| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༥. བལསུཏྟཾ
5. Balasuttaṃ
༥. ‘‘ཙཏྟཱརིམཱནི, བྷིཀྑཝེ, བལཱནི། ཀཏམཱནི ཙཏྟཱརི? པཉྙཱབལཾ, ཝཱིརིཡབལཾ, ཨནཝཛྫབལཾ, སངྒཱཧབལཾ། ཀཏམཉྩ, བྷིཀྑཝེ, པཉྙཱབལཾ? ཡེ དྷམྨཱ ཀུསལཱ ཀུསལསངྑཱཏཱ ཡེ དྷམྨཱ ཨཀུསལཱ ཨཀུསལསངྑཱཏཱ ཡེ དྷམྨཱ སཱཝཛྫཱ སཱཝཛྫསངྑཱཏཱ ཡེ དྷམྨཱ ཨནཝཛྫཱ ཨནཝཛྫསངྑཱཏཱ ཡེ དྷམྨཱ ཀཎྷཱ ཀཎྷསངྑཱཏཱ ཡེ དྷམྨཱ སུཀྐཱ སུཀྐསངྑཱཏཱ ཡེ དྷམྨཱ སེཝིཏབྦཱ སེཝིཏབྦསངྑཱཏཱ ཡེ དྷམྨཱ ཨསེཝིཏབྦཱ ཨསེཝིཏབྦསངྑཱཏཱ ཡེ དྷམྨཱ ནཱལམརིཡཱ ནཱལམརིཡསངྑཱཏཱ ཡེ དྷམྨཱ ཨལམརིཡཱ ཨལམརིཡསངྑཱཏཱ, ཏྱཱསྶ དྷམྨཱ པཉྙཱཡ ཝོདིཊྛཱ ཧོནྟི ཝོཙརིཏཱ། ཨིདཾ ཝུཙྩཏི, བྷིཀྑཝེ, པཉྙཱབལཾ།
5. ‘‘Cattārimāni, bhikkhave, balāni. Katamāni cattāri? Paññābalaṃ, vīriyabalaṃ, anavajjabalaṃ, saṅgāhabalaṃ. Katamañca, bhikkhave, paññābalaṃ? Ye dhammā kusalā kusalasaṅkhātā ye dhammā akusalā akusalasaṅkhātā ye dhammā sāvajjā sāvajjasaṅkhātā ye dhammā anavajjā anavajjasaṅkhātā ye dhammā kaṇhā kaṇhasaṅkhātā ye dhammā sukkā sukkasaṅkhātā ye dhammā sevitabbā sevitabbasaṅkhātā ye dhammā asevitabbā asevitabbasaṅkhātā ye dhammā nālamariyā nālamariyasaṅkhātā ye dhammā alamariyā alamariyasaṅkhātā, tyāssa dhammā paññāya vodiṭṭhā honti vocaritā. Idaṃ vuccati, bhikkhave, paññābalaṃ.
‘‘ཀཏམཉྩ , བྷིཀྑཝེ, ཝཱིརིཡབལཾ? ཡེ དྷམྨཱ ཨཀུསལཱ ཨཀུསལསངྑཱཏཱ ཡེ དྷམྨཱ སཱཝཛྫཱ སཱཝཛྫསངྑཱཏཱ ཡེ དྷམྨཱ ཀཎྷཱ ཀཎྷསངྑཱཏཱ ཡེ དྷམྨཱ ཨསེཝིཏབྦཱ ཨསེཝིཏབྦསངྑཱཏཱ ཡེ དྷམྨཱ ནཱལམརིཡཱ ནཱལམརིཡསངྑཱཏཱ, ཏེསཾ དྷམྨཱནཾ པཧཱནཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི། ཡེ དྷམྨཱ ཀུསལཱ ཀུསལསངྑཱཏཱ ཡེ དྷམྨཱ ཨནཝཛྫཱ ཨནཝཛྫསངྑཱཏཱ ཡེ དྷམྨཱ སུཀྐཱ སུཀྐསངྑཱཏཱ ཡེ དྷམྨཱ སེཝིཏབྦཱ སེཝིཏབྦསངྑཱཏཱ ཡེ དྷམྨཱ ཨལམརིཡཱ ཨལམརིཡསངྑཱཏཱ, ཏེསཾ དྷམྨཱནཾ པཊིལཱབྷཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི། ཨིདཾ ཝུཙྩཏི, བྷིཀྑཝེ, ཝཱིརིཡབལཾ།
‘‘Katamañca , bhikkhave, vīriyabalaṃ? Ye dhammā akusalā akusalasaṅkhātā ye dhammā sāvajjā sāvajjasaṅkhātā ye dhammā kaṇhā kaṇhasaṅkhātā ye dhammā asevitabbā asevitabbasaṅkhātā ye dhammā nālamariyā nālamariyasaṅkhātā, tesaṃ dhammānaṃ pahānāya chandaṃ janeti vāyamati vīriyaṃ ārabhati cittaṃ paggaṇhāti padahati. Ye dhammā kusalā kusalasaṅkhātā ye dhammā anavajjā anavajjasaṅkhātā ye dhammā sukkā sukkasaṅkhātā ye dhammā sevitabbā sevitabbasaṅkhātā ye dhammā alamariyā alamariyasaṅkhātā, tesaṃ dhammānaṃ paṭilābhāya chandaṃ janeti vāyamati vīriyaṃ ārabhati cittaṃ paggaṇhāti padahati. Idaṃ vuccati, bhikkhave, vīriyabalaṃ.
‘‘ཀཏམཉྩ, བྷིཀྑཝེ, ཨནཝཛྫབལཾ? ཨིདྷ, བྷིཀྑཝེ, ཨརིཡསཱཝཀོ ཨནཝཛྫེན ཀཱཡཀམྨེན སམནྣཱགཏོ ཧོཏི, ཨནཝཛྫེན ཝཙཱིཀམྨེན སམནྣཱགཏོ ཧོཏི, ཨནཝཛྫེན མནོཀམྨེན སམནྣཱགཏོ ཧོཏི། ཨིདཾ ཝུཙྩཏི, བྷིཀྑཝེ, ཨནཝཛྫབལཾ།
‘‘Katamañca, bhikkhave, anavajjabalaṃ? Idha, bhikkhave, ariyasāvako anavajjena kāyakammena samannāgato hoti, anavajjena vacīkammena samannāgato hoti, anavajjena manokammena samannāgato hoti. Idaṃ vuccati, bhikkhave, anavajjabalaṃ.
‘‘ཀཏམཉྩ , བྷིཀྑཝེ, སངྒཱཧབལཾ? ཙཏྟཱརིམཱནི, བྷིཀྑཝེ, སངྒཧཝཏྠཱུནི – དཱནཾ, པེཡྻཝཛྫཾ, ཨཏྠཙརིཡཱ, སམཱནཏྟཏཱ། ཨེཏདགྒཾ, བྷིཀྑཝེ, དཱནཱནཾ ཡདིདཾ དྷམྨདཱནཾ། ཨེཏདགྒཾ, བྷིཀྑཝེ, པེཡྻཝཛྫཱནཾ ཡདིདཾ ཨཏྠིཀསྶ ཨོཧིཏསོཏསྶ པུནཔྤུནཾ དྷམྨཾ དེསེཏི། ཨེཏདགྒཾ, བྷིཀྑཝེ, ཨཏྠཙརིཡཱནཾ ཡདིདཾ ཨསྶདྡྷཾ སདྡྷཱསམྤདཱཡ སམཱདཔེཏི ནིཝེསེཏི པཏིཊྛཱཔེཏི, དུསྶཱིལཾ སཱིལསམྤདཱཡ… པེ॰… མཙྪརིཾ ཙཱགསམྤདཱཡ…པེ॰… དུཔྤཉྙཾ པཉྙཱསམྤདཱཡ སམཱདཔེཏི ནིཝེསེཏི པཏིཊྛཱཔེཏི། ཨེཏདགྒཾ, བྷིཀྑཝེ, སམཱནཏྟཏཱནཾ ཡདིདཾ སོཏཱཔནྣོ སོཏཱཔནྣསྶ སམཱནཏྟོ, སཀདཱགཱམཱི སཀདཱགཱམིསྶ སམཱནཏྟོ, ཨནཱགཱམཱི ཨནཱགཱམིསྶ སམཱནཏྟོ, ཨརཧཱ ཨརཧཏོ སམཱནཏྟོ། ཨིདཾ ཝུཙྩཏི, བྷིཀྑཝེ, སངྒཱཧབལཾ། ཨིམཱནི ཁོ, བྷིཀྑཝེ, ཙཏྟཱརི བལཱནི།
‘‘Katamañca , bhikkhave, saṅgāhabalaṃ? Cattārimāni, bhikkhave, saṅgahavatthūni – dānaṃ, peyyavajjaṃ, atthacariyā, samānattatā. Etadaggaṃ, bhikkhave, dānānaṃ yadidaṃ dhammadānaṃ. Etadaggaṃ, bhikkhave, peyyavajjānaṃ yadidaṃ atthikassa ohitasotassa punappunaṃ dhammaṃ deseti. Etadaggaṃ, bhikkhave, atthacariyānaṃ yadidaṃ assaddhaṃ saddhāsampadāya samādapeti niveseti patiṭṭhāpeti, dussīlaṃ sīlasampadāya… pe… macchariṃ cāgasampadāya…pe… duppaññaṃ paññāsampadāya samādapeti niveseti patiṭṭhāpeti. Etadaggaṃ, bhikkhave, samānattatānaṃ yadidaṃ sotāpanno sotāpannassa samānatto, sakadāgāmī sakadāgāmissa samānatto, anāgāmī anāgāmissa samānatto, arahā arahato samānatto. Idaṃ vuccati, bhikkhave, saṅgāhabalaṃ. Imāni kho, bhikkhave, cattāri balāni.
‘‘ཨིམེཧི ཁོ, བྷིཀྑཝེ, ཙཏཱུཧི བལེཧི སམནྣཱགཏོ ཨརིཡསཱཝཀོ པཉྩ བྷཡཱནི སམཏིཀྐནྟོ ཧོཏི། ཀཏམཱནི པཉྩ? ཨཱཛཱིཝིཀབྷཡཾ, ཨསིལོཀབྷཡཾ, པརིསསཱརཛྫབྷཡཾ, མརཎབྷཡཾ , དུགྒཏིབྷཡཾ། ས ཁོ སོ, བྷིཀྑཝེ, ཨརིཡསཱཝཀོ ཨིཏི པཊིསཉྩིཀྑཏི – ‘ནཱཧཾ ཨཱཛཱིཝིཀབྷཡསྶ བྷཱཡཱམི། ཀིསྶཱཧཾ ཨཱཛཱིཝིཀབྷཡསྶ བྷཱཡིསྶཱམི? ཨཏྠི མེ ཙཏྟཱརི བལཱནི – པཉྙཱབལཾ, ཝཱིརིཡབལཾ, ཨནཝཛྫབལཾ, སངྒཱཧབལཾ། དུཔྤཉྙོ ཁོ ཨཱཛཱིཝིཀབྷཡསྶ བྷཱཡེཡྻ། ཀུསཱིཏོ ཨཱཛཱིཝིཀབྷཡསྶ བྷཱཡེཡྻ། སཱཝཛྫཀཱཡཀམྨནྟཝཙཱིཀམྨནྟམནོཀམྨནྟོ ཨཱཛཱིཝིཀབྷཡསྶ བྷཱཡེཡྻ། ཨསངྒཱཧཀོ ཨཱཛཱིཝིཀབྷཡསྶ བྷཱཡེཡྻ། ནཱཧཾ ཨསིལོཀབྷཡསྶ བྷཱཡཱམི…པེ॰… ནཱཧཾ པརིསསཱརཛྫབྷཡསྶ བྷཱཡཱམི…པེ॰… ནཱཧཾ མརཎབྷཡསྶ བྷཱཡཱམི…པེ॰… ནཱཧཾ དུགྒཏིབྷཡསྶ བྷཱཡཱམི། ཀིསྶཱཧཾ དུགྒཏིབྷཡསྶ བྷཱཡིསྶཱམི? ཨཏྠི མེ ཙཏྟཱརི བལཱནི – པཉྙཱབལཾ, ཝཱིརིཡབལཾ, ཨནཝཛྫབལཾ, སངྒཱཧབལཾ། དུཔྤཉྙོ ཁོ དུགྒཏིབྷཡསྶ བྷཱཡེཡྻ། ཀུསཱིཏོ དུགྒཏིབྷཡསྶ བྷཱཡེཡྻ། སཱཝཛྫཀཱཡཀམྨནྟཝཙཱིཀམྨནྟམནོཀམྨནྟོ དུགྒཏིབྷཡསྶ བྷཱཡེཡྻ། ཨསངྒཱཧཀོ དུགྒཏིབྷཡསྶ བྷཱཡེཡྻ། ཨིམེཧི ཁོ, བྷིཀྑཝེ, ཙཏཱུཧི བལེཧི སམནྣཱགཏོ ཨརིཡསཱཝཀོ ཨིམཱནི པཉྩ བྷཡཱནི སམཏིཀྐནྟོ ཧོཏཱི’’ཏི། པཉྩམཾ།
‘‘Imehi kho, bhikkhave, catūhi balehi samannāgato ariyasāvako pañca bhayāni samatikkanto hoti. Katamāni pañca? Ājīvikabhayaṃ, asilokabhayaṃ, parisasārajjabhayaṃ, maraṇabhayaṃ , duggatibhayaṃ. Sa kho so, bhikkhave, ariyasāvako iti paṭisañcikkhati – ‘nāhaṃ ājīvikabhayassa bhāyāmi. Kissāhaṃ ājīvikabhayassa bhāyissāmi? Atthi me cattāri balāni – paññābalaṃ, vīriyabalaṃ, anavajjabalaṃ, saṅgāhabalaṃ. Duppañño kho ājīvikabhayassa bhāyeyya. Kusīto ājīvikabhayassa bhāyeyya. Sāvajjakāyakammantavacīkammantamanokammanto ājīvikabhayassa bhāyeyya. Asaṅgāhako ājīvikabhayassa bhāyeyya. Nāhaṃ asilokabhayassa bhāyāmi…pe… nāhaṃ parisasārajjabhayassa bhāyāmi…pe… nāhaṃ maraṇabhayassa bhāyāmi…pe… nāhaṃ duggatibhayassa bhāyāmi. Kissāhaṃ duggatibhayassa bhāyissāmi? Atthi me cattāri balāni – paññābalaṃ, vīriyabalaṃ, anavajjabalaṃ, saṅgāhabalaṃ. Duppañño kho duggatibhayassa bhāyeyya. Kusīto duggatibhayassa bhāyeyya. Sāvajjakāyakammantavacīkammantamanokammanto duggatibhayassa bhāyeyya. Asaṅgāhako duggatibhayassa bhāyeyya. Imehi kho, bhikkhave, catūhi balehi samannāgato ariyasāvako imāni pañca bhayāni samatikkanto hotī’’ti. Pañcamaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༥. བལསུཏྟཝཎྞནཱ • 5. Balasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༤-༥. ནནྡཀསུཏྟཱདིཝཎྞནཱ • 4-5. Nandakasuttādivaṇṇanā
