| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
9. பா³லபண்டி³தஸுத்தவண்ணனா
9. Bālapaṇḍitasuttavaṇṇanā
246. ஏதேஹீதி து³சிந்திதாதீ³ஹி. ஏதேன லக்க²ணஸத்³த³ஸ்ஸ கரணத்த²தமாஹ. தானேவாதி லக்க²ணானி ஏவ. தஸ்ஸாதி பா³லஸ்ஸ. ‘‘அயங் பா³லோ’’தி நிமீயதி ஸஞ்சானீயதி ஏதேஹீதி பா³லனிமித்தானி. அபதா³னங் வுச்சதி விக்²யாதங் கம்மங். து³சிந்திதாதீ³னி ச பா³லே விக்²யாதானி, அவதா⁴ரணபா⁴வே வா, தஸ்மா பா³லஸ்ஸ அபதா³னானீதி பா³லாபதா³னானி. அபி⁴ஜ்ஜா²தீ³ஹி து³ட்ட²ங் தூ³ஸிதங் சிந்தேதீதி து³சிந்திதசிந்தீ. லோபா⁴தீ³ஹி து³ட்ட²ங் பா⁴ஸிதங் முஸாவாதா³தி³ங் பா⁴ஸதீதி து³ப்³பா⁴ஸிதபா⁴ஸீ. தேஸங் தேஸங்யேவ வஸேன கத்தப்³ப³தோ து³க்கடகம்மங் பாணாதிபாதாதி³ங் கரோதீதி து³க்கடகம்மகாரீ. தேனாஹ ‘‘சிந்தயந்தோ’’திஆதி³. தானி உபனிஸ்ஸாய ஜாதந்தி தஜ்ஜங். ததோ ஏவ தேஸங் ஸாருப்பங் அனுரூபந்தி தஸ்ஸாருப்பங். தேனாஹ ‘‘தஜ்ஜாதிக’’ந்திஆதி³. கச்ச²மானாயாதி கதி²யமானாய.
246.Etehīti ducintitādīhi. Etena lakkhaṇasaddassa karaṇatthatamāha. Tānevāti lakkhaṇāni eva. Tassāti bālassa. ‘‘Ayaṃ bālo’’ti nimīyati sañcānīyati etehīti bālanimittāni. Apadānaṃ vuccati vikhyātaṃ kammaṃ. Ducintitādīni ca bāle vikhyātāni, avadhāraṇabhāve vā, tasmā bālassa apadānānīti bālāpadānāni. Abhijjhādīhi duṭṭhaṃ dūsitaṃ cintetīti ducintitacintī. Lobhādīhi duṭṭhaṃ bhāsitaṃ musāvādādiṃ bhāsatīti dubbhāsitabhāsī. Tesaṃ tesaṃyeva vasena kattabbato dukkaṭakammaṃ pāṇātipātādiṃ karotīti dukkaṭakammakārī. Tenāha ‘‘cintayanto’’tiādi. Tāni upanissāya jātanti tajjaṃ. Tato eva tesaṃ sāruppaṃ anurūpanti tassāruppaṃ. Tenāha ‘‘tajjātika’’ntiādi. Kacchamānāyāti kathiyamānāya.
248. யஸ்மா ஸத்தானங் யதூ²பசிதானி கம்மானி கதோகாஸானி தது³பட்டா²பிதானி கம்மனிமித்தக³தினிமித்தானி மரணஸ்ஸ ஆஸன்னகாலே சித்தஸ்ஸ ஆபாத²ங் ஆக³ச்ச²ந்தானி, ததா³ ஓலம்ப³ந்தானி விய அபி⁴ப⁴வந்தானி விய அஜ்ஜொ²த்த²ரந்தானி விய உபட்ட²ஹந்தி, தஸ்மா வுத்தங் – ‘‘ஓலம்ப³னாதி³ஆகாரேன ஹி தானி உபட்ட²ஹந்தீ’’தி. உபட்டா²னாகாரோ ஏவ ததா³ சித்தஸ்ஸ கோ³சரபா⁴வங் க³ச்ச²தீதி ஆஹ – ‘‘தஸ்மிங் உபட்டா²னாகாரே ஆபாத²க³தே’’தி.
248. Yasmā sattānaṃ yathūpacitāni kammāni katokāsāni tadupaṭṭhāpitāni kammanimittagatinimittāni maraṇassa āsannakāle cittassa āpāthaṃ āgacchantāni, tadā olambantāni viya abhibhavantāni viya ajjhottharantāni viya upaṭṭhahanti, tasmā vuttaṃ – ‘‘olambanādiākārena hi tāni upaṭṭhahantī’’ti. Upaṭṭhānākāro eva tadā cittassa gocarabhāvaṃ gacchatīti āha – ‘‘tasmiṃ upaṭṭhānākāre āpāthagate’’ti.
249. ந ஸக்காதி ந வத³தீதி ஏதேன த்³வேபி படிஸேதா⁴ பகதிஅத்தா²தி அயமத்தோ² வுத்தோ ஹோதி. ந ஸுகராதி பன இமினா து³க்கரபா⁴வோ தீ³பிதோ, து³க்கரஞ்ச தாவ உபாயேன ஸக்கா காதுந்தி த³ஸ்ஸெந்தோ ஆஹ – ‘‘ந ஸுகரங் பனா’’திஆதி³. தேனாதி வினிவிஜ்ஜி²த்வா க³மனேன அஞ்ஞமஞ்ஞங் ஸங்விஜ்ஜ²னேன. அஸ்ஸாதி சோரஸ்ஸ. இதோ உத்தரிபீதி மஜ்ஜ²ன்ஹிகஸமயங் ஸாயன்ஹஸமயஞ்ச ஸத்திஸதேன.
249.Na sakkāti na vadatīti etena dvepi paṭisedhā pakatiatthāti ayamattho vutto hoti. Na sukarāti pana iminā dukkarabhāvo dīpito, dukkarañca tāva upāyena sakkā kātunti dassento āha – ‘‘na sukaraṃ panā’’tiādi. Tenāti vinivijjhitvā gamanena aññamaññaṃ saṃvijjhanena. Assāti corassa. Ito uttaripīti majjhanhikasamayaṃ sāyanhasamayañca sattisatena.
250. ஸங்க²ம்பி ந உபேதீதி இமினா ஸங்கா²தப்³ப³மத்தங் நத்தீ²தி தீ³பிதங் ஹோதீதி ஆஹ – ‘‘க³ணனாமத்தம்பி ந க³ச்ச²தீ’’தி. உபனிக்கே²பனமத்தம்பீதி எத்தா²பி ஏஸேவ நயோ. கலபா⁴க³ந்தி கலானங் ஸங்க³ணனகொட்டா²ஸங். தேனாஹ ‘‘ஸதிமங் கல’’ந்திஆதி³. ஓலோகிதமத்தம்பீதி உபனிக்கே²பனவஸேன ஓலோகனமத்தகம்பி. தங் கம்மகாரணந்தி தங் பஞ்சவித⁴ப³ந்த⁴னகம்மகாரணங் சதுன்னம்பி பஸ்ஸானங் வஸேன ஸம்பரிவத்தெத்வா கரொந்தியேவ, பாளியங் பன ஏகபஸ்ஸவஸேன ஆக³தா. கே³ஹஸ்ஸாதி மஹதோ கே³ஹஸ்ஸ. ஸப்³ப³தோதி ஸப்³பா³வயவதோ. ஸம்பஜ்ஜலிதே ஏகஜாலீபூ⁴தே. ஸுபக்குதி²தாயாதி ஸுட்டு² நிபக்காய.
250.Saṅkhampi na upetīti iminā saṅkhātabbamattaṃ natthīti dīpitaṃ hotīti āha – ‘‘gaṇanāmattampi na gacchatī’’ti. Upanikkhepanamattampīti etthāpi eseva nayo. Kalabhāganti kalānaṃ saṅgaṇanakoṭṭhāsaṃ. Tenāha ‘‘satimaṃ kala’’ntiādi. Olokitamattampīti upanikkhepanavasena olokanamattakampi. Taṃ kammakāraṇanti taṃ pañcavidhabandhanakammakāraṇaṃ catunnampi passānaṃ vasena samparivattetvā karontiyeva, pāḷiyaṃ pana ekapassavasena āgatā. Gehassāti mahato gehassa. Sabbatoti sabbāvayavato. Sampajjalite ekajālībhūte. Supakkuthitāyāti suṭṭhu nipakkāya.
விப⁴த்தோதி தத்த² நிப்³ப³த்தகஸத்தானங் ஸாதா⁴ரணகம்முனா விப⁴த்தோ விய நிப்³ப³த்தோ. அயோபாகாரேன பரிதோ அத்தோ க³ஹிதோதி அயோபாகாரபரியத்தோ பரிக்கி²த்தோ.
Vibhattoti tattha nibbattakasattānaṃ sādhāraṇakammunā vibhatto viya nibbatto. Ayopākārena parito atto gahitoti ayopākārapariyatto parikkhitto.
யமககோ³ளகாதி தா³ரகானங் கீளனயுக³ளா. ஏவம்பி து³க்கோ²தி யதா²வுத்தஉஸ்ஸத³னிரயவஸேனபி ஸோத-கா⁴ன-ஜிவ்ஹா-காய-மனோ-கோ³சரதாவஸேனபி இமினா ஆகாரேன து³க்கோ²தி.
Yamakagoḷakāti dārakānaṃ kīḷanayugaḷā. Evampi dukkhoti yathāvuttaussadanirayavasenapi sota-ghāna-jivhā-kāya-mano-gocaratāvasenapi iminā ākārena dukkhoti.
251. த³ந்தேஹி உல்லேஹித்வாதி உத்தரத³ந்தேஹி அஞ்சி²த்வா. ரஸவஸேன அதித்தோ அஸ்ஸாதோ³ ரஸாதோ³. தேனாஹ ‘‘ரஸகே³தே⁴ன பரிபு⁴த்தரஸோ’’தி.
251.Dantehi ullehitvāti uttaradantehi añchitvā. Rasavasena atitto assādo rasādo. Tenāha ‘‘rasagedhena paribhuttaraso’’ti.
252. து³ரூபோதி விரூபோ. து³த்³த³ஸோதி தேனேவ விரூபபா⁴வேன அனிட்ட²த³ஸ்ஸனோ. லகுண்ட²கோதி ரஸ்ஸோ. பவிட்ட²கீ³வோதி க²ந்த⁴ந்தரங் அனுபவிட்ட²கீ³வோ. மஹோத³ரோதி விபுலகுச்சி². யேபு⁴ய்யேன ஹி லகுண்டகா ஸத்தா ரஸ்ஸகீ³வா புது²லகுச்சி²காவ ஹொந்தீதி ததா² வுத்தங். காணோ நாம சக்கு²விகலோதி வுத்தங் – ‘‘ஏகக்கி²காணோ வா உப⁴யக்கி²காணோ வா’’தி. குணீதி ஹத்த²விகலோ வுச்சதீதி ஆஹ – ‘‘ஏகஹத்த²குணீ வா உப⁴யஹத்த²குணீ வா’’தி. வாதாதி³னா உபஹதகாயபக்கோ² இத⁴ பக்க²ஹதோதி அதி⁴ப்பேதோ, ந பக்கி²ஹதோதி ஆஹ – ‘‘பக்க²ஹதோதி பீட²ஸப்பீ’’தி. து³க்கா²னுபப³ந்த⁴த³ஸ்ஸனத்த²ந்தி அபராபரஜாதீஸு விபாகது³க்க²ஸ்ஸ அனுபப³ந்த⁴வஸேன பவத்தித³ஸ்ஸனத்த²ங்.
252.Durūpoti virūpo. Duddasoti teneva virūpabhāvena aniṭṭhadassano. Lakuṇṭhakoti rasso. Paviṭṭhagīvoti khandhantaraṃ anupaviṭṭhagīvo. Mahodaroti vipulakucchi. Yebhuyyena hi lakuṇṭakā sattā rassagīvā puthulakucchikāva hontīti tathā vuttaṃ. Kāṇo nāma cakkhuvikaloti vuttaṃ – ‘‘ekakkhikāṇo vā ubhayakkhikāṇo vā’’ti. Kuṇīti hatthavikalo vuccatīti āha – ‘‘ekahatthakuṇī vā ubhayahatthakuṇī vā’’ti. Vātādinā upahatakāyapakkho idha pakkhahatoti adhippeto, na pakkhihatoti āha – ‘‘pakkhahatoti pīṭhasappī’’ti. Dukkhānupabandhadassanatthanti aparāparajātīsu vipākadukkhassa anupabandhavasena pavattidassanatthaṃ.
கலீயதி க²லீயதி அப்பஹீயதி ஸாஸனங் ஏதேனாதி கலி, ஜுதபராஜயோ. ஸோ ஏவ க³ஹஸதி³ஸதாய ‘‘கலிக்³க³ஹோ’’தி வுத்தோ. அதி⁴ப³ந்த⁴ந்தி குடும்ப³ஸ்ஸ அதி⁴வுத்த²ஸ்ஸ மூலபூ⁴தஸ்ஸ அத்தனோ ப³ந்தி⁴தப்³ப³தங். தேனாஹ ‘‘அத்தனாபி ப³ந்த⁴ங் நிக³ச்செ²ய்யா’’தி. பா³லபூ⁴மியா பா³லபா⁴வஸ்ஸ மத்த²கப்பத்தி நிரயகா³மிகம்மகாரிதாதி ‘‘நிரயே நிப்³ப³த்ததி’’ச்சேவ வுத்தங். தக்³க³ஹணேனேவ பன ததோ முது³முது³தராதி³கம்மவஸேன ஸேஸாபாயேஸு அபராபரனிப்³ப³த்தாதி³பா³லபூ⁴மி விபா⁴விதா ஹோதீதி.
Kalīyati khalīyati appahīyati sāsanaṃ etenāti kali, jutaparājayo. So eva gahasadisatāya ‘‘kaliggaho’’ti vutto. Adhibandhanti kuṭumbassa adhivutthassa mūlabhūtassa attano bandhitabbataṃ. Tenāha ‘‘attanāpi bandhaṃ nigaccheyyā’’ti. Bālabhūmiyā bālabhāvassa matthakappatti nirayagāmikammakāritāti ‘‘niraye nibbattati’’cceva vuttaṃ. Taggahaṇeneva pana tato mudumudutarādikammavasena sesāpāyesu aparāparanibbattādibālabhūmi vibhāvitā hotīti.
253. வுத்தானுஸாரேனாதி ‘‘பா³லோ அய’’ந்திஆதி³னா வுத்தஸ்ஸ அத்த²வசனஸ்ஸ ‘‘பண்டி³தோ அய’’ந்தி ஏதேஹி லக்கீ²யதீதிஆதி³னா அனுஸாரேன. மனோஸுசரிதாதீ³னங் வஸேனாதி சிந்தெந்தோ அனபி⁴ஜ்ஜா²-அப்³யாபாத³-ஸம்மாத³ஸ்ஸனங் ஸுசிந்திதமேவ சிந்தேதீதிஆதி³னா மனோஸுசரிதானங் திண்ணங் ஸுசரிதானங் வஸேன யோஜேதப்³பா³னி.
253.Vuttānusārenāti ‘‘bālo aya’’ntiādinā vuttassa atthavacanassa ‘‘paṇḍito aya’’nti etehi lakkhīyatītiādinā anusārena. Manosucaritādīnaṃ vasenāti cintento anabhijjhā-abyāpāda-sammādassanaṃ sucintitameva cintetītiādinā manosucaritānaṃ tiṇṇaṃ sucaritānaṃ vasena yojetabbāni.
சக்கரதனவண்ணனா
Cakkaratanavaṇṇanā
256. உபோஸத²ங் (தீ³॰ நி॰ டீ॰ 2.243) வுச்சதி அட்ட²ங்க³ஸமன்னாக³தங் ஸப்³ப³தி³வஸேஸு க³ஹட்டே²ஹி ரக்கி²தப்³ப³ஸீலங், ஸமாதா³னவஸேன தங் ஏதஸ்ஸ அத்தீ²தி உபோஸதி²கோ, தஸ்ஸ. தேனாஹ ‘‘ஸமாதி³ன்னஉபோஸத²ங்க³ஸ்ஸா’’தி. ததா³தி தஸ்மிங் காலே, யஸ்மிங் பன காலே சக்கவத்திபா⁴வஸங்வத்தனிய-தா³ன-ஸீலாதி³-புஞ்ஞஸம்பா⁴ரஸமுதா³க³மஸம்பன்னோ பூரிதசக்கவத்திவத்தோ காதீ³பதே³ஸவிஸேஸபச்சாஜாதியா சேவ குலரூபபோ⁴கா³தி⁴பதெய்யாதி³கு³ணவிஸேஸஸம்பத்தியா ச தத³னுரூபே அத்தபா⁴வே டி²தோ ஹோதி, தஸ்மிங் காலே. தாதி³ஸே ஹி காலே சக்கவத்திபா⁴வீ புரிஸுத்தமோ யதா²வுத்தகு³ணஸமன்னாக³தோ ராஜா க²த்தியோ ஹுத்வா முத்³தா⁴வஸித்தோ விஸுத்³த⁴ஸீலோ அனுபோஸத²ங் ஸதஸஹஸ்ஸவிஸ்ஸஜ்ஜனாதி³னா ஸம்மாபடிபத்திங் படிபஜ்ஜதி, ந யதா³ சக்கரதனங் உப்பஜ்ஜதி, ததா³ ஏவ. தேனாஹ – ‘‘பாதோ…பே॰… த⁴ம்மதா’’தி. (தத்த² த³மோ இந்த்³ரியஸங்வரோ, ஸங்யமோ ஸீலஸங்வரோ.)
256. Uposathaṃ (dī. ni. ṭī. 2.243) vuccati aṭṭhaṅgasamannāgataṃ sabbadivasesu gahaṭṭhehi rakkhitabbasīlaṃ, samādānavasena taṃ etassa atthīti uposathiko, tassa. Tenāha ‘‘samādinnauposathaṅgassā’’ti. Tadāti tasmiṃ kāle, yasmiṃ pana kāle cakkavattibhāvasaṃvattaniya-dāna-sīlādi-puññasambhārasamudāgamasampanno pūritacakkavattivatto kādīpadesavisesapaccājātiyā ceva kularūpabhogādhipateyyādiguṇavisesasampattiyā ca tadanurūpe attabhāve ṭhito hoti, tasmiṃ kāle. Tādise hi kāle cakkavattibhāvī purisuttamo yathāvuttaguṇasamannāgato rājā khattiyo hutvā muddhāvasitto visuddhasīlo anuposathaṃ satasahassavissajjanādinā sammāpaṭipattiṃ paṭipajjati, na yadā cakkaratanaṃ uppajjati, tadā eva. Tenāha – ‘‘pāto…pe… dhammatā’’ti. (Tattha damo indriyasaṃvaro, saṃyamo sīlasaṃvaro.)
வுத்தப்பகாரபுஞ்ஞகம்மபச்சயந்தி சக்கவத்திபா⁴வாவஹதா³னத³மஸங்யமாதி³புஞ்ஞகம்மஹேதுகங். நீலமணிஸங்கா⁴டஸதி³ஸந்தி இந்த³னீலமணிஸஞ்சயஸமானங். தி³ப்³பா³னுபா⁴வயுத்தத்தாதி த³ஸ்ஸனீயதா மனுஞ்ஞகோ⁴ஸதா ஆகாஸகா³மிதா ஓபா⁴ஸவிஸ்ஸஜ்ஜனா அப்படிகா⁴ததா ரஞ்ஞோ இச்சி²தத்த²னிப்ப²த்திகாரணதாதி ஏவமாதீ³ஹி தி³ப்³ப³ஸதி³ஸேஹி ஆனுபா⁴வேஹி ஸமன்னாக³தத்தா. ஸப்³பே³ஹி ஆகாரேஹீதி ஸப்³பே³ஹி ஸுந்த³ரேஹி ஆகாரேஹி. பரிபூரந்தி பரிபுண்ணங். ஸா சஸ்ஸ பாரிபூரி இதா³னேவ வித்தா²ரீயதி.
Vuttappakārapuññakammapaccayanti cakkavattibhāvāvahadānadamasaṃyamādipuññakammahetukaṃ. Nīlamaṇisaṅghāṭasadisanti indanīlamaṇisañcayasamānaṃ. Dibbānubhāvayuttattāti dassanīyatā manuññaghosatā ākāsagāmitā obhāsavissajjanā appaṭighātatā rañño icchitatthanipphattikāraṇatāti evamādīhi dibbasadisehi ānubhāvehi samannāgatattā. Sabbehi ākārehīti sabbehi sundarehi ākārehi. Paripūranti paripuṇṇaṃ. Sā cassa pāripūri idāneva vitthārīyati.
பனாளீதி சி²த்³த³ங். ஸுத்³த⁴ஸினித்³த⁴த³ந்தபந்தியா நிப்³பி³வராயாதி அதி⁴ப்பாயோ. நாபி⁴பனாளி பரிக்கே²பபட்டேஸூதி நாபி⁴பரிக்கே²பபட்டே சேவ நாபி⁴யா பனாளிபரிக்கே²பபட்டே ச. ஸுவிப⁴த்தாவாதி அஞ்ஞமஞ்ஞங் அஸங்கிண்ணத்தா ஸுட்டு² விப⁴த்தா. பரிச்சே²த³லேக²ந்தரேஸு மணிகா ஸுவிப⁴த்தா ஹுத்வா பஞ்ஞாயந்தீதி வத³ந்தி.
Panāḷīti chiddaṃ. Suddhasiniddhadantapantiyā nibbivarāyāti adhippāyo. Nābhipanāḷi parikkhepapaṭṭesūti nābhiparikkhepapaṭṭe ceva nābhiyā panāḷiparikkhepapaṭṭe ca. Suvibhattāvāti aññamaññaṃ asaṃkiṇṇattā suṭṭhu vibhattā. Paricchedalekhantaresu maṇikā suvibhattā hutvā paññāyantīti vadanti.
பரிச்சே²த³லேகா²தீ³னீதி ஆதி³-ஸத்³தே³ன மாலாகம்மாதி³ங் ஸங்க³ண்ஹாதி. ஸுரத்தாதிஆதீ³ஸு ஸுரத்தக்³க³ஹணேன மஹானாமவண்ணதங் படிக்கி²பதி, ஸுத்³த⁴க்³க³ஹணேன ஸங்கிலிட்ட²தங், ஸினித்³த⁴க்³க³ஹணேன லூக²தங். காமங் தஸ்ஸ சக்கரதனஸ்ஸ நேமிமண்ட³லங் அஸந்தி⁴கங்வ நிப்³ப³த்தங், ஸப்³ப³த்த²கமேவ பன கேவலங் பவாளவண்ணோவ ந ஸோப⁴தீதி பகதிசக்கஸ்ஸ ஸந்தி⁴யுத்தேஸு டா²னேஸு ரத்தஜம்பு³னத³பரிக்க²தங் அஹோஸி, தங் ஸந்தா⁴ய வுத்தங் ‘‘ஸந்தீ⁴ஸு பனஸ்ஸா’’திஆதி³.
Paricchedalekhādīnīti ādi-saddena mālākammādiṃ saṅgaṇhāti. Surattātiādīsu surattaggahaṇena mahānāmavaṇṇataṃ paṭikkhipati, suddhaggahaṇena saṃkiliṭṭhataṃ, siniddhaggahaṇena lūkhataṃ. Kāmaṃ tassa cakkaratanassa nemimaṇḍalaṃ asandhikaṃva nibbattaṃ, sabbatthakameva pana kevalaṃ pavāḷavaṇṇova na sobhatīti pakaticakkassa sandhiyuttesu ṭhānesu rattajambunadaparikkhataṃ ahosi, taṃ sandhāya vuttaṃ ‘‘sandhīsu panassā’’tiādi.
நேமிமண்ட³லபிட்டி²யந்தி நேமிமண்ட³லஸ்ஸ பிட்டி²பதே³ஸே. த³ஸன்னங் த³ஸன்னங் அரானமந்தரேதி த³ஸன்னங் த³ஸன்னங் அரானங் அந்தரஸமீபே பதே³ஸே. சி²த்³த³மண்ட³லசித்தோதி மண்ட³லஸண்டா²னசி²த்³த³விசித்தோ. ஸுகுஸலஸமன்னாஹதஸ்ஸாதி ஸுட்டு² குஸலேன ஸிப்பினா பஹதஸ்ஸ, வாதி³தஸ்ஸாதி அத்தோ². வக்³கூ³தி மனோரமோ ரஜனீயோதி ஸுணந்தானங் ராகு³ப்பாத³கோ. கமனீயோதி கந்தோ. ஸமோஸரிதகுஸுமதா³மாதி ஓலம்பி³தஸுக³ந்த⁴குஸுமதா³மா. நேமிபரிக்கே²பஸ்ஸாதி நேமிபரியந்தபரிக்கே²பஸ்ஸ. நாபி⁴பனாளியா த்³வின்னங் பஸ்ஸானங் வஸேன ‘‘த்³வின்னம்பி நாபி⁴பனாளீன’’ந்தி வுத்தங். ஏகா ஏவ ஹி ஸா பனாளி. யேஹீதி யேஹி த்³வீஹி ஸீஹமுகே²ஹி. புன யேஹீதி முத்தாகலாபேஹி.
Nemimaṇḍalapiṭṭhiyanti nemimaṇḍalassa piṭṭhipadese. Dasannaṃ dasannaṃ arānamantareti dasannaṃ dasannaṃ arānaṃ antarasamīpe padese. Chiddamaṇḍalacittoti maṇḍalasaṇṭhānachiddavicitto. Sukusalasamannāhatassāti suṭṭhu kusalena sippinā pahatassa, vāditassāti attho. Vaggūti manoramo rajanīyoti suṇantānaṃ rāguppādako. Kamanīyoti kanto. Samosaritakusumadāmāti olambitasugandhakusumadāmā. Nemiparikkhepassāti nemipariyantaparikkhepassa. Nābhipanāḷiyā dvinnaṃ passānaṃ vasena ‘‘dvinnampi nābhipanāḷīna’’nti vuttaṃ. Ekā eva hi sā panāḷi. Yehīti yehi dvīhi sīhamukhehi. Puna yehīti muttākalāpehi.
ஓதா⁴பயமானந்தி ஸோதுங் அவஹிதானி குருமானங். சந்தோ³ புரதோ, சக்கரதனங் பச்சா²தி ஏவங் புப்³பா³பரியேன புப்³பா³பரபா⁴கே³ன.
Odhāpayamānanti sotuṃ avahitāni kurumānaṃ. Cando purato, cakkaratanaṃ pacchāti evaṃ pubbāpariyena pubbāparabhāgena.
அந்தே புரஸ்ஸாதி அனுராத⁴புரே ரஞ்ஞோ அந்தேபுரஸ்ஸ உத்தரஸீஹபஞ்ஜரஆஸன்னே ததா³ ரஞ்ஞோ பாஸாதே³ தாதி³ஸஸ்ஸ உத்தரதி³ஸாய ஸீஹபஞ்ஜரஸ்ஸ லப்³ப⁴மானத்தா வுத்தங். ஸுகே²ன ஸக்காதி கிஞ்சி அனாருஹித்வா ஸரீரஞ்ச அனுல்லங்கி⁴த்வா யதா²டி²தேனேவ ஹத்தே²ன புப்ப²முட்டி²யோ கி²பித்வா ஸுகே²ன ஸக்கா ஹோதி பூஜேதுங்.
Ante purassāti anurādhapure rañño antepurassa uttarasīhapañjaraāsanne tadā rañño pāsāde tādisassa uttaradisāya sīhapañjarassa labbhamānattā vuttaṃ. Sukhena sakkāti kiñci anāruhitvā sarīrañca anullaṅghitvā yathāṭhiteneva hatthena pupphamuṭṭhiyo khipitvā sukhena sakkā hoti pūjetuṃ.
நானாவிராக³ரதனப்பபா⁴ஸமுஜ்ஜலந்தி நானாவித⁴சித்தவண்ணரதனோபா⁴ஸபப⁴ஸ்ஸரங். ஆகாஸங் அப்³பு⁴க்³க³ந்த்வா பவத்தேதி. ஆக³ந்த்வா டி²தட்டா²னதோ உபரி ஆகாஸங் அப்³பு⁴க்³க³ந்த்வா பவத்தே.
Nānāvirāgaratanappabhāsamujjalanti nānāvidhacittavaṇṇaratanobhāsapabhassaraṃ. Ākāsaṃ abbhuggantvā pavatteti. Āgantvā ṭhitaṭṭhānato upari ākāsaṃ abbhuggantvā pavatte.
ஸன்னிவேஸக்க²மோதி க²ந்த⁴வாரஸன்னிவேஸயொக்³யோ. ஸுலபா⁴ஹாரூபகரணோதி ஸுகே²னேவ லத்³த⁴ப்³ப³த⁴ஞ்ஞகோ³ரஸதா³ருதிணாதி³போ⁴ஜனஸாத⁴னோ. பரசக்கந்தி பரஸ்ஸ ரஞ்ஞோ ஸேனா, ஆணா வா.
Sannivesakkhamoti khandhavārasannivesayogyo. Sulabhāhārūpakaraṇoti sukheneva laddhabbadhaññagorasadārutiṇādibhojanasādhano. Paracakkanti parassa rañño senā, āṇā vā.
ஆக³தனந்த³னோதி ஆக³தோ ஹுத்வா நந்தி³ஜனநோ. ஆக³தங் வா ஆக³மனங், தேன நந்த³தீதி ஆக³தனந்த³னோ. க³மனேன ஸோசேதீதி க³மனஸோசனோ. உபகப்பேதா²தி உபரூபரி கப்பேத² ஸங்வித³ஹத², உபனேதா²தி அத்தோ². உபபரிக்கி²த்வாதி ஹேதுதோபி ஸபா⁴வதோபி ப²லதோபி தி³ட்ட²த⁴ம்மிகஸம்பராயிகஆதீ³னவதோபி வீமங்ஸித்வா.
Āgatanandanoti āgato hutvā nandijanano. Āgataṃ vā āgamanaṃ, tena nandatīti āgatanandano. Gamanena socetīti gamanasocano. Upakappethāti uparūpari kappetha saṃvidahatha, upanethāti attho. Upaparikkhitvāti hetutopi sabhāvatopi phalatopi diṭṭhadhammikasamparāyikaādīnavatopi vīmaṃsitvā.
விபா⁴வெந்தி பஞ்ஞாய அத்த²ங் விபூ⁴தங் கரொந்தீதி விபா⁴வினோ, பஞ்ஞவந்தோ. அனுயந்தாதி அனுவத்தகா. ஓக³ச்ச²மானந்தி ஓஸீத³ந்தங். யோஜனமத்தந்தி வித்தா²ரதோ யோஜனமத்தங் பதே³ஸங். க³ம்பீ⁴ரபா⁴வேன பன யதா² பூ⁴மி தி³ஸ்ஸதி, ஏவங் ஓக³ச்ச²தி. தேனாஹ ‘‘மஹாஸமுத்³த³தல’’ந்திஆதி³. அந்தே சக்கரதனங் உத³கேன ஸேனாய அனஜ்ஜொ²த்த²ரணத்த²ங்.
Vibhāventi paññāya atthaṃ vibhūtaṃ karontīti vibhāvino, paññavanto. Anuyantāti anuvattakā. Ogacchamānanti osīdantaṃ. Yojanamattanti vitthārato yojanamattaṃ padesaṃ. Gambhīrabhāvena pana yathā bhūmi dissati, evaṃ ogacchati. Tenāha ‘‘mahāsamuddatala’’ntiādi. Ante cakkaratanaṃ udakena senāya anajjhottharaṇatthaṃ.
257. புரத்தி²மோ ஸமுத்³தோ³ பரியந்தோ அஸ்ஸாதி புரத்தி²மஸமுத்³த³பரியந்தோ, புரத்தி²மஸமுத்³த³ங் பரியந்தங் கத்வா. சாதுரந்தாயாதி சாதுஸமுத்³த³ந்தாய புப்³ப³விதே³ஹாதி³சதுகொட்டா²ஸந்தாய.
257. Puratthimo samuddo pariyanto assāti puratthimasamuddapariyanto, puratthimasamuddaṃ pariyantaṃ katvā. Cāturantāyāti cātusamuddantāya pubbavidehādicatukoṭṭhāsantāya.
ஹத்தி²ரதனவண்ணனா
Hatthiratanavaṇṇanā
258. ஹரிசந்த³னாதீ³ஹீதி ஆதி³-ஸத்³தே³ன சதுஜ்ஜாதியக³ந்தா⁴தி³ங் ஸங்க³ண்ஹாதி. ஆக³மனங் சிந்தேதா²தி வத³ந்தி சக்கவத்திவத்தஸ்ஸ பூரிததாய பரிசிதத்தா. பூ⁴மிபு²ஸனகேஹி வாலதி⁴, வரங்க³ங் ஹத்தோ²தி இமேஹி ச தீஹி, சதூஹி பாதே³ஹி சாதி ஸத்தஹி அவயவேஹி டி²தத்தா ஸத்தபதிட்டோ². இதரேஸங் அமச்சாதீ³னங் சிந்தயந்தானங் ந ஆக³ச்ச²தி. அபனெத்வாதி அத்தனோ ஆனுபா⁴வேன அபனெத்வா. க³ந்த⁴மேவ ஹி தஸ்ஸ இதரே ஹத்தி²னோ ந ஸஹந்தி.
258.Haricandanādīhīti ādi-saddena catujjātiyagandhādiṃ saṅgaṇhāti. Āgamanaṃ cintethāti vadanti cakkavattivattassa pūritatāya paricitattā. Bhūmiphusanakehi vāladhi, varaṅgaṃ hatthoti imehi ca tīhi, catūhi pādehi cāti sattahi avayavehi ṭhitattā sattapatiṭṭho. Itaresaṃ amaccādīnaṃ cintayantānaṃ na āgacchati. Apanetvāti attano ānubhāvena apanetvā. Gandhameva hi tassa itare hatthino na sahanti.
அஸ்ஸரதனவண்ணனா
Assaratanavaṇṇanā
ஸிந்த⁴வகுலதோதி ஸிந்த⁴வஸ்ஸாஜானீயகுலதோ.
Sindhavakulatoti sindhavassājānīyakulato.
மணிரதனவண்ணனா
Maṇiratanavaṇṇanā
ஸகடனாபி⁴ஸமப்பமாணந்தி பரிணாஹதோ மஹாஸகடஸ்ஸ நாபி⁴யா ஸமப்பமாணங். உபோ⁴ஸு அந்தேஸூதி ஹெட்டா² உபரி சாதி த்³வீஸு அந்தேஸு. கண்ணிகபரியந்ததோதி த்³வின்னங் கஞ்சனபது³மானங் கண்ணிகாய பரியந்ததோ. முத்தாஜாலகே ட²பெத்வாதி ஸுவிஸுத்³தே⁴ முத்தாமயே ஜாலகே பதிட்ட²பெத்வா.
Sakaṭanābhisamappamāṇanti pariṇāhato mahāsakaṭassa nābhiyā samappamāṇaṃ. Ubhosu antesūti heṭṭhā upari cāti dvīsu antesu. Kaṇṇikapariyantatoti dvinnaṃ kañcanapadumānaṃ kaṇṇikāya pariyantato. Muttājālake ṭhapetvāti suvisuddhe muttāmaye jālake patiṭṭhapetvā.
இத்தி²ரதனவண்ணனா
Itthiratanavaṇṇanā
‘‘இத்தி²ரதனங் பாதுப⁴வதீ’’தி வத்வா அஸ்ஸ பாதுப⁴வனாகாரங் த³ஸ்ஸேதுங், ‘‘மத்³த³ராஜகுலதோ வா’’திஆதி³ வுத்தங். மத்³த³ரட்ட²ங் கிர அபி⁴ரூபானங் இத்தீ²னங் உப்பத்திட்டா²னங். ஸண்டா²னபாரிபூரியாதி ஹத்த²பாதா³தி³ஸரீராவயவானங் ஸுஸண்டி²ததாய. அவயவபாரிபூரியா ஹி ஸமுதா³யபாரிபூரிஸித்³தி⁴. ரூபந்தி ஸரீரங். த³ஸ்ஸனீயாதி ஸுரூபபா⁴வேன பஸ்ஸிதப்³ப³யுத்தா. ஸோமனஸ்ஸவஸேன சித்தங் பஸாதே³தி யோனிஸோ சிந்தெந்தானங் கம்மப²லஸத்³தா⁴ய வஸேன. பஸாதா³வஹத்தாதி காரணவசனேன யதா² பாஸாதி³கதாய வண்ணபொக்க²ரதாஸித்³தி⁴ வுத்தா, ஏவங் த³ஸ்ஸனீயதாய பாஸாதி³கதாஸித்³தி⁴, அபி⁴ரூபதாய ச த³ஸ்ஸனீயதாஸித்³தி⁴ வத்தப்³பா³தி நயங் த³ஸ்ஸேதி. படிலோமதோ வா வண்ணபொக்க²ரதாய பாஸாதி³கதாஸித்³தி⁴, பாஸாதி³கதாய த³ஸ்ஸனீயதாஸித்³தி⁴, த³ஸ்ஸனீயதாய அபி⁴ரூபதாஸித்³தி⁴ யோஜேதப்³பா³. ஏவங் ஸரீரஸம்பத்திவஸேன அபி⁴ரூபதாதி³கே த³ஸ்ஸெத்வா இதா³னி ஸரீரே தோ³ஸாபா⁴வவஸேனபி தே த³ஸ்ஸேதுங், ‘‘அபி⁴ரூபா வா’’திஆதி³ வுத்தங். தத்த² யதா² பமாணயுத்தா, ஏவங் ஆரோஹபரிணாஹயோக³தோ ச பாஸாதி³கா நாதிதீ³க⁴தாத³யோ. ஏவங் மனுஸ்ஸானங் தி³ப்³ப³ரூபதாஸம்பத்திபீதி ‘‘அப்பத்தா தி³ப்³ப³வண்ண’’ந்தி வுத்தங். காயவிபத்தியாதி ஸரீரதோ³ஸஸ்ஸ. அபா⁴வோதி அச்சந்தமேவ தூ³ரீபா⁴வோ.
‘‘Itthiratanaṃpātubhavatī’’ti vatvā assa pātubhavanākāraṃ dassetuṃ, ‘‘maddarājakulato vā’’tiādi vuttaṃ. Maddaraṭṭhaṃ kira abhirūpānaṃ itthīnaṃ uppattiṭṭhānaṃ. Saṇṭhānapāripūriyāti hatthapādādisarīrāvayavānaṃ susaṇṭhitatāya. Avayavapāripūriyā hi samudāyapāripūrisiddhi. Rūpanti sarīraṃ. Dassanīyāti surūpabhāvena passitabbayuttā. Somanassavasena cittaṃ pasādeti yoniso cintentānaṃ kammaphalasaddhāya vasena. Pasādāvahattāti kāraṇavacanena yathā pāsādikatāya vaṇṇapokkharatāsiddhi vuttā, evaṃ dassanīyatāya pāsādikatāsiddhi, abhirūpatāya ca dassanīyatāsiddhi vattabbāti nayaṃ dasseti. Paṭilomato vā vaṇṇapokkharatāya pāsādikatāsiddhi, pāsādikatāya dassanīyatāsiddhi, dassanīyatāya abhirūpatāsiddhi yojetabbā. Evaṃ sarīrasampattivasena abhirūpatādike dassetvā idāni sarīre dosābhāvavasenapi te dassetuṃ, ‘‘abhirūpā vā’’tiādi vuttaṃ. Tattha yathā pamāṇayuttā, evaṃ ārohapariṇāhayogato ca pāsādikā nātidīghatādayo. Evaṃ manussānaṃ dibbarūpatāsampattipīti ‘‘appattā dibbavaṇṇa’’nti vuttaṃ. Kāyavipattiyāti sarīradosassa. Abhāvoti accantameva dūrībhāvo.
ஸதவிஹதஸ்ஸாதி ஸதக்க²த்துங் விஹதஸ்ஸ. ஸதவிஹதஸ்ஸாதி ச இத³ங் கப்பாஸபிசுவஸேன வுத்தங், தூலபிசுனோ பன விஹனநமேவ நத்தி². குங்குமதக³ரதுருக்க²யவனபுப்பா²னி சதுஜ்ஜாதி. தமாலதக³ரதுருக்க²யவனபுப்பா²னீதி அபரே.
Satavihatassāti satakkhattuṃ vihatassa. Satavihatassāti ca idaṃ kappāsapicuvasena vuttaṃ, tūlapicuno pana vihananameva natthi. Kuṅkumatagaraturukkhayavanapupphāni catujjāti. Tamālatagaraturukkhayavanapupphānīti apare.
அக்³கி³த³ட்³டா⁴ வியாதி ஆஸனக³தேன அக்³கி³னா த³ட்³டா⁴ விய. பட²மமேவாதி அஞ்ஞகிச்சதோ பட²மமேவ, த³ஸ்ஸனஸமகாலமேவாதி அத்தோ². தங் தங் அத்தனா ரஞ்ஞோ காதப்³ப³கிச்சங் கிங் கரோமீதி புச்சி²தப்³ப³தாய கிங் கரணந்தி படிஸ்ஸாவேதீதி கிங்காரபடிஸ்ஸாவினீ.
Aggidaḍḍhā viyāti āsanagatena agginā daḍḍhā viya. Paṭhamamevāti aññakiccato paṭhamameva, dassanasamakālamevāti attho. Taṃ taṃ attanā rañño kātabbakiccaṃ kiṃ karomīti pucchitabbatāya kiṃ karaṇanti paṭissāvetīti kiṅkārapaṭissāvinī.
மாதுகா³மோ நாம யேபு⁴ய்யேன ஸட²ஜாதிகோ, இத்தி²ரதனஸ்ஸ பன தங் நத்தீ²தி த³ஸ்ஸேதுங், ‘‘ஸ்வாஸ்ஸா’’திஆதி³ வுத்தங். கு³ணாதி ரூபகு³ணா சேவ ஆசாரகு³ணா ச. புரிமகம்மானுபா⁴வேனாதி தஸ்ஸா புரிமகம்மானுபா⁴வேன. இத்தி²ரதனஸ்ஸ தப்³பா⁴வஸங்வத்தனியபுரிமகம்மஸ்ஸ ஆனுபா⁴வேன, சக்கவத்தினோபி பரிவாரஸங்வத்தனியங் புஞ்ஞகம்மங் தாதி³ஸஸ்ஸ ப²லவிஸேஸஸ்ஸ உபனிஸ்ஸயோ ஹோதியேவ. தேனாஹ ‘‘சக்கவத்தினோ புஞ்ஞங் உபனிஸ்ஸாயா’’தி. ஏதேன ஸேஸரதனேஸுபி தேஸங் விஸேஸானங் தது³பனிஸ்ஸயதா விபா⁴விதா ஏவாதி த³ட்ட²ப்³ப³ங். புப்³பே³ ஏகதே³ஸவஸேன லப்³ப⁴மானபாரிபூரீ ரஞ்ஞோ சக்கவத்திபா⁴வூபக³மனதோ பட்டா²ய ஸப்³பா³காரபாரிபூரா ஜாதா.
Mātugāmo nāma yebhuyyena saṭhajātiko, itthiratanassa pana taṃ natthīti dassetuṃ, ‘‘svāssā’’tiādi vuttaṃ. Guṇāti rūpaguṇā ceva ācāraguṇā ca. Purimakammānubhāvenāti tassā purimakammānubhāvena. Itthiratanassa tabbhāvasaṃvattaniyapurimakammassa ānubhāvena, cakkavattinopi parivārasaṃvattaniyaṃ puññakammaṃ tādisassa phalavisesassa upanissayo hotiyeva. Tenāha ‘‘cakkavattino puññaṃ upanissāyā’’ti. Etena sesaratanesupi tesaṃ visesānaṃ tadupanissayatā vibhāvitā evāti daṭṭhabbaṃ. Pubbe ekadesavasena labbhamānapāripūrī rañño cakkavattibhāvūpagamanato paṭṭhāya sabbākārapāripūrā jātā.
க³ஹபதிரதனவண்ணனா
Gahapatiratanavaṇṇanā
பகதியாவாதி ஸபா⁴வேனேவ, சக்கரதனபாதுபா⁴வதோ புப்³பே³பி.
Pakatiyāvāti sabhāveneva, cakkaratanapātubhāvato pubbepi.
பரிணாயகரதனவண்ணனா
Pariṇāyakaratanavaṇṇanā
நிஸ்ஸாயாதி உபனிஸ்ஸாய.
Nissāyāti upanissāya.
260. கடக்³க³ஹோ வுச்சதி ஜயக்³க³ஹோ ஸகானங் பணானங் கடபா⁴வேன அத்த²ஸித்³தி⁴வஸேன ஸங்க³ண்ஹனந்தி கத்வா. தேனாஹ ‘‘ஜயக்³கா³ஹேனா’’தி. ஏகப்பஹாரேனேவாதி ஏகப்பயோகே³னேவ ஸதஸஹஸ்ஸானி அதி⁴க³ச்செ²ய்யாதி யோஜனா. ஸேஸங் வுத்தனயத்தா ஸுவிஞ்ஞெய்யமேவ.
260.Kaṭaggaho vuccati jayaggaho sakānaṃ paṇānaṃ kaṭabhāvena atthasiddhivasena saṅgaṇhananti katvā. Tenāha ‘‘jayaggāhenā’’ti. Ekappahārenevāti ekappayogeneva satasahassāni adhigaccheyyāti yojanā. Sesaṃ vuttanayattā suviññeyyameva.
பா³லபண்டி³தஸுத்தவண்ணனாய லீனத்த²ப்பகாஸனா ஸமத்தா.
Bālapaṇḍitasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 9. பா³லபண்டி³தஸுத்தங் • 9. Bālapaṇḍitasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 9. பா³லபண்டி³தஸுத்தவண்ணனா • 9. Bālapaṇḍitasuttavaṇṇanā
