| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
3. பா³லவக்³க³வண்ணனா
3. Bālavaggavaṇṇanā
22-24. ததியஸ்ஸ பட²மது³தியததியானி உத்தானத்தா²னேவ.
22-24. Tatiyassa paṭhamadutiyatatiyāni uttānatthāneva.
25. சதுத்தே² நேதப்³போ³தி அஞ்ஞதோ ஆஹரித்வா போ³தே⁴தப்³போ³, ஞாபேதப்³போ³தி அத்தோ².
25. Catutthe netabboti aññato āharitvā bodhetabbo, ñāpetabboti attho.
27. ச²ட்டே² நோ சேபி படிச்சா²தெ³த்வா கரொந்தீதி பாணாதிபாதாதீ³னி கரொந்தோ ஸசேபி அப்படிச்சா²தெ³த்வா கரொந்தி. படிச்ச²ன்னமேவாதி விஞ்ஞூஹி க³ரஹிதப்³ப³பா⁴வதோ படிச்சா²த³னாரஹத்தா படிச்ச²ன்னமேவாதி வுச்சதி. அவீசிஆத³யோ பதே³ஸவிஸேஸா தத்தூ²பபன்னா ஸத்தா ச நிரயக்³க³ஹணேன க³ஹிதாதி ஆஹ ‘‘நிரயோதி ஸஹோகாஸகா க²ந்தா⁴’’தி. திரச்சா²னயோனி நாம விஸுங் பதே³ஸவிஸேஸோ நத்தீ²தி ஆஹ ‘‘திரச்சா²னயோனியங் க²ந்தா⁴வ லப்³ப⁴ந்தீ’’தி.
27. Chaṭṭhe no cepi paṭicchādetvā karontīti pāṇātipātādīni karonto sacepi appaṭicchādetvā karonti. Paṭicchannamevāti viññūhi garahitabbabhāvato paṭicchādanārahattā paṭicchannamevāti vuccati. Avīciādayo padesavisesā tatthūpapannā sattā ca nirayaggahaṇena gahitāti āha ‘‘nirayoti sahokāsakā khandhā’’ti. Tiracchānayoni nāma visuṃ padesaviseso natthīti āha ‘‘tiracchānayoniyaṃ khandhāva labbhantī’’ti.
31. த³ஸமே அத்தோ² ப²லங் தத³தீ⁴னவுத்திதாய வஸோ ஏதஸ்ஸாதி அத்த²வஸோ, ஹேதூதி ஆஹ ‘‘அத்த²வஸேதி காரணானீ’’தி. அரஞ்ஞவனபத்தா²னீதி அரஞ்ஞலக்க²ணப்பத்தானி வனபத்தா²னி. வனபத்த²-ஸத்³தோ³ ஹி ஸண்ட³பூ⁴தே ருக்க²ஸமூஹேபி வத்ததீதி அரஞ்ஞக்³க³ஹணங். வனீயதி விவேககாமேஹி ப⁴ஜீயதி, வனுதே வா தே அத்தஸம்பத்தியா வஸனத்தா²ய யாசந்தோ விய ஹோதீதி வனங், பதிட்ட²ஹந்தி எத்த² விவேககாமா யதா²தி⁴ப்பேதவிஸேஸாதி⁴க³மேனாதி பத்த²ங், வனேஸு பத்த²ங் க³ஹனட்டா²னே ஸேனாஸனங் வனபத்த²ங். கிஞ்சாபீதி அனுஜானநஸம்பா⁴வனத்தே² நிபாதோ. கிங் அனுஜானாதி? நிப்பரியாயதோ அரஞ்ஞபா⁴வங் கா³மதோ ப³ஹி அரஞ்ஞந்தி. தேனாஹ ‘‘நிப்பரியாயேனா’’திஆதி³. கிங் ஸம்பா⁴வேதி? ஆரஞ்ஞகங்க³னிப்பா²த³கத்தங். யஞ்ஹி ஆரஞ்ஞகங்க³னிப்பா²த³கங், தங் விஸேஸதோ அரஞ்ஞந்தி வத்தப்³ப³ந்தி. தேனாஹ ‘‘யங் தங் பஞ்சத⁴னுஸதிக’’ந்திஆதி³. நிக்க²மித்வா ப³ஹி இந்த³கீ²லாதி இந்த³கீ²லதோ ப³ஹி நிக்க²மித்வா, ததோ ப³ஹி பட்டா²யாதி அத்தோ². ப³ஹி இந்த³கீ²லாதி வா யத்த² த்³வே தீணி இந்த³கீ²லானி, தத்த² ப³ஹித்³தா⁴ இந்த³கீ²லதோ பட்டா²ய. யத்த² தங் நத்தி², தத³ரஹட்டா²னதோ பட்டா²யாதி வத³ந்தி. கா³மந்தந்தி கா³மஸமீபங். அனுபசாரட்டா²னந்தி நிச்சகிச்சவஸேன ந உபசரிதப்³ப³ட்டா²னங். தேனாஹ ‘‘யத்த² ந கஸீயதி ந வபீயதீ’’தி.
31. Dasame attho phalaṃ tadadhīnavuttitāya vaso etassāti atthavaso, hetūti āha ‘‘atthavaseti kāraṇānī’’ti. Araññavanapatthānīti araññalakkhaṇappattāni vanapatthāni. Vanapattha-saddo hi saṇḍabhūte rukkhasamūhepi vattatīti araññaggahaṇaṃ. Vanīyati vivekakāmehi bhajīyati, vanute vā te attasampattiyā vasanatthāya yācanto viya hotīti vanaṃ, patiṭṭhahanti ettha vivekakāmā yathādhippetavisesādhigamenāti patthaṃ, vanesu patthaṃ gahanaṭṭhāne senāsanaṃ vanapatthaṃ. Kiñcāpīti anujānanasambhāvanatthe nipāto. Kiṃ anujānāti? Nippariyāyato araññabhāvaṃ gāmato bahi araññanti. Tenāha ‘‘nippariyāyenā’’tiādi. Kiṃ sambhāveti? Āraññakaṅganipphādakattaṃ. Yañhi āraññakaṅganipphādakaṃ, taṃ visesato araññanti vattabbanti. Tenāha ‘‘yaṃ taṃ pañcadhanusatika’’ntiādi. Nikkhamitvā bahi indakhīlāti indakhīlato bahi nikkhamitvā, tato bahi paṭṭhāyāti attho. Bahi indakhīlāti vā yattha dve tīṇi indakhīlāni, tattha bahiddhā indakhīlato paṭṭhāya. Yattha taṃ natthi, tadarahaṭṭhānato paṭṭhāyāti vadanti. Gāmantanti gāmasamīpaṃ. Anupacāraṭṭhānanti niccakiccavasena na upacaritabbaṭṭhānaṃ. Tenāha ‘‘yattha na kasīyati na vapīyatī’’ti.
அத்தனோ ச தி³ட்ட²த⁴ம்மஸுக²விஹாரந்தி ஏதேன ஸத்தா² அத்தனோ விவேகாபி⁴ரதிங் பகாஸேதி. தத்த² தி³ட்ட²த⁴ம்மோ நாம அயங் பச்சக்கோ² அத்தபா⁴வோ, ஸுக²விஹாரோ நாம சதுன்னங் இரியாபத²விஹாரானங் பா²ஸுதா. ஏககஸ்ஸ ஹி அரஞ்ஞே அந்தமஸோ உச்சாரவஸ்ஸாவகிச்சங் உபாதா³ய ஸப்³பே³ இரியாபதா² பா²ஸுகா ஹொந்தி, தஸ்மா தி³ட்ட²த⁴ம்மே ஸுக²விஹாரங் தி³ட்ட²த⁴ம்மஸுக²விஹாரந்தி ஏவங் வா எத்த² அத்தோ² த³ட்ட²ப்³போ³.
Attano ca diṭṭhadhammasukhavihāranti etena satthā attano vivekābhiratiṃ pakāseti. Tattha diṭṭhadhammo nāma ayaṃ paccakkho attabhāvo, sukhavihāro nāma catunnaṃ iriyāpathavihārānaṃ phāsutā. Ekakassa hi araññe antamaso uccāravassāvakiccaṃ upādāya sabbe iriyāpathā phāsukā honti, tasmā diṭṭhadhamme sukhavihāraṃ diṭṭhadhammasukhavihāranti evaṃ vā ettha attho daṭṭhabbo.
பச்சி²மஞ்ச ஜனதங் அனுகம்பமானோதி கத²ங் அரஞ்ஞவாஸேன பச்சி²மா ஜனதா அனுகம்பிதா ஹோதி? ஸத்³தா⁴பப்³ப³ஜிதா ஹி குலபுத்தா ப⁴க³வதோ அரஞ்ஞவாஸங் தி³ஸ்வா ‘‘ப⁴க³வாபி நாம அரஞ்ஞஸேனாஸனானி ந முஞ்சதி, யஸ்ஸ நேவத்தி² பரிஞ்ஞாதப்³ப³ங் ந பஹாதப்³ப³ங் ந பா⁴வேதப்³ப³ங் ந ஸச்சி²காதப்³ப³ங், கிமங்க³ங் பன மய’’ந்தி சிந்தெத்வா தத்த² வஸிதப்³ப³மேவ மஞ்ஞிஸ்ஸந்தி, ஏவங் கி²ப்பமேவ து³க்க²ஸ்ஸந்தகரா ப⁴விஸ்ஸந்தி. ஏவங் பச்சி²மா ஜனதா அனுகம்பிதா ஹோதி. ஏதமத்த²ங் த³ஸ்ஸெந்தோ ஆஹ ‘‘பச்சி²மே மம ஸாவகே அனுகம்பந்தோ’’தி.
Pacchimañca janataṃ anukampamānoti kathaṃ araññavāsena pacchimā janatā anukampitā hoti? Saddhāpabbajitā hi kulaputtā bhagavato araññavāsaṃ disvā ‘‘bhagavāpi nāma araññasenāsanāni na muñcati, yassa nevatthi pariññātabbaṃ na pahātabbaṃ na bhāvetabbaṃ na sacchikātabbaṃ, kimaṅgaṃ pana maya’’nti cintetvā tattha vasitabbameva maññissanti, evaṃ khippameva dukkhassantakarā bhavissanti. Evaṃ pacchimā janatā anukampitā hoti. Etamatthaṃ dassento āha ‘‘pacchime mama sāvake anukampanto’’ti.
32. ஏகாத³ஸமே விஜ்ஜங் ப⁴ஜந்தீதி விஜ்ஜாபா⁴கி³யா, விஜ்ஜாபா⁴கே³ விஜ்ஜாகொட்டா²ஸே வத்தந்தீதிபி விஜ்ஜாபா⁴கி³யா. பத³ங் பச்சி²ந்த³தீதி மக்³க³சித்தஸ்ஸ பதிட்ட²ங் உபச்சி²ந்த³தி, மக்³க³சித்தங் பதிட்டா²பேதுங் ந தே³தீதி அத்தோ². உப்³ப³ட்டெத்வாதி ஸமுச்சே²த³வஸேன ஸமூலங் உத்³த⁴ரித்வா. அட்ட²ஸு டா²னேஸூதி பு³த்³தா⁴தீ³ஸு அட்ட²ஸு டா²னேஸு. ராக³ஸ்ஸ க²யவிராகே³னாதி ராக³ஸ்ஸ க²யஸங்கா²தேன விராகே³ன, ராக³ஸ்ஸ அனுப்பத்தித⁴ம்மதாபாத³னேனாதி வுத்தங் ஹோதி.
32. Ekādasame vijjaṃ bhajantīti vijjābhāgiyā, vijjābhāge vijjākoṭṭhāse vattantītipi vijjābhāgiyā. Padaṃ pacchindatīti maggacittassa patiṭṭhaṃ upacchindati, maggacittaṃ patiṭṭhāpetuṃ na detīti attho. Ubbaṭṭetvāti samucchedavasena samūlaṃ uddharitvā. Aṭṭhasu ṭhānesūti buddhādīsu aṭṭhasu ṭhānesu. Rāgassa khayavirāgenāti rāgassa khayasaṅkhātena virāgena, rāgassa anuppattidhammatāpādanenāti vuttaṃ hoti.
பா³லவக்³க³வண்ணனா நிட்டி²தா.
Bālavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. பா³லவக்³கோ³ • 3. Bālavaggo
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 3. பா³லவக்³க³வண்ணனா • 3. Bālavaggavaṇṇanā
