| Library / Tipiṭaka / திபிடக • Tipiṭaka / பஞ்சபகரண-மூலடீகா • Pañcapakaraṇa-mūlaṭīkā |
3. ததியவக்³கோ³
3. Tatiyavaggo
1. ப³லகதா²வண்ணனா
1. Balakathāvaṇṇanā
354. இந்த்³ரியபரோபரியத்தங் அஸாதா⁴ரணந்தி யதா² நித்³தே³ஸதோ வித்தா²ரதோ ஸப்³ப³ங் ஸப்³பா³காரங் டா²னாட்டா²னாதி³ங் அஜானந்தாபி ‘‘அட்டா²னமேதங் அனவகாஸோ, யங் தி³ட்டி²ஸம்பன்னோ புக்³க³லோ கஞ்சி ஸங்கா²ரங் நிச்சதோ உபக³ச்செ²ய்யா’’திஆதி³னா (அ॰ நி॰ 1.268) டா²னாட்டா²னானி உத்³தே³ஸதோ ஸங்கே²பதோ ஸாவகா ஜானந்தி, ந ஏவங் ‘‘ஆஸயங் ஜானாதி அனுஸயங் ஜானாதீ’’திஆதி³னா (படி॰ ம॰ 1.113) உத்³தே³ஸமத்தேனபி இந்த்³ரியபரோபரியத்தங் ஜானந்தீதி ‘‘அஸாதா⁴ரண’’ந்தி ஆஹ. தே²ரேன பன ஸத்³தா⁴தீ³னங் இந்த்³ரியானங் திக்க²முது³பா⁴வஜானநமத்தங் ஸந்தா⁴ய ‘‘ஸத்தானங் இந்த்³ரியபரோபரியத்தங் யதா²பூ⁴தங் பஜானாமீ’’தி (படி॰ ம॰ 2.44) வுத்தங், ந யதா²வுத்தங் இந்த்³ரியபரோபரியத்தஞாணங் ததா²க³தப³லந்தி அயமெத்த² அதி⁴ப்பாயோ த³ட்ட²ப்³போ³. ‘‘உத்³தே³ஸதோ டா²னாட்டா²னாதி³மத்தஜானநவஸேன படிஜானாதீ’’தி வுத்தங், ஏவங் பன படிஜானந்தேன ‘‘ததா²க³தப³லங் ஸாவகஸாதா⁴ரண’’ந்தி இத³ம்பி ஏவமேவ படிஞ்ஞாதங் ஸியாதி கத²மயங் சோதே³தப்³போ³ ஸியா.
354. Indriyaparopariyattaṃasādhāraṇanti yathā niddesato vitthārato sabbaṃ sabbākāraṃ ṭhānāṭṭhānādiṃ ajānantāpi ‘‘aṭṭhānametaṃ anavakāso, yaṃ diṭṭhisampanno puggalo kañci saṅkhāraṃ niccato upagaccheyyā’’tiādinā (a. ni. 1.268) ṭhānāṭṭhānāni uddesato saṅkhepato sāvakā jānanti, na evaṃ ‘‘āsayaṃ jānāti anusayaṃ jānātī’’tiādinā (paṭi. ma. 1.113) uddesamattenapi indriyaparopariyattaṃ jānantīti ‘‘asādhāraṇa’’nti āha. Therena pana saddhādīnaṃ indriyānaṃ tikkhamudubhāvajānanamattaṃ sandhāya ‘‘sattānaṃ indriyaparopariyattaṃ yathābhūtaṃ pajānāmī’’ti (paṭi. ma. 2.44) vuttaṃ, na yathāvuttaṃ indriyaparopariyattañāṇaṃ tathāgatabalanti ayamettha adhippāyo daṭṭhabbo. ‘‘Uddesato ṭhānāṭṭhānādimattajānanavasena paṭijānātī’’ti vuttaṃ, evaṃ pana paṭijānantena ‘‘tathāgatabalaṃ sāvakasādhāraṇa’’nti idampi evameva paṭiññātaṃ siyāti kathamayaṃ codetabbo siyā.
356. ஸேஸேஸு படிக்கே²போ ஸகவாதி³ஸ்ஸ டா²னாட்டா²னஞாணாதீ³னங் ஸாதா⁴ரணாஸாதா⁴ரணத்தா தத்த² ஸாதா⁴ரணபக்க²ங் ஸந்தா⁴யாதி அதி⁴ப்பாயோ.
356. Sesesu paṭikkhepo sakavādissa ṭhānāṭṭhānañāṇādīnaṃ sādhāraṇāsādhāraṇattā tattha sādhāraṇapakkhaṃ sandhāyāti adhippāyo.
ப³லகதா²வண்ணனா நிட்டி²தா.
Balakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (21) 1. ப³லகதா² • (21) 1. Balakathā
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 1. ப³லகதா²வண்ணனா • 1. Balakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 1. ப³லகதா²வண்ணனா • 1. Balakathāvaṇṇanā
