| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
(১০) ৫. বালৰগ্গৰণ্ণনা
(10) 5. Bālavaggavaṇṇanā
৯৯. পঞ্চমস্স পঠমে অনাগতং ভারং ৰহতীতি ‘‘সম্মজ্জনী পদীপো চ, উদকং আসনেন চ, ছন্দপারিসুদ্ধিউতুক্খানং, ভিক্খুগণনা চ ওৰাদো, পাতিমোক্খং থেরভারোতি ৰুচ্চতী’’তি ইমং দসৰিধং থেরভারং নৰকো হুত্ৰা থেরেন অনজ্ঝিট্ঠো করোন্তো অনাগতং ভারং ৰহতি নাম। আগতং ভারং ন ৰহতীতি থেরো সমানো তমেৰ দসৰিধং ভারং অত্তনা ৰা অকরোন্তো পরং ৰা অসমাদপেন্তো আগতং ভারং ন ৰহতি নাম। দুতিযসুত্তেপি ইমিনাৰ নযেন অত্থো ৰেদিতব্বো।
99. Pañcamassa paṭhame anāgataṃ bhāraṃ vahatīti ‘‘sammajjanī padīpo ca, udakaṃ āsanena ca, chandapārisuddhiutukkhānaṃ, bhikkhugaṇanā ca ovādo, pātimokkhaṃ therabhāroti vuccatī’’ti imaṃ dasavidhaṃ therabhāraṃ navako hutvā therena anajjhiṭṭho karonto anāgataṃ bhāraṃ vahati nāma. Āgataṃ bhāraṃ na vahatīti thero samāno tameva dasavidhaṃ bhāraṃ attanā vā akaronto paraṃ vā asamādapento āgataṃ bhāraṃ na vahati nāma. Dutiyasuttepi imināva nayena attho veditabbo.
১০১. ততিযে অকপ্পিযে কপ্পিযসঞ্ঞীতি অকপ্পিযে সীহমংসাদিম্হি ‘‘কপ্পিযং ইদ’’ন্তি এৰংসঞ্ঞী। কপ্পিযে অকপ্পিযসঞ্ঞীতি কুম্ভীলমংসবিল়ারমংসাদিম্হি কপ্পিযে ‘‘অকপ্পিযং ইদ’’ন্তি এৰংসঞ্ঞী। চতুত্থং ৰুত্তনযেনেৰ ৰেদিতব্বং।
101. Tatiye akappiye kappiyasaññīti akappiye sīhamaṃsādimhi ‘‘kappiyaṃ ida’’nti evaṃsaññī. Kappiye akappiyasaññīti kumbhīlamaṃsabiḷāramaṃsādimhi kappiye ‘‘akappiyaṃ ida’’nti evaṃsaññī. Catutthaṃ vuttanayeneva veditabbaṃ.
১০৩. পঞ্চমে অনাপত্তিযা আপত্তিসঞ্ঞীতি আপুচ্ছিত্ৰা ভণ্ডকং ধোৰন্তস্স, পত্তং পচন্তস্স, কেসে ছিন্দন্তস্স, গামং পৰিসন্তস্সাতিআদীসু অনাপত্তি, তত্থ ‘‘আপত্তি অয’’ন্তি এৰংসঞ্ঞী। আপত্তিযা অনাপত্তিসঞ্ঞীতি তেসঞ্ঞেৰ ৰত্থূনং অনাপুচ্ছাকরণে আপত্তি, তত্থ ‘‘অনাপত্তী’’তি এৰংসঞ্ঞী। ছট্ঠেপি ৰুত্তনযেনেৰ অত্থো ৰেদিতব্বো। সত্তমাদীনি উত্তানত্থানেৰ।
103. Pañcame anāpattiyā āpattisaññīti āpucchitvā bhaṇḍakaṃ dhovantassa, pattaṃ pacantassa, kese chindantassa, gāmaṃ pavisantassātiādīsu anāpatti, tattha ‘‘āpatti aya’’nti evaṃsaññī. Āpattiyā anāpattisaññīti tesaññeva vatthūnaṃ anāpucchākaraṇe āpatti, tattha ‘‘anāpattī’’ti evaṃsaññī. Chaṭṭhepi vuttanayeneva attho veditabbo. Sattamādīni uttānatthāneva.
১০৯. একাদসমে আসৰাতি কিলেসা। ন কুক্কুচ্চাযিতব্বন্তি সঙ্ঘভোগস্স অপট্ঠপনং অৰিচারণং ন কুক্কুচ্চাযিতব্বং নাম, তং কুক্কুচ্চাযতি। কুক্কুচ্চাযিতব্বন্তি তস্সেৰ পট্ঠপনং ৰিচারণং, তং ন কুক্কুচ্চাযতি। দ্ৰাদসমাদীনি হেট্ঠা ৰুত্তনযেনেৰ ৰেদিতব্বানীতি।
109. Ekādasame āsavāti kilesā. Na kukkuccāyitabbanti saṅghabhogassa apaṭṭhapanaṃ avicāraṇaṃ na kukkuccāyitabbaṃ nāma, taṃ kukkuccāyati. Kukkuccāyitabbanti tasseva paṭṭhapanaṃ vicāraṇaṃ, taṃ na kukkuccāyati. Dvādasamādīni heṭṭhā vuttanayeneva veditabbānīti.
বালৰগ্গো পঞ্চমো।
Bālavaggo pañcamo.
দুতিযপণ্ণাসকং নিট্ঠিতং।
Dutiyapaṇṇāsakaṃ niṭṭhitaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / (১০) ৫. বালৰগ্গো • (10) 5. Bālavaggo
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / (১০) ৫. বালৰগ্গৰণ্ণনা • (10) 5. Bālavaggavaṇṇanā
