| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༩. བལཀཐཱ
9. Balakathā
༤༤. སཱཝཏྠིནིདཱནཾ 1། ‘‘པཉྩིམཱནི , བྷིཀྑཝེ, བལཱནི། ཀཏམཱནི པཉྩ? སདྡྷཱབལཾ, ཝཱིརིཡབལཾ, སཏིབལཾ, སམཱདྷིབལཾ, པཉྙཱབལཾ – ཨིམཱནི ཁོ, བྷིཀྑཝེ, པཉྩ བལཱནི།
44. Sāvatthinidānaṃ 2. ‘‘Pañcimāni , bhikkhave, balāni. Katamāni pañca? Saddhābalaṃ, vīriyabalaṃ, satibalaṃ, samādhibalaṃ, paññābalaṃ – imāni kho, bhikkhave, pañca balāni.
‘‘ཨཔི ཙ, ཨཊྛསཊྛི བལཱནི – སདྡྷཱབལཾ, ཝཱིརིཡབལཾ, སཏིབལཾ, སམཱདྷིབལཾ, པཉྙཱབལཾ, ཧིརིབལཾ, ཨོཏྟཔྤབལཾ, པཊིསངྑཱནབལཾ, བྷཱཝནཱབལཾ, ཨནཝཛྫབལཾ, སངྒཧབལཾ, ཁནྟིབལཾ, པཉྙཏྟིབལཾ, ནིཛ྄ཛྷཏྟིབལཾ, ཨིསྶརིཡབལཾ , ཨདྷིཊྛཱནབལཾ, སམཐབལཾ, ཝིཔསྶནཱབལཾ, དས སེཁབལཱནི, དས ཨསེཁབལཱནི, དས ཁཱིཎཱསཝབལཱནི, དས ཨིདྡྷིབལཱནི, དས ཏཐཱགཏབལཱནི’’།
‘‘Api ca, aṭṭhasaṭṭhi balāni – saddhābalaṃ, vīriyabalaṃ, satibalaṃ, samādhibalaṃ, paññābalaṃ, hiribalaṃ, ottappabalaṃ, paṭisaṅkhānabalaṃ, bhāvanābalaṃ, anavajjabalaṃ, saṅgahabalaṃ, khantibalaṃ, paññattibalaṃ, nijjhattibalaṃ, issariyabalaṃ , adhiṭṭhānabalaṃ, samathabalaṃ, vipassanābalaṃ, dasa sekhabalāni, dasa asekhabalāni, dasa khīṇāsavabalāni, dasa iddhibalāni, dasa tathāgatabalāni’’.
ཀཏམཾ སདྡྷཱབལཾ? ཨསྶདྡྷིཡེ ན ཀམྤཏཱིཏི – སདྡྷཱབལཾ། སཧཛཱཏཱནཾ དྷམྨཱནཾ ཨུཔཏྠམྦྷནཊྛེན སདྡྷཱབལཾ, ཀིལེསཱནཾ པརིཡཱདཱནཊྛེན སདྡྷཱབལཾ, པཊིཝེདྷཱདིཝིསོདྷནཊྛེན སདྡྷཱབལཾ, ཙིཏྟསྶ ཨདྷིཊྛཱནཊྛེན སདྡྷཱབལཾ, ཙིཏྟསྶ ཝོདཱནཊྛེན སདྡྷཱབལཾ, ཝིསེསཱདྷིགམཊྛེན སདྡྷཱབལཾ, ཨུཏྟརི པཊིཝེདྷཊྛེན སདྡྷཱབལཾ, སཙྩཱབྷིསམཡཊྛེན སདྡྷཱབལཾ, ནིརོདྷེ པཏིཊྛཱཔཀཊྛེན སདྡྷཱབལཾ། ཨིདཾ སདྡྷཱབལཾ།
Katamaṃ saddhābalaṃ? Assaddhiye na kampatīti – saddhābalaṃ. Sahajātānaṃ dhammānaṃ upatthambhanaṭṭhena saddhābalaṃ, kilesānaṃ pariyādānaṭṭhena saddhābalaṃ, paṭivedhādivisodhanaṭṭhena saddhābalaṃ, cittassa adhiṭṭhānaṭṭhena saddhābalaṃ, cittassa vodānaṭṭhena saddhābalaṃ, visesādhigamaṭṭhena saddhābalaṃ, uttari paṭivedhaṭṭhena saddhābalaṃ, saccābhisamayaṭṭhena saddhābalaṃ, nirodhe patiṭṭhāpakaṭṭhena saddhābalaṃ. Idaṃ saddhābalaṃ.
ཀཏམཾ ཝཱིརིཡབལཾ? ཀོསཛྫེ ན ཀམྤཏཱིཏི – ཝཱིརིཡབལཾ། སཧཛཱཏཱནཾ དྷམྨཱནཾ ཨུཔཏྠམྦྷནཊྛེན ཝཱིརིཡབལཾ, ཀིལེསཱནཾ པརིཡཱདཱནཊྛེན ཝཱིརིཡབལཾ, པཊིཝེདྷཱདིཝིསོདྷནཊྛེན ཝཱིརིཡབལཾ, ཙིཏྟསྶ ཨདྷིཊྛཱནཊྛེན ཝཱིརིཡབལཾ, ཙིཏྟསྶ ཝོདཱནཊྛེན ཝཱིརིཡབལཾ, ཝིསེསཱདྷིགམཊྛེན ཝཱིརིཡབལཾ, ཨུཏྟརི པཊིཝེདྷཊྛེན ཝཱིརིཡབལཾ, སཙྩཱབྷིསམཡཊྛེན ཝཱིརིཡབལཾ, ནིརོདྷེ པཏིཊྛཱཔཀཊྛེན ཝཱིརིཡབལཾ། ཨིདཾ ཝཱིརིཡབལཾ།
Katamaṃ vīriyabalaṃ? Kosajje na kampatīti – vīriyabalaṃ. Sahajātānaṃ dhammānaṃ upatthambhanaṭṭhena vīriyabalaṃ, kilesānaṃ pariyādānaṭṭhena vīriyabalaṃ, paṭivedhādivisodhanaṭṭhena vīriyabalaṃ, cittassa adhiṭṭhānaṭṭhena vīriyabalaṃ, cittassa vodānaṭṭhena vīriyabalaṃ, visesādhigamaṭṭhena vīriyabalaṃ, uttari paṭivedhaṭṭhena vīriyabalaṃ, saccābhisamayaṭṭhena vīriyabalaṃ, nirodhe patiṭṭhāpakaṭṭhena vīriyabalaṃ. Idaṃ vīriyabalaṃ.
ཀཏམཾ སཏིབལཾ? པམཱདེ ན ཀམྤཏཱིཏི – སཏིབལཾ། སཧཛཱཏཱནཾ དྷམྨཱནཾ ཨུཔཏྠམྦྷནཊྛེན སཏིབལཾ…པེ॰… ནིརོདྷེ པཏིཊྛཱཔཀཊྛེན སཏིབལཾ། ཨིདཾ སཏིབལཾ།
Katamaṃ satibalaṃ? Pamāde na kampatīti – satibalaṃ. Sahajātānaṃ dhammānaṃ upatthambhanaṭṭhena satibalaṃ…pe… nirodhe patiṭṭhāpakaṭṭhena satibalaṃ. Idaṃ satibalaṃ.
ཀཏམཾ སམཱདྷིབལཾ? ཨུདྡྷཙྩེ ན ཀམྤཏཱིཏི – སམཱདྷིབལཾ། སཧཛཱཏཱནཾ དྷམྨཱནཾ ཨུཔཏྠམྦྷནཊྛེན སམཱདྷིབལཾ…པེ॰… ནིརོདྷེ པཏིཊྛཱཔཀཊྛེན སམཱདྷིབལཾ། ཨིདཾ སམཱདྷིབལཾ།
Katamaṃ samādhibalaṃ? Uddhacce na kampatīti – samādhibalaṃ. Sahajātānaṃ dhammānaṃ upatthambhanaṭṭhena samādhibalaṃ…pe… nirodhe patiṭṭhāpakaṭṭhena samādhibalaṃ. Idaṃ samādhibalaṃ.
ཀཏམཾ པཉྙཱབལཾ? ཨཝིཛྫཱཡ ན ཀམྤཏཱིཏི – པཉྙཱབལཾ། སཧཛཱཏཱནཾ དྷམྨཱནཾ ཨུཔཏྠམྦྷནཊྛེན པཉྙཱབལཾ…པེ॰… ནིརོདྷེ པཏིཊྛཱཔཀཊྛེན པཉྙཱབལཾ། ཨིདཾ པཉྙཱབལཾ།
Katamaṃ paññābalaṃ? Avijjāya na kampatīti – paññābalaṃ. Sahajātānaṃ dhammānaṃ upatthambhanaṭṭhena paññābalaṃ…pe… nirodhe patiṭṭhāpakaṭṭhena paññābalaṃ. Idaṃ paññābalaṃ.
ཀཏམཾ ཧིརིབལཾ? ནེཀྑམྨེན ཀཱམཙྪནྡཾ ཧིརཱིཡཏཱིཏི 3 – ཧིརིབལཾ། ཨབྱཱཔཱདེན བྱཱཔཱདཾ ཧིརཱིཡཏཱིཏི – ཧིརིབལཾ། ཨཱལོཀསཉྙཱཡ ཐིནམིདྡྷཾ ཧིརཱིཡཏཱིཏི – ཧིརིབལཾ། ཨཝིཀྑེཔེན ཨུདྡྷཙྩཾ ཧིརཱིཡཏཱིཏི – ཧིརིབལཾ། དྷམྨཝཝཏྠཱནེན ཝིཙིཀིཙྪཾ ཧིརཱིཡཏཱིཏི – ཧིརིབལཾ། ཉཱཎེན ཨཝིཛྫཾ ཧིརཱིཡཏཱིཏི – ཧིརིབལཾ། པཱམོཛྫེན ཨརཏིཾ ཧིརཱིཡཏཱིཏི – ཧིརིབལཾ། པཋམེན ཛྷཱནེན ནཱིཝརཎེ ཧིརཱིཡཏཱིཏི – ཧིརིབལཾ…པེ॰… ཨརཧཏྟམགྒེན སབྦཀིལེསེ ཧིརཱིཡཏཱིཏི – ཧིརིབལཾ། ཨིདཾ ཧིརིབལཾ།
Katamaṃ hiribalaṃ? Nekkhammena kāmacchandaṃ hirīyatīti 4 – hiribalaṃ. Abyāpādena byāpādaṃ hirīyatīti – hiribalaṃ. Ālokasaññāya thinamiddhaṃ hirīyatīti – hiribalaṃ. Avikkhepena uddhaccaṃ hirīyatīti – hiribalaṃ. Dhammavavatthānena vicikicchaṃ hirīyatīti – hiribalaṃ. Ñāṇena avijjaṃ hirīyatīti – hiribalaṃ. Pāmojjena aratiṃ hirīyatīti – hiribalaṃ. Paṭhamena jhānena nīvaraṇe hirīyatīti – hiribalaṃ…pe… arahattamaggena sabbakilese hirīyatīti – hiribalaṃ. Idaṃ hiribalaṃ.
ཀཏམཾ ཨོཏྟཔྤབལཾ? ནེཀྑམྨེན ཀཱམཙྪནྡཾ ཨོཏྟཔྤཏཱིཏི – ཨོཏྟཔྤབལཾ། ཨབྱཱཔཱདེན བྱཱཔཱདཾ ཨོཏྟཔྤཏཱིཏི – ཨོཏྟཔྤབལཾ། ཨཱལོཀསཉྙཱཡ ཐིནམིདྡྷཾ ཨོཏྟཔྤཏཱིཏི – ཨོཏྟཔྤབལཾ། ཨཝིཀྑེཔེན ཨུདྡྷཙྩཾ ཨོཏྟཔྤཏཱིཏི – ཨོཏྟཔྤབལཾ། དྷམྨཝཝཏྠཱནེན ཝིཙིཀིཙྪཾ ཨོཏྟཔྤཏཱིཏི – ཨོཏྟཔྤབལཾ། ཉཱཎེན ཨཝིཛྫཾ ཨོཏྟཔྤཏཱིཏི – ཨོཏྟཔྤབལཾ ། པཱམོཛྫེན ཨརཏིཾ ཨོཏྟཔྤཏཱིཏི – ཨོཏྟཔྤབལཾ། པཋམེན ཛྷཱནེན ནཱིཝརཎེ ཨོཏྟཔྤཏཱིཏི – ཨོཏྟཔྤབལཾ…པེ॰… ཨརཧཏྟམགྒེན སབྦཀིལེསེ ཨོཏྟཔྤཏཱིཏི – ཨོཏྟཔྤབལཾ། ཨིདཾ ཨོཏྟཔྤབལཾ།
Katamaṃ ottappabalaṃ? Nekkhammena kāmacchandaṃ ottappatīti – ottappabalaṃ. Abyāpādena byāpādaṃ ottappatīti – ottappabalaṃ. Ālokasaññāya thinamiddhaṃ ottappatīti – ottappabalaṃ. Avikkhepena uddhaccaṃ ottappatīti – ottappabalaṃ. Dhammavavatthānena vicikicchaṃ ottappatīti – ottappabalaṃ. Ñāṇena avijjaṃ ottappatīti – ottappabalaṃ . Pāmojjena aratiṃ ottappatīti – ottappabalaṃ. Paṭhamena jhānena nīvaraṇe ottappatīti – ottappabalaṃ…pe… arahattamaggena sabbakilese ottappatīti – ottappabalaṃ. Idaṃ ottappabalaṃ.
ཀཏམཾ པཊིསངྑཱནབལཾ? ནེཀྑམྨེན ཀཱམཙྪནྡཾ པཊིསངྑཱཏཱིཏི – པཊིསངྑཱནབལཾ། ཨབྱཱཔཱདེན བྱཱཔཱདཾ པཊིསངྑཱཏཱིཏི – པཊིསངྑཱནབལཾ། ཨཱལོཀསཉྙཱཡ ཐིནམིདྡྷཾ པཊིསངྑཱཏཱིཏི – པཊིསངྑཱནབལཾ། ཨཝིཀྑེཔེན ཨུདྡྷཙྩཾ པཊིསངྑཱཏཱིཏི – པཊིསངྑཱནབལཾ། དྷམྨཝཝཏྠཱནེན ཝིཙིཀིཙྪཾ པཊིསངྑཱཏཱིཏི – པཊིསངྑཱནབལཾ། ཉཱཎེན ཨཝིཛྫཾ པཊིསངྑཱཏཱིཏི – པཊིསངྑཱནབལཾ ། པཱམོཛྫེན ཨརཏིཾ པཊིསངྑཱཏཱིཏི – པཊིསངྑཱནབལཾ། པཋམེན ཛྷཱནེན ནཱིཝརཎེ པཊིསངྑཱཏཱིཏི – པཊིསངྑཱནབལཾ…པེ॰… ཨརཧཏྟམགྒེན སབྦཀིལེསེ པཊིསངྑཱཏཱིཏི – པཊིསངྑཱནབལཾ། ཨིདཾ པཊིསངྑཱནབལཾ།
Katamaṃ paṭisaṅkhānabalaṃ? Nekkhammena kāmacchandaṃ paṭisaṅkhātīti – paṭisaṅkhānabalaṃ. Abyāpādena byāpādaṃ paṭisaṅkhātīti – paṭisaṅkhānabalaṃ. Ālokasaññāya thinamiddhaṃ paṭisaṅkhātīti – paṭisaṅkhānabalaṃ. Avikkhepena uddhaccaṃ paṭisaṅkhātīti – paṭisaṅkhānabalaṃ. Dhammavavatthānena vicikicchaṃ paṭisaṅkhātīti – paṭisaṅkhānabalaṃ. Ñāṇena avijjaṃ paṭisaṅkhātīti – paṭisaṅkhānabalaṃ . Pāmojjena aratiṃ paṭisaṅkhātīti – paṭisaṅkhānabalaṃ. Paṭhamena jhānena nīvaraṇe paṭisaṅkhātīti – paṭisaṅkhānabalaṃ…pe… arahattamaggena sabbakilese paṭisaṅkhātīti – paṭisaṅkhānabalaṃ. Idaṃ paṭisaṅkhānabalaṃ.
ཀཏམཾ བྷཱཝནཱབལཾ? ཀཱམཙྪནྡཾ པཛཧནྟོ ནེཀྑམྨཾ བྷཱཝེཏཱིཏི – བྷཱཝནཱབལཾ། བྱཱཔཱདཾ པཛཧནྟོ ཨབྱཱཔཱདཾ བྷཱཝེཏཱིཏི – བྷཱཝནཱབལཾ། ཐིནམིདྡྷཾ པཛཧནྟོ ཨཱལོཀསཉྙཾ བྷཱཝེཏཱིཏི – བྷཱཝནཱབལཾ། ཨུདྡྷཙྩཾ པཛཧནྟོ ཨཝིཀྑེཔཾ བྷཱཝེཏཱིཏི – བྷཱཝནཱབལཾ། ཝིཙིཀིཙྪཾ པཛཧནྟོ དྷམྨཝཝཏྠཱནཾ བྷཱཝེཏཱིཏི – བྷཱཝནཱབལཾ། ཨཝིཛྫཾ པཛཧནྟོ ཉཱཎཾ བྷཱཝེཏཱིཏི – བྷཱཝནཱབལཾ། ཨརཏིཾ པཛཧནྟོ པཱམོཛྫཾ བྷཱཝེཏཱིཏི – བྷཱཝནཱབལཾ། ནཱིཝརཎེ པཛཧནྟོ པཋམཾ ཛྷཱནཾ བྷཱཝེཏཱིཏི – བྷཱཝནཱབལཾ…པེ॰… སབྦཀིལེསེ པཛཧནྟོ ཨརཧཏྟམགྒཾ བྷཱཝེཏཱིཏི – བྷཱཝནཱབལཾ། ཨིདཾ བྷཱཝནཱབལཾ།
Katamaṃ bhāvanābalaṃ? Kāmacchandaṃ pajahanto nekkhammaṃ bhāvetīti – bhāvanābalaṃ. Byāpādaṃ pajahanto abyāpādaṃ bhāvetīti – bhāvanābalaṃ. Thinamiddhaṃ pajahanto ālokasaññaṃ bhāvetīti – bhāvanābalaṃ. Uddhaccaṃ pajahanto avikkhepaṃ bhāvetīti – bhāvanābalaṃ. Vicikicchaṃ pajahanto dhammavavatthānaṃ bhāvetīti – bhāvanābalaṃ. Avijjaṃ pajahanto ñāṇaṃ bhāvetīti – bhāvanābalaṃ. Aratiṃ pajahanto pāmojjaṃ bhāvetīti – bhāvanābalaṃ. Nīvaraṇe pajahanto paṭhamaṃ jhānaṃ bhāvetīti – bhāvanābalaṃ…pe… sabbakilese pajahanto arahattamaggaṃ bhāvetīti – bhāvanābalaṃ. Idaṃ bhāvanābalaṃ.
ཀཏམཾ ཨནཝཛྫབལཾ? ཀཱམཙྪནྡསྶ པཧཱིནཏྟཱ ནེཀྑམྨེ ནཏྠི ཀིཉྩི ཝཛྫནྟི – ཨནཝཛྫབལཾ། བྱཱཔཱདསྶ པཧཱིནཏྟཱ ཨབྱཱཔཱདེ ནཏྠི ཀིཉྩི ཝཛྫནྟི – ཨནཝཛྫབལཾ། ཐིནམིདྡྷསྶ པཧཱིནཏྟཱ ཨཱལོཀསཉྙཱཡ ནཏྠི ཀིཉྩི ཝཛྫནྟི – ཨནཝཛྫབལཾ། ཨུདྡྷཙྩསྶ པཧཱིནཏྟཱ ཨཝིཀྑེཔེ ནཏྠི ཀིཉྩི ཝཛྫནྟི – ཨནཝཛྫབལཾ། ཝིཙིཀིཙྪཱཡ པཧཱིནཏྟཱ དྷམྨཝཝཏྠཱནེ ནཏྠི ཀིཉྩི ཝཛྫནྟི – ཨནཝཛྫབལཾ། ཨཝིཛྫཱཡ པཧཱིནཏྟཱ ཉཱཎེ ནཏྠི ཀིཉྩི ཝཛྫནྟི – ཨནཝཛྫབལཾ། ཨརཏིཡཱ པཧཱིནཏྟཱ པཱམོཛྫེ ནཏྠི ཀིཉྩི ཝཛྫནྟི ཨནཝཛྫབལཾ། ནཱིཝརཎཱནཾ པཧཱིནཏྟཱ པཋམཛ྄ཛྷཱནེ ནཏྠི ཀིཉྩི ཝཛྫནྟི – ཨནཝཛྫབལཾ…པེ॰… སབྦཀིལེསཱནཾ པཧཱིནཏྟཱ ཨརཧཏྟམགྒེ ནཏྠི ཀིཉྩི ཝཛྫནྟི – ཨནཝཛྫབལཾ། ཨིདཾ ཨནཝཛྫབལཾ།
Katamaṃ anavajjabalaṃ? Kāmacchandassa pahīnattā nekkhamme natthi kiñci vajjanti – anavajjabalaṃ. Byāpādassa pahīnattā abyāpāde natthi kiñci vajjanti – anavajjabalaṃ. Thinamiddhassa pahīnattā ālokasaññāya natthi kiñci vajjanti – anavajjabalaṃ. Uddhaccassa pahīnattā avikkhepe natthi kiñci vajjanti – anavajjabalaṃ. Vicikicchāya pahīnattā dhammavavatthāne natthi kiñci vajjanti – anavajjabalaṃ. Avijjāya pahīnattā ñāṇe natthi kiñci vajjanti – anavajjabalaṃ. Aratiyā pahīnattā pāmojje natthi kiñci vajjanti anavajjabalaṃ. Nīvaraṇānaṃ pahīnattā paṭhamajjhāne natthi kiñci vajjanti – anavajjabalaṃ…pe… sabbakilesānaṃ pahīnattā arahattamagge natthi kiñci vajjanti – anavajjabalaṃ. Idaṃ anavajjabalaṃ.
ཀཏམཾ སངྒཧབལཾ? ཀཱམཙྪནྡཾ པཛཧནྟོ ནེཀྑམྨཝསེན ཙིཏྟཾ སངྒཎྷཱཏཱིཏི – སངྒཧབལཾ། བྱཱཔཱདཾ པཛཧནྟོ ཨབྱཱཔཱདཝསེན ཙིཏྟཾ སངྒཎྷཱཏཱིཏི – སངྒཧབལཾ། ཐིནམིདྡྷཾ པཛཧནྟོ ཨཱལོཀསཉྙཱཝསེན ཙིཏྟཾ སངྒཎྷཱཏཱིཏི – སངྒཧབལཾ…པེ॰… སབྦཀིལེསེ པཛཧནྟོ ཨརཧཏྟམགྒཝསེན ཙིཏྟཾ སངྒཎྷཱཏཱིཏི – སངྒཧབལཾ། ཨིདཾ སངྒཧབལཾ།
Katamaṃ saṅgahabalaṃ? Kāmacchandaṃ pajahanto nekkhammavasena cittaṃ saṅgaṇhātīti – saṅgahabalaṃ. Byāpādaṃ pajahanto abyāpādavasena cittaṃ saṅgaṇhātīti – saṅgahabalaṃ. Thinamiddhaṃ pajahanto ālokasaññāvasena cittaṃ saṅgaṇhātīti – saṅgahabalaṃ…pe… sabbakilese pajahanto arahattamaggavasena cittaṃ saṅgaṇhātīti – saṅgahabalaṃ. Idaṃ saṅgahabalaṃ.
ཀཏམཾ ཁནྟིབལཾ? ཀཱམཙྪནྡསྶ པཧཱིནཏྟཱ ནེཀྑམྨཾ ཁམཏཱིཏི – ཁནྟིབལཾ། བྱཱཔཱདསྶ པཧཱིནཏྟཱ ཨབྱཱཔཱདོ ཁམཏཱིཏི – ཁནྟིབལཾ། ཐིནམིདྡྷསྶ པཧཱིནཏྟཱ ཨཱལོཀསཉྙཱ ཁམཏཱིཏི – ཁནྟིབལཾ། ཨུདྡྷཙྩསྶ པཧཱིནཏྟཱ ཨཝིཀྑེཔོ ཁམཏཱིཏི – ཁནྟིབལཾ། ཝིཙིཀིཙྪཱཡ པཧཱིནཏྟཱ དྷམྨཝཝཏྠཱནཾ ཁམཏཱིཏི – ཁནྟིབལཾ། ཨཝིཛྫཱཡ པཧཱིནཏྟཱ ཉཱཎཾ ཁམཏཱིཏི – ཁནྟིབལཾ། ཨརཏིཡཱ པཧཱིནཏྟཱ པཱམོཛྫཾ ཁམཏཱིཏི – ཁནྟིབལཾ། ནཱིཝརཎཱནཾ པཧཱིནཏྟཱ པཋམཾ ཛྷཱནཾ ཁམཏཱིཏི – ཁནྟིབལཾ…པེ॰… སབྦཀིལེསཱནཾ པཧཱིནཏྟཱ ཨརཧཏྟམགྒོ ཁམཏཱིཏི – ཁནྟིབལཾ། ཨིདཾ ཁནྟིབལཾ།
Katamaṃ khantibalaṃ? Kāmacchandassa pahīnattā nekkhammaṃ khamatīti – khantibalaṃ. Byāpādassa pahīnattā abyāpādo khamatīti – khantibalaṃ. Thinamiddhassa pahīnattā ālokasaññā khamatīti – khantibalaṃ. Uddhaccassa pahīnattā avikkhepo khamatīti – khantibalaṃ. Vicikicchāya pahīnattā dhammavavatthānaṃ khamatīti – khantibalaṃ. Avijjāya pahīnattā ñāṇaṃ khamatīti – khantibalaṃ. Aratiyā pahīnattā pāmojjaṃ khamatīti – khantibalaṃ. Nīvaraṇānaṃ pahīnattā paṭhamaṃ jhānaṃ khamatīti – khantibalaṃ…pe… sabbakilesānaṃ pahīnattā arahattamaggo khamatīti – khantibalaṃ. Idaṃ khantibalaṃ.
ཀཏམཾ པཉྙཏྟིབལཾ? ཀཱམཙྪནྡཾ པཛཧནྟོ ནེཀྑམྨཝསེན ཙིཏྟཾ པཉྙཔེཏཱིཏི – པཉྙཏྟིབལཾ། བྱཱཔཱདཾ པཛཧནྟོ ཨབྱཱཔཱདཝསེན ཙིཏྟཾ པཉྙཔེཏཱིཏི – པཉྙཏྟིབལཾ། ཐིནམིདྡྷཾ པཛཧནྟོ ཨཱལོཀསཉྙཱཝསེན ཙིཏྟཾ པཉྙཔེཏཱིཏི – པཉྙཏྟིབལཾ…པེ॰… སབྦཀིལེསེ པཛཧནྟོ ཨརཧཏྟམགྒཝསེན ཙིཏྟཾ པཉྙཔེཏཱིཏི – པཉྙཏྟིབལཾ། ཨིདཾ པཉྙཏྟིབལཾ།
Katamaṃ paññattibalaṃ? Kāmacchandaṃ pajahanto nekkhammavasena cittaṃ paññapetīti – paññattibalaṃ. Byāpādaṃ pajahanto abyāpādavasena cittaṃ paññapetīti – paññattibalaṃ. Thinamiddhaṃ pajahanto ālokasaññāvasena cittaṃ paññapetīti – paññattibalaṃ…pe… sabbakilese pajahanto arahattamaggavasena cittaṃ paññapetīti – paññattibalaṃ. Idaṃ paññattibalaṃ.
ཀཏམཾ ནིཛ྄ཛྷཏྟིབལཾ? ཀཱམཙྪནྡཾ པཛཧནྟོ ནེཀྑམྨཝསེན ཙིཏྟཾ ནིཛ྄ཛྷཱཔེཏཱིཏི – ནིཛ྄ཛྷཏྟིབལཾ། བྱཱཔཱདཾ པཛཧནྟོ ཨབྱཱཔཱདཝསེན ཙིཏྟཾ ནིཛ྄ཛྷཱཔེཏཱིཏི – ནིཛ྄ཛྷཏྟིབལཾ། ཐིནམིདྡྷཾ པཛཧནྟོ ཨཱལོཀསཉྙཱཝསེན ཙིཏྟཾ ནིཛ྄ཛྷཱཔེཏཱིཏི – ནིཛ྄ཛྷཏྟིབལཾ…པེ॰… སབྦཀིལེསེ པཛཧནྟོ ཨརཧཏྟམགྒཝསེན ཙིཏྟཾ ནིཛ྄ཛྷཱཔེཏཱིཏི – ནིཛ྄ཛྷཏྟིབལཾ། ཨིདཾ ནིཛ྄ཛྷཏྟིབལཾ།
Katamaṃ nijjhattibalaṃ? Kāmacchandaṃ pajahanto nekkhammavasena cittaṃ nijjhāpetīti – nijjhattibalaṃ. Byāpādaṃ pajahanto abyāpādavasena cittaṃ nijjhāpetīti – nijjhattibalaṃ. Thinamiddhaṃ pajahanto ālokasaññāvasena cittaṃ nijjhāpetīti – nijjhattibalaṃ…pe… sabbakilese pajahanto arahattamaggavasena cittaṃ nijjhāpetīti – nijjhattibalaṃ. Idaṃ nijjhattibalaṃ.
ཀཏམཾ ཨིསྶརིཡབལཾ? ཀཱམཙྪནྡཾ པཛཧནྟོ ནེཀྑམྨཝསེན ཙིཏྟཾ ཝསཾ ཝཏྟེཏཱིཏི – ཨིསྶརིཡབལཾ། བྱཱཔཱདཾ པཛཧནྟོ ཨབྱཱཔཱདཝསེན ཙིཏྟཾ ཝསཾ ཝཏྟེཏཱིཏི – ཨིསྶརིཡབལཾ། ཐིནམིདྡྷཾ པཛཧནྟོ ཨཱལོཀསཉྙཱཝསེན ཙིཏྟཾ ཝསཾ ཝཏྟེཏཱིཏི – ཨིསྶརིཡབལཾ…པེ॰… སབྦཀིལེསེ པཛཧནྟོ ཨརཧཏྟམགྒཝསེན ཙིཏྟཾ ཝསཾ ཝཏྟེཏཱིཏི – ཨིསྶརིཡབལཾ། ཨིདཾ ཨིསྶརིཡབལཾ།
Katamaṃ issariyabalaṃ? Kāmacchandaṃ pajahanto nekkhammavasena cittaṃ vasaṃ vattetīti – issariyabalaṃ. Byāpādaṃ pajahanto abyāpādavasena cittaṃ vasaṃ vattetīti – issariyabalaṃ. Thinamiddhaṃ pajahanto ālokasaññāvasena cittaṃ vasaṃ vattetīti – issariyabalaṃ…pe… sabbakilese pajahanto arahattamaggavasena cittaṃ vasaṃ vattetīti – issariyabalaṃ. Idaṃ issariyabalaṃ.
ཀཏམཾ ཨདྷིཊྛཱནབལཾ? ཀཱམཙྪནྡཾ པཛཧནྟོ ནེཀྑམྨཝསེན ཙིཏྟཾ ཨདྷིཊྛཱཏཱིཏི – ཨདྷིཊྛཱནབལཾ། བྱཱཔཱདཾ པཛཧནྟོ ཨབྱཱཔཱདཝསེན ཙིཏྟཾ ཨདྷིཊྛཱཏཱིཏི – ཨདྷིཊྛཱནབལཾ། ཐིནམིདྡྷཾ པཛཧནྟོ ཨཱལོཀསཉྙཱཝསེན ཙིཏྟཾ ཨདྷིཊྛཱཏཱིཏི – ཨདྷིཊྛཱནབལཾ…པེ॰… སབྦཀིལེསེ པཛཧནྟོ ཨརཧཏྟམགྒཝསེན ཙིཏྟཾ ཨདྷིཊྛཱཏཱིཏི – ཨདྷིཊྛཱནབལཾ། ཨིདཾ ཨདྷིཊྛཱནབལཾ།
Katamaṃ adhiṭṭhānabalaṃ? Kāmacchandaṃ pajahanto nekkhammavasena cittaṃ adhiṭṭhātīti – adhiṭṭhānabalaṃ. Byāpādaṃ pajahanto abyāpādavasena cittaṃ adhiṭṭhātīti – adhiṭṭhānabalaṃ. Thinamiddhaṃ pajahanto ālokasaññāvasena cittaṃ adhiṭṭhātīti – adhiṭṭhānabalaṃ…pe… sabbakilese pajahanto arahattamaggavasena cittaṃ adhiṭṭhātīti – adhiṭṭhānabalaṃ. Idaṃ adhiṭṭhānabalaṃ.
ཀཏམཾ སམཐབལཾ? ནེཀྑམྨཝསེན ཙིཏྟསྶ ཨེཀགྒཏཱ ཨཝིཀྑེཔོ སམཐབལཾ, ཨབྱཱཔཱདཝསེན ཙིཏྟསྶ ཨེཀགྒཏཱ ཨཝིཀྑེཔོ སམཐབལཾ, ཨཱལོཀསཉྙཱཝསེན ཙིཏྟསྶ ཨེཀགྒཏཱ ཨཝིཀྑེཔོ སམཐབལཾ…པེ॰… པཊིནིསྶགྒཱནུཔསྶཱི ཨསྶཱསཝསེན ཙིཏྟསྶ ཨེཀགྒཏཱ ཨཝིཀྑེཔོ སམཐབལཾ, པཊིནིསྶགྒཱནུཔསྶཱི པསྶཱསཝསེན ཙིཏྟསྶ ཨེཀགྒཏཱ ཨཝིཀྑེཔོ སམཐབལཾ།
Katamaṃ samathabalaṃ? Nekkhammavasena cittassa ekaggatā avikkhepo samathabalaṃ, abyāpādavasena cittassa ekaggatā avikkhepo samathabalaṃ, ālokasaññāvasena cittassa ekaggatā avikkhepo samathabalaṃ…pe… paṭinissaggānupassī assāsavasena cittassa ekaggatā avikkhepo samathabalaṃ, paṭinissaggānupassī passāsavasena cittassa ekaggatā avikkhepo samathabalaṃ.
སམཐབལནྟི ཀེནཊྛེན སམཐབལཾ? པཋམེན ཛྷཱནེན ནཱིཝརཎེ ན ཀམྤཏཱིཏི – སམཐབལཾ། དུཏིཡེན ཛྷཱནེན ཝིཏཀྐཝིཙཱརེ ན ཀམྤཏཱིཏི – སམཐབལཾ། ཏཏིཡེན ཛྷཱནེན པཱིཏིཡཱ ན ཀམྤཏཱིཏི – སམཐབལཾ། ཙཏུཏྠེན ཛྷཱནེན སུཁདུཀྑེ ན ཀམྤཏཱིཏི – སམཐབལཾ། ཨཱཀཱསཱནཉྩཱཡཏནསམཱཔཏྟིཡཱ རཱུཔསཉྙཱཡ པཊིགྷསཉྙཱཡ ནཱནཏྟསཉྙཱཡ ན ཀམྤཏཱིཏི – སམཐབལཾ ། ཝིཉྙཱཎཉྩཱཡཏནསམཱཔཏྟིཡཱ ཨཱཀཱསཱནཉྩཱཡཏནསཉྙཱཡ ན ཀམྤཏཱིཏི – སམཐབལཾ། ཨཱཀིཉྩཉྙཱཡཏནསམཱཔཏྟིཡཱ ཝིཉྙཱཎཉྩཱཡཏནསཉྙཱཡ ན ཀམྤཏཱིཏི – སམཐབལཾ། ནེཝསཉྙཱནཱསཉྙཱཡཏནསམཱཔཏྟིཡཱ ཨཱཀིཉྩཉྙཱཡཏནསཉྙཱཡ ན ཀམྤཏཱིཏི – སམཐབལཾ། ཨུདྡྷཙྩེ ཙ ཨུདྡྷཙྩསཧགཏཀིལེསེ ཙ ཁནྡྷེ ཙ ན ཀམྤཏཱི ན ཙལཏི ན ཝེདྷཏཱིཏི – སམཐབལཾ། ཨིདཾ སམཐབལཾ།
Samathabalanti kenaṭṭhena samathabalaṃ? Paṭhamena jhānena nīvaraṇe na kampatīti – samathabalaṃ. Dutiyena jhānena vitakkavicāre na kampatīti – samathabalaṃ. Tatiyena jhānena pītiyā na kampatīti – samathabalaṃ. Catutthena jhānena sukhadukkhe na kampatīti – samathabalaṃ. Ākāsānañcāyatanasamāpattiyā rūpasaññāya paṭighasaññāya nānattasaññāya na kampatīti – samathabalaṃ . Viññāṇañcāyatanasamāpattiyā ākāsānañcāyatanasaññāya na kampatīti – samathabalaṃ. Ākiñcaññāyatanasamāpattiyā viññāṇañcāyatanasaññāya na kampatīti – samathabalaṃ. Nevasaññānāsaññāyatanasamāpattiyā ākiñcaññāyatanasaññāya na kampatīti – samathabalaṃ. Uddhacce ca uddhaccasahagatakilese ca khandhe ca na kampatī na calati na vedhatīti – samathabalaṃ. Idaṃ samathabalaṃ.
ཀཏམཾ ཝིཔསྶནཱབལཾ? ཨནིཙྩཱནུཔསྶནཱ ཝིཔསྶནཱབལཾ, དུཀྑཱནུཔསྶནཱ ཝིཔསྶནཱབལཾ…པེ॰… པཊིནིསྶགྒཱནུཔསྶནཱ ཝིཔསྶནཱབལཾ, རཱུཔེ ཨནིཙྩཱནུཔསྶནཱ ཝིཔསྶནཱབལཾ, རཱུཔེ དུཀྑཱནུཔསྶནཱ ཝིཔསྶནཱབལཾ…པེ॰… རཱུཔེ པཊིནསྶགྒཱནུཔསྶནཱ ཝིཔསྶནཱབལཾ, ཝེདནཱཡ…པེ॰… སཉྙཱཡ… སངྑཱརེསུ… ཝིཉྙཱཎེ… ཙཀྑུསྨིཾ…པེ॰… ཛརཱམརཎེ ཨནིཙྩཱནུཔསྶནཱ ཝིཔསྶནཱབལཾ, ཛརཱམརཎེ དུཀྑཱནུཔསྶནཱ ཝིཔསྶནཱབལཾ…པེ॰… ཛརཱམརཎེ པཊིནིསྶགྒཱནུཔསྶནཱ ཝིཔསྶནཱབལཾ། ཝིཔསྶནཱབལནྟི ཀེནཊྛེན ཝིཔསྶནཱབལཾ? ཨནིཙྩཱནུཔསྶནཱཡ ནིཙྩསཉྙཱཡ ན ཀམྤཏཱིཏི – ཝིཔསྶནཱབལཾ། དུཀྑཱནུཔསྶནཱཡ སུཁསཉྙཱཡ ན ཀམྤཏཱིཏི – ཝིཔསྶནཱབལཾ། ཨནཏྟཱནུཔསྶནཱཡ ཨཏྟསཉྙཱཡ ཀམྤཏཱིཏི – ཝིཔསྶནཱབལཾ། ནིབྦིདཱནུཔསྶནཱཡ ནནྡིཡཱ ན ཀམྤཏཱིཏི – ཝིཔསྶནཱབལཾ། ཝིརཱགཱནུཔསྶནཱཡ རཱགེ ན ཀམྤཏཱིཏི – ཝིཔསྶནཱབལཾ། ནིརོདྷཱནུཔསྶནཱ སམུདཡེ ན ཀམྤཏཱིཏི – ཝིཔསྶནཱབལཾ ། པཊིནིསྶགྒཱནུཔསྶནཱཡ ཨཱདཱནེ ན ཀམྤཏཱིཏི – ཝིཔསྶནཱབལཾ། ཨཝིཛྫཱཡ ཨཝིཛྫཱསཧགཏཀིལེསེ ཙ ཁནྡྷེ ཙ ན ཀམྤཏི ན ཙལཏི ན ཝེདྷཏཱིཏི – ཝིཔསྶནཱབལཾ། ཨིདཾ ཝིཔསྶནཱབལཾ།
Katamaṃ vipassanābalaṃ? Aniccānupassanā vipassanābalaṃ, dukkhānupassanā vipassanābalaṃ…pe… paṭinissaggānupassanā vipassanābalaṃ, rūpe aniccānupassanā vipassanābalaṃ, rūpe dukkhānupassanā vipassanābalaṃ…pe… rūpe paṭinassaggānupassanā vipassanābalaṃ, vedanāya…pe… saññāya… saṅkhāresu… viññāṇe… cakkhusmiṃ…pe… jarāmaraṇe aniccānupassanā vipassanābalaṃ, jarāmaraṇe dukkhānupassanā vipassanābalaṃ…pe… jarāmaraṇe paṭinissaggānupassanā vipassanābalaṃ. Vipassanābalanti kenaṭṭhena vipassanābalaṃ? Aniccānupassanāya niccasaññāya na kampatīti – vipassanābalaṃ. Dukkhānupassanāya sukhasaññāya na kampatīti – vipassanābalaṃ. Anattānupassanāya attasaññāya kampatīti – vipassanābalaṃ. Nibbidānupassanāya nandiyā na kampatīti – vipassanābalaṃ. Virāgānupassanāya rāge na kampatīti – vipassanābalaṃ. Nirodhānupassanā samudaye na kampatīti – vipassanābalaṃ . Paṭinissaggānupassanāya ādāne na kampatīti – vipassanābalaṃ. Avijjāya avijjāsahagatakilese ca khandhe ca na kampati na calati na vedhatīti – vipassanābalaṃ. Idaṃ vipassanābalaṃ.
ཀཏམཱནི དས སེཁབལཱནི, དས ཨསེཁབལཱནི? སམྨཱདིཊྛིཾ 5 སིཀྑཏཱིཏི – སེཁབལཾ། ཏཏྠ སིཀྑིཏཏྟཱ ཨསེཁབལཾ། སམྨཱསངྐཔྤཾ སིཀྑཏཱིཏི – སེཁབལཾ། ཏཏྠ སིཀྑིཏཏྟཱ – ཨསེཁབལཾ ། སམྨཱཝཱཙཾ…པེ॰… སམྨཱཀམྨནྟཾ… སམྨཱཨཱཛཱིཝཾ… སམྨཱཝཱཡཱམཾ… སམྨཱསཏིཾ… སམྨཱསམཱདྷིཾ… སམྨཱཉཱཎཾ…པེ॰… སམྨཱཝིམུཏྟིཾ སིཀྑཏཱིཏི – སེཁབལཾ། ཏཏྠ སིཀྑིཏཏྟཱ – ཨསེཁབལཾ། ཨིམཱནི དས སེཁབལཱནི, དས ཨསེཁབལཱནི།
Katamāni dasa sekhabalāni, dasa asekhabalāni? Sammādiṭṭhiṃ 6 sikkhatīti – sekhabalaṃ. Tattha sikkhitattā asekhabalaṃ. Sammāsaṅkappaṃ sikkhatīti – sekhabalaṃ. Tattha sikkhitattā – asekhabalaṃ . Sammāvācaṃ…pe… sammākammantaṃ… sammāājīvaṃ… sammāvāyāmaṃ… sammāsatiṃ… sammāsamādhiṃ… sammāñāṇaṃ…pe… sammāvimuttiṃ sikkhatīti – sekhabalaṃ. Tattha sikkhitattā – asekhabalaṃ. Imāni dasa sekhabalāni, dasa asekhabalāni.
ཀཏམཱནི དས ཁཱིཎཱསཝབལཱནི? 7 ཨིདྷ ཁཱིཎཱསཝསྶ བྷིཀྑུནོ ཨནིཙྩཏོ སབྦེ སངྑཱརཱ ཡཐཱབྷཱུཏཾ སམྨཔྤཉྙཱཡ སུདིཊྛཱ ཧོནྟི། ཡམྤི ཁཱིཎཱསཝསྶ བྷིཀྑུནོ ཨནིཙྩཏོ སབྦེ སངྑཱརཱ ཡཐཱབྷཱུཏཾ སམྨཔྤཉྙཱཡ སུདིཊྛཱ ཧོནྟི, ཨིདམྤི ཁཱིཎཱསཝསྶ བྷིཀྑུནོ བལཾ ཧོཏི, ཡཾ བལཾ ཨཱགམྨ ཁཱིཎཱསཝོ བྷིཀྑུ ཨཱསཝཱནཾ ཁཡཾ པཊིཛཱནཱཏི – ‘‘ཁཱིཎཱ མེ ཨཱསཝཱ’’ཏི།
Katamāni dasa khīṇāsavabalāni?8 Idha khīṇāsavassa bhikkhuno aniccato sabbe saṅkhārā yathābhūtaṃ sammappaññāya sudiṭṭhā honti. Yampi khīṇāsavassa bhikkhuno aniccato sabbe saṅkhārā yathābhūtaṃ sammappaññāya sudiṭṭhā honti, idampi khīṇāsavassa bhikkhuno balaṃ hoti, yaṃ balaṃ āgamma khīṇāsavo bhikkhu āsavānaṃ khayaṃ paṭijānāti – ‘‘khīṇā me āsavā’’ti.
པུན ཙཔརཾ ཁཱིཎཱསཝསྶ བྷིཀྑུནོ ཨངྒཱརཀཱསཱུཔམཱ ཀཱམཱ ཡཐཱབྷཱུཏཾ སམྨཔྤཉྙཱཡ སུདིཊྛཱ ཧོནྟི། ཡམྤི ཁཱིཎཱསཝསྶ བྷིཀྑུནོ ཨངྒཱརཀཱསཱུཔམཱ ཀཱམཱ ཡཐཱབྷཱུཏཾ སམྨཔྤཉྙཱཡ སུདིཊྛཱ ཧོནྟི, ཨིདམྤི ཁཱིཎཱསཝསྶ བྷིཀྑུནོ བལཾ ཧོཏི, ཡཾ བལཾ ཨཱགམྨ ཁཱིཎཱསཝོ བྷིཀྑུ ཨཱསཝཱནཾ ཁཡཾ པཊིཛཱནཱཏི – ‘‘ཁཱིཎཱ མེ ཨཱསཝཱ’’ཏི།
Puna caparaṃ khīṇāsavassa bhikkhuno aṅgārakāsūpamā kāmā yathābhūtaṃ sammappaññāya sudiṭṭhā honti. Yampi khīṇāsavassa bhikkhuno aṅgārakāsūpamā kāmā yathābhūtaṃ sammappaññāya sudiṭṭhā honti, idampi khīṇāsavassa bhikkhuno balaṃ hoti, yaṃ balaṃ āgamma khīṇāsavo bhikkhu āsavānaṃ khayaṃ paṭijānāti – ‘‘khīṇā me āsavā’’ti.
པུན ཙཔརཾ ཁཱིཎཱསཝསྶ བྷིཀྑུནོ ཝིཝེཀནིནྣཾ ཙིཏྟཾ ཧོཏི ཝིཝེཀཔོཎཾ ཝིཝེཀཔབྦྷཱརཾ ཝིཝེཀཊྛཾ ནེཀྑམྨཱབྷིརཏཾ བྱནྟཱིབྷཱུཏཾ 9 སབྦསོ ཨཱསཝཊྛཱནིཡེཧི དྷམྨེཧི། ཡམྤི ཁཱིཎཱསཝསྶ བྷིཀྑུནོ ཝིཝེཀནིནྣཾ ཙིཏྟཾ ཧོཏི ཝིཝེཀཔོཎཾ ཝིཝེཀཔབྦྷཱརཾ ཝིཝེཀཊྛཾ ནེཀྑམྨཱབྷིརཏཾ བྱནྟིབྷཱུཏཾ སབྦསོ ཨཱསཝཊྛཱནིཡེཧི དྷམྨེཧི, ཨིདམྤི ཁཱིཎཱསཝསྶ བྷིཀྑུནོ བལཾ ཧོཏི, ཡཾ བལཾ ཨཱགམྨ ཁཱིཎཱསཝོ བྷིཀྑུ ཨཱསཝཱནཾ ཁཡཾ པཊིཛཱནཱཏི – ‘‘ཁཱིཎཱ མེ ཨཱསཝཱ’’ཏི།
Puna caparaṃ khīṇāsavassa bhikkhuno vivekaninnaṃ cittaṃ hoti vivekapoṇaṃ vivekapabbhāraṃ vivekaṭṭhaṃ nekkhammābhirataṃ byantībhūtaṃ 10 sabbaso āsavaṭṭhāniyehi dhammehi. Yampi khīṇāsavassa bhikkhuno vivekaninnaṃ cittaṃ hoti vivekapoṇaṃ vivekapabbhāraṃ vivekaṭṭhaṃ nekkhammābhirataṃ byantibhūtaṃ sabbaso āsavaṭṭhāniyehi dhammehi, idampi khīṇāsavassa bhikkhuno balaṃ hoti, yaṃ balaṃ āgamma khīṇāsavo bhikkhu āsavānaṃ khayaṃ paṭijānāti – ‘‘khīṇā me āsavā’’ti.
པུན ཙཔརཾ ཁཱིཎཱསཝསྶ བྷིཀྑུནོ ཙཏྟཱརོ སཏིཔཊྛཱནཱ བྷཱཝིཏཱ ཧོནྟི སུབྷཱཝིཏཱ། ཡམྤི ཁཱིཎཱསཝསྶ བྷིཀྑུནོ ཙཏྟཱརོ སཏིཔཊྛཱནཱ བྷཱཝིཏཱ ཧོནྟི སུབྷཱཝིཏཱ, ཨིདམྤི ཁཱིཎཱསཝསྶ བྷིཀྑུནོ བལཾ ཧོཏི, ཡཾ བལཾ ཨཱགམྨ ཁཱིཎཱསཝོ བྷིཀྑུ ཨཱསཝཱནཾ ཁཡཾ པཊིཛཱནཱཏི – ‘‘ཁཱིཎཱ མེ ཨཱསཝཱ’’ཏི།
Puna caparaṃ khīṇāsavassa bhikkhuno cattāro satipaṭṭhānā bhāvitā honti subhāvitā. Yampi khīṇāsavassa bhikkhuno cattāro satipaṭṭhānā bhāvitā honti subhāvitā, idampi khīṇāsavassa bhikkhuno balaṃ hoti, yaṃ balaṃ āgamma khīṇāsavo bhikkhu āsavānaṃ khayaṃ paṭijānāti – ‘‘khīṇā me āsavā’’ti.
པུན ཙཔརཾ ཁཱིཎཱསཝསྶ བྷིཀྑུནོ ཙཏྟཱརོ སམྨཔྤདྷཱནཱ བྷཱཝིཏཱ ཧོནྟི སུབྷཱཝིཏཱ…པེ॰… ཙཏྟཱརོ ཨིདྡྷིཔཱདཱ བྷཱཝིཏཱ ཧོནྟི སུབྷཱཝིཏཱ… པཉྩིནྡྲིཡཱནི བྷཱཝིཏཱནི ཧོནྟི སུབྷཱཝིཏཱནི… པཉྩ བལཱནི བྷཱཝིཏཱནི ཧོནྟི སུབྷཱཝིཏཱནི… སཏྟ བོཛ྄ཛྷངྒཱ བྷཱཝིཏཱ ཧོནྟི སུབྷཱཝིཏཱ…པེ॰… ཨརིཡོ ཨཊྛངྒིཀོ མགྒོ བྷཱཝིཏོ ཧོཏི སུབྷཱཝིཏོ། ཡམྤི ཁཱིཎཱསཝསྶ བྷིཀྑུནོ ཨཊྛངྒིཀོ མགྒོ བྷཱཝིཏོ ཧོཏི སུབྷཱཝིཏོ, ཨིདམྤི ཁཱིཎཱསཝསྶ བྷིཀྑུནོ བལཾ ཧོཏི, ཡཾ བལཾ ཨཱགམྨ ཁཱིཎཱསཝོ བྷིཀྑུ ཨཱསཝཱནཾ ཁཡཾ པཊིཛཱནཱཏི – ‘‘ཁཱིཎཱ མེ ཨཱསཝཱ’’ཏི། ཨིམཱནི དས ཁཱིཎཱསཝབལཱནི།
Puna caparaṃ khīṇāsavassa bhikkhuno cattāro sammappadhānā bhāvitā honti subhāvitā…pe… cattāro iddhipādā bhāvitā honti subhāvitā… pañcindriyāni bhāvitāni honti subhāvitāni… pañca balāni bhāvitāni honti subhāvitāni… satta bojjhaṅgā bhāvitā honti subhāvitā…pe… ariyo aṭṭhaṅgiko maggo bhāvito hoti subhāvito. Yampi khīṇāsavassa bhikkhuno aṭṭhaṅgiko maggo bhāvito hoti subhāvito, idampi khīṇāsavassa bhikkhuno balaṃ hoti, yaṃ balaṃ āgamma khīṇāsavo bhikkhu āsavānaṃ khayaṃ paṭijānāti – ‘‘khīṇā me āsavā’’ti. Imāni dasa khīṇāsavabalāni.
ཀཏམཱནི དས ཨིདྡྷིབལཱནི? ཨདྷིཊྛཱནཱ ཨིདྡྷི, ཝིཀུབྦནཱ ཨིདྡྷི, མནོམཡཱ ཨིདྡྷི, ཉཱཎཝིཔྥཱརཱ ཨིདྡྷི, སམཱདྷིཝིཔྥཱརཱ ཨིདྡྷི, ཨརིཡཱ ཨིདྡྷི, ཀམྨཝིཔཱཀཛཱ ཨིདྡྷི, པུཉྙཝཏོ ཨིདྡྷི, ཝིཛྫཱམཡཱ ཨིདྡྷི, ཏཏྠ ཏཏྠ སམྨཱ པཡོགཔྤཙྩཡཱ ཨིཛ྄ཛྷནཊྛེན ཨིདྡྷི – ཨིམཱནི དས ཨིདྡྷིབལཱནི།
Katamāni dasa iddhibalāni? Adhiṭṭhānā iddhi, vikubbanā iddhi, manomayā iddhi, ñāṇavipphārā iddhi, samādhivipphārā iddhi, ariyā iddhi, kammavipākajā iddhi, puññavato iddhi, vijjāmayā iddhi, tattha tattha sammā payogappaccayā ijjhanaṭṭhena iddhi – imāni dasa iddhibalāni.
ཀཏམཱནི དས ཏཐཱགཏབལཱནི? ཨིདྷ ཏཐཱགཏོ ཋཱནཉྩ ཋཱནཏོ ཨཊྛཱནཉྩ ཨཊྛཱནཏོ ཡཐཱབྷཱུཏཾ པཛཱནཱཏི། ཡམྤི ཏཐཱགཏོ ཋཱནཉྩ ཋཱནཏོ ཨཊྛཱནཉྩ ཨཊྛཱནཏོ ཡཐཱབྷཱུཏཾ པཛཱནཱཏི, ཨིདམྤི ཏཐཱགཏསྶ ཏཐཱགཏབལཾ ཧོཏི, ཡཾ བལཾ ཨཱགམྨ ཏཐཱགཏོ ཨཱསབྷཾ ཋཱནཾ པཊིཛཱནཱཏི པརིསཱསུ སཱིཧནཱདཾ ནདཏི, བྲཧྨཙཀྐཾ པཝཏྟེཏི།
Katamāni dasa tathāgatabalāni? Idha tathāgato ṭhānañca ṭhānato aṭṭhānañca aṭṭhānato yathābhūtaṃ pajānāti. Yampi tathāgato ṭhānañca ṭhānato aṭṭhānañca aṭṭhānato yathābhūtaṃ pajānāti, idampi tathāgatassa tathāgatabalaṃ hoti, yaṃ balaṃ āgamma tathāgato āsabhaṃ ṭhānaṃ paṭijānāti parisāsu sīhanādaṃ nadati, brahmacakkaṃ pavatteti.
པུན ཙཔརཾ ཏཐཱགཏོ ཨཏཱིཏཱནཱགཏཔཙྩུཔྤནྣཱནཾ ཀམྨསམཱདཱནཱནཾ ཋཱནསོ ཧེཏུསོ ཝིཔཱཀཾ ཡཐཱབྷཱུཏཾ པཛཱནཱཏི། ཡམྤི ཏཐཱགཏོ ཨཏཱིཏཱནཱགཏཔཙྩུཔྤནྣཱནཾ ཀམྨསམཱདཱནཱནཾ ཋཱནསོ ཧེཏུསོ ཝིཔཱཀཾ ཡཐཱབྷཱུཏཾ པཛཱནཱཏི, ཨིདམྤི ཏཐཱགཏསྶ ཏཐཱགཏབལཾ ཧོཏི, ཡཾ བལཾ ཨཱགམྨ ཏཐཱགཏོ ཨཱསབྷཾ ཋཱནཾ པཊིཛཱནཱཏི, པརིསཱསུ སཱིཧནཱདཾ, ནདཏི, བྲཧྨཙཀྐཾ པཝཏྟེཏི།
Puna caparaṃ tathāgato atītānāgatapaccuppannānaṃ kammasamādānānaṃ ṭhānaso hetuso vipākaṃ yathābhūtaṃ pajānāti. Yampi tathāgato atītānāgatapaccuppannānaṃ kammasamādānānaṃ ṭhānaso hetuso vipākaṃ yathābhūtaṃ pajānāti, idampi tathāgatassa tathāgatabalaṃ hoti, yaṃ balaṃ āgamma tathāgato āsabhaṃ ṭhānaṃ paṭijānāti, parisāsu sīhanādaṃ, nadati, brahmacakkaṃ pavatteti.
པུན ཙཔརཾ ཏཐཱགཏོ སབྦཏྠགཱམིནིཾ པཊིཔདཾ 11 ཡཐཱབྷཱུཏཾ པཛཱནཱཏི། ཡམྤི ཏཐཱགཏོ སབྦཏྠགཱམིནིཾ པཊིཔདཾ ཡཐཱབྷཱུཏཾ པཛཱནཱཏི, ཨིདམྤི ཏཐཱགཏསྶ ཏཐཱགཏབལཾ ཧོཏི, ཡཾ བལཾ ཨཱགམྨ ཏཐཱགཏོ ཨཱསབྷཾ ཋཱནཾ པཊིཛཱནཱཏི, པརིསཱསུ སཱིཧནཱདཾ ནདཏི, བྲཧྨཙཀྐཾ པཝཏྟེཏི།
Puna caparaṃ tathāgato sabbatthagāminiṃ paṭipadaṃ 12 yathābhūtaṃ pajānāti. Yampi tathāgato sabbatthagāminiṃ paṭipadaṃ yathābhūtaṃ pajānāti, idampi tathāgatassa tathāgatabalaṃ hoti, yaṃ balaṃ āgamma tathāgato āsabhaṃ ṭhānaṃ paṭijānāti, parisāsu sīhanādaṃ nadati, brahmacakkaṃ pavatteti.
པུན ཙཔརཾ ཏཐཱགཏོ ཨནེཀདྷཱཏུནཱནཱདྷཱཏུལོཀཾ ཡཐཱབྷཱུཏཾ པཛཱནཱཏི། ཡམྤི ཏཐཱགཏོ ཨནེཀདྷཱཏུནཱནཱདྷཱཏུལོཀཾ ཡཐཱབྷཱུཏཾ པཛཱནཱཏི, ཨིདམྤི ཏཐཱགཏསྶ…པེ॰…།
Puna caparaṃ tathāgato anekadhātunānādhātulokaṃ yathābhūtaṃ pajānāti. Yampi tathāgato anekadhātunānādhātulokaṃ yathābhūtaṃ pajānāti, idampi tathāgatassa…pe….
པུན ཙཔརཾ ཏཐཱགཏོ སཏྟཱནཾ ནཱནཱདྷིམུཏྟིཀཏཾ ཡཐཱབྷཱུཏཾ པཛཱནཱཏི། ཡམྤི ཏཐཱགཏོ སཏྟཱནཾ ནཱནཱདྷིམུཏྟིཀཏཾ ཡཐཱབྷཱུཏཾ པཛཱནཱཏི, ཨིདམྤི ཏཐཱགཏསྶ…པེ॰…།
Puna caparaṃ tathāgato sattānaṃ nānādhimuttikataṃ yathābhūtaṃ pajānāti. Yampi tathāgato sattānaṃ nānādhimuttikataṃ yathābhūtaṃ pajānāti, idampi tathāgatassa…pe….
པུན ཙཔརཾ ཏཐཱགཏོ པརསཏྟཱནཾ པརཔུགྒལཱནཾ ཨིནྡྲིཡཔརོཔརིཡཏྟཾ ཡཐཱབྷཱུཏཾ པཛཱནཱཏི། ཡམྤི ཏཐཱགཏོ པརསཏྟཱནཾ པརཔུགྒལཱནཾ ཨིནྡྲིཡཔརོཔརིཡཏྟཾ ཡཐཱབྷཱུཏཾ པཛཱནཱཏི, ཨིདམྤི ཏཐཱགཏསྶ…པེ॰…།
Puna caparaṃ tathāgato parasattānaṃ parapuggalānaṃ indriyaparopariyattaṃ yathābhūtaṃ pajānāti. Yampi tathāgato parasattānaṃ parapuggalānaṃ indriyaparopariyattaṃ yathābhūtaṃ pajānāti, idampi tathāgatassa…pe….
པུན ཙཔརཾ ཏཐཱགཏོ ཛྷཱནཝིམོཀྑསམཱདྷིསམཱཔཏྟཱིནཾ སཾཀིལེསཾ ཝོདཱནཾ ཝུཊྛཱནཾ ཡཐཱབྷཱུཏཾ པཛཱནཱཏི། ཡམྤི ཏཐཱགཏོ ཛྷཱནཝིམོཀྑསམཱདྷིསམཱཔཏྟཱིནཾ སཾཀིལེསཾ ཝོདཱནཾ ཝུཊྛཱནཾ ཡཐཱབྷཱུཏཾ པཛཱནཱཏི, ཨིདམྤི ཏཐཱགཏསྶ…པེ॰…།
Puna caparaṃ tathāgato jhānavimokkhasamādhisamāpattīnaṃ saṃkilesaṃ vodānaṃ vuṭṭhānaṃ yathābhūtaṃ pajānāti. Yampi tathāgato jhānavimokkhasamādhisamāpattīnaṃ saṃkilesaṃ vodānaṃ vuṭṭhānaṃ yathābhūtaṃ pajānāti, idampi tathāgatassa…pe….
པུན ཙཔརཾ ཏཐཱགཏོ ཨནེཀཝིཧིཏཾ པུབྦེནིཝཱསཾ ཨནུསྶརཏི, སེཡྻཐིདཾ – ཨེཀམྤི ཛཱཏིཾ དྭེཔི ཛཱཏིཡོ…པེ॰… ཨིཏི སཱཀཱརཾ སཨུདྡེསཾ ཨནེཀཝིཧིཏཾ པུབྦེནིཝཱསཾ ཨནུསྶརཏི། ཡམྤི ཏཐཱགཏོ ཨནེཀཝིཧིཏཾ པུབྦེནིཝཱསཾ ཨནུསྶརཏི། སེཡྻཐིདཾ – ཨེཀམྤི ཛཱཏིཾ དྭེཔི ཛཱཏིཡོ…པེ॰… ཨིདམྤི ཏཐཱགཏསྶ…པེ॰…།
Puna caparaṃ tathāgato anekavihitaṃ pubbenivāsaṃ anussarati, seyyathidaṃ – ekampi jātiṃ dvepi jātiyo…pe… iti sākāraṃ sauddesaṃ anekavihitaṃ pubbenivāsaṃ anussarati. Yampi tathāgato anekavihitaṃ pubbenivāsaṃ anussarati. Seyyathidaṃ – ekampi jātiṃ dvepi jātiyo…pe… idampi tathāgatassa…pe….
པུན ཙཔརཾ ཏཐཱགཏོ དིབྦེན ཙཀྑུནཱ ཝིསུདྡྷེན ཨཏིཀྐནྟམཱནུསཀེན སཏྟེ པསྶཏི ཙཝམཱནེ ཨུཔཔཛྫམཱནེ…པེ॰… ཡམྤི ཏཐཱགཏོ དིབྦེན ཙཀྑུནཱ ཝིསུདྡྷེན ཨཏིཀྐནྟམཱནུསཀེན སཏྟེ པསྶཏི ཙཝམཱནེ ཨུཔཔཛྫམཱནེ…པེ॰… ཨིདམྤི ཏཐཱགཏསྶ…པེ॰…།
Puna caparaṃ tathāgato dibbena cakkhunā visuddhena atikkantamānusakena satte passati cavamāne upapajjamāne…pe… yampi tathāgato dibbena cakkhunā visuddhena atikkantamānusakena satte passati cavamāne upapajjamāne…pe… idampi tathāgatassa…pe….
པུན ཙཔརཾ ཏཐཱགཏོ ཨཱསཝཱནཾ ཁཡཱ ཨནཱསཝཾ ཙེཏོཝིམུཏྟིཾ པཉྙཱཝིམུཏྟིཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརཏི། ཡམྤི ཏཐཱགཏོ ཨཱསཝཱནཾ ཁཡཱ ཨནཱསཝཾ ཙེཏོཝིམུཏྟིཾ པཉྙཱཝིམུཏྟིཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརཏི, ཨིདམྤི ཏཐཱགཏསྶ ཏཐཱགཏབལཾ ཧོཏི, ཡཾ བལཾ ཨཱགམྨ ཏཐཱགཏོ ཨཱསབྷཾ ཋཱནཾ པཊིཛཱནཱཏི, པརིསཱསུ སཱིཧནཱདཾ ནདཏི, བྲཧྨཙཀྐཾ པཝཏྟེཏི། ཨིམཱནི དས ཏཐཱགཏབལཱནི།
Puna caparaṃ tathāgato āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Yampi tathāgato āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati, idampi tathāgatassa tathāgatabalaṃ hoti, yaṃ balaṃ āgamma tathāgato āsabhaṃ ṭhānaṃ paṭijānāti, parisāsu sīhanādaṃ nadati, brahmacakkaṃ pavatteti. Imāni dasa tathāgatabalāni.
༤༥. ཀེནཊྛེན སདྡྷཱབལཾ? ཀེནཊྛེན ཝཱིརིཡབལཾ? ཀེནཊྛེན སཏིབལཾ? ཀེནཊྛེན སམཱདྷིབལཾ? ཀེནཊྛེན པཉྙཱབལཾ? ཀེནཊྛེན ཧིརིབལཾ? ཀེནཊྛེན ཨོཏྟཔྤབལཾ? ཀེནཊྛེན པཊིསངྑཱནབལཾ…པེ॰… ཀེནཊྛེན ཏཐཱགཏབལཾ?
45. Kenaṭṭhena saddhābalaṃ? Kenaṭṭhena vīriyabalaṃ? Kenaṭṭhena satibalaṃ? Kenaṭṭhena samādhibalaṃ? Kenaṭṭhena paññābalaṃ? Kenaṭṭhena hiribalaṃ? Kenaṭṭhena ottappabalaṃ? Kenaṭṭhena paṭisaṅkhānabalaṃ…pe… kenaṭṭhena tathāgatabalaṃ?
ཨསྶདྡྷིཡེ ཨཀམྤིཡཊྛེན སདྡྷཱབལཾ། ཀོསཛྫེ ཨཀམྤིཡཊྛེན ཝཱིརིཡབལཾ། པམཱདེ ཨཀམྤིཡཊྛེན སཏིབལཾ། ཨུདྡྷཙྩེ ཨཀམྤིཡཊྛེན སམཱདྷིབལཾ། ཨཝིཛྫཱཡ ཨཀམྤིཡཊྛེན པཉྙཱབལཾ ། ཧིརཱིཡཏི པཱཔཀེ ཨཀུསལེ དྷམྨེཏི – ཧིརིབལཾ། ཨོཏྟཔྤཏི པཱཔཀེ ཨཀུསལེ དྷམྨེཏི – ཨོཏྟཔྤབལཾ། ཉཱཎེན ཀིལེསེ པཊིསངྑཱཏཱིཏི – པཊིསངྑཱནབལཾ། ཏཏྠ ཛཱཏཱ དྷམྨཱ ཨེཀརསཱ ཧོནྟཱིཏི – བྷཱཝནཱབལཾ། ཏཏྠ ནཏྠི ཀིཉྩི ཝཛྫནྟི – ཨནཝཛྫབལཾ། ཏེན ཙིཏྟཾ སངྒཎྷཱཏཱིཏི – སངྒཧབལཾ། ཏཾ ཏསྶ ཁམཏཱིཏི – 13 ཁནྟིབལཾ། ཏེན ཙིཏྟཾ པཉྙཔེཏཱིཏི – པཉྙཏྟིབལཾ། ཏེན ཙིཏྟཾ ནིཛ྄ཛྷཱཔེཏཱིཏི – ནིཛ྄ཛྷཏྟིབལཾ། ཏེན ཙིཏྟཾ ཝསཾ ཝཏྟེཏཱིཏི – ཨིསྶརིཡབལཾ། ཏེན ཙིཏྟཾ ཨདྷིཊྛཱཏཱིཏི – ཨདྷིཊྛཱནབལཾ། ཏེན ཙིཏྟཾ ཨེཀགྒནྟི – སམཐབལཾ། ཏཏྠ ཛཱཏེ དྷམྨེ ཨནུཔསྶཏཱིཏི – ཝིཔསྶནཱབལཾ། ཏཏྠ སིཀྑཏཱིཏི – སེཁབལཾ། ཏཏྠ སིཀྑིཏཏྟཱ – ཨསེཁབལཾ། ཏེན ཨཱསཝཱ ཁཱིཎཱཏི – ཁཱིཎཱསཝབལཾ། ཏསྶ ཨིཛ྄ཛྷཏཱིཏི – ཨིདྡྷིབལཾ། ཨཔྤམེཡྻཊྛེན ཏཐཱགཏབལནྟི།
Assaddhiye akampiyaṭṭhena saddhābalaṃ. Kosajje akampiyaṭṭhena vīriyabalaṃ. Pamāde akampiyaṭṭhena satibalaṃ. Uddhacce akampiyaṭṭhena samādhibalaṃ. Avijjāya akampiyaṭṭhena paññābalaṃ . Hirīyati pāpake akusale dhammeti – hiribalaṃ. Ottappati pāpake akusale dhammeti – ottappabalaṃ. Ñāṇena kilese paṭisaṅkhātīti – paṭisaṅkhānabalaṃ. Tattha jātā dhammā ekarasā hontīti – bhāvanābalaṃ. Tattha natthi kiñci vajjanti – anavajjabalaṃ. Tena cittaṃ saṅgaṇhātīti – saṅgahabalaṃ. Taṃ tassa khamatīti – 14 khantibalaṃ. Tena cittaṃ paññapetīti – paññattibalaṃ. Tena cittaṃ nijjhāpetīti – nijjhattibalaṃ. Tena cittaṃ vasaṃ vattetīti – issariyabalaṃ. Tena cittaṃ adhiṭṭhātīti – adhiṭṭhānabalaṃ. Tena cittaṃ ekagganti – samathabalaṃ. Tattha jāte dhamme anupassatīti – vipassanābalaṃ. Tattha sikkhatīti – sekhabalaṃ. Tattha sikkhitattā – asekhabalaṃ. Tena āsavā khīṇāti – khīṇāsavabalaṃ. Tassa ijjhatīti – iddhibalaṃ. Appameyyaṭṭhena tathāgatabalanti.
བལཀཐཱ ནིཊྛིཏཱ།
Balakathā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / བལཀཐཱཝཎྞནཱ • Balakathāvaṇṇanā
