဗကိလေသာနံ ပဟီနတ္တာ အရဟတ္တမဂ္ဂေ နတ္ထိ ကိဉ္စိ ဝဇ္ဇန္တိ – အနဝဇ္ဇဗလံ။ ဣဒံ အနဝဇ္ဇဗလံ။
Katamaṃ anavajjabalaṃ? Kāmacchandassa pahīnattā nekkhamme natthi kiñci vajjanti – anavajjabalaṃ. Byāpādassa pahīnattā abyāpāde natthi kiñci vajjanti – anavajjabalaṃ. Thinamiddhassa pahīnattā ālokasaññāya natthi kiñci vajjanti – anavajjabalaṃ. Uddhaccassa pahīnattā avikkhepe natthi kiñci vajjanti – anavajjabalaṃ. Vicikicchāya pahīnattā dhammavavatthāne natthi kiñci vajjanti – anavajjabalaṃ. Avijjāya pahīnattā ñāṇe natthi kiñci vajjanti – anavajjabalaṃ. Aratiyā pahīnattā pāmojje natthi kiñci vajjanti anavajjabalaṃ. Nīvaraṇānaṃ pahīnattā paṭhamajjhāne natthi kiñci vajjanti – anavajjabalaṃ…pe… sabbakilesānaṃ pahīnattā arahattamagge natthi kiñci vajjanti – anavajjabalaṃ. Idaṃ anavajjabalaṃ.
ကတမံ သင္ဂဟဗလံ? ကာမစ္ဆန္ဒံ ပဇဟန္တော နေက္ခမ္မဝသေန စိတ္တံ သင္ဂဏ္ဟာတီတိ – သင္ဂဟဗလံ။ ဗ္ယာပာဒံ ပဇဟန္တော အဗ္ယာပာဒဝသေန စိတ္တံ သင္ဂဏ္ဟာတီတိ – သင္ဂဟဗလံ။ ထိနမိဒ္ဓံ ပဇဟန္တော အာလောကသညာဝသေန စိတ္တံ သင္ဂဏ္ဟာတီတိ – သင္ဂဟဗလံ။ပေ.။ သဗ္ဗကိလေသေ ပဇဟန္တော အရဟတ္တမဂ္ဂဝသေန စိတ္တံ သင္ဂဏ္ဟာတီတိ – သင္ဂဟဗလံ။ ဣဒံ သင္ဂဟဗလံ။
Katamaṃ saṅgahabalaṃ? Kāmacchandaṃ pajahanto nekkhammavasena cittaṃ saṅgaṇhātīti – saṅgahabalaṃ. Byāpādaṃ pajahanto abyāpādavasena cittaṃ saṅgaṇhātīti – saṅgahabalaṃ. Thinamiddhaṃ pajahanto ālokasaññāvasena cittaṃ saṅgaṇhātīti – saṅgahabalaṃ…pe… sabbakilese pajahanto arahattamaggavasena cittaṃ saṅgaṇhātīti – saṅgahabalaṃ. Idaṃ saṅgahabalaṃ.
ကတမံ ခန္တိဗလံ? ကာမစ္ဆန္ဒသ္သ ပဟီနတ္တာ နေက္ခမ္မံ ခမတီတိ – ခန္တိဗလံ။ ဗ္ယာပာဒသ္သ ပဟီနတ္တာ အဗ္ယာပာဒော ခမတီတိ – ခန္တိဗလံ။ ထိနမိဒ္ဓသ္သ ပဟီနတ္တာ အာလောကသညာ ခမတီတိ – ခန္တိဗလံ။ ဥဒ္ဓစ္စသ္သ ပဟီနတ္တာ အဝိက္ခေပော ခမတီတိ – ခန္တိဗလံ။ ဝိစိကိစ္ဆာယ ပဟီနတ္တာ ဓမ္မဝဝတ္ထာနံ ခမတီတိ – ခန္တိဗလံ။ အဝိဇ္ဇာယ ပဟီနတ္တာ ဉာဏံ ခမတီတိ – ခန္တိဗလံ။ အရတိယာ ပဟီနတ္တာ ပာမောဇ္ဇံ ခမတီတိ – ခန္တိဗလံ။ နီဝရဏာနံ ပဟီနတ္တာ ပဌမံ ဈာနံ ခမတီတိ – ခန္တိဗလံ။ပေ.။ သဗ္ဗကိလေသာနံ ပဟီနတ္တာ အရဟတ္တမဂ္ဂော ခမတီတိ – ခန္တိဗလံ။ ဣဒံ ခန္တိဗလံ။
Katamaṃ khantibalaṃ? Kāmacchandassa pahīnattā nekkhammaṃ khamatīti – khantibalaṃ. Byāpādassa pahīnattā abyāpādo khamatīti – khantibalaṃ. Thinamiddhassa pahīnattā ālokasaññā khamatīti – khantibalaṃ. Uddhaccassa pahīnattā avikkhepo khamatīti – khantibalaṃ. Vicikicchāya pahīnattā dhammavavatthānaṃ khamatīti – khantibalaṃ. Avijjāya pahīnattā ñāṇaṃ khamatīti – khantibalaṃ. Aratiyā pahīnattā pāmojjaṃ khamatīti – khantibalaṃ. Nīvaraṇānaṃ pahīnattā paṭhamaṃ jhānaṃ khamatīti – khantibalaṃ…pe… sabbakilesānaṃ pahīnattā arahattamaggo khamatīti – khantibalaṃ. Idaṃ khantibalaṃ.
ကတမံ ပညတ္တိဗလံ? ကာမစ္ဆန္ဒံ ပဇဟန္တော နေက္ခမ္မဝသေန စိတ္တံ ပညပေတီတိ – ပညတ္တိဗလံ။ ဗ္ယာပာဒံ ပဇဟန္တော အဗ္ယာပာဒဝသေန စိတ္တံ ပညပေတီတိ – ပညတ္တိဗလံ။ ထိနမိဒ္ဓံ ပဇဟန္တော အာလောကသညာဝသေန စိတ္တံ ပညပေတီတိ – ပညတ္တိဗလံ။ပေ.။ သဗ္ဗကိလေသေ ပဇဟန္တော အရဟတ္တမဂ္ဂဝသေန စိတ္တံ ပညပေတီတိ – ပညတ္တိဗလံ။ ဣဒံ ပညတ္တိဗလံ။
Katamaṃ paññattibalaṃ? Kāmacchandaṃ pajahanto nekkhammavasena cittaṃ paññapetīti – paññattibalaṃ. Byāpādaṃ pajahanto abyāpādavasena cittaṃ paññapetīti – paññattibalaṃ. Thinamiddhaṃ pajahanto ālokasaññāvasena cittaṃ paññapetīti – paññattibalaṃ…pe… sabbakilese pajahanto arahattamaggavasena cittaṃ paññapetīti – paññattibalaṃ. Idaṃ paññattibalaṃ.
ကတမံ နိဇ္ဈတ္တိဗလံ? ကာမစ္ဆန္ဒံ ပဇဟန္တော နေက္ခမ္မဝသေန စိတ္တံ နိဇ္ဈာပေတီတိ – နိဇ္ဈတ္တိဗလံ။ ဗ္ယာပာဒံ ပဇဟန္တော အဗ္ယာပာဒဝသေန စိတ္တံ နိဇ္ဈာပေတီတိ – နိဇ္ဈတ္တိဗလံ။ ထိနမိဒ္ဓံ ပဇဟန္တော အာလောကသညာဝသေန စိတ္တံ နိဇ္ဈာပေတီတိ – နိဇ္ဈတ္တိဗလံ။ပေ.။ သဗ္ဗကိလေသေ ပဇဟန္တော အရဟတ္တမဂ္ဂဝသေန စိတ္တံ နိဇ္ဈာပေတီတိ – နိဇ္ဈတ္တိဗလံ။ ဣဒံ နိဇ္ဈတ္တိဗလံ။
Katamaṃ nijjhattibalaṃ? Kāmacchandaṃ pajahanto nekkhammavasena cittaṃ nijjhāpetīti – nijjhattibalaṃ. Byāpādaṃ pajahanto abyāpādavasena cittaṃ nijjhāpetīti – nijjhattibalaṃ. Thinamiddhaṃ pajahanto ālokasaññāvasena cittaṃ nijjhāpetīti – nijjhattibalaṃ…pe… sabbakilese pajahanto arahattamaggavasena cittaṃ nijjhāpetīti – nijjhattibalaṃ. Idaṃ nijjhattibalaṃ.
ကတမံ ဣသ္သရိယဗလံ? ကာမစ္ဆန္ဒံ ပဇဟန္တော နေက္ခမ္မဝသေန စိတ္တံ ဝသံ ဝတ္တေတီတိ – ဣသ္သရိယဗလံ။ ဗ္ယာပာဒံ ပဇဟန္တော အဗ္ယာပာဒဝသေန စိတ္တံ ဝသံ ဝတ္တေတီတိ – ဣသ္သရိယဗလံ။ ထိနမိဒ္ဓံ ပဇဟန္တော အာလောကသညာဝသေန စိတ္တံ ဝသံ ဝတ္တေတီတိ – ဣသ္သရိယဗလံ။ပေ.။ သဗ္ဗကိလေသေ ပဇဟန္တော အရဟတ္တမဂ္ဂဝသေန စိတ္တံ ဝသံ ဝတ္တေတီတိ – ဣသ္သရိယဗလံ။ ဣဒံ ဣသ္သရိယဗလံ။
Katamaṃ issariyabalaṃ? Kāmacchandaṃ pajahanto nekkhammavasena cittaṃ vasaṃ vattetīti – issariyabalaṃ. Byāpādaṃ pajahanto abyāpādavasena cittaṃ vasaṃ vattetīti – issariyabalaṃ. Thinamiddhaṃ pajahanto ālokasaññāvasena cittaṃ vasaṃ vattetīti – issariyabalaṃ…pe… sabbakilese pajahanto arahattamaggavasena cittaṃ vasaṃ vattetīti – issariyabalaṃ. Idaṃ issariyabalaṃ.
ကတမံ အဓိဋ္ဌာနဗလံ? ကာမစ္ဆန္ဒံ ပဇဟန္တော နေက္ခမ္မဝသေန စိတ္တံ အဓိဋ္ဌာတီတိ – အဓိဋ္ဌာနဗလံ။ ဗ္ယာပာဒံ ပဇဟန္တော အဗ္ယာပာဒဝသေန စိတ္တံ အဓိဋ္ဌာတီတိ – အဓိဋ္ဌာနဗလံ။ ထိနမိဒ္ဓံ ပဇဟန္တော အာလောကသညာဝသေန စိတ္တံ အဓိဋ္ဌာတီတိ – အဓိဋ္ဌာနဗလံ။ပေ.။ သဗ္ဗကိလေသေ ပဇဟန္တော အရဟတ္တမဂ္ဂဝသေန စိတ္တံ အဓိဋ္ဌာတီတိ – အဓိဋ္ဌာနဗလံ။ ဣဒံ အဓိဋ္ဌာနဗလံ။
Katamaṃ adhiṭṭhānabalaṃ? Kāmacchandaṃ pajahanto nekkhammavasena cittaṃ adhiṭṭhātīti – adhiṭṭhānabalaṃ. Byāpādaṃ pajahanto abyāpādavasena cittaṃ adhiṭṭhātīti – adhiṭṭhānabalaṃ. Thinamiddhaṃ pajahanto ālokasaññāvasena cittaṃ adhiṭṭhātīti – adhiṭṭhānabalaṃ…pe… sabbakilese pajahanto arahattamaggavasena cittaṃ adhiṭṭhātīti – adhiṭṭhānabalaṃ. Idaṃ adhiṭṭhānabalaṃ.
ကတမံ သမထဗလံ? နေက္ခမ္မဝသေန စိတ္တသ္သ ဧကဂ္ဂတာ အဝိက္ခေပော သမထဗလံ, အဗ္ယာပာဒဝသေန စိတ္တသ္သ ဧကဂ္ဂတာ အဝိက္ခေပော သမထဗလံ, အာလောကသညာဝသေန စိတ္တသ္သ ဧကဂ္ဂတာ အဝိက္ခေပော သမထဗလံ။ပေ.။ ပဋိနိသ္သဂ္ဂာနုပသ္သီ အသ္သာသဝသေန စိတ္တသ္သ ဧကဂ္ဂတာ အဝိက္ခေပော သမထဗလံ, ပဋိနိသ္သဂ္ဂာနုပသ္သီ ပသ္သာသဝသေန စိတ္တသ္သ ဧကဂ္ဂတာ အဝိက္ခေပော သမထဗလံ။
Katamaṃ samathabalaṃ? Nekkhammavasena cittassa ekaggatā avikkhepo samathabalaṃ, abyāpādavasena cittassa ekaggatā avikkhepo samathabalaṃ, ālokasaññāvasena cittassa ekaggatā avikkhepo samathabalaṃ…pe… paṭinissaggānupassī assāsavasena cittassa ekaggatā avikkhepo samathabalaṃ, paṭinissaggānupassī passāsavasena cittassa ekaggatā avikkhepo samathabalaṃ.
သမထဗလန္တိ ကေနဋ္ဌေန သမထဗလံ? ပဌမေန ဈာနေန နီဝရဏေ န ကမ္ပတီတိ – သမထဗလံ။ ဒုတိယေန ဈာနေန ဝိတက္ကဝိစာရေ န ကမ္ပတီတိ – သမထဗလံ။ တတိယေန ဈာနေန ပီတိယာ န ကမ္ပတီတိ – သမထဗလံ။ စတုတ္ထေန ဈာနေန သုခဒုက္ခေ န ကမ္ပတီတိ – သမထဗလံ။ အာကာသာနဉ္စာယတနသမာပတ္တိယာ ရူပသညာယ ပဋိဃသညာယ နာနတ္တသညာယ န ကမ္ပတီတိ – သမထဗလံ ။ ဝိညာဏဉ္စာယတနသမာပတ္တိယာ အာကာသာနဉ္စာယတနသညာယ န ကမ္ပတီတိ – သမထဗလံ။ အာကိဉ္စညာယတနသမာပတ္တိယာ ဝိညာဏဉ္စာယတနသညာယ န ကမ္ပတီတိ – သမထဗလံ။ နေဝသညာနာသညာယတနသမာပတ္တိယာ အာကိဉ္စညာယတနသညာယ န ကမ္ပတီတိ – သမထဗလံ။ ဥဒ္ဓစ္စေ စ ဥဒ္ဓစ္စသဟဂတကိလေသေ စ ခန္ဓေ စ န ကမ္ပတီ န စလတိ န ဝေဓတီတိ – သမထဗလံ။ ဣဒံ သမထဗလံ။
Samathabalanti kenaṭṭhena samathabalaṃ? Paṭhamena jhānena nīvaraṇe na kampatīti – samathabalaṃ. Dutiyena jhānena vitakkavicāre na kampatīti – samathabalaṃ. Tatiyena jhānena pītiyā na kampatīti – samathabalaṃ. Catutthena jhānena sukhadukkhe na kampatīti – samathabalaṃ. Ākāsānañcāyatanasamāpattiyā rūpasaññāya paṭighasaññāya nānattasaññāya na kampatīti – samathabalaṃ . Viññāṇañcāyatanasamāpattiyā ākāsānañcāyatanasaññāya na kampatīti – samathabalaṃ. Ākiñcaññāyatanasamāpattiyā viññāṇañcāyatanasaññāya na kampatīti – samathabalaṃ. Nevasaññānāsaññāyatanasamāpattiyā ākiñcaññāyatanasaññāya na kampatīti – samathabalaṃ. Uddhacce ca uddhaccasahagatakilese ca khandhe ca na kampatī na calati na vedhatīti – samathabalaṃ. Idaṃ samathabalaṃ.
ကတမံ ဝိပသ္သနာဗလံ? အနိစ္စာနုပသ္သနာ ဝိပသ္သနာဗလံ, ဒုက္ခာနုပသ္သနာ ဝိပသ္သနာဗလံ။ပေ.။ ပဋိနိသ္သဂ္ဂာနုပသ္သနာ ဝိပသ္သနာဗလံ, ရူပေ အနိစ္စာနုပသ္သနာ ဝိပသ္သနာဗလံ, ရူပေ ဒုက္ခာနုပသ္သနာ ဝိပသ္သနာဗလံ။ပေ.။ ရူပေ ပဋိနသ္သဂ္ဂာနုပသ္သနာ ဝိပသ္သနာဗလံ, ဝေဒနာယ။ပေ.။ သညာယ။ သင္ခာရေသု။ ဝိညာဏေ။ စက္ခုသ္မိံ။ပေ.။ ဇရာမရဏေ အနိစ္စာနုပသ္သနာ ဝိပသ္သနာဗလံ, ဇရာမရဏေ ဒုက္ခာနုပသ္သနာ ဝိပသ္သနာဗလံ။ပေ.။ ဇရာမရဏေ ပဋိနိသ္သဂ္ဂာနုပသ္သနာ ဝိပသ္သနာဗလံ။ ဝိပသ္သနာဗလန္တိ ကေနဋ္ဌေန ဝိပသ္သနာဗလံ? အနိစ္စာနုပသ္သနာယ နိစ္စသညာယ န ကမ္ပတီတိ – ဝိပသ္သနာဗလံ။ ဒုက္ခာနုပသ္သနာယ သုခသညာယ န ကမ္ပတီတိ – ဝိပသ္သနာဗလံ။ အနတ္တာနုပသ္သနာယ အတ္တသညာယ ကမ္ပတီတိ – ဝိပသ္သနာဗလံ။ နိဗ္ဗိဒာနုပသ္သနာယ နန္ဒိယာ န ကမ္ပတီတိ – ဝိပသ္သနာဗလံ။ ဝိရာဂာနုပသ္သနာယ ရာဂေ န ကမ္ပတီတိ – ဝိပသ္သနာဗလံ။ နိရောဓာနုပသ္သနာ သမုဒယေ န ကမ္ပတီတိ – ဝိပသ္သနာဗလံ ။ ပဋိနိသ္သဂ္ဂာနုပသ္သနာယ အာဒာနေ န ကမ္ပတီတိ – ဝိပသ္သနာဗလံ။ အဝိဇ္ဇာယ အဝိဇ္ဇာသဟဂတကိလေသေ စ ခန္ဓေ စ န ကမ္ပတိ န စလတိ န ဝေဓတီတိ – ဝိပသ္သနာဗလံ။ ဣဒံ ဝိပသ္သနာဗလံ။
Katamaṃ vipassanābalaṃ? Aniccānupassanā vipassanābalaṃ, dukkhānupassanā vipassanābalaṃ…pe… paṭinissaggānupassanā vipassanābalaṃ, rūpe aniccānupassanā vipassanābalaṃ, rūpe dukkhānupassanā vipassanābalaṃ…pe… rūpe paṭinassaggānupassanā vipassanābalaṃ, vedanāya…pe… saññāya… saṅkhāresu… viññāṇe… cakkhusmiṃ…pe… jarāmaraṇe aniccānupassanā vipassanābalaṃ, jarāmaraṇe dukkhānupassanā vipassanābalaṃ…pe… jarāmaraṇe paṭinissaggānupassanā vipassanābalaṃ. Vipassanābalanti kenaṭṭhena vipassanābalaṃ? Aniccānupassanāya niccasaññāya na kampatīti – vipassanābalaṃ. Dukkhānupassanāya sukhasaññāya na kampatīti – vipassanābalaṃ. Anattānupassanāya attasaññāya kampatīti – vipassanābalaṃ. Nibbidānupassanāya nandiyā na kampatīti – vipassanābalaṃ. Virāgānupassanāya rāge na kampatīti – vipassanābalaṃ. Nirodhānupassanā samudaye na kampatīti – vipassanābalaṃ . Paṭinissaggānupassanāya ādāne na kampatīti – vipassanābalaṃ. Avijjāya avijjāsahagatakilese ca khandhe ca na kampati na calati na vedhatīti – vipassanābalaṃ. Idaṃ vipassanābalaṃ.
ကတမာနိ ဒသ သေခဗလာနိ, ဒသ အသေခဗလာနိ? သမ္မာဒိဋ္ဌိံ 5 သိက္ခတီတိ – သေခဗလံ။ တတ္ထ သိက္ခိတတ္တာ အသေခဗလံ။ သမ္မာသင္ကပ္ပံ သိက္ခတီတိ – သေခဗလံ။ တတ္ထ သိက္ခိတတ္တာ – အသေခဗလံ ။ သမ္မာဝာစံ။ပေ.။ သမ္မာကမ္မန္တံ။ သမ္မာအာဇီဝံ။ သမ္မာဝာယာမံ။ သမ္မာသတိံ။ သမ္မာသမာဓိံ။ သမ္မာဉာဏံ။ပေ.။ သမ္မာဝိမုတ္တိံ သိက္ခတီတိ – သေခဗလံ။ တတ္ထ သိက္ခိတတ္တာ – အသေခဗလံ။ ဣမာနိ ဒသ သေခဗလာနိ, ဒသ အသေခဗလာနိ။
Katamāni dasa sekhabalāni, dasa asekhabalāni? Sammādiṭṭhiṃ 6 sikkhatīti – sekhabalaṃ. Tattha sikkhitattā asekhabalaṃ. Sammāsaṅkappaṃ sikkhatīti – sekhabalaṃ. Tattha sikkhitattā – asekhabalaṃ . Sammāvācaṃ…pe… sammākammantaṃ… sammāājīvaṃ… sammāvāyāmaṃ… sammāsatiṃ… sammāsamādhiṃ… sammāñāṇaṃ…pe… sammāvimuttiṃ sikkhatīti – sekhabalaṃ. Tattha sikkhitattā – asekhabalaṃ. Imāni dasa sekhabalāni, dasa asekhabalāni.
ကတမာနိ ဒသ ခီဏာသဝဗလာနိ? 7 ဣဓ ခီဏာသဝသ္သ ဘိက္ခုနော အနိစ္စတော သဗ္ဗေ သင္ခာရာ ယထာဘူတံ သမ္မပ္ပညာယ သုဒိဋ္ဌာ ဟောန္တိ။ ယမ္ပိ ခီဏာသဝသ္သ ဘိက္ခုနော အနိစ္စတော သဗ္ဗေ သင္ခာရာ ယထာဘူတံ သမ္မပ္ပညာယ သုဒိဋ္ဌာ ဟောန္တိ, ဣဒမ္ပိ ခီဏာသဝသ္သ ဘိက္ခုနော ဗလံ ဟောတိ, ယံ ဗလံ အာဂမ္မ ခီဏာသဝော ဘိက္ခု အာသဝာနံ ခယံ ပဋိဇာနာတိ – ‘‘ခီဏာ မေ အာသဝာ’’တိ။
Katamāni dasa khīṇāsavabalāni?8 Idha khīṇāsavassa bhikkhuno aniccato sabbe saṅkhārā yathābhūtaṃ sammappaññāya sudiṭṭhā honti. Yampi khīṇāsavassa bhikkhuno aniccato sabbe saṅkhārā yathābhūtaṃ sammappaññāya sudiṭṭhā honti, idampi khīṇāsavassa bhikkhuno balaṃ hoti, yaṃ balaṃ āgamma khīṇāsavo bhikkhu āsavānaṃ khayaṃ paṭijānāti – ‘‘khīṇā me āsavā’’ti.
ပုန စပရံ ခီဏာသဝသ္သ ဘိက္ခုနော အင္ဂာရကာသူပမာ ကာမာ ယထာဘူတံ သမ္မပ္ပညာယ သုဒိဋ္ဌာ ဟောန္တိ။ ယမ္ပိ ခီဏာသဝသ္သ ဘိက္ခုနော အင္ဂာရကာသူပမာ ကာမာ ယထာဘူတံ သမ္မပ္ပညာယ သုဒိဋ္ဌာ ဟောန္တိ, ဣဒမ္ပိ ခီဏာသဝသ္သ ဘိက္ခုနော ဗလံ ဟောတိ, ယံ ဗလံ အာဂမ္မ ခီဏာသဝော ဘိက္ခု အာသဝာနံ ခယံ ပဋိဇာနာတိ – ‘‘ခီဏာ မေ အာသဝာ’’တိ။
Puna caparaṃ khīṇāsavassa bhikkhuno aṅgārakāsūpamā kāmā yathābhūtaṃ sammappaññāya sudiṭṭhā honti. Yampi khīṇāsavassa bhikkhuno aṅgārakāsūpamā kāmā yathābhūtaṃ sammappaññāya sudiṭṭhā honti, idampi khīṇāsavassa bhikkhuno balaṃ hoti, yaṃ balaṃ āgamma khīṇāsavo bhikkhu āsavānaṃ khayaṃ paṭijānāti – ‘‘khīṇā me āsavā’’ti.
ပုန စပရံ ခီဏာသဝသ္သ ဘိက္ခုနော ဝိဝေကနိန္နံ စိတ္တံ ဟောတိ ဝိဝေကပောဏံ ဝိဝေကပဗ္ဘာရံ ဝိဝေကဋ္ဌံ နေက္ခမ္မာဘိရတံ ဗ္ယန္တီဘူတံ 9 သဗ္ဗသော အာသဝဋ္ဌာနိယေဟိ ဓမ္မေဟိ။ ယမ္ပိ ခီဏာသဝသ္သ ဘိက္ခုနော ဝိဝေကနိန္နံ စိတ္တံ ဟောတိ ဝိဝေကပောဏံ ဝိဝေကပဗ္ဘာရံ ဝိဝေကဋ္ဌံ နေက္ခမ္မာဘိရတံ ဗ္ယန္တိဘူတံ သဗ္ဗသော အာသဝဋ္ဌာနိယေဟိ ဓမ္မေဟိ, ဣဒမ္ပိ ခီဏာသဝသ္သ ဘိက္ခုနော ဗလံ ဟောတိ, ယံ ဗလံ အာဂမ္မ ခီဏာသဝော ဘိက္ခု အာသဝာနံ ခယံ ပဋိဇာနာတိ – ‘‘ခီဏာ မေ အာသဝာ’’တိ။
Puna caparaṃ khīṇāsavassa bhikkhuno vivekaninnaṃ cittaṃ hoti vivekapoṇaṃ vivekapabbhāraṃ vivekaṭṭhaṃ nekkhammābhirataṃ byantībhūtaṃ 10 sabbaso āsavaṭṭhāniyehi dhammehi. Yampi khīṇāsavassa bhikkhuno vivekaninnaṃ cittaṃ hoti vivekapoṇaṃ vivekapabbhāraṃ vivekaṭṭhaṃ nekkhammābhirataṃ byantibhūtaṃ sabbaso āsavaṭṭhāniyehi dhammehi, idampi khīṇāsavassa bhikkhuno balaṃ hoti, yaṃ balaṃ āgamma khīṇāsavo bhikkhu āsavānaṃ khayaṃ paṭijānāti – ‘‘khīṇā me āsavā’’ti.
ပုန စပရံ ခီဏာသဝသ္သ ဘိက္ခုနော စတ္တာရော သတိပဋ္ဌာနာ ဘာဝိတာ ဟောန္တိ သုဘာဝိတာ။ ယမ္ပိ ခီဏာသဝသ္သ ဘိက္ခုနော စတ္တာရော သတိပဋ္ဌာနာ ဘာဝိတာ ဟောန္တိ သုဘာဝိတာ, ဣဒမ္ပိ ခီဏာသဝသ္သ ဘိက္ခုနော ဗလံ ဟောတိ, ယံ ဗလံ အာဂမ္မ ခီဏာသဝော ဘိက္ခု အာသဝာနံ ခယံ ပဋိဇာနာတိ – ‘‘ခီဏာ မေ အာသဝာ’’တိ။
Puna caparaṃ khīṇāsavassa bhikkhuno cattāro satipaṭṭhānā bhāvitā honti subhāvitā. Yampi khīṇāsavassa bhikkhuno cattāro satipaṭṭhānā bhāvitā honti subhāvitā, idampi khīṇāsavassa bhikkhuno balaṃ hoti, yaṃ balaṃ āgamma khīṇāsavo bhikkhu āsavānaṃ khayaṃ paṭijānāti – ‘‘khīṇā me āsavā’’ti.
ပုန စပရံ ခီဏာသဝသ္သ ဘိက္ခုနော စတ္တာရော သမ္မပ္ပဓာနာ ဘာဝိတာ ဟောန္တိ သုဘာဝိတာ။ပေ.။ စတ္တာရော ဣဒ္ဓိပာဒာ ဘာဝိတာ ဟောန္တိ သုဘာဝိတာ။ ပဉ္စိန္ဒ္ရိယာနိ ဘာဝိတာနိ ဟောန္တိ သုဘာဝိတာနိ။ ပဉ္စ ဗလာနိ ဘာဝိတာနိ ဟောန္တိ သုဘာဝိတာနိ။ သတ္တ ဗောဇ္ဈင္ဂာ ဘာဝိတာ ဟောန္တိ သုဘာဝိတာ။ပေ.။ အရိယော အဋ္ဌင္ဂိကော မဂ္ဂော ဘာဝိတော ဟောတိ သုဘာဝိတော။ ယမ္ပိ ခီဏာသဝသ္သ ဘိက္ခုနော အဋ္ဌင္ဂိကော မဂ္ဂော ဘာဝိတော ဟောတိ သုဘာဝိတော, ဣဒမ္ပိ ခီဏာသဝသ္သ ဘိက္ခုနော ဗလံ ဟောတိ, ယံ ဗလံ အာဂမ္မ ခီဏာသဝော ဘိက္ခု အာသဝာနံ ခယံ ပဋိဇာနာတိ – ‘‘ခီဏာ မေ အာသဝာ’’တိ။ ဣမာနိ ဒသ ခီဏာသဝဗလာနိ။
Puna caparaṃ khīṇāsavassa bhikkhuno cattāro sammappadhānā bhāvitā honti subhāvitā…pe… cattāro iddhipādā bhāvitā honti subhāvitā… pañcindriyāni bhāvitāni honti subhāvitāni… pañca balāni bhāvitāni honti subhāvitāni… satta bojjhaṅgā bhāvitā honti subhāvitā…pe… ariyo aṭṭhaṅgiko maggo bhāvito hoti subhāvito. Yampi khīṇāsavassa bhikkhuno aṭṭhaṅgiko maggo bhāvito hoti subhāvito, idampi khīṇāsavassa bhikkhuno balaṃ hoti, yaṃ balaṃ āgamma khīṇāsavo bhikkhu āsavānaṃ khayaṃ paṭijānāti – ‘‘khīṇā me āsavā’’ti. Imāni dasa khīṇāsavabalāni.
ကတမာနိ ဒသ ဣဒ္ဓိဗလာနိ? အဓိဋ္ဌာနာ ဣဒ္ဓိ, ဝိကုဗ္ဗနာ ဣဒ္ဓိ, မနောမယာ ဣဒ္ဓိ, ဉာဏဝိပ္ဖာရာ ဣဒ္ဓိ, သမာဓိဝိပ္ဖာရာ ဣဒ္ဓိ, အရိယာ ဣဒ္ဓိ, ကမ္မဝိပာကဇာ ဣဒ္ဓိ, ပုညဝတော ဣဒ္ဓိ, ဝိဇ္ဇာမယာ ဣဒ္ဓိ, တတ္ထ တတ္ထ သမ္မာ ပယောဂပ္ပစ္စယာ ဣဇ္ဈနဋ္ဌေန ဣဒ္ဓိ – ဣမာနိ ဒသ ဣဒ္ဓိဗလာနိ။
Katamāni dasa iddhibalāni? Adhiṭṭhānā iddhi, vikubbanā iddhi, manomayā iddhi, ñāṇavipphārā iddhi, samādhivipphārā iddhi, ariyā iddhi, kammavipākajā iddhi, puññavato iddhi, vijjāmayā iddhi, tattha tattha sammā payogappaccayā ijjhanaṭṭhena iddhi – imāni dasa iddhibalāni.
ကတမာနိ ဒသ တထာဂတဗလာနိ? ဣဓ တထာဂတော ဌာနဉ္စ ဌာနတော အဋ္ဌာနဉ္စ အဋ္ဌာနတော ယထာဘူတံ ပဇာနာတိ။ ယမ္ပိ တထာဂတော ဌာနဉ္စ ဌာနတော အဋ္ဌာနဉ္စ အဋ္ဌာနတော ယထာဘူတံ ပဇာနာတိ, ဣဒမ္ပိ တထာဂတသ္သ တထာဂတဗလံ ဟောတိ, ယံ ဗလံ အာဂမ္မ တထာဂတော အာသဘံ ဌာနံ ပဋိဇာနာတိ ပရိသာသု သီဟနာဒံ နဒတိ, ဗ္ရဟ္မစက္ကံ ပဝတ္တေတိ။
Katamāni dasa tathāgatabalāni? Idha tathāgato ṭhānañca ṭhānato aṭṭhānañca aṭṭhānato yathābhūtaṃ pajānāti. Yampi tathāgato ṭhānañca ṭhānato aṭṭhānañca aṭṭhānato yathābhūtaṃ pajānāti, idampi tathāgatassa tathāgatabalaṃ hoti, yaṃ balaṃ āgamma tathāgato āsabhaṃ ṭhānaṃ paṭijānāti parisāsu sīhanādaṃ nadati, brahmacakkaṃ pavatteti.
ပုန စပရံ တထာဂတော အတီတာနာဂတပစ္စုပ္ပန္နာနံ ကမ္မသမာဒာနာနံ ဌာနသော ဟေတုသော ဝိပာကံ ယထာဘူတံ ပဇာနာတိ။ ယမ္ပိ တထာဂတော အတီတာနာဂတပစ္စုပ္ပန္နာနံ ကမ္မသမာဒာနာနံ ဌာနသော ဟေတုသော ဝိပာကံ ယထာဘူတံ ပဇာနာတိ, ဣဒမ္ပိ တထာဂတသ္သ တထာဂတဗလံ ဟောတိ, ယံ ဗလံ အာဂမ္မ တထာဂတော အာသဘံ ဌာနံ ပဋိဇာနာတိ, ပရိသာသု သီဟနာဒံ, နဒတိ, ဗ္ရဟ္မစက္ကံ ပဝတ္တေတိ။
Puna caparaṃ tathāgato atītānāgatapaccuppannānaṃ kammasamādānānaṃ ṭhānaso hetuso vipākaṃ yathābhūtaṃ pajānāti. Yampi tathāgato atītānāgatapaccuppannānaṃ kammasamādānānaṃ ṭhānaso hetuso vipākaṃ yathābhūtaṃ pajānāti, idampi tathāgatassa tathāgatabalaṃ hoti, yaṃ balaṃ āgamma tathāgato āsabhaṃ ṭhānaṃ paṭijānāti, parisāsu sīhanādaṃ, nadati, brahmacakkaṃ pavatteti.
ပုန စပရံ တထာဂတော သဗ္ဗတ္ထဂာမိနိံ ပဋိပဒံ 11 ယထာဘူတံ ပဇာနာတိ။ ယမ္ပိ တထာဂတော သဗ္ဗတ္ထဂာမိနိံ ပဋိပဒံ ယထာဘူတံ ပဇာနာတိ, ဣဒမ္ပိ တထာဂတသ္သ တထာဂတဗလံ ဟောတိ, ယံ ဗလံ အာဂမ္မ တထာဂတော အာသဘံ ဌာနံ ပဋိဇာနာတိ, ပရိသာသု သီဟနာဒံ နဒတိ, ဗ္ရဟ္မစက္ကံ ပဝတ္တေတိ။
Puna caparaṃ tathāgato sabbatthagāminiṃ paṭipadaṃ 12 yathābhūtaṃ pajānāti. Yampi tathāgato sabbatthagāminiṃ paṭipadaṃ yathābhūtaṃ pajānāti, idampi tathāgatassa tathāgatabalaṃ hoti, yaṃ balaṃ āgamma tathāgato āsabhaṃ ṭhānaṃ paṭijānāti, parisāsu sīhanādaṃ nadati, brahmacakkaṃ pavatteti.
ပုန စပရံ တထာဂတော အနေကဓာတုနာနာဓာတုလောကံ ယထာဘူတံ ပဇာနာတိ။ ယမ္ပိ တထာဂတော အနေကဓာတုနာနာဓာတုလောကံ ယထာဘူတံ ပဇာနာတိ, ဣဒမ္ပိ တထာဂတသ္သ။ပေ.။။
Puna caparaṃ tathāgato anekadhātunānādhātulokaṃ yathābhūtaṃ pajānāti. Yampi tathāgato anekadhātunānādhātulokaṃ yathābhūtaṃ pajānāti, idampi tathāgatassa…pe….
ပုန စပရံ တထာဂတော သတ္တာနံ နာနာဓိမုတ္တိကတံ ယထာဘူတံ ပဇာနာတိ။ ယမ္ပိ တထာဂတော သတ္တာနံ နာနာဓိမုတ္တိကတံ ယထာဘူတံ ပဇာနာတိ, ဣဒမ္ပိ တထာဂတသ္သ။ပေ.။။
Puna caparaṃ tathāgato sattānaṃ nānādhimuttikataṃ yathābhūtaṃ pajānāti. Yampi tathāgato sattānaṃ nānādhimuttikataṃ yathābhūtaṃ pajānāti, idampi tathāgatassa…pe….
ပုန စပရံ တထာဂတော ပရသတ္တာနံ ပရပုဂ္ဂလာနံ ဣန္ဒ္ရိယပရောပရိယတ္တံ ယထာဘူတံ ပဇာနာတိ။ ယမ္ပိ တထာဂတော ပရသတ္တာနံ ပရပုဂ္ဂလာနံ ဣန္ဒ္ရိယပရောပရိယတ္တံ ယထာဘူတံ ပဇာနာတိ, ဣဒမ္ပိ တထာဂတသ္သ။ပေ.။။
Puna caparaṃ tathāgato parasattānaṃ parapuggalānaṃ indriyaparopariyattaṃ yathābhūtaṃ pajānāti. Yampi tathāgato parasattānaṃ parapuggalānaṃ indriyaparopariyattaṃ yathābhūtaṃ pajānāti, idampi tathāgatassa…pe….
ပုန စပရံ တထာဂတော ဈာနဝိမောက္ခသမာဓိသမာပတ္တီနံ သံကိလေသံ ဝောဒာနံ ဝုဋ္ဌာနံ ယထာဘူတံ ပဇာနာတိ။ ယမ္ပိ တထာဂတော ဈာနဝိမောက္ခသမာဓိသမာပတ္တီနံ သံကိလေသံ ဝောဒာနံ ဝုဋ္ဌာနံ ယထာဘူတံ ပဇာနာတိ, ဣဒမ္ပိ တထာဂတသ္သ။ပေ.။။
Puna caparaṃ tathāgato jhānavimokkhasamādhisamāpattīnaṃ saṃkilesaṃ vodānaṃ vuṭṭhānaṃ yathābhūtaṃ pajānāti. Yampi tathāgato jhānavimokkhasamādhisamāpattīnaṃ saṃkilesaṃ vodānaṃ vuṭṭhānaṃ yathābhūtaṃ pajānāti, idampi tathāgatassa…pe….
ပုန စပရံ တထာဂတော အနေကဝိဟိတံ ပုဗ္ဗေနိဝာသံ အနုသ္သရတိ, သေယ္ယထိဒံ – ဧကမ္ပိ ဇာတိံ ဒ္ဝေပိ ဇာတိယော။ပေ.။ ဣတိ သာကာရံ သဥဒ္ဒေသံ အနေကဝိဟိတံ ပုဗ္ဗေနိဝာသံ အနုသ္သရတိ။ ယမ္ပိ တထာဂတော အနေကဝိဟိတံ ပုဗ္ဗေနိဝာသံ အနုသ္သရတိ။ သေယ္ယထိဒံ – ဧကမ္ပိ ဇာတိံ ဒ္ဝေပိ ဇာတိယော။ပေ.။ ဣဒမ္ပိ တထာဂတသ္သ။ပေ.။။
Puna caparaṃ tathāgato anekavihitaṃ pubbenivāsaṃ anussarati, seyyathidaṃ – ekampi jātiṃ dvepi jātiyo…pe… iti sākāraṃ sauddesaṃ anekavihitaṃ pubbenivāsaṃ anussarati. Yampi tathāgato anekavihitaṃ pubbenivāsaṃ anussarati. Seyyathidaṃ – ekampi jātiṃ dvepi jātiyo…pe… idampi tathāgatassa…pe….
ပုန စပရံ တထာဂတော ဒိဗ္ဗေန စက္ခုနာ ဝိသုဒ္ဓေန အတိက္ကန္တမာနုသကေန သတ္တေ ပသ္သတိ စဝမာနေ ဥပပဇ္ဇမာနေ။ပေ.။ ယမ္ပိ တထာဂတော ဒိဗ္ဗေန စက္ခုနာ ဝိသုဒ္ဓေန အတိက္ကန္တမာနုသကေန သတ္တေ ပသ္သတိ စဝမာနေ ဥပပဇ္ဇမာနေ။ပေ.။ ဣဒမ္ပိ တထာဂတသ္သ။ပေ.။။
Puna caparaṃ tathāgato dibbena cakkhunā visuddhena atikkantamānusakena satte passati cavamāne upapajjamāne…pe… yampi tathāgato dibbena cakkhunā visuddhena atikkantamānusakena satte passati cavamāne upapajjamāne…pe… idampi tathāgatassa…pe….
ပုန စပရံ တထာဂတော အာသဝာနံ ခယာ အနာသဝံ စေတောဝိမုတ္တိံ ပညာဝိမုတ္တိံ ဒိဋ္ဌေဝ ဓမ္မေ သယံ အဘိညာ သစ္ဆိကတ္ဝာ ဥပသမ္ပဇ္ဇ ဝိဟရတိ။ ယမ္ပိ တထာဂတော အာသဝာနံ ခယာ အနာသဝံ စေတောဝိမုတ္တိံ ပညာဝိမုတ္တိံ ဒိဋ္ဌေဝ ဓမ္မေ သယံ အဘိညာ သစ္ဆိကတ္ဝာ ဥပသမ္ပဇ္ဇ ဝိဟရတိ, ဣဒမ္ပိ တထာဂတသ္သ တထာဂတဗလံ ဟောတိ, ယံ ဗလံ အာဂမ္မ တထာဂတော အာသဘံ ဌာနံ ပဋိဇာနာတိ, ပရိသာသု သီဟနာဒံ နဒတိ, ဗ္ရဟ္မစက္ကံ ပဝတ္တေတိ။ ဣမာနိ ဒသ တထာဂတဗလာနိ။
Puna caparaṃ tathāgato āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Yampi tathāgato āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati, idampi tathāgatassa tathāgatabalaṃ hoti, yaṃ balaṃ āgamma tathāgato āsabhaṃ ṭhānaṃ paṭijānāti, parisāsu sīhanādaṃ nadati, brahmacakkaṃ pavatteti. Imāni dasa tathāgatabalāni.
၄၅. ကေနဋ္ဌေန သဒ္ဓာဗလံ? ကေနဋ္ဌေန ဝီရိယဗလံ? ကေနဋ္ဌေန သတိဗလံ? ကေနဋ္ဌေန သမာဓိဗလံ? ကေနဋ္ဌေန ပညာဗလံ? ကေနဋ္ဌေန ဟိရိဗလံ? ကေနဋ္ဌေန ဩတ္တပ္ပဗလံ? ကေနဋ္ဌေန ပဋိသင္ခာနဗလံ။ပေ.။ ကေနဋ္ဌေန တထာဂတဗလံ?
45. Kenaṭṭhena saddhābalaṃ? Kenaṭṭhena vīriyabalaṃ? Kenaṭṭhena satibalaṃ? Kenaṭṭhena samādhibalaṃ? Kenaṭṭhena paññābalaṃ? Kenaṭṭhena hiribalaṃ? Kenaṭṭhena ottappabalaṃ? Kenaṭṭhena paṭisaṅkhānabalaṃ…pe… kenaṭṭhena tathāgatabalaṃ?
အသ္သဒ္ဓိယေ အကမ္ပိယဋ္ဌေန သဒ္ဓာဗလံ။ ကောသဇ္ဇေ အကမ္ပိယဋ္ဌေန ဝီရိယဗလံ။ ပမာဒေ အကမ္ပိယဋ္ဌေန သတိဗလံ။ ဥဒ္ဓစ္စေ အကမ္ပိယဋ္ဌေန သမာဓိဗလံ။ အဝိဇ္ဇာယ အကမ္ပိယဋ္ဌေန ပညာဗလံ ။ ဟိရီယတိ ပာပကေ အကုသလေ ဓမ္မေတိ – ဟိရိဗလံ။ ဩတ္တပ္ပတိ ပာပကေ အကုသလေ ဓမ္မေတိ – ဩတ္တပ္ပဗလံ။ ဉာဏေန ကိလေသေ ပဋိသင္ခာတီတိ – ပဋိသင္ခာနဗလံ။ တတ္ထ ဇာတာ ဓမ္မာ ဧကရသာ ဟောန္တီတိ – ဘာဝနာဗလံ။ တတ္ထ နတ္ထိ ကိဉ္စိ ဝဇ္ဇန္တိ – အနဝဇ္ဇဗလံ။ တေန စိတ္တံ သင္ဂဏ္ဟာတီတိ – သင္ဂဟဗလံ။ တံ တသ္သ ခမတီတိ – 13 ခန္တိဗလံ။ တေန စိတ္တံ ပညပေတီတိ – ပညတ္တိဗလံ။ တေန စိတ္တံ နိဇ္ဈာပေတီတိ – နိဇ္ဈတ္တိဗလံ။ တေန စိတ္တံ ဝသံ ဝတ္တေတီတိ – ဣသ္သရိယဗလံ။ တေန စိတ္တံ အဓိဋ္ဌာတီတိ – အဓိဋ္ဌာနဗလံ။ တေန စိတ္တံ ဧကဂ္ဂန္တိ – သမထဗလံ။ တတ္ထ ဇာတေ ဓမ္မေ အနုပသ္သတီတိ – ဝိပသ္သနာဗလံ။ တတ္ထ သိက္ခတီတိ – သေခဗလံ။ တတ္ထ သိက္ခိတတ္တာ – အသေခဗလံ။ တေန အာသဝာ ခီဏာတိ – ခီဏာသဝဗလံ။ တသ္သ ဣဇ္ဈတီတိ – ဣဒ္ဓိဗလံ။ အပ္ပမေယ္ယဋ္ဌေန တထာဂတဗလန္တိ။
Assaddhiye akampiyaṭṭhena saddhābalaṃ. Kosajje akampiyaṭṭhena vīriyabalaṃ. Pamāde akampiyaṭṭhena satibalaṃ. Uddhacce akampiyaṭṭhena samādhibalaṃ. Avijjāya akampiyaṭṭhena paññābalaṃ . Hirīyati pāpake akusale dhammeti – hiribalaṃ. Ottappati pāpake akusale dhammeti – ottappabalaṃ. Ñāṇena kilese paṭisaṅkhātīti – paṭisaṅkhānabalaṃ. Tattha jātā dhammā ekarasā hontīti – bhāvanābalaṃ. Tattha natthi kiñci vajjanti – anavajjabalaṃ. Tena cittaṃ saṅgaṇhātīti – saṅgahabalaṃ. Taṃ tassa khamatīti – 14 khantibalaṃ. Tena cittaṃ paññapetīti – paññattibalaṃ. Tena cittaṃ nijjhāpetīti – nijjhattibalaṃ. Tena cittaṃ vasaṃ vattetīti – issariyabalaṃ. Tena cittaṃ adhiṭṭhātīti – adhiṭṭhānabalaṃ. Tena cittaṃ ekagganti – samathabalaṃ. Tattha jāte dhamme anupassatīti – vipassanābalaṃ. Tattha sikkhatīti – sekhabalaṃ. Tattha sikkhitattā – asekhabalaṃ. Tena āsavā khīṇāti – khīṇāsavabalaṃ. Tassa ijjhatīti – iddhibalaṃ. Appameyyaṭṭhena tathāgatabalanti.
ဗလကထာ နိဋ္ဌိတာ။
Balakathā niṭṭhitā.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ဗလကထာဝဏ္ဏနာ • Balakathāvaṇṇanā
