| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
(10) 5. பா³லவக்³க³வண்ணனா
(10) 5. Bālavaggavaṇṇanā
99. பஞ்சமஸ்ஸ பட²மே அனாக³தங் பா⁴ரங் வஹதீதி அத்தனோ அஸம்பத்தங் பா⁴ரங் வஹதி. அதே²ரோவ ஸமானோ தே²ரேஹி வஹிதப்³ப³ங் பீ³ஜனக்³கா³ஹத⁴ம்மஜ்ஜே²ஸனாதி³பா⁴ரங் வஹதீதி ஏவமெத்த² அத்தோ² த³ட்ட²ப்³போ³. அட்ட²கதா²யங் (மஹாவ॰ அட்ட²॰ 159-160) பன யஸ்மா ஸம்மஜ்ஜனாதி³னவவித⁴ங் புப்³ப³கிச்சங் ஆணத்தேனேவ காதப்³ப³ங், பாதிமொக்க²ஞ்ச ஆணத்தேனேவ உத்³தி³ஸிதப்³ப³ங், தஸ்மா தங் ஸப்³ப³ங் வினா ஆணத்தியா கரொந்தோ அனாக³தங் பா⁴ரங் வஹதி நாமாதி த³ஸ்ஸேதுங் ‘‘ஸம்மஜ்ஜனீ பதீ³போ’’திஆதி³ வுத்தங். யஞ்ஹி ‘‘அனுஜானாமி, பி⁴க்க²வே, உபோஸதா²கா³ரங் ஸம்மஜ்ஜிது’’ந்திஆதி³னா நயேன பாளியங் ஆக³தங். அட்ட²கதா²ஸு ச –
99. Pañcamassa paṭhame anāgataṃ bhāraṃ vahatīti attano asampattaṃ bhāraṃ vahati. Atherova samāno therehi vahitabbaṃ bījanaggāhadhammajjhesanādibhāraṃ vahatīti evamettha attho daṭṭhabbo. Aṭṭhakathāyaṃ (mahāva. aṭṭha. 159-160) pana yasmā sammajjanādinavavidhaṃ pubbakiccaṃ āṇatteneva kātabbaṃ, pātimokkhañca āṇatteneva uddisitabbaṃ, tasmā taṃ sabbaṃ vinā āṇattiyā karonto anāgataṃ bhāraṃ vahati nāmāti dassetuṃ ‘‘sammajjanī padīpo’’tiādi vuttaṃ. Yañhi ‘‘anujānāmi, bhikkhave, uposathāgāraṃ sammajjitu’’ntiādinā nayena pāḷiyaṃ āgataṃ. Aṭṭhakathāsu ca –
‘‘ஸம்மஜ்ஜனீ பதீ³போ ச, உத³கங் ஆஸனேன ச;
‘‘Sammajjanī padīpo ca, udakaṃ āsanena ca;
உபோஸத²ஸ்ஸ ஏதானி, ‘புப்³ப³கரண’ந்தி வுச்சதி.
Uposathassa etāni, ‘pubbakaraṇa’nti vuccati.
‘‘ச²ந்த³பாரிஸுத்³தி⁴உதுக்கா²னங், பி⁴க்கு²க³ணனா ச ஓவாதோ³;
‘‘Chandapārisuddhiutukkhānaṃ, bhikkhugaṇanā ca ovādo;
உபோஸத²ஸ்ஸ ஏதானி, ‘புப்³ப³கிச்ச’ந்தி வுச்சதீ’’தி. (மஹாவ॰ அட்ட² 168) –
Uposathassa etāni, ‘pubbakicca’nti vuccatī’’ti. (mahāva. aṭṭha 168) –
ஏவங் த்³வீஹி நாமேஹி நவவித⁴ங் புப்³ப³கிச்சங் த³ஸ்ஸிதங், தங் அகத்வா உபோஸத²ங் காதுங் ந வட்டதி. தஸ்மா ‘‘அனுஜானாமி, பி⁴க்க²வே, தே²ரேன பி⁴க்கு²னா நவங் பி⁴க்கு²ங் ஆணாபேது’’ந்தி வசனதோ தே²ரேன ஆணத்தேன அகி³லானேன பி⁴க்கு²னா உபோஸதா²கா³ரங் ஸம்மஜ்ஜிதப்³ப³ங், பானீயங் பரிபோ⁴ஜனீயங் உபட்ட²பேதப்³ப³ங், ஆஸனங் பஞ்ஞாபேதப்³ப³ங், பதீ³போ காதப்³போ³, அகரொந்தோ து³க்கடங் ஆபஜ்ஜதி.
Evaṃ dvīhi nāmehi navavidhaṃ pubbakiccaṃ dassitaṃ, taṃ akatvā uposathaṃ kātuṃ na vaṭṭati. Tasmā ‘‘anujānāmi, bhikkhave, therena bhikkhunā navaṃ bhikkhuṃ āṇāpetu’’nti vacanato therena āṇattena agilānena bhikkhunā uposathāgāraṃ sammajjitabbaṃ, pānīyaṃ paribhojanīyaṃ upaṭṭhapetabbaṃ, āsanaṃ paññāpetabbaṃ, padīpo kātabbo, akaronto dukkaṭaṃ āpajjati.
தே²ரேனபி பதிரூபங் ஞத்வா ஆணாபேதப்³ப³ங், ஆணாபெந்தேனபி யங் கிஞ்சி கம்மங் கரொந்தோ வா ஸதா³ காலமேவ ஏகோ வா பா⁴ரனித்த²ரணகோ வா ஸரபா⁴ணகத⁴ம்மகதி²காதீ³ஸு வா அஞ்ஞதரோ ந உபோஸதா²கா³ரஸம்மஜ்ஜனத்த²ங் ஆணாபேதப்³போ³, அவஸேஸா பன வாரேன ஆணாபேதப்³பா³. ஸசே ஆணத்தோ ஸம்மஜ்ஜனிங் தாவகாலிகம்பி ந லப⁴தி, ஸாகா²ப⁴ங்க³ங் கப்பியங் காரெத்வா ஸம்மஜ்ஜிதப்³ப³ங், தம்பி அலப⁴ந்தஸ்ஸ லத்³த⁴கப்பியங் ஹோதி. பதீ³பகரணேபி வுத்தனயேனேவ ஆணாபேதப்³போ³, ஆணாபெந்தேன ச ‘‘அமுகஸ்மிங் நாம ஓகாஸே தேலங் வா கபல்லிகா வா அத்தி², தங் க³ஹெத்வா கரோஹீ’’தி வத்தப்³போ³. ஸசே தேலாதீ³னி நத்தி², பரியேஸிதப்³பா³னி. பரியேஸித்வா அலப⁴ந்தஸ்ஸ லத்³த⁴கப்பியங் ஹோதி. அபி ச கபாலே அக்³கி³ ஜாலேதப்³போ³. ஆஸனபஞ்ஞாபனாணத்தியம்பி வுத்தனயேனேவ ஆணாபேதப்³போ³, ஆணத்தேன ச ஸசே உபோஸதா²கா³ரே ஆஸனானி நத்தி², ஸங்கி⁴காவாஸதோ ஆஹரித்வா பஞ்ஞாபெத்வா புன ஆஹரிதப்³பா³னி, ஆஸனேஸு அஸதி கடஸாரகேபி தட்டிகாயோபி பஞ்ஞாபேதுங் வட்டதி, தாஸுபி அஸதி ஸாகா²ப⁴ங்கா³னி கப்பியங் காரெத்வா பஞ்ஞாபேதப்³பா³னி. கப்பியகாரகங் அலப⁴ந்தஸ்ஸ லத்³த⁴கப்பியங் ஹோதி.
Therenapi patirūpaṃ ñatvā āṇāpetabbaṃ, āṇāpentenapi yaṃ kiñci kammaṃ karonto vā sadā kālameva eko vā bhāranittharaṇako vā sarabhāṇakadhammakathikādīsu vā aññataro na uposathāgārasammajjanatthaṃ āṇāpetabbo, avasesā pana vārena āṇāpetabbā. Sace āṇatto sammajjaniṃ tāvakālikampi na labhati, sākhābhaṅgaṃ kappiyaṃ kāretvā sammajjitabbaṃ, tampi alabhantassa laddhakappiyaṃ hoti. Padīpakaraṇepi vuttanayeneva āṇāpetabbo, āṇāpentena ca ‘‘amukasmiṃ nāma okāse telaṃ vā kapallikā vā atthi, taṃ gahetvā karohī’’ti vattabbo. Sace telādīni natthi, pariyesitabbāni. Pariyesitvā alabhantassa laddhakappiyaṃ hoti. Api ca kapāle aggi jāletabbo. Āsanapaññāpanāṇattiyampi vuttanayeneva āṇāpetabbo, āṇattena ca sace uposathāgāre āsanāni natthi, saṅghikāvāsato āharitvā paññāpetvā puna āharitabbāni, āsanesu asati kaṭasārakepi taṭṭikāyopi paññāpetuṃ vaṭṭati, tāsupi asati sākhābhaṅgāni kappiyaṃ kāretvā paññāpetabbāni. Kappiyakārakaṃ alabhantassa laddhakappiyaṃ hoti.
ச²ந்த³பாரிஸுத்³தீ⁴தி எத்த² உபோஸத²கரணத்த²ங் ஸன்னிபதிதே ஸங்கே⁴ ப³ஹி உபோஸத²ங் கத்வா ஆக³தேன ஸன்னிபாதட்டா²னங் க³ந்த்வா காயஸாமக்³கி³ங் அதெ³ந்தேன ச²ந்தோ³ தா³தப்³போ³. யோபி கி³லானோ வா கிச்சப்பஸுதோ வா, தேன பாரிஸுத்³தி⁴ங் தெ³ந்தேன ச²ந்தோ³ தா³தப்³போ³. கத²ங் தா³தப்³போ³? ஏகஸ்ஸ பி⁴க்கு²னோ ஸந்திகே ‘‘ச²ந்த³ங் த³ம்மி, ச²ந்த³ங் மே ஹர, ச²ந்த³ங் மே ஆரோசேஹீ’’தி அயமத்தோ² காயேன வா வாசாய வா உப⁴யேன வா விஞ்ஞாபேதப்³போ³. ஏவங் தி³ன்னோ ஹோதி ச²ந்தோ³. அகதூபோஸதே²ன பன கி³லானேன வா கிச்சப்பஸுதேன வா பாரிஸுத்³தி⁴ தா³தப்³பா³. கத²ங் தா³தப்³பா³? ஏகஸ்ஸ பி⁴க்கு²னோ ஸந்திகே ‘‘பாரிஸுத்³தி⁴ங் த³ம்மி, பாரிஸுத்³தி⁴ங் மே ஹர, பாரிஸுத்³தி⁴ங் மே ஆரோசேஹீ’’தி அயமத்தோ² காயேன வா வாசாய வா உப⁴யேன வா விஞ்ஞாபேதப்³போ³. ஏவங் தி³ன்னா ஹோதி பாரிஸுத்³தி⁴. தங் பன தெ³ந்தேன ச²ந்தோ³பி தா³தப்³போ³. வுத்தஞ்ஹேதங் ப⁴க³வதா – ‘‘அனுஜானாமி, பி⁴க்க²வே, தத³ஹுபோஸதே² பாரிஸுத்³தி⁴ங் தெ³ந்தேன ச²ந்த³ம்பி தா³துங், ஸந்தி ஸங்க⁴ஸ்ஸ கரணீய’’ந்தி. தத்த² பாரிஸுத்³தி⁴தா³னங் ஸங்க⁴ஸ்ஸபி அத்தனோபி உபோஸத²கரணங் ஸம்பாதே³தி, ந அவஸேஸங் ஸங்க⁴கிச்சங். ச²ந்த³தா³னங் ஸங்க⁴ஸ்ஸேவ உபோஸத²கரணஞ்ச ஸேஸகிச்சஞ்ச ஸம்பாதே³தி, அத்தனோ பன உபோஸதோ² அகதோயேவ ஹோதி, தஸ்மா பாரிஸுத்³தி⁴ங் தெ³ந்தேன ச²ந்தோ³பி தா³தப்³போ³.
Chandapārisuddhīti ettha uposathakaraṇatthaṃ sannipatite saṅghe bahi uposathaṃ katvā āgatena sannipātaṭṭhānaṃ gantvā kāyasāmaggiṃ adentena chando dātabbo. Yopi gilāno vā kiccappasuto vā, tena pārisuddhiṃ dentena chando dātabbo. Kathaṃ dātabbo? Ekassa bhikkhuno santike ‘‘chandaṃ dammi, chandaṃ me hara, chandaṃ me ārocehī’’ti ayamattho kāyena vā vācāya vā ubhayena vā viññāpetabbo. Evaṃ dinno hoti chando. Akatūposathena pana gilānena vā kiccappasutena vā pārisuddhi dātabbā. Kathaṃ dātabbā? Ekassa bhikkhuno santike ‘‘pārisuddhiṃ dammi, pārisuddhiṃ me hara, pārisuddhiṃ me ārocehī’’ti ayamattho kāyena vā vācāya vā ubhayena vā viññāpetabbo. Evaṃ dinnā hoti pārisuddhi. Taṃ pana dentena chandopi dātabbo. Vuttañhetaṃ bhagavatā – ‘‘anujānāmi, bhikkhave, tadahuposathe pārisuddhiṃ dentena chandampi dātuṃ, santi saṅghassa karaṇīya’’nti. Tattha pārisuddhidānaṃ saṅghassapi attanopi uposathakaraṇaṃ sampādeti, na avasesaṃ saṅghakiccaṃ. Chandadānaṃ saṅghasseva uposathakaraṇañca sesakiccañca sampādeti, attano pana uposatho akatoyeva hoti, tasmā pārisuddhiṃ dentena chandopi dātabbo.
உதுக்கா²னந்தி ‘‘ஹேமந்தாதீ³னங் உதூனங் எத்தகங் அதிக்கந்தங், எத்தகங் அவஸிட்ட²’’ந்தி ஏவங் உதூனங் ஆசிக்க²னங். பி⁴க்கு²க³ணனாதி ‘‘எத்தகா பி⁴க்கூ² உபோஸத²க்³கே³ ஸன்னிபதிதா’’தி பி⁴க்கூ²னங் க³ணனா. இத³ம்பி உப⁴யங் கத்வாவ உபோஸதோ² காதப்³போ³. ஓவாதோ³தி பி⁴க்கு²னோவாதோ³. ந ஹி பி⁴க்கூ²னீஹி யாசிதங் ஓவாத³ங் அனாரோசெத்வா உபோஸத²ங் காதுங் வட்டதி. பி⁴க்கு²னியோ ஹி ‘‘ஸ்வே உபோஸதோ²’’தி ஆக³ந்த்வா ‘‘அயங் உபோஸதோ² சாதுத்³த³ஸோ, பன்னரஸோ’’தி புச்சி²த்வா புன உபோஸத²தி³வஸே ஆக³ந்த்வா ‘‘பி⁴க்கு²னிஸங்கோ⁴, அய்ய, பி⁴க்கு²ஸங்க⁴ஸ்ஸ பாதே³ வந்த³தி, ஓவாதூ³பஸங்கமனஞ்ச யாசதி, லப⁴து கிர, அய்ய, பி⁴க்கு²னிஸங்கோ⁴ ஓவாதூ³பஸங்கமன’’ந்தி ஏவங் ஓவாத³ங் யாசந்தி. தங் ட²பெத்வா பா³லகி³லானக³மியே அஞ்ஞோ ஸசேபி ஆரஞ்ஞகோ ஹோதி, அப்படிக்³க³ஹேதுங் ந லப⁴தி, தஸ்மா யேன ஸோ படிக்³க³ஹிதோ, தேன பி⁴க்கு²னா உபோஸத²க்³கே³ பாதிமொக்கு²த்³தே³ஸகோ பி⁴க்கு² ஏவங் வத்தப்³போ³ ‘‘பி⁴க்கு²னிஸங்கோ⁴, ப⁴ந்தே, பி⁴க்கு²ஸங்க⁴ஸ்ஸ பாதே³ வந்த³தி, ஓவாதூ³பஸங்கமனஞ்ச யாசதி, லப⁴து கிர, ப⁴ந்தே, பி⁴க்கு²னிஸங்கோ⁴ ஓவாதூ³பஸங்கமன’’ந்தி.
Utukkhānanti ‘‘hemantādīnaṃ utūnaṃ ettakaṃ atikkantaṃ, ettakaṃ avasiṭṭha’’nti evaṃ utūnaṃ ācikkhanaṃ. Bhikkhugaṇanāti ‘‘ettakā bhikkhū uposathagge sannipatitā’’ti bhikkhūnaṃ gaṇanā. Idampi ubhayaṃ katvāva uposatho kātabbo. Ovādoti bhikkhunovādo. Na hi bhikkhūnīhi yācitaṃ ovādaṃ anārocetvā uposathaṃ kātuṃ vaṭṭati. Bhikkhuniyo hi ‘‘sve uposatho’’ti āgantvā ‘‘ayaṃ uposatho cātuddaso, pannaraso’’ti pucchitvā puna uposathadivase āgantvā ‘‘bhikkhunisaṅgho, ayya, bhikkhusaṅghassa pāde vandati, ovādūpasaṅkamanañca yācati, labhatu kira, ayya, bhikkhunisaṅgho ovādūpasaṅkamana’’nti evaṃ ovādaṃ yācanti. Taṃ ṭhapetvā bālagilānagamiye añño sacepi āraññako hoti, appaṭiggahetuṃ na labhati, tasmā yena so paṭiggahito, tena bhikkhunā uposathagge pātimokkhuddesako bhikkhu evaṃ vattabbo ‘‘bhikkhunisaṅgho, bhante, bhikkhusaṅghassa pāde vandati, ovādūpasaṅkamanañca yācati, labhatu kira, bhante, bhikkhunisaṅgho ovādūpasaṅkamana’’nti.
பாதிமொக்கு²த்³தே³ஸகேன வத்தப்³ப³ங் – ‘‘அத்தி² கோசி பி⁴க்கு² பி⁴க்கு²னோவாத³கோ ஸம்மதோ’’தி. ஸசே ஹோதி கோசி பி⁴க்கு² பி⁴க்கு²னோவாத³கோ ஸம்மதோ, ததோ தேன ஸோ வத்தப்³போ³ – ‘‘இத்த²ன்னாமகோ பி⁴க்கு² பி⁴க்கு²னோவாத³கோ ஸம்மதோ, தங் பி⁴க்கு²னிஸங்கோ⁴ உபஸங்கமதூ’’தி. ஸசே நத்தி², ததோ தேன புச்சி²தப்³ப³ங் – ‘‘கோ ஆயஸ்மா உஸ்ஸஹதி பி⁴க்கு²னியோ ஓவதி³து’’ந்தி. ஸசே கோசி உஸ்ஸஹதி, ஸோபி ச அட்ட²ஹி அங்கே³ஹி ஸமன்னாக³தோ, தங் தத்தே²வ ஸம்மன்னித்வா ஓவாத³ப்படிக்³கா³ஹகோ வத்தப்³போ³ – ‘‘இத்த²ன்னாமோ பி⁴க்கு² பி⁴க்கு²னோவாத³கோ ஸம்மதோ, தங் பி⁴க்கு²னிஸங்கோ⁴ உபஸங்கமதூ’’தி. ஸசே பன ந கோசி உஸ்ஸஹதி, பாதிமொக்கு²த்³தே³ஸகேன வத்தப்³ப³ங் – ‘‘நத்தி² கோசி பி⁴க்கு² பி⁴க்கு²னோவாத³கோ ஸம்மதோ, பாஸாதி³கேன பி⁴க்கு²னிஸங்கோ⁴ ஸம்பாதே³தூ’’தி. எத்தாவதா ஹி ஸிக்க²த்தயஸங்க³ஹிதங் ஸகலங் ஸாஸனங் ஆரோசிதங் ஹோதி. தேன பி⁴க்கு²னா ‘‘ஸாதூ⁴’’தி ஸம்படிச்சி²த்வா பாடிபதே³ பி⁴க்கு²னீனங் ஆரோசேதப்³ப³ங். பாதிமொக்க²ம்பி ‘‘ந, பி⁴க்க²வே, அனஜ்ஜி²ட்டே²ன பாதிமொக்க²ங் உத்³தி³ஸிதப்³ப³ங், யோ உத்³தி³ஸெய்ய, ஆபத்தி து³க்கடஸ்ஸா’’தி வசனதோ அனாணத்தேன ந உத்³தி³ஸிதப்³ப³ங். ‘‘தே²ராதெ⁴ய்யங் பாதிமொக்க²’’ந்தி ஹி வசனதோ ஸங்க⁴த்தே²ரோ வா பாதிமொக்க²ங் உத்³தி³ஸெய்ய , ‘‘அனுஜானாமி, பி⁴க்க²வே, யோ தத்த² பி⁴க்கு² ப்³யத்தோ படிப³லோ, தஸ்ஸாதெ⁴ய்யங் பாதிமொக்க²’’ந்தி வசனதோ நவகதரோ வா தே²ரேன ஆணத்தோ. து³தியாதீ³னி உத்தானத்தா²னேவ.
Pātimokkhuddesakena vattabbaṃ – ‘‘atthi koci bhikkhu bhikkhunovādako sammato’’ti. Sace hoti koci bhikkhu bhikkhunovādako sammato, tato tena so vattabbo – ‘‘itthannāmako bhikkhu bhikkhunovādako sammato, taṃ bhikkhunisaṅgho upasaṅkamatū’’ti. Sace natthi, tato tena pucchitabbaṃ – ‘‘ko āyasmā ussahati bhikkhuniyo ovaditu’’nti. Sace koci ussahati, sopi ca aṭṭhahi aṅgehi samannāgato, taṃ tattheva sammannitvā ovādappaṭiggāhako vattabbo – ‘‘itthannāmo bhikkhu bhikkhunovādako sammato, taṃ bhikkhunisaṅgho upasaṅkamatū’’ti. Sace pana na koci ussahati, pātimokkhuddesakena vattabbaṃ – ‘‘natthi koci bhikkhu bhikkhunovādako sammato, pāsādikena bhikkhunisaṅgho sampādetū’’ti. Ettāvatā hi sikkhattayasaṅgahitaṃ sakalaṃ sāsanaṃ ārocitaṃ hoti. Tena bhikkhunā ‘‘sādhū’’ti sampaṭicchitvā pāṭipade bhikkhunīnaṃ ārocetabbaṃ. Pātimokkhampi ‘‘na, bhikkhave, anajjhiṭṭhena pātimokkhaṃ uddisitabbaṃ, yo uddiseyya, āpatti dukkaṭassā’’ti vacanato anāṇattena na uddisitabbaṃ. ‘‘Therādheyyaṃ pātimokkha’’nti hi vacanato saṅghatthero vā pātimokkhaṃ uddiseyya , ‘‘anujānāmi, bhikkhave, yo tattha bhikkhu byatto paṭibalo, tassādheyyaṃ pātimokkha’’nti vacanato navakataro vā therena āṇatto. Dutiyādīni uttānatthāneva.
109. ஏகாத³ஸமே ந குக்குச்சாயிதப்³ப³ங் குக்குச்சாயதீதி ந குக்குச்சாயிதுங் யுத்தகங் குக்குச்சாயதி. ஸூகரமங்ஸங் லபி⁴த்வா ‘‘அச்ச²மங்ஸ’’ந்தி குக்குச்சாயதி, ‘‘ஸூகரமங்ஸ’’ந்தி ஜானந்தோபி ‘‘அச்ச²மங்ஸ’’ந்தி குக்குச்சாயதி, ந பரிபு⁴ஞ்ஜதீதி வுத்தங் ஹோதி. ஏவங் மிக³மங்ஸங் ‘‘தீ³பிமங்ஸ’’ந்தி, காலே ஸந்தேயேவ ‘‘காலோ நத்தீ²’’தி, அப்பவாரெத்வா ‘‘பவாரிதொம்ஹீ’’தி, பத்தே ரஜஸ்மிங் அபதிதேயேவ ‘‘பதித’’ந்தி, அத்தானங் உத்³தி³ஸ்ஸ மச்ச²மங்ஸே அகதேயேவ ‘‘மங் உத்³தி³ஸ்ஸ கத’’ந்தி குக்குச்சாயதி. குக்குச்சாயிதப்³ப³ங் ந குக்குச்சாயதீதி குக்குச்சாயிதுங் யுத்தங் ந குக்குச்சாயதி. அச்ச²மங்ஸங் லபி⁴த்வா ‘‘ஸூகரமங்ஸ’’ந்தி ந குக்குச்சாயதி, ‘‘அச்ச²மங்ஸ’’ந்தி ஜானந்தோபி ‘‘ஸூகரமங்ஸ’’ந்தி ந குக்குச்சாயதி, மத்³தி³த்வா வீதிக்கமதீதி வுத்தங் ஹோதி. ஏவங் தீ³பிமங்ஸங் மிக³மங்ஸந்தி…பே॰… அத்தானங் உத்³தி³ஸ்ஸ மச்ச²மங்ஸே கதே ‘‘மங் உத்³தி³ஸ்ஸ கத’’ந்தி ந குக்குச்சாயதீதி ஏவமெத்த² அத்தோ² த³ட்ட²ப்³போ³. அட்ட²கதா²யங் பன ‘‘ந குக்குச்சாயிதப்³ப³ந்தி ஸங்க⁴போ⁴க³ஸ்ஸ அபட்ட²பனங் அவிசாரணங் ந குக்குச்சாயிதப்³ப³ங் நாம, தங் குக்குச்சாயதி. குக்குச்சாயிதப்³ப³ந்தி தஸ்ஸேவ பட்ட²பனங் விசாரணங், தங் ந குக்குச்சாயதீ’’தி எத்தகமேவ வுத்தங். தத்த² ஸங்க⁴போ⁴க³ஸ்ஸாதி ஸங்க⁴ஸ்ஸ சதுபச்சயபரிபோ⁴க³த்தா²ய தி³ன்னகெ²த்தவத்து²தளாகாதி³கஸ்ஸ, ததோ உப்பன்னத⁴ஞ்ஞஹிரஞ்ஞாதி³கஸ்ஸ ச ஸங்க⁴ஸ்ஸ போ⁴க³ஸ்ஸ. அபட்ட²பனந்தி அஸங்வித³ஹனங். தேனாஹ ‘‘அவிசாரண’’ந்தி. தஸ்ஸேவாதி யதா²வுத்தஸ்ஸேவ ஸங்க⁴போ⁴க³ஸ்ஸ.
109. Ekādasame na kukkuccāyitabbaṃ kukkuccāyatīti na kukkuccāyituṃ yuttakaṃ kukkuccāyati. Sūkaramaṃsaṃ labhitvā ‘‘acchamaṃsa’’nti kukkuccāyati, ‘‘sūkaramaṃsa’’nti jānantopi ‘‘acchamaṃsa’’nti kukkuccāyati, na paribhuñjatīti vuttaṃ hoti. Evaṃ migamaṃsaṃ ‘‘dīpimaṃsa’’nti, kāle santeyeva ‘‘kālo natthī’’ti, appavāretvā ‘‘pavāritomhī’’ti, patte rajasmiṃ apatiteyeva ‘‘patita’’nti, attānaṃ uddissa macchamaṃse akateyeva ‘‘maṃ uddissa kata’’nti kukkuccāyati. Kukkuccāyitabbaṃ na kukkuccāyatīti kukkuccāyituṃ yuttaṃ na kukkuccāyati. Acchamaṃsaṃ labhitvā ‘‘sūkaramaṃsa’’nti na kukkuccāyati, ‘‘acchamaṃsa’’nti jānantopi ‘‘sūkaramaṃsa’’nti na kukkuccāyati, madditvā vītikkamatīti vuttaṃ hoti. Evaṃ dīpimaṃsaṃ migamaṃsanti…pe… attānaṃ uddissa macchamaṃse kate ‘‘maṃ uddissa kata’’nti na kukkuccāyatīti evamettha attho daṭṭhabbo. Aṭṭhakathāyaṃ pana ‘‘na kukkuccāyitabbanti saṅghabhogassa apaṭṭhapanaṃ avicāraṇaṃ na kukkuccāyitabbaṃ nāma, taṃ kukkuccāyati. Kukkuccāyitabbanti tasseva paṭṭhapanaṃ vicāraṇaṃ, taṃ na kukkuccāyatī’’ti ettakameva vuttaṃ. Tattha saṅghabhogassāti saṅghassa catupaccayaparibhogatthāya dinnakhettavatthutaḷākādikassa, tato uppannadhaññahiraññādikassa ca saṅghassa bhogassa. Apaṭṭhapananti asaṃvidahanaṃ. Tenāha ‘‘avicāraṇa’’nti. Tassevāti yathāvuttasseva saṅghabhogassa.
பா³லவக்³க³வண்ணனா நிட்டி²தா.
Bālavaggavaṇṇanā niṭṭhitā.
து³தியபண்ணாஸகங் நிட்டி²தங்.
Dutiyapaṇṇāsakaṃ niṭṭhitaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / (10) 5. பா³லவக்³கோ³ • (10) 5. Bālavaggo
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / (10) 5. பா³லவக்³க³வண்ணனா • (10) 5. Bālavaggavaṇṇanā
