| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
3. ததியவக்³கோ³
3. Tatiyavaggo
1. ப³லகதா²வண்ணனா
1. Balakathāvaṇṇanā
354. இதா³னி ப³லகதா² நாம ஹோதி. தத்த² யேஸங் அனுருத்³த⁴ஸங்யுத்தே ‘‘இமேஸஞ்ச பனாஹங், ஆவுஸோ, சதுன்னங் ஸதிபட்டா²னானங் பா⁴விதத்தா ப³ஹுலீகதத்தா டா²னஞ்ச டா²னதோ அட்டா²னஞ்ச அட்டா²னதோ யதா²பூ⁴தங் பஜானாமீ’’திஆதீ³னி (ஸங்॰ நி॰ 5.913) த³ஸஸுத்தானி அயோனிஸோ க³ஹெத்வா ‘‘ததா²க³தப³லங் ஸாவகஸாதா⁴ரண’’ந்தி லத்³தி⁴, ஸெய்யதா²பி ஏதரஹி அந்த⁴கானங்; தே ஸந்தா⁴ய புச்சா² ஸகவாதி³ஸ்ஸ, லத்³தி⁴யங் ட²த்வா படிஞ்ஞா பரவாதி³ஸ்ஸ. ததா²க³தப³லஞ்ச நாமேதங் ஸாவகேஹி ஸாதா⁴ரணம்பி அத்தி² அஸாதா⁴ரணம்பி ஸாதா⁴ரணாஸாதா⁴ரணம்பி. தத்த² ஆஸவானங் க²யே ஞாணங் ஸாதா⁴ரணங். இந்த்³ரியபரோபரியத்திஞாணங் அஸாதா⁴ரணங். ஸேஸங் ஸாதா⁴ரணஞ்ச அஸாதா⁴ரணஞ்ச. டா²னாட்டா²னாதீ³னி ஹி ஸாவகா பதே³ஸேன ஜானந்தி, ததா²க³தா நிப்பதே³ஸேன. இதி தானி உத்³தே³ஸதோ ஸாதா⁴ரணானி, ந நித்³தே³ஸதோ. அயங் பன அவிஸேஸேன ஸப்³ப³ம்பி ஸாதா⁴ரணந்தி ஆஹ. தமேனங் ததோ விவேசேதுங் ததா²க³தப³லங் ஸாவகப³லந்தி புன அனுயோகோ³ ஆரத்³தோ⁴. தத்த² பட²மபஞ்ஹே நித்³தே³ஸதோ ஸப்³பா³காரவிஸயதங் ஸந்தா⁴ய படிக்கி²பதி. து³தியபஞ்ஹே உத்³தே³ஸதோ டா²னாட்டா²னமத்தாதி³ஜானநவஸேன படிஜானாதி. தஞ்ஞேவாதிஆதி³பஞ்ஹேஸு ஸப்³பா³காரேன நின்னானாகரணதாய அபா⁴வேன படிக்கி²பதி. புப்³ப³யோகோ³ ச புப்³ப³சரியா ச அத்த²தோ ஏகங், ததா² த⁴ம்மக்கா²னஞ்ச த⁴ம்மதே³ஸனா ச.
354. Idāni balakathā nāma hoti. Tattha yesaṃ anuruddhasaṃyutte ‘‘imesañca panāhaṃ, āvuso, catunnaṃ satipaṭṭhānānaṃ bhāvitattā bahulīkatattā ṭhānañca ṭhānato aṭṭhānañca aṭṭhānato yathābhūtaṃ pajānāmī’’tiādīni (saṃ. ni. 5.913) dasasuttāni ayoniso gahetvā ‘‘tathāgatabalaṃ sāvakasādhāraṇa’’nti laddhi, seyyathāpi etarahi andhakānaṃ; te sandhāya pucchā sakavādissa, laddhiyaṃ ṭhatvā paṭiññā paravādissa. Tathāgatabalañca nāmetaṃ sāvakehi sādhāraṇampi atthi asādhāraṇampi sādhāraṇāsādhāraṇampi. Tattha āsavānaṃ khaye ñāṇaṃ sādhāraṇaṃ. Indriyaparopariyattiñāṇaṃ asādhāraṇaṃ. Sesaṃ sādhāraṇañca asādhāraṇañca. Ṭhānāṭṭhānādīni hi sāvakā padesena jānanti, tathāgatā nippadesena. Iti tāni uddesato sādhāraṇāni, na niddesato. Ayaṃ pana avisesena sabbampi sādhāraṇanti āha. Tamenaṃ tato vivecetuṃ tathāgatabalaṃ sāvakabalanti puna anuyogo āraddho. Tattha paṭhamapañhe niddesato sabbākāravisayataṃ sandhāya paṭikkhipati. Dutiyapañhe uddesato ṭhānāṭṭhānamattādijānanavasena paṭijānāti. Taññevātiādipañhesu sabbākārena ninnānākaraṇatāya abhāvena paṭikkhipati. Pubbayogo ca pubbacariyā ca atthato ekaṃ, tathā dhammakkhānañca dhammadesanā ca.
இந்த்³ரியபரோபரியத்திபஞ்ஹே ஏகதே³ஸேன ஸாதா⁴ரணதங் ஸந்தா⁴ய ஸாவகவிஸயே படிஜானாதி.
Indriyaparopariyattipañhe ekadesena sādhāraṇataṃ sandhāya sāvakavisaye paṭijānāti.
355. இதா³னி யஸ்மா உத்³தே³ஸதோ டா²னாட்டா²னாதீ³னி ஸாவகோ ஜானாதி, தஸ்மா ஸாவகஸ்ஸ ததா² ஜானநங் பகாஸெத்வா தேன ஜானநமத்தஸாமஞ்ஞேன தேஸங் ஸாவகஸாதா⁴ரணத்தங் பதிட்டா²பேதுங் ஸாவகோ டா²னாட்டா²னங் ஜானாதீதிஆத³யோ பரவாதி³பஞ்ஹா ஹொந்தி. தத்த² இந்த்³ரியபரோபரியத்திஞாணங் ச²ன்னங் அஸாதா⁴ரணஞாணானங் அஞ்ஞதரந்தி ந க³ஹிதங். ஆஸவக்க²யேன வா ஆஸவக்க²யந்தி யங் ததா²க³தஸ்ஸ ஆஸவக்க²யேன ஸத்³தி⁴ங் ஸாவகஸ்ஸ ஆஸவக்க²யங் படிச்ச வத்தப்³ப³ங் ஸியா நானாகரணங், தங் நத்தி². விமுத்தியா வா விமுத்திந்தி பதே³பி ஏஸேவ நயோ. ஸேஸமெத்த² உத்தானத்த²மேவ.
355. Idāni yasmā uddesato ṭhānāṭṭhānādīni sāvako jānāti, tasmā sāvakassa tathā jānanaṃ pakāsetvā tena jānanamattasāmaññena tesaṃ sāvakasādhāraṇattaṃ patiṭṭhāpetuṃ sāvako ṭhānāṭṭhānaṃjānātītiādayo paravādipañhā honti. Tattha indriyaparopariyattiñāṇaṃ channaṃ asādhāraṇañāṇānaṃ aññataranti na gahitaṃ. Āsavakkhayena vā āsavakkhayanti yaṃ tathāgatassa āsavakkhayena saddhiṃ sāvakassa āsavakkhayaṃ paṭicca vattabbaṃ siyā nānākaraṇaṃ, taṃ natthi. Vimuttiyā vā vimuttinti padepi eseva nayo. Sesamettha uttānatthameva.
356. இதா³னி யங் ஸகவாதி³னா ‘‘ஆஸவானங் க²யே ஞாணங் ஸாதா⁴ரண’’ந்தி அனுஞ்ஞாதங், தேன ஸத்³தி⁴ங் ஸங்ஸந்தி³த்வா ஸேஸானம்பி ஸாதா⁴ரணபா⁴வங் புச்சி²துங் புன ஆஸவானங் க²யேதிஆத³யோ பரவாதி³பஞ்ஹாவ ஹொந்தி. தேஸங் விஸ்ஸஜ்ஜனே ஸகவாதி³னா ஆஸவக்க²யே விஸேஸாபா⁴வேன தங் ஞாணங் ஸாதா⁴ரணந்தி அனுஞ்ஞாதங். இதரேஸுபி விஸேஸாபா⁴வேன ஸாதா⁴ரணதா படிக்கி²த்தா. புன டா²னாட்டா²னாதீ³னங் ஆஸவக்க²யேனேவ ஸத்³தி⁴ங் ஸங்ஸந்தி³த்வா அஸாதா⁴ரணபுச்சா² பரவாதி³ஸ்ஸேவ. தத்த² ஆஸவக்க²யஞாணே படிக்கே²போ, ஸேஸேஸு ச படிஞ்ஞா ஸகவாதி³ஸ்ஸ. ததோ இந்த்³ரியபரோபரியத்தேன ஸத்³தி⁴ங் ஸங்ஸந்தி³த்வா அஸாதா⁴ரணபுச்சா² பரவாதி³ஸ்ஸ. ஸா ஸங்கி²பித்வா த³ஸ்ஸிதா. ததா²பி இந்த்³ரியபரோபரியத்தே படிஞ்ஞா, ஸேஸேஸு ச படிக்கே²போ ஸகவாதி³ஸ்ஸ. ததோ டா²னாட்டா²னாதீ³ஹி ஸத்³தி⁴ங் ஸங்ஸந்தி³த்வா இந்த்³ரியபரோபரியத்தஸ்ஸ ஸாதா⁴ரணபுச்சா² பரவாதி³ஸ்ஸ. ஸாபி ஸங்கி²பித்வாவ த³ஸ்ஸிதா. தத்த² இந்த்³ரியபரோபரியத்தே படிக்கே²போ. ஸேஸேஸு ச படிஞ்ஞா ஸகவாதி³ஸ்ஸாதி.
356. Idāni yaṃ sakavādinā ‘‘āsavānaṃ khaye ñāṇaṃ sādhāraṇa’’nti anuññātaṃ, tena saddhiṃ saṃsanditvā sesānampi sādhāraṇabhāvaṃ pucchituṃ puna āsavānaṃ khayetiādayo paravādipañhāva honti. Tesaṃ vissajjane sakavādinā āsavakkhaye visesābhāvena taṃ ñāṇaṃ sādhāraṇanti anuññātaṃ. Itaresupi visesābhāvena sādhāraṇatā paṭikkhittā. Puna ṭhānāṭṭhānādīnaṃ āsavakkhayeneva saddhiṃ saṃsanditvā asādhāraṇapucchā paravādisseva. Tattha āsavakkhayañāṇe paṭikkhepo, sesesu ca paṭiññā sakavādissa. Tato indriyaparopariyattena saddhiṃ saṃsanditvā asādhāraṇapucchā paravādissa. Sā saṅkhipitvā dassitā. Tathāpi indriyaparopariyatte paṭiññā, sesesu ca paṭikkhepo sakavādissa. Tato ṭhānāṭṭhānādīhi saddhiṃ saṃsanditvā indriyaparopariyattassa sādhāraṇapucchā paravādissa. Sāpi saṅkhipitvāva dassitā. Tattha indriyaparopariyatte paṭikkhepo. Sesesu ca paṭiññā sakavādissāti.
ப³லகதா²வண்ணனா.
Balakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (21) 1. ப³லகதா² • (21) 1. Balakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 1. ப³லகதா²வண்ணனா • 1. Balakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 1. ப³லகதா²வண்ணனா • 1. Balakathāvaṇṇanā
