| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
3. பா³லவக்³க³வண்ணனா
3. Bālavaggavaṇṇanā
22. ததியஸ்ஸ பட²மே அச்சயங் அச்சயதோ ந பஸ்ஸதீதி ‘‘அபரஜ்ஜி²த்வா அபரத்³த⁴ங் மயா’’தி அத்தனோ அபராத⁴ங் ந பஸ்ஸதி, அபரத்³த⁴ங் மயாதி வத்வா த³ண்ட³கம்மங் ஆஹரித்வா ந க²மாபேதீதி அத்தோ². அச்சயங் தே³ஸெந்தஸ்ஸாதி ஏவங் வத்வா த³ண்ட³கம்மங் ஆஹரித்வா க²மாபெந்தஸ்ஸ. யதா²த⁴ம்மங் நப்படிக்³க³ண்ஹாதீதி ‘‘புன ஏவங் ந கரிஸ்ஸாமி, க²மத² மே’’தி வுச்சமானோ அச்சயங் இமங் யதா²த⁴ம்மங் யதா²ஸபா⁴வங் ந படிக்³க³ண்ஹாதி. ‘‘இதோ பட்டா²ய புன ஏவரூபங் மா அகாஸி, க²மாமி துய்ஹ’’ந்தி ந வத³தி. ஸுக்கபக்கோ² வுத்தபடிபக்க²னயேனேவ வேதி³தப்³போ³.
22. Tatiyassa paṭhame accayaṃ accayato na passatīti ‘‘aparajjhitvā aparaddhaṃ mayā’’ti attano aparādhaṃ na passati, aparaddhaṃ mayāti vatvā daṇḍakammaṃ āharitvā na khamāpetīti attho. Accayaṃ desentassāti evaṃ vatvā daṇḍakammaṃ āharitvā khamāpentassa. Yathādhammaṃ nappaṭiggaṇhātīti ‘‘puna evaṃ na karissāmi, khamatha me’’ti vuccamāno accayaṃ imaṃ yathādhammaṃ yathāsabhāvaṃ na paṭiggaṇhāti. ‘‘Ito paṭṭhāya puna evarūpaṃ mā akāsi, khamāmi tuyha’’nti na vadati. Sukkapakkho vuttapaṭipakkhanayeneva veditabbo.
23. து³தியே அப்³பா⁴சிக்க²ந்தீதி அபி⁴ப⁴வித்வா ஆசிக்க²ந்தி, அபூ⁴தேன வத³ந்தி. தோ³ஸந்தரோதி அந்தரே பதிததோ³ஸோ. ஏவரூபோ ஹி ‘‘நத்தி² ஸமணஸ்ஸ கோ³தமஸ்ஸ உத்தரிமனுஸ்ஸத⁴ம்மோ’’திஆதீ³னி வத³ந்தோ ஸுனக்க²த்தோ விய ததா²க³தங் அப்³பா⁴சிக்க²தி. ஸத்³தோ⁴ வா து³க்³க³ஹிதேனாதி யோ ஹி ஞாணவிரஹிதாய ஸத்³தா⁴ய அதிஸத்³தோ⁴ ஹோதி முத்³த⁴ப்பஸன்னோ, ஸோபி ‘‘பு³த்³தோ⁴ நாம ஸப்³ப³லோகுத்தரோ, ஸப்³பே³ தஸ்ஸ கேஸாத³யோ பா³த்திங்ஸ கொட்டா²ஸா லோகுத்தராயேவா’’திஆதி³னா நயேன து³க்³க³ஹிதங் க³ண்ஹித்வா ததா²க³தங் அப்³பா⁴சிக்க²தி. ததியங் உத்தானத்த²மேவாதி.
23. Dutiye abbhācikkhantīti abhibhavitvā ācikkhanti, abhūtena vadanti. Dosantaroti antare patitadoso. Evarūpo hi ‘‘natthi samaṇassa gotamassa uttarimanussadhammo’’tiādīni vadanto sunakkhatto viya tathāgataṃ abbhācikkhati. Saddhovā duggahitenāti yo hi ñāṇavirahitāya saddhāya atisaddho hoti muddhappasanno, sopi ‘‘buddho nāma sabbalokuttaro, sabbe tassa kesādayo bāttiṃsa koṭṭhāsā lokuttarāyevā’’tiādinā nayena duggahitaṃ gaṇhitvā tathāgataṃ abbhācikkhati. Tatiyaṃ uttānatthamevāti.
25. சதுத்தே² நெய்யத்த²ங் ஸுத்தந்தந்தி யஸ்ஸ அத்தோ² நேதப்³போ³, தங் நேதப்³ப³த்த²ங் ஸுத்தந்தங். நீதத்தோ² ஸுத்தந்தோதி தீ³பேதீதி கதி²தத்தோ² அயங் ஸுத்தந்தோதி வத³தி. தத்த² ‘‘ஏகபுக்³க³லோ, பி⁴க்க²வே, த்³வேமே, பி⁴க்க²வே, புக்³க³லா, தயோமே, பி⁴க்க²வே, புக்³க³லா, சத்தாரோமே, பி⁴க்க²வே, புக்³க³லா’’தி ஏவரூபோ ஸுத்தந்தோ நெய்யத்தோ² நாம. எத்த² ஹி கிஞ்சாபி ஸம்மாஸம்பு³த்³தே⁴ன ‘‘ஏகபுக்³க³லோ, பி⁴க்க²வே’’திஆதி³ வுத்தங், பரமத்த²தோ பன புக்³க³லோ நாம நத்தீ²தி ஏவமஸ்ஸ அத்தோ² நேதப்³போ³வ ஹோதி. அயங் பன அத்தனோ பா³லதாய நீதத்தோ² அயங் ஸுத்தந்தோதி தீ³பேதி. பரமத்த²தோ ஹி புக்³க³லே அஸதி ந ததா²க³தோ ‘‘ஏகபுக்³க³லோ, பி⁴க்க²வே’’திஆதீ³னி வதெ³ய்ய. யஸ்மா பன தேன வுத்தங், தஸ்மா பரமத்த²தோ அத்தி² புக்³க³லோதி க³ண்ஹந்தோ தங் நெய்யத்த²ங் ஸுத்தந்தங் நீதத்தோ² ஸுத்தந்தோதி தீ³பேதி. நீதத்த²ந்தி அனிச்சங் து³க்க²ங் அனத்தாதி ஏவங் கதி²தத்த²ங். எத்த² ஹி அனிச்சமேவ து³க்க²மேவ அனத்தாயேவாதி அத்தோ². அயங் பன அத்தனோ பா³லதாய ‘‘நெய்யத்தோ² அயங் ஸுத்தந்தோ, அத்த²மஸ்ஸ ஆஹரிஸ்ஸாமீ’’தி ‘‘நிச்சங் நாம அத்தி², ஸுக²ங் நாம அத்தி², அத்தா நாம அத்தீ²’’தி க³ண்ஹந்தோ நீதத்த²ங் ஸுத்தந்தங் நெய்யத்தோ² ஸுத்தந்தோதி தீ³பேதி நாம. பஞ்சமங் உத்தானத்த²மேவாதி.
25. Catutthe neyyatthaṃ suttantanti yassa attho netabbo, taṃ netabbatthaṃ suttantaṃ. Nītattho suttantoti dīpetīti kathitattho ayaṃ suttantoti vadati. Tattha ‘‘ekapuggalo, bhikkhave, dveme, bhikkhave, puggalā, tayome, bhikkhave, puggalā, cattārome, bhikkhave, puggalā’’ti evarūpo suttanto neyyattho nāma. Ettha hi kiñcāpi sammāsambuddhena ‘‘ekapuggalo, bhikkhave’’tiādi vuttaṃ, paramatthato pana puggalo nāma natthīti evamassa attho netabbova hoti. Ayaṃ pana attano bālatāya nītattho ayaṃ suttantoti dīpeti. Paramatthato hi puggale asati na tathāgato ‘‘ekapuggalo, bhikkhave’’tiādīni vadeyya. Yasmā pana tena vuttaṃ, tasmā paramatthato atthi puggaloti gaṇhanto taṃ neyyatthaṃ suttantaṃ nītattho suttantoti dīpeti. Nītatthanti aniccaṃ dukkhaṃ anattāti evaṃ kathitatthaṃ. Ettha hi aniccameva dukkhameva anattāyevāti attho. Ayaṃ pana attano bālatāya ‘‘neyyattho ayaṃ suttanto, atthamassa āharissāmī’’ti ‘‘niccaṃ nāma atthi, sukhaṃ nāma atthi, attā nāma atthī’’ti gaṇhanto nītatthaṃ suttantaṃ neyyattho suttantoti dīpeti nāma. Pañcamaṃ uttānatthamevāti.
27. ச²ட்டே² படிச்ச²ன்னகம்மந்தஸ்ஸாதி பாபகம்மஸ்ஸ. பாபங் ஹி படிச்சா²தெ³த்வா கரொந்தி. நோ சேபி படிச்சா²தெ³த்வா கரொந்தி, பாபகம்மங் படிச்ச²ன்னமேவாதி வுச்சதி. நிரயோதி ஸஹோகாஸகா க²ந்தா⁴. திரச்சா²னயோனியங் க²ந்தா⁴வ லப்³ப⁴ந்தி. ஸத்தமட்ட²மானி உத்தானத்தா²னேவ.
27. Chaṭṭhe paṭicchannakammantassāti pāpakammassa. Pāpaṃ hi paṭicchādetvā karonti. No cepi paṭicchādetvā karonti, pāpakammaṃ paṭicchannamevāti vuccati. Nirayoti sahokāsakā khandhā. Tiracchānayoniyaṃ khandhāva labbhanti. Sattamaṭṭhamāni uttānatthāneva.
30. நவமே படிக்³கா³ஹாதி படிக்³கா³ஹகா, து³ஸ்ஸீலங் புக்³க³லங் த்³வே டா²னானி படிக்³க³ண்ஹந்தீதி அத்தோ².
30. Navame paṭiggāhāti paṭiggāhakā, dussīlaṃ puggalaṃ dve ṭhānāni paṭiggaṇhantīti attho.
31. த³ஸமே அத்த²வஸேதி காரணானி. அரஞ்ஞவனபத்தா²னீதி அரஞ்ஞானி ச வனபத்தா²னி ச. தத்த² கிஞ்சாபி அபி⁴த⁴ம்மே நிப்பரியாயேன ‘‘நிக்க²மித்வா ப³ஹி இந்த³கீ²லா, ஸப்³ப³மேதங் அரஞ்ஞ’’ந்தி (விப⁴॰ 529) வுத்தங், ததா²பி யங் தங் ‘‘பஞ்சத⁴னுஸதிகங் பச்சி²ம’’ந்தி (பாரா॰ 654) ஆரஞ்ஞகங்க³னிப்பா²த³கங் ஸேனாஸனங் வுத்தங், ததே³வ அதி⁴ப்பேதந்தி வேதி³தப்³ப³ங். வனபத்த²ந்தி கா³மந்தங் அதிக்கமித்வா மனுஸ்ஸானங் அனுபசாரட்டா²னங், யத்த² ந கஸீயதி ந வபீயதி. பந்தானீதி பரியந்தானி அதிதூ³ரானி, தி³ட்ட²த⁴ம்மஸுக²விஹாரந்தி லோகியலோகுத்தரங் பா²ஸுவிஹாரங். பச்சி²மஞ்ச ஜனதங் அனுகம்பமானோதி பச்சி²மே மம ஸாவகே அனுகம்பந்தோ.
31. Dasame atthavaseti kāraṇāni. Araññavanapatthānīti araññāni ca vanapatthāni ca. Tattha kiñcāpi abhidhamme nippariyāyena ‘‘nikkhamitvā bahi indakhīlā, sabbametaṃ arañña’’nti (vibha. 529) vuttaṃ, tathāpi yaṃ taṃ ‘‘pañcadhanusatikaṃ pacchima’’nti (pārā. 654) āraññakaṅganipphādakaṃ senāsanaṃ vuttaṃ, tadeva adhippetanti veditabbaṃ. Vanapatthanti gāmantaṃ atikkamitvā manussānaṃ anupacāraṭṭhānaṃ, yattha na kasīyati na vapīyati. Pantānīti pariyantāni atidūrāni, diṭṭhadhammasukhavihāranti lokiyalokuttaraṃ phāsuvihāraṃ. Pacchimañca janataṃ anukampamānoti pacchime mama sāvake anukampanto.
32. ஏகாத³ஸமே விஜ்ஜாபா⁴கி³யாதி விஜ்ஜாகொட்டா²ஸிகா. ஸமதோ²தி சித்தேகக்³க³தா. விபஸ்ஸனாதி ஸங்கா²ரபரிக்³கா³ஹகஞாணங். கமத்த²மனுபோ⁴தீதி கதமங் அத்த²ங் ஆராதே⁴தி ஸம்பாதே³தி பரிபூரேதி. சித்தங் பா⁴வீயதீதி மக்³க³சித்தங் பா⁴வீயதி ப்³ரூஹீயதி வட்³டீ⁴யதி. யோ ராகோ³, ஸோ பஹீயதீதி யோ ரஜ்ஜனகவஸேன ராகோ³, ஸோ பஹீயதி. ராகோ³ ஹி மக்³க³சித்தஸ்ஸ பச்சனீகோ, மக்³க³சித்தங் ராக³ஸ்ஸ ச. ராக³க்க²ணே மக்³க³சித்தங் நத்தி², மக்³க³சித்தக்க²ணே ராகோ³ நத்தி². யதா³ பன ராகோ³ உப்பஜ்ஜதி, ததா³ மக்³க³சித்தஸ்ஸ உப்பத்திங் நிவாரேதி, பத³ங் பச்சி²ந்த³தி. யதா³ பன மக்³க³சித்தங் உப்பஜ்ஜதி, ததா³ ராக³ங் ஸமூலகங் உப்³ப³ட்டெத்வா ஸமுக்³கா⁴தெந்தமேவ உப்பஜ்ஜதி. தேன வுத்தங் – ‘‘ராகோ³ பஹீயதீ’’தி.
32. Ekādasame vijjābhāgiyāti vijjākoṭṭhāsikā. Samathoti cittekaggatā. Vipassanāti saṅkhārapariggāhakañāṇaṃ. Kamatthamanubhotīti katamaṃ atthaṃ ārādheti sampādeti paripūreti. Cittaṃ bhāvīyatīti maggacittaṃ bhāvīyati brūhīyati vaḍḍhīyati. Yo rāgo, so pahīyatīti yo rajjanakavasena rāgo, so pahīyati. Rāgo hi maggacittassa paccanīko, maggacittaṃ rāgassa ca. Rāgakkhaṇe maggacittaṃ natthi, maggacittakkhaṇe rāgo natthi. Yadā pana rāgo uppajjati, tadā maggacittassa uppattiṃ nivāreti, padaṃ pacchindati. Yadā pana maggacittaṃ uppajjati, tadā rāgaṃ samūlakaṃ ubbaṭṭetvā samugghātentameva uppajjati. Tena vuttaṃ – ‘‘rāgo pahīyatī’’ti.
விபஸ்ஸனா, பி⁴க்க²வே, பா⁴விதாதி விபஸ்ஸனாஞாணங் ப்³ரூஹிதங் வட்³டி⁴தங். பஞ்ஞா பா⁴வீயதீதி மக்³க³பஞ்ஞா பா⁴வீயதி ப்³ரூஹீயதி வட்³டீ⁴யதி. யா அவிஜ்ஜா, ஸா பஹீயதீதி அட்ட²ஸு டா²னேஸு வட்டமூலிகா மஹாஅவிஜ்ஜா பஹீயதி. அவிஜ்ஜா ஹி மக்³க³பஞ்ஞாய பச்சனீகா, மக்³க³பஞ்ஞா அவிஜ்ஜாய. அவிஜ்ஜாக்க²ணே மக்³க³பஞ்ஞா நத்தி² , மக்³க³பஞ்ஞாக்க²ணே அவிஜ்ஜா நத்தி². யதா³ பன அவிஜ்ஜா உப்பஜ்ஜதி, ததா³ மக்³க³பஞ்ஞாய உப்பத்திங் நிவாரேதி, பத³ங் பச்சி²ந்த³தி. யதா³ மக்³க³பஞ்ஞா உப்பஜ்ஜதி, ததா³ அவிஜ்ஜங் ஸமூலிகங் உப்³ப³ட்டெத்வா ஸமுக்³கா⁴தயமானாவ உப்பஜ்ஜதி. தேன வுத்தங் – ‘‘அவிஜ்ஜா பஹீயதீ’’தி. இதி மக்³க³சித்தங் மக்³க³பஞ்ஞாதி த்³வேபி ஸஹஜாதத⁴ம்மாவ கதி²தா.
Vipassanā, bhikkhave, bhāvitāti vipassanāñāṇaṃ brūhitaṃ vaḍḍhitaṃ. Paññā bhāvīyatīti maggapaññā bhāvīyati brūhīyati vaḍḍhīyati. Yā avijjā, sā pahīyatīti aṭṭhasu ṭhānesu vaṭṭamūlikā mahāavijjā pahīyati. Avijjā hi maggapaññāya paccanīkā, maggapaññā avijjāya. Avijjākkhaṇe maggapaññā natthi , maggapaññākkhaṇe avijjā natthi. Yadā pana avijjā uppajjati, tadā maggapaññāya uppattiṃ nivāreti, padaṃ pacchindati. Yadā maggapaññā uppajjati, tadā avijjaṃ samūlikaṃ ubbaṭṭetvā samugghātayamānāva uppajjati. Tena vuttaṃ – ‘‘avijjā pahīyatī’’ti. Iti maggacittaṃ maggapaññāti dvepi sahajātadhammāva kathitā.
ராகு³பக்கிலிட்ட²ங் வா, பி⁴க்க²வே, சித்தங் ந விமுச்சதீதி ராகே³ன உபக்கிலிட்ட²த்தா மக்³க³சித்தங் ந விமுச்சதீதி த³ஸ்ஸேதி. அவிஜ்ஜுபக்கிலிட்டா² வா பஞ்ஞா ந பா⁴வீயதீதி அவிஜ்ஜாய உபக்கிலிட்ட²த்தா மக்³க³பஞ்ஞா ந பா⁴வீயதீதி த³ஸ்ஸேதி. இதி கோ², பி⁴க்க²வேதி ஏவங் கோ², பி⁴க்க²வே. ராக³விராகா³ சேதோவிமுத்தீதி ராக³ஸ்ஸ க²யவிராகே³ன சேதோவிமுத்தி நாம ஹோதி. ப²லஸமாதி⁴ஸ்ஸேதங் நாமங். அவிஜ்ஜாவிராகா³ பஞ்ஞாவிமுத்தீதி அவிஜ்ஜாய க²யவிராகே³ன பஞ்ஞாவிமுத்தி நாம ஹோதி. இமஸ்மிங் ஸுத்தே நானாக்க²ணிகா ஸமாதி⁴விபஸ்ஸனா கதி²தாதி.
Rāgupakkiliṭṭhaṃ vā, bhikkhave, cittaṃ na vimuccatīti rāgena upakkiliṭṭhattā maggacittaṃ na vimuccatīti dasseti. Avijjupakkiliṭṭhā vā paññā na bhāvīyatīti avijjāya upakkiliṭṭhattā maggapaññā na bhāvīyatīti dasseti. Iti kho, bhikkhaveti evaṃ kho, bhikkhave. Rāgavirāgā cetovimuttīti rāgassa khayavirāgena cetovimutti nāma hoti. Phalasamādhissetaṃ nāmaṃ. Avijjāvirāgā paññāvimuttīti avijjāya khayavirāgena paññāvimutti nāma hoti. Imasmiṃ sutte nānākkhaṇikā samādhivipassanā kathitāti.
பா³லவக்³கோ³ ததியோ.
Bālavaggo tatiyo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. பா³லவக்³கோ³ • 3. Bālavaggo
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3. பா³லவக்³க³வண்ணனா • 3. Bālavaggavaṇṇanā
