| Library / Tipiṭaka / তিপিটক • Tipiṭaka / পঞ্চপকরণ-অনুটীকা • Pañcapakaraṇa-anuṭīkā |
৩. ততিযৰগ্গো
3. Tatiyavaggo
১. বলকথাৰণ্ণনা
1. Balakathāvaṇṇanā
৩৫৪. নিদ্দেসতোতি ‘‘অট্ঠানমেতং অনৰকাসো’’তিআদিনা নিদ্দিট্ঠপ্পকারতো। সো পন যস্মা ৰিত্থারো হোতি, তস্মা ৰুত্তং ‘‘ৰিত্থারতো’’তি। সব্বং কিলেসাৰরণাদিং, তমেৰ পচ্চেকং পৰত্তিআকারভেদতো সব্বাকারং। ‘‘সব্ব’’ন্তি হি ইদং সরূপতো গহণং, ‘‘সব্বাকারতো’’তি পৰত্তিআকারভেদতো। ভগৰা হি ধম্মে জানন্তো তেসং আকারভেদে অনৰসেসেত্ৰাৰ জানাতি। যথাহ ‘‘সব্বে ধম্মা সব্বাকারতো বুদ্ধস্স ভগৰতো ঞাণমুখে আপাথং আগচ্ছন্তী’’তি (মহানি॰ ১৫৬; চূল়নি॰ মোঘরাজমাণৰপুচ্ছানিদ্দেস ৮৫; পটি॰ ম॰ ৩.৫)। উদ্দেসতোতি একদেসতো। একদেসো চ ৰিত্থারো ন হোতীতি আহ ‘‘সঙ্খেপতো’’তি। যথা জানন্তীতি সম্বন্ধো। উদ্দেসমত্তেনপীতি দিট্ঠিগতযথাভূতঞাণাদিপ্পভেদানং আসযাদীনং উদ্দেসমত্তেনপি। তেনাহ ‘‘ইন্দ্রিযানং তিক্খমুদুভাৰজাননমত্তং সন্ধাযা’’তি। থেরেনাতি অনুরুদ্ধত্থেরেন। এৰমেৰাতি উদ্দেসতো ঠানাদিমত্তজাননাকারেনেৰ। স্ৰাযমত্থো সকৰাদিনাপি ইচ্ছিতোযেৰাতি আহ ‘‘কথমযং চোদেতব্বো সিযা’’তি।
354. Niddesatoti ‘‘aṭṭhānametaṃ anavakāso’’tiādinā niddiṭṭhappakārato. So pana yasmā vitthāro hoti, tasmā vuttaṃ ‘‘vitthārato’’ti. Sabbaṃ kilesāvaraṇādiṃ, tameva paccekaṃ pavattiākārabhedato sabbākāraṃ. ‘‘Sabba’’nti hi idaṃ sarūpato gahaṇaṃ, ‘‘sabbākārato’’ti pavattiākārabhedato. Bhagavā hi dhamme jānanto tesaṃ ākārabhede anavasesetvāva jānāti. Yathāha ‘‘sabbe dhammā sabbākārato buddhassa bhagavato ñāṇamukhe āpāthaṃ āgacchantī’’ti (mahāni. 156; cūḷani. mogharājamāṇavapucchāniddesa 85; paṭi. ma. 3.5). Uddesatoti ekadesato. Ekadeso ca vitthāro na hotīti āha ‘‘saṅkhepato’’ti. Yathā jānantīti sambandho. Uddesamattenapīti diṭṭhigatayathābhūtañāṇādippabhedānaṃ āsayādīnaṃ uddesamattenapi. Tenāha ‘‘indriyānaṃ tikkhamudubhāvajānanamattaṃ sandhāyā’’ti. Therenāti anuruddhattherena. Evamevāti uddesato ṭhānādimattajānanākāreneva. Svāyamattho sakavādināpi icchitoyevāti āha ‘‘kathamayaṃ codetabbo siyā’’ti.
৩৫৬. সেসেসূতি ইন্দ্রিযপরোপরিযত্তঞাণতো সেসেসু। পটিক্খেপোতি অসাধারণতাপটিক্খেপো। ননু চ সেসানং অসাধারণতাপি অত্থীতি চোদনং সন্ধাযাহ ‘‘ঠানা…পে॰… অধিপ্পাযো’’তি।
356. Sesesūti indriyaparopariyattañāṇato sesesu. Paṭikkhepoti asādhāraṇatāpaṭikkhepo. Nanu ca sesānaṃ asādhāraṇatāpi atthīti codanaṃ sandhāyāha ‘‘ṭhānā…pe… adhippāyo’’ti.
বলকথাৰণ্ণনা নিট্ঠিতা।
Balakathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (২১) ১. বলকথা • (21) 1. Balakathā
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ১. বলকথাৰণ্ণনা • 1. Balakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১. বলকথাৰণ্ণনা • 1. Balakathāvaṇṇanā
