| Library / Tipiṭaka / திபிடக • Tipiṭaka / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā |
ப³லராஸிவண்ணனா
Balarāsivaṇṇanā
ஸத்³தா⁴ப³லாதீ³ஸுபி ஸத்³தா⁴தீ³னி வுத்தத்தா²னேவ. அகம்பியட்டே²ன பன ப³லந்தி வேதி³தப்³ப³ங். ஏவமேதேஸு அஸ்ஸத்³தி⁴யே ந கம்பதீதி ஸத்³தா⁴ப³லங். கோஸஜ்ஜே ந கம்பதீதி வீரியப³லங். முட்ட²ஸ்ஸச்சே ந கம்பதீதி ஸதிப³லங். உத்³த⁴ச்சே ந கம்பதீதி ஸமாதி⁴ப³லங். அவிஜ்ஜாய ந கம்பதீதி பஞ்ஞாப³லங். அஹிரிகே ந கம்பதீதி ஹிரிப³லங் . அனொத்தப்பே ந கம்பதீதி ஒத்தப்பப³லந்தி. அயங் உப⁴யபத³வஸேன அத்த²வண்ணனா ஹோதி.
Saddhābalādīsupi saddhādīni vuttatthāneva. Akampiyaṭṭhena pana balanti veditabbaṃ. Evametesu assaddhiye na kampatīti saddhābalaṃ. Kosajje na kampatīti vīriyabalaṃ. Muṭṭhassacce na kampatīti satibalaṃ. Uddhacce na kampatīti samādhibalaṃ. Avijjāya na kampatīti paññābalaṃ. Ahirike na kampatīti hiribalaṃ. Anottappe na kampatīti ottappabalanti. Ayaṃ ubhayapadavasena atthavaṇṇanā hoti.
தத்த² புரிமானி பஞ்ச ஹெட்டா² லக்க²ணாதீ³ஹி பகாஸிதானேவ. பச்சி²மத்³வயே காயது³ச்சரிதாதீ³ஹி ஹிரியதீதி ஹிரீ; லஜ்ஜாயேதங் அதி⁴வசனங். தேஹி ஏவ ஒத்தப்பதீதி ஒத்தப்பங்; பாபதோ உப்³பே³க³ஸ்ஸேதங் அதி⁴வசனங். தேஸங் நானாகரணதீ³பனத்த²ங் ‘ஸமுட்டா²னங் அதி⁴பதி லஜ்ஜா ப⁴யலக்க²ணேன சா’தி இமங் மாதிகங் ட²பெத்வா அயங் வித்தா²ரகதா² வுத்தா.
Tattha purimāni pañca heṭṭhā lakkhaṇādīhi pakāsitāneva. Pacchimadvaye kāyaduccaritādīhi hiriyatīti hirī; lajjāyetaṃ adhivacanaṃ. Tehi eva ottappatīti ottappaṃ; pāpato ubbegassetaṃ adhivacanaṃ. Tesaṃ nānākaraṇadīpanatthaṃ ‘samuṭṭhānaṃ adhipati lajjā bhayalakkhaṇena cā’ti imaṃ mātikaṃ ṭhapetvā ayaṃ vitthārakathā vuttā.
அஜ்ஜ²த்தஸமுட்டா²னா ஹிரீ நாம; ப³ஹித்³தா⁴ஸமுட்டா²னங் ஒத்தப்பங் நாம. அத்தாதி⁴பதி ஹிரீ நாம; லோகாதி⁴பதி ஒத்தப்பங் நாம. லஜ்ஜாஸபா⁴வஸண்டி²தா ஹிரீ நாம; ப⁴யஸபா⁴வஸண்டி²தங் ஒத்தப்பங் நாம. ஸப்பதிஸ்ஸவலக்க²ணா ஹிரீ நாம; வஜ்ஜபீ⁴ருகப⁴யத³ஸ்ஸாவிலக்க²ணங் ஒத்தப்பங் நாம.
Ajjhattasamuṭṭhānā hirī nāma; bahiddhāsamuṭṭhānaṃ ottappaṃ nāma. Attādhipati hirī nāma; lokādhipati ottappaṃ nāma. Lajjāsabhāvasaṇṭhitā hirī nāma; bhayasabhāvasaṇṭhitaṃ ottappaṃ nāma. Sappatissavalakkhaṇā hirī nāma; vajjabhīrukabhayadassāvilakkhaṇaṃ ottappaṃ nāma.
தத்த² அஜ்ஜ²த்தஸமுட்டா²னங் ஹிரிங் சதூஹி காரணேஹி ஸமுட்டா²பேதி – ஜாதிங் பச்சவெக்கி²த்வா, வயங் பச்சவெக்கி²த்வா, ஸூரபா⁴வங் பச்சவெக்கி²த்வா, பா³ஹுஸச்சங் பச்சவெக்கி²த்வா. கத²ங்? ‘பாபகரணங் நாமேதங் ந ஜாதிஸம்பன்னானங் கம்மங், ஹீனஜச்சானங் கேவட்டாதீ³னங் இத³ங் கம்மங். மாதி³ஸஸ்ஸ ஜாதிஸம்பன்னஸ்ஸ இத³ங் கம்மங் காதுங் ந யுத்த’ந்தி, ஏவங் தாவ ஜாதிங் பச்சவெக்கி²த்வா பாணாதிபாதாதி³பாபங் அகரொந்தோ ஹிரிங் ஸமுட்டா²பேதி. ததா² ‘பாபகரணங் நாமேதங் த³ஹரேஹி கத்தப்³ப³ங் கம்மங், மாதி³ஸஸ்ஸ வயே டி²தஸ்ஸ இத³ங் கம்மங் காதுங் ந யுத்த’ந்தி, ஏவங் வயங் பச்சவெக்கி²த்வா பாணாதிபாதாதி³பாபங் அகரொந்தோ ஹிரிங் ஸமுட்டா²பேதி. ததா² ‘பாபகம்மங் நாமேதங் து³ப்³ப³லஜாதிகானங் கம்மங், ந ஸூரபா⁴வானங். மாதி³ஸஸ்ஸ ஸூரபா⁴வஸம்பன்னஸ்ஸ இத³ங் கம்மங் காதுங் ந யுத்த’ந்தி, ஏவங் ஸூரபா⁴வங் பச்சவெக்கி²த்வா பாணாதிபாதாதி³பாபங் அகரொந்தோ ஹிரிங் ஸமுட்டா²பேதி. ததா² ‘பாபகம்மங் நாமேதங் அந்த⁴பா³லானங் கம்மங், ந பண்டி³தானங். மாதி³ஸஸ்ஸ பண்டி³தஸ்ஸ ப³ஹுஸ்ஸுதஸ்ஸ இத³ங் கம்மங் காதுங் ந யுத்த’ந்தி, ஏவங் பா³ஹுஸச்சங் பச்சவெக்கி²த்வா பாணாதிபாதாதி³பாபங் அகரொந்தோ ஹிரிங் ஸமுட்டா²பேதி. ஏவங் அஜ்ஜ²த்தஸமுட்டா²னஹிரிங் சதூஹி காரணேஹி ஸமுட்டா²பேதி. ஸமுட்டா²பெத்வா ச பன அத்தனோ சித்தே ஹிரிங் பவேஸெத்வா பாபகம்மங் ந கரோதி. ஏவங் அஜ்ஜ²த்தஸமுட்டா²னா ஹிரீ நாம ஹோதி.
Tattha ajjhattasamuṭṭhānaṃ hiriṃ catūhi kāraṇehi samuṭṭhāpeti – jātiṃ paccavekkhitvā, vayaṃ paccavekkhitvā, sūrabhāvaṃ paccavekkhitvā, bāhusaccaṃ paccavekkhitvā. Kathaṃ? ‘Pāpakaraṇaṃ nāmetaṃ na jātisampannānaṃ kammaṃ, hīnajaccānaṃ kevaṭṭādīnaṃ idaṃ kammaṃ. Mādisassa jātisampannassa idaṃ kammaṃ kātuṃ na yutta’nti, evaṃ tāva jātiṃ paccavekkhitvā pāṇātipātādipāpaṃ akaronto hiriṃ samuṭṭhāpeti. Tathā ‘pāpakaraṇaṃ nāmetaṃ daharehi kattabbaṃ kammaṃ, mādisassa vaye ṭhitassa idaṃ kammaṃ kātuṃ na yutta’nti, evaṃ vayaṃ paccavekkhitvā pāṇātipātādipāpaṃ akaronto hiriṃ samuṭṭhāpeti. Tathā ‘pāpakammaṃ nāmetaṃ dubbalajātikānaṃ kammaṃ, na sūrabhāvānaṃ. Mādisassa sūrabhāvasampannassa idaṃ kammaṃ kātuṃ na yutta’nti, evaṃ sūrabhāvaṃ paccavekkhitvā pāṇātipātādipāpaṃ akaronto hiriṃ samuṭṭhāpeti. Tathā ‘pāpakammaṃ nāmetaṃ andhabālānaṃ kammaṃ, na paṇḍitānaṃ. Mādisassa paṇḍitassa bahussutassa idaṃ kammaṃ kātuṃ na yutta’nti, evaṃ bāhusaccaṃ paccavekkhitvā pāṇātipātādipāpaṃ akaronto hiriṃ samuṭṭhāpeti. Evaṃ ajjhattasamuṭṭhānahiriṃ catūhi kāraṇehi samuṭṭhāpeti. Samuṭṭhāpetvā ca pana attano citte hiriṃ pavesetvā pāpakammaṃ na karoti. Evaṃ ajjhattasamuṭṭhānā hirī nāma hoti.
கத²ங் ப³ஹித்³தா⁴ஸமுட்டா²னங் ஒத்தப்பங் நாம? ஸசே த்வங் பாபகம்மங் கரிஸ்ஸஸி சதூஸு பரிஸாஸு க³ரஹப்பத்தோ ப⁴விஸ்ஸஸி.
Kathaṃ bahiddhāsamuṭṭhānaṃ ottappaṃ nāma? Sace tvaṃ pāpakammaṃ karissasi catūsu parisāsu garahappatto bhavissasi.
க³ரஹிஸ்ஸந்தி தங் விஞ்ஞூ, அஸுசிங் நாக³ரிகோ யதா²;
Garahissanti taṃ viññū, asuciṃ nāgariko yathā;
வஜ்ஜிதோ ஸீலவந்தேஹி, கத²ங் பி⁴க்கு² கரிஸ்ஸஸீதி.
Vajjito sīlavantehi, kathaṃ bhikkhu karissasīti.
ஏவங் பச்சவெக்க²ந்தோ ஹி ப³ஹித்³தா⁴ஸமுட்டி²தேன ஒத்தப்பேன பாபகம்மங் ந கரோதி. ஏவங் ப³ஹித்³தா⁴ஸமுட்டா²னங் ஒத்தப்பங் நாம ஹோதி.
Evaṃ paccavekkhanto hi bahiddhāsamuṭṭhitena ottappena pāpakammaṃ na karoti. Evaṃ bahiddhāsamuṭṭhānaṃ ottappaṃ nāma hoti.
கத²ங் அத்தாதி⁴பதி ஹிரீ நாம? இதே⁴கச்சோ குலபுத்தோ அத்தானங் அதி⁴பதிங் ஜெட்ட²கங் கத்வா ‘மாதி³ஸஸ்ஸ ஸத்³தா⁴பப்³ப³ஜிதஸ்ஸ ப³ஹுஸ்ஸுதஸ்ஸ து⁴தங்க³த⁴ரஸ்ஸ ந யுத்தங் பாபகம்மங் காது’ந்தி பாபங் ந கரோதி. ஏவங் அத்தாதி⁴பதி ஹிரீ நாம ஹோதி. தேனாஹ ப⁴க³வா – ‘‘ஸோ அத்தானங்யேவ அதி⁴பதிங் ஜெட்ட²கங் கரித்வா அகுஸலங் பஜஹதி குஸலங் பா⁴வேதி, ஸாவஜ்ஜங் பஜஹதி அனவஜ்ஜங் பா⁴வேதி, ஸுத்³த⁴மத்தானங் பரிஹரதீ’’தி (அ॰ நி॰ 3.40).
Kathaṃ attādhipati hirī nāma? Idhekacco kulaputto attānaṃ adhipatiṃ jeṭṭhakaṃ katvā ‘mādisassa saddhāpabbajitassa bahussutassa dhutaṅgadharassa na yuttaṃ pāpakammaṃ kātu’nti pāpaṃ na karoti. Evaṃ attādhipati hirī nāma hoti. Tenāha bhagavā – ‘‘so attānaṃyeva adhipatiṃ jeṭṭhakaṃ karitvā akusalaṃ pajahati kusalaṃ bhāveti, sāvajjaṃ pajahati anavajjaṃ bhāveti, suddhamattānaṃ pariharatī’’ti (a. ni. 3.40).
கத²ங் லோகாதி⁴பதி ஒத்தப்பங் நாம? இதே⁴கச்சோ குலபுத்தோ லோகங் அதி⁴பதிங் ஜெட்ட²கங் கத்வா பாபகம்மங் ந கரோதி. யதா²ஹ – ‘‘மஹா கோ² பனாயங் லோகஸன்னிவாஸோ. மஹந்தஸ்மிங் கோ² பன லோகஸன்னிவாஸே ஸந்தி ஸமணப்³ராஹ்மணா இத்³தி⁴மந்தோ தி³ப்³ப³சக்கு²கா பரசித்தவிது³னோ, தே தூ³ரதோபி பஸ்ஸந்தி, ஆஸன்னாபி ந தி³ஸ்ஸந்தி, சேதஸாபி சித்தங் பஜானந்தி, தேபிமங் ஏவங் ஜானிஸ்ஸந்தி ‘பஸ்ஸத² போ⁴ இமங் குலபுத்தங், ஸத்³தா⁴ அகா³ரஸ்மா அனகா³ரியங் பப்³ப³ஜிதோ ஸமானோ வோகிண்ணோ விஹரதி பாபகேஹி அகுஸலேஹி த⁴ம்மேஹீ’தி. ஸந்தி தே³வதா இத்³தி⁴மந்தினியோ தி³ப்³ப³சக்கு²கா பரசித்தவிது³னியோ. தா தூ³ரதோபி பஸ்ஸந்தி, ஆஸன்னாபி ந தி³ஸ்ஸந்தி, சேதஸாபி சித்தங் பஜானந்தி, தாபி மங் ஜானிஸ்ஸந்தி ‘பஸ்ஸத² போ⁴ இமங் குலபுத்தங், ஸத்³தா⁴ அகா³ரஸ்மா அனகா³ரியங் பப்³ப³ஜிதோ ஸமானோ வோகிண்ணோ விஹரதி பாபகேஹி அகுஸலேஹி த⁴ம்மேஹீ’தி… ஸோ லோகங்யேவ அதி⁴பதிங் ஜெட்ட²கங் கத்வா அகுஸலங் பஜஹதி குஸலங் பா⁴வேதி, ஸாவஜ்ஜங் பஜஹதி அனவஜ்ஜங் பா⁴வேதி, ஸுத்³த⁴மத்தானங் பரிஹரதீ’’தி (அ॰ நி॰ 3.146). ஏவங் லோகாதி⁴பதி ஒத்தப்பங் நாம ஹோதி.
Kathaṃ lokādhipati ottappaṃ nāma? Idhekacco kulaputto lokaṃ adhipatiṃ jeṭṭhakaṃ katvā pāpakammaṃ na karoti. Yathāha – ‘‘mahā kho panāyaṃ lokasannivāso. Mahantasmiṃ kho pana lokasannivāse santi samaṇabrāhmaṇā iddhimanto dibbacakkhukā paracittaviduno, te dūratopi passanti, āsannāpi na dissanti, cetasāpi cittaṃ pajānanti, tepimaṃ evaṃ jānissanti ‘passatha bho imaṃ kulaputtaṃ, saddhā agārasmā anagāriyaṃ pabbajito samāno vokiṇṇo viharati pāpakehi akusalehi dhammehī’ti. Santi devatā iddhimantiniyo dibbacakkhukā paracittaviduniyo. Tā dūratopi passanti, āsannāpi na dissanti, cetasāpi cittaṃ pajānanti, tāpi maṃ jānissanti ‘passatha bho imaṃ kulaputtaṃ, saddhā agārasmā anagāriyaṃ pabbajito samāno vokiṇṇo viharati pāpakehi akusalehi dhammehī’ti… so lokaṃyeva adhipatiṃ jeṭṭhakaṃ katvā akusalaṃ pajahati kusalaṃ bhāveti, sāvajjaṃ pajahati anavajjaṃ bhāveti, suddhamattānaṃ pariharatī’’ti (a. ni. 3.146). Evaṃ lokādhipati ottappaṃ nāma hoti.
லஜ்ஜாஸபா⁴வஸண்டி²தா ஹிரீ, ப⁴யஸபா⁴வஸண்டி²தங் ஒத்தப்பந்தி. எத்த² பன லஜ்ஜாதி லஜ்ஜனாகாரோ; தேன ஸபா⁴வேன ஸண்டி²தா ஹிரீ. ப⁴யந்தி அபாயப⁴யங்; தேன ஸபா⁴வேன ஸண்டி²தங் ஒத்தப்பங். தது³ப⁴யம்பி பாபபரிவஜ்ஜனே பாகடங் ஹோதி. ஏகச்சோ ஹி, யதா² நாம ஏகோ குலபுத்தோ உச்சாரபஸ்ஸாவாதீ³னி கரொந்தோ லஜ்ஜிதப்³ப³யுத்தகங் ஏகங் தி³ஸ்வா லஜ்ஜனாகாரப்பத்தோ ப⁴வெய்ய ஹீளிதோ, ஏவமேவ அஜ்ஜ²த்தங் லஜ்ஜித⁴ம்மங் ஓக்கமித்வா பாபகம்மங் ந கரோதி. ஏகச்சோ அபாயப⁴யபீ⁴தோ ஹுத்வா பாபகம்மங் ந கரோதி.
Lajjāsabhāvasaṇṭhitā hirī, bhayasabhāvasaṇṭhitaṃ ottappanti. Ettha pana lajjāti lajjanākāro; tena sabhāvena saṇṭhitā hirī. Bhayanti apāyabhayaṃ; tena sabhāvena saṇṭhitaṃ ottappaṃ. Tadubhayampi pāpaparivajjane pākaṭaṃ hoti. Ekacco hi, yathā nāma eko kulaputto uccārapassāvādīni karonto lajjitabbayuttakaṃ ekaṃ disvā lajjanākārappatto bhaveyya hīḷito, evameva ajjhattaṃ lajjidhammaṃ okkamitvā pāpakammaṃ na karoti. Ekacco apāyabhayabhīto hutvā pāpakammaṃ na karoti.
தத்ரித³ங் ஓபம்மங் – யதா² ஹி த்³வீஸு அயோகு³ளேஸு ஏகோ ஸீதலோ ப⁴வெய்ய கூ³த²மக்கி²தோ, ஏகோ உண்ஹோ ஆதி³த்தோ. தத்த² பண்டி³தோ ஸீதலங் கூ³த²மக்கி²தத்தா ஜிகு³ச்ச²ந்தோ ந க³ண்ஹாதி, இதரங் டா³ஹப⁴யேன. தத்த² ஸீதலஸ்ஸ கூ³த²மக்க²னஜிகு³ச்சா²ய அக³ண்ஹனங் விய அஜ்ஜ²த்தங் லஜ்ஜித⁴ம்மங் ஓக்கமித்வா பாபஸ்ஸ அகரணங். உண்ஹஸ்ஸ டா³ஹப⁴யேன அக³ண்ஹனங் விய அபாயப⁴யேன பாபஸ்ஸ அகரணங் வேதி³தப்³ப³ங்.
Tatridaṃ opammaṃ – yathā hi dvīsu ayoguḷesu eko sītalo bhaveyya gūthamakkhito, eko uṇho āditto. Tattha paṇḍito sītalaṃ gūthamakkhitattā jigucchanto na gaṇhāti, itaraṃ ḍāhabhayena. Tattha sītalassa gūthamakkhanajigucchāya agaṇhanaṃ viya ajjhattaṃ lajjidhammaṃ okkamitvā pāpassa akaraṇaṃ. Uṇhassa ḍāhabhayena agaṇhanaṃ viya apāyabhayena pāpassa akaraṇaṃ veditabbaṃ.
ஸப்பதிஸ்ஸவலக்க²ணா ஹிரீ, வஜ்ஜபீ⁴ருகப⁴யத³ஸ்ஸாவிலக்க²ணங் ஒத்தப்பந்தி. இத³ம்பி த்³வயங் பாபபரிவஜ்ஜனே ஏவ பாகடங் ஹோதி. ஏகச்சோ ஹி ஜாதிமஹத்தபச்சவெக்க²ணா ஸத்து²மஹத்தபச்சவெக்க²ணா தா³யஜ்ஜமஹத்தபச்சவெக்க²ணா ஸப்³ரஹ்மசாரீமஹத்தபச்சவெக்க²ணாதி சதூஹி காரணேஹி ஸப்பதிஸ்ஸவலக்க²ணங் ஹிரிங் ஸமுட்டா²பெத்வா பாபங் ந கரோதி. ஏகச்சோ அத்தானுவாத³ப⁴யங் பரானுவாத³ப⁴யங் த³ண்ட³ப⁴யங் து³க்³க³திப⁴யந்தி சதூஹி காரணேஹி வஜ்ஜபீ⁴ருகப⁴யத³ஸ்ஸாவிலக்க²ணங் ஒத்தப்பங் ஸமுட்டா²பெத்வா பாபங் ந கரோதி. தத்த² ஜாதிமஹத்தபச்சவெக்க²ணாதீ³னி சேவ அத்தானுவாத³ப⁴யாதீ³னி ச வித்தா²ரெத்வா கதே²தப்³பா³னி.
Sappatissavalakkhaṇā hirī, vajjabhīrukabhayadassāvilakkhaṇaṃ ottappanti. Idampi dvayaṃ pāpaparivajjane eva pākaṭaṃ hoti. Ekacco hi jātimahattapaccavekkhaṇā satthumahattapaccavekkhaṇā dāyajjamahattapaccavekkhaṇā sabrahmacārīmahattapaccavekkhaṇāti catūhi kāraṇehi sappatissavalakkhaṇaṃ hiriṃ samuṭṭhāpetvā pāpaṃ na karoti. Ekacco attānuvādabhayaṃ parānuvādabhayaṃ daṇḍabhayaṃ duggatibhayanti catūhi kāraṇehi vajjabhīrukabhayadassāvilakkhaṇaṃ ottappaṃ samuṭṭhāpetvā pāpaṃ na karoti. Tattha jātimahattapaccavekkhaṇādīni ceva attānuvādabhayādīni ca vitthāretvā kathetabbāni.
