| Library / Tipiṭaka / তিপিটক • Tipiṭaka / পঞ্চপকরণ-মূলটীকা • Pañcapakaraṇa-mūlaṭīkā |
৩. ততিযৰগ্গো
3. Tatiyavaggo
১. বলকথাৰণ্ণনা
1. Balakathāvaṇṇanā
৩৫৪. ইন্দ্রিযপরোপরিযত্তং অসাধারণন্তি যথা নিদ্দেসতো ৰিত্থারতো সব্বং সব্বাকারং ঠানাট্ঠানাদিং অজানন্তাপি ‘‘অট্ঠানমেতং অনৰকাসো, যং দিট্ঠিসম্পন্নো পুগ্গলো কঞ্চি সঙ্খারং নিচ্চতো উপগচ্ছেয্যা’’তিআদিনা (অ॰ নি॰ ১.২৬৮) ঠানাট্ঠানানি উদ্দেসতো সঙ্খেপতো সাৰকা জানন্তি, ন এৰং ‘‘আসযং জানাতি অনুসযং জানাতী’’তিআদিনা (পটি॰ ম॰ ১.১১৩) উদ্দেসমত্তেনপি ইন্দ্রিযপরোপরিযত্তং জানন্তীতি ‘‘অসাধারণ’’ন্তি আহ। থেরেন পন সদ্ধাদীনং ইন্দ্রিযানং তিক্খমুদুভাৰজাননমত্তং সন্ধায ‘‘সত্তানং ইন্দ্রিযপরোপরিযত্তং যথাভূতং পজানামী’’তি (পটি॰ ম॰ ২.৪৪) ৰুত্তং, ন যথাৰুত্তং ইন্দ্রিযপরোপরিযত্তঞাণং তথাগতবলন্তি অযমেত্থ অধিপ্পাযো দট্ঠব্বো। ‘‘উদ্দেসতো ঠানাট্ঠানাদিমত্তজাননৰসেন পটিজানাতী’’তি ৰুত্তং, এৰং পন পটিজানন্তেন ‘‘তথাগতবলং সাৰকসাধারণ’’ন্তি ইদম্পি এৰমেৰ পটিঞ্ঞাতং সিযাতি কথমযং চোদেতব্বো সিযা।
354. Indriyaparopariyattaṃasādhāraṇanti yathā niddesato vitthārato sabbaṃ sabbākāraṃ ṭhānāṭṭhānādiṃ ajānantāpi ‘‘aṭṭhānametaṃ anavakāso, yaṃ diṭṭhisampanno puggalo kañci saṅkhāraṃ niccato upagaccheyyā’’tiādinā (a. ni. 1.268) ṭhānāṭṭhānāni uddesato saṅkhepato sāvakā jānanti, na evaṃ ‘‘āsayaṃ jānāti anusayaṃ jānātī’’tiādinā (paṭi. ma. 1.113) uddesamattenapi indriyaparopariyattaṃ jānantīti ‘‘asādhāraṇa’’nti āha. Therena pana saddhādīnaṃ indriyānaṃ tikkhamudubhāvajānanamattaṃ sandhāya ‘‘sattānaṃ indriyaparopariyattaṃ yathābhūtaṃ pajānāmī’’ti (paṭi. ma. 2.44) vuttaṃ, na yathāvuttaṃ indriyaparopariyattañāṇaṃ tathāgatabalanti ayamettha adhippāyo daṭṭhabbo. ‘‘Uddesato ṭhānāṭṭhānādimattajānanavasena paṭijānātī’’ti vuttaṃ, evaṃ pana paṭijānantena ‘‘tathāgatabalaṃ sāvakasādhāraṇa’’nti idampi evameva paṭiññātaṃ siyāti kathamayaṃ codetabbo siyā.
৩৫৬. সেসেসু পটিক্খেপো সকৰাদিস্স ঠানাট্ঠানঞাণাদীনং সাধারণাসাধারণত্তা তত্থ সাধারণপক্খং সন্ধাযাতি অধিপ্পাযো।
356. Sesesu paṭikkhepo sakavādissa ṭhānāṭṭhānañāṇādīnaṃ sādhāraṇāsādhāraṇattā tattha sādhāraṇapakkhaṃ sandhāyāti adhippāyo.
বলকথাৰণ্ণনা নিট্ঠিতা।
Balakathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (২১) ১. বলকথা • (21) 1. Balakathā
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ১. বলকথাৰণ্ণনা • 1. Balakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১. বলকথাৰণ্ণনা • 1. Balakathāvaṇṇanā
