| Library / Tipiṭaka / তিপিটক • Tipiṭaka / মজ্ঝিমনিকায (টীকা) • Majjhimanikāya (ṭīkā) |
৯. বালপণ্ডিতসুত্তৰণ্ণনা
9. Bālapaṇḍitasuttavaṇṇanā
২৪৬. এতেহীতি দুচিন্তিতাদীহি। এতেন লক্খণসদ্দস্স করণত্থতমাহ। তানেৰাতি লক্খণানি এৰ। তস্সাতি বালস্স। ‘‘অযং বালো’’তি নিমীযতি সঞ্চানীযতি এতেহীতি বালনিমিত্তানি। অপদানং ৰুচ্চতি ৰিখ্যাতং কম্মং। দুচিন্তিতাদীনি চ বালে ৰিখ্যাতানি, অৰধারণভাৰে ৰা, তস্মা বালস্স অপদানানীতি বালাপদানানি। অভিজ্ঝাদীহি দুট্ঠং দূসিতং চিন্তেতীতি দুচিন্তিতচিন্তী। লোভাদীহি দুট্ঠং ভাসিতং মুসাৰাদাদিং ভাসতীতি দুব্ভাসিতভাসী। তেসং তেসংযেৰ ৰসেন কত্তব্বতো দুক্কটকম্মং পাণাতিপাতাদিং করোতীতি দুক্কটকম্মকারী। তেনাহ ‘‘চিন্তযন্তো’’তিআদি। তানি উপনিস্সায জাতন্তি তজ্জং। ততো এৰ তেসং সারুপ্পং অনুরূপন্তি তস্সারুপ্পং। তেনাহ ‘‘তজ্জাতিক’’ন্তিআদি। কচ্ছমানাযাতি কথিযমানায।
246.Etehīti ducintitādīhi. Etena lakkhaṇasaddassa karaṇatthatamāha. Tānevāti lakkhaṇāni eva. Tassāti bālassa. ‘‘Ayaṃ bālo’’ti nimīyati sañcānīyati etehīti bālanimittāni. Apadānaṃ vuccati vikhyātaṃ kammaṃ. Ducintitādīni ca bāle vikhyātāni, avadhāraṇabhāve vā, tasmā bālassa apadānānīti bālāpadānāni. Abhijjhādīhi duṭṭhaṃ dūsitaṃ cintetīti ducintitacintī. Lobhādīhi duṭṭhaṃ bhāsitaṃ musāvādādiṃ bhāsatīti dubbhāsitabhāsī. Tesaṃ tesaṃyeva vasena kattabbato dukkaṭakammaṃ pāṇātipātādiṃ karotīti dukkaṭakammakārī. Tenāha ‘‘cintayanto’’tiādi. Tāni upanissāya jātanti tajjaṃ. Tato eva tesaṃ sāruppaṃ anurūpanti tassāruppaṃ. Tenāha ‘‘tajjātika’’ntiādi. Kacchamānāyāti kathiyamānāya.
২৪৮. যস্মা সত্তানং যথূপচিতানি কম্মানি কতোকাসানি তদুপট্ঠাপিতানি কম্মনিমিত্তগতিনিমিত্তানি মরণস্স আসন্নকালে চিত্তস্স আপাথং আগচ্ছন্তানি, তদা ওলম্বন্তানি ৰিয অভিভৰন্তানি ৰিয অজ্ঝোত্থরন্তানি ৰিয উপট্ঠহন্তি, তস্মা ৰুত্তং – ‘‘ওলম্বনাদিআকারেন হি তানি উপট্ঠহন্তী’’তি। উপট্ঠানাকারো এৰ তদা চিত্তস্স গোচরভাৰং গচ্ছতীতি আহ – ‘‘তস্মিং উপট্ঠানাকারে আপাথগতে’’তি।
248. Yasmā sattānaṃ yathūpacitāni kammāni katokāsāni tadupaṭṭhāpitāni kammanimittagatinimittāni maraṇassa āsannakāle cittassa āpāthaṃ āgacchantāni, tadā olambantāni viya abhibhavantāni viya ajjhottharantāni viya upaṭṭhahanti, tasmā vuttaṃ – ‘‘olambanādiākārena hi tāni upaṭṭhahantī’’ti. Upaṭṭhānākāro eva tadā cittassa gocarabhāvaṃ gacchatīti āha – ‘‘tasmiṃ upaṭṭhānākāre āpāthagate’’ti.
২৪৯. ন সক্কাতি ন ৰদতীতি এতেন দ্ৰেপি পটিসেধা পকতিঅত্থাতি অযমত্থো ৰুত্তো হোতি। ন সুকরাতি পন ইমিনা দুক্করভাৰো দীপিতো, দুক্করঞ্চ তাৰ উপাযেন সক্কা কাতুন্তি দস্সেন্তো আহ – ‘‘ন সুকরং পনা’’তিআদি। তেনাতি ৰিনিৰিজ্ঝিত্ৰা গমনেন অঞ্ঞমঞ্ঞং সংৰিজ্ঝনেন। অস্সাতি চোরস্স। ইতো উত্তরিপীতি মজ্ঝন্হিকসমযং সাযন্হসমযঞ্চ সত্তিসতেন।
249.Na sakkāti na vadatīti etena dvepi paṭisedhā pakatiatthāti ayamattho vutto hoti. Na sukarāti pana iminā dukkarabhāvo dīpito, dukkarañca tāva upāyena sakkā kātunti dassento āha – ‘‘na sukaraṃ panā’’tiādi. Tenāti vinivijjhitvā gamanena aññamaññaṃ saṃvijjhanena. Assāti corassa. Ito uttaripīti majjhanhikasamayaṃ sāyanhasamayañca sattisatena.
২৫০. সঙ্খম্পি ন উপেতীতি ইমিনা সঙ্খাতব্বমত্তং নত্থীতি দীপিতং হোতীতি আহ – ‘‘গণনামত্তম্পি ন গচ্ছতী’’তি। উপনিক্খেপনমত্তম্পীতি এত্থাপি এসেৰ নযো। কলভাগন্তি কলানং সঙ্গণনকোট্ঠাসং। তেনাহ ‘‘সতিমং কল’’ন্তিআদি। ওলোকিতমত্তম্পীতি উপনিক্খেপনৰসেন ওলোকনমত্তকম্পি। তং কম্মকারণন্তি তং পঞ্চৰিধবন্ধনকম্মকারণং চতুন্নম্পি পস্সানং ৰসেন সম্পরিৰত্তেত্ৰা করোন্তিযেৰ, পাল়িযং পন একপস্সৰসেন আগতা। গেহস্সাতি মহতো গেহস্স। সব্বতোতি সব্বাৰযৰতো। সম্পজ্জলিতে একজালীভূতে। সুপক্কুথিতাযাতি সুট্ঠু নিপক্কায।
250.Saṅkhampi na upetīti iminā saṅkhātabbamattaṃ natthīti dīpitaṃ hotīti āha – ‘‘gaṇanāmattampi na gacchatī’’ti. Upanikkhepanamattampīti etthāpi eseva nayo. Kalabhāganti kalānaṃ saṅgaṇanakoṭṭhāsaṃ. Tenāha ‘‘satimaṃ kala’’ntiādi. Olokitamattampīti upanikkhepanavasena olokanamattakampi. Taṃ kammakāraṇanti taṃ pañcavidhabandhanakammakāraṇaṃ catunnampi passānaṃ vasena samparivattetvā karontiyeva, pāḷiyaṃ pana ekapassavasena āgatā. Gehassāti mahato gehassa. Sabbatoti sabbāvayavato. Sampajjalite ekajālībhūte. Supakkuthitāyāti suṭṭhu nipakkāya.
ৰিভত্তোতি তত্থ নিব্বত্তকসত্তানং সাধারণকম্মুনা ৰিভত্তো ৰিয নিব্বত্তো। অযোপাকারেন পরিতো অত্তো গহিতোতি অযোপাকারপরিযত্তো পরিক্খিত্তো।
Vibhattoti tattha nibbattakasattānaṃ sādhāraṇakammunā vibhatto viya nibbatto. Ayopākārena parito atto gahitoti ayopākārapariyatto parikkhitto.
যমকগোল়কাতি দারকানং কীল়নযুগল়া। এৰম্পি দুক্খোতি যথাৰুত্তউস্সদনিরযৰসেনপি সোত-ঘান-জিৰ্হা-কায-মনো-গোচরতাৰসেনপি ইমিনা আকারেন দুক্খোতি।
Yamakagoḷakāti dārakānaṃ kīḷanayugaḷā. Evampi dukkhoti yathāvuttaussadanirayavasenapi sota-ghāna-jivhā-kāya-mano-gocaratāvasenapi iminā ākārena dukkhoti.
২৫১. দন্তেহি উল্লেহিত্ৰাতি উত্তরদন্তেহি অঞ্ছিত্ৰা। রসৰসেন অতিত্তো অস্সাদো রসাদো। তেনাহ ‘‘রসগেধেন পরিভুত্তরসো’’তি।
251.Dantehi ullehitvāti uttaradantehi añchitvā. Rasavasena atitto assādo rasādo. Tenāha ‘‘rasagedhena paribhuttaraso’’ti.
২৫২. দুরূপোতি ৰিরূপো। দুদ্দসোতি তেনেৰ ৰিরূপভাৰেন অনিট্ঠদস্সনো। লকুণ্ঠকোতি রস্সো। পৰিট্ঠগীৰোতি খন্ধন্তরং অনুপৰিট্ঠগীৰো। মহোদরোতি ৰিপুলকুচ্ছি। যেভুয্যেন হি লকুণ্টকা সত্তা রস্সগীৰা পুথুলকুচ্ছিকাৰ হোন্তীতি তথা ৰুত্তং। কাণো নাম চক্খুৰিকলোতি ৰুত্তং – ‘‘একক্খিকাণো ৰা উভযক্খিকাণো ৰা’’তি। কুণীতি হত্থৰিকলো ৰুচ্চতীতি আহ – ‘‘একহত্থকুণী ৰা উভযহত্থকুণী ৰা’’তি। ৰাতাদিনা উপহতকাযপক্খো ইধ পক্খহতোতি অধিপ্পেতো, ন পক্খিহতোতি আহ – ‘‘পক্খহতোতি পীঠসপ্পী’’তি। দুক্খানুপবন্ধদস্সনত্থন্তি অপরাপরজাতীসু ৰিপাকদুক্খস্স অনুপবন্ধৰসেন পৰত্তিদস্সনত্থং।
252.Durūpoti virūpo. Duddasoti teneva virūpabhāvena aniṭṭhadassano. Lakuṇṭhakoti rasso. Paviṭṭhagīvoti khandhantaraṃ anupaviṭṭhagīvo. Mahodaroti vipulakucchi. Yebhuyyena hi lakuṇṭakā sattā rassagīvā puthulakucchikāva hontīti tathā vuttaṃ. Kāṇo nāma cakkhuvikaloti vuttaṃ – ‘‘ekakkhikāṇo vā ubhayakkhikāṇo vā’’ti. Kuṇīti hatthavikalo vuccatīti āha – ‘‘ekahatthakuṇī vā ubhayahatthakuṇī vā’’ti. Vātādinā upahatakāyapakkho idha pakkhahatoti adhippeto, na pakkhihatoti āha – ‘‘pakkhahatoti pīṭhasappī’’ti. Dukkhānupabandhadassanatthanti aparāparajātīsu vipākadukkhassa anupabandhavasena pavattidassanatthaṃ.
কলীযতি খলীযতি অপ্পহীযতি সাসনং এতেনাতি কলি, জুতপরাজযো। সো এৰ গহসদিসতায ‘‘কলিগ্গহো’’তি ৰুত্তো। অধিবন্ধন্তি কুটুম্বস্স অধিৰুত্থস্স মূলভূতস্স অত্তনো বন্ধিতব্বতং। তেনাহ ‘‘অত্তনাপি বন্ধং নিগচ্ছেয্যা’’তি। বালভূমিযা বালভাৰস্স মত্থকপ্পত্তি নিরযগামিকম্মকারিতাতি ‘‘নিরযে নিব্বত্ততি’’চ্চেৰ ৰুত্তং। তগ্গহণেনেৰ পন ততো মুদুমুদুতরাদিকম্মৰসেন সেসাপাযেসু অপরাপরনিব্বত্তাদিবালভূমি ৰিভাৰিতা হোতীতি।
Kalīyati khalīyati appahīyati sāsanaṃ etenāti kali, jutaparājayo. So eva gahasadisatāya ‘‘kaliggaho’’ti vutto. Adhibandhanti kuṭumbassa adhivutthassa mūlabhūtassa attano bandhitabbataṃ. Tenāha ‘‘attanāpi bandhaṃ nigaccheyyā’’ti. Bālabhūmiyā bālabhāvassa matthakappatti nirayagāmikammakāritāti ‘‘niraye nibbattati’’cceva vuttaṃ. Taggahaṇeneva pana tato mudumudutarādikammavasena sesāpāyesu aparāparanibbattādibālabhūmi vibhāvitā hotīti.
২৫৩. ৰুত্তানুসারেনাতি ‘‘বালো অয’’ন্তিআদিনা ৰুত্তস্স অত্থৰচনস্স ‘‘পণ্ডিতো অয’’ন্তি এতেহি লক্খীযতীতিআদিনা অনুসারেন। মনোসুচরিতাদীনং ৰসেনাতি চিন্তেন্তো অনভিজ্ঝা-অব্যাপাদ-সম্মাদস্সনং সুচিন্তিতমেৰ চিন্তেতীতিআদিনা মনোসুচরিতানং তিণ্ণং সুচরিতানং ৰসেন যোজেতব্বানি।
253.Vuttānusārenāti ‘‘bālo aya’’ntiādinā vuttassa atthavacanassa ‘‘paṇḍito aya’’nti etehi lakkhīyatītiādinā anusārena. Manosucaritādīnaṃ vasenāti cintento anabhijjhā-abyāpāda-sammādassanaṃ sucintitameva cintetītiādinā manosucaritānaṃ tiṇṇaṃ sucaritānaṃ vasena yojetabbāni.
চক্করতনৰণ্ণনা
Cakkaratanavaṇṇanā
২৫৬. উপোসথং (দী॰ নি॰ টী॰ ২.২৪৩) ৰুচ্চতি অট্ঠঙ্গসমন্নাগতং সব্বদিৰসেসু গহট্ঠেহি রক্খিতব্বসীলং, সমাদানৰসেন তং এতস্স অত্থীতি উপোসথিকো, তস্স। তেনাহ ‘‘সমাদিন্নউপোসথঙ্গস্সা’’তি। তদাতি তস্মিং কালে, যস্মিং পন কালে চক্কৰত্তিভাৰসংৰত্তনিয-দান-সীলাদি-পুঞ্ঞসম্ভারসমুদাগমসম্পন্নো পূরিতচক্কৰত্তিৰত্তো কাদীপদেসৰিসেসপচ্চাজাতিযা চেৰ কুলরূপভোগাধিপতেয্যাদিগুণৰিসেসসম্পত্তিযা চ তদনুরূপে অত্তভাৰে ঠিতো হোতি, তস্মিং কালে। তাদিসে হি কালে চক্কৰত্তিভাৰী পুরিসুত্তমো যথাৰুত্তগুণসমন্নাগতো রাজা খত্তিযো হুত্ৰা মুদ্ধাৰসিত্তো ৰিসুদ্ধসীলো অনুপোসথং সতসহস্সৰিস্সজ্জনাদিনা সম্মাপটিপত্তিং পটিপজ্জতি, ন যদা চক্করতনং উপ্পজ্জতি, তদা এৰ। তেনাহ – ‘‘পাতো…পে॰… ধম্মতা’’তি। (তত্থ দমো ইন্দ্রিযসংৰরো, সংযমো সীলসংৰরো।)
256. Uposathaṃ (dī. ni. ṭī. 2.243) vuccati aṭṭhaṅgasamannāgataṃ sabbadivasesu gahaṭṭhehi rakkhitabbasīlaṃ, samādānavasena taṃ etassa atthīti uposathiko, tassa. Tenāha ‘‘samādinnauposathaṅgassā’’ti. Tadāti tasmiṃ kāle, yasmiṃ pana kāle cakkavattibhāvasaṃvattaniya-dāna-sīlādi-puññasambhārasamudāgamasampanno pūritacakkavattivatto kādīpadesavisesapaccājātiyā ceva kularūpabhogādhipateyyādiguṇavisesasampattiyā ca tadanurūpe attabhāve ṭhito hoti, tasmiṃ kāle. Tādise hi kāle cakkavattibhāvī purisuttamo yathāvuttaguṇasamannāgato rājā khattiyo hutvā muddhāvasitto visuddhasīlo anuposathaṃ satasahassavissajjanādinā sammāpaṭipattiṃ paṭipajjati, na yadā cakkaratanaṃ uppajjati, tadā eva. Tenāha – ‘‘pāto…pe… dhammatā’’ti. (Tattha damo indriyasaṃvaro, saṃyamo sīlasaṃvaro.)
ৰুত্তপ্পকারপুঞ্ঞকম্মপচ্চযন্তি চক্কৰত্তিভাৰাৰহদানদমসংযমাদিপুঞ্ঞকম্মহেতুকং। নীলমণিসঙ্ঘাটসদিসন্তি ইন্দনীলমণিসঞ্চযসমানং। দিব্বানুভাৰযুত্তত্তাতি দস্সনীযতা মনুঞ্ঞঘোসতা আকাসগামিতা ওভাসৰিস্সজ্জনা অপ্পটিঘাততা রঞ্ঞো ইচ্ছিতত্থনিপ্ফত্তিকারণতাতি এৰমাদীহি দিব্বসদিসেহি আনুভাৰেহি সমন্নাগতত্তা। সব্বেহি আকারেহীতি সব্বেহি সুন্দরেহি আকারেহি। পরিপূরন্তি পরিপুণ্ণং। সা চস্স পারিপূরি ইদানেৰ ৰিত্থারীযতি।
Vuttappakārapuññakammapaccayanti cakkavattibhāvāvahadānadamasaṃyamādipuññakammahetukaṃ. Nīlamaṇisaṅghāṭasadisanti indanīlamaṇisañcayasamānaṃ. Dibbānubhāvayuttattāti dassanīyatā manuññaghosatā ākāsagāmitā obhāsavissajjanā appaṭighātatā rañño icchitatthanipphattikāraṇatāti evamādīhi dibbasadisehi ānubhāvehi samannāgatattā. Sabbehi ākārehīti sabbehi sundarehi ākārehi. Paripūranti paripuṇṇaṃ. Sā cassa pāripūri idāneva vitthārīyati.
পনাল়ীতি ছিদ্দং। সুদ্ধসিনিদ্ধদন্তপন্তিযা নিব্বিৰরাযাতি অধিপ্পাযো। নাভিপনাল়ি পরিক্খেপপট্টেসূতি নাভিপরিক্খেপপট্টে চেৰ নাভিযা পনাল়িপরিক্খেপপট্টে চ। সুৰিভত্তাৰাতি অঞ্ঞমঞ্ঞং অসংকিণ্ণত্তা সুট্ঠু ৰিভত্তা। পরিচ্ছেদলেখন্তরেসু মণিকা সুৰিভত্তা হুত্ৰা পঞ্ঞাযন্তীতি ৰদন্তি।
Panāḷīti chiddaṃ. Suddhasiniddhadantapantiyā nibbivarāyāti adhippāyo. Nābhipanāḷi parikkhepapaṭṭesūti nābhiparikkhepapaṭṭe ceva nābhiyā panāḷiparikkhepapaṭṭe ca. Suvibhattāvāti aññamaññaṃ asaṃkiṇṇattā suṭṭhu vibhattā. Paricchedalekhantaresu maṇikā suvibhattā hutvā paññāyantīti vadanti.
পরিচ্ছেদলেখাদীনীতি আদি-সদ্দেন মালাকম্মাদিং সঙ্গণ্হাতি। সুরত্তাতিআদীসু সুরত্তগ্গহণেন মহানামৰণ্ণতং পটিক্খিপতি, সুদ্ধগ্গহণেন সংকিলিট্ঠতং, সিনিদ্ধগ্গহণেন লূখতং। কামং তস্স চক্করতনস্স নেমিমণ্ডলং অসন্ধিকংৰ নিব্বত্তং, সব্বত্থকমেৰ পন কেৰলং পৰাল়ৰণ্ণোৰ ন সোভতীতি পকতিচক্কস্স সন্ধিযুত্তেসু ঠানেসু রত্তজম্বুনদপরিক্খতং অহোসি, তং সন্ধায ৰুত্তং ‘‘সন্ধীসু পনস্সা’’তিআদি।
Paricchedalekhādīnīti ādi-saddena mālākammādiṃ saṅgaṇhāti. Surattātiādīsu surattaggahaṇena mahānāmavaṇṇataṃ paṭikkhipati, suddhaggahaṇena saṃkiliṭṭhataṃ, siniddhaggahaṇena lūkhataṃ. Kāmaṃ tassa cakkaratanassa nemimaṇḍalaṃ asandhikaṃva nibbattaṃ, sabbatthakameva pana kevalaṃ pavāḷavaṇṇova na sobhatīti pakaticakkassa sandhiyuttesu ṭhānesu rattajambunadaparikkhataṃ ahosi, taṃ sandhāya vuttaṃ ‘‘sandhīsu panassā’’tiādi.
নেমিমণ্ডলপিট্ঠিযন্তি নেমিমণ্ডলস্স পিট্ঠিপদেসে। দসন্নং দসন্নং অরানমন্তরেতি দসন্নং দসন্নং অরানং অন্তরসমীপে পদেসে। ছিদ্দমণ্ডলচিত্তোতি মণ্ডলসণ্ঠানছিদ্দৰিচিত্তো। সুকুসলসমন্নাহতস্সাতি সুট্ঠু কুসলেন সিপ্পিনা পহতস্স, ৰাদিতস্সাতি অত্থো। ৰগ্গূতি মনোরমো রজনীযোতি সুণন্তানং রাগুপ্পাদকো। কমনীযোতি কন্তো। সমোসরিতকুসুমদামাতি ওলম্বিতসুগন্ধকুসুমদামা। নেমিপরিক্খেপস্সাতি নেমিপরিযন্তপরিক্খেপস্স। নাভিপনাল়িযা দ্ৰিন্নং পস্সানং ৰসেন ‘‘দ্ৰিন্নম্পি নাভিপনাল়ীন’’ন্তি ৰুত্তং। একা এৰ হি সা পনাল়ি। যেহীতি যেহি দ্ৰীহি সীহমুখেহি। পুন যেহীতি মুত্তাকলাপেহি।
Nemimaṇḍalapiṭṭhiyanti nemimaṇḍalassa piṭṭhipadese. Dasannaṃ dasannaṃ arānamantareti dasannaṃ dasannaṃ arānaṃ antarasamīpe padese. Chiddamaṇḍalacittoti maṇḍalasaṇṭhānachiddavicitto. Sukusalasamannāhatassāti suṭṭhu kusalena sippinā pahatassa, vāditassāti attho. Vaggūti manoramo rajanīyoti suṇantānaṃ rāguppādako. Kamanīyoti kanto. Samosaritakusumadāmāti olambitasugandhakusumadāmā. Nemiparikkhepassāti nemipariyantaparikkhepassa. Nābhipanāḷiyā dvinnaṃ passānaṃ vasena ‘‘dvinnampi nābhipanāḷīna’’nti vuttaṃ. Ekā eva hi sā panāḷi. Yehīti yehi dvīhi sīhamukhehi. Puna yehīti muttākalāpehi.
ওধাপযমানন্তি সোতুং অৰহিতানি কুরুমানং। চন্দো পুরতো, চক্করতনং পচ্ছাতি এৰং পুব্বাপরিযেন পুব্বাপরভাগেন।
Odhāpayamānanti sotuṃ avahitāni kurumānaṃ. Cando purato, cakkaratanaṃ pacchāti evaṃ pubbāpariyena pubbāparabhāgena.
অন্তে পুরস্সাতি অনুরাধপুরে রঞ্ঞো অন্তেপুরস্স উত্তরসীহপঞ্জরআসন্নে তদা রঞ্ঞো পাসাদে তাদিসস্স উত্তরদিসায সীহপঞ্জরস্স লব্ভমানত্তা ৰুত্তং। সুখেন সক্কাতি কিঞ্চি অনারুহিত্ৰা সরীরঞ্চ অনুল্লঙ্ঘিত্ৰা যথাঠিতেনেৰ হত্থেন পুপ্ফমুট্ঠিযো খিপিত্ৰা সুখেন সক্কা হোতি পূজেতুং।
Ante purassāti anurādhapure rañño antepurassa uttarasīhapañjaraāsanne tadā rañño pāsāde tādisassa uttaradisāya sīhapañjarassa labbhamānattā vuttaṃ. Sukhena sakkāti kiñci anāruhitvā sarīrañca anullaṅghitvā yathāṭhiteneva hatthena pupphamuṭṭhiyo khipitvā sukhena sakkā hoti pūjetuṃ.
নানাৰিরাগরতনপ্পভাসমুজ্জলন্তি নানাৰিধচিত্তৰণ্ণরতনোভাসপভস্সরং। আকাসং অব্ভুগ্গন্ত্ৰা পৰত্তেতি। আগন্ত্ৰা ঠিতট্ঠানতো উপরি আকাসং অব্ভুগ্গন্ত্ৰা পৰত্তে।
Nānāvirāgaratanappabhāsamujjalanti nānāvidhacittavaṇṇaratanobhāsapabhassaraṃ. Ākāsaṃ abbhuggantvā pavatteti. Āgantvā ṭhitaṭṭhānato upari ākāsaṃ abbhuggantvā pavatte.
সন্নিৰেসক্খমোতি খন্ধৰারসন্নিৰেসযোগ্যো। সুলভাহারূপকরণোতি সুখেনেৰ লদ্ধব্বধঞ্ঞগোরসদারুতিণাদিভোজনসাধনো। পরচক্কন্তি পরস্স রঞ্ঞো সেনা, আণা ৰা।
Sannivesakkhamoti khandhavārasannivesayogyo. Sulabhāhārūpakaraṇoti sukheneva laddhabbadhaññagorasadārutiṇādibhojanasādhano. Paracakkanti parassa rañño senā, āṇā vā.
আগতনন্দনোতি আগতো হুত্ৰা নন্দিজননো। আগতং ৰা আগমনং, তেন নন্দতীতি আগতনন্দনো। গমনেন সোচেতীতি গমনসোচনো। উপকপ্পেথাতি উপরূপরি কপ্পেথ সংৰিদহথ, উপনেথাতি অত্থো। উপপরিক্খিত্ৰাতি হেতুতোপি সভাৰতোপি ফলতোপি দিট্ঠধম্মিকসম্পরাযিকআদীনৰতোপি ৰীমংসিত্ৰা।
Āgatanandanoti āgato hutvā nandijanano. Āgataṃ vā āgamanaṃ, tena nandatīti āgatanandano. Gamanena socetīti gamanasocano. Upakappethāti uparūpari kappetha saṃvidahatha, upanethāti attho. Upaparikkhitvāti hetutopi sabhāvatopi phalatopi diṭṭhadhammikasamparāyikaādīnavatopi vīmaṃsitvā.
ৰিভাৰেন্তি পঞ্ঞায অত্থং ৰিভূতং করোন্তীতি ৰিভাৰিনো, পঞ্ঞৰন্তো। অনুযন্তাতি অনুৰত্তকা। ওগচ্ছমানন্তি ওসীদন্তং। যোজনমত্তন্তি ৰিত্থারতো যোজনমত্তং পদেসং। গম্ভীরভাৰেন পন যথা ভূমি দিস্সতি, এৰং ওগচ্ছতি। তেনাহ ‘‘মহাসমুদ্দতল’’ন্তিআদি। অন্তে চক্করতনং উদকেন সেনায অনজ্ঝোত্থরণত্থং।
Vibhāventi paññāya atthaṃ vibhūtaṃ karontīti vibhāvino, paññavanto. Anuyantāti anuvattakā. Ogacchamānanti osīdantaṃ. Yojanamattanti vitthārato yojanamattaṃ padesaṃ. Gambhīrabhāvena pana yathā bhūmi dissati, evaṃ ogacchati. Tenāha ‘‘mahāsamuddatala’’ntiādi. Ante cakkaratanaṃ udakena senāya anajjhottharaṇatthaṃ.
২৫৭. পুরত্থিমো সমুদ্দো পরিযন্তো অস্সাতি পুরত্থিমসমুদ্দপরিযন্তো, পুরত্থিমসমুদ্দং পরিযন্তং কত্ৰা। চাতুরন্তাযাতি চাতুসমুদ্দন্তায পুব্বৰিদেহাদিচতুকোট্ঠাসন্তায।
257. Puratthimo samuddo pariyanto assāti puratthimasamuddapariyanto, puratthimasamuddaṃ pariyantaṃ katvā. Cāturantāyāti cātusamuddantāya pubbavidehādicatukoṭṭhāsantāya.
হত্থিরতনৰণ্ণনা
Hatthiratanavaṇṇanā
২৫৮. হরিচন্দনাদীহীতি আদি-সদ্দেন চতুজ্জাতিযগন্ধাদিং সঙ্গণ্হাতি। আগমনং চিন্তেথাতি ৰদন্তি চক্কৰত্তিৰত্তস্স পূরিততায পরিচিতত্তা। ভূমিফুসনকেহি ৰালধি, ৰরঙ্গং হত্থোতি ইমেহি চ তীহি, চতূহি পাদেহি চাতি সত্তহি অৰযৰেহি ঠিতত্তা সত্তপতিট্ঠো। ইতরেসং অমচ্চাদীনং চিন্তযন্তানং ন আগচ্ছতি। অপনেত্ৰাতি অত্তনো আনুভাৰেন অপনেত্ৰা। গন্ধমেৰ হি তস্স ইতরে হত্থিনো ন সহন্তি।
258.Haricandanādīhīti ādi-saddena catujjātiyagandhādiṃ saṅgaṇhāti. Āgamanaṃ cintethāti vadanti cakkavattivattassa pūritatāya paricitattā. Bhūmiphusanakehi vāladhi, varaṅgaṃ hatthoti imehi ca tīhi, catūhi pādehi cāti sattahi avayavehi ṭhitattā sattapatiṭṭho. Itaresaṃ amaccādīnaṃ cintayantānaṃ na āgacchati. Apanetvāti attano ānubhāvena apanetvā. Gandhameva hi tassa itare hatthino na sahanti.
অস্সরতনৰণ্ণনা
Assaratanavaṇṇanā
সিন্ধৰকুলতোতি সিন্ধৰস্সাজানীযকুলতো।
Sindhavakulatoti sindhavassājānīyakulato.
মণিরতনৰণ্ণনা
Maṇiratanavaṇṇanā
সকটনাভিসমপ্পমাণন্তি পরিণাহতো মহাসকটস্স নাভিযা সমপ্পমাণং। উভোসু অন্তেসূতি হেট্ঠা উপরি চাতি দ্ৰীসু অন্তেসু। কণ্ণিকপরিযন্ততোতি দ্ৰিন্নং কঞ্চনপদুমানং কণ্ণিকায পরিযন্ততো। মুত্তাজালকে ঠপেত্ৰাতি সুৰিসুদ্ধে মুত্তামযে জালকে পতিট্ঠপেত্ৰা।
Sakaṭanābhisamappamāṇanti pariṇāhato mahāsakaṭassa nābhiyā samappamāṇaṃ. Ubhosu antesūti heṭṭhā upari cāti dvīsu antesu. Kaṇṇikapariyantatoti dvinnaṃ kañcanapadumānaṃ kaṇṇikāya pariyantato. Muttājālake ṭhapetvāti suvisuddhe muttāmaye jālake patiṭṭhapetvā.
ইত্থিরতনৰণ্ণনা
Itthiratanavaṇṇanā
‘‘ইত্থিরতনং পাতুভৰতী’’তি ৰত্ৰা অস্স পাতুভৰনাকারং দস্সেতুং, ‘‘মদ্দরাজকুলতো ৰা’’তিআদি ৰুত্তং। মদ্দরট্ঠং কির অভিরূপানং ইত্থীনং উপ্পত্তিট্ঠানং। সণ্ঠানপারিপূরিযাতি হত্থপাদাদিসরীরাৰযৰানং সুসণ্ঠিততায। অৰযৰপারিপূরিযা হি সমুদাযপারিপূরিসিদ্ধি। রূপন্তি সরীরং। দস্সনীযাতি সুরূপভাৰেন পস্সিতব্বযুত্তা। সোমনস্সৰসেন চিত্তং পসাদেতি যোনিসো চিন্তেন্তানং কম্মফলসদ্ধায ৰসেন। পসাদাৰহত্তাতি কারণৰচনেন যথা পাসাদিকতায ৰণ্ণপোক্খরতাসিদ্ধি ৰুত্তা, এৰং দস্সনীযতায পাসাদিকতাসিদ্ধি, অভিরূপতায চ দস্সনীযতাসিদ্ধি ৰত্তব্বাতি নযং দস্সেতি। পটিলোমতো ৰা ৰণ্ণপোক্খরতায পাসাদিকতাসিদ্ধি, পাসাদিকতায দস্সনীযতাসিদ্ধি, দস্সনীযতায অভিরূপতাসিদ্ধি যোজেতব্বা। এৰং সরীরসম্পত্তিৰসেন অভিরূপতাদিকে দস্সেত্ৰা ইদানি সরীরে দোসাভাৰৰসেনপি তে দস্সেতুং, ‘‘অভিরূপা ৰা’’তিআদি ৰুত্তং। তত্থ যথা পমাণযুত্তা, এৰং আরোহপরিণাহযোগতো চ পাসাদিকা নাতিদীঘতাদযো। এৰং মনুস্সানং দিব্বরূপতাসম্পত্তিপীতি ‘‘অপ্পত্তা দিব্বৰণ্ণ’’ন্তি ৰুত্তং। কাযৰিপত্তিযাতি সরীরদোসস্স। অভাৰোতি অচ্চন্তমেৰ দূরীভাৰো।
‘‘Itthiratanaṃpātubhavatī’’ti vatvā assa pātubhavanākāraṃ dassetuṃ, ‘‘maddarājakulato vā’’tiādi vuttaṃ. Maddaraṭṭhaṃ kira abhirūpānaṃ itthīnaṃ uppattiṭṭhānaṃ. Saṇṭhānapāripūriyāti hatthapādādisarīrāvayavānaṃ susaṇṭhitatāya. Avayavapāripūriyā hi samudāyapāripūrisiddhi. Rūpanti sarīraṃ. Dassanīyāti surūpabhāvena passitabbayuttā. Somanassavasena cittaṃ pasādeti yoniso cintentānaṃ kammaphalasaddhāya vasena. Pasādāvahattāti kāraṇavacanena yathā pāsādikatāya vaṇṇapokkharatāsiddhi vuttā, evaṃ dassanīyatāya pāsādikatāsiddhi, abhirūpatāya ca dassanīyatāsiddhi vattabbāti nayaṃ dasseti. Paṭilomato vā vaṇṇapokkharatāya pāsādikatāsiddhi, pāsādikatāya dassanīyatāsiddhi, dassanīyatāya abhirūpatāsiddhi yojetabbā. Evaṃ sarīrasampattivasena abhirūpatādike dassetvā idāni sarīre dosābhāvavasenapi te dassetuṃ, ‘‘abhirūpā vā’’tiādi vuttaṃ. Tattha yathā pamāṇayuttā, evaṃ ārohapariṇāhayogato ca pāsādikā nātidīghatādayo. Evaṃ manussānaṃ dibbarūpatāsampattipīti ‘‘appattā dibbavaṇṇa’’nti vuttaṃ. Kāyavipattiyāti sarīradosassa. Abhāvoti accantameva dūrībhāvo.
সতৰিহতস্সাতি সতক্খত্তুং ৰিহতস্স। সতৰিহতস্সাতি চ ইদং কপ্পাসপিচুৰসেন ৰুত্তং, তূলপিচুনো পন ৰিহননমেৰ নত্থি। কুঙ্কুমতগরতুরুক্খযৰনপুপ্ফানি চতুজ্জাতি। তমালতগরতুরুক্খযৰনপুপ্ফানীতি অপরে।
Satavihatassāti satakkhattuṃ vihatassa. Satavihatassāti ca idaṃ kappāsapicuvasena vuttaṃ, tūlapicuno pana vihananameva natthi. Kuṅkumatagaraturukkhayavanapupphāni catujjāti. Tamālatagaraturukkhayavanapupphānīti apare.
অগ্গিদড্ঢা ৰিযাতি আসনগতেন অগ্গিনা দড্ঢা ৰিয। পঠমমেৰাতি অঞ্ঞকিচ্চতো পঠমমেৰ, দস্সনসমকালমেৰাতি অত্থো। তং তং অত্তনা রঞ্ঞো কাতব্বকিচ্চং কিং করোমীতি পুচ্ছিতব্বতায কিং করণন্তি পটিস্সাৰেতীতি কিঙ্কারপটিস্সাৰিনী।
Aggidaḍḍhā viyāti āsanagatena agginā daḍḍhā viya. Paṭhamamevāti aññakiccato paṭhamameva, dassanasamakālamevāti attho. Taṃ taṃ attanā rañño kātabbakiccaṃ kiṃ karomīti pucchitabbatāya kiṃ karaṇanti paṭissāvetīti kiṅkārapaṭissāvinī.
মাতুগামো নাম যেভুয্যেন সঠজাতিকো, ইত্থিরতনস্স পন তং নত্থীতি দস্সেতুং, ‘‘স্ৰাস্সা’’তিআদি ৰুত্তং। গুণাতি রূপগুণা চেৰ আচারগুণা চ। পুরিমকম্মানুভাৰেনাতি তস্সা পুরিমকম্মানুভাৰেন। ইত্থিরতনস্স তব্ভাৰসংৰত্তনিযপুরিমকম্মস্স আনুভাৰেন, চক্কৰত্তিনোপি পরিৰারসংৰত্তনিযং পুঞ্ঞকম্মং তাদিসস্স ফলৰিসেসস্স উপনিস্সযো হোতিযেৰ। তেনাহ ‘‘চক্কৰত্তিনো পুঞ্ঞং উপনিস্সাযা’’তি। এতেন সেসরতনেসুপি তেসং ৰিসেসানং তদুপনিস্সযতা ৰিভাৰিতা এৰাতি দট্ঠব্বং। পুব্বে একদেসৰসেন লব্ভমানপারিপূরী রঞ্ঞো চক্কৰত্তিভাৰূপগমনতো পট্ঠায সব্বাকারপারিপূরা জাতা।
Mātugāmo nāma yebhuyyena saṭhajātiko, itthiratanassa pana taṃ natthīti dassetuṃ, ‘‘svāssā’’tiādi vuttaṃ. Guṇāti rūpaguṇā ceva ācāraguṇā ca. Purimakammānubhāvenāti tassā purimakammānubhāvena. Itthiratanassa tabbhāvasaṃvattaniyapurimakammassa ānubhāvena, cakkavattinopi parivārasaṃvattaniyaṃ puññakammaṃ tādisassa phalavisesassa upanissayo hotiyeva. Tenāha ‘‘cakkavattino puññaṃ upanissāyā’’ti. Etena sesaratanesupi tesaṃ visesānaṃ tadupanissayatā vibhāvitā evāti daṭṭhabbaṃ. Pubbe ekadesavasena labbhamānapāripūrī rañño cakkavattibhāvūpagamanato paṭṭhāya sabbākārapāripūrā jātā.
গহপতিরতনৰণ্ণনা
Gahapatiratanavaṇṇanā
পকতিযাৰাতি সভাৰেনেৰ, চক্করতনপাতুভাৰতো পুব্বেপি।
Pakatiyāvāti sabhāveneva, cakkaratanapātubhāvato pubbepi.
পরিণাযকরতনৰণ্ণনা
Pariṇāyakaratanavaṇṇanā
নিস্সাযাতি উপনিস্সায।
Nissāyāti upanissāya.
২৬০. কটগ্গহো ৰুচ্চতি জযগ্গহো সকানং পণানং কটভাৰেন অত্থসিদ্ধিৰসেন সঙ্গণ্হনন্তি কত্ৰা। তেনাহ ‘‘জযগ্গাহেনা’’তি। একপ্পহারেনেৰাতি একপ্পযোগেনেৰ সতসহস্সানি অধিগচ্ছেয্যাতি যোজনা। সেসং ৰুত্তনযত্তা সুৰিঞ্ঞেয্যমেৰ।
260.Kaṭaggaho vuccati jayaggaho sakānaṃ paṇānaṃ kaṭabhāvena atthasiddhivasena saṅgaṇhananti katvā. Tenāha ‘‘jayaggāhenā’’ti. Ekappahārenevāti ekappayogeneva satasahassāni adhigaccheyyāti yojanā. Sesaṃ vuttanayattā suviññeyyameva.
বালপণ্ডিতসুত্তৰণ্ণনায লীনত্থপ্পকাসনা সমত্তা।
Bālapaṇḍitasuttavaṇṇanāya līnatthappakāsanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৯. বালপণ্ডিতসুত্তং • 9. Bālapaṇḍitasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৯. বালপণ্ডিতসুত্তৰণ্ণনা • 9. Bālapaṇḍitasuttavaṇṇanā
