| Library / Tipiṭaka / තිපිටක • Tipiṭaka / පටිසම්‌භිදාමග්‌ගපාළි • Paṭisambhidāmaggapāḷi |
9. බලකථා
9. Balakathā
44. සාවත්‌ථිනිදානං 1. ‘‘පඤ්‌චිමානි , භික්‌ඛවෙ, බලානි. කතමානි පඤ්‌ච? සද්‌ධාබලං, වීරියබලං, සතිබලං, සමාධිබලං, පඤ්‌ඤාබලං – ඉමානි ඛො, භික්‌ඛවෙ, පඤ්‌ච බලානි.
44. Sāvatthinidānaṃ 2. ‘‘Pañcimāni , bhikkhave, balāni. Katamāni pañca? Saddhābalaṃ, vīriyabalaṃ, satibalaṃ, samādhibalaṃ, paññābalaṃ – imāni kho, bhikkhave, pañca balāni.
‘‘අපි ච, අට්‌ඨසට්‌ඨි බලානි – සද්‌ධාබලං, වීරියබලං, සතිබලං, සමාධිබලං, පඤ්‌ඤාබලං, හිරිබලං, ඔත්‌තප්‌පබලං, පටිසඞ්‌ඛානබලං, භාවනාබලං, අනවජ්‌ජබලං, සඞ්‌ගහබලං, ඛන්‌තිබලං, පඤ්‌ඤත්‌තිබලං, නිජ්‌ඣත්‌තිබලං, ඉස්‌සරියබලං , අධිට්‌ඨානබලං, සමථබලං, විපස්‌සනාබලං, දස සෙඛබලානි, දස අසෙඛබලානි, දස ඛීණාසවබලානි, දස ඉද්‌ධිබලානි, දස තථාගතබලානි’’.
‘‘Api ca, aṭṭhasaṭṭhi balāni – saddhābalaṃ, vīriyabalaṃ, satibalaṃ, samādhibalaṃ, paññābalaṃ, hiribalaṃ, ottappabalaṃ, paṭisaṅkhānabalaṃ, bhāvanābalaṃ, anavajjabalaṃ, saṅgahabalaṃ, khantibalaṃ, paññattibalaṃ, nijjhattibalaṃ, issariyabalaṃ , adhiṭṭhānabalaṃ, samathabalaṃ, vipassanābalaṃ, dasa sekhabalāni, dasa asekhabalāni, dasa khīṇāsavabalāni, dasa iddhibalāni, dasa tathāgatabalāni’’.
කතමං සද්‌ධාබලං? අස්‌සද්‌ධියෙ න කම්‌පතීති – සද්‌ධාබලං. සහජාතානං ධම්‌මානං උපත්‌ථම්‌භනට්‌ඨෙන සද්‌ධාබලං, කිලෙසානං පරියාදානට්‌ඨෙන සද්‌ධාබලං, පටිවෙධාදිවිසොධනට්‌ඨෙන සද්‌ධාබලං, චිත්‌තස්‌ස අධිට්‌ඨානට්‌ඨෙන සද්‌ධාබලං, චිත්‌තස්‌ස වොදානට්‌ඨෙන සද්‌ධාබලං, විසෙසාධිගමට්‌ඨෙන සද්‌ධාබලං, උත්‌තරි පටිවෙධට්‌ඨෙන සද්‌ධාබලං, සච්‌චාභිසමයට්‌ඨෙන සද්‌ධාබලං, නිරොධෙ පතිට්‌ඨාපකට්‌ඨෙන සද්‌ධාබලං. ඉදං සද්‌ධාබලං.
Katamaṃ saddhābalaṃ? Assaddhiye na kampatīti – saddhābalaṃ. Sahajātānaṃ dhammānaṃ upatthambhanaṭṭhena saddhābalaṃ, kilesānaṃ pariyādānaṭṭhena saddhābalaṃ, paṭivedhādivisodhanaṭṭhena saddhābalaṃ, cittassa adhiṭṭhānaṭṭhena saddhābalaṃ, cittassa vodānaṭṭhena saddhābalaṃ, visesādhigamaṭṭhena saddhābalaṃ, uttari paṭivedhaṭṭhena saddhābalaṃ, saccābhisamayaṭṭhena saddhābalaṃ, nirodhe patiṭṭhāpakaṭṭhena saddhābalaṃ. Idaṃ saddhābalaṃ.
කතමං වීරියබලං? කොසජ්‌ජෙ න කම්‌පතීති – වීරියබලං. සහජාතානං ධම්‌මානං උපත්‌ථම්‌භනට්‌ඨෙන වීරියබලං, කිලෙසානං පරියාදානට්‌ඨෙන වීරියබලං, පටිවෙධාදිවිසොධනට්‌ඨෙන වීරියබලං, චිත්‌තස්‌ස අධිට්‌ඨානට්‌ඨෙන වීරියබලං, චිත්‌තස්‌ස වොදානට්‌ඨෙන වීරියබලං, විසෙසාධිගමට්‌ඨෙන වීරියබලං, උත්‌තරි පටිවෙධට්‌ඨෙන වීරියබලං, සච්‌චාභිසමයට්‌ඨෙන වීරියබලං, නිරොධෙ පතිට්‌ඨාපකට්‌ඨෙන වීරියබලං. ඉදං වීරියබලං.
Katamaṃ vīriyabalaṃ? Kosajje na kampatīti – vīriyabalaṃ. Sahajātānaṃ dhammānaṃ upatthambhanaṭṭhena vīriyabalaṃ, kilesānaṃ pariyādānaṭṭhena vīriyabalaṃ, paṭivedhādivisodhanaṭṭhena vīriyabalaṃ, cittassa adhiṭṭhānaṭṭhena vīriyabalaṃ, cittassa vodānaṭṭhena vīriyabalaṃ, visesādhigamaṭṭhena vīriyabalaṃ, uttari paṭivedhaṭṭhena vīriyabalaṃ, saccābhisamayaṭṭhena vīriyabalaṃ, nirodhe patiṭṭhāpakaṭṭhena vīriyabalaṃ. Idaṃ vīriyabalaṃ.
කතමං සතිබලං? පමාදෙ න කම්‌පතීති – සතිබලං. සහජාතානං ධම්‌මානං උපත්‌ථම්‌භනට්‌ඨෙන සතිබලං…පෙ.… නිරොධෙ පතිට්‌ඨාපකට්‌ඨෙන සතිබලං. ඉදං සතිබලං.
Katamaṃ satibalaṃ? Pamāde na kampatīti – satibalaṃ. Sahajātānaṃ dhammānaṃ upatthambhanaṭṭhena satibalaṃ…pe… nirodhe patiṭṭhāpakaṭṭhena satibalaṃ. Idaṃ satibalaṃ.
කතමං සමාධිබලං? උද්‌ධච්‌චෙ න කම්‌පතීති – සමාධිබලං. සහජාතානං ධම්‌මානං උපත්‌ථම්‌භනට්‌ඨෙන සමාධිබලං…පෙ.… නිරොධෙ පතිට්‌ඨාපකට්‌ඨෙන සමාධිබලං. ඉදං සමාධිබලං.
Katamaṃ samādhibalaṃ? Uddhacce na kampatīti – samādhibalaṃ. Sahajātānaṃ dhammānaṃ upatthambhanaṭṭhena samādhibalaṃ…pe… nirodhe patiṭṭhāpakaṭṭhena samādhibalaṃ. Idaṃ samādhibalaṃ.
කතමං පඤ්‌ඤාබලං? අවිජ්‌ජාය න කම්‌පතීති – පඤ්‌ඤාබලං. සහජාතානං ධම්‌මානං උපත්‌ථම්‌භනට්‌ඨෙන පඤ්‌ඤාබලං…පෙ.… නිරොධෙ පතිට්‌ඨාපකට්‌ඨෙන පඤ්‌ඤාබලං. ඉදං පඤ්‌ඤාබලං.
Katamaṃ paññābalaṃ? Avijjāya na kampatīti – paññābalaṃ. Sahajātānaṃ dhammānaṃ upatthambhanaṭṭhena paññābalaṃ…pe… nirodhe patiṭṭhāpakaṭṭhena paññābalaṃ. Idaṃ paññābalaṃ.
කතමං හිරිබලං? නෙක්‌ඛම්‌මෙන කාමච්‌ඡන්‌දං හිරීයතීති 3 – හිරිබලං. අබ්‍යාපාදෙන බ්‍යාපාදං හිරීයතීති – හිරිබලං. ආලොකසඤ්‌ඤාය ථිනමිද්‌ධං හිරීයතීති – හිරිබලං. අවික්‌ඛෙපෙන උද්‌ධච්‌චං හිරීයතීති – හිරිබලං. ධම්‌මවවත්‌ථානෙන විචිකිච්‌ඡං හිරීයතීති – හිරිබලං. ඤාණෙන අවිජ්‌ජං හිරීයතීති – හිරිබලං. පාමොජ්‌ජෙන අරතිං හිරීයතීති – හිරිබලං. පඨමෙන ඣානෙන නීවරණෙ හිරීයතීති – හිරිබලං…පෙ.… අරහත්‌තමග්‌ගෙන සබ්‌බකිලෙසෙ හිරීයතීති – හිරිබලං. ඉදං හිරිබලං.
Katamaṃ hiribalaṃ? Nekkhammena kāmacchandaṃ hirīyatīti 4 – hiribalaṃ. Abyāpādena byāpādaṃ hirīyatīti – hiribalaṃ. Ālokasaññāya thinamiddhaṃ hirīyatīti – hiribalaṃ. Avikkhepena uddhaccaṃ hirīyatīti – hiribalaṃ. Dhammavavatthānena vicikicchaṃ hirīyatīti – hiribalaṃ. Ñāṇena avijjaṃ hirīyatīti – hiribalaṃ. Pāmojjena aratiṃ hirīyatīti – hiribalaṃ. Paṭhamena jhānena nīvaraṇe hirīyatīti – hiribalaṃ…pe… arahattamaggena sabbakilese hirīyatīti – hiribalaṃ. Idaṃ hiribalaṃ.
කතමං ඔත්‌තප්‌පබලං? නෙක්‌ඛම්‌මෙන කාමච්‌ඡන්‌දං ඔත්‌තප්‌පතීති – ඔත්‌තප්‌පබලං. අබ්‍යාපාදෙන බ්‍යාපාදං ඔත්‌තප්‌පතීති – ඔත්‌තප්‌පබලං. ආලොකසඤ්‌ඤාය ථිනමිද්‌ධං ඔත්‌තප්‌පතීති – ඔත්‌තප්‌පබලං. අවික්‌ඛෙපෙන උද්‌ධච්‌චං ඔත්‌තප්‌පතීති – ඔත්‌තප්‌පබලං. ධම්‌මවවත්‌ථානෙන විචිකිච්‌ඡං ඔත්‌තප්‌පතීති – ඔත්‌තප්‌පබලං. ඤාණෙන අවිජ්‌ජං ඔත්‌තප්‌පතීති – ඔත්‌තප්‌පබලං . පාමොජ්‌ජෙන අරතිං ඔත්‌තප්‌පතීති – ඔත්‌තප්‌පබලං. පඨමෙන ඣානෙන නීවරණෙ ඔත්‌තප්‌පතීති – ඔත්‌තප්‌පබලං…පෙ.… අරහත්‌තමග්‌ගෙන සබ්‌බකිලෙසෙ ඔත්‌තප්‌පතීති – ඔත්‌තප්‌පබලං. ඉදං ඔත්‌තප්‌පබලං.
Katamaṃ ottappabalaṃ? Nekkhammena kāmacchandaṃ ottappatīti – ottappabalaṃ. Abyāpādena byāpādaṃ ottappatīti – ottappabalaṃ. Ālokasaññāya thinamiddhaṃ ottappatīti – ottappabalaṃ. Avikkhepena uddhaccaṃ ottappatīti – ottappabalaṃ. Dhammavavatthānena vicikicchaṃ ottappatīti – ottappabalaṃ. Ñāṇena avijjaṃ ottappatīti – ottappabalaṃ . Pāmojjena aratiṃ ottappatīti – ottappabalaṃ. Paṭhamena jhānena nīvaraṇe ottappatīti – ottappabalaṃ…pe… arahattamaggena sabbakilese ottappatīti – ottappabalaṃ. Idaṃ ottappabalaṃ.
කතමං පටිසඞ්‌ඛානබලං? නෙක්‌ඛම්‌මෙන කාමච්‌ඡන්‌දං පටිසඞ්‌ඛාතීති – පටිසඞ්‌ඛානබලං. අබ්‍යාපාදෙන බ්‍යාපාදං පටිසඞ්‌ඛාතීති – පටිසඞ්‌ඛානබලං. ආලොකසඤ්‌ඤාය ථිනමිද්‌ධං පටිසඞ්‌ඛාතීති – පටිසඞ්‌ඛානබලං. අවික්‌ඛෙපෙන උද්‌ධච්‌චං පටිසඞ්‌ඛාතීති – පටිසඞ්‌ඛානබලං. ධම්‌මවවත්‌ථානෙන විචිකිච්‌ඡං පටිසඞ්‌ඛාතීති – පටිසඞ්‌ඛානබලං. ඤාණෙන අවිජ්‌ජං පටිසඞ්‌ඛාතීති – පටිසඞ්‌ඛානබලං . පාමොජ්‌ජෙන අරතිං පටිසඞ්‌ඛාතීති – පටිසඞ්‌ඛානබලං. පඨමෙන ඣානෙන නීවරණෙ පටිසඞ්‌ඛාතීති – පටිසඞ්‌ඛානබලං…පෙ.… අරහත්‌තමග්‌ගෙන සබ්‌බකිලෙසෙ පටිසඞ්‌ඛාතීති – පටිසඞ්‌ඛානබලං. ඉදං පටිසඞ්‌ඛානබලං.
Katamaṃ paṭisaṅkhānabalaṃ? Nekkhammena kāmacchandaṃ paṭisaṅkhātīti – paṭisaṅkhānabalaṃ. Abyāpādena byāpādaṃ paṭisaṅkhātīti – paṭisaṅkhānabalaṃ. Ālokasaññāya thinamiddhaṃ paṭisaṅkhātīti – paṭisaṅkhānabalaṃ. Avikkhepena uddhaccaṃ paṭisaṅkhātīti – paṭisaṅkhānabalaṃ. Dhammavavatthānena vicikicchaṃ paṭisaṅkhātīti – paṭisaṅkhānabalaṃ. Ñāṇena avijjaṃ paṭisaṅkhātīti – paṭisaṅkhānabalaṃ . Pāmojjena aratiṃ paṭisaṅkhātīti – paṭisaṅkhānabalaṃ. Paṭhamena jhānena nīvaraṇe paṭisaṅkhātīti – paṭisaṅkhānabalaṃ…pe… arahattamaggena sabbakilese paṭisaṅkhātīti – paṭisaṅkhānabalaṃ. Idaṃ paṭisaṅkhānabalaṃ.
කතමං භාවනාබලං? කාමච්‌ඡන්‌දං පජහන්‌තො නෙක්‌ඛම්‌මං භාවෙතීති – භාවනාබලං. බ්‍යාපාදං පජහන්‌තො අබ්‍යාපාදං භාවෙතීති – භාවනාබලං. ථිනමිද්‌ධං පජහන්‌තො ආලොකසඤ්‌ඤං භාවෙතීති – භාවනාබලං. උද්‌ධච්‌චං පජහන්‌තො අවික්‌ඛෙපං භාවෙතීති – භාවනාබලං. විචිකිච්‌ඡං පජහන්‌තො ධම්‌මවවත්‌ථානං භාවෙතීති – භාවනාබලං. අවිජ්‌ජං පජහන්‌තො ඤාණං භාවෙතීති – භාවනාබලං. අරතිං පජහන්‌තො පාමොජ්‌ජං භාවෙතීති – භාවනාබලං. නීවරණෙ පජහන්‌තො පඨමං ඣානං භාවෙතීති – භාවනාබලං…පෙ.… සබ්‌බකිලෙසෙ පජහන්‌තො අරහත්‌තමග්‌ගං භාවෙතීති – භාවනාබලං. ඉදං භාවනාබලං.
Katamaṃ bhāvanābalaṃ? Kāmacchandaṃ pajahanto nekkhammaṃ bhāvetīti – bhāvanābalaṃ. Byāpādaṃ pajahanto abyāpādaṃ bhāvetīti – bhāvanābalaṃ. Thinamiddhaṃ pajahanto ālokasaññaṃ bhāvetīti – bhāvanābalaṃ. Uddhaccaṃ pajahanto avikkhepaṃ bhāvetīti – bhāvanābalaṃ. Vicikicchaṃ pajahanto dhammavavatthānaṃ bhāvetīti – bhāvanābalaṃ. Avijjaṃ pajahanto ñāṇaṃ bhāvetīti – bhāvanābalaṃ. Aratiṃ pajahanto pāmojjaṃ bhāvetīti – bhāvanābalaṃ. Nīvaraṇe pajahanto paṭhamaṃ jhānaṃ bhāvetīti – bhāvanābalaṃ…pe… sabbakilese pajahanto arahattamaggaṃ bhāvetīti – bhāvanābalaṃ. Idaṃ bhāvanābalaṃ.
කතමං අනවජ්‌ජබලං? කාමච්‌ඡන්‌දස්‌ස පහීනත්‌තා නෙක්‌ඛම්‌මෙ නත්‌ථි කිඤ්‌චි වජ්‌ජන්‌ති – අනවජ්‌ජබලං. බ්‍යාපාදස්‌ස පහීනත්‌තා අබ්‍යාපාදෙ නත්‌ථි කිඤ්‌චි වජ්‌ජන්‌ති – අනවජ්‌ජබලං. ථිනමිද්‌ධස්‌ස පහීනත්‌තා ආලොකසඤ්‌ඤාය නත්‌ථි කිඤ්‌චි වජ්‌ජන්‌ති – අනවජ්‌ජබලං. උද්‌ධච්‌චස්‌ස පහීනත්‌තා අවික්‌ඛෙපෙ නත්‌ථි කිඤ්‌චි වජ්‌ජන්‌ති – අනවජ්‌ජබලං. විචිකිච්‌ඡාය පහීනත්‌තා ධම්‌මවවත්‌ථානෙ නත්‌ථි කිඤ්‌චි වජ්‌ජන්‌ති – අනවජ්‌ජබලං. අවිජ්‌ජාය පහීනත්‌තා ඤාණෙ නත්‌ථි කිඤ්‌චි වජ්‌ජන්‌ති – අනවජ්‌ජබලං. අරතියා පහීනත්‌තා පාමොජ්‌ජෙ නත්‌ථි කිඤ්‌චි වජ්‌ජන්‌ති අනවජ්‌ජබලං. නීවරණානං පහීනත්‌තා පඨමජ්‌ඣානෙ නත්‌ථි කිඤ්‌චි වජ්‌ජන්‌ති – අනවජ්‌ජබලං…පෙ.… සබ්‌බකිලෙසානං පහීනත්‌තා අරහත්‌තමග්‌ගෙ නත්‌ථි කිඤ්‌චි වජ්‌ජන්‌ති – අනවජ්‌ජබලං. ඉදං අනවජ්‌ජබලං.
Katamaṃ anavajjabalaṃ? Kāmacchandassa pahīnattā nekkhamme natthi kiñci vajjanti – anavajjabalaṃ. Byāpādassa pahīnattā abyāpāde natthi kiñci vajjanti – anavajjabalaṃ. Thinamiddhassa pahīnattā ālokasaññāya natthi kiñci vajjanti – anavajjabalaṃ. Uddhaccassa pahīnattā avikkhepe natthi kiñci vajjanti – anavajjabalaṃ. Vicikicchāya pahīnattā dhammavavatthāne natthi kiñci vajjanti – anavajjabalaṃ. Avijjāya pahīnattā ñāṇe natthi kiñci vajjanti – anavajjabalaṃ. Aratiyā pahīnattā pāmojje natthi kiñci vajjanti anavajjabalaṃ. Nīvaraṇānaṃ pahīnattā paṭhamajjhāne natthi kiñci vajjanti – anavajjabalaṃ…pe… sabbakilesānaṃ pahīnattā arahattamagge natthi kiñci vajjanti – anavajjabalaṃ. Idaṃ anavajjabalaṃ.
කතමං සඞ්‌ගහබලං? කාමච්‌ඡන්‌දං පජහන්‌තො නෙක්‌ඛම්‌මවසෙන චිත්‌තං සඞ්‌ගණ්‌හාතීති – සඞ්‌ගහබලං. බ්‍යාපාදං පජහන්‌තො අබ්‍යාපාදවසෙන චිත්‌තං සඞ්‌ගණ්‌හාතීති – සඞ්‌ගහබලං. ථිනමිද්‌ධං පජහන්‌තො ආලොකසඤ්‌ඤාවසෙන චිත්‌තං සඞ්‌ගණ්‌හාතීති – සඞ්‌ගහබලං…පෙ.… සබ්‌බකිලෙසෙ පජහන්‌තො අරහත්‌තමග්‌ගවසෙන චිත්‌තං සඞ්‌ගණ්‌හාතීති – සඞ්‌ගහබලං. ඉදං සඞ්‌ගහබලං.
Katamaṃ saṅgahabalaṃ? Kāmacchandaṃ pajahanto nekkhammavasena cittaṃ saṅgaṇhātīti – saṅgahabalaṃ. Byāpādaṃ pajahanto abyāpādavasena cittaṃ saṅgaṇhātīti – saṅgahabalaṃ. Thinamiddhaṃ pajahanto ālokasaññāvasena cittaṃ saṅgaṇhātīti – saṅgahabalaṃ…pe… sabbakilese pajahanto arahattamaggavasena cittaṃ saṅgaṇhātīti – saṅgahabalaṃ. Idaṃ saṅgahabalaṃ.
කතමං ඛන්‌තිබලං? කාමච්‌ඡන්‌දස්‌ස පහීනත්‌තා නෙක්‌ඛම්‌මං ඛමතීති – ඛන්‌තිබලං. බ්‍යාපාදස්‌ස පහීනත්‌තා අබ්‍යාපාදො ඛමතීති – ඛන්‌තිබලං. ථිනමිද්‌ධස්‌ස පහීනත්‌තා ආලොකසඤ්‌ඤා ඛමතීති – ඛන්‌තිබලං. උද්‌ධච්‌චස්‌ස පහීනත්‌තා අවික්‌ඛෙපො ඛමතීති – ඛන්‌තිබලං. විචිකිච්‌ඡාය පහීනත්‌තා ධම්‌මවවත්‌ථානං ඛමතීති – ඛන්‌තිබලං. අවිජ්‌ජාය පහීනත්‌තා ඤාණං ඛමතීති – ඛන්‌තිබලං. අරතියා පහීනත්‌තා පාමොජ්‌ජං ඛමතීති – ඛන්‌තිබලං. නීවරණානං පහීනත්‌තා පඨමං ඣානං ඛමතීති – ඛන්‌තිබලං…පෙ.… සබ්‌බකිලෙසානං පහීනත්‌තා අරහත්‌තමග්‌ගො ඛමතීති – ඛන්‌තිබලං. ඉදං ඛන්‌තිබලං.
Katamaṃ khantibalaṃ? Kāmacchandassa pahīnattā nekkhammaṃ khamatīti – khantibalaṃ. Byāpādassa pahīnattā abyāpādo khamatīti – khantibalaṃ. Thinamiddhassa pahīnattā ālokasaññā khamatīti – khantibalaṃ. Uddhaccassa pahīnattā avikkhepo khamatīti – khantibalaṃ. Vicikicchāya pahīnattā dhammavavatthānaṃ khamatīti – khantibalaṃ. Avijjāya pahīnattā ñāṇaṃ khamatīti – khantibalaṃ. Aratiyā pahīnattā pāmojjaṃ khamatīti – khantibalaṃ. Nīvaraṇānaṃ pahīnattā paṭhamaṃ jhānaṃ khamatīti – khantibalaṃ…pe… sabbakilesānaṃ pahīnattā arahattamaggo khamatīti – khantibalaṃ. Idaṃ khantibalaṃ.
කතමං පඤ්‌ඤත්‌තිබලං? කාමච්‌ඡන්‌දං පජහන්‌තො නෙක්‌ඛම්‌මවසෙන චිත්‌තං පඤ්‌ඤපෙතීති – පඤ්‌ඤත්‌තිබලං. බ්‍යාපාදං පජහන්‌තො අබ්‍යාපාදවසෙන චිත්‌තං පඤ්‌ඤපෙතීති – පඤ්‌ඤත්‌තිබලං. ථිනමිද්‌ධං පජහන්‌තො ආලොකසඤ්‌ඤාවසෙන චිත්‌තං පඤ්‌ඤපෙතීති – පඤ්‌ඤත්‌තිබලං…පෙ.… සබ්‌බකිලෙසෙ පජහන්‌තො අරහත්‌තමග්‌ගවසෙන චිත්‌තං පඤ්‌ඤපෙතීති – පඤ්‌ඤත්‌තිබලං. ඉදං පඤ්‌ඤත්‌තිබලං.
Katamaṃ paññattibalaṃ? Kāmacchandaṃ pajahanto nekkhammavasena cittaṃ paññapetīti – paññattibalaṃ. Byāpādaṃ pajahanto abyāpādavasena cittaṃ paññapetīti – paññattibalaṃ. Thinamiddhaṃ pajahanto ālokasaññāvasena cittaṃ paññapetīti – paññattibalaṃ…pe… sabbakilese pajahanto arahattamaggavasena cittaṃ paññapetīti – paññattibalaṃ. Idaṃ paññattibalaṃ.
කතමං නිජ්‌ඣත්‌තිබලං? කාමච්‌ඡන්‌දං පජහන්‌තො නෙක්‌ඛම්‌මවසෙන චිත්‌තං නිජ්‌ඣාපෙතීති – නිජ්‌ඣත්‌තිබලං. බ්‍යාපාදං පජහන්‌තො අබ්‍යාපාදවසෙන චිත්‌තං නිජ්‌ඣාපෙතීති – නිජ්‌ඣත්‌තිබලං. ථිනමිද්‌ධං පජහන්‌තො ආලොකසඤ්‌ඤාවසෙන චිත්‌තං නිජ්‌ඣාපෙතීති – නිජ්‌ඣත්‌තිබලං…පෙ.… සබ්‌බකිලෙසෙ පජහන්‌තො අරහත්‌තමග්‌ගවසෙන චිත්‌තං නිජ්‌ඣාපෙතීති – නිජ්‌ඣත්‌තිබලං. ඉදං නිජ්‌ඣත්‌තිබලං.
Katamaṃ nijjhattibalaṃ? Kāmacchandaṃ pajahanto nekkhammavasena cittaṃ nijjhāpetīti – nijjhattibalaṃ. Byāpādaṃ pajahanto abyāpādavasena cittaṃ nijjhāpetīti – nijjhattibalaṃ. Thinamiddhaṃ pajahanto ālokasaññāvasena cittaṃ nijjhāpetīti – nijjhattibalaṃ…pe… sabbakilese pajahanto arahattamaggavasena cittaṃ nijjhāpetīti – nijjhattibalaṃ. Idaṃ nijjhattibalaṃ.
කතමං ඉස්‌සරියබලං? කාමච්‌ඡන්‌දං පජහන්‌තො නෙක්‌ඛම්‌මවසෙන චිත්‌තං වසං වත්‌තෙතීති – ඉස්‌සරියබලං. බ්‍යාපාදං පජහන්‌තො අබ්‍යාපාදවසෙන චිත්‌තං වසං වත්‌තෙතීති – ඉස්‌සරියබලං. ථිනමිද්‌ධං පජහන්‌තො ආලොකසඤ්‌ඤාවසෙන චිත්‌තං වසං වත්‌තෙතීති – ඉස්‌සරියබලං…පෙ.… සබ්‌බකිලෙසෙ පජහන්‌තො අරහත්‌තමග්‌ගවසෙන චිත්‌තං වසං වත්‌තෙතීති – ඉස්‌සරියබලං. ඉදං ඉස්‌සරියබලං.
Katamaṃ issariyabalaṃ? Kāmacchandaṃ pajahanto nekkhammavasena cittaṃ vasaṃ vattetīti – issariyabalaṃ. Byāpādaṃ pajahanto abyāpādavasena cittaṃ vasaṃ vattetīti – issariyabalaṃ. Thinamiddhaṃ pajahanto ālokasaññāvasena cittaṃ vasaṃ vattetīti – issariyabalaṃ…pe… sabbakilese pajahanto arahattamaggavasena cittaṃ vasaṃ vattetīti – issariyabalaṃ. Idaṃ issariyabalaṃ.
කතමං අධිට්‌ඨානබලං? කාමච්‌ඡන්‌දං පජහන්‌තො නෙක්‌ඛම්‌මවසෙන චිත්‌තං අධිට්‌ඨාතීති – අධිට්‌ඨානබලං. බ්‍යාපාදං පජහන්‌තො අබ්‍යාපාදවසෙන චිත්‌තං අධිට්‌ඨාතීති – අධිට්‌ඨානබලං. ථිනමිද්‌ධං පජහන්‌තො ආලොකසඤ්‌ඤාවසෙන චිත්‌තං අධිට්‌ඨාතීති – අධිට්‌ඨානබලං…පෙ.… සබ්‌බකිලෙසෙ පජහන්‌තො අරහත්‌තමග්‌ගවසෙන චිත්‌තං අධිට්‌ඨාතීති – අධිට්‌ඨානබලං. ඉදං අධිට්‌ඨානබලං.
Katamaṃ adhiṭṭhānabalaṃ? Kāmacchandaṃ pajahanto nekkhammavasena cittaṃ adhiṭṭhātīti – adhiṭṭhānabalaṃ. Byāpādaṃ pajahanto abyāpādavasena cittaṃ adhiṭṭhātīti – adhiṭṭhānabalaṃ. Thinamiddhaṃ pajahanto ālokasaññāvasena cittaṃ adhiṭṭhātīti – adhiṭṭhānabalaṃ…pe… sabbakilese pajahanto arahattamaggavasena cittaṃ adhiṭṭhātīti – adhiṭṭhānabalaṃ. Idaṃ adhiṭṭhānabalaṃ.
කතමං සමථබලං? නෙක්‌ඛම්‌මවසෙන චිත්‌තස්‌ස එකග්‌ගතා අවික්‌ඛෙපො සමථබලං, අබ්‍යාපාදවසෙන චිත්‌තස්‌ස එකග්‌ගතා අවික්‌ඛෙපො සමථබලං, ආලොකසඤ්‌ඤාවසෙන චිත්‌තස්‌ස එකග්‌ගතා අවික්‌ඛෙපො සමථබලං…පෙ.… පටිනිස්‌සග්‌ගානුපස්‌සී අස්‌සාසවසෙන චිත්‌තස්‌ස එකග්‌ගතා අවික්‌ඛෙපො සමථබලං, පටිනිස්‌සග්‌ගානුපස්‌සී පස්‌සාසවසෙන චිත්‌තස්‌ස එකග්‌ගතා අවික්‌ඛෙපො සමථබලං.
Katamaṃ samathabalaṃ? Nekkhammavasena cittassa ekaggatā avikkhepo samathabalaṃ, abyāpādavasena cittassa ekaggatā avikkhepo samathabalaṃ, ālokasaññāvasena cittassa ekaggatā avikkhepo samathabalaṃ…pe… paṭinissaggānupassī assāsavasena cittassa ekaggatā avikkhepo samathabalaṃ, paṭinissaggānupassī passāsavasena cittassa ekaggatā avikkhepo samathabalaṃ.
සමථබලන්‌ති කෙනට්‌ඨෙන සමථබලං? පඨමෙන ඣානෙන නීවරණෙ න කම්‌පතීති – සමථබලං. දුතියෙන ඣානෙන විතක්‌කවිචාරෙ න කම්‌පතීති – සමථබලං. තතියෙන ඣානෙන පීතියා න කම්‌පතීති – සමථබලං. චතුත්‌ථෙන ඣානෙන සුඛදුක්‌ඛෙ න කම්‌පතීති – සමථබලං. ආකාසානඤ්‌චායතනසමාපත්‌තියා රූපසඤ්‌ඤාය පටිඝසඤ්‌ඤාය නානත්‌තසඤ්‌ඤාය න කම්‌පතීති – සමථබලං . විඤ්‌ඤාණඤ්‌චායතනසමාපත්‌තියා ආකාසානඤ්‌චායතනසඤ්‌ඤාය න කම්‌පතීති – සමථබලං. ආකිඤ්‌චඤ්‌ඤායතනසමාපත්‌තියා විඤ්‌ඤාණඤ්‌චායතනසඤ්‌ඤාය න කම්‌පතීති – සමථබලං. නෙවසඤ්‌ඤානාසඤ්‌ඤායතනසමාපත්‌තියා ආකිඤ්‌චඤ්‌ඤායතනසඤ්‌ඤාය න කම්‌පතීති – සමථබලං. උද්‌ධච්‌චෙ ච උද්‌ධච්‌චසහගතකිලෙසෙ ච ඛන්‌ධෙ ච න කම්‌පතී න චලති න වෙධතීති – සමථබලං. ඉදං සමථබලං.
Samathabalanti kenaṭṭhena samathabalaṃ? Paṭhamena jhānena nīvaraṇe na kampatīti – samathabalaṃ. Dutiyena jhānena vitakkavicāre na kampatīti – samathabalaṃ. Tatiyena jhānena pītiyā na kampatīti – samathabalaṃ. Catutthena jhānena sukhadukkhe na kampatīti – samathabalaṃ. Ākāsānañcāyatanasamāpattiyā rūpasaññāya paṭighasaññāya nānattasaññāya na kampatīti – samathabalaṃ . Viññāṇañcāyatanasamāpattiyā ākāsānañcāyatanasaññāya na kampatīti – samathabalaṃ. Ākiñcaññāyatanasamāpattiyā viññāṇañcāyatanasaññāya na kampatīti – samathabalaṃ. Nevasaññānāsaññāyatanasamāpattiyā ākiñcaññāyatanasaññāya na kampatīti – samathabalaṃ. Uddhacce ca uddhaccasahagatakilese ca khandhe ca na kampatī na calati na vedhatīti – samathabalaṃ. Idaṃ samathabalaṃ.
කතමං විපස්‌සනාබලං? අනිච්‌චානුපස්‌සනා විපස්‌සනාබලං, දුක්‌ඛානුපස්‌සනා විපස්‌සනාබලං…පෙ.… පටිනිස්‌සග්‌ගානුපස්‌සනා විපස්‌සනාබලං, රූපෙ අනිච්‌චානුපස්‌සනා විපස්‌සනාබලං, රූපෙ දුක්‌ඛානුපස්‌සනා විපස්‌සනාබලං…පෙ.… රූපෙ පටිනස්‌සග්‌ගානුපස්‌සනා විපස්‌සනාබලං, වෙදනාය…පෙ.… සඤ්‌ඤාය… සඞ්‌ඛාරෙසු… විඤ්‌ඤාණෙ… චක්‌ඛුස්‌මිං…පෙ.… ජරාමරණෙ අනිච්‌චානුපස්‌සනා විපස්‌සනාබලං, ජරාමරණෙ දුක්‌ඛානුපස්‌සනා විපස්‌සනාබලං…පෙ.… ජරාමරණෙ පටිනිස්‌සග්‌ගානුපස්‌සනා විපස්‌සනාබලං. විපස්‌සනාබලන්‌ති කෙනට්‌ඨෙන විපස්‌සනාබලං? අනිච්‌චානුපස්‌සනාය නිච්‌චසඤ්‌ඤාය න කම්‌පතීති – විපස්‌සනාබලං. දුක්‌ඛානුපස්‌සනාය සුඛසඤ්‌ඤාය න කම්‌පතීති – විපස්‌සනාබලං. අනත්‌තානුපස්‌සනාය අත්‌තසඤ්‌ඤාය කම්‌පතීති – විපස්‌සනාබලං. නිබ්‌බිදානුපස්‌සනාය නන්‌දියා න කම්‌පතීති – විපස්‌සනාබලං. විරාගානුපස්‌සනාය රාගෙ න කම්‌පතීති – විපස්‌සනාබලං. නිරොධානුපස්‌සනා සමුදයෙ න කම්‌පතීති – විපස්‌සනාබලං . පටිනිස්‌සග්‌ගානුපස්‌සනාය ආදානෙ න කම්‌පතීති – විපස්‌සනාබලං. අවිජ්‌ජාය අවිජ්‌ජාසහගතකිලෙසෙ ච ඛන්‌ධෙ ච න කම්‌පති න චලති න වෙධතීති – විපස්‌සනාබලං. ඉදං විපස්‌සනාබලං.
Katamaṃ vipassanābalaṃ? Aniccānupassanā vipassanābalaṃ, dukkhānupassanā vipassanābalaṃ…pe… paṭinissaggānupassanā vipassanābalaṃ, rūpe aniccānupassanā vipassanābalaṃ, rūpe dukkhānupassanā vipassanābalaṃ…pe… rūpe paṭinassaggānupassanā vipassanābalaṃ, vedanāya…pe… saññāya… saṅkhāresu… viññāṇe… cakkhusmiṃ…pe… jarāmaraṇe aniccānupassanā vipassanābalaṃ, jarāmaraṇe dukkhānupassanā vipassanābalaṃ…pe… jarāmaraṇe paṭinissaggānupassanā vipassanābalaṃ. Vipassanābalanti kenaṭṭhena vipassanābalaṃ? Aniccānupassanāya niccasaññāya na kampatīti – vipassanābalaṃ. Dukkhānupassanāya sukhasaññāya na kampatīti – vipassanābalaṃ. Anattānupassanāya attasaññāya kampatīti – vipassanābalaṃ. Nibbidānupassanāya nandiyā na kampatīti – vipassanābalaṃ. Virāgānupassanāya rāge na kampatīti – vipassanābalaṃ. Nirodhānupassanā samudaye na kampatīti – vipassanābalaṃ . Paṭinissaggānupassanāya ādāne na kampatīti – vipassanābalaṃ. Avijjāya avijjāsahagatakilese ca khandhe ca na kampati na calati na vedhatīti – vipassanābalaṃ. Idaṃ vipassanābalaṃ.
කතමානි දස සෙඛබලානි, දස අසෙඛබලානි? සම්‌මාදිට්‌ඨිං 5 සික්‌ඛතීති – සෙඛබලං. තත්‌ථ සික්‌ඛිතත්‌තා අසෙඛබලං. සම්‌මාසඞ්‌කප්‌පං සික්‌ඛතීති – සෙඛබලං. තත්‌ථ සික්‌ඛිතත්‌තා – අසෙඛබලං . සම්‌මාවාචං…පෙ.… සම්‌මාකම්‌මන්‌තං… සම්‌මාආජීවං… සම්‌මාවායාමං… සම්‌මාසතිං… සම්‌මාසමාධිං… සම්‌මාඤාණං…පෙ.… සම්‌මාවිමුත්‌තිං සික්‌ඛතීති – සෙඛබලං. තත්‌ථ සික්‌ඛිතත්‌තා – අසෙඛබලං. ඉමානි දස සෙඛබලානි, දස අසෙඛබලානි.
Katamāni dasa sekhabalāni, dasa asekhabalāni? Sammādiṭṭhiṃ 6 sikkhatīti – sekhabalaṃ. Tattha sikkhitattā asekhabalaṃ. Sammāsaṅkappaṃ sikkhatīti – sekhabalaṃ. Tattha sikkhitattā – asekhabalaṃ . Sammāvācaṃ…pe… sammākammantaṃ… sammāājīvaṃ… sammāvāyāmaṃ… sammāsatiṃ… sammāsamādhiṃ… sammāñāṇaṃ…pe… sammāvimuttiṃ sikkhatīti – sekhabalaṃ. Tattha sikkhitattā – asekhabalaṃ. Imāni dasa sekhabalāni, dasa asekhabalāni.
කතමානි දස ඛීණාසවබලානි? 7 ඉධ ඛීණාසවස්‌ස භික්‌ඛුනො අනිච්‌චතො සබ්‌බෙ සඞ්‌ඛාරා යථාභූතං සම්‌මප්‌පඤ්‌ඤාය සුදිට්‌ඨා හොන්‌ති. යම්‌පි ඛීණාසවස්‌ස භික්‌ඛුනො අනිච්‌චතො සබ්‌බෙ සඞ්‌ඛාරා යථාභූතං සම්‌මප්‌පඤ්‌ඤාය සුදිට්‌ඨා හොන්‌ති, ඉදම්‌පි ඛීණාසවස්‌ස භික්‌ඛුනො බලං හොති, යං බලං ආගම්‌ම ඛීණාසවො භික්‌ඛු ආසවානං ඛයං පටිජානාති – ‘‘ඛීණා මෙ ආසවා’’ති.
Katamāni dasa khīṇāsavabalāni?8 Idha khīṇāsavassa bhikkhuno aniccato sabbe saṅkhārā yathābhūtaṃ sammappaññāya sudiṭṭhā honti. Yampi khīṇāsavassa bhikkhuno aniccato sabbe saṅkhārā yathābhūtaṃ sammappaññāya sudiṭṭhā honti, idampi khīṇāsavassa bhikkhuno balaṃ hoti, yaṃ balaṃ āgamma khīṇāsavo bhikkhu āsavānaṃ khayaṃ paṭijānāti – ‘‘khīṇā me āsavā’’ti.
පුන චපරං ඛීණාසවස්‌ස භික්‌ඛුනො අඞ්‌ගාරකාසූපමා කාමා යථාභූතං සම්‌මප්‌පඤ්‌ඤාය සුදිට්‌ඨා හොන්‌ති. යම්‌පි ඛීණාසවස්‌ස භික්‌ඛුනො අඞ්‌ගාරකාසූපමා කාමා යථාභූතං සම්‌මප්‌පඤ්‌ඤාය සුදිට්‌ඨා හොන්‌ති, ඉදම්‌පි ඛීණාසවස්‌ස භික්‌ඛුනො බලං හොති, යං බලං ආගම්‌ම ඛීණාසවො භික්‌ඛු ආසවානං ඛයං පටිජානාති – ‘‘ඛීණා මෙ ආසවා’’ති.
Puna caparaṃ khīṇāsavassa bhikkhuno aṅgārakāsūpamā kāmā yathābhūtaṃ sammappaññāya sudiṭṭhā honti. Yampi khīṇāsavassa bhikkhuno aṅgārakāsūpamā kāmā yathābhūtaṃ sammappaññāya sudiṭṭhā honti, idampi khīṇāsavassa bhikkhuno balaṃ hoti, yaṃ balaṃ āgamma khīṇāsavo bhikkhu āsavānaṃ khayaṃ paṭijānāti – ‘‘khīṇā me āsavā’’ti.
පුන චපරං ඛීණාසවස්‌ස භික්‌ඛුනො විවෙකනින්‌නං චිත්‌තං හොති විවෙකපොණං විවෙකපබ්‌භාරං විවෙකට්‌ඨං නෙක්‌ඛම්‌මාභිරතං බ්‍යන්‌තීභූතං 9 සබ්‌බසො ආසවට්‌ඨානියෙහි ධම්‌මෙහි. යම්‌පි ඛීණාසවස්‌ස භික්‌ඛුනො විවෙකනින්‌නං චිත්‌තං හොති විවෙකපොණං විවෙකපබ්‌භාරං විවෙකට්‌ඨං නෙක්‌ඛම්‌මාභිරතං බ්‍යන්‌තිභූතං සබ්‌බසො ආසවට්‌ඨානියෙහි ධම්‌මෙහි, ඉදම්‌පි ඛීණාසවස්‌ස භික්‌ඛුනො බලං හොති, යං බලං ආගම්‌ම ඛීණාසවො භික්‌ඛු ආසවානං ඛයං පටිජානාති – ‘‘ඛීණා මෙ ආසවා’’ති.
Puna caparaṃ khīṇāsavassa bhikkhuno vivekaninnaṃ cittaṃ hoti vivekapoṇaṃ vivekapabbhāraṃ vivekaṭṭhaṃ nekkhammābhirataṃ byantībhūtaṃ 10 sabbaso āsavaṭṭhāniyehi dhammehi. Yampi khīṇāsavassa bhikkhuno vivekaninnaṃ cittaṃ hoti vivekapoṇaṃ vivekapabbhāraṃ vivekaṭṭhaṃ nekkhammābhirataṃ byantibhūtaṃ sabbaso āsavaṭṭhāniyehi dhammehi, idampi khīṇāsavassa bhikkhuno balaṃ hoti, yaṃ balaṃ āgamma khīṇāsavo bhikkhu āsavānaṃ khayaṃ paṭijānāti – ‘‘khīṇā me āsavā’’ti.
පුන චපරං ඛීණාසවස්‌ස භික්‌ඛුනො චත්‌තාරො සතිපට්‌ඨානා භාවිතා හොන්‌ති සුභාවිතා. යම්‌පි ඛීණාසවස්‌ස භික්‌ඛුනො චත්‌තාරො සතිපට්‌ඨානා භාවිතා හොන්‌ති සුභාවිතා, ඉදම්‌පි ඛීණාසවස්‌ස භික්‌ඛුනො බලං හොති, යං බලං ආගම්‌ම ඛීණාසවො භික්‌ඛු ආසවානං ඛයං පටිජානාති – ‘‘ඛීණා මෙ ආසවා’’ති.
Puna caparaṃ khīṇāsavassa bhikkhuno cattāro satipaṭṭhānā bhāvitā honti subhāvitā. Yampi khīṇāsavassa bhikkhuno cattāro satipaṭṭhānā bhāvitā honti subhāvitā, idampi khīṇāsavassa bhikkhuno balaṃ hoti, yaṃ balaṃ āgamma khīṇāsavo bhikkhu āsavānaṃ khayaṃ paṭijānāti – ‘‘khīṇā me āsavā’’ti.
පුන චපරං ඛීණාසවස්‌ස භික්‌ඛුනො චත්‌තාරො සම්‌මප්‌පධානා භාවිතා හොන්‌ති සුභාවිතා…පෙ.… චත්‌තාරො ඉද්‌ධිපාදා භාවිතා හොන්‌ති සුභාවිතා… පඤ්‌චින්‌ද්‍රියානි භාවිතානි හොන්‌ති සුභාවිතානි… පඤ්‌ච බලානි භාවිතානි හොන්‌ති සුභාවිතානි… සත්‌ත බොජ්‌ඣඞ්‌ගා භාවිතා හොන්‌ති සුභාවිතා…පෙ.… අරියො අට්‌ඨඞ්‌ගිකො මග්‌ගො භාවිතො හොති සුභාවිතො. යම්‌පි ඛීණාසවස්‌ස භික්‌ඛුනො අට්‌ඨඞ්‌ගිකො මග්‌ගො භාවිතො හොති සුභාවිතො, ඉදම්‌පි ඛීණාසවස්‌ස භික්‌ඛුනො බලං හොති, යං බලං ආගම්‌ම ඛීණාසවො භික්‌ඛු ආසවානං ඛයං පටිජානාති – ‘‘ඛීණා මෙ ආසවා’’ති. ඉමානි දස ඛීණාසවබලානි.
Puna caparaṃ khīṇāsavassa bhikkhuno cattāro sammappadhānā bhāvitā honti subhāvitā…pe… cattāro iddhipādā bhāvitā honti subhāvitā… pañcindriyāni bhāvitāni honti subhāvitāni… pañca balāni bhāvitāni honti subhāvitāni… satta bojjhaṅgā bhāvitā honti subhāvitā…pe… ariyo aṭṭhaṅgiko maggo bhāvito hoti subhāvito. Yampi khīṇāsavassa bhikkhuno aṭṭhaṅgiko maggo bhāvito hoti subhāvito, idampi khīṇāsavassa bhikkhuno balaṃ hoti, yaṃ balaṃ āgamma khīṇāsavo bhikkhu āsavānaṃ khayaṃ paṭijānāti – ‘‘khīṇā me āsavā’’ti. Imāni dasa khīṇāsavabalāni.
කතමානි දස ඉද්‌ධිබලානි? අධිට්‌ඨානා ඉද්‌ධි, විකුබ්‌බනා ඉද්‌ධි, මනොමයා ඉද්‌ධි, ඤාණවිප්‌ඵාරා ඉද්‌ධි, සමාධිවිප්‌ඵාරා ඉද්‌ධි, අරියා ඉද්‌ධි, කම්‌මවිපාකජා ඉද්‌ධි, පුඤ්‌ඤවතො ඉද්‌ධි, විජ්‌ජාමයා ඉද්‌ධි, තත්‌ථ තත්‌ථ සම්‌මා පයොගප්‌පච්‌චයා ඉජ්‌ඣනට්‌ඨෙන ඉද්‌ධි – ඉමානි දස ඉද්‌ධිබලානි.
Katamāni dasa iddhibalāni? Adhiṭṭhānā iddhi, vikubbanā iddhi, manomayā iddhi, ñāṇavipphārā iddhi, samādhivipphārā iddhi, ariyā iddhi, kammavipākajā iddhi, puññavato iddhi, vijjāmayā iddhi, tattha tattha sammā payogappaccayā ijjhanaṭṭhena iddhi – imāni dasa iddhibalāni.
කතමානි දස තථාගතබලානි? ඉධ තථාගතො ඨානඤ්‌ච ඨානතො අට්‌ඨානඤ්‌ච අට්‌ඨානතො යථාභූතං පජානාති. යම්‌පි තථාගතො ඨානඤ්‌ච ඨානතො අට්‌ඨානඤ්‌ච අට්‌ඨානතො යථාභූතං පජානාති, ඉදම්‌පි තථාගතස්‌ස තථාගතබලං හොති, යං බලං ආගම්‌ම තථාගතො ආසභං ඨානං පටිජානාති පරිසාසු සීහනාදං නදති, බ්‍රහ්‌මචක්‌කං පවත්‌තෙති.
Katamāni dasa tathāgatabalāni? Idha tathāgato ṭhānañca ṭhānato aṭṭhānañca aṭṭhānato yathābhūtaṃ pajānāti. Yampi tathāgato ṭhānañca ṭhānato aṭṭhānañca aṭṭhānato yathābhūtaṃ pajānāti, idampi tathāgatassa tathāgatabalaṃ hoti, yaṃ balaṃ āgamma tathāgato āsabhaṃ ṭhānaṃ paṭijānāti parisāsu sīhanādaṃ nadati, brahmacakkaṃ pavatteti.
පුන චපරං තථාගතො අතීතානාගතපච්‌චුප්‌පන්‌නානං කම්‌මසමාදානානං ඨානසො හෙතුසො විපාකං යථාභූතං පජානාති. යම්‌පි තථාගතො අතීතානාගතපච්‌චුප්‌පන්‌නානං කම්‌මසමාදානානං ඨානසො හෙතුසො විපාකං යථාභූතං පජානාති, ඉදම්‌පි තථාගතස්‌ස තථාගතබලං හොති, යං බලං ආගම්‌ම තථාගතො ආසභං ඨානං පටිජානාති, පරිසාසු සීහනාදං, නදති, බ්‍රහ්‌මචක්‌කං පවත්‌තෙති.
Puna caparaṃ tathāgato atītānāgatapaccuppannānaṃ kammasamādānānaṃ ṭhānaso hetuso vipākaṃ yathābhūtaṃ pajānāti. Yampi tathāgato atītānāgatapaccuppannānaṃ kammasamādānānaṃ ṭhānaso hetuso vipākaṃ yathābhūtaṃ pajānāti, idampi tathāgatassa tathāgatabalaṃ hoti, yaṃ balaṃ āgamma tathāgato āsabhaṃ ṭhānaṃ paṭijānāti, parisāsu sīhanādaṃ, nadati, brahmacakkaṃ pavatteti.
පුන චපරං තථාගතො සබ්‌බත්‌ථගාමිනිං පටිපදං 11 යථාභූතං පජානාති. යම්‌පි තථාගතො සබ්‌බත්‌ථගාමිනිං පටිපදං යථාභූතං පජානාති, ඉදම්‌පි තථාගතස්‌ස තථාගතබලං හොති, යං බලං ආගම්‌ම තථාගතො ආසභං ඨානං පටිජානාති, පරිසාසු සීහනාදං නදති, බ්‍රහ්‌මචක්‌කං පවත්‌තෙති.
Puna caparaṃ tathāgato sabbatthagāminiṃ paṭipadaṃ 12 yathābhūtaṃ pajānāti. Yampi tathāgato sabbatthagāminiṃ paṭipadaṃ yathābhūtaṃ pajānāti, idampi tathāgatassa tathāgatabalaṃ hoti, yaṃ balaṃ āgamma tathāgato āsabhaṃ ṭhānaṃ paṭijānāti, parisāsu sīhanādaṃ nadati, brahmacakkaṃ pavatteti.
පුන චපරං තථාගතො අනෙකධාතුනානාධාතුලොකං යථාභූතං පජානාති. යම්‌පි තථාගතො අනෙකධාතුනානාධාතුලොකං යථාභූතං පජානාති, ඉදම්‌පි තථාගතස්‌ස…පෙ.….
Puna caparaṃ tathāgato anekadhātunānādhātulokaṃ yathābhūtaṃ pajānāti. Yampi tathāgato anekadhātunānādhātulokaṃ yathābhūtaṃ pajānāti, idampi tathāgatassa…pe….
පුන චපරං තථාගතො සත්‌තානං නානාධිමුත්‌තිකතං යථාභූතං පජානාති. යම්‌පි තථාගතො සත්‌තානං නානාධිමුත්‌තිකතං යථාභූතං පජානාති, ඉදම්‌පි තථාගතස්‌ස…පෙ.….
Puna caparaṃ tathāgato sattānaṃ nānādhimuttikataṃ yathābhūtaṃ pajānāti. Yampi tathāgato sattānaṃ nānādhimuttikataṃ yathābhūtaṃ pajānāti, idampi tathāgatassa…pe….
පුන චපරං තථාගතො පරසත්‌තානං පරපුග්‌ගලානං ඉන්‌ද්‍රියපරොපරියත්‌තං යථාභූතං පජානාති. යම්‌පි තථාගතො පරසත්‌තානං පරපුග්‌ගලානං ඉන්‌ද්‍රියපරොපරියත්‌තං යථාභූතං පජානාති, ඉදම්‌පි තථාගතස්‌ස…පෙ.….
Puna caparaṃ tathāgato parasattānaṃ parapuggalānaṃ indriyaparopariyattaṃ yathābhūtaṃ pajānāti. Yampi tathāgato parasattānaṃ parapuggalānaṃ indriyaparopariyattaṃ yathābhūtaṃ pajānāti, idampi tathāgatassa…pe….
පුන චපරං තථාගතො ඣානවිමොක්‌ඛසමාධිසමාපත්‌තීනං සංකිලෙසං වොදානං වුට්‌ඨානං යථාභූතං පජානාති. යම්‌පි තථාගතො ඣානවිමොක්‌ඛසමාධිසමාපත්‌තීනං සංකිලෙසං වොදානං වුට්‌ඨානං යථාභූතං පජානාති, ඉදම්‌පි තථාගතස්‌ස…පෙ.….
Puna caparaṃ tathāgato jhānavimokkhasamādhisamāpattīnaṃ saṃkilesaṃ vodānaṃ vuṭṭhānaṃ yathābhūtaṃ pajānāti. Yampi tathāgato jhānavimokkhasamādhisamāpattīnaṃ saṃkilesaṃ vodānaṃ vuṭṭhānaṃ yathābhūtaṃ pajānāti, idampi tathāgatassa…pe….
පුන චපරං තථාගතො අනෙකවිහිතං පුබ්‌බෙනිවාසං අනුස්‌සරති, සෙය්‍යථිදං – එකම්‌පි ජාතිං ද්‌වෙපි ජාතියො…පෙ.… ඉති සාකාරං සඋද්‌දෙසං අනෙකවිහිතං පුබ්‌බෙනිවාසං අනුස්‌සරති. යම්‌පි තථාගතො අනෙකවිහිතං පුබ්‌බෙනිවාසං අනුස්‌සරති. සෙය්‍යථිදං – එකම්‌පි ජාතිං ද්‌වෙපි ජාතියො…පෙ.… ඉදම්‌පි තථාගතස්‌ස…පෙ.….
Puna caparaṃ tathāgato anekavihitaṃ pubbenivāsaṃ anussarati, seyyathidaṃ – ekampi jātiṃ dvepi jātiyo…pe… iti sākāraṃ sauddesaṃ anekavihitaṃ pubbenivāsaṃ anussarati. Yampi tathāgato anekavihitaṃ pubbenivāsaṃ anussarati. Seyyathidaṃ – ekampi jātiṃ dvepi jātiyo…pe… idampi tathāgatassa…pe….
පුන චපරං තථාගතො දිබ්‌බෙන චක්‌ඛුනා විසුද්‌ධෙන අතික්‌කන්‌තමානුසකෙන සත්‌තෙ පස්‌සති චවමානෙ උපපජ්‌ජමානෙ…පෙ.… යම්‌පි තථාගතො දිබ්‌බෙන චක්‌ඛුනා විසුද්‌ධෙන අතික්‌කන්‌තමානුසකෙන සත්‌තෙ පස්‌සති චවමානෙ උපපජ්‌ජමානෙ…පෙ.… ඉදම්‌පි තථාගතස්‌ස…පෙ.….
Puna caparaṃ tathāgato dibbena cakkhunā visuddhena atikkantamānusakena satte passati cavamāne upapajjamāne…pe… yampi tathāgato dibbena cakkhunā visuddhena atikkantamānusakena satte passati cavamāne upapajjamāne…pe… idampi tathāgatassa…pe….
පුන චපරං තථාගතො ආසවානං ඛයා අනාසවං චෙතොවිමුත්‌තිං පඤ්‌ඤාවිමුත්‌තිං දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරති. යම්‌පි තථාගතො ආසවානං ඛයා අනාසවං චෙතොවිමුත්‌තිං පඤ්‌ඤාවිමුත්‌තිං දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරති, ඉදම්‌පි තථාගතස්‌ස තථාගතබලං හොති, යං බලං ආගම්‌ම තථාගතො ආසභං ඨානං පටිජානාති, පරිසාසු සීහනාදං නදති, බ්‍රහ්‌මචක්‌කං පවත්‌තෙති. ඉමානි දස තථාගතබලානි.
Puna caparaṃ tathāgato āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Yampi tathāgato āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati, idampi tathāgatassa tathāgatabalaṃ hoti, yaṃ balaṃ āgamma tathāgato āsabhaṃ ṭhānaṃ paṭijānāti, parisāsu sīhanādaṃ nadati, brahmacakkaṃ pavatteti. Imāni dasa tathāgatabalāni.
45. කෙනට්‌ඨෙන සද්‌ධාබලං? කෙනට්‌ඨෙන වීරියබලං? කෙනට්‌ඨෙන සතිබලං? කෙනට්‌ඨෙන සමාධිබලං? කෙනට්‌ඨෙන පඤ්‌ඤාබලං? කෙනට්‌ඨෙන හිරිබලං? කෙනට්‌ඨෙන ඔත්‌තප්‌පබලං? කෙනට්‌ඨෙන පටිසඞ්‌ඛානබලං…පෙ.… කෙනට්‌ඨෙන තථාගතබලං?
45. Kenaṭṭhena saddhābalaṃ? Kenaṭṭhena vīriyabalaṃ? Kenaṭṭhena satibalaṃ? Kenaṭṭhena samādhibalaṃ? Kenaṭṭhena paññābalaṃ? Kenaṭṭhena hiribalaṃ? Kenaṭṭhena ottappabalaṃ? Kenaṭṭhena paṭisaṅkhānabalaṃ…pe… kenaṭṭhena tathāgatabalaṃ?
අස්‌සද්‌ධියෙ අකම්‌පියට්‌ඨෙන සද්‌ධාබලං. කොසජ්‌ජෙ අකම්‌පියට්‌ඨෙන වීරියබලං. පමාදෙ අකම්‌පියට්‌ඨෙන සතිබලං. උද්‌ධච්‌චෙ අකම්‌පියට්‌ඨෙන සමාධිබලං. අවිජ්‌ජාය අකම්‌පියට්‌ඨෙන පඤ්‌ඤාබලං . හිරීයති පාපකෙ අකුසලෙ ධම්‌මෙති – හිරිබලං. ඔත්‌තප්‌පති පාපකෙ අකුසලෙ ධම්‌මෙති – ඔත්‌තප්‌පබලං. ඤාණෙන කිලෙසෙ පටිසඞ්‌ඛාතීති – පටිසඞ්‌ඛානබලං. තත්‌ථ ජාතා ධම්‌මා එකරසා හොන්‌තීති – භාවනාබලං. තත්‌ථ නත්‌ථි කිඤ්‌චි වජ්‌ජන්‌ති – අනවජ්‌ජබලං. තෙන චිත්‌තං සඞ්‌ගණ්‌හාතීති – සඞ්‌ගහබලං. තං තස්‌ස ඛමතීති – 13 ඛන්‌තිබලං. තෙන චිත්‌තං පඤ්‌ඤපෙතීති – පඤ්‌ඤත්‌තිබලං. තෙන චිත්‌තං නිජ්‌ඣාපෙතීති – නිජ්‌ඣත්‌තිබලං. තෙන චිත්‌තං වසං වත්‌තෙතීති – ඉස්‌සරියබලං. තෙන චිත්‌තං අධිට්‌ඨාතීති – අධිට්‌ඨානබලං. තෙන චිත්‌තං එකග්‌ගන්‌ති – සමථබලං. තත්‌ථ ජාතෙ ධම්‌මෙ අනුපස්‌සතීති – විපස්‌සනාබලං. තත්‌ථ සික්‌ඛතීති – සෙඛබලං. තත්‌ථ සික්‌ඛිතත්‌තා – අසෙඛබලං. තෙන ආසවා ඛීණාති – ඛීණාසවබලං. තස්‌ස ඉජ්‌ඣතීති – ඉද්‌ධිබලං. අප්‌පමෙය්‍යට්‌ඨෙන තථාගතබලන්‌ති.
Assaddhiye akampiyaṭṭhena saddhābalaṃ. Kosajje akampiyaṭṭhena vīriyabalaṃ. Pamāde akampiyaṭṭhena satibalaṃ. Uddhacce akampiyaṭṭhena samādhibalaṃ. Avijjāya akampiyaṭṭhena paññābalaṃ . Hirīyati pāpake akusale dhammeti – hiribalaṃ. Ottappati pāpake akusale dhammeti – ottappabalaṃ. Ñāṇena kilese paṭisaṅkhātīti – paṭisaṅkhānabalaṃ. Tattha jātā dhammā ekarasā hontīti – bhāvanābalaṃ. Tattha natthi kiñci vajjanti – anavajjabalaṃ. Tena cittaṃ saṅgaṇhātīti – saṅgahabalaṃ. Taṃ tassa khamatīti – 14 khantibalaṃ. Tena cittaṃ paññapetīti – paññattibalaṃ. Tena cittaṃ nijjhāpetīti – nijjhattibalaṃ. Tena cittaṃ vasaṃ vattetīti – issariyabalaṃ. Tena cittaṃ adhiṭṭhātīti – adhiṭṭhānabalaṃ. Tena cittaṃ ekagganti – samathabalaṃ. Tattha jāte dhamme anupassatīti – vipassanābalaṃ. Tattha sikkhatīti – sekhabalaṃ. Tattha sikkhitattā – asekhabalaṃ. Tena āsavā khīṇāti – khīṇāsavabalaṃ. Tassa ijjhatīti – iddhibalaṃ. Appameyyaṭṭhena tathāgatabalanti.
බලකථා නිට්‌ඨිතා.
Balakathā niṭṭhitā.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / පටිසම්‌භිදාමග්‌ග-අට්‌ඨකථා • Paṭisambhidāmagga-aṭṭhakathā / බලකථාවණ්‌ණනා • Balakathāvaṇṇanā
