| Library / Tipiṭaka / তিপিটক • Tipiṭaka / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā |
৯. বলকথা
9. Balakathā
বলকথাৰণ্ণনা
Balakathāvaṇṇanā
৪৪. ইদানি লোকুত্তরকথায অনন্তরং কথিতায লোকুত্তরকথাৰতিযা সুত্তন্তপুব্বঙ্গমায বলকথায অপুব্বত্থানুৰণ্ণনা। তত্থ আদিতো সুত্তন্তৰসেন পঞ্চ বলানি দস্সেত্ৰা তদঞ্ঞানিপি বলানি দস্সেতুকামো অপিচ অট্ঠসট্ঠি বলানীতিআদিমাহ। সব্বানিপি তংতংপটিপক্খেহি অকম্পিযট্ঠেন বলানি নাম হোন্তি। হিরিবলন্তিআদীসু পাপতো হিরীযন্তি এতাযাতি হিরী, লজ্জাযেতং নামং। পাপতো ওত্তপ্পন্তি এতেনাতি ওত্তপ্পং, পাপতো উব্বেগস্সেতং নামং। অজ্ঝত্তসমুট্ঠানা হিরী, বহিদ্ধাসমুট্ঠানং ওত্তপ্পং। অত্তাধিপতি হিরী, লোকাধিপতি ওত্তপ্পং । লজ্জাসভাৰসণ্ঠিতা হিরী, ভযসভাৰসণ্ঠিতং ওত্তপ্পং। সপ্পতিস্সৰলক্খণা হিরী, ৰজ্জভীরুকভযদস্সাৰিলক্খণং ওত্তপ্পং। সা এৰ হিরী অহিরিকেন ন কম্পতীতি হিরিবলং। তদেৰ ওত্তপ্পং অনোত্তপ্পেন ন কম্পতীতি ওত্তপ্পবলং। অপ্পটিসঙ্খানেন ন কম্পতীতি পটিসঙ্খানবলং। উপপরিক্খণপঞ্ঞাযেতং নামং। ৰীরিযসীসেন সত্ত বোজ্ঝঙ্গে ভাৰেন্তস্স উপ্পন্নবলং ভাৰনাবলং। তথাপৰত্তানং চতুন্নং খন্ধানমেতং নামং। পরিসুদ্ধানি সীলাদীনি অনৰজ্জবলং। চত্তারি সঙ্গহৰত্থূনি সঙ্গহবলং। সঙ্গহে বলন্তিপি পাঠো। দুক্খমানং অধিৰাসনং খন্তিবলং। ধম্মকথায পরেসং তোসনং পঞ্ঞত্তিবলং। অধিতস্স অত্থস্স অধিগমাপনং নিজ্ঝত্তিবলং। কুসলেসু বহুভাৰো ইস্সরিযবলং। কুসলেসু যথারুচি পতিট্ঠানং অধিট্ঠানবলং। হিরিবলাদীনং অত্থো মাতিকাপদেসু ব্যঞ্জনৰসেন ৰিসেসতো যুজ্জমানং গহেত্ৰা ৰুত্তো। সমথবলং ৰিপস্সনাবলন্তি বলপ্পত্তা সমথৰিপস্সনা এৰ।
44. Idāni lokuttarakathāya anantaraṃ kathitāya lokuttarakathāvatiyā suttantapubbaṅgamāya balakathāya apubbatthānuvaṇṇanā. Tattha ādito suttantavasena pañca balāni dassetvā tadaññānipi balāni dassetukāmo apica aṭṭhasaṭṭhi balānītiādimāha. Sabbānipi taṃtaṃpaṭipakkhehi akampiyaṭṭhena balāni nāma honti. Hiribalantiādīsu pāpato hirīyanti etāyāti hirī, lajjāyetaṃ nāmaṃ. Pāpato ottappanti etenāti ottappaṃ, pāpato ubbegassetaṃ nāmaṃ. Ajjhattasamuṭṭhānā hirī, bahiddhāsamuṭṭhānaṃ ottappaṃ. Attādhipati hirī, lokādhipati ottappaṃ . Lajjāsabhāvasaṇṭhitā hirī, bhayasabhāvasaṇṭhitaṃ ottappaṃ. Sappatissavalakkhaṇā hirī, vajjabhīrukabhayadassāvilakkhaṇaṃ ottappaṃ. Sā eva hirī ahirikena na kampatīti hiribalaṃ. Tadeva ottappaṃ anottappena na kampatīti ottappabalaṃ. Appaṭisaṅkhānena na kampatīti paṭisaṅkhānabalaṃ. Upaparikkhaṇapaññāyetaṃ nāmaṃ. Vīriyasīsena satta bojjhaṅge bhāventassa uppannabalaṃ bhāvanābalaṃ. Tathāpavattānaṃ catunnaṃ khandhānametaṃ nāmaṃ. Parisuddhāni sīlādīni anavajjabalaṃ. Cattāri saṅgahavatthūni saṅgahabalaṃ. Saṅgahe balantipi pāṭho. Dukkhamānaṃ adhivāsanaṃ khantibalaṃ. Dhammakathāya paresaṃ tosanaṃ paññattibalaṃ. Adhitassa atthassa adhigamāpanaṃ nijjhattibalaṃ. Kusalesu bahubhāvo issariyabalaṃ. Kusalesu yathāruci patiṭṭhānaṃ adhiṭṭhānabalaṃ. Hiribalādīnaṃ attho mātikāpadesu byañjanavasena visesato yujjamānaṃ gahetvā vutto. Samathabalaṃ vipassanābalanti balappattā samathavipassanā eva.
মাতিকানিদ্দেসে অস্সদ্ধিযে ন কম্পতীতি সদ্ধাবলন্তি মূলবলট্ঠং ৰত্ৰা তমেৰ অপরেহি নৰহি পরিযাযেহি ৰিসেসেত্ৰা দস্সেসি। যো হি ধম্মো অকম্পিযো বলপ্পত্তো হোতি, সো সহজাতে উপত্থম্ভেতি, অত্তনো পটিপক্খে কিলেসে পরিযাদিযতি, পটিৰেধস্স আদিভূতং সীলং দিট্ঠিঞ্চ ৰিসোধেতি, চিত্তং আরম্মণে পতিট্ঠাপেতি, চিত্তং পভস্সরং করোন্তো ৰোদাপেতি, ৰসিং পাপেন্তো ৰিসেসং অধিগমাপেতি, ততো উত্তরিং পাপেন্তো উত্তরিপটিৰেধং কারেতি, কমেন অরিযমগ্গং পাপেত্ৰা সচ্চাভিসমযং কারেতি, ফলপ্পত্তিযা নিরোধে পতিট্ঠাপেতি। তস্মা নৰধা বলট্ঠো ৰিসেসিতো। এস নযো ৰীরিযবলাদীসু চতূসু।
Mātikāniddese assaddhiye na kampatīti saddhābalanti mūlabalaṭṭhaṃ vatvā tameva aparehi navahi pariyāyehi visesetvā dassesi. Yo hi dhammo akampiyo balappatto hoti, so sahajāte upatthambheti, attano paṭipakkhe kilese pariyādiyati, paṭivedhassa ādibhūtaṃ sīlaṃ diṭṭhiñca visodheti, cittaṃ ārammaṇe patiṭṭhāpeti, cittaṃ pabhassaraṃ karonto vodāpeti, vasiṃ pāpento visesaṃ adhigamāpeti, tato uttariṃ pāpento uttaripaṭivedhaṃ kāreti, kamena ariyamaggaṃ pāpetvā saccābhisamayaṃ kāreti, phalappattiyā nirodhe patiṭṭhāpeti. Tasmā navadhā balaṭṭho visesito. Esa nayo vīriyabalādīsu catūsu.
কামচ্ছন্দং হিরীযতীতি নেক্খম্মযুত্তো যোগী নেক্খম্মেন কামচ্ছন্দতো হিরীযতি। ওত্তপ্পেপি এসেৰ নযো। এতেহি সব্বাকুসলেহিপি হিরীযনা ওত্তপ্পনা ৰুত্তাযেৰ হোন্তি। ব্যাপাদন্তিআদীনম্পি ইমিনাৰ নযেন অত্থো ৰেদিতব্বো। পটিসঙ্খাতীতি অসম্মোহৰসেন আদীনৰতো উপপরিক্খতি। ভাৰেতীতি ৰড্ঢেতি। ৰজ্জন্তি রাগাদিৰজ্জং। সঙ্গণ্হাতীতি বন্ধতি। খমতীতি তস্স যোগিস্স খমতি রুচ্চতি। পঞ্ঞাপেতীতি তোসেতি। নিজ্ঝাপেতীতি চিন্তাপেতি। ৰসং ৰত্তেতীতি চিত্তে পহু হুত্ৰা চিত্তং অত্তনো ৰসং কত্ৰা পৰত্তেতি। অধিট্ঠাতীতি ৰিদহতি। ভাৰনাবলাদীনি সব্বানিপি নেক্খম্মাদীনিযেৰ। মাতিকাৰণ্ণনায অঞ্ঞথা ৰুত্তো, অত্থো পন ব্যঞ্জনৰসেনেৰ পাকটত্তা ইধ ন ৰুত্তোতি ৰেদিতব্বং। সমথবলং ৰিপস্সনাবলঞ্চ ৰিত্থারতো নিদ্দিসিত্ৰা অৰসানে উদ্ধচ্চসহগতকিলেসে চ খন্ধে চ ন কম্পতীতিআদি চ অৰিজ্জাসহগতকিলেসে চ খন্ধে চ ন কম্পতীতিআদি চ সমথবলৰিপস্সনাবলানং লক্খণদস্সনত্থং ৰুত্তং।
Kāmacchandaṃ hirīyatīti nekkhammayutto yogī nekkhammena kāmacchandato hirīyati. Ottappepi eseva nayo. Etehi sabbākusalehipi hirīyanā ottappanā vuttāyeva honti. Byāpādantiādīnampi imināva nayena attho veditabbo. Paṭisaṅkhātīti asammohavasena ādīnavato upaparikkhati. Bhāvetīti vaḍḍheti. Vajjanti rāgādivajjaṃ. Saṅgaṇhātīti bandhati. Khamatīti tassa yogissa khamati ruccati. Paññāpetīti toseti. Nijjhāpetīti cintāpeti. Vasaṃ vattetīti citte pahu hutvā cittaṃ attano vasaṃ katvā pavatteti. Adhiṭṭhātīti vidahati. Bhāvanābalādīni sabbānipi nekkhammādīniyeva. Mātikāvaṇṇanāya aññathā vutto, attho pana byañjanavaseneva pākaṭattā idha na vuttoti veditabbaṃ. Samathabalaṃ vipassanābalañca vitthārato niddisitvā avasāne uddhaccasahagatakilese ca khandhe ca na kampatītiādi ca avijjāsahagatakilese ca khandhe ca na kampatītiādi ca samathabalavipassanābalānaṃ lakkhaṇadassanatthaṃ vuttaṃ.
সেখাসেখবলেসু সম্মাদিট্ঠিং সিক্খতীতি সেখবলন্তি সেখপুগ্গলো সম্মাদিট্ঠিং সিক্খতীতি সেখো, সা সম্মাদিট্ঠি তস্স সেখস্স বলন্তি সেখবলন্তি অত্থো। তত্থ সিক্খিতত্তা অসেখবলন্তি অসেখপুগ্গলো তত্থ সম্মাদিট্ঠিযা সিক্খিতত্তা ন সিক্খতীতি অসেখো, সাযেৰ সম্মাদিট্ঠি তস্স অসেখস্স বলন্তি অসেখবলং। এসেৰ নযো সম্মাসঙ্কপ্পাদীসু। সম্মাঞাণন্তি পচ্চৰেক্খণঞাণং। তম্পি হি লোকিকম্পি হোন্তং সেখস্স পৰত্তত্তা সেখবলং, অসেখস্স পৰত্তত্তা অসেখবলন্তি ৰুত্তং। সম্মাৰিমুত্তীতি অট্ঠ মগ্গঙ্গানি ঠপেত্ৰা সেসা ফলসম্পযুত্তা ধম্মা । কেচি পন ‘‘ঠপেত্ৰা লোকুত্তরৰিমুত্তিং অৰসেসা ৰিমুত্তিযো সম্মাৰিমুত্তী’’তি ৰদন্তি। তস্স সেখাসেখবলত্তং ৰুত্তনযমেৰ।
Sekhāsekhabalesu sammādiṭṭhiṃ sikkhatīti sekhabalanti sekhapuggalo sammādiṭṭhiṃ sikkhatīti sekho, sā sammādiṭṭhi tassa sekhassa balanti sekhabalanti attho. Tattha sikkhitattā asekhabalanti asekhapuggalo tattha sammādiṭṭhiyā sikkhitattā na sikkhatīti asekho, sāyeva sammādiṭṭhi tassa asekhassa balanti asekhabalaṃ. Eseva nayo sammāsaṅkappādīsu. Sammāñāṇanti paccavekkhaṇañāṇaṃ. Tampi hi lokikampi hontaṃ sekhassa pavattattā sekhabalaṃ, asekhassa pavattattā asekhabalanti vuttaṃ. Sammāvimuttīti aṭṭha maggaṅgāni ṭhapetvā sesā phalasampayuttā dhammā . Keci pana ‘‘ṭhapetvā lokuttaravimuttiṃ avasesā vimuttiyo sammāvimuttī’’ti vadanti. Tassa sekhāsekhabalattaṃ vuttanayameva.
খীণাসৰবলেসু সব্বানিপি ঞাণবলানি। খীণাসৰস্স ভিক্খুনোতি করণত্থে সামিৰচনং, খীণাসৰেন ভিক্খুনাতি অত্থো। অনিচ্চতোতি হুত্ৰা অভাৰাকারেন অনিচ্চতো। যথাভূতন্তি যথাসভাৰতো। পঞ্ঞাযাতি সহৰিপস্সনায মগ্গপঞ্ঞায। অনিচ্চতো সুদিট্ঠা দুক্খতো অনত্ততো সুদিট্ঠা হোন্তি তম্মূলকত্তা। যন্তি ভাৰনপুংসকৰচনং, যেন কারণেনাতি ৰা অত্থো। আগম্মাতি পটিচ্চ। পটিজানাতীতি সম্পটিচ্ছতি পটিঞ্ঞং করোতি। অঙ্গারকাসূপমাতি মহাভিতাপট্ঠেন অঙ্গারকাসুযা উপমিতা। কামাতি ৰত্থুকামা চ কিলেসকামা চ।
Khīṇāsavabalesu sabbānipi ñāṇabalāni. Khīṇāsavassa bhikkhunoti karaṇatthe sāmivacanaṃ, khīṇāsavena bhikkhunāti attho. Aniccatoti hutvā abhāvākārena aniccato. Yathābhūtanti yathāsabhāvato. Paññāyāti sahavipassanāya maggapaññāya. Aniccato sudiṭṭhā dukkhato anattato sudiṭṭhā honti tammūlakattā. Yanti bhāvanapuṃsakavacanaṃ, yena kāraṇenāti vā attho. Āgammāti paṭicca. Paṭijānātīti sampaṭicchati paṭiññaṃ karoti. Aṅgārakāsūpamāti mahābhitāpaṭṭhena aṅgārakāsuyā upamitā. Kāmāti vatthukāmā ca kilesakāmā ca.
ৰিৰেকনিন্নন্তি ফলসমাপত্তিৰসেন উপধিৰিৰেকসঙ্খাতনিব্বাননিন্নং। তযো হি ৰিৰেকা – কাযৰিৰেকো চিত্তৰিৰেকো উপধিৰিৰেকোতি। কাযৰিৰেকো চ ৰিৰেকট্ঠকাযানং নেক্খম্মাভিরতানং। চিত্তৰিৰেকো চ অধিচিত্তমনুযুত্তানং। উপধিৰিৰেকো চ নিরুপধীনং পুগ্গলানং ৰিসঙ্খারগতানং, নিস্সরণৰিৰেকসঙ্খাতনিব্বাননিন্নং ৰা। পঞ্চ হি ৰিৰেকা – ৰিক্খম্ভনৰিৰেকো তদঙ্গৰিৰেকো সমুচ্ছেদৰিৰেকো পটিপ্পস্সদ্ধিৰিৰেকো নিস্সরণৰিৰেকোতি। ৰিৰেকনিন্নন্তি ৰিৰেকে নিন্নং। ৰিৰেকপোণন্তি ৰিৰেকে নতং। ৰিৰেকপব্ভারন্তি ৰিৰেকসীসভারং। দ্ৰেপি পুরিমস্সেৰ ৰেৰচনানি। ৰিৰেকট্ঠন্তি কিলেসেহি ৰজ্জিতং, দূরীভূতং ৰা। নেক্খম্মাভিরতন্তি নিব্বানে অভিরতং, পব্বজ্জায অভিরতং ৰা। ব্যন্তীভূতন্তি ৰিগতন্তীভূতং, একদেসেনাপি অনল্লীনং ৰিপ্পমুত্তং ৰিসংসট্ঠং। সব্বসোতি সব্বথা। আসৰট্ঠানিযেহি ধম্মেহীতি সংযোগৰসেন আসৰানং কারণভূতেহি কিলেসধম্মেহীতি অত্থো। অথ ৰা ব্যন্তীভূতন্তি ৰিগতনিকন্তিভূতং, নিত্তণ্হন্তি অত্থো। কুতো? সব্বসো আসৰট্ঠানিযেহি ধম্মেহি সব্বেহি তেভূমকধম্মেহীতি অত্থো। ইধ দসহি খীণাসৰবলেহি খীণাসৰস্স লোকিযলোকুত্তরো মগ্গো কথিতো। ‘‘অনিচ্চতো সব্বে সঙ্খারা’’তি দুক্খপরিঞ্ঞাবলং, ‘‘অঙ্গারকাসূপমা কামা’’তি সমুদযপহানবলং, ‘‘ৰিৰেকনিন্নং চিত্তং হোতী’’তি নিরোধসচ্ছিকিরিযাবলং, ‘‘চত্তারো সতিপট্ঠানা’’তিআদি সত্তৰিধং মগ্গভাৰনাবলন্তিপি ৰদন্তি। দস ইদ্ধিবলানি ইদ্ধিকথায আৰি ভৰিস্সন্তি।
Vivekaninnanti phalasamāpattivasena upadhivivekasaṅkhātanibbānaninnaṃ. Tayo hi vivekā – kāyaviveko cittaviveko upadhivivekoti. Kāyaviveko ca vivekaṭṭhakāyānaṃ nekkhammābhiratānaṃ. Cittaviveko ca adhicittamanuyuttānaṃ. Upadhiviveko ca nirupadhīnaṃ puggalānaṃ visaṅkhāragatānaṃ, nissaraṇavivekasaṅkhātanibbānaninnaṃ vā. Pañca hi vivekā – vikkhambhanaviveko tadaṅgaviveko samucchedaviveko paṭippassaddhiviveko nissaraṇavivekoti. Vivekaninnanti viveke ninnaṃ. Vivekapoṇanti viveke nataṃ. Vivekapabbhāranti vivekasīsabhāraṃ. Dvepi purimasseva vevacanāni. Vivekaṭṭhanti kilesehi vajjitaṃ, dūrībhūtaṃ vā. Nekkhammābhiratanti nibbāne abhirataṃ, pabbajjāya abhirataṃ vā. Byantībhūtanti vigatantībhūtaṃ, ekadesenāpi anallīnaṃ vippamuttaṃ visaṃsaṭṭhaṃ. Sabbasoti sabbathā. Āsavaṭṭhāniyehi dhammehīti saṃyogavasena āsavānaṃ kāraṇabhūtehi kilesadhammehīti attho. Atha vā byantībhūtanti vigatanikantibhūtaṃ, nittaṇhanti attho. Kuto? Sabbaso āsavaṭṭhāniyehi dhammehi sabbehi tebhūmakadhammehīti attho. Idha dasahi khīṇāsavabalehi khīṇāsavassa lokiyalokuttaro maggo kathito. ‘‘Aniccato sabbe saṅkhārā’’ti dukkhapariññābalaṃ, ‘‘aṅgārakāsūpamā kāmā’’ti samudayapahānabalaṃ, ‘‘vivekaninnaṃ cittaṃ hotī’’ti nirodhasacchikiriyābalaṃ, ‘‘cattāro satipaṭṭhānā’’tiādi sattavidhaṃ maggabhāvanābalantipi vadanti. Dasa iddhibalāni iddhikathāya āvi bhavissanti.
তথাগতবলনিদ্দেসে তথাগতবলানীতি অঞ্ঞেহি অসাধারণানি তথাগতস্সেৰ বলানি। যথা ৰা পুব্ববুদ্ধানং বলানি পুঞ্ঞুস্সযসম্পত্তিযা আগতানি, তথা আগতবলানীতিপি অত্থো। তত্থ দুৰিধং তথাগতবলং – কাযবলং ঞাণবলঞ্চ। তেসু কাযবলং হত্থিকুলানুসারেন ৰেদিতব্বং। ৰুত্তঞ্হেতং পোরাণেহি –
Tathāgatabalaniddese tathāgatabalānīti aññehi asādhāraṇāni tathāgatasseva balāni. Yathā vā pubbabuddhānaṃ balāni puññussayasampattiyā āgatāni, tathā āgatabalānītipi attho. Tattha duvidhaṃ tathāgatabalaṃ – kāyabalaṃ ñāṇabalañca. Tesu kāyabalaṃ hatthikulānusārena veditabbaṃ. Vuttañhetaṃ porāṇehi –
‘‘কাল়াৰকঞ্চ গঙ্গেয্যং, পণ্ডরং তম্বপিঙ্গলং।
‘‘Kāḷāvakañca gaṅgeyyaṃ, paṇḍaraṃ tambapiṅgalaṃ;
গন্ধমঙ্গলহেমঞ্চ, উপোসথছদ্দন্তিমে দসা’’তি॥ (ৰিভ॰ অট্ঠ॰ ৭৬০; ম॰ নি॰ অট্ঠ॰ ১.১৪৮; সং॰ নি॰ অট্ঠ॰ ২.২.২২)।
Gandhamaṅgalahemañca, uposathachaddantime dasā’’ti. (vibha. aṭṭha. 760; ma. ni. aṭṭha. 1.148; saṃ. ni. aṭṭha. 2.2.22);
ইমানি দস হত্থিকুলানি। তত্থ কাল়াৰকন্তি পকতিহত্থিকুলং দট্ঠব্বং। যং দসন্নং পুরিসানং কাযবলং, তং একস্স কাল়াৰকস্স হত্থিনো বলং। যং দসন্নং কাল়াৰকানং বলং, তং একস্স গঙ্গেয্যস্স বলং। যং দসন্নং গঙ্গেয্যানং, তং একস্স পণ্ডরস্স। যং দসন্নং পণ্ডরানং , তং একস্স তম্বস্স। যং দসন্নং তম্বানং, তং একস্স পিঙ্গলস্স। যং দসন্নং পিঙ্গলানং, তং একস্স গন্ধহত্থিনো। যং দসন্নং গন্ধহত্থীনং, তং একস্স মঙ্গলহত্থিনো। যং দসন্নং মঙ্গলহত্থীনং, তং একস্স হেমৰতস্স। যং দসন্নং হেমৰতানং, তং একস্স উপোসথস্স। যং দসন্নং উপোসথানং, তং একস্স ছদ্দন্তস্স। যং দসন্নং ছদ্দন্তানং, তং একস্স তথাগতস্স বলং। নারাযনসঙ্ঘাতবলন্তিপি ইদমেৰ ৰুচ্চতি। তদেতং পকতিহত্থিনো গণনায হত্থীনং কোটিসহস্সস্স, পুরিসগণনায দসন্নং পুরিসকোটিসহস্সানং বলং হোতি। ইদং তাৰ তথাগতস্স কাযবলং।
Imāni dasa hatthikulāni. Tattha kāḷāvakanti pakatihatthikulaṃ daṭṭhabbaṃ. Yaṃ dasannaṃ purisānaṃ kāyabalaṃ, taṃ ekassa kāḷāvakassa hatthino balaṃ. Yaṃ dasannaṃ kāḷāvakānaṃ balaṃ, taṃ ekassa gaṅgeyyassa balaṃ. Yaṃ dasannaṃ gaṅgeyyānaṃ, taṃ ekassa paṇḍarassa. Yaṃ dasannaṃ paṇḍarānaṃ , taṃ ekassa tambassa. Yaṃ dasannaṃ tambānaṃ, taṃ ekassa piṅgalassa. Yaṃ dasannaṃ piṅgalānaṃ, taṃ ekassa gandhahatthino. Yaṃ dasannaṃ gandhahatthīnaṃ, taṃ ekassa maṅgalahatthino. Yaṃ dasannaṃ maṅgalahatthīnaṃ, taṃ ekassa hemavatassa. Yaṃ dasannaṃ hemavatānaṃ, taṃ ekassa uposathassa. Yaṃ dasannaṃ uposathānaṃ, taṃ ekassa chaddantassa. Yaṃ dasannaṃ chaddantānaṃ, taṃ ekassa tathāgatassa balaṃ. Nārāyanasaṅghātabalantipi idameva vuccati. Tadetaṃ pakatihatthino gaṇanāya hatthīnaṃ koṭisahassassa, purisagaṇanāya dasannaṃ purisakoṭisahassānaṃ balaṃ hoti. Idaṃ tāva tathāgatassa kāyabalaṃ.
ঞাণবলং পন ইধ তাৰ অঞ্ঞত্থ চ পাল়িযং আগতমেৰ দসবলঞাণং, মজ্ঝিমে (ম॰ নি॰ ১.১৫০) আগতং চতুৰেসারজ্জঞাণং, অট্ঠসু পরিসাসু অকম্পনঞাণং, চতুযোনিপরিচ্ছেদকঞাণং, পঞ্চগতিপরিচ্ছেদকঞাণং, সংযুত্তকে (সং॰ নি॰ ২.৩৩-৩৪) আগতানি তেসত্ততি ঞাণানি, সত্তসত্ততি ঞাণানীতি এৰমঞ্ঞানিপি অনেকানি ঞাণসহস্সানি। এতং ঞাণবলং নাম। ইধাপি ঞাণবলমেৰ অধিপ্পেতং। ঞাণঞ্হি অকম্পিযট্ঠেন উপত্থম্ভনট্ঠেন চ বলন্তি ৰুত্তং।
Ñāṇabalaṃ pana idha tāva aññattha ca pāḷiyaṃ āgatameva dasabalañāṇaṃ, majjhime (ma. ni. 1.150) āgataṃ catuvesārajjañāṇaṃ, aṭṭhasu parisāsu akampanañāṇaṃ, catuyoniparicchedakañāṇaṃ, pañcagatiparicchedakañāṇaṃ, saṃyuttake (saṃ. ni. 2.33-34) āgatāni tesattati ñāṇāni, sattasattati ñāṇānīti evamaññānipi anekāni ñāṇasahassāni. Etaṃ ñāṇabalaṃ nāma. Idhāpi ñāṇabalameva adhippetaṃ. Ñāṇañhi akampiyaṭṭhena upatthambhanaṭṭhena ca balanti vuttaṃ.
ঠানঞ্চ ঠানতোতি কারণঞ্চ কারণতো। কারণঞ্হি যস্মা তত্থ ফলং তিট্ঠতি তদাযত্তৰুত্তিতায উপ্পজ্জতি চেৰ পৰত্ততি চ, তস্মা ঠানন্তি ৰুচ্চতি। তং ভগৰা যে যে ধম্মা যেসং যেসং ধম্মানং হেতূ পচ্চযা উপ্পাদায, তং তং ঠানন্তি, যে যে ধম্মা যেসং যেসং ধম্মানং ন হেতূ ন পচ্চযা উপ্পাদায, তং তং অট্ঠানন্তি পজানন্তো ঠানঞ্চ ঠানতো অট্ঠানঞ্চ অট্ঠানতো যথাভূতং পজানাতি। যম্পীতি যেন ঞাণেন। ইদম্পীতি ইদম্পি ঠানাট্ঠানঞাণং, তথাগতস্স তথাগতবলং নাম হোতীতি অত্থো। এৰং সেসপদেসুপি যোজনা ৰেদিতব্বা।
Ṭhānañca ṭhānatoti kāraṇañca kāraṇato. Kāraṇañhi yasmā tattha phalaṃ tiṭṭhati tadāyattavuttitāya uppajjati ceva pavattati ca, tasmā ṭhānanti vuccati. Taṃ bhagavā ye ye dhammā yesaṃ yesaṃ dhammānaṃ hetū paccayā uppādāya, taṃ taṃ ṭhānanti, ye ye dhammā yesaṃ yesaṃ dhammānaṃ na hetū na paccayā uppādāya, taṃ taṃ aṭṭhānanti pajānanto ṭhānañca ṭhānato aṭṭhānañca aṭṭhānato yathābhūtaṃ pajānāti. Yampīti yena ñāṇena. Idampīti idampi ṭhānāṭṭhānañāṇaṃ, tathāgatassa tathāgatabalaṃ nāma hotīti attho. Evaṃ sesapadesupi yojanā veditabbā.
আসভং ঠানন্তি সেট্ঠট্ঠানং উত্তমট্ঠানং, আসভা ৰা পুব্ববুদ্ধা, তেসং ঠানন্তি অত্থো। অপিচ গৰসতজেট্ঠকো উসভো, গৰসহস্সজেট্ঠকো ৰসভো, ৰজসতজেট্ঠকো ৰা উসভো, ৰজসহস্সজেট্ঠকো ৰসভো, সব্বগৰসেট্ঠো সব্বপরিস্সযসহো সেতো পাসাদিকো মহাভারৰহো অসনিসতসদ্দেহিপি অসন্তসনীযো নিসভো, সো ইধ উসভোতি অধিপ্পেতো। ইদম্পি হি তস্স পরিযাযৰচনং। উসভস্স ইদন্তি আসভং। ঠানন্তি চতূহি পাদেহি পথৰিং উপ্পীল়েত্ৰা অৰট্ঠানং। ইদং পন আসভং ৰিযাতি আসভং যথেৰ হি নিসভসঙ্খাতো উসভো উসভবলেন সমন্নাগতো চতূহি পাদেহি পথৰিং উপ্পীল়েত্ৰা অচলট্ঠানেন তিট্ঠতি, এৰং তথাগতোপি দসহি তথাগতবলেহি সমন্নাগতো চতূহি ৰেসারজ্জপাদেহি অট্ঠপরিসপথৰিং উপ্পীল়েত্ৰা সদেৰকে লোকে কেনচি পচ্চত্থিকেন পচ্চামিত্তেন অকম্পিযো অচলট্ঠানেন তিট্ঠতি, এৰং তিট্ঠমানো চ তং আসভং ঠানং পটিজানাতি উপগচ্ছতি ন পচ্চক্খাতি, অত্তনি আরোপেতি। তেন ৰুত্তং – ‘‘আসভং ঠানং পটিজানাতী’’তি (সং॰ নি॰ অট্ঠ॰ ২.২.২২; ম॰ নি॰ অট্ঠ॰ ১.১৪৮)।
Āsabhaṃṭhānanti seṭṭhaṭṭhānaṃ uttamaṭṭhānaṃ, āsabhā vā pubbabuddhā, tesaṃ ṭhānanti attho. Apica gavasatajeṭṭhako usabho, gavasahassajeṭṭhako vasabho, vajasatajeṭṭhako vā usabho, vajasahassajeṭṭhako vasabho, sabbagavaseṭṭho sabbaparissayasaho seto pāsādiko mahābhāravaho asanisatasaddehipi asantasanīyo nisabho, so idha usabhoti adhippeto. Idampi hi tassa pariyāyavacanaṃ. Usabhassa idanti āsabhaṃ. Ṭhānanti catūhi pādehi pathaviṃ uppīḷetvā avaṭṭhānaṃ. Idaṃ pana āsabhaṃ viyāti āsabhaṃ yatheva hi nisabhasaṅkhāto usabho usabhabalena samannāgato catūhi pādehi pathaviṃ uppīḷetvā acalaṭṭhānena tiṭṭhati, evaṃ tathāgatopi dasahi tathāgatabalehi samannāgato catūhi vesārajjapādehi aṭṭhaparisapathaviṃ uppīḷetvā sadevake loke kenaci paccatthikena paccāmittena akampiyo acalaṭṭhānena tiṭṭhati, evaṃ tiṭṭhamāno ca taṃ āsabhaṃ ṭhānaṃ paṭijānāti upagacchati na paccakkhāti, attani āropeti. Tena vuttaṃ – ‘‘āsabhaṃ ṭhānaṃ paṭijānātī’’ti (saṃ. ni. aṭṭha. 2.2.22; ma. ni. aṭṭha. 1.148).
পরিসাসূতি খত্তিযব্রাহ্মণগহপতিসমণচাতুমহারাজিকতাৰতিংসমারব্রহ্মানং ৰসেন অট্ঠসু পরিসাসু। সীহনাদং নদতীতি সেট্ঠনাদং অছম্ভিতনাদং নদতি, সীহনাদসদিসং ৰা নাদং নদতি। অযমত্থো সীহনাদসুত্তেন (ম॰ নি॰ ১.১৪৬ আদযো; দী॰ নি॰ ১.৩৮১ আদযো) দীপেতব্বো। যথা ৰা সীহো সহনতো হননতো চ সীহোতি ৰুচ্চতি, এৰং তথাগতো লোকধম্মানং সহনতো পরপ্পৰাদানং হননতো সীহোতি ৰুচ্চতি। এৰং ৰুত্তস্স সীহস্স নাদং সীহনাদং। তত্থ যথা সীহো সীহবলেন সমন্নাগতো সব্বত্থ ৰিসারদো ৰিগতলোমহংসো সীহনাদং নদতি, এৰং তথাগতসীহোপি তথাগতবলেহি সমন্নাগতো অট্ঠসু পরিসাসু ৰিসারদো ৰিগতলোমহংসো ‘‘ইতি রূপ’’ন্তিআদিনা (সং॰ নি॰ ৩.৭৮) নযেন নানাৰিধদেসনাৰিলাসসম্পন্নং সীহনাদং নদতি। তেন ৰুত্তং – ‘‘পরিসাসু সীহনাদং নদতী’’তি।
Parisāsūti khattiyabrāhmaṇagahapatisamaṇacātumahārājikatāvatiṃsamārabrahmānaṃ vasena aṭṭhasu parisāsu. Sīhanādaṃ nadatīti seṭṭhanādaṃ achambhitanādaṃ nadati, sīhanādasadisaṃ vā nādaṃ nadati. Ayamattho sīhanādasuttena (ma. ni. 1.146 ādayo; dī. ni. 1.381 ādayo) dīpetabbo. Yathā vā sīho sahanato hananato ca sīhoti vuccati, evaṃ tathāgato lokadhammānaṃ sahanato parappavādānaṃ hananato sīhoti vuccati. Evaṃ vuttassa sīhassa nādaṃ sīhanādaṃ. Tattha yathā sīho sīhabalena samannāgato sabbattha visārado vigatalomahaṃso sīhanādaṃ nadati, evaṃ tathāgatasīhopi tathāgatabalehi samannāgato aṭṭhasu parisāsu visārado vigatalomahaṃso ‘‘iti rūpa’’ntiādinā (saṃ. ni. 3.78) nayena nānāvidhadesanāvilāsasampannaṃ sīhanādaṃ nadati. Tena vuttaṃ – ‘‘parisāsu sīhanādaṃ nadatī’’ti.
ব্রহ্মচক্কং পৰত্তেতীতি এত্থ ব্রহ্মন্তি সেট্ঠং উত্তমং ৰিসুদ্ধং। চক্কসদ্দো পনাযং –
Brahmacakkaṃ pavattetīti ettha brahmanti seṭṭhaṃ uttamaṃ visuddhaṃ. Cakkasaddo panāyaṃ –
সম্পত্তিযং লক্খণে চ, রথঙ্গে ইরিযাপথে।
Sampattiyaṃ lakkhaṇe ca, rathaṅge iriyāpathe;
দানে রতনধম্মূর, চক্কাদীসু চ দিস্সতি।
Dāne ratanadhammūra, cakkādīsu ca dissati;
ধম্মচক্কে ইধ মতো, তম্পি দ্ৰেধা ৰিভাৰযে॥
Dhammacakke idha mato, tampi dvedhā vibhāvaye.
‘‘চত্তারিমানি , ভিক্খৰে, চক্কানি, যেহি সমন্নাগতানং দেৰমনুস্সান’’ন্তিআদীসু (অ॰ নি॰ ৪.৩১) হি অযং সম্পত্তিযং দিস্সতি। ‘‘হেট্ঠা পাদতলেসু চক্কানি জাতানি হোন্তী’’তি (দী॰ নি॰ ২.৩৫) এত্থ লক্খণে। ‘‘চক্কংৰ ৰহতো পদ’’ন্তি (ধ॰ প॰ ১) এত্থ রথঙ্গে। ‘‘চতুচক্কং নৰদ্ৰার’’ন্তি (সং॰ নি॰ ১.২৯) এত্থ ইরিযাপথে। ‘‘দদং ভুঞ্জ মা চ পমাদো , চক্কং ৰত্তয কোসলাধিপা’’তি (জা॰ ১.৭.১৪৯) এত্থ দানে। ‘‘দিব্বং চক্করতনং পাতুরহোসী’’তি (দী॰ নি॰ ২.২৪৩) এত্থ রতনচক্কে। ‘‘মযা পৰত্তিতং চক্ক’’ন্তি (সু॰ নি॰ ৫৬২) এত্থ ধম্মচক্কে। ‘‘ইচ্ছাহতস্স পোসস্স, চক্কং ভমতি মত্থকে’’তি (জা॰ ১.১.১০৪; ১.৫.১০৩) এত্থ উরচক্কে। ‘‘খুরপরিযন্তেন চেপি চক্কেনা’’তি (দী॰ নি॰ ১.১৬৬) এত্থ পহরণচক্কে। ‘‘অসনিৰিচক্ক’’ন্তি (দী॰ নি॰ ৩.৬১; সং॰ নি॰ ২.১৬২) এত্থ অসনিমণ্ডলে। ইধ পনাযং ধম্মচক্কে মতো।
‘‘Cattārimāni , bhikkhave, cakkāni, yehi samannāgatānaṃ devamanussāna’’ntiādīsu (a. ni. 4.31) hi ayaṃ sampattiyaṃ dissati. ‘‘Heṭṭhā pādatalesu cakkāni jātāni hontī’’ti (dī. ni. 2.35) ettha lakkhaṇe. ‘‘Cakkaṃva vahato pada’’nti (dha. pa. 1) ettha rathaṅge. ‘‘Catucakkaṃ navadvāra’’nti (saṃ. ni. 1.29) ettha iriyāpathe. ‘‘Dadaṃ bhuñja mā ca pamādo , cakkaṃ vattaya kosalādhipā’’ti (jā. 1.7.149) ettha dāne. ‘‘Dibbaṃ cakkaratanaṃ pāturahosī’’ti (dī. ni. 2.243) ettha ratanacakke. ‘‘Mayā pavattitaṃ cakka’’nti (su. ni. 562) ettha dhammacakke. ‘‘Icchāhatassa posassa, cakkaṃ bhamati matthake’’ti (jā. 1.1.104; 1.5.103) ettha uracakke. ‘‘Khurapariyantena cepi cakkenā’’ti (dī. ni. 1.166) ettha paharaṇacakke. ‘‘Asanivicakka’’nti (dī. ni. 3.61; saṃ. ni. 2.162) ettha asanimaṇḍale. Idha panāyaṃ dhammacakke mato.
তং পনেতং ধম্মচক্কং দুৰিধং হোতি পটিৰেধঞাণঞ্চ দেসনাঞাণঞ্চ। তত্থ পঞ্ঞাপভাৰিতং অত্তনো অরিযফলাৰহং পটিৰেধঞাণং, করুণাপভাৰিতং সাৰকানং অরিযফলাৰহং দেসনাঞাণং। তত্থ পটিৰেধঞাণং উপ্পজ্জমানং উপ্পন্নন্তি দুৰিধং। তঞ্হি অভিনিক্খমনতো যাৰ অরহত্তমগ্গা উপ্পজ্জমানং নাম, ফলক্খণে উপ্পন্নং নাম। তুসিতভৰনতো ৰা যাৰ বোধিপল্লঙ্কে অরহত্তমগ্গা উপ্পজ্জমানং নাম, ফলক্খণে উপ্পন্নং নাম। দীপঙ্করদসবলতো ৰা পট্ঠায যাৰ অরহত্তমগ্গা উপ্পজ্জমানং নাম, ফলক্খণে উপ্পন্নং নাম। দেসনাঞাণম্পি পৰত্তমানং পৰত্তন্তি দুৰিধং। তঞ্হি যাৰ অঞ্ঞাতকোণ্ডঞ্ঞত্থেরস্স অরহত্তমগ্গা পৰত্তমানং নাম, ফলক্খণে পৰত্তং নাম। তত্থ পটিৰেধঞাণং লোকুত্তরং, দেসনাঞাণং লোকিযং। উভযম্পি পনেতং অঞ্ঞেহি অসাধারণং, বুদ্ধানংযেৰ ওরসঞাণং। তেন ৰুত্তং – ‘‘ব্রহ্মচক্কং পৰত্তেতী’’তি।
Taṃ panetaṃ dhammacakkaṃ duvidhaṃ hoti paṭivedhañāṇañca desanāñāṇañca. Tattha paññāpabhāvitaṃ attano ariyaphalāvahaṃ paṭivedhañāṇaṃ, karuṇāpabhāvitaṃ sāvakānaṃ ariyaphalāvahaṃ desanāñāṇaṃ. Tattha paṭivedhañāṇaṃ uppajjamānaṃ uppannanti duvidhaṃ. Tañhi abhinikkhamanato yāva arahattamaggā uppajjamānaṃ nāma, phalakkhaṇe uppannaṃ nāma. Tusitabhavanato vā yāva bodhipallaṅke arahattamaggā uppajjamānaṃ nāma, phalakkhaṇe uppannaṃ nāma. Dīpaṅkaradasabalato vā paṭṭhāya yāva arahattamaggā uppajjamānaṃ nāma, phalakkhaṇe uppannaṃ nāma. Desanāñāṇampi pavattamānaṃ pavattanti duvidhaṃ. Tañhi yāva aññātakoṇḍaññattherassa arahattamaggā pavattamānaṃ nāma, phalakkhaṇe pavattaṃ nāma. Tattha paṭivedhañāṇaṃ lokuttaraṃ, desanāñāṇaṃ lokiyaṃ. Ubhayampi panetaṃ aññehi asādhāraṇaṃ, buddhānaṃyeva orasañāṇaṃ. Tena vuttaṃ – ‘‘brahmacakkaṃ pavattetī’’ti.
কম্মসমাদানানন্তি সমাদিযিত্ৰা কতানং কুসলাকুসলকম্মানং, কম্মমেৰ ৰা কম্মসমাদানং। ঠানসো হেতুসোতি পচ্চযতো চেৰ হেতুতো চ। তত্থ গতিউপধিকালপযোগা ৰিপাকস্স ঠানং। কম্মং হেতু।
Kammasamādānānanti samādiyitvā katānaṃ kusalākusalakammānaṃ, kammameva vā kammasamādānaṃ. Ṭhānaso hetusoti paccayato ceva hetuto ca. Tattha gatiupadhikālapayogā vipākassa ṭhānaṃ. Kammaṃ hetu.
সব্বত্থগামিনিন্তি সব্বগতিগামিনিঞ্চ অগতিগামিনিঞ্চ। পটিপদন্তি মগ্গং। যথাভূতং পজানাতীতি বহূসুপি মনুস্সেসু একমেৰ পাণং ঘাতেন্তেসু ইমস্স চেতনা নিরযগামিনী ভৰিস্সতি, ইমস্স তিরচ্ছানযোনিগামিনীতি ইমিনা নযেন একৰত্থুস্মিম্পি কুসলাকুসলচেতনাসঙ্খাতানং পটিপত্তীনং অৰিপরীততো সভাৰং জানাতি।
Sabbatthagāmininti sabbagatigāminiñca agatigāminiñca. Paṭipadanti maggaṃ. Yathābhūtaṃ pajānātīti bahūsupi manussesu ekameva pāṇaṃ ghātentesu imassa cetanā nirayagāminī bhavissati, imassa tiracchānayonigāminīti iminā nayena ekavatthusmimpi kusalākusalacetanāsaṅkhātānaṃ paṭipattīnaṃ aviparītato sabhāvaṃ jānāti.
অনেকধাতুন্তি চক্খুধাতুআদীহি, কামধাতুআদীহি ৰা ধাতূহি বহুধাতুং। নানাধাতুন্তি তাসংযেৰ ধাতূনং ৰিলক্খণত্তা নানপ্পকারধাতুং । লোকন্তি খন্ধাযতনধাতুলোকং। যথাভূতং পজানাতীতি তাসং তাসং ধাতূনং অৰিপরীততো সভাৰং পটিৰিজ্ঝতি।
Anekadhātunti cakkhudhātuādīhi, kāmadhātuādīhi vā dhātūhi bahudhātuṃ. Nānādhātunti tāsaṃyeva dhātūnaṃ vilakkhaṇattā nānappakāradhātuṃ . Lokanti khandhāyatanadhātulokaṃ. Yathābhūtaṃ pajānātīti tāsaṃ tāsaṃ dhātūnaṃ aviparītato sabhāvaṃ paṭivijjhati.
নানাধিমুত্তিকতন্তি হীনপণীতাদিঅধিমুত্তীহি নানাধিমুত্তিকভাৰং।
Nānādhimuttikatanti hīnapaṇītādiadhimuttīhi nānādhimuttikabhāvaṃ.
পরসত্তানন্তি পধানসত্তানং। পরপুগ্গলানন্তি ততো পরেসং হীনসত্তানং। একত্থমেৰ ৰা এতং পদদ্ৰযং ৰেনেয্যৰসেন ভগৰতা দ্ৰেধা ৰুত্তং। ইধাপি ভগৰতা ৰুত্তনযেনেৰ ৰুত্তং। ইন্দ্রিযপরোপরিযত্তন্তি সদ্ধাদীনং ইন্দ্রিযানং পরভাৰঞ্চ অপরভাৰঞ্চ, ৰুদ্ধিঞ্চ হানিঞ্চাতি অত্থো।
Parasattānanti padhānasattānaṃ. Parapuggalānanti tato paresaṃ hīnasattānaṃ. Ekatthameva vā etaṃ padadvayaṃ veneyyavasena bhagavatā dvedhā vuttaṃ. Idhāpi bhagavatā vuttanayeneva vuttaṃ. Indriyaparopariyattanti saddhādīnaṃ indriyānaṃ parabhāvañca aparabhāvañca, vuddhiñca hāniñcāti attho.
ঝানৰিমোক্খসমাধিসমাপত্তীনন্তি পঠমাদীনং চতুন্নং ঝানানং, ‘‘রূপী রূপানি পস্সতী’’তিআদীনং (পটি॰ ম॰ ১.২০৯) অট্ঠন্নং ৰিমোক্খানং, সৰিতক্কসৰিচারাদীনং তিণ্ণং সমাধীনং, পঠমজ্ঝানসমাপত্তিআদীনঞ্চ নৰন্নং অনুপুব্বসমাপত্তীনং। সংকিলেসন্তি হানভাগিযধম্মং। ৰোদানন্তি ৰিসেসভাগিযধম্মং। ৰুট্ঠানন্তি যেন কারণেন ঝানাদীহি ৰুট্ঠহন্তি, তং কারণং। তং পন ‘‘ৰোদানম্পি ৰুট্ঠানং, তম্হা তম্হা সমাধিম্হা ৰুট্ঠানম্পি ৰুট্ঠান’’ন্তি (ৰিভ॰ ৮২৮) এৰং ৰুত্তং পগুণজ্ঝানঞ্চেৰ ভৰঙ্গফলসমাপত্তিযো চ। হেট্ঠিমং হেট্ঠিমঞ্হি পগুণজ্ঝানং উপরিমস্স উপরিমস্স পদট্ঠানং হোতি, তস্মা ‘‘ৰোদানম্পি ৰুট্ঠান’’ন্তি ৰুত্তং। ভৰঙ্গেন পন সব্বজ্ঝানেহি ৰুট্ঠানং হোতি, নিরোধসমাপত্তিতো ফলসমাপত্তিযা ৰুট্ঠানং হোতি। তং সন্ধায ‘‘তম্হা তম্হা সমাধিম্হা ৰুট্ঠানম্পি ৰুট্ঠান’’ন্তি ৰুত্তং।
Jhānavimokkhasamādhisamāpattīnanti paṭhamādīnaṃ catunnaṃ jhānānaṃ, ‘‘rūpī rūpāni passatī’’tiādīnaṃ (paṭi. ma. 1.209) aṭṭhannaṃ vimokkhānaṃ, savitakkasavicārādīnaṃ tiṇṇaṃ samādhīnaṃ, paṭhamajjhānasamāpattiādīnañca navannaṃ anupubbasamāpattīnaṃ. Saṃkilesanti hānabhāgiyadhammaṃ. Vodānanti visesabhāgiyadhammaṃ. Vuṭṭhānanti yena kāraṇena jhānādīhi vuṭṭhahanti, taṃ kāraṇaṃ. Taṃ pana ‘‘vodānampi vuṭṭhānaṃ, tamhā tamhā samādhimhā vuṭṭhānampi vuṭṭhāna’’nti (vibha. 828) evaṃ vuttaṃ paguṇajjhānañceva bhavaṅgaphalasamāpattiyo ca. Heṭṭhimaṃ heṭṭhimañhi paguṇajjhānaṃ uparimassa uparimassa padaṭṭhānaṃ hoti, tasmā ‘‘vodānampi vuṭṭhāna’’nti vuttaṃ. Bhavaṅgena pana sabbajjhānehi vuṭṭhānaṃ hoti, nirodhasamāpattito phalasamāpattiyā vuṭṭhānaṃ hoti. Taṃ sandhāya ‘‘tamhā tamhā samādhimhā vuṭṭhānampi vuṭṭhāna’’nti vuttaṃ.
পুব্বেনিৰাসদিব্বচক্খুআসৰক্খযঞাণানি হেট্ঠা পকাসিতানেৰ।
Pubbenivāsadibbacakkhuāsavakkhayañāṇāni heṭṭhā pakāsitāneva.
তত্থ আসৰানং খযাতি অরহত্তমগ্গেন সব্বকিলেসানং খযা। অনাসৰন্তি আসৰৰিরহিতং। চেতোৰিমুত্তিং পঞ্ঞাৰিমুত্তিন্তি এত্থ চেতোৰচনেন অরহত্তফলসম্পযুত্তো সমাধি, পঞ্ঞাৰচনেন তংসম্পযুত্তা চ পঞ্ঞা ৰুত্তা। তত্থ চ সমাধি রাগতো ৰিমুত্তত্তা চেতোৰিমুত্তি, পঞ্ঞা অৰিজ্জায ৰিমুত্তত্তা পঞ্ঞাৰিমুত্তীতি ৰেদিতব্বা। ৰুত্তঞ্হেতং ভগৰতা – ‘‘যো হিস্স, ভিক্খৰে, সমাধি, তদস্স সমাধিন্দ্রিযং। যা হিস্স, ভিক্খৰে, পঞ্ঞা, তদস্স পঞ্ঞিন্দ্রিযং। ইতি খো, ভিক্খৰে, রাগৰিরাগা চেতোৰিমুত্তি অৰিজ্জাৰিরাগা পঞ্ঞাৰিমুত্তী’’তি (সং॰ নি॰ ৫.৫১৬; ৫২০)। অপিচেত্থ সমথবলং চেতোৰিমুত্তি, ৰিপস্সনাবলং পঞ্ঞাৰিমুত্তীতি ৰেদিতব্বং। দিট্ঠেৰ ধম্মেতি ইমস্মিংযেৰ অত্তভাৰে। সযং অভিঞ্ঞা সচ্ছিকত্ৰাতি অধিকায পঞ্ঞায অত্তনাযেৰ পচ্চক্খং কত্ৰা, অপরপ্পচ্চযেন ঞত্ৰাতি অত্থো। উপসম্পজ্জাতি অধিগন্ত্ৰা, নিপ্ফাদেত্ৰা ৰা। ইমেসং পন দসন্নং দসবলঞাণানং ৰিত্থারো অভিধম্মে (ৰিভ॰ ৮০৯ আদযো) ৰুত্তনযেন ৰেদিতব্বো।
Tattha āsavānaṃ khayāti arahattamaggena sabbakilesānaṃ khayā. Anāsavanti āsavavirahitaṃ. Cetovimuttiṃ paññāvimuttinti ettha cetovacanena arahattaphalasampayutto samādhi, paññāvacanena taṃsampayuttā ca paññā vuttā. Tattha ca samādhi rāgato vimuttattā cetovimutti, paññā avijjāya vimuttattā paññāvimuttīti veditabbā. Vuttañhetaṃ bhagavatā – ‘‘yo hissa, bhikkhave, samādhi, tadassa samādhindriyaṃ. Yā hissa, bhikkhave, paññā, tadassa paññindriyaṃ. Iti kho, bhikkhave, rāgavirāgā cetovimutti avijjāvirāgā paññāvimuttī’’ti (saṃ. ni. 5.516; 520). Apicettha samathabalaṃ cetovimutti, vipassanābalaṃ paññāvimuttīti veditabbaṃ. Diṭṭheva dhammeti imasmiṃyeva attabhāve. Sayaṃ abhiññā sacchikatvāti adhikāya paññāya attanāyeva paccakkhaṃ katvā, aparappaccayena ñatvāti attho. Upasampajjāti adhigantvā, nipphādetvā vā. Imesaṃ pana dasannaṃ dasabalañāṇānaṃ vitthāro abhidhamme (vibha. 809 ādayo) vuttanayena veditabbo.
তত্থ পরৰাদিকথা হোতি – দসবলঞাণং নাম পাটিযেক্কং ঞাণং নত্থি, সব্বঞ্ঞুতঞ্ঞাণস্সেৰাযং পভেদোতি। ন তং তথা দট্ঠব্বং। অঞ্ঞমেৰ হি দসবলঞাণং, অঞ্ঞং সব্বঞ্ঞুতঞ্ঞাণং। দসবলঞাণঞ্হি সকসককিচ্চমেৰ জানাতি, সব্বঞ্ঞুতঞ্ঞাণং তম্পি, ততো অৰসেসম্পি জানাতি। দসবলঞাণেসু হি পঠমং কারণাকারণমেৰ জানাতি, দুতিযং কম্মন্তরৰিপাকন্তরমেৰ, ততিযং কম্মপরিচ্ছেদমেৰ, চতুত্থং ধাতুনানত্তকারণমেৰ, পঞ্চমং সত্তানং অজ্ঝাসযাধিমুত্তিমেৰ, ছট্ঠং ইন্দ্রিযানং তিক্খমুদুভাৰমেৰ, সত্তমং ঝানাদীহি সদ্ধিং তেসং সংকিলেসাদিমেৰ, অট্ঠমং পুব্বেনিৰুত্থখন্ধসন্ততিমেৰ, নৰমং সত্তানং চুতিপটিসন্ধিমেৰ, দসমং সচ্চপরিচ্ছেদমেৰ। সব্বঞ্ঞুতঞ্ঞাণং পন এতেহি জানিতব্বঞ্চ, ততো উত্তরিঞ্চ পজানাতি। এতেসং পন কিচ্চং ন সব্বং করোতি। তঞ্হি ঝানং হুত্ৰা অপ্পেতুং ন সক্কোতি, ইদ্ধি হুত্ৰা ৰিকুব্বিতুং ন সক্কোতি, মগ্গো হুত্ৰা কিলেসে খেপেতুং ন সক্কোতি।
Tattha paravādikathā hoti – dasabalañāṇaṃ nāma pāṭiyekkaṃ ñāṇaṃ natthi, sabbaññutaññāṇassevāyaṃ pabhedoti. Na taṃ tathā daṭṭhabbaṃ. Aññameva hi dasabalañāṇaṃ, aññaṃ sabbaññutaññāṇaṃ. Dasabalañāṇañhi sakasakakiccameva jānāti, sabbaññutaññāṇaṃ tampi, tato avasesampi jānāti. Dasabalañāṇesu hi paṭhamaṃ kāraṇākāraṇameva jānāti, dutiyaṃ kammantaravipākantarameva, tatiyaṃ kammaparicchedameva, catutthaṃ dhātunānattakāraṇameva, pañcamaṃ sattānaṃ ajjhāsayādhimuttimeva, chaṭṭhaṃ indriyānaṃ tikkhamudubhāvameva, sattamaṃ jhānādīhi saddhiṃ tesaṃ saṃkilesādimeva, aṭṭhamaṃ pubbenivutthakhandhasantatimeva, navamaṃ sattānaṃ cutipaṭisandhimeva, dasamaṃ saccaparicchedameva. Sabbaññutaññāṇaṃ pana etehi jānitabbañca, tato uttariñca pajānāti. Etesaṃ pana kiccaṃ na sabbaṃ karoti. Tañhi jhānaṃ hutvā appetuṃ na sakkoti, iddhi hutvā vikubbituṃ na sakkoti, maggo hutvā kilese khepetuṃ na sakkoti.
অপিচ পরৰাদী এৰং পুচ্ছিতব্বো ‘‘দসবলঞাণং নামেতং সৰিতক্কসৰিচারং অৰিতক্কৰিচারমত্তং অৰিতক্কাৰিচারং কামাৰচরং রূপাৰচরং অরূপাৰচরং লোকিযং লোকুত্তর’’ন্তি। জানন্তো ‘‘পটিপাটিযা সত্ত ঞাণানি সৰিতক্কসৰিচারানী’’তি ৰক্খতি। ‘‘ততো পরানি দ্ৰে অৰিতক্কঅৰিচারানী’’তি ৰক্খতি। ‘‘আসৰক্খযঞাণং সিযা সৰিতক্কসৰিচারং, সিযা অৰিতক্কৰিচারমত্তং, সিযা অৰিতক্কঅৰিচার’’ন্তি ৰক্খতি। তথা ‘‘পটিপাটিযা সত্ত কামাৰচরানি, ততো পরানি দ্ৰে রূপাৰচরানি, ততো অৰসানে একং লোকুত্তর’’ন্তি ৰক্খতি। ‘‘সব্বঞ্ঞুতঞ্ঞাণং পন সৰিতক্কসৰিচারমেৰ কামাৰচরমেৰ লোকিযমেৰা’’তি ৰক্খতি।
Apica paravādī evaṃ pucchitabbo ‘‘dasabalañāṇaṃ nāmetaṃ savitakkasavicāraṃ avitakkavicāramattaṃ avitakkāvicāraṃ kāmāvacaraṃ rūpāvacaraṃ arūpāvacaraṃ lokiyaṃ lokuttara’’nti. Jānanto ‘‘paṭipāṭiyā satta ñāṇāni savitakkasavicārānī’’ti vakkhati. ‘‘Tato parāni dve avitakkaavicārānī’’ti vakkhati. ‘‘Āsavakkhayañāṇaṃ siyā savitakkasavicāraṃ, siyā avitakkavicāramattaṃ, siyā avitakkaavicāra’’nti vakkhati. Tathā ‘‘paṭipāṭiyā satta kāmāvacarāni, tato parāni dve rūpāvacarāni, tato avasāne ekaṃ lokuttara’’nti vakkhati. ‘‘Sabbaññutaññāṇaṃ pana savitakkasavicārameva kāmāvacarameva lokiyamevā’’ti vakkhati.
এৰমেত্থ অপুব্বত্থানুৰণ্ণনং ঞত্ৰা ইদানি যস্মা তথাগতো পঠমংযেৰ ঠানাট্ঠানঞাণেন ৰেনেয্যসত্তানং আসৰক্খযাধিগমস্স চেৰ অনধিগমস্স চ ঠানাট্ঠানভূতং কিলেসাৰরণাভাৰং পস্সতি লোকিযসম্মাদিট্ঠিট্ঠানদস্সনতো নিযতমিচ্ছাদিট্ঠিট্ঠানাভাৰদস্সনতো চ। অথ নেসং কম্মৰিপাকঞাণেন ৰিপাকাৰরণাভাৰং পস্সতি তিহেতুকপটিসন্ধিদস্সনতো। সব্বত্থগামিনিপটিপদাঞাণেন কম্মাৰরণাভাৰং পস্সতি আনন্তরিককম্মাভাৰদস্সনতো। এৰং অনাৰরণানং অনেকধাতুনানাধাতুঞাণেন অনুকূলধম্মদেসনত্থং চরিযাৰিসেসং পস্সতি ধাতুৰেমত্তদস্সনতো। অথ নেসং নানাধিমুত্তিকতাঞাণেন অধিমুত্তিং পস্সতি পযোগং অনাদিযিত্ৰাপি অধিমুত্তিৰসেন ধম্মদেসনত্থং । অথেৰং দিট্ঠঅধিমুত্তীনং যথাসত্তি যথাবলং ধম্মং দেসেতুং ইন্দ্রিযপরোপরিযত্তঞাণেন ইন্দ্রিযপরোপরিযত্তং পস্সতি সদ্ধাদীনং তিক্খমুদুভাৰদস্সনতো। এৰং পরিঞ্ঞাতিন্দ্রিযপরোপরিযত্তাপি পনেতে সচে দূরে হোন্তি, অথ ঝানাদিঞাণেন ঝানাদীসু ৰসীভূতত্তা ইদ্ধিৰিসেসেন খিপ্পং উপগচ্ছতি। উপগন্ত্ৰা চ নেসং পুব্বেনিৰাসানুস্সতিঞাণেন পুব্বজাতিৰিভাৰনং দিব্বচক্খানুভাৰতো পত্তব্বেন চেতোপরিযঞাণেন সম্পতি চিত্তৰিসেসং পস্সন্তো আসৰক্খযঞাণানুভাৰেন আসৰক্খযগামিনিযা পটিপদায ৰিগতসম্মোহত্তা আসৰক্খযায ধম্মং দেসেতি। তস্মা ইমিনানুক্কমেন ইমানি দস বলানি ৰুত্তানীতি ৰেদিতব্বানীতি।
Evamettha apubbatthānuvaṇṇanaṃ ñatvā idāni yasmā tathāgato paṭhamaṃyeva ṭhānāṭṭhānañāṇena veneyyasattānaṃ āsavakkhayādhigamassa ceva anadhigamassa ca ṭhānāṭṭhānabhūtaṃ kilesāvaraṇābhāvaṃ passati lokiyasammādiṭṭhiṭṭhānadassanato niyatamicchādiṭṭhiṭṭhānābhāvadassanato ca. Atha nesaṃ kammavipākañāṇena vipākāvaraṇābhāvaṃ passati tihetukapaṭisandhidassanato. Sabbatthagāminipaṭipadāñāṇena kammāvaraṇābhāvaṃ passati ānantarikakammābhāvadassanato. Evaṃ anāvaraṇānaṃ anekadhātunānādhātuñāṇena anukūladhammadesanatthaṃ cariyāvisesaṃ passati dhātuvemattadassanato. Atha nesaṃ nānādhimuttikatāñāṇena adhimuttiṃ passati payogaṃ anādiyitvāpi adhimuttivasena dhammadesanatthaṃ . Athevaṃ diṭṭhaadhimuttīnaṃ yathāsatti yathābalaṃ dhammaṃ desetuṃ indriyaparopariyattañāṇena indriyaparopariyattaṃ passati saddhādīnaṃ tikkhamudubhāvadassanato. Evaṃ pariññātindriyaparopariyattāpi panete sace dūre honti, atha jhānādiñāṇena jhānādīsu vasībhūtattā iddhivisesena khippaṃ upagacchati. Upagantvā ca nesaṃ pubbenivāsānussatiñāṇena pubbajātivibhāvanaṃ dibbacakkhānubhāvato pattabbena cetopariyañāṇena sampati cittavisesaṃ passanto āsavakkhayañāṇānubhāvena āsavakkhayagāminiyā paṭipadāya vigatasammohattā āsavakkhayāya dhammaṃ deseti. Tasmā iminānukkamena imāni dasa balāni vuttānīti veditabbānīti.
৪৫. ইদানি সব্ববলানি লক্খণতো নিদ্দিসিতুকামো কেনট্ঠেন সদ্ধাবলন্তিআদিনা নযেন পুচ্ছং কত্ৰা অস্সদ্ধিযে অকম্পিযট্ঠেনাতিআদিনা নযেন ৰিস্সজ্জনং অকাসি। তত্থ হিরীযতীতিআদি পুগ্গলাধিট্ঠানা দেসনা। ভাৰনাবলাদীসু অধিট্ঠানবলপরিযন্তেসু ‘‘তত্থা’’তি চ, ‘‘তেনা’’তি চ, ‘‘ত’’ন্তি চ নেক্খম্মাদিকমেৰ সন্ধায ৰুত্তন্তি ৰেদিতব্বং। তেন চিত্তং একগ্গন্তি তেন সমাধিনা চিত্তং একগ্গং হোতীতি ৰুত্তং হোতি। তত্থ জাতেতি তত্থ সমথে সম্পযোগৰসেন জাতে, তস্মিং ৰা ৰিপস্সনারম্মণং হুত্ৰা জাতে। তত্থ সিক্খতীতি তত্থ সেখবলে সেখো সিক্খতীতি সেখবলন্তি অত্থো। তত্থ সিক্খিতত্তাতি তত্থ অসেখবলে অসেখস্স সিক্খিতত্তা অসেখবলং। তেন আসৰা খীণাতি তেন লোকিযলোকুত্তরেন ঞাণেন আসৰা খীণাতি তং ঞাণং খীণাসৰবলং । লোকিযেনাপি হি ঞাণেন আসৰা খীণা নাম ৰিপস্সনায অভাৰে লোকুত্তরমগ্গাভাৰতো। এৰং খীণাসৰস্স বলন্তি খীণাসৰবলং। তস্স ইজ্ঝতীতি ইদ্ধিবলন্তি তস্স ইদ্ধিমতো ইজ্ঝতীতি ইদ্ধিযেৰ বলং ইদ্ধিবলং। অপ্পমেয্যট্ঠেনাতি যস্মা সাৰকা ঠানাট্ঠানাদীনি একদেসেন জানন্তি, সব্বাকারেন পজাননংযেৰ সন্ধায ‘‘যথাভূতং পজানাতী’’তি ৰুত্তং। কিঞ্চাপি তীসু ৰিজ্জাসু ‘‘যথাভূতং পজানাতী’’তি ন ৰুত্তং, অঞ্ঞত্থ পন ৰুত্তত্তা তাসুপি ৰুত্তমেৰ হোতি। অঞ্ঞত্থাতি সেসেসু সত্তসু ঞাণবলেসু চ অভিধম্মে (ৰিভ॰ ৭৬০) চ দসসুপি বলেসু। ইন্দ্রিযপরোপরিযত্তঞাণং পন সব্বথাপি সাৰকেহি অসাধারণমেৰ। তস্মা দসপি বলানি সাৰকেহি অসাধারণানীতি। অধিমত্তট্ঠেন অতুলিযট্ঠেন অপ্পমেয্যানি, তস্মাযেৰ চ ‘‘অপ্পমেয্যট্ঠেন তথাগতবল’’ন্তি ৰুত্তন্তি।
45. Idāni sabbabalāni lakkhaṇato niddisitukāmo kenaṭṭhena saddhābalantiādinā nayena pucchaṃ katvā assaddhiye akampiyaṭṭhenātiādinā nayena vissajjanaṃ akāsi. Tattha hirīyatītiādi puggalādhiṭṭhānā desanā. Bhāvanābalādīsu adhiṭṭhānabalapariyantesu ‘‘tatthā’’ti ca, ‘‘tenā’’ti ca, ‘‘ta’’nti ca nekkhammādikameva sandhāya vuttanti veditabbaṃ. Tena cittaṃ ekagganti tena samādhinā cittaṃ ekaggaṃ hotīti vuttaṃ hoti. Tattha jāteti tattha samathe sampayogavasena jāte, tasmiṃ vā vipassanārammaṇaṃ hutvā jāte. Tattha sikkhatīti tattha sekhabale sekho sikkhatīti sekhabalanti attho. Tattha sikkhitattāti tattha asekhabale asekhassa sikkhitattā asekhabalaṃ. Tena āsavā khīṇāti tena lokiyalokuttarena ñāṇena āsavā khīṇāti taṃ ñāṇaṃ khīṇāsavabalaṃ . Lokiyenāpi hi ñāṇena āsavā khīṇā nāma vipassanāya abhāve lokuttaramaggābhāvato. Evaṃ khīṇāsavassa balanti khīṇāsavabalaṃ. Tassa ijjhatīti iddhibalanti tassa iddhimato ijjhatīti iddhiyeva balaṃ iddhibalaṃ. Appameyyaṭṭhenāti yasmā sāvakā ṭhānāṭṭhānādīni ekadesena jānanti, sabbākārena pajānanaṃyeva sandhāya ‘‘yathābhūtaṃ pajānātī’’ti vuttaṃ. Kiñcāpi tīsu vijjāsu ‘‘yathābhūtaṃ pajānātī’’ti na vuttaṃ, aññattha pana vuttattā tāsupi vuttameva hoti. Aññatthāti sesesu sattasu ñāṇabalesu ca abhidhamme (vibha. 760) ca dasasupi balesu. Indriyaparopariyattañāṇaṃ pana sabbathāpi sāvakehi asādhāraṇameva. Tasmā dasapi balāni sāvakehi asādhāraṇānīti. Adhimattaṭṭhena atuliyaṭṭhena appameyyāni, tasmāyeva ca ‘‘appameyyaṭṭhena tathāgatabala’’nti vuttanti.
বলকথাৰণ্ণনা নিট্ঠিতা।
Balakathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / পটিসম্ভিদামগ্গপাল়ি • Paṭisambhidāmaggapāḷi / ৯. বলকথা • 9. Balakathā
