| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
9. பா³லபண்டி³தஸுத்தவண்ணனா
9. Bālapaṇḍitasuttavaṇṇanā
19. நவமே அவிஜ்ஜானீவரணஸ்ஸாதி அவிஜ்ஜாய நிவாரிதஸ்ஸ. ஏவமயங் காயோ ஸமுதா³க³தோதி ஏவங் அவிஜ்ஜாய நிவாரிதத்தா தண்ஹாய ச ஸம்பயுத்தத்தாயேவ அயங் காயோ நிப்³ப³த்தோ. அயஞ்சேவ காயோதி அயஞ்சஸ்ஸ அத்தனோ ஸவிஞ்ஞாணகோ காயோ. ப³ஹித்³தா⁴ ச நாமரூபந்தி ப³ஹித்³தா⁴ ச பரேஸங் ஸவிஞ்ஞாணகோ காயோ. அத்தனோ ச பரஸ்ஸ ச பஞ்சஹி க²ந்தே⁴ஹி ச²ஹி ஆயதனேஹி சாபி அயங் அத்தோ² தீ³பேதப்³போ³வ. இத்தே²தங் த்³வயந்தி ஏவமேதங் த்³வயங். த்³வயங் படிச்ச ப²ஸ்ஸோதி அஞ்ஞத்த² சக்கு²ரூபாதீ³னி த்³வயானி படிச்ச சக்கு²ஸம்ப²ஸ்ஸாத³யோ வுத்தா, இத⁴ பன அஜ்ஜ²த்திகபா³ஹிரானி ஆயதனானி. மஹாத்³வயங் நாம கிரேதங். ஸளேவாயதனானீதி ஸளேவ ப²ஸ்ஸாயதனானி ப²ஸ்ஸகாரணானி. யேஹி பு²ட்டோ²தி யேஹி காரணபூ⁴தேஹி ஆயதனேஹி உப்பன்னேன ப²ஸ்ஸேன பு²ட்டோ². அஞ்ஞதரேனாதி எத்த² பரிபுண்ணவஸேன அஞ்ஞதரதா வேதி³தப்³பா³. தத்ராதி தஸ்மிங் பா³லபண்டி³தானங் காயனிப்³ப³த்தனாதி³ம்ஹி. கோ அதி⁴ப்பயாஸோதி கோ அதி⁴கபயோகோ³.
19. Navame avijjānīvaraṇassāti avijjāya nivāritassa. Evamayaṃ kāyo samudāgatoti evaṃ avijjāya nivāritattā taṇhāya ca sampayuttattāyeva ayaṃ kāyo nibbatto. Ayañceva kāyoti ayañcassa attano saviññāṇako kāyo. Bahiddhā ca nāmarūpanti bahiddhā ca paresaṃ saviññāṇako kāyo. Attano ca parassa ca pañcahi khandhehi chahi āyatanehi cāpi ayaṃ attho dīpetabbova. Itthetaṃ dvayanti evametaṃ dvayaṃ. Dvayaṃ paṭicca phassoti aññattha cakkhurūpādīni dvayāni paṭicca cakkhusamphassādayo vuttā, idha pana ajjhattikabāhirāni āyatanāni. Mahādvayaṃ nāma kiretaṃ. Saḷevāyatanānīti saḷeva phassāyatanāni phassakāraṇāni. Yehi phuṭṭhoti yehi kāraṇabhūtehi āyatanehi uppannena phassena phuṭṭho. Aññatarenāti ettha paripuṇṇavasena aññataratā veditabbā. Tatrāti tasmiṃ bālapaṇḍitānaṃ kāyanibbattanādimhi. Ko adhippayāsoti ko adhikapayogo.
ப⁴க³வங்மூலகாதி ப⁴க³வா மூலங் ஏதேஸந்தி ப⁴க³வங்மூலகா. இத³ங் வுத்தங் ஹோதி – இமே, ப⁴ந்தே, அம்ஹாகங் த⁴ம்மா புப்³பே³ கஸ்ஸபஸம்மாஸம்பு³த்³தே⁴ன உப்பாதி³தா, தஸ்மிங் பரினிப்³பு³தே ஏகங் பு³த்³த⁴ந்தரங் அஞ்ஞோ ஸமணோ வா ப்³ராஹ்மணோ வா இமே த⁴ம்மே உப்பாதே³துங் ஸமத்தோ² நாம நாஹோஸி, ப⁴க³வதா பன நோ இமே த⁴ம்மா உப்பாதி³தா. ப⁴க³வந்தஞ்ஹி நிஸ்ஸாய மயங் இமே த⁴ம்மே ஆஜானாம படிவிஜ்ஜா²மாதி ஏவங் ப⁴க³வங்மூலகா நோ, ப⁴ந்தே, த⁴ம்மாதி. ப⁴க³வங்னெத்திகாதி ப⁴க³வா ஹி த⁴ம்மானங் நேதா வினேதா அனுனேதா, யதா²ஸபா⁴வதோ பாடியேக்கங் பாடியேக்கங் நாமங் க³ஹெத்வா த³ஸ்ஸேதாதி த⁴ம்மா ப⁴க³வங்னெத்திகா நாம ஹொந்தி. ப⁴க³வங்படிஸரணாதி சதுபூ⁴மகத⁴ம்மா ஸப்³ப³ஞ்ஞுதஞ்ஞாணஸ்ஸ ஆபாத²ங் ஆக³ச்ச²மானா ப⁴க³வதி படிஸரந்தி நாமாதி ப⁴க³வங்படிஸரணா. படிஸரந்தீதி ஸமோஸரந்தி. அபிச மஹாபோ³தி⁴மண்டே³ நிஸின்னஸ்ஸ ப⁴க³வதோ படிவேத⁴வஸேன ப²ஸ்ஸோ ஆக³ச்ச²தி ‘‘அஹங் ப⁴க³வா கின்னாமோ’’தி? த்வங் பு²ஸனட்டே²ன ப²ஸ்ஸோ நாம. வேத³னா, ஸஞ்ஞா, ஸங்கா²ரா, விஞ்ஞாணங் ஆக³ச்ச²தி ‘‘அஹங் ப⁴க³வா கின்னாம’’ந்தி, த்வங் விஜானநட்டே²ன விஞ்ஞாணங் நாமாதி ஏவங் சதுபூ⁴மகத⁴ம்மானங் யதா²ஸபா⁴வதோ பாடியேக்கங் பாடியேக்கங் நாமங் க³ண்ஹந்தோ ப⁴க³வா த⁴ம்மே படிஸரதீதி ப⁴க³வங்படிஸரணா. ப⁴க³வந்தங்யேவ படிபா⁴தூதி ப⁴க³வதோவ ஏதஸ்ஸ பா⁴ஸிதஸ்ஸ அத்தோ² உபட்டா²து, தும்ஹேயேவ நோ கதெ²த்வா தே³தா²தி அத்தோ².
Bhagavaṃmūlakāti bhagavā mūlaṃ etesanti bhagavaṃmūlakā. Idaṃ vuttaṃ hoti – ime, bhante, amhākaṃ dhammā pubbe kassapasammāsambuddhena uppāditā, tasmiṃ parinibbute ekaṃ buddhantaraṃ añño samaṇo vā brāhmaṇo vā ime dhamme uppādetuṃ samattho nāma nāhosi, bhagavatā pana no ime dhammā uppāditā. Bhagavantañhi nissāya mayaṃ ime dhamme ājānāma paṭivijjhāmāti evaṃ bhagavaṃmūlakā no, bhante, dhammāti. Bhagavaṃnettikāti bhagavā hi dhammānaṃ netā vinetā anunetā, yathāsabhāvato pāṭiyekkaṃ pāṭiyekkaṃ nāmaṃ gahetvā dassetāti dhammā bhagavaṃnettikā nāma honti. Bhagavaṃpaṭisaraṇāti catubhūmakadhammā sabbaññutaññāṇassa āpāthaṃ āgacchamānā bhagavati paṭisaranti nāmāti bhagavaṃpaṭisaraṇā. Paṭisarantīti samosaranti. Apica mahābodhimaṇḍe nisinnassa bhagavato paṭivedhavasena phasso āgacchati ‘‘ahaṃ bhagavā kinnāmo’’ti? Tvaṃ phusanaṭṭhena phasso nāma. Vedanā, saññā, saṅkhārā, viññāṇaṃ āgacchati ‘‘ahaṃ bhagavā kinnāma’’nti, tvaṃ vijānanaṭṭhena viññāṇaṃ nāmāti evaṃ catubhūmakadhammānaṃ yathāsabhāvato pāṭiyekkaṃ pāṭiyekkaṃ nāmaṃ gaṇhanto bhagavā dhamme paṭisaratīti bhagavaṃpaṭisaraṇā. Bhagavantaṃyeva paṭibhātūti bhagavatova etassa bhāsitassa attho upaṭṭhātu, tumheyeva no kathetvā dethāti attho.
ஸா சேவ அவிஜ்ஜாதி எத்த² கிஞ்சாபி ஸா அவிஜ்ஜா ச தண்ஹா ச கம்மங் ஜவாபெத்வா படிஸந்தி⁴ங் ஆகட்³டி⁴த்வா நிருத்³தா⁴, யதா² பன அஜ்ஜாபி யங் ஹிய்யோ பே⁴ஸஜ்ஜங் பீதங், ததே³வ போ⁴ஜனங் பு⁴ஞ்ஜாதி ஸரிக்க²கத்தேன ததே³வாதி வுச்சதி, ஏவமிதா⁴பி ஸா சேவ அவிஜ்ஜா ஸா ச தண்ஹாதி இத³ம்பி ஸரிக்க²கத்தேன வுத்தங். ப்³ரஹ்மசரியந்தி மக்³க³ப்³ரஹ்மசரியங். து³க்க²க்க²யாயாதி வட்டது³க்க²ஸ்ஸ க²யத்தா²ய. காயூபகோ³ ஹோதீதி அஞ்ஞங் படிஸந்தி⁴காயங் உபக³ந்தா ஹோதி. யதி³த³ங் ப்³ரஹ்மசரியவாஸோதி யோ அயங் மக்³க³ப்³ரஹ்மசரியவாஸோ, அயங் பா³லதோ பண்டி³தஸ்ஸ விஸேஸோதி த³ஸ்ஸேதி. இதி இமஸ்மிங் ஸுத்தே ஸப்³போ³பி ஸபடிஸந்தி⁴கோ புது²ஜ்ஜனோ ‘‘பா³லோ’’தி, அப்படிஸந்தி⁴கோ கீ²ணாஸவோ ‘‘பண்டி³தோ’’தி வுத்தோ. ஸோதாபன்னஸகதா³கா³மிஅனாகா³மினோ பன ‘‘பண்டி³தா’’தி வா ‘‘பா³லா’’தி வா ந வத்தப்³பா³, ப⁴ஜமானா பன பண்டி³தபக்க²ங் ப⁴ஜந்தி. நவமங்.
Sāceva avijjāti ettha kiñcāpi sā avijjā ca taṇhā ca kammaṃ javāpetvā paṭisandhiṃ ākaḍḍhitvā niruddhā, yathā pana ajjāpi yaṃ hiyyo bhesajjaṃ pītaṃ, tadeva bhojanaṃ bhuñjāti sarikkhakattena tadevāti vuccati, evamidhāpi sā ceva avijjā sā ca taṇhāti idampi sarikkhakattena vuttaṃ. Brahmacariyanti maggabrahmacariyaṃ. Dukkhakkhayāyāti vaṭṭadukkhassa khayatthāya. Kāyūpago hotīti aññaṃ paṭisandhikāyaṃ upagantā hoti. Yadidaṃ brahmacariyavāsoti yo ayaṃ maggabrahmacariyavāso, ayaṃ bālato paṇḍitassa visesoti dasseti. Iti imasmiṃ sutte sabbopi sapaṭisandhiko puthujjano ‘‘bālo’’ti, appaṭisandhiko khīṇāsavo ‘‘paṇḍito’’ti vutto. Sotāpannasakadāgāmianāgāmino pana ‘‘paṇḍitā’’ti vā ‘‘bālā’’ti vā na vattabbā, bhajamānā pana paṇḍitapakkhaṃ bhajanti. Navamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 9. பா³லபண்டி³தஸுத்தங் • 9. Bālapaṇḍitasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9. பா³லபண்டி³தஸுத்தவண்ணனா • 9. Bālapaṇḍitasuttavaṇṇanā
