| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā |
೩. ತತಿಯವಗ್ಗೋ
3. Tatiyavaggo
೧. ಬಲಕಥಾವಣ್ಣನಾ
1. Balakathāvaṇṇanā
೩೫೪. ಇನ್ದ್ರಿಯಪರೋಪರಿಯತ್ತಂ ಅಸಾಧಾರಣನ್ತಿ ಯಥಾ ನಿದ್ದೇಸತೋ ವಿತ್ಥಾರತೋ ಸಬ್ಬಂ ಸಬ್ಬಾಕಾರಂ ಠಾನಾಟ್ಠಾನಾದಿಂ ಅಜಾನನ್ತಾಪಿ ‘‘ಅಟ್ಠಾನಮೇತಂ ಅನವಕಾಸೋ, ಯಂ ದಿಟ್ಠಿಸಮ್ಪನ್ನೋ ಪುಗ್ಗಲೋ ಕಞ್ಚಿ ಸಙ್ಖಾರಂ ನಿಚ್ಚತೋ ಉಪಗಚ್ಛೇಯ್ಯಾ’’ತಿಆದಿನಾ (ಅ॰ ನಿ॰ ೧.೨೬೮) ಠಾನಾಟ್ಠಾನಾನಿ ಉದ್ದೇಸತೋ ಸಙ್ಖೇಪತೋ ಸಾವಕಾ ಜಾನನ್ತಿ, ನ ಏವಂ ‘‘ಆಸಯಂ ಜಾನಾತಿ ಅನುಸಯಂ ಜಾನಾತೀ’’ತಿಆದಿನಾ (ಪಟಿ॰ ಮ॰ ೧.೧೧೩) ಉದ್ದೇಸಮತ್ತೇನಪಿ ಇನ್ದ್ರಿಯಪರೋಪರಿಯತ್ತಂ ಜಾನನ್ತೀತಿ ‘‘ಅಸಾಧಾರಣ’’ನ್ತಿ ಆಹ। ಥೇರೇನ ಪನ ಸದ್ಧಾದೀನಂ ಇನ್ದ್ರಿಯಾನಂ ತಿಕ್ಖಮುದುಭಾವಜಾನನಮತ್ತಂ ಸನ್ಧಾಯ ‘‘ಸತ್ತಾನಂ ಇನ್ದ್ರಿಯಪರೋಪರಿಯತ್ತಂ ಯಥಾಭೂತಂ ಪಜಾನಾಮೀ’’ತಿ (ಪಟಿ॰ ಮ॰ ೨.೪೪) ವುತ್ತಂ, ನ ಯಥಾವುತ್ತಂ ಇನ್ದ್ರಿಯಪರೋಪರಿಯತ್ತಞಾಣಂ ತಥಾಗತಬಲನ್ತಿ ಅಯಮೇತ್ಥ ಅಧಿಪ್ಪಾಯೋ ದಟ್ಠಬ್ಬೋ। ‘‘ಉದ್ದೇಸತೋ ಠಾನಾಟ್ಠಾನಾದಿಮತ್ತಜಾನನವಸೇನ ಪಟಿಜಾನಾತೀ’’ತಿ ವುತ್ತಂ, ಏವಂ ಪನ ಪಟಿಜಾನನ್ತೇನ ‘‘ತಥಾಗತಬಲಂ ಸಾವಕಸಾಧಾರಣ’’ನ್ತಿ ಇದಮ್ಪಿ ಏವಮೇವ ಪಟಿಞ್ಞಾತಂ ಸಿಯಾತಿ ಕಥಮಯಂ ಚೋದೇತಬ್ಬೋ ಸಿಯಾ।
354. Indriyaparopariyattaṃasādhāraṇanti yathā niddesato vitthārato sabbaṃ sabbākāraṃ ṭhānāṭṭhānādiṃ ajānantāpi ‘‘aṭṭhānametaṃ anavakāso, yaṃ diṭṭhisampanno puggalo kañci saṅkhāraṃ niccato upagaccheyyā’’tiādinā (a. ni. 1.268) ṭhānāṭṭhānāni uddesato saṅkhepato sāvakā jānanti, na evaṃ ‘‘āsayaṃ jānāti anusayaṃ jānātī’’tiādinā (paṭi. ma. 1.113) uddesamattenapi indriyaparopariyattaṃ jānantīti ‘‘asādhāraṇa’’nti āha. Therena pana saddhādīnaṃ indriyānaṃ tikkhamudubhāvajānanamattaṃ sandhāya ‘‘sattānaṃ indriyaparopariyattaṃ yathābhūtaṃ pajānāmī’’ti (paṭi. ma. 2.44) vuttaṃ, na yathāvuttaṃ indriyaparopariyattañāṇaṃ tathāgatabalanti ayamettha adhippāyo daṭṭhabbo. ‘‘Uddesato ṭhānāṭṭhānādimattajānanavasena paṭijānātī’’ti vuttaṃ, evaṃ pana paṭijānantena ‘‘tathāgatabalaṃ sāvakasādhāraṇa’’nti idampi evameva paṭiññātaṃ siyāti kathamayaṃ codetabbo siyā.
೩೫೬. ಸೇಸೇಸು ಪಟಿಕ್ಖೇಪೋ ಸಕವಾದಿಸ್ಸ ಠಾನಾಟ್ಠಾನಞಾಣಾದೀನಂ ಸಾಧಾರಣಾಸಾಧಾರಣತ್ತಾ ತತ್ಥ ಸಾಧಾರಣಪಕ್ಖಂ ಸನ್ಧಾಯಾತಿ ಅಧಿಪ್ಪಾಯೋ।
356. Sesesu paṭikkhepo sakavādissa ṭhānāṭṭhānañāṇādīnaṃ sādhāraṇāsādhāraṇattā tattha sādhāraṇapakkhaṃ sandhāyāti adhippāyo.
ಬಲಕಥಾವಣ್ಣನಾ ನಿಟ್ಠಿತಾ।
Balakathāvaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / (೨೧) ೧. ಬಲಕಥಾ • (21) 1. Balakathā
ಅಟ್ಠಕಥಾ • Aṭṭhakathā / ಅಭಿಧಮ್ಮಪಿಟಕ (ಅಟ್ಠಕಥಾ) • Abhidhammapiṭaka (aṭṭhakathā) / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā / ೧. ಬಲಕಥಾವಣ್ಣನಾ • 1. Balakathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೧. ಬಲಕಥಾವಣ್ಣನಾ • 1. Balakathāvaṇṇanā
