| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ • Majjhimanikāya |
༩. བཱལཔཎྜིཏསུཏྟཾ
9. Bālapaṇḍitasuttaṃ
༢༤༦. ཨེཝཾ མེ སུཏཾ – ཨེཀཾ སམཡཾ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏཏྲ ཁོ བྷགཝཱ བྷིཀྑཱུ ཨཱམནྟེསི – ‘‘བྷིཀྑཝོ’’ཏི། ‘‘བྷདནྟེ’’ཏི ཏེ བྷིཀྑཱུ བྷགཝཏོ པཙྩསྶོསུཾ། བྷགཝཱ ཨེཏདཝོཙ –
246. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘ཏཱིཎིམཱནི, བྷིཀྑཝེ, བཱལསྶ བཱལལཀྑཎཱནི བཱལནིམིཏྟཱནི བཱལཱཔདཱནཱནི། ཀཏམཱནི ཏཱིཎི? ཨིདྷ, བྷིཀྑཝེ, བཱལོ དུཙྩིནྟིཏཙིནྟཱི ཙ ཧོཏི དུབྦྷཱསིཏབྷཱསཱི ཙ དུཀྐཊཀམྨཀཱརཱི ཙ། ནོ ཙེཏཾ 1, བྷིཀྑཝེ, བཱལོ དུཙྩིནྟིཏཙིནྟཱི ཙ ཨབྷཝིསྶ དུབྦྷཱསིཏབྷཱསཱི ཙ དུཀྐཊཀམྨཀཱརཱི ཙ ཀེན ནཾ 2 པཎྜིཏཱ ཛཱནེཡྻུཾ – ‘བཱལོ ཨཡཾ བྷཝཾ ཨསཔྤུརིསོ’ཏི? ཡསྨཱ ཙ ཁོ, བྷིཀྑཝེ, བཱལོ དུཙྩིནྟིཏཙིནྟཱི ཙ ཧོཏི དུབྦྷཱསིཏབྷཱསཱི ཙ དུཀྐཊཀམྨཀཱརཱི ཙ ཏསྨཱ ནཾ པཎྜིཏཱ ཛཱནནྟི – ‘བཱལོ ཨཡཾ བྷཝཾ ཨསཔྤུརིསོ’ཏི། ས ཁོ སོ, བྷིཀྑཝེ, བཱལོ ཏིཝིདྷཾ དིཊྛེཝ དྷམྨེ དུཀྑཾ དོམནསྶཾ པཊིསཾཝེདེཏི། སཙེ, བྷིཀྑཝེ, བཱལོ སབྷཱཡཾ ཝཱ ནིསིནྣོ ཧོཏི, རཐིཀཱཡ 3 ཝཱ ནིསིནྣོ ཧོཏི, སིངྒྷཱཊཀེ ཝཱ ནིསིནྣོ ཧོཏི; ཏཏྲ ཙེ ཛནོ ཏཛྫཾ ཏསྶཱརུཔྤཾ ཀཐཾ མནྟེཏི། སཙེ, བྷིཀྑཝེ, བཱལོ པཱཎཱཏིཔཱཏཱི ཧོཏི, ཨདིནྣཱདཱཡཱི ཧོཏི, ཀཱམེསུམིཙྪཱཙཱརཱི ཧོཏི, མུསཱཝཱདཱི ཧོཏི, སུརཱམེརཡམཛྫཔམཱདཊྛཱཡཱི ཧོཏི, ཏཏྲ, བྷིཀྑཝེ, བཱལསྶ ཨེཝཾ ཧོཏི – ‘ཡཾ ཁོ ཛནོ ཏཛྫཾ ཏསྶཱརུཔྤཾ ཀཐཾ མནྟེཏི, སཾཝིཛྫནྟེཝ ཏེ 4 དྷམྨཱ མཡི, ཨཧཉྩ ཏེསུ དྷམྨེསུ སནྡིསྶཱམཱི’ཏི། ཨིདཾ, བྷིཀྑཝེ, བཱལོ པཋམཾ དིཊྛེཝ དྷམྨེ དུཀྑཾ དོམནསྶཾ པཊིསཾཝེདེཏི།
‘‘Tīṇimāni, bhikkhave, bālassa bālalakkhaṇāni bālanimittāni bālāpadānāni. Katamāni tīṇi? Idha, bhikkhave, bālo duccintitacintī ca hoti dubbhāsitabhāsī ca dukkaṭakammakārī ca. No cetaṃ 5, bhikkhave, bālo duccintitacintī ca abhavissa dubbhāsitabhāsī ca dukkaṭakammakārī ca kena naṃ 6 paṇḍitā jāneyyuṃ – ‘bālo ayaṃ bhavaṃ asappuriso’ti? Yasmā ca kho, bhikkhave, bālo duccintitacintī ca hoti dubbhāsitabhāsī ca dukkaṭakammakārī ca tasmā naṃ paṇḍitā jānanti – ‘bālo ayaṃ bhavaṃ asappuriso’ti. Sa kho so, bhikkhave, bālo tividhaṃ diṭṭheva dhamme dukkhaṃ domanassaṃ paṭisaṃvedeti. Sace, bhikkhave, bālo sabhāyaṃ vā nisinno hoti, rathikāya 7 vā nisinno hoti, siṅghāṭake vā nisinno hoti; tatra ce jano tajjaṃ tassāruppaṃ kathaṃ manteti. Sace, bhikkhave, bālo pāṇātipātī hoti, adinnādāyī hoti, kāmesumicchācārī hoti, musāvādī hoti, surāmerayamajjapamādaṭṭhāyī hoti, tatra, bhikkhave, bālassa evaṃ hoti – ‘yaṃ kho jano tajjaṃ tassāruppaṃ kathaṃ manteti, saṃvijjanteva te 8 dhammā mayi, ahañca tesu dhammesu sandissāmī’ti. Idaṃ, bhikkhave, bālo paṭhamaṃ diṭṭheva dhamme dukkhaṃ domanassaṃ paṭisaṃvedeti.
༢༤༧. ‘‘པུན ཙཔརཾ, བྷིཀྑཝེ, བཱལོ པསྶཏི རཱཛཱནོ ཙོརཾ ཨཱགུཙཱརིཾ གཧེཏྭཱ ཝིཝིདྷཱ ཀམྨཀཱརཎཱ ཀཱརེནྟེ – ཀསཱཧིཔི ཏཱལེ༹ནྟེ ཝེཏྟེཧིཔི ཏཱལེ༹ནྟེ ཨདྡྷདཎྜཀེཧིཔི ཏཱལེ༹ནྟེ ཧཏྠམྤི ཚིནྡནྟེ པཱདམྤི ཚིནྡནྟེ ཧཏྠཔཱདམྤི ཚིནྡནྟེ ཀཎྞམྤི ཚིནྡནྟེ ནཱསམྤི ཚིནྡནྟེ ཀཎྞནཱསམྤི ཚིནྡནྟེ བིལངྒཐཱལིཀམྤི ཀརོནྟེ སངྑམུཎྜིཀམྤི ཀརོནྟེ རཱཧུམུཁམྤི ཀརོནྟེ ཛོཏིམཱལིཀམྤི ཀརོནྟེ ཧཏྠཔཛྫོཏིཀམྤི ཀརོནྟེ ཨེརཀཝཏྟིཀམྤི ཀརོནྟེ ཙཱིརཀཝཱསིཀམྤི ཀརོནྟེ ཨེཎེཡྻཀམྤི ཀརོནྟེ བལི༹སམཾསིཀམྤི ཀརོནྟེ ཀཧཱཔཎིཀམྤི ཀརོནྟེ ཁཱརཱཔཏཙྪིཀམྤི 9 ཀརོནྟེ པལིགྷཔརིཝཏྟིཀམྤི ཀརོནྟེ པལཱལཔཱིཋཀམྤི 10 ཀརོནྟེ ཏཏྟེནཔི ཏེལེན ཨོསིཉྩནྟེ སུནཁེཧིཔི ཁཱདཱཔེནྟེ ཛཱིཝནྟམྤི སཱུལེ ཨུཏྟཱསེནྟེ ཨསིནཱཔི སཱིསཾ ཚིནྡནྟེ། ཏཏྲ, བྷིཀྑཝེ, བཱལསྶ ཨེཝཾ ཧོཏི – ‘ཡཐཱརཱུཔཱནཾ ཁོ པཱཔཀཱནཾ ཀམྨཱནཾ ཧེཏུ རཱཛཱནོ ཙོརཾ ཨཱགུཙཱརིཾ གཧེཏྭཱ ཝིཝིདྷཱ ཀམྨཀཱརཎཱ ཀཱརེནྟི – ཀསཱཧིཔི ཏཱལེ༹ནྟི…པེ॰… ཨསིནཱཔི སཱིསཾ ཚིནྡནྟི; སཾཝིཛྫནྟེཝ ཏེ དྷམྨཱ མཡི, ཨཧཉྩ ཏེསུ དྷམྨེསུ སནྡིསྶཱམི། མཾ ཙེཔི རཱཛཱནོ 11 ཛཱནེཡྻུཾ, མམྤི རཱཛཱནོ གཧེཏྭཱ ཝིཝིདྷཱ ཀམྨཀཱརཎཱ ཀཱརེཡྻུཾ – ཀསཱཧིཔི ཏཱལེ༹ཡྻུཾ…པེ॰… ཛཱིཝནྟམྤི སཱུལེ ཨུཏྟཱསེཡྻུཾ, ཨསིནཱཔི སཱིསཾ ཚིནྡེཡྻུ’ནྟི། ཨིདམྤི, བྷིཀྑཝེ, བཱལོ དུཏིཡཾ དིཊྛེཝ དྷམྨེ དུཀྑཾ དོམནསྶཾ པཊིསཾཝེདེཏི།
247. ‘‘Puna caparaṃ, bhikkhave, bālo passati rājāno coraṃ āgucāriṃ gahetvā vividhā kammakāraṇā kārente – kasāhipi tāḷente vettehipi tāḷente addhadaṇḍakehipi tāḷente hatthampi chindante pādampi chindante hatthapādampi chindante kaṇṇampi chindante nāsampi chindante kaṇṇanāsampi chindante bilaṅgathālikampi karonte saṅkhamuṇḍikampi karonte rāhumukhampi karonte jotimālikampi karonte hatthapajjotikampi karonte erakavattikampi karonte cīrakavāsikampi karonte eṇeyyakampi karonte baḷisamaṃsikampi karonte kahāpaṇikampi karonte khārāpatacchikampi 12 karonte palighaparivattikampi karonte palālapīṭhakampi 13 karonte tattenapi telena osiñcante sunakhehipi khādāpente jīvantampi sūle uttāsente asināpi sīsaṃ chindante. Tatra, bhikkhave, bālassa evaṃ hoti – ‘yathārūpānaṃ kho pāpakānaṃ kammānaṃ hetu rājāno coraṃ āgucāriṃ gahetvā vividhā kammakāraṇā kārenti – kasāhipi tāḷenti…pe… asināpi sīsaṃ chindanti; saṃvijjanteva te dhammā mayi, ahañca tesu dhammesu sandissāmi. Maṃ cepi rājāno 14 jāneyyuṃ, mampi rājāno gahetvā vividhā kammakāraṇā kāreyyuṃ – kasāhipi tāḷeyyuṃ…pe… jīvantampi sūle uttāseyyuṃ, asināpi sīsaṃ chindeyyu’nti. Idampi, bhikkhave, bālo dutiyaṃ diṭṭheva dhamme dukkhaṃ domanassaṃ paṭisaṃvedeti.
༢༤༨. ‘‘པུན ཙཔརཾ, བྷིཀྑཝེ, བཱལཾ པཱིཋསམཱརཱུལ༹ྷཾ ཝཱ མཉྩསམཱརཱུལ༹ྷཾ ཝཱ ཚམཱཡཾ 15 ཝཱ སེམཱནཾ, ཡཱནིསྶ པུབྦེ པཱཔཀཱནི ཀམྨཱནི ཀཏཱནི ཀཱཡེན དུཙྩརིཏཱནི ཝཱཙཱཡ དུཙྩརིཏཱནི མནསཱ དུཙྩརིཏཱནི ཏཱནིསྶ ཏམྷི སམཡེ ཨོལམྦནྟི ཨཛ྄ཛྷོལམྦནྟི ཨབྷིཔྤལམྦནྟི། སེཡྻཐཱཔི, བྷིཀྑཝེ, མཧཏཾ པབྦཏཀཱུཊཱནཾ ཚཱཡཱ སཱཡནྷསམཡཾ པཐཝིཡཱ ཨོལམྦནྟི ཨཛ྄ཛྷོལམྦནྟི ཨབྷིཔྤལམྦནྟི; ཨེཝམེཝ ཁོ, བྷིཀྑཝེ, བཱལཾ པཱིཋསམཱརཱུལ༹ྷཾ ཝཱ མཉྩསམཱརཱུལ༹ྷཾ ཝཱ ཚམཱཡཾ ཝཱ སེམཱནཾ, ཡཱནིསྶ པུབྦེ པཱཔཀཱནི ཀམྨཱནི ཀཏཱནི ཀཱཡེན དུཙྩརིཏཱནི ཝཱཙཱཡ དུཙྩརིཏཱནི མནསཱ དུཙྩརིཏཱནི ཏཱནིསྶ ཏམྷི སམཡེ ཨོལམྦནྟི ཨཛ྄ཛྷོལམྦནྟི ཨབྷིཔྤལམྦནྟི། ཏཏྲ, བྷིཀྑཝེ, བཱལསྶ ཨེཝཾ ཧོཏི – ‘ཨཀཏཾ ཝཏ མེ ཀལྱཱཎཾ, ཨཀཏཾ ཀུསལཾ, ཨཀཏཾ བྷཱིརུཏྟཱཎཾ; ཀཏཾ པཱཔཾ, ཀཏཾ ལུདྡཾ, ཀཏཾ ཀིབྦིསཾ། ཡཱཝཏཱ, བྷོ, ཨཀཏཀལྱཱཎཱནཾ ཨཀཏཀུསལཱནཾ ཨཀཏབྷཱིརུཏྟཱཎཱནཾ ཀཏཔཱཔཱནཾ ཀཏལུདྡཱནཾ ཀཏཀིབྦིསཱནཾ གཏི ཏཾ གཏིཾ པེཙྩ གཙྪཱམཱི’ཏི། སོ སོཙཏི ཀིལམཏི པརིདེཝཏི ཨུརཏྟཱལི༹ཾ ཀནྡཏི སམྨོཧཾ ཨཱཔཛྫཏི། ཨིདམྤི, བྷིཀྑཝེ, བཱལོ ཏཏིཡཾ དིཊྛེཝ དྷམྨེ དུཀྑཾ དོམནསྶཾ པཊིསཾཝེདེཏི།
248. ‘‘Puna caparaṃ, bhikkhave, bālaṃ pīṭhasamārūḷhaṃ vā mañcasamārūḷhaṃ vā chamāyaṃ 16 vā semānaṃ, yānissa pubbe pāpakāni kammāni katāni kāyena duccaritāni vācāya duccaritāni manasā duccaritāni tānissa tamhi samaye olambanti ajjholambanti abhippalambanti. Seyyathāpi, bhikkhave, mahataṃ pabbatakūṭānaṃ chāyā sāyanhasamayaṃ pathaviyā olambanti ajjholambanti abhippalambanti; evameva kho, bhikkhave, bālaṃ pīṭhasamārūḷhaṃ vā mañcasamārūḷhaṃ vā chamāyaṃ vā semānaṃ, yānissa pubbe pāpakāni kammāni katāni kāyena duccaritāni vācāya duccaritāni manasā duccaritāni tānissa tamhi samaye olambanti ajjholambanti abhippalambanti. Tatra, bhikkhave, bālassa evaṃ hoti – ‘akataṃ vata me kalyāṇaṃ, akataṃ kusalaṃ, akataṃ bhīruttāṇaṃ; kataṃ pāpaṃ, kataṃ luddaṃ, kataṃ kibbisaṃ. Yāvatā, bho, akatakalyāṇānaṃ akatakusalānaṃ akatabhīruttāṇānaṃ katapāpānaṃ kataluddānaṃ katakibbisānaṃ gati taṃ gatiṃ pecca gacchāmī’ti. So socati kilamati paridevati urattāḷiṃ kandati sammohaṃ āpajjati. Idampi, bhikkhave, bālo tatiyaṃ diṭṭheva dhamme dukkhaṃ domanassaṃ paṭisaṃvedeti.
‘‘ས ཁོ སོ, བྷིཀྑཝེ, བཱལོ ཀཱཡེན དུཙྩརིཏཾ ཙརིཏྭཱ ཝཱཙཱཡ དུཙྩརིཏཾ ཙརིཏྭཱ མནསཱ དུཙྩརིཏཾ ཙརིཏྭཱ ཀཱཡསྶ བྷེདཱ པརཾ མརཎཱ ཨཔཱཡཾ དུགྒཏིཾ ཝིནིཔཱཏཾ ནིརཡཾ ཨུཔཔཛྫཏི། ཡཾ ཁོ ཏཾ, བྷིཀྑཝེ, སམྨཱ ཝདམཱནོ ཝདེཡྻ – ‘ཨེཀནྟཾ ཨནིཊྛཾ ཨེཀནྟཾ ཨཀནྟཾ ཨེཀནྟཾ ཨམནཱཔ’ནྟི, ནིརཡམེཝ ཏཾ སམྨཱ ཝདམཱནོ ཝདེཡྻ – ‘ཨེཀནྟཾ ཨནིཊྛཾ ཨེཀནྟཾ ཨཀནྟཾ ཨེཀནྟཾ ཨམནཱཔ’ནྟི། ཡཱཝཉྩིདཾ, བྷིཀྑཝེ, ཨུཔམཱཔི 17 ན སུཀརཱ ཡཱཝ དུཀྑཱ ནིརཡཱ’’ཏི།
‘‘Sa kho so, bhikkhave, bālo kāyena duccaritaṃ caritvā vācāya duccaritaṃ caritvā manasā duccaritaṃ caritvā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati. Yaṃ kho taṃ, bhikkhave, sammā vadamāno vadeyya – ‘ekantaṃ aniṭṭhaṃ ekantaṃ akantaṃ ekantaṃ amanāpa’nti, nirayameva taṃ sammā vadamāno vadeyya – ‘ekantaṃ aniṭṭhaṃ ekantaṃ akantaṃ ekantaṃ amanāpa’nti. Yāvañcidaṃ, bhikkhave, upamāpi 18 na sukarā yāva dukkhā nirayā’’ti.
༢༤༩. ཨེཝཾ ཝུཏྟེ, ཨཉྙཏརོ བྷིཀྑུ བྷགཝནྟཾ ཨེཏདཝོཙ – ‘‘སཀྐཱ པན, བྷནྟེ, ཨུཔམཾ ཀཱཏུ’’ནྟི? ‘‘སཀྐཱ བྷིཀྑཱུ’’ཏི བྷགཝཱ ཨཝོཙ། སེཡྻཐཱཔི, བྷིཀྑུ, ཙོརཾ ཨཱགུཙཱརིཾ གཧེཏྭཱ རཉྙོ དསྶེཡྻུཾ – ‘ཨཡཾ ཁོ, དེཝ, ཙོརོ ཨཱགུཙཱརཱི, ཨིམསྶ ཡཾ ཨིཙྪསི ཏཾ དཎྜཾ པཎེཧཱི’ཏི། ཏམེནཾ རཱཛཱ ཨེཝཾ ཝདེཡྻ – ‘གཙྪཐ, བྷོ, ཨིམཾ པུརིསཾ པུབྦཎྷསམཡཾ སཏྟིསཏེན ཧནཐཱ’ཏི ། ཏམེནཾ པུབྦཎྷསམཡཾ སཏྟིསཏེན ཧནེཡྻུཾ། ཨཐ རཱཛཱ མཛ྄ཛྷནྷིཀསམཡཾ 19 ཨེཝཾ ཝདེཡྻ – ‘ཨམྦྷོ, ཀཐཾ སོ པུརིསོ’ཏི? ‘‘‘ཏཐེཝ, དེཝ, ཛཱིཝཏཱི’ཏི། ཏམེནཾ རཱཛཱ ཨེཝཾ ཝདེཡྻ – ‘གཙྪཐ, བྷོ, ཏཾ པུརིསཾ མཛ྄ཛྷནྷིཀསམཡཾ སཏྟིསཏེན ཧནཐཱ’ཏི། ཏམེནཾ མཛ྄ཛྷནྷིཀསམཡཾ སཏྟིསཏེན ཧནེཡྻུཾ། ཨཐ རཱཛཱ སཱཡནྷསམཡཾ ཨེཝཾ ཝདེཡྻ – ‘ཨམྦྷོ, ཀཐཾ སོ པུརིསོ’ཏི? ‘ཏཐེཝ, དེཝ, ཛཱིཝཏཱི’ཏི། ཏམེནཾ རཱཛཱ ཨེཝཾ ཝདེཡྻ – ‘གཙྪཐ, བྷོ, ཏཾ པུརིསཾ སཱཡནྷསམཡཾ སཏྟིསཏེན ཧནཐཱ’ཏི། ཏམེནཾ སཱཡནྷསམཡཾ སཏྟིསཏེན ཧནེཡྻུཾ། ཏཾ ཀིཾ མཉྙཐ , བྷིཀྑཝེ, ཨཔི ནུ སོ པུརིསོ ཏཱིཧི སཏྟིསཏེཧི ཧཉྙམཱནོ ཏཏོནིདཱནཾ དུཀྑཾ དོམནསྶཾ པཊིསཾཝེདིཡེཐཱ’’ཏི? ‘‘ཨེཀིསྶཱཔི, བྷནྟེ, སཏྟིཡཱ ཧཉྙམཱནོ སོ པུརིསོ ཏཏོནིདཱནཾ དུཀྑཾ དོམནསྶཾ པཊིསཾཝེདིཡེཐ, ཀོ པན ཝཱདོ ཏཱིཧི སཏྟིསཏེཧཱི’’ཏི?
249. Evaṃ vutte, aññataro bhikkhu bhagavantaṃ etadavoca – ‘‘sakkā pana, bhante, upamaṃ kātu’’nti? ‘‘Sakkā bhikkhū’’ti bhagavā avoca. Seyyathāpi, bhikkhu, coraṃ āgucāriṃ gahetvā rañño dasseyyuṃ – ‘ayaṃ kho, deva, coro āgucārī, imassa yaṃ icchasi taṃ daṇḍaṃ paṇehī’ti. Tamenaṃ rājā evaṃ vadeyya – ‘gacchatha, bho, imaṃ purisaṃ pubbaṇhasamayaṃ sattisatena hanathā’ti . Tamenaṃ pubbaṇhasamayaṃ sattisatena haneyyuṃ. Atha rājā majjhanhikasamayaṃ 20 evaṃ vadeyya – ‘ambho, kathaṃ so puriso’ti? ‘‘‘Tatheva, deva, jīvatī’ti. Tamenaṃ rājā evaṃ vadeyya – ‘gacchatha, bho, taṃ purisaṃ majjhanhikasamayaṃ sattisatena hanathā’ti. Tamenaṃ majjhanhikasamayaṃ sattisatena haneyyuṃ. Atha rājā sāyanhasamayaṃ evaṃ vadeyya – ‘ambho, kathaṃ so puriso’ti? ‘Tatheva, deva, jīvatī’ti. Tamenaṃ rājā evaṃ vadeyya – ‘gacchatha, bho, taṃ purisaṃ sāyanhasamayaṃ sattisatena hanathā’ti. Tamenaṃ sāyanhasamayaṃ sattisatena haneyyuṃ. Taṃ kiṃ maññatha , bhikkhave, api nu so puriso tīhi sattisatehi haññamāno tatonidānaṃ dukkhaṃ domanassaṃ paṭisaṃvediyethā’’ti? ‘‘Ekissāpi, bhante, sattiyā haññamāno so puriso tatonidānaṃ dukkhaṃ domanassaṃ paṭisaṃvediyetha, ko pana vādo tīhi sattisatehī’’ti?
༢༥༠. ཨཐ ཁོ བྷགཝཱ པརིཏྟཾ པཱཎིམཏྟཾ པཱསཱཎཾ གཧེཏྭཱ བྷིཀྑཱུ ཨཱམནྟེསི – ‘‘ཏཾ ཀིཾ མཉྙཐ, བྷིཀྑཝེ, ཀཏམོ ནུ ཁོ མཧནྟཏརོ – ཡོ ཙཱཡཾ མཡཱ པརིཏྟོ པཱཎིམཏྟོ པཱསཱཎོ གཧིཏོ, ཡོ ཙ ཧིམཝཱ པབྦཏརཱཛཱ’’ཏི? ‘‘ཨཔྤམཏྟཀོ ཨཡཾ, བྷནྟེ, བྷགཝཏཱ པརིཏྟོ པཱཎིམཏྟོ པཱསཱཎོ གཧིཏོ, ཧིམཝནྟཾ པབྦཏརཱཛཱནཾ ཨུཔནིདྷཱཡ སངྑམྤི ན ཨུཔེཏི, ཀལབྷཱགམྤི ན ཨུཔེཏི, ཨུཔནིདྷམྤི 21 ན ཨུཔེཏི’’། ‘‘ཨེཝམེཝ ཁོ, བྷིཀྑཝེ, ཡཾ སོ པུརིསོ ཏཱིཧི སཏྟིསཏེཧི ཧཉྙམཱནོ ཏཏོནིདཱནཾ དུཀྑཾ དོམནསྶཾ པཊིསཾཝེདེཏི ཏཾ ནིརཡཀསྶ དུཀྑསྶ ཨུཔནིདྷཱཡ སངྑམྤི ན ཨུཔེཏི, ཀལབྷཱགམྤི ན ཨུཔེཏི, ཨུཔནིདྷམྤི ན ཨུཔེཏི’’།
250. Atha kho bhagavā parittaṃ pāṇimattaṃ pāsāṇaṃ gahetvā bhikkhū āmantesi – ‘‘taṃ kiṃ maññatha, bhikkhave, katamo nu kho mahantataro – yo cāyaṃ mayā paritto pāṇimatto pāsāṇo gahito, yo ca himavā pabbatarājā’’ti? ‘‘Appamattako ayaṃ, bhante, bhagavatā paritto pāṇimatto pāsāṇo gahito, himavantaṃ pabbatarājānaṃ upanidhāya saṅkhampi na upeti, kalabhāgampi na upeti, upanidhampi 22 na upeti’’. ‘‘Evameva kho, bhikkhave, yaṃ so puriso tīhi sattisatehi haññamāno tatonidānaṃ dukkhaṃ domanassaṃ paṭisaṃvedeti taṃ nirayakassa dukkhassa upanidhāya saṅkhampi na upeti, kalabhāgampi na upeti, upanidhampi na upeti’’.
‘‘ཏམེནཾ, བྷིཀྑཝེ, ནིརཡཔཱལཱ པཉྩཝིདྷབནྡྷནཾ ནཱམ ཀམྨཀཱརཎཾ ཀརོནྟི – ཏཏྟཾ ཨཡོཁིལཾ 23 ཧཏྠེ གམེནྟི, ཏཏྟཾ ཨཡོཁིལཾ དུཏིཡེ ཧཏྠེ གམེནྟི, ཏཏྟཾ ཨཡོཁིལཾ པཱདེ གམེནྟི, ཏཏྟཾ ཨཡོཁིལཾ དུཏིཡེ པཱདེ གམེནྟི, ཏཏྟཾ ཨཡོཁིལཾ མཛ྄ཛྷེ ཨུརསྨིཾ གམེནྟི། སོ ཏཏྠ དུཀྑཱ ཏིབྦཱ ཁརཱ ཀཊུཀཱ ཝེདནཱ ཝེདེཏི, ན ཙ ཏཱཝ ཀཱལཾ ཀརོཏི ཡཱཝ ན ཏཾ པཱཔཀམྨཾ བྱནྟཱིཧོཏི 24། ཏམེནཾ, བྷིཀྑཝེ, ནིརཡཔཱལཱ སཾཝེསེཏྭཱ ཀུཋཱརཱིཧི 25 ཏཙྪནྟི། སོ ཏཏྠ དུཀྑཱ ཏིབྦཱ…པེ॰… བྱནྟཱིཧོཏི། ཏམེནཾ, བྷིཀྑཝེ, ནིརཡཔཱལཱ ཨུདྡྷཾཔཱདཾ ཨདྷོསིརཾ གཧེཏྭཱ ཝཱསཱིཧི ཏཙྪནྟི། སོ ཏཏྠ དུཀྑཱ ཏིབྦཱ…པེ॰… བྱནྟཱིཧོཏི། ཏམེནཾ, བྷིཀྑཝེ, ནིརཡཔཱལཱ རཐེ ཡོཛེཏྭཱ ཨཱདིཏྟཱཡ པཐཝིཡཱ སམྤཛྫལིཏཱཡ སཛོཏིབྷཱུཏཱཡ 26 སཱརེནྟིཔི པཙྩཱསཱརེནྟིཔི ། སོ ཏཏྠ དུཀྑཱ ཏིབྦཱ…པེ॰… བྱནྟཱིཧོཏི། ཏམེནཾ, བྷིཀྑཝེ, ནིརཡཔཱལཱ མཧནྟཾ ཨངྒཱརཔབྦཏཾ ཨཱདིཏྟཾ སམྤཛྫལིཏཾ སཛོཏིབྷཱུཏཾ ཨཱརོཔེནྟིཔི ཨོརོཔེནྟིཔི། སོ ཏཏྠ དུཀྑཱ ཏིབྦཱ ཁརཱ ཀཊུཀཱ ཝེདནཱ ཝེདེཏི, ན ཙ ཏཱཝ ཀཱལཾ ཀརོཏི ཡཱཝ ན ཏཾ པཱཔཀམྨཾ བྱནྟཱིཧོཏི། ཏམེནཾ, བྷིཀྑཝེ, ནིརཡཔཱལཱ ཨུདྡྷཾཔཱདཾ ཨདྷོསིརཾ གཧེཏྭཱ ཏཏྟཱཡ ལོཧཀུམྦྷིཡཱ པཀྑིཔནྟི ཨཱདིཏྟཱཡ སམྤཛྫལིཏཱཡ སཛོཏིབྷཱུཏཱཡ། སོ ཏཏྠ ཕེཎུདྡེཧཀཾ པཙྩཏི། སོ ཏཏྠ ཕེཎུདྡེཧཀཾ པཙྩམཱནོ སཀིམྤི ཨུདྡྷཾ གཙྪཏི, སཀིམྤི ཨདྷོ གཙྪཏི, སཀིམྤི ཏིརིཡཾ གཙྪཏི། སོ ཏཏྠ དུཀྑཱ ཏིབྦཱ ཁརཱ ཀཊུཀཱ ཝེདནཱ ཝེདེཏི, ན ཙ ཏཱཝ ཀཱལངྐརོཏི ཡཱཝ ན ཏཾ པཱཔཀམྨཾ བྱནྟཱིཧོཏི། ཏམེནཾ, བྷིཀྑཝེ, ནིརཡཔཱལཱ 27 མཧཱནིརཡེ པཀྑིཔནྟི། སོ ཁོ པན, བྷིཀྑཝེ, མཧཱནིརཡོ –
‘‘Tamenaṃ, bhikkhave, nirayapālā pañcavidhabandhanaṃ nāma kammakāraṇaṃ karonti – tattaṃ ayokhilaṃ 28 hatthe gamenti, tattaṃ ayokhilaṃ dutiye hatthe gamenti, tattaṃ ayokhilaṃ pāde gamenti, tattaṃ ayokhilaṃ dutiye pāde gamenti, tattaṃ ayokhilaṃ majjhe urasmiṃ gamenti. So tattha dukkhā tibbā kharā kaṭukā vedanā vedeti, na ca tāva kālaṃ karoti yāva na taṃ pāpakammaṃ byantīhoti 29. Tamenaṃ, bhikkhave, nirayapālā saṃvesetvā kuṭhārīhi 30 tacchanti. So tattha dukkhā tibbā…pe… byantīhoti. Tamenaṃ, bhikkhave, nirayapālā uddhaṃpādaṃ adhosiraṃ gahetvā vāsīhi tacchanti. So tattha dukkhā tibbā…pe… byantīhoti. Tamenaṃ, bhikkhave, nirayapālā rathe yojetvā ādittāya pathaviyā sampajjalitāya sajotibhūtāya 31 sārentipi paccāsārentipi . So tattha dukkhā tibbā…pe… byantīhoti. Tamenaṃ, bhikkhave, nirayapālā mahantaṃ aṅgārapabbataṃ ādittaṃ sampajjalitaṃ sajotibhūtaṃ āropentipi oropentipi. So tattha dukkhā tibbā kharā kaṭukā vedanā vedeti, na ca tāva kālaṃ karoti yāva na taṃ pāpakammaṃ byantīhoti. Tamenaṃ, bhikkhave, nirayapālā uddhaṃpādaṃ adhosiraṃ gahetvā tattāya lohakumbhiyā pakkhipanti ādittāya sampajjalitāya sajotibhūtāya. So tattha pheṇuddehakaṃ paccati. So tattha pheṇuddehakaṃ paccamāno sakimpi uddhaṃ gacchati, sakimpi adho gacchati, sakimpi tiriyaṃ gacchati. So tattha dukkhā tibbā kharā kaṭukā vedanā vedeti, na ca tāva kālaṅkaroti yāva na taṃ pāpakammaṃ byantīhoti. Tamenaṃ, bhikkhave, nirayapālā 32 mahāniraye pakkhipanti. So kho pana, bhikkhave, mahānirayo –
‘‘ཙཏུཀྐཎྞོ ཙཏུདྭཱརོ, ཝིབྷཏྟོ བྷཱགསོ མིཏོ།
‘‘Catukkaṇṇo catudvāro, vibhatto bhāgaso mito;
ཨཡོཔཱཀཱརཔརིཡནྟོ, ཨཡསཱ པཊིཀུཛྫིཏོ༎
Ayopākārapariyanto, ayasā paṭikujjito.
‘‘ཏསྶ ཨཡོམཡཱ བྷཱུམི, ཛལིཏཱ ཏེཛསཱ ཡུཏཱ།
‘‘Tassa ayomayā bhūmi, jalitā tejasā yutā;
སམནྟཱ ཡོཛནསཏཾ, ཕརིཏྭཱ ཏིཊྛཏི སབྦདཱ’’༎
Samantā yojanasataṃ, pharitvā tiṭṭhati sabbadā’’.
‘‘ཨནེཀཔརིཡཱཡེནཔི ཁོ ཨཧཾ, བྷིཀྑཝེ, ནིརཡཀཐཾ ཀཐེཡྻཾ; ཡཱཝཉྩིདཾ, བྷིཀྑཝེ, ན སུཀརཱ ཨཀྑཱནེན པཱཔུཎིཏུཾ ཡཱཝ དུཀྑཱ ནིརཡཱ།
‘‘Anekapariyāyenapi kho ahaṃ, bhikkhave, nirayakathaṃ katheyyaṃ; yāvañcidaṃ, bhikkhave, na sukarā akkhānena pāpuṇituṃ yāva dukkhā nirayā.
༢༥༡. ‘‘སནྟི, བྷིཀྑཝེ, ཏིརཙྪཱནགཏཱ པཱཎཱ ཏིཎབྷཀྑཱ། ཏེ ཨལླཱནིཔི ཏིཎཱནི སུཀྑཱནིཔི ཏིཎཱནི དནྟུལླེཧཀཾ ཁཱདནྟི། ཀཏམེ ཙ, བྷིཀྑཝེ, ཏིརཙྪཱནགཏཱ པཱཎཱ ཏིཎབྷཀྑཱ? ཧཏྠཱི ཨསྶཱ གོཎཱ གདྲབྷཱ ཨཛཱ མིགཱ, ཡེ ཝཱ པནཉྙེཔི ཀེཙི ཏིརཙྪཱནགཏཱ པཱཎཱ ཏིཎབྷཀྑཱ། ས ཁོ སོ, བྷིཀྑཝེ, བཱལོ ཨིདྷ པུབྦེ རསཱདོ ཨིདྷ པཱཔཱནི ཀམྨཱནི ཀརིཏྭཱ ཀཱཡསྶ བྷེདཱ པརཾ མརཎཱ ཏེསཾ སཏྟཱནཾ སཧབྱཏཾ ཨུཔཔཛྫཏི ཡེ ཏེ སཏྟཱ ཏིཎབྷཀྑཱ།
251. ‘‘Santi, bhikkhave, tiracchānagatā pāṇā tiṇabhakkhā. Te allānipi tiṇāni sukkhānipi tiṇāni dantullehakaṃ khādanti. Katame ca, bhikkhave, tiracchānagatā pāṇā tiṇabhakkhā? Hatthī assā goṇā gadrabhā ajā migā, ye vā panaññepi keci tiracchānagatā pāṇā tiṇabhakkhā. Sa kho so, bhikkhave, bālo idha pubbe rasādo idha pāpāni kammāni karitvā kāyassa bhedā paraṃ maraṇā tesaṃ sattānaṃ sahabyataṃ upapajjati ye te sattā tiṇabhakkhā.
‘‘སནྟི, བྷིཀྑཝེ, ཏིརཙྪཱནགཏཱ པཱཎཱ གཱུཐབྷཀྑཱ། ཏེ དཱུརཏོཝ གཱུཐགནྡྷཾ གྷཱཡིཏྭཱ དྷཱཝནྟི – ‘ཨེཏྠ བྷུཉྫིསྶཱམ, ཨེཏྠ བྷུཉྫིསྶཱམཱ’ཏི། སེཡྻཐཱཔི ནཱམ བྲཱཧྨཎཱ ཨཱཧུཏིགནྡྷེན དྷཱཝནྟི – ‘ཨེཏྠ བྷུཉྫིསྶཱམ, ཨེཏྠ བྷུཉྫིསྶཱམཱ’ཏི; ཨེཝམེཝ ཁོ, བྷིཀྑཝེ, སནྟི ཏིརཙྪཱནགཏཱ པཱཎཱ གཱུཐབྷཀྑཱ, ཏེ དཱུརཏོཝ གཱུཐགནྡྷཾ གྷཱཡིཏྭཱ དྷཱཝནྟི – ‘ཨེཏྠ བྷུཉྫིསྶཱམ, ཨེཏྠ བྷུཉྫིསྶཱམཱ’ཏི། ཀཏམེ ཙ, བྷིཀྑཝེ, ཏིརཙྪཱནགཏཱ པཱཎཱ གཱུཐབྷཀྑཱ? ཀུཀྐུཊཱ སཱུཀརཱ སོཎཱ སིངྒཱལཱ, ཡེ ཝཱ པནཉྙེཔི ཀེཙི ཏིརཙྪཱནགཏཱ པཱཎཱ གཱུཐབྷཀྑཱ། ས ཁོ སོ, བྷིཀྑཝེ, བཱལོ ཨིདྷ པུབྦེ རསཱདོ ཨིདྷ པཱཔཱནི ཀམྨཱནི ཀརིཏྭཱ ཀཱཡསྶ བྷེདཱ པརཾ མརཎཱ ཏེསཾ སཏྟཱནཾ སཧབྱཏཾ ཨུཔཔཛྫཏི ཡེ ཏེ སཏྟཱ གཱུཐབྷཀྑཱ།
‘‘Santi, bhikkhave, tiracchānagatā pāṇā gūthabhakkhā. Te dūratova gūthagandhaṃ ghāyitvā dhāvanti – ‘ettha bhuñjissāma, ettha bhuñjissāmā’ti. Seyyathāpi nāma brāhmaṇā āhutigandhena dhāvanti – ‘ettha bhuñjissāma, ettha bhuñjissāmā’ti; evameva kho, bhikkhave, santi tiracchānagatā pāṇā gūthabhakkhā, te dūratova gūthagandhaṃ ghāyitvā dhāvanti – ‘ettha bhuñjissāma, ettha bhuñjissāmā’ti. Katame ca, bhikkhave, tiracchānagatā pāṇā gūthabhakkhā? Kukkuṭā sūkarā soṇā siṅgālā, ye vā panaññepi keci tiracchānagatā pāṇā gūthabhakkhā. Sa kho so, bhikkhave, bālo idha pubbe rasādo idha pāpāni kammāni karitvā kāyassa bhedā paraṃ maraṇā tesaṃ sattānaṃ sahabyataṃ upapajjati ye te sattā gūthabhakkhā.
‘‘སནྟི, བྷིཀྑཝེ, ཏིརཙྪཱནགཏཱ པཱཎཱ ཨནྡྷཀཱརེ ཛཱཡནྟི ཨནྡྷཀཱརེ ཛཱིཡནྟི 33 ཨནྡྷཀཱརེ མཱིཡནྟི 34། ཀཏམེ ཙ, བྷིཀྑཝེ, ཏིརཙྪཱནགཏཱ པཱཎཱ ཨནྡྷཀཱརེ ཛཱཡནྟི ཨནྡྷཀཱརེ ཛཱིཡནྟི ཨནྡྷཀཱརེ མཱིཡནྟི? ཀཱིཊཱ པུལ༹ཝཱ 35 གཎྜུཔྤཱདཱ, ཡེ ཝཱ པནཉྙེཔི ཀེཙི ཏིརཙྪཱནགཏཱ པཱཎཱ ཨནྡྷཀཱརེ ཛཱཡནྟི ཨནྡྷཀཱརེ ཛཱིཡནྟི ཨནྡྷཀཱརེ མཱིཡནྟི། ས ཁོ སོ, བྷིཀྑཝེ, བཱལོ ཨིདྷ པུབྦེ རསཱདོ, ཨིདྷ པཱཔཱནི ཀམྨཱནི ཀརིཏྭཱ ཀཱཡསྶ བྷེདཱ པརཾ མརཎཱ ཏེསཾ སཏྟཱནཾ སཧབྱཏཾ ཨུཔཔཛྫཏི ཡེ ཏེ སཏྟཱ ཨནྡྷཀཱརེ ཛཱཡནྟི ཨནྡྷཀཱརེ ཛཱིཡནྟི ཨནྡྷཀཱརེ མཱིཡནྟི།
‘‘Santi, bhikkhave, tiracchānagatā pāṇā andhakāre jāyanti andhakāre jīyanti 36 andhakāre mīyanti 37. Katame ca, bhikkhave, tiracchānagatā pāṇā andhakāre jāyanti andhakāre jīyanti andhakāre mīyanti? Kīṭā puḷavā 38 gaṇḍuppādā, ye vā panaññepi keci tiracchānagatā pāṇā andhakāre jāyanti andhakāre jīyanti andhakāre mīyanti. Sa kho so, bhikkhave, bālo idha pubbe rasādo, idha pāpāni kammāni karitvā kāyassa bhedā paraṃ maraṇā tesaṃ sattānaṃ sahabyataṃ upapajjati ye te sattā andhakāre jāyanti andhakāre jīyanti andhakāre mīyanti.
‘‘སནྟི, བྷིཀྑཝེ, ཏིརཙྪཱནགཏཱ པཱཎཱ ཨུདཀསྨིཾ ཛཱཡནྟི ཨུདཀསྨིཾ ཛཱིཡནྟི ཨུདཀསྨིཾ མཱིཡནྟི། ཀཏམེ ཙ, བྷིཀྑཝེ, ཏིརཙྪཱནགཏཱ པཱཎཱ ཨུདཀསྨིཾ ཛཱཡནྟི ཨུདཀསྨིཾ ཛཱིཡནྟི ཨུདཀསྨིཾ མཱིཡནྟི? མཙྪཱ ཀཙྪཔཱ སུསུམཱརཱ, ཡེ ཝཱ པནཉྙེཔི ཀེཙི ཏིརཙྪཱནགཏཱ པཱཎཱ ཨུདཀསྨིཾ ཛཱཡནྟི ཨུདཀསྨིཾ ཛཱིཡནྟི ཨུདཀསྨིཾ མཱིཡནྟི། ས ཁོ སོ, བྷིཀྑཝེ, བཱལོ ཨིདྷ པུབྦེ རསཱདོ ཨིདྷ པཱཔཱནི ཀམྨཱནི ཀརིཏྭཱ ཀཱཡསྶ བྷེདཱ པརཾ མརཎཱ ཏེསཾ སཏྟཱནཾ སཧབྱཏཾ ཨུཔཔཛྫཏི ཡེ ཏེ སཏྟཱ ཨུདཀསྨིཾ ཛཱཡནྟི ཨུདཀསྨིཾ ཛཱིཡནྟི ཨུདཀསྨིཾ མཱིཡནྟི།
‘‘Santi, bhikkhave, tiracchānagatā pāṇā udakasmiṃ jāyanti udakasmiṃ jīyanti udakasmiṃ mīyanti. Katame ca, bhikkhave, tiracchānagatā pāṇā udakasmiṃ jāyanti udakasmiṃ jīyanti udakasmiṃ mīyanti? Macchā kacchapā susumārā, ye vā panaññepi keci tiracchānagatā pāṇā udakasmiṃ jāyanti udakasmiṃ jīyanti udakasmiṃ mīyanti. Sa kho so, bhikkhave, bālo idha pubbe rasādo idha pāpāni kammāni karitvā kāyassa bhedā paraṃ maraṇā tesaṃ sattānaṃ sahabyataṃ upapajjati ye te sattā udakasmiṃ jāyanti udakasmiṃ jīyanti udakasmiṃ mīyanti.
‘‘སནྟི , བྷིཀྑཝེ, ཏིརཙྪཱནགཏཱ པཱཎཱ ཨསུཙིསྨིཾ ཛཱཡནྟི ཨསུཙིསྨིཾ ཛཱིཡནྟི ཨསུཙིསྨིཾ མཱིཡནྟི། ཀཏམེ ཙ, བྷིཀྑཝེ, ཏིརཙྪཱནགཏཱ པཱཎཱ ཨསུཙིསྨིཾ ཛཱཡནྟི ཨསུཙིསྨིཾ ཛཱིཡནྟི ཨསུཙིསྨིཾ མཱིཡནྟི? ཡེ ཏེ, བྷིཀྑཝེ, སཏྟཱ པཱུཏིམཙྪེ ཝཱ ཛཱཡནྟི པཱུཏིམཙྪེ ཝཱ ཛཱིཡནྟི པཱུཏིམཙྪེ ཝཱ མཱིཡནྟི པཱུཏིཀུཎཔེ ཝཱ…པེ॰… པཱུཏིཀུམྨཱསེ ཝཱ… ཙནྡནིཀཱཡ ཝཱ… ཨོལིགལླེ ཝཱ ཛཱཡནྟི, (ཡེ ཝཱ པནཉྙེཔི ཀེཙི ཏིརཙྪཱནགཏཱ པཱཎཱ ཨསུཙིསྨིཾ ཛཱཡནྟི ཨསུཙིསྨིཾ ཛཱིཡནྟི ཨསུཙིསྨིཾ མཱིཡནྟི།) 39 ས ཁོ སོ, བྷིཀྑཝེ, བཱལོ ཨིདྷ པུབྦེ རསཱདོ ཨིདྷ པཱཔཱནི ཀམྨཱནི ཀརིཏྭཱ ཀཱཡསྶ བྷེདཱ པརཾ མརཎཱ ཏེསཾ སཏྟཱནཾ སཧབྱཏཾ ཨུཔཔཛྫཏི ཡེ ཏེ སཏྟཱ ཨསུཙིསྨིཾ ཛཱཡནྟི ཨསུཙིསྨིཾ ཛཱིཡནྟི ཨསུཙིསྨིཾ མཱིཡནྟི།
‘‘Santi , bhikkhave, tiracchānagatā pāṇā asucismiṃ jāyanti asucismiṃ jīyanti asucismiṃ mīyanti. Katame ca, bhikkhave, tiracchānagatā pāṇā asucismiṃ jāyanti asucismiṃ jīyanti asucismiṃ mīyanti? Ye te, bhikkhave, sattā pūtimacche vā jāyanti pūtimacche vā jīyanti pūtimacche vā mīyanti pūtikuṇape vā…pe… pūtikummāse vā… candanikāya vā… oligalle vā jāyanti, (ye vā panaññepi keci tiracchānagatā pāṇā asucismiṃ jāyanti asucismiṃ jīyanti asucismiṃ mīyanti.) 40 Sa kho so, bhikkhave, bālo idha pubbe rasādo idha pāpāni kammāni karitvā kāyassa bhedā paraṃ maraṇā tesaṃ sattānaṃ sahabyataṃ upapajjati ye te sattā asucismiṃ jāyanti asucismiṃ jīyanti asucismiṃ mīyanti.
‘‘ཨནེཀཔརིཡཱཡེནཔི ཁོ ཨཧཾ, བྷིཀྑཝེ, ཏིརཙྪཱནཡོནིཀཐཾ ཀཐེཡྻཾ; ཡཱཝཉྩིདཾ, བྷིཀྑཝེ, ན སུཀརཾ ཨཀྑཱནེན པཱཔུཎིཏུཾ ཡཱཝ དུཀྑཱ ཏིརཙྪཱནཡོནི།
‘‘Anekapariyāyenapi kho ahaṃ, bhikkhave, tiracchānayonikathaṃ katheyyaṃ; yāvañcidaṃ, bhikkhave, na sukaraṃ akkhānena pāpuṇituṃ yāva dukkhā tiracchānayoni.
༢༥༢. ‘‘སེཡྻཐཱཔི, བྷིཀྑཝེ, པུརིསོ ཨེཀཙྪིགྒལཾ ཡུགཾ མཧཱསམུདྡེ པཀྑིཔེཡྻ། ཏམེནཾ པུརཏྠིམོ ཝཱཏོ པཙྪིམེན སཾཧརེཡྻ, པཙྪིམོ ཝཱཏོ པུརཏྠིམེན སཾཧརེཡྻ, ཨུཏྟརོ ཝཱཏོ དཀྑིཎེན སཾཧརེཡྻ, དཀྑིཎོ ཝཱཏོ ཨུཏྟརེན སཾཧརེཡྻ། ཏཏྲཱསྶ ཀཱཎོ ཀཙྪཔོ, སོ ཝསྶསཏསྶ ཝསྶསཏསྶ 41 ཨཙྩཡེན སཀིཾ ཨུམྨུཛྫེཡྻ། ཏཾ ཀིཾ མཉྙཐ, བྷིཀྑཝེ, ཨཔི ནུ སོ ཀཱཎོ ཀཙྪཔོ ཨམུསྨིཾ ཨེཀཙྪིགྒལེ ཡུགེ གཱིཝཾ པཝེསེཡྻཱ’’ཏི? (‘‘ནོ ཧེཏཾ, བྷནྟེ’’།) 42 ‘‘ཡདི པན 43, བྷནྟེ, ཀདཱཙི ཀརཧཙི དཱིགྷསྶ ཨདྡྷུནོ ཨཙྩཡེནཱ’’ཏི། ‘‘ཁིཔྤཏརཾ ཁོ སོ, བྷིཀྑཝེ, ཀཱཎོ ཀཙྪཔོ ཨམུསྨིཾ ཨེཀཙྪིགྒལེ ཡུགེ གཱིཝཾ པཝེསེཡྻ, ཨཏོ དུལླབྷཏརཱཧཾ, བྷིཀྑཝེ, མནུསྶཏྟཾ ཝདཱམི སཀིཾ ཝིནིཔཱཏགཏེན བཱལེན། ཏཾ ཀིསྶ ཧེཏུ? ན ཧེཏྠ, བྷིཀྑཝེ, ཨཏྠི དྷམྨཙརིཡཱ སམཙརིཡཱ ཀུསལཀིརིཡཱ པུཉྙཀིརིཡཱ། ཨཉྙམཉྙཁཱདིཀཱ ཨེཏྠ, བྷིཀྑཝེ, ཝཏྟཏི དུབྦལཁཱདིཀཱ’’།
252. ‘‘Seyyathāpi, bhikkhave, puriso ekacchiggalaṃ yugaṃ mahāsamudde pakkhipeyya. Tamenaṃ puratthimo vāto pacchimena saṃhareyya, pacchimo vāto puratthimena saṃhareyya, uttaro vāto dakkhiṇena saṃhareyya, dakkhiṇo vāto uttarena saṃhareyya. Tatrāssa kāṇo kacchapo, so vassasatassa vassasatassa 44 accayena sakiṃ ummujjeyya. Taṃ kiṃ maññatha, bhikkhave, api nu so kāṇo kacchapo amusmiṃ ekacchiggale yuge gīvaṃ paveseyyā’’ti? (‘‘No hetaṃ, bhante’’.) 45 ‘‘Yadi pana 46, bhante, kadāci karahaci dīghassa addhuno accayenā’’ti. ‘‘Khippataraṃ kho so, bhikkhave, kāṇo kacchapo amusmiṃ ekacchiggale yuge gīvaṃ paveseyya, ato dullabhatarāhaṃ, bhikkhave, manussattaṃ vadāmi sakiṃ vinipātagatena bālena. Taṃ kissa hetu? Na hettha, bhikkhave, atthi dhammacariyā samacariyā kusalakiriyā puññakiriyā. Aññamaññakhādikā ettha, bhikkhave, vattati dubbalakhādikā’’.
‘‘ས ཁོ སོ, བྷིཀྑཝེ, བཱལོ སཙེ ཀདཱཙི ཀརཧཙི དཱིགྷསྶ ཨདྡྷུནོ ཨཙྩཡེན མནུསྶཏྟཾ ཨཱགཙྪཏི, ཡཱནི ཏཱནི ནཱིཙཀུལཱནི – ཙཎྜཱལཀུལཾ ཝཱ ནེསཱདཀུལཾ ཝཱ ཝེནཀུལཾ 47 ཝཱ རཐཀཱརཀུལཾ ཝཱ པུཀྐུསཀུལཾ ཝཱ། ཏཐཱརཱུཔེ ཀུལེ པཙྩཱཛཱཡཏི དལིདྡེ ཨཔྤནྣཔཱནབྷོཛནེ ཀསིརཝུཏྟིཀེ, ཡཏྠ ཀསིརེན གྷཱསཙྪཱདོ ལབྦྷཏི། སོ ཙ ཧོཏི དུབྦཎྞོ དུདྡསིཀོ ཨོཀོཊིམཀོ བཝ྄ཧཱབཱདྷོ 48 ཀཱཎོ ཝཱ ཀུཎཱི ཝཱ ཁུཛྫོ ཝཱ པཀྑཧཏོ ཝཱ ན ལཱབྷཱི ཨནྣསྶ པཱནསྶ ཝཏྠསྶ ཡཱནསྶ མཱལཱགནྡྷཝིལེཔནསྶ སེཡྻཱཝསཐཔདཱིཔེཡྻསྶ། སོ ཀཱཡེན དུཙྩརིཏཾ ཙརཏི ཝཱཙཱཡ དུཙྩརིཏཾ ཙརཏི མནསཱ དུཙྩརིཏཾ ཙརཏི། སོ ཀཱཡེན དུཙྩརིཏཾ ཙརིཏྭཱ ཝཱཙཱཡ དུཙྩརིཏཾ ཙརིཏྭཱ མནསཱ དུཙྩརིཏཾ ཙརིཏྭཱ ཀཱཡསྶ བྷེདཱ པརཾ མརཎཱ ཨཔཱཡཾ དུགྒཏིཾ ཝིནིཔཱཏཾ ནིརཡཾ ཨུཔཔཛྫཏི།
‘‘Sa kho so, bhikkhave, bālo sace kadāci karahaci dīghassa addhuno accayena manussattaṃ āgacchati, yāni tāni nīcakulāni – caṇḍālakulaṃ vā nesādakulaṃ vā venakulaṃ 49 vā rathakārakulaṃ vā pukkusakulaṃ vā. Tathārūpe kule paccājāyati dalidde appannapānabhojane kasiravuttike, yattha kasirena ghāsacchādo labbhati. So ca hoti dubbaṇṇo duddasiko okoṭimako bavhābādho 50 kāṇo vā kuṇī vā khujjo vā pakkhahato vā na lābhī annassa pānassa vatthassa yānassa mālāgandhavilepanassa seyyāvasathapadīpeyyassa. So kāyena duccaritaṃ carati vācāya duccaritaṃ carati manasā duccaritaṃ carati. So kāyena duccaritaṃ caritvā vācāya duccaritaṃ caritvā manasā duccaritaṃ caritvā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati.
‘‘སེཡྻཐཱཔི, བྷིཀྑཝེ, ཨཀྑདྷུཏྟོ པཋམེནེཝ ཀལིགྒཧེན པུཏྟམྤི ཛཱིཡེཐ, དཱརམྤི ཛཱིཡེཐ, སབྦཾ སཱཔཏེཡྻམྤི ཛཱིཡེཐ, ཨུཏྟརིཔི ཨདྷིབནྡྷཾ 51 ནིགཙྪེཡྻ། ཨཔྤམཏྟཀོ སོ, བྷིཀྑཝེ, ཀལིགྒཧོ ཡཾ སོ ཨཀྑདྷུཏྟོ པཋམེནེཝ ཀལིགྒཧེན པུཏྟམྤི ཛཱིཡེཐ, དཱརམྤི ཛཱིཡེཐ, སབྦཾ སཱཔཏེཡྻམྤི ཛཱིཡེཐ, ཨུཏྟརིཔི ཨདྷིབནྡྷཾ ནིགཙྪེཡྻ། ཨཐ ཁོ ཨཡམེཝ ཏཏོ མཧནྟཏརོ ཀལིགྒཧོ ཡཾ སོ བཱལོ ཀཱཡེན དུཙྩརིཏཾ ཙརིཏྭཱ ཝཱཙཱཡ དུཙྩརིཏཾ ཙརིཏྭཱ མནསཱ དུཙྩརིཏཾ ཙརིཏྭཱ ཀཱཡསྶ བྷེདཱ པརཾ མརཎཱ ཨཔཱཡཾ དུགྒཏིཾ ཝིནིཔཱཏཾ ནིརཡཾ ཨུཔཔཛྫཏི། ཨཡཾ, བྷིཀྑཝེ, ཀེཝལཱ པརིཔཱུརཱ 52 བཱལབྷཱུམཱི’’ཏི།
‘‘Seyyathāpi, bhikkhave, akkhadhutto paṭhameneva kaliggahena puttampi jīyetha, dārampi jīyetha, sabbaṃ sāpateyyampi jīyetha, uttaripi adhibandhaṃ 53 nigaccheyya. Appamattako so, bhikkhave, kaliggaho yaṃ so akkhadhutto paṭhameneva kaliggahena puttampi jīyetha, dārampi jīyetha, sabbaṃ sāpateyyampi jīyetha, uttaripi adhibandhaṃ nigaccheyya. Atha kho ayameva tato mahantataro kaliggaho yaṃ so bālo kāyena duccaritaṃ caritvā vācāya duccaritaṃ caritvā manasā duccaritaṃ caritvā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati. Ayaṃ, bhikkhave, kevalā paripūrā 54 bālabhūmī’’ti.
༢༥༣. ‘‘ཏཱིཎིམཱནི, བྷིཀྑཝེ, པཎྜིཏསྶ པཎྜིཏལཀྑཎཱནི པཎྜིཏནིམིཏྟཱནི པཎྜིཏཱཔདཱནཱནི། ཀཏམཱནི ཏཱིཎི? ཨིདྷ, བྷིཀྑཝེ, པཎྜིཏོ སུཙིནྟིཏཙིནྟཱི ཙ ཧོཏི སུབྷཱསིཏབྷཱསཱི ཙ སུཀཏཀམྨཀཱརཱི ཙ། ནོ ཙེཏཾ, བྷིཀྑཝེ, པཎྜིཏོ སུཙིནྟིཏཙིནྟཱི ཙ ཨབྷཝིསྶ སུབྷཱསིཏབྷཱསཱི ཙ སུཀཏཀམྨཀཱརཱི ཙ, ཀེན ནཾ 55 པཎྜིཏཱ ཛཱནེཡྻུཾ – ‘པཎྜིཏོ ཨཡཾ བྷཝཾ སཔྤུརིསོ’ཏི? ཡསྨཱ ཙ ཁོ, བྷིཀྑཝེ, པཎྜིཏོ སུཙིནྟིཏཙིནྟཱི ཙ ཧོཏི སུབྷཱསིཏབྷཱསཱི ཙ སུཀཏཀམྨཀཱརཱི ཙ ཏསྨཱ ནཾ པཎྜིཏཱ ཛཱནནྟི – ‘པཎྜིཏོ ཨཡཾ བྷཝཾ སཔྤུརིསོ’ཏི། ས ཁོ སོ, བྷིཀྑཝེ, པཎྜིཏོ ཏིཝིདྷཾ དིཊྛེཝ དྷམྨེ སུཁཾ སོམནསྶཾ པཊིསཾཝེདེཏི། སཙེ, བྷིཀྑཝེ, པཎྜིཏོ སབྷཱཡཾ ཝཱ ནིསིནྣོ ཧོཏི, རཐིཀཱཡ ཝཱ ནིསིནྣོ ཧོཏི, སིངྒྷཱཊཀེ ཝཱ ནིསིནྣོ ཧོཏི; ཏཏྲ ཙེ ཛནོ ཏཛྫཾ ཏསྶཱརུཔྤཾ ཀཐཾ མནྟེཏི ། སཙེ, བྷིཀྑཝེ, པཎྜིཏོ པཱཎཱཏིཔཱཏཱ པཊིཝིརཏོ ཧོཏི, ཨདིནྣཱདཱནཱ པཊིཝིརཏོ ཧོཏི, ཀཱམེསུམིཙྪཱཙཱརཱ པཊིཝིརཏོ ཧོཏི, མུསཱཝཱདཱ པཊིཝིརཏོ ཧོཏི, སུརཱམེརཡམཛྫཔྤམཱདཊྛཱནཱ པཊིཝིརཏོ ཧོཏི; ཏཏྲ, བྷིཀྑཝེ, པཎྜིཏསྶ ཨེཝཾ ཧོཏི – ‘ཡཾ ཁོ ཛནོ ཏཛྫཾ ཏསྶཱརུཔྤཾ ཀཐཾ མནྟེཏི; སཾཝིཛྫནྟེཝ ཏེ དྷམྨཱ མཡི, ཨཧཉྩ ཏེསུ དྷམྨེསུ སནྡིསྶཱམཱི’ཏི། ཨིདཾ, བྷིཀྑཝེ, པཎྜིཏོ པཋམཾ དིཊྛེཝ དྷམྨེ སུཁཾ སོམནསྶཾ པཊིསཾཝེདེཏི།
253. ‘‘Tīṇimāni, bhikkhave, paṇḍitassa paṇḍitalakkhaṇāni paṇḍitanimittāni paṇḍitāpadānāni. Katamāni tīṇi? Idha, bhikkhave, paṇḍito sucintitacintī ca hoti subhāsitabhāsī ca sukatakammakārī ca. No cetaṃ, bhikkhave, paṇḍito sucintitacintī ca abhavissa subhāsitabhāsī ca sukatakammakārī ca, kena naṃ 56 paṇḍitā jāneyyuṃ – ‘paṇḍito ayaṃ bhavaṃ sappuriso’ti? Yasmā ca kho, bhikkhave, paṇḍito sucintitacintī ca hoti subhāsitabhāsī ca sukatakammakārī ca tasmā naṃ paṇḍitā jānanti – ‘paṇḍito ayaṃ bhavaṃ sappuriso’ti. Sa kho so, bhikkhave, paṇḍito tividhaṃ diṭṭheva dhamme sukhaṃ somanassaṃ paṭisaṃvedeti. Sace, bhikkhave, paṇḍito sabhāyaṃ vā nisinno hoti, rathikāya vā nisinno hoti, siṅghāṭake vā nisinno hoti; tatra ce jano tajjaṃ tassāruppaṃ kathaṃ manteti . Sace, bhikkhave, paṇḍito pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, surāmerayamajjappamādaṭṭhānā paṭivirato hoti; tatra, bhikkhave, paṇḍitassa evaṃ hoti – ‘yaṃ kho jano tajjaṃ tassāruppaṃ kathaṃ manteti; saṃvijjanteva te dhammā mayi, ahañca tesu dhammesu sandissāmī’ti. Idaṃ, bhikkhave, paṇḍito paṭhamaṃ diṭṭheva dhamme sukhaṃ somanassaṃ paṭisaṃvedeti.
༢༥༤. ‘‘པུན ཙཔརཾ, བྷིཀྑཝེ, པཎྜིཏོ པསྶཏི རཱཛཱནོ ཙོརཾ ཨཱགུཙཱརིཾ གཧེཏྭཱ ཝིཝིདྷཱ ཀམྨཀཱརཎཱ ཀཱརེནྟེ – ཀསཱཧིཔི ཏཱལེ༹ནྟེ ཝེཏྟེཧིཔི ཏཱལེ༹ནྟེ ཨདྡྷདཎྜཀེཧིཔི ཏཱལེ༹ནྟེ ཧཏྠམྤི ཚིནྡནྟེ པཱདམྤི ཚིནྡནྟེ ཧཏྠཔཱདམྤི ཚིནྡནྟེ ཀཎྞམྤི ཚིནྡནྟེ ནཱསམྤི ཚིནྡནྟེ ཀཎྞནཱསམྤི ཚིནྡནྟེ བིལངྒཐཱལིཀམྤི ཀརོནྟེ སངྑམུཎྜིཀམྤི ཀརོནྟེ རཱཧུམུཁམྤི ཀརོནྟེ ཛོཏིམཱལིཀམྤི ཀརོནྟེ ཧཏྠཔཛྫོཏིཀམྤི ཀརོནྟེ ཨེརཀཝཏྟིཀམྤི ཀརོནྟེ ཙཱིརཀཝཱསིཀམྤི ཀརོནྟེ ཨེཎེཡྻཀམྤི ཀརོནྟེ བལིསམཾསིཀམྤི ཀརོནྟེ ཀཧཱཔཎིཀམྤི ཀརོནྟེ ཁཱརཱཔཏཙྪིཀམྤི ཀརོནྟེ པལིགྷཔརིཝཏྟིཀམྤི ཀརོནྟེ པལཱལཔཱིཋཀམྤི ཀརོནྟེ ཏཏྟེནཔི ཏེལེན ཨོསིཉྩནྟེ སུནཁེཧིཔི ཁཱདཱཔེནྟེ ཛཱིཝནྟམྤི སཱུལེ ཨུཏྟཱསེནྟེ ཨསིནཱཔི སཱིསཾ ཚིནྡནྟེ། ཏཏྲ, བྷིཀྑཝེ, པཎྜིཏསྶ ཨེཝཾ ཧོཏི – ‘ཡཐཱརཱུཔཱནཾ ཁོ པཱཔཀཱནཾ ཀམྨཱནཾ ཧེཏུ རཱཛཱནོ ཙོརཾ ཨཱགུཙཱརིཾ གཧེཏྭཱ ཝིཝིདྷཱ ཀམྨཀཱརཎཱ ཀཱརེནྟི ཀསཱཧིཔི ཏཱལེ༹ནྟི, ཝེཏྟེཧིཔི ཏཱལེ༹ནྟི, ཨདྡྷདཎྜཀེཧིཔི ཏཱལེ༹ནྟི, ཧཏྠམྤི ཚིནྡནྟི , པཱདམྤི ཚིནྡནྟི, ཧཏྠཔཱདམྤི ཚིནྡནྟི, ཀཎྞམྤི ཚིནྡནྟི, ནཱསམྤི ཚིནྡནྟི, ཀཎྞནཱསམྤི ཚིནྡནྟི, བིལངྒཐཱལིཀམྤི ཀརོནྟི, སངྑམུཎྜིཀམྤི ཀརོནྟི, རཱཧུམུཁམྤི ཀརོནྟི, ཛོཏིམཱལིཀམྤི ཀརོནྟི, ཧཏྠཔཛྫོཏིཀམྤི ཀརོནྟི, ཨེརཀཝཏྟིཀམྤི ཀརོནྟི, ཙཱིརཀཝཱསིཀམྤི ཀརོནྟི, ཨེཎེཡྻཀམྤི ཀརོནྟི, བལིསམཾསིཀམྤི ཀརོནྟི, ཀཧཱཔཎིཀམྤི ཀརོནྟི, ཁཱརཱཔཏཙྪིཀམྤི ཀརོནྟི, པལིགྷཔརིཝཏྟིཀམྤི ཀརོནྟི, པལཱལཔཱིཋཀམྤི ཀརོནྟི, ཏཏྟེནཔི ཏེལེན ཨོསིཉྩནྟི, སུནཁེཧིཔི ཁཱདཱཔེནྟི, ཛཱིཝནྟམྤི སཱུལེ ཨུཏྟཱསེནྟི, ཨསིནཱཔི སཱིསཾ ཚིནྡནྟི, ན ཏེ དྷམྨཱ མཡི སཾཝིཛྫནྟི, ཨཧཉྩ ན ཏེསུ དྷམྨེསུ སནྡིསྶཱམཱི’ཏི། ཨིདམྤི, བྷིཀྑཝེ, པཎྜིཏོ དུཏིཡཾ དིཊྛེཝ དྷམྨེ སུཁཾ སོམནསྶཾ པཊིསཾཝེདེཏི།
254. ‘‘Puna caparaṃ, bhikkhave, paṇḍito passati rājāno coraṃ āgucāriṃ gahetvā vividhā kammakāraṇā kārente – kasāhipi tāḷente vettehipi tāḷente addhadaṇḍakehipi tāḷente hatthampi chindante pādampi chindante hatthapādampi chindante kaṇṇampi chindante nāsampi chindante kaṇṇanāsampi chindante bilaṅgathālikampi karonte saṅkhamuṇḍikampi karonte rāhumukhampi karonte jotimālikampi karonte hatthapajjotikampi karonte erakavattikampi karonte cīrakavāsikampi karonte eṇeyyakampi karonte balisamaṃsikampi karonte kahāpaṇikampi karonte khārāpatacchikampi karonte palighaparivattikampi karonte palālapīṭhakampi karonte tattenapi telena osiñcante sunakhehipi khādāpente jīvantampi sūle uttāsente asināpi sīsaṃ chindante. Tatra, bhikkhave, paṇḍitassa evaṃ hoti – ‘yathārūpānaṃ kho pāpakānaṃ kammānaṃ hetu rājāno coraṃ āgucāriṃ gahetvā vividhā kammakāraṇā kārenti kasāhipi tāḷenti, vettehipi tāḷenti, addhadaṇḍakehipi tāḷenti, hatthampi chindanti , pādampi chindanti, hatthapādampi chindanti, kaṇṇampi chindanti, nāsampi chindanti, kaṇṇanāsampi chindanti, bilaṅgathālikampi karonti, saṅkhamuṇḍikampi karonti, rāhumukhampi karonti, jotimālikampi karonti, hatthapajjotikampi karonti, erakavattikampi karonti, cīrakavāsikampi karonti, eṇeyyakampi karonti, balisamaṃsikampi karonti, kahāpaṇikampi karonti, khārāpatacchikampi karonti, palighaparivattikampi karonti, palālapīṭhakampi karonti, tattenapi telena osiñcanti, sunakhehipi khādāpenti, jīvantampi sūle uttāsenti, asināpi sīsaṃ chindanti, na te dhammā mayi saṃvijjanti, ahañca na tesu dhammesu sandissāmī’ti. Idampi, bhikkhave, paṇḍito dutiyaṃ diṭṭheva dhamme sukhaṃ somanassaṃ paṭisaṃvedeti.
༢༥༥. ‘‘པུན ཙཔརཾ, བྷིཀྑཝེ, པཎྜིཏཾ པཱིཋསམཱརཱུལ༹ྷཾ ཝཱ མཉྩསམཱརཱུལ༹ྷཾ ཝཱ ཚམཱཡཾ ཝཱ སེམཱནཾ, ཡཱནིསྶ པུབྦེ ཀལྱཱཎཱནི ཀམྨཱནི ཀཏཱནི ཀཱཡེན སུཙརིཏཱནི ཝཱཙཱཡ སུཙརིཏཱནི མནསཱ སུཙརིཏཱནི ཏཱནིསྶ ཏམྷི སམཡེ ཨོལམྦནྟི…པེ॰… སེཡྻཐཱཔི, བྷིཀྑཝེ, མཧཏཾ པབྦཏཀཱུཊཱནཾ ཚཱཡཱ སཱཡནྷསམཡཾ པཐཝིཡཱ ཨོལམྦནྟི ཨཛ྄ཛྷོལམྦནྟི ཨབྷིཔྤལམྦནྟི; ཨེཝམེཝ ཁོ, བྷིཀྑཝེ, པཎྜིཏཾ པཱིཋསམཱརཱུལ༹ྷཾ ཝཱ མཉྩསམཱརཱུལ༹ྷཾ ཝཱ ཚམཱཡཾ ཝཱ སེམཱནཾ ཡཱནིསྶ པུབྦེ ཀལྱཱཎཱནི ཀམྨཱནི ཀཏཱནི ཀཱཡེན སུཙརིཏཱནི ཝཱཙཱཡ སུཙརིཏཱནི མནསཱ སུཙརིཏཱནི ཏཱནིསྶ ཏམྷི སམཡེ ཨོལམྦནྟི ཨཛ྄ཛྷོལམྦནྟི ཨབྷིཔྤལམྦནྟི། ཏཏྲ, བྷིཀྑཝེ, པཎྜིཏསྶ ཨེཝཾ ཧོཏི – ‘ཨཀཏཾ ཝཏ མེ པཱཔཾ, ཨཀཏཾ ལུདྡཾ, ཨཀཏཾ ཀིབྦིསཾ; ཀཏཾ ཀལྱཱཎཾ, ཀཏཾ ཀུསལཾ, ཀཏཾ བྷཱིརུཏྟཱཎཾ། ཡཱཝཏཱ, བྷོ, ཨཀཏཔཱཔཱནཾ ཨཀཏལུདྡཱནཾ ཨཀཏཀིབྦིསཱནཾ ཀཏཀལྱཱཎཱནཾ ཀཏཀུསལཱནཾ ཀཏབྷཱིརུཏྟཱཎཱནཾ གཏི ཏཾ གཏིཾ པེཙྩ གཙྪཱམཱི’ཏི། སོ ན སོཙཏི, ན ཀིལམཏི, ན པརིདེཝཏི, ན ཨུརཏྟཱལི༹ཾ ཀནྡཏི, ན སམྨོཧཾ ཨཱཔཛྫཏི། ཨིདམྤི, བྷིཀྑཝེ, པཎྜིཏོ ཏཏིཡཾ དིཊྛེཝ དྷམྨེ སུཁཾ སོམནསྶཾ པཊིསཾཝེདེཏི།
255. ‘‘Puna caparaṃ, bhikkhave, paṇḍitaṃ pīṭhasamārūḷhaṃ vā mañcasamārūḷhaṃ vā chamāyaṃ vā semānaṃ, yānissa pubbe kalyāṇāni kammāni katāni kāyena sucaritāni vācāya sucaritāni manasā sucaritāni tānissa tamhi samaye olambanti…pe… seyyathāpi, bhikkhave, mahataṃ pabbatakūṭānaṃ chāyā sāyanhasamayaṃ pathaviyā olambanti ajjholambanti abhippalambanti; evameva kho, bhikkhave, paṇḍitaṃ pīṭhasamārūḷhaṃ vā mañcasamārūḷhaṃ vā chamāyaṃ vā semānaṃ yānissa pubbe kalyāṇāni kammāni katāni kāyena sucaritāni vācāya sucaritāni manasā sucaritāni tānissa tamhi samaye olambanti ajjholambanti abhippalambanti. Tatra, bhikkhave, paṇḍitassa evaṃ hoti – ‘akataṃ vata me pāpaṃ, akataṃ luddaṃ, akataṃ kibbisaṃ; kataṃ kalyāṇaṃ, kataṃ kusalaṃ, kataṃ bhīruttāṇaṃ. Yāvatā, bho, akatapāpānaṃ akataluddānaṃ akatakibbisānaṃ katakalyāṇānaṃ katakusalānaṃ katabhīruttāṇānaṃ gati taṃ gatiṃ pecca gacchāmī’ti. So na socati, na kilamati, na paridevati, na urattāḷiṃ kandati, na sammohaṃ āpajjati. Idampi, bhikkhave, paṇḍito tatiyaṃ diṭṭheva dhamme sukhaṃ somanassaṃ paṭisaṃvedeti.
‘‘ས ཁོ སོ, བྷིཀྑཝེ, པཎྜིཏོ ཀཱཡེན སུཙརིཏཾ ཙརིཏྭཱ ཝཱཙཱཡ སུཙརིཏཾ ཙརིཏྭཱ མནསཱ སུཙརིཏཾ ཙརིཏྭཱ ཀཱཡསྶ བྷེདཱ པརཾ མརཎཱ སུགཏིཾ སགྒཾ ལོཀཾ ཨུཔཔཛྫཏི། ཡཾ ཁོ ཏཾ, བྷིཀྑཝེ, སམྨཱ ཝདམཱནོ ཝདེཡྻ – ‘ཨེཀནྟཾ ཨིཊྛཾ ཨེཀནྟཾ ཀནྟཾ ཨེཀནྟཾ མནཱཔ’ནྟི, སགྒམེཝ ཏཾ སམྨཱ ཝདམཱནོ ཝདེཡྻ – ‘ཨེཀནྟཾ ཨིཊྛཾ ཨེཀནྟཾ ཀནྟཾ ཨེཀནྟཾ མནཱཔ’ནྟི། ཡཱཝཉྩིདཾ, བྷིཀྑཝེ, ཨུཔམཱཔི ན སུཀརཱ ཡཱཝ སུཁཱ སགྒཱ’’ཏི།
‘‘Sa kho so, bhikkhave, paṇḍito kāyena sucaritaṃ caritvā vācāya sucaritaṃ caritvā manasā sucaritaṃ caritvā kāyassa bhedā paraṃ maraṇā sugatiṃ saggaṃ lokaṃ upapajjati. Yaṃ kho taṃ, bhikkhave, sammā vadamāno vadeyya – ‘ekantaṃ iṭṭhaṃ ekantaṃ kantaṃ ekantaṃ manāpa’nti, saggameva taṃ sammā vadamāno vadeyya – ‘ekantaṃ iṭṭhaṃ ekantaṃ kantaṃ ekantaṃ manāpa’nti. Yāvañcidaṃ, bhikkhave, upamāpi na sukarā yāva sukhā saggā’’ti.
༢༥༦. ཨེཝཾ ཝུཏྟེ, ཨཉྙཏརོ བྷིཀྑུ བྷགཝནྟཾ ཨེཏདཝོཙ – ‘‘སཀྐཱ པན, བྷནྟེ, ཨུཔམཾ ཀཱཏུ’’ནྟི? ‘‘སཀྐཱ བྷིཀྑཱུ’’ཏི བྷགཝཱ ཨཝོཙ། ‘‘སེཡྻཐཱཔི, བྷིཀྑཝེ, རཱཛཱ ཙཀྐཝཏྟཱི སཏྟཧི རཏནེཧི སམནྣཱགཏོ ཙཏཱུཧི ཙ ཨིདྡྷཱིཧི ཏཏོནིདཱནཾ སུཁཾ སོམནསྶཾ པཊིསཾཝེདེཏི། ཀཏམེཧི སཏྟཧི? ཨིདྷ, བྷིཀྑཝེ, རཉྙོ ཁཏྟིཡསྶ མུདྡྷཱཝསིཏྟསྶ ཏདཧུཔོསཐེ པནྣརསེ སཱིསཾནྷཱཏསྶ ཨུཔོསཐིཀསྶ ཨུཔརིཔཱསཱདཝརགཏསྶ དིབྦཾ ཙཀྐརཏནཾ པཱཏུབྷཝཏི སཧསྶཱརཾ སནེམིཀཾ སནཱབྷིཀཾ སབྦཱཀཱརཔརིཔཱུརཾ། ཏཾ དིསྭཱན རཉྙོ ཁཏྟིཡསྶ མུདྡྷཱཝསིཏྟསྶ ཨེཝཾ ཧོཏི 57 – ‘སུཏཾ ཁོ པན མེཏཾ ཡསྶ རཉྙོ ཁཏྟིཡསྶ མུདྡྷཱཝསིཏྟསྶ ཏདཧུཔོསཐེ པནྣརསེ སཱིསཾནྷཱཏསྶ ཨུཔོསཐིཀསྶ ཨུཔརིཔཱསཱདཝརགཏསྶ དིབྦཾ ཙཀྐརཏནཾ པཱཏུབྷཝཏི སཧསྶཱརཾ སནེམིཀཾ སནཱབྷིཀཾ སབྦཱཀཱརཔརིཔཱུརཾ, སོ ཧོཏི རཱཛཱ ཙཀྐཝཏྟཱིཏི། ཨསྶཾ ནུ ཁོ ཨཧཾ རཱཛཱ ཙཀྐཝཏྟཱི’’’ཏི?
256. Evaṃ vutte, aññataro bhikkhu bhagavantaṃ etadavoca – ‘‘sakkā pana, bhante, upamaṃ kātu’’nti? ‘‘Sakkā bhikkhū’’ti bhagavā avoca. ‘‘Seyyathāpi, bhikkhave, rājā cakkavattī sattahi ratanehi samannāgato catūhi ca iddhīhi tatonidānaṃ sukhaṃ somanassaṃ paṭisaṃvedeti. Katamehi sattahi? Idha, bhikkhave, rañño khattiyassa muddhāvasittassa tadahuposathe pannarase sīsaṃnhātassa uposathikassa uparipāsādavaragatassa dibbaṃ cakkaratanaṃ pātubhavati sahassāraṃ sanemikaṃ sanābhikaṃ sabbākāraparipūraṃ. Taṃ disvāna rañño khattiyassa muddhāvasittassa evaṃ hoti 58 – ‘sutaṃ kho pana metaṃ yassa rañño khattiyassa muddhāvasittassa tadahuposathe pannarase sīsaṃnhātassa uposathikassa uparipāsādavaragatassa dibbaṃ cakkaratanaṃ pātubhavati sahassāraṃ sanemikaṃ sanābhikaṃ sabbākāraparipūraṃ, so hoti rājā cakkavattīti. Assaṃ nu kho ahaṃ rājā cakkavattī’’’ti?
‘‘ཨཐ ཁོ, བྷིཀྑཝེ, རཱཛཱ ཁཏྟིཡོ མུདྡྷཱཝསིཏྟོ ཝཱམེན ཧཏྠེན བྷིངྐཱརཾ གཧེཏྭཱ དཀྑིཎེན ཧཏྠེན ཙཀྐརཏནཾ ཨབྦྷུཀྐིརཏི – ‘པཝཏྟཏུ བྷཝཾ ཙཀྐརཏནཾ, ཨབྷིཝིཛིནཱཏུ བྷཝཾ ཙཀྐརཏན’ནྟི། ཨཐ ཁོ ཏཾ, བྷིཀྑཝེ, ཙཀྐརཏནཾ པུརཏྠིམཾ དིསཾ པཝཏྟཏི། ཨནྭདེཝ རཱཛཱ ཙཀྐཝཏྟཱི སདྡྷིཾ ཙཏུརངྒིནིཡཱ སེནཱཡ། ཡསྨིཾ ཁོ པན, བྷིཀྑཝེ, པདེསེ ཙཀྐརཏནཾ པཏིཊྛཱཏི ཏཏྠ རཱཛཱ ཙཀྐཝཏྟཱི ཝཱསཾ ཨུཔེཏི སདྡྷིཾ ཙཏུརངྒིནིཡཱ སེནཱཡ། ཡེ ཁོ པན, བྷིཀྑཝེ , པུརཏྠིམཱཡ དིསཱཡ པཊིརཱཛཱནོ ཏེ རཱཛཱནཾ ཙཀྐཝཏྟིཾ ཨུཔསངྐམིཏྭཱ ཨེཝམཱཧཾསུ – ‘ཨེཧི ཁོ, མཧཱརཱཛ! སྭཱགཏཾ ཏེ, མཧཱརཱཛ 59! སཀཾ ཏེ, མཧཱརཱཛ! ཨནུསཱས, མཧཱརཱཛཱ’ཏི ། རཱཛཱ ཙཀྐཝཏྟཱི ཨེཝམཱཧ – ‘པཱཎོ ན ཧནྟབྦོ, ཨདིནྣཾ ནཱདཱཏབྦཾ, ཀཱམེསུམིཙྪཱ ན ཙརིཏབྦཱ, མུསཱ ན བྷཱསིཏབྦཱ, མཛྫཾ ན པཱཏབྦཾ, ཡཐཱབྷུཏྟཉྩ བྷུཉྫཐཱ’ཏི། ཡེ ཁོ པན, བྷིཀྑཝེ, པུརཏྠིམཱཡ དིསཱཡ པཊིརཱཛཱནོ ཏེ རཉྙོ ཙཀྐཝཏྟིསྶ ཨནུཡནྟཱ 60 བྷཝནྟི 61།
‘‘Atha kho, bhikkhave, rājā khattiyo muddhāvasitto vāmena hatthena bhiṅkāraṃ gahetvā dakkhiṇena hatthena cakkaratanaṃ abbhukkirati – ‘pavattatu bhavaṃ cakkaratanaṃ, abhivijinātu bhavaṃ cakkaratana’nti. Atha kho taṃ, bhikkhave, cakkaratanaṃ puratthimaṃ disaṃ pavattati. Anvadeva rājā cakkavattī saddhiṃ caturaṅginiyā senāya. Yasmiṃ kho pana, bhikkhave, padese cakkaratanaṃ patiṭṭhāti tattha rājā cakkavattī vāsaṃ upeti saddhiṃ caturaṅginiyā senāya. Ye kho pana, bhikkhave , puratthimāya disāya paṭirājāno te rājānaṃ cakkavattiṃ upasaṅkamitvā evamāhaṃsu – ‘ehi kho, mahārāja! Svāgataṃ te, mahārāja 62! Sakaṃ te, mahārāja! Anusāsa, mahārājā’ti . Rājā cakkavattī evamāha – ‘pāṇo na hantabbo, adinnaṃ nādātabbaṃ, kāmesumicchā na caritabbā, musā na bhāsitabbā, majjaṃ na pātabbaṃ, yathābhuttañca bhuñjathā’ti. Ye kho pana, bhikkhave, puratthimāya disāya paṭirājāno te rañño cakkavattissa anuyantā 63 bhavanti 64.
༢༥༧. ‘‘ཨཐ ཁོ ཏཾ, བྷིཀྑཝེ, ཙཀྐརཏནཾ པུརཏྠིམཾ སམུདྡཾ ཨཛ྄ཛྷོགཱཧེཏྭཱ 65 པཙྩུཏྟརིཏྭཱ དཀྑིཎཾ དིསཾ པཝཏྟཏི…པེ॰… དཀྑིཎཾ སམུདྡཾ ཨཛ྄ཛྷོགཱཧེཏྭཱ པཙྩུཏྟརིཏྭཱ པཙྪིམཾ དིསཾ པཝཏྟཏི… པཙྪིམཾ སམུདྡཾ ཨཛ྄ཛྷོགཱཧེཏྭཱ པཙྩུཏྟརིཏྭཱ ཨུཏྟརཾ དིསཾ པཝཏྟཏི ཨནྭདེཝ རཱཛཱ ཙཀྐཝཏྟཱི སདྡྷིཾ ཙཏུརངྒིནིཡཱ སེནཱཡ། ཡསྨིཾ ཁོ པན, བྷིཀྑཝེ, པདེསེ ཙཀྐརཏནཾ པཏིཊྛཱཏི ཏཏྠ རཱཛཱ ཙཀྐཝཏྟཱི ཝཱསཾ ཨུཔེཏི སདྡྷིཾ ཙཏུརངྒིནིཡཱ སེནཱཡ།
257. ‘‘Atha kho taṃ, bhikkhave, cakkaratanaṃ puratthimaṃ samuddaṃ ajjhogāhetvā 66 paccuttaritvā dakkhiṇaṃ disaṃ pavattati…pe… dakkhiṇaṃ samuddaṃ ajjhogāhetvā paccuttaritvā pacchimaṃ disaṃ pavattati… pacchimaṃ samuddaṃ ajjhogāhetvā paccuttaritvā uttaraṃ disaṃ pavattati anvadeva rājā cakkavattī saddhiṃ caturaṅginiyā senāya. Yasmiṃ kho pana, bhikkhave, padese cakkaratanaṃ patiṭṭhāti tattha rājā cakkavattī vāsaṃ upeti saddhiṃ caturaṅginiyā senāya.
‘‘ཡེ ཁོ པན, བྷིཀྑཝེ, ཨུཏྟརཱཡ དིསཱཡ པཊིརཱཛཱནོ ཏེ རཱཛཱནཾ ཙཀྐཝཏྟིཾ ཨུཔསངྐམིཏྭཱ ཨེཝམཱཧཾསུ – ‘ཨེཧི ཁོ, མཧཱརཱཛ! སྭཱགཏཾ ཏེ, མཧཱརཱཛ! སཀཾ ཏེ, མཧཱརཱཛ! ཨནུསཱས, མཧཱརཱཛཱ’ཏི། རཱཛཱ ཙཀྐཝཏྟཱི ཨེཝམཱཧ – ‘པཱཎོ ན ཧནྟབྦོ, ཨདིནྣཾ ནཱདཱཏབྦཾ, ཀཱམེསུམིཙྪཱ ན ཙརིཏབྦཱ, མུསཱ ན བྷཱསིཏབྦཱ, མཛྫཾ ན པཱཏབྦཾ; ཡཐཱབྷུཏྟཉྩ བྷུཉྫཐཱ’ཏི། ཡེ ཁོ པན, བྷིཀྑཝེ, ཨུཏྟརཱཡ དིསཱཡ པཊིརཱཛཱནོ ཏེ རཉྙོ ཙཀྐཝཏྟིསྶ ཨནུཡནྟཱ བྷཝནྟི།
‘‘Ye kho pana, bhikkhave, uttarāya disāya paṭirājāno te rājānaṃ cakkavattiṃ upasaṅkamitvā evamāhaṃsu – ‘ehi kho, mahārāja! Svāgataṃ te, mahārāja! Sakaṃ te, mahārāja! Anusāsa, mahārājā’ti. Rājā cakkavattī evamāha – ‘pāṇo na hantabbo, adinnaṃ nādātabbaṃ, kāmesumicchā na caritabbā, musā na bhāsitabbā, majjaṃ na pātabbaṃ; yathābhuttañca bhuñjathā’ti. Ye kho pana, bhikkhave, uttarāya disāya paṭirājāno te rañño cakkavattissa anuyantā bhavanti.
‘‘ཨཐ ཁོ ཏཾ, བྷིཀྑཝེ, ཙཀྐརཏནཾ སམུདྡཔརིཡནྟཾ པཐཝིཾ ཨབྷིཝིཛིནིཏྭཱ ཏམེཝ རཱཛདྷཱནིཾ པཙྩཱགནྟྭཱ རཉྙོ ཙཀྐཝཏྟིསྶ ཨནྟེཔུརདྭཱརེ ཨཀྑཱཧཏཾ མཉྙེ ཏིཊྛཏི རཉྙོ ཙཀྐཝཏྟིསྶ ཨནྟེཔུརདྭཱརཾ ཨུཔསོབྷཡམཱནཾ། རཉྙོ, བྷིཀྑཝེ, ཙཀྐཝཏྟིསྶ ཨེཝརཱུཔཾ ཙཀྐརཏནཾ པཱཏུབྷཝཏི།
‘‘Atha kho taṃ, bhikkhave, cakkaratanaṃ samuddapariyantaṃ pathaviṃ abhivijinitvā tameva rājadhāniṃ paccāgantvā rañño cakkavattissa antepuradvāre akkhāhataṃ maññe tiṭṭhati rañño cakkavattissa antepuradvāraṃ upasobhayamānaṃ. Rañño, bhikkhave, cakkavattissa evarūpaṃ cakkaratanaṃ pātubhavati.
༢༥༨. ‘‘པུན ཙཔརཾ, བྷིཀྑཝེ, རཉྙོ ཙཀྐཝཏྟིསྶ ཧཏྠིརཏནཾ པཱཏུབྷཝཏི – སབྦསེཏོ སཏྟཔྤཏིཊྛོ ཨིདྡྷིམཱ ཝེཧཱསངྒམོ ཨུཔོསཐོ ནཱམ ནཱགརཱཛཱ། ཏཾ དིསྭཱན རཉྙོ ཙཀྐཝཏྟིསྶ ཙིཏྟཾ པསཱིདཏི – ‘བྷདྡཀཾ ཝཏ, བྷོ, ཧཏྠིཡཱནཾ, སཙེ དམཐཾ ཨུཔེཡྻཱ’ཏི། ཨཐ ཁོ ཏཾ, བྷིཀྑཝེ, ཧཏྠིརཏནཾ སེཡྻཐཱཔི ནཱམ བྷདྡོ ཧཏྠཱཛཱནཱིཡོ དཱིགྷརཏྟཾ སུཔརིདནྟོ ཨེཝམེཝ དམཐཾ ཨུཔེཏི། བྷཱུཏཔུབྦཾ, བྷིཀྑཝེ, རཱཛཱ ཙཀྐཝཏྟཱི ཏམེཝ ཧཏྠིརཏནཾ ཝཱིམཾསམཱནོ པུབྦཎྷསམཡཾ ཨབྷིརུཧིཏྭཱ སམུདྡཔརིཡནྟཾ པཐཝིཾ ཨནུསཾཡཱཡིཏྭཱ ཏམེཝ རཱཛདྷཱནིཾ པཙྩཱགནྟྭཱ པཱཏརཱསམཀཱསི། རཉྙོ, བྷིཀྑཝེ, ཙཀྐཝཏྟིསྶ ཨེཝརཱུཔཾ ཧཏྠིརཏནཾ པཱཏུབྷཝཏི།
258. ‘‘Puna caparaṃ, bhikkhave, rañño cakkavattissa hatthiratanaṃ pātubhavati – sabbaseto sattappatiṭṭho iddhimā vehāsaṅgamo uposatho nāma nāgarājā. Taṃ disvāna rañño cakkavattissa cittaṃ pasīdati – ‘bhaddakaṃ vata, bho, hatthiyānaṃ, sace damathaṃ upeyyā’ti. Atha kho taṃ, bhikkhave, hatthiratanaṃ seyyathāpi nāma bhaddo hatthājānīyo dīgharattaṃ suparidanto evameva damathaṃ upeti. Bhūtapubbaṃ, bhikkhave, rājā cakkavattī tameva hatthiratanaṃ vīmaṃsamāno pubbaṇhasamayaṃ abhiruhitvā samuddapariyantaṃ pathaviṃ anusaṃyāyitvā tameva rājadhāniṃ paccāgantvā pātarāsamakāsi. Rañño, bhikkhave, cakkavattissa evarūpaṃ hatthiratanaṃ pātubhavati.
‘‘པུན ཙཔརཾ, བྷིཀྑཝེ, རཉྙོ ཙཀྐཝཏྟིསྶ ཨསྶརཏནཾ པཱཏུབྷཝཏི – སབྦསེཏོ ཀཱལ༹སཱིསོ མུཉྫཀེསོ ཨིདྡྷིམཱ ཝེཧཱསངྒམོ ཝལཱཧཀོ ནཱམ ཨསྶརཱཛཱ། ཏཾ དིསྭཱན རཉྙོ ཙཀྐཝཏྟིསྶ ཙིཏྟཾ པསཱིདཏི – ‘བྷདྡཀཾ ཝཏ, བྷོ, ཨསྶཡཱནཾ, སཙེ དམཐཾ ཨུཔེཡྻཱ’ཏི། ཨཐ ཁོ ཏཾ, བྷིཀྑཝེ, ཨསྶརཏནཾ སེཡྻཐཱཔི ནཱམ བྷདྡོ ཨསྶཱཛཱནཱིཡོ དཱིགྷརཏྟཾ སུཔརིདནྟོ ཨེཝམེཝ དམཐཾ ཨུཔེཏི། བྷཱུཏཔུབྦཾ, བྷིཀྑཝེ, རཱཛཱ ཙཀྐཝཏྟཱི ཏམེཝ ཨསྶརཏནཾ ཝཱིམཾསམཱནོ པུབྦཎྷསམཡཾ ཨབྷིརུཧིཏྭཱ སམུདྡཔརིཡནྟཾ པཐཝིཾ ཨནུསཾཡཱཡིཏྭཱ ཏམེཝ རཱཛདྷཱནིཾ པཙྩཱགནྟྭཱ པཱཏརཱསམཀཱསི། རཉྙོ, བྷིཀྑཝེ, ཙཀྐཝཏྟིསྶ ཨེཝརཱུཔཾ ཨསྶརཏནཾ པཱཏུབྷཝཏི།
‘‘Puna caparaṃ, bhikkhave, rañño cakkavattissa assaratanaṃ pātubhavati – sabbaseto kāḷasīso muñjakeso iddhimā vehāsaṅgamo valāhako nāma assarājā. Taṃ disvāna rañño cakkavattissa cittaṃ pasīdati – ‘bhaddakaṃ vata, bho, assayānaṃ, sace damathaṃ upeyyā’ti. Atha kho taṃ, bhikkhave, assaratanaṃ seyyathāpi nāma bhaddo assājānīyo dīgharattaṃ suparidanto evameva damathaṃ upeti. Bhūtapubbaṃ, bhikkhave, rājā cakkavattī tameva assaratanaṃ vīmaṃsamāno pubbaṇhasamayaṃ abhiruhitvā samuddapariyantaṃ pathaviṃ anusaṃyāyitvā tameva rājadhāniṃ paccāgantvā pātarāsamakāsi. Rañño, bhikkhave, cakkavattissa evarūpaṃ assaratanaṃ pātubhavati.
‘‘པུན ཙཔརཾ, བྷིཀྑཝེ, རཉྙོ ཙཀྐཝཏྟིསྶ མཎིརཏནཾ པཱཏུབྷཝཏི། སོ ཧོཏི མཎི ཝེལུ༹རིཡོ སུབྷོ ཛཱཏིམཱ ཨཊྛཾསོ སུཔརིཀམྨཀཏོ ། ཏསྶ ཁོ པན, བྷིཀྑཝེ, མཎིརཏནསྶ ཨཱབྷཱ སམནྟཱ ཡོཛནཾ ཕུཊཱ ཧོཏི། བྷཱུཏཔུབྦཾ, བྷིཀྑཝེ, རཱཛཱ ཙཀྐཝཏྟཱི ཏམེཝ མཎིརཏནཾ ཝཱིམཾསམཱནོ ཙཏུརངྒིནིཾ སེནཾ སནྣཡ྄ཧིཏྭཱ མཎིཾ དྷཛགྒཾ ཨཱརོཔེཏྭཱ རཏྟནྡྷཀཱརཏིམིསཱཡ པཱཡཱསི། ཡེ ཁོ པན, བྷིཀྑཝེ, སམནྟཱ གཱམཱ ཨཧེསུཾ ཏེ ཏེནོབྷཱསེན ཀམྨནྟེ པཡོཛེསུཾ ‘དིཝཱ’ཏི མཉྙམཱནཱ། རཉྙོ, བྷིཀྑཝེ, ཙཀྐཝཏྟིསྶ ཨེཝརཱུཔཾ མཎིརཏནཾ པཱཏུབྷཝཏི།
‘‘Puna caparaṃ, bhikkhave, rañño cakkavattissa maṇiratanaṃ pātubhavati. So hoti maṇi veḷuriyo subho jātimā aṭṭhaṃso suparikammakato . Tassa kho pana, bhikkhave, maṇiratanassa ābhā samantā yojanaṃ phuṭā hoti. Bhūtapubbaṃ, bhikkhave, rājā cakkavattī tameva maṇiratanaṃ vīmaṃsamāno caturaṅginiṃ senaṃ sannayhitvā maṇiṃ dhajaggaṃ āropetvā rattandhakāratimisāya pāyāsi. Ye kho pana, bhikkhave, samantā gāmā ahesuṃ te tenobhāsena kammante payojesuṃ ‘divā’ti maññamānā. Rañño, bhikkhave, cakkavattissa evarūpaṃ maṇiratanaṃ pātubhavati.
‘‘པུན ཙཔརཾ, བྷིཀྑཝེ, རཉྙོ ཙཀྐཝཏྟིསྶ ཨིཏྠིརཏནཾ པཱཏུབྷཝཏི། སཱ ཨབྷིརཱུཔཱ དསྶནཱིཡཱ པཱསཱདིཀཱ པརམཱཡ ཝཎྞཔོཀྑརཏཱཡ སམནྣཱགཏཱ ནཱཏིདཱིགྷཱ ནཱཏིརསྶཱ ནཱཏིཀིསཱ ནཱཏིཐཱུལཱ ནཱཏིཀཱལི༹ཀཱ 67 ནཱཙྩོདཱཏཱ, ཨཏིཀྐནྟཱ མཱནུསཾ ཝཎྞཾ, ཨཔྤཏྟཱ དིབྦཾ ཝཎྞཾ། ཏསྶ ཁོ པན, བྷིཀྑཝེ, ཨིཏྠིརཏནསྶ ཨེཝརཱུཔོ ཀཱཡསམྥསྶོ ཧོཏི སེཡྻཐཱཔི ནཱམ ཏཱུལཔིཙུནོ ཝཱ ཀཔྤཱསཔིཙུནོ ཝཱ། ཏསྶ ཁོ པན, བྷིཀྑཝེ, ཨིཏྠིརཏནསྶ སཱིཏེ ཨུཎྷཱནི གཏྟཱནི ཧོནྟི, ཨུཎྷེ སཱིཏཱནི གཏྟཱནི ཧོནྟི། ཏསྶ ཁོ པན, བྷིཀྑཝེ, ཨིཏྠིརཏནསྶ ཀཱཡཏོ ཙནྡནགནྡྷོ ཝཱཡཏི, མུཁཏོ ཨུཔྤལགནྡྷོ ཝཱཡཏི། ཏཾ ཁོ པན, བྷིཀྑཝེ, ཨིཏྠིརཏནཾ རཉྙོ ཙཀྐཝཏྟིསྶ པུབྦུཊྛཱཡིནཱི ཧོཏི པཙྪཱནིཔཱཏིནཱི ཀིཾཀཱརཔཊིསྶཱཝིནཱི མནཱཔཙཱརིནཱི པིཡཝཱདིནཱི། ཏཾ ཁོ པན, བྷིཀྑཝེ, ཨིཏྠིརཏནཾ རཱཛཱནཾ ཙཀྐཝཏྟིཾ མནསཱཔི ནོ ཨཏིཙརཏི, ཀུཏོ པན ཀཱཡེན? རཉྙོ, བྷིཀྑཝེ, ཙཀྐཝཏྟིསྶ ཨེཝརཱུཔཾ ཨིཏྠིརཏནཾ པཱཏུབྷཝཏི།
‘‘Puna caparaṃ, bhikkhave, rañño cakkavattissa itthiratanaṃ pātubhavati. Sā abhirūpā dassanīyā pāsādikā paramāya vaṇṇapokkharatāya samannāgatā nātidīghā nātirassā nātikisā nātithūlā nātikāḷikā 68 nāccodātā, atikkantā mānusaṃ vaṇṇaṃ, appattā dibbaṃ vaṇṇaṃ. Tassa kho pana, bhikkhave, itthiratanassa evarūpo kāyasamphasso hoti seyyathāpi nāma tūlapicuno vā kappāsapicuno vā. Tassa kho pana, bhikkhave, itthiratanassa sīte uṇhāni gattāni honti, uṇhe sītāni gattāni honti. Tassa kho pana, bhikkhave, itthiratanassa kāyato candanagandho vāyati, mukhato uppalagandho vāyati. Taṃ kho pana, bhikkhave, itthiratanaṃ rañño cakkavattissa pubbuṭṭhāyinī hoti pacchānipātinī kiṃkārapaṭissāvinī manāpacārinī piyavādinī. Taṃ kho pana, bhikkhave, itthiratanaṃ rājānaṃ cakkavattiṃ manasāpi no aticarati, kuto pana kāyena? Rañño, bhikkhave, cakkavattissa evarūpaṃ itthiratanaṃ pātubhavati.
‘‘པུན ཙཔརཾ, བྷིཀྑཝེ, རཉྙོ ཙཀྐཝཏྟིསྶ གཧཔཏིརཏནཾ པཱཏུབྷཝཏི། ཏསྶ ཀམྨཝིཔཱཀཛཾ དིབྦཙཀྑུ པཱཏུབྷཝཏི, ཡེན ནིདྷིཾ པསྶཏི སསྶཱམིཀམྤི ཨསྶཱམིཀམྤི། སོ རཱཛཱནཾ ཙཀྐཝཏྟིཾ ཨུཔསངྐམིཏྭཱ ཨེཝམཱཧ – ‘ཨཔྤོསྶུཀྐོ ཏྭཾ, དེཝ, ཧོཧི། ཨཧཾ ཏེ དྷནེན དྷནཀརཎཱིཡཾ 69 ཀརིསྶཱམཱི’ཏི། བྷཱུཏཔུབྦཾ, བྷིཀྑཝེ, རཱཛཱ ཙཀྐཝཏྟཱི ཏམེཝ གཧཔཏིརཏནཾ ཝཱིམཾསམཱནོ ནཱཝཾ ཨབྷིརུཧིཏྭཱ མཛ྄ཛྷེ གངྒཱཡ ནདིཡཱ སོཏཾ ཨོགཱཧིཏྭཱ 70 གཧཔཏིརཏནཾ ཨེཏདཝོཙ – ‘ཨཏྠོ མེ, གཧཔཏི, ཧིརཉྙསུཝཎྞེནཱ’ཏི། ‘ཏེན ཧི, མཧཱརཱཛ, ཨེཀཾ ཏཱིརཾ ནཱཝཱ ཨུཔེཏཱུ’ཏི། ‘ཨིདྷེཝ མེ, གཧཔཏི, ཨཏྠོ ཧིརཉྙསུཝཎྞེནཱ’ཏི། ཨཐ ཁོ ཏཾ, བྷིཀྑཝེ, གཧཔཏིརཏནཾ ཨུབྷོཧི ཧཏྠེཧི ཨུདཀེ ཨོམསིཏྭཱ པཱུརཾ ཧིརཉྙསུཝཎྞསྶ ཀུམྦྷིཾ ཨུདྡྷརིཏྭཱ རཱཛཱནཾ ཙཀྐཝཏྟིཾ ཨེཏདཝོཙ – ‘ཨལམེཏྟཱཝཏཱ, མཧཱརཱཛ! ཀཏམེཏྟཱཝཏཱ, མཧཱརཱཛ! པཱུཛིཏམེཏྟཱཝཏཱ, མཧཱརཱཛཱ’ཏི། རཱཛཱ ཙཀྐཝཏྟཱི ཨེཝམཱཧ – ‘ཨལམེཏྟཱཝཏཱ, གཧཔཏི! ཀཏམེཏྟཱཝཏཱ, གཧཔཏི! པཱུཛིཏམེཏྟཱཝཏཱ, གཧཔཏཱི’ཏི ། རཉྙོ, བྷིཀྑཝེ, ཙཀྐཝཏྟིསྶ ཨེཝརཱུཔཾ གཧཔཏིརཏནཾ པཱཏུབྷཝཏི།
‘‘Puna caparaṃ, bhikkhave, rañño cakkavattissa gahapatiratanaṃ pātubhavati. Tassa kammavipākajaṃ dibbacakkhu pātubhavati, yena nidhiṃ passati sassāmikampi assāmikampi. So rājānaṃ cakkavattiṃ upasaṅkamitvā evamāha – ‘appossukko tvaṃ, deva, hohi. Ahaṃ te dhanena dhanakaraṇīyaṃ 71 karissāmī’ti. Bhūtapubbaṃ, bhikkhave, rājā cakkavattī tameva gahapatiratanaṃ vīmaṃsamāno nāvaṃ abhiruhitvā majjhe gaṅgāya nadiyā sotaṃ ogāhitvā 72 gahapatiratanaṃ etadavoca – ‘attho me, gahapati, hiraññasuvaṇṇenā’ti. ‘Tena hi, mahārāja, ekaṃ tīraṃ nāvā upetū’ti. ‘Idheva me, gahapati, attho hiraññasuvaṇṇenā’ti. Atha kho taṃ, bhikkhave, gahapatiratanaṃ ubhohi hatthehi udake omasitvā pūraṃ hiraññasuvaṇṇassa kumbhiṃ uddharitvā rājānaṃ cakkavattiṃ etadavoca – ‘alamettāvatā, mahārāja! Katamettāvatā, mahārāja! Pūjitamettāvatā, mahārājā’ti. Rājā cakkavattī evamāha – ‘alamettāvatā, gahapati! Katamettāvatā, gahapati! Pūjitamettāvatā, gahapatī’ti . Rañño, bhikkhave, cakkavattissa evarūpaṃ gahapatiratanaṃ pātubhavati.
‘‘པུན ཙཔརཾ, བྷིཀྑཝེ, རཉྙོ ཙཀྐཝཏྟིསྶ པརིཎཱཡཀརཏནཾ པཱཏུབྷཝཏི – པཎྜིཏོ བྱཏྟོ མེདྷཱཝཱི པཊིབལོ རཱཛཱནཾ ཙཀྐཝཏྟིཾ ཨུཔཡཱཔེཏབྦཾ ཨུཔཡཱཔེཏུཾ 73 ཨཔཡཱཔེཏབྦཾ ཨཔཡཱཔེཏུཾ ཋཔེཏབྦཾ ཋཔེཏུཾ། སོ རཱཛཱནཾ ཙཀྐཝཏྟིཾ ཨུཔསངྐམིཏྭཱ ཨེཝམཱཧ – ‘ཨཔྤོསྶུཀྐོ ཏྭཾ , དེཝ, ཧོཧི། ཨཧམནུསཱསིསྶཱམཱི’ཏི། རཉྙོ, བྷིཀྑཝེ, ཙཀྐཝཏྟིསྶ ཨེཝརཱུཔཾ པརིཎཱཡཀརཏནཾ པཱཏུབྷཝཏི། རཱཛཱ, བྷིཀྑཝེ, ཙཀྐཝཏྟཱི ཨིམེཧི སཏྟཧི རཏནེཧི སམནྣཱགཏོ ཧོཏི།
‘‘Puna caparaṃ, bhikkhave, rañño cakkavattissa pariṇāyakaratanaṃ pātubhavati – paṇḍito byatto medhāvī paṭibalo rājānaṃ cakkavattiṃ upayāpetabbaṃ upayāpetuṃ 74 apayāpetabbaṃ apayāpetuṃ ṭhapetabbaṃ ṭhapetuṃ. So rājānaṃ cakkavattiṃ upasaṅkamitvā evamāha – ‘appossukko tvaṃ , deva, hohi. Ahamanusāsissāmī’ti. Rañño, bhikkhave, cakkavattissa evarūpaṃ pariṇāyakaratanaṃ pātubhavati. Rājā, bhikkhave, cakkavattī imehi sattahi ratanehi samannāgato hoti.
༢༥༩. ‘‘ཀཏམཱཧི ཙཏཱུཧི ཨིདྡྷཱིཧི? ཨིདྷ, བྷིཀྑཝེ, རཱཛཱ ཙཀྐཝཏྟཱི ཨབྷིརཱུཔོ ཧོཏི དསྶནཱིཡོ པཱསཱདིཀོ པརམཱཡ ཝཎྞཔོཀྑརཏཱཡ སམནྣཱགཏོ ཨཏིཝིཡ ཨཉྙེཧི མནུསྶེཧི། རཱཛཱ, བྷིཀྑཝེ, ཙཀྐཝཏྟཱི ཨིམཱཡ པཋམཱཡ ཨིདྡྷིཡཱ སམནྣཱགཏོ ཧོཏི།
259. ‘‘Katamāhi catūhi iddhīhi? Idha, bhikkhave, rājā cakkavattī abhirūpo hoti dassanīyo pāsādiko paramāya vaṇṇapokkharatāya samannāgato ativiya aññehi manussehi. Rājā, bhikkhave, cakkavattī imāya paṭhamāya iddhiyā samannāgato hoti.
‘‘པུན ཙཔརཾ, བྷིཀྑཝེ, རཱཛཱ ཙཀྐཝཏྟཱི དཱིགྷཱཡུཀོ ཧོཏི ཙིརཊྛིཏིཀོ ཨཏིཝིཡ ཨཉྙེཧི མནུསྶེཧི། རཱཛཱ, བྷིཀྑཝེ, ཙཀྐཝཏྟཱི ཨིམཱཡ དུཏིཡཱཡ ཨིདྡྷིཡཱ སམནྣཱགཏོ ཧོཏི།
‘‘Puna caparaṃ, bhikkhave, rājā cakkavattī dīghāyuko hoti ciraṭṭhitiko ativiya aññehi manussehi. Rājā, bhikkhave, cakkavattī imāya dutiyāya iddhiyā samannāgato hoti.
‘‘པུན ཙཔརཾ, བྷིཀྑཝེ, རཱཛཱ ཙཀྐཝཏྟཱི ཨཔྤཱབཱདྷོ ཧོཏི ཨཔྤཱཏངྐོ སམཝེཔཱཀིནིཡཱ གཧཎིཡཱ སམནྣཱགཏོ ནཱཏིསཱིཏཱཡ ནཱཙྩུཎྷཱཡ ཨཏིཝིཡ ཨཉྙེཧི མནུསྶེཧི། རཱཛཱ, བྷིཀྑཝེ, ཙཀྐཝཏྟཱི ཨིམཱཡ ཏཏིཡཱཡ ཨིདྡྷིཡཱ སམནྣཱགཏོ ཧོཏི།
‘‘Puna caparaṃ, bhikkhave, rājā cakkavattī appābādho hoti appātaṅko samavepākiniyā gahaṇiyā samannāgato nātisītāya nāccuṇhāya ativiya aññehi manussehi. Rājā, bhikkhave, cakkavattī imāya tatiyāya iddhiyā samannāgato hoti.
‘‘པུན ཙཔརཾ, བྷིཀྑཝེ, རཱཛཱ ཙཀྐཝཏྟཱི བྲཱཧྨཎགཧཔཏིཀཱནཾ པིཡོ ཧོཏི མནཱཔོ། སེཡྻཐཱཔི, བྷིཀྑཝེ, པིཏཱ པུཏྟཱནཾ པིཡོ ཧོཏི མནཱཔོ, ཨེཝམེཝ ཁོ, བྷིཀྑཝེ, རཱཛཱ ཙཀྐཝཏྟཱི བྲཱཧྨཎགཧཔཏིཀཱནཾ པིཡོ ཧོཏི མནཱཔོ། རཉྙོཔི, བྷིཀྑཝེ, ཙཀྐཝཏྟིསྶ བྲཱཧྨཎགཧཔཏིཀཱ པིཡཱ ཧོནྟི མནཱཔཱ། སེཡྻཐཱཔི, བྷིཀྑཝེ, པིཏུ པུཏྟཱ པིཡཱ ཧོནྟི མནཱཔཱ, ཨེཝམེཝ ཁོ, བྷིཀྑཝེ, རཉྙོཔི ཙཀྐཝཏྟིསྶ བྲཱཧྨཎགཧཔཏིཀཱ པིཡཱ ཧོནྟི མནཱཔཱ།
‘‘Puna caparaṃ, bhikkhave, rājā cakkavattī brāhmaṇagahapatikānaṃ piyo hoti manāpo. Seyyathāpi, bhikkhave, pitā puttānaṃ piyo hoti manāpo, evameva kho, bhikkhave, rājā cakkavattī brāhmaṇagahapatikānaṃ piyo hoti manāpo. Raññopi, bhikkhave, cakkavattissa brāhmaṇagahapatikā piyā honti manāpā. Seyyathāpi, bhikkhave, pitu puttā piyā honti manāpā, evameva kho, bhikkhave, raññopi cakkavattissa brāhmaṇagahapatikā piyā honti manāpā.
‘‘བྷཱུཏཔུབྦཾ , བྷིཀྑཝེ, རཱཛཱ ཙཀྐཝཏྟཱི ཙཏུརངྒིནིཡཱ སེནཱཡ ཨུཡྻཱནབྷཱུམིཾ ནིཡྻཱསི། ཨཐ ཁོ, བྷིཀྑཝེ, བྲཱཧྨཎགཧཔཏིཀཱ རཱཛཱནཾ ཙཀྐཝཏྟིཾ ཨུཔསངྐམིཏྭཱ ཨེཝམཱཧཾསུ – ‘ཨཏརམཱནོ, དེཝ, ཡཱཧི ཡཐཱ ཏཾ མཡཾ ཙིརཏརཾ པསྶེཡྻཱམཱ’ཏི། རཱཛཱཔི, བྷིཀྑཝེ, ཙཀྐཝཏྟཱི སཱརཐིཾ ཨཱམནྟེསི – ‘ཨཏརམཱནོ , སཱརཐི, པེསེཧི ཡཐཱ མཾ བྲཱཧྨཎགཧཔཏིཀཱ ཙིརཏརཾ པསྶེཡྻུ’ནྟི། རཱཛཱ, བྷིཀྑཝེ, ཙཀྐཝཏྟཱི ཨིམཱཡ ཙཏུཏྠཱཡ ཨིདྡྷིཡཱ སམནྣཱགཏོ ཧོཏི། རཱཛཱ, བྷིཀྑཝེ, ཙཀྐཝཏྟཱི ཨིམཱཧི ཙཏཱུཧི ཨིདྡྷཱིཧི སམནྣཱགཏོ ཧོཏི།
‘‘Bhūtapubbaṃ , bhikkhave, rājā cakkavattī caturaṅginiyā senāya uyyānabhūmiṃ niyyāsi. Atha kho, bhikkhave, brāhmaṇagahapatikā rājānaṃ cakkavattiṃ upasaṅkamitvā evamāhaṃsu – ‘ataramāno, deva, yāhi yathā taṃ mayaṃ cirataraṃ passeyyāmā’ti. Rājāpi, bhikkhave, cakkavattī sārathiṃ āmantesi – ‘ataramāno , sārathi, pesehi yathā maṃ brāhmaṇagahapatikā cirataraṃ passeyyu’nti. Rājā, bhikkhave, cakkavattī imāya catutthāya iddhiyā samannāgato hoti. Rājā, bhikkhave, cakkavattī imāhi catūhi iddhīhi samannāgato hoti.
‘‘ཏཾ ཀིཾ མཉྙཐ, བྷིཀྑཝེ, ཨཔི ནུ ཁོ རཱཛཱ ཙཀྐཝཏྟཱི ཨིམེཧི སཏྟཧི རཏནེཧི སམནྣཱགཏོ ཨིམཱཧི ཙཏཱུཧི ཙ ཨིདྡྷཱིཧི ཏཏོནིདཱནཾ སུཁཾ སོམནསྶཾ པཊིསཾཝེདིཡེཐཱ’’ཏི? ‘‘ཨེཀམེཀེནཔི, བྷནྟེ, རཏནེན 75 སམནྣཱགཏོ རཱཛཱ ཙཀྐཝཏྟཱི ཏཏོནིདཱནཾ སུཁཾ སོམནསྶཾ པཊིསཾཝེདིཡེཐ, ཀོ པན ཝཱདོ སཏྟཧི རཏནེཧི ཙཏཱུཧི ཙ ཨིདྡྷཱིཧཱི’’ཏི?
‘‘Taṃ kiṃ maññatha, bhikkhave, api nu kho rājā cakkavattī imehi sattahi ratanehi samannāgato imāhi catūhi ca iddhīhi tatonidānaṃ sukhaṃ somanassaṃ paṭisaṃvediyethā’’ti? ‘‘Ekamekenapi, bhante, ratanena 76 samannāgato rājā cakkavattī tatonidānaṃ sukhaṃ somanassaṃ paṭisaṃvediyetha, ko pana vādo sattahi ratanehi catūhi ca iddhīhī’’ti?
༢༦༠. ཨཐ ཁོ བྷགཝཱ པརིཏྟཾ པཱཎིམཏྟཾ པཱསཱཎཾ གཧེཏྭཱ བྷིཀྑཱུ ཨཱམནྟེསི – ‘‘ཏཾ ཀིཾ མཉྙཐ, བྷིཀྑཝེ, ཀཏམོ ནུ ཁོ མཧནྟཏརོ – ཡོ ཙཱཡཾ མཡཱ པརིཏྟོ པཱཎིམཏྟོ པཱསཱཎོ གཧིཏོ ཡོ ཙ ཧིམཝཱ པབྦཏརཱཛཱ’’ཏི? ‘‘ཨཔྤམཏྟཀོ ཨཡཾ, བྷནྟེ, བྷགཝཏཱ པརིཏྟོ པཱཎིམཏྟོ པཱསཱཎོ གཧིཏོ; ཧིམཝནྟཾ པབྦཏརཱཛཱནཾ ཨུཔནིདྷཱཡ སངྑམྤི ན ཨུཔེཏི; ཀལབྷཱགམྤི ན ཨུཔེཏི; ཨུཔནིདྷམྤི ན ཨུཔེཏཱི’’ཏི། ‘‘ཨེཝམེཝ ཁོ, བྷིཀྑཝེ, ཡཾ རཱཛཱ ཙཀྐཝཏྟཱི སཏྟཧི རཏནེཧི སམནྣཱགཏོ ཙཏཱུཧི ཙ ཨིདྡྷཱིཧི ཏཏོནིདཱནཾ སུཁཾ སོམནསྶཾ པཊིསཾཝེདེཏི ཏཾ དིབྦསྶ སུཁསྶ ཨུཔནིདྷཱཡ སངྑམྤི ན ཨུཔེཏི; ཀལབྷཱགམྤི ན ཨུཔེཏི; ཨུཔནིདྷམྤི ན ཨུཔེཏི’’།
260. Atha kho bhagavā parittaṃ pāṇimattaṃ pāsāṇaṃ gahetvā bhikkhū āmantesi – ‘‘taṃ kiṃ maññatha, bhikkhave, katamo nu kho mahantataro – yo cāyaṃ mayā paritto pāṇimatto pāsāṇo gahito yo ca himavā pabbatarājā’’ti? ‘‘Appamattako ayaṃ, bhante, bhagavatā paritto pāṇimatto pāsāṇo gahito; himavantaṃ pabbatarājānaṃ upanidhāya saṅkhampi na upeti; kalabhāgampi na upeti; upanidhampi na upetī’’ti. ‘‘Evameva kho, bhikkhave, yaṃ rājā cakkavattī sattahi ratanehi samannāgato catūhi ca iddhīhi tatonidānaṃ sukhaṃ somanassaṃ paṭisaṃvedeti taṃ dibbassa sukhassa upanidhāya saṅkhampi na upeti; kalabhāgampi na upeti; upanidhampi na upeti’’.
‘‘ས ཁོ སོ, བྷིཀྑཝེ, པཎྜིཏོ སཙེ ཀདཱཙི ཀརཧཙི དཱིགྷསྶ ཨདྡྷུནོ ཨཙྩཡེན མནུསྶཏྟཾ ཨཱགཙྪཏི, ཡཱནི ཏཱནི ཨུཙྩཱཀུལཱནི – ཁཏྟིཡམཧཱསཱལཀུལཾ ཝཱ བྲཱཧྨཎམཧཱསཱལཀུལཾ ཝཱ གཧཔཏིམཧཱསཱལཀུལཾ ཝཱ ཏཐཱརཱུཔེ ཀུལེ པཙྩཱཛཱཡཏི ཨཌྜྷེ མཧདྡྷནེ མཧཱབྷོགེ པཧཱུཏཛཱཏརཱུཔརཛཏེ པཧཱུཏཝིཏྟཱུཔཀརཎེ པཧཱུཏདྷནདྷཉྙེ། སོ ཙ ཧོཏི ཨབྷིརཱུཔོ དསྶནཱིཡོ པཱསཱདིཀོ པརམཱཡ ཝཎྞཔོཀྑརཏཱཡ སམནྣཱགཏོ, ལཱབྷཱི ཨནྣསྶ པཱནསྶ ཝཏྠསྶ ཡཱནསྶ མཱལཱགནྡྷཝིལེཔནསྶ སེཡྻཱཝསཐཔདཱིཔེཡྻསྶ། སོ ཀཱཡེན སུཙརིཏཾ ཙརཏི, ཝཱཙཱཡ སུཙརིཏཾ ཙརཏི, མནསཱ སུཙརིཏཾ ཙརཏི། སོ ཀཱཡེན སུཙརིཏཾ ཙརིཏྭཱ, ཝཱཙཱཡ སུཙརིཏཾ ཙརིཏྭཱ, མནསཱ སུཙརིཏཾ ཙརིཏྭཱ, ཀཱཡསྶ བྷེདཱ པརཾ མརཎཱ སུགཏིཾ སགྒཾ ལོཀཾ ཨུཔཔཛྫཏི། སེཡྻཐཱཔི, བྷིཀྑཝེ, ཨཀྑདྷུཏྟོ པཋམེནེཝ ཀཊགྒཧེན མཧནྟཾ བྷོགཀྑནྡྷཾ ཨདྷིགཙྪེཡྻ; ཨཔྤམཏྟཀོ སོ, བྷིཀྑཝེ, ཀཊགྒཧོ ཡཾ སོ ཨཀྑདྷུཏྟོ པཋམེནེཝ ཀཊགྒཧེན མཧནྟཾ བྷོགཀྑནྡྷཾ ཨདྷིགཙྪེཡྻ། ཨཐ ཁོ ཨཡམེཝ ཏཏོ མཧནྟཏརོ ཀཊགྒཧོ ཡཾ སོ པཎྜིཏོ ཀཱཡེན སུཙརིཏཾ ཙརིཏྭཱ, ཝཱཙཱཡ སུཙརིཏཾ ཙརིཏྭཱ, མནསཱ སུཙརིཏཾ ཙརིཏྭཱ ཀཱཡསྶ བྷེདཱ པརཾ མརཎཱ སུགཏིཾ སགྒཾ ལོཀཾ ཨུཔཔཛྫཏི། ཨཡཾ, བྷིཀྑཝེ, ཀེཝལཱ པརིཔཱུརཱ པཎྜིཏབྷཱུམཱི’’ཏི།
‘‘Sa kho so, bhikkhave, paṇḍito sace kadāci karahaci dīghassa addhuno accayena manussattaṃ āgacchati, yāni tāni uccākulāni – khattiyamahāsālakulaṃ vā brāhmaṇamahāsālakulaṃ vā gahapatimahāsālakulaṃ vā tathārūpe kule paccājāyati aḍḍhe mahaddhane mahābhoge pahūtajātarūparajate pahūtavittūpakaraṇe pahūtadhanadhaññe. So ca hoti abhirūpo dassanīyo pāsādiko paramāya vaṇṇapokkharatāya samannāgato, lābhī annassa pānassa vatthassa yānassa mālāgandhavilepanassa seyyāvasathapadīpeyyassa. So kāyena sucaritaṃ carati, vācāya sucaritaṃ carati, manasā sucaritaṃ carati. So kāyena sucaritaṃ caritvā, vācāya sucaritaṃ caritvā, manasā sucaritaṃ caritvā, kāyassa bhedā paraṃ maraṇā sugatiṃ saggaṃ lokaṃ upapajjati. Seyyathāpi, bhikkhave, akkhadhutto paṭhameneva kaṭaggahena mahantaṃ bhogakkhandhaṃ adhigaccheyya; appamattako so, bhikkhave, kaṭaggaho yaṃ so akkhadhutto paṭhameneva kaṭaggahena mahantaṃ bhogakkhandhaṃ adhigaccheyya. Atha kho ayameva tato mahantataro kaṭaggaho yaṃ so paṇḍito kāyena sucaritaṃ caritvā, vācāya sucaritaṃ caritvā, manasā sucaritaṃ caritvā kāyassa bhedā paraṃ maraṇā sugatiṃ saggaṃ lokaṃ upapajjati. Ayaṃ, bhikkhave, kevalā paripūrā paṇḍitabhūmī’’ti.
ཨིདམཝོཙ བྷགཝཱ། ཨཏྟམནཱ ཏེ བྷིཀྑཱུ བྷགཝཏོ བྷཱསིཏཾ ཨབྷིནནྡུནྟི།
Idamavoca bhagavā. Attamanā te bhikkhū bhagavato bhāsitaṃ abhinandunti.
བཱལཔཎྜིཏསུཏྟཾ ནིཊྛིཏཾ ནཝམཾ།
Bālapaṇḍitasuttaṃ niṭṭhitaṃ navamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༩. བཱལཔཎྜིཏསུཏྟཝཎྞནཱ • 9. Bālapaṇḍitasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༩. བཱལཔཎྜིཏསུཏྟཝཎྞནཱ • 9. Bālapaṇḍitasuttavaṇṇanā
