| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) |
༩. བཱལཔཎྜིཏསུཏྟཝཎྞནཱ
9. Bālapaṇḍitasuttavaṇṇanā
༡༩. ནཝམེ ཨཝིཛྫཱནཱིཝརཎསྶཱཏི ཨཝིཛྫཱཡ ནིཝཱརིཏསྶ། ཨེཝམཡཾ ཀཱཡོ སམུདཱགཏོཏི ཨེཝཾ ཨཝིཛྫཱཡ ནིཝཱརིཏཏྟཱ ཏཎྷཱཡ ཙ སམྤཡུཏྟཏྟཱཡེཝ ཨཡཾ ཀཱཡོ ནིབྦཏྟོ། ཨཡཉྩེཝ ཀཱཡོཏི ཨཡཉྩསྶ ཨཏྟནོ སཝིཉྙཱཎཀོ ཀཱཡོ། བཧིདྡྷཱ ཙ ནཱམརཱུཔནྟི བཧིདྡྷཱ ཙ པརེསཾ སཝིཉྙཱཎཀོ ཀཱཡོ། ཨཏྟནོ ཙ པརསྶ ཙ པཉྩཧི ཁནྡྷེཧི ཚཧི ཨཱཡཏནེཧི ཙཱཔི ཨཡཾ ཨཏྠོ དཱིཔེཏབྦོཝ། ཨིཏྠེཏཾ དྭཡནྟི ཨེཝམེཏཾ དྭཡཾ། དྭཡཾ པཊིཙྩ ཕསྶོཏི ཨཉྙཏྠ ཙཀྑུརཱུཔཱདཱིནི དྭཡཱནི པཊིཙྩ ཙཀྑུསམྥསྶཱདཡོ ཝུཏྟཱ, ཨིདྷ པན ཨཛ྄ཛྷཏྟིཀབཱཧིརཱནི ཨཱཡཏནཱནི། མཧཱདྭཡཾ ནཱམ ཀིརེཏཾ། སལེ༹ཝཱཡཏནཱནཱིཏི སལེ༹ཝ ཕསྶཱཡཏནཱནི ཕསྶཀཱརཎཱནི། ཡེཧི ཕུཊྛོཏི ཡེཧི ཀཱརཎབྷཱུཏེཧི ཨཱཡཏནེཧི ཨུཔྤནྣེན ཕསྶེན ཕུཊྛོ། ཨཉྙཏརེནཱཏི ཨེཏྠ པརིཔུཎྞཝསེན ཨཉྙཏརཏཱ ཝེདིཏབྦཱ། ཏཏྲཱཏི ཏསྨིཾ བཱལཔཎྜིཏཱནཾ ཀཱཡནིབྦཏྟནཱདིམྷི། ཀོ ཨདྷིཔྤཡཱསོཏི ཀོ ཨདྷིཀཔཡོགོ།
19. Navame avijjānīvaraṇassāti avijjāya nivāritassa. Evamayaṃ kāyo samudāgatoti evaṃ avijjāya nivāritattā taṇhāya ca sampayuttattāyeva ayaṃ kāyo nibbatto. Ayañceva kāyoti ayañcassa attano saviññāṇako kāyo. Bahiddhā ca nāmarūpanti bahiddhā ca paresaṃ saviññāṇako kāyo. Attano ca parassa ca pañcahi khandhehi chahi āyatanehi cāpi ayaṃ attho dīpetabbova. Itthetaṃ dvayanti evametaṃ dvayaṃ. Dvayaṃ paṭicca phassoti aññattha cakkhurūpādīni dvayāni paṭicca cakkhusamphassādayo vuttā, idha pana ajjhattikabāhirāni āyatanāni. Mahādvayaṃ nāma kiretaṃ. Saḷevāyatanānīti saḷeva phassāyatanāni phassakāraṇāni. Yehi phuṭṭhoti yehi kāraṇabhūtehi āyatanehi uppannena phassena phuṭṭho. Aññatarenāti ettha paripuṇṇavasena aññataratā veditabbā. Tatrāti tasmiṃ bālapaṇḍitānaṃ kāyanibbattanādimhi. Ko adhippayāsoti ko adhikapayogo.
བྷགཝཾམཱུལཀཱཏི བྷགཝཱ མཱུལཾ ཨེཏེསནྟི བྷགཝཾམཱུལཀཱ། ཨིདཾ ཝུཏྟཾ ཧོཏི – ཨིམེ, བྷནྟེ, ཨམྷཱཀཾ དྷམྨཱ པུབྦེ ཀསྶཔསམྨཱསམྦུདྡྷེན ཨུཔྤཱདིཏཱ, ཏསྨིཾ པརིནིབྦུཏེ ཨེཀཾ བུདྡྷནྟརཾ ཨཉྙོ སམཎོ ཝཱ བྲཱཧྨཎོ ཝཱ ཨིམེ དྷམྨེ ཨུཔྤཱདེཏུཾ སམཏྠོ ནཱམ ནཱཧོསི, བྷགཝཏཱ པན ནོ ཨིམེ དྷམྨཱ ཨུཔྤཱདིཏཱ། བྷགཝནྟཉྷི ནིསྶཱཡ མཡཾ ཨིམེ དྷམྨེ ཨཱཛཱནཱམ པཊིཝིཛ྄ཛྷཱམཱཏི ཨེཝཾ བྷགཝཾམཱུལཀཱ ནོ, བྷནྟེ, དྷམྨཱཏི། བྷགཝཾནེཏྟིཀཱཏི བྷགཝཱ ཧི དྷམྨཱནཾ ནེཏཱ ཝིནེཏཱ ཨནུནེཏཱ, ཡཐཱསབྷཱཝཏོ པཱཊིཡེཀྐཾ པཱཊིཡེཀྐཾ ནཱམཾ གཧེཏྭཱ དསྶེཏཱཏི དྷམྨཱ བྷགཝཾནེཏྟིཀཱ ནཱམ ཧོནྟི། བྷགཝཾཔཊིསརཎཱཏི ཙཏུབྷཱུམཀདྷམྨཱ སབྦཉྙུཏཉྙཱཎསྶ ཨཱཔཱཐཾ ཨཱགཙྪམཱནཱ བྷགཝཏི པཊིསརནྟི ནཱམཱཏི བྷགཝཾཔཊིསརཎཱ། པཊིསརནྟཱིཏི སམོསརནྟི། ཨཔིཙ མཧཱབོདྷིམཎྜེ ནིསིནྣསྶ བྷགཝཏོ པཊིཝེདྷཝསེན ཕསྶོ ཨཱགཙྪཏི ‘‘ཨཧཾ བྷགཝཱ ཀིནྣཱམོ’’ཏི? ཏྭཾ ཕུསནཊྛེན ཕསྶོ ནཱམ། ཝེདནཱ, སཉྙཱ, སངྑཱརཱ, ཝིཉྙཱཎཾ ཨཱགཙྪཏི ‘‘ཨཧཾ བྷགཝཱ ཀིནྣཱམ’’ནྟི, ཏྭཾ ཝིཛཱནནཊྛེན ཝིཉྙཱཎཾ ནཱམཱཏི ཨེཝཾ ཙཏུབྷཱུམཀདྷམྨཱནཾ ཡཐཱསབྷཱཝཏོ པཱཊིཡེཀྐཾ པཱཊིཡེཀྐཾ ནཱམཾ གཎྷནྟོ བྷགཝཱ དྷམྨེ པཊིསརཏཱིཏི བྷགཝཾཔཊིསརཎཱ། བྷགཝནྟཾཡེཝ པཊིབྷཱཏཱུཏི བྷགཝཏོཝ ཨེཏསྶ བྷཱསིཏསྶ ཨཏྠོ ཨུཔཊྛཱཏུ, ཏུམྷེཡེཝ ནོ ཀཐེཏྭཱ དེཐཱཏི ཨཏྠོ།
Bhagavaṃmūlakāti bhagavā mūlaṃ etesanti bhagavaṃmūlakā. Idaṃ vuttaṃ hoti – ime, bhante, amhākaṃ dhammā pubbe kassapasammāsambuddhena uppāditā, tasmiṃ parinibbute ekaṃ buddhantaraṃ añño samaṇo vā brāhmaṇo vā ime dhamme uppādetuṃ samattho nāma nāhosi, bhagavatā pana no ime dhammā uppāditā. Bhagavantañhi nissāya mayaṃ ime dhamme ājānāma paṭivijjhāmāti evaṃ bhagavaṃmūlakā no, bhante, dhammāti. Bhagavaṃnettikāti bhagavā hi dhammānaṃ netā vinetā anunetā, yathāsabhāvato pāṭiyekkaṃ pāṭiyekkaṃ nāmaṃ gahetvā dassetāti dhammā bhagavaṃnettikā nāma honti. Bhagavaṃpaṭisaraṇāti catubhūmakadhammā sabbaññutaññāṇassa āpāthaṃ āgacchamānā bhagavati paṭisaranti nāmāti bhagavaṃpaṭisaraṇā. Paṭisarantīti samosaranti. Apica mahābodhimaṇḍe nisinnassa bhagavato paṭivedhavasena phasso āgacchati ‘‘ahaṃ bhagavā kinnāmo’’ti? Tvaṃ phusanaṭṭhena phasso nāma. Vedanā, saññā, saṅkhārā, viññāṇaṃ āgacchati ‘‘ahaṃ bhagavā kinnāma’’nti, tvaṃ vijānanaṭṭhena viññāṇaṃ nāmāti evaṃ catubhūmakadhammānaṃ yathāsabhāvato pāṭiyekkaṃ pāṭiyekkaṃ nāmaṃ gaṇhanto bhagavā dhamme paṭisaratīti bhagavaṃpaṭisaraṇā. Bhagavantaṃyeva paṭibhātūti bhagavatova etassa bhāsitassa attho upaṭṭhātu, tumheyeva no kathetvā dethāti attho.
སཱ ཙེཝ ཨཝིཛྫཱཏི ཨེཏྠ ཀིཉྩཱཔི སཱ ཨཝིཛྫཱ ཙ ཏཎྷཱ ཙ ཀམྨཾ ཛཝཱཔེཏྭཱ པཊིསནྡྷིཾ ཨཱཀཌྜྷིཏྭཱ ནིརུདྡྷཱ, ཡཐཱ པན ཨཛྫཱཔི ཡཾ ཧིཡྻོ བྷེསཛྫཾ པཱིཏཾ, ཏདེཝ བྷོཛནཾ བྷུཉྫཱཏི སརིཀྑཀཏྟེན ཏདེཝཱཏི ཝུཙྩཏི, ཨེཝམིདྷཱཔི སཱ ཙེཝ ཨཝིཛྫཱ སཱ ཙ ཏཎྷཱཏི ཨིདམྤི སརིཀྑཀཏྟེན ཝུཏྟཾ། བྲཧྨཙརིཡནྟི མགྒབྲཧྨཙརིཡཾ། དུཀྑཀྑཡཱཡཱཏི ཝཊྚདུཀྑསྶ ཁཡཏྠཱཡ། ཀཱཡཱུཔགོ ཧོཏཱིཏི ཨཉྙཾ པཊིསནྡྷིཀཱཡཾ ཨུཔགནྟཱ ཧོཏི། ཡདིདཾ བྲཧྨཙརིཡཝཱསོཏི ཡོ ཨཡཾ མགྒབྲཧྨཙརིཡཝཱསོ, ཨཡཾ བཱལཏོ པཎྜིཏསྶ ཝིསེསོཏི དསྶེཏི། ཨིཏི ཨིམསྨིཾ སུཏྟེ སབྦོཔི སཔཊིསནྡྷིཀོ པུཐུཛྫནོ ‘‘བཱལོ’’ཏི, ཨཔྤཊིསནྡྷིཀོ ཁཱིཎཱསཝོ ‘‘པཎྜིཏོ’’ཏི ཝུཏྟོ། སོཏཱཔནྣསཀདཱགཱམིཨནཱགཱམིནོ པན ‘‘པཎྜིཏཱ’’ཏི ཝཱ ‘‘བཱལཱ’’ཏི ཝཱ ན ཝཏྟབྦཱ, བྷཛམཱནཱ པན པཎྜིཏཔཀྑཾ བྷཛནྟི། ནཝམཾ།
Sāceva avijjāti ettha kiñcāpi sā avijjā ca taṇhā ca kammaṃ javāpetvā paṭisandhiṃ ākaḍḍhitvā niruddhā, yathā pana ajjāpi yaṃ hiyyo bhesajjaṃ pītaṃ, tadeva bhojanaṃ bhuñjāti sarikkhakattena tadevāti vuccati, evamidhāpi sā ceva avijjā sā ca taṇhāti idampi sarikkhakattena vuttaṃ. Brahmacariyanti maggabrahmacariyaṃ. Dukkhakkhayāyāti vaṭṭadukkhassa khayatthāya. Kāyūpago hotīti aññaṃ paṭisandhikāyaṃ upagantā hoti. Yadidaṃ brahmacariyavāsoti yo ayaṃ maggabrahmacariyavāso, ayaṃ bālato paṇḍitassa visesoti dasseti. Iti imasmiṃ sutte sabbopi sapaṭisandhiko puthujjano ‘‘bālo’’ti, appaṭisandhiko khīṇāsavo ‘‘paṇḍito’’ti vutto. Sotāpannasakadāgāmianāgāmino pana ‘‘paṇḍitā’’ti vā ‘‘bālā’’ti vā na vattabbā, bhajamānā pana paṇḍitapakkhaṃ bhajanti. Navamaṃ.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༩. བཱལཔཎྜིཏསུཏྟཾ • 9. Bālapaṇḍitasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༩. བཱལཔཎྜིཏསུཏྟཝཎྞནཱ • 9. Bālapaṇḍitasuttavaṇṇanā
